Zwela o Kidi ni Kuxila Kwoso

1. Ihi i twatokala kubhanga phala kubhanga mbandu ya mwiji wa Jihova?

KYOSO kitudijiya ni muthu Mbangi ya Jihova, kibhwidisu kimoxi kitwene mudibhanga kyenyiki: “Kyebhi ki weza mu kwijiya o kidi kya Mak’â Nzambi?” Sayi athu atambwijila kwila o jitata jâ ene a alongo o kidi kiki, amukwa amba kwila adilongo tu mivu kudima. Tutambwijila mu ukexilu yu mukonda o kidi kya Mak’â Nzambi kyendesa o mwenyu wetu woso. Twejiya we kwila tutena ngo kubhanga mbandu ya mwiji wa Jihova se tuzola o kidi ni ku kikumbidila ku mwenyu wetu. Ukexilu umoxi wa kubhanga kiki, o kuzwela o kidi ni kubhanga o ima mu kidi.—Jisá. 31:5.

2. (a) O athu ejidile ihi yalungu ni Jezú? (b) Ima yebhi yeji bhanga o athu mukonda dya kidi kyeji kwa bokela Jezú?

² O athu ejidile kwila mu ithangana yoso Jezú wexile muzwela o kidi, kate mwene o jinguma jê ejidile o maka enyá, sumbala sayi ithangana kawabhelele o ima yexile muzwela Jezú. (Mat. 22:16) Jezú wambe kiki yalungu ni ima yeji bhanga o athu mukonda dya kidi kyabokele mwene: “Ngeza phala kubhangesa kwila, o mon’a diyala udikwata ni tat’â, o mon’a muhatu ni mam’â, o mbalakaji ni ukow’ê.” (Mat. 10:35) Jezú kamesenene kwila o athu akala ni njinda mukonda dya njimbu yexile muboka mwene ni maxibulu mê, maji mwene wejidile kwila kiki kyeji bhita. (Mat. 23:37) Mwene wejidile we kwila sayi athu eji zola o kidi kya Bibidya, maji athu amukwa eji kizemba.—2 Te. 2:​9-11.

3. Ihi i twanda dilonga mu milongi yiyi?

³ Tubhanga nguzu phala kukayela o phangu ya Jezú mu kuzwela o kidi mu ithangana yoso, né mwene se o athu aluwala mba akala ni njinda. Twene we muboka ni kulonga o kidi kya Bibidya ku athu sumbala sayi yá akizembe. O kwila kiki kilombolola kuma twatokala kuboka o njimbu yambote sé kuxila o athu? Kana! Mu milongi yiyi, kya dyanga twanda tambwijila o kibhwidisu kiki: Kwebhi kututena kusanga o kidi kyalungu ni Jihova? Anga twanda tambwijila o kibhwidisu kya mukwa: Mukonda dyahi, kyebhi ni kwebhi kututena kuzwela o kidi kya Bibidya? O itambwijilu ya ibhwidisu yiyi yanda tukwatekesa kuzwela o kidi mu kithangana kyatokala ni kuxila kwoso.

KWEBHI KUTUTENA KUSANGA O KIDI KYALUNGU NI JIHOVA?

4. Mukonda dyahi twamba kwila Jihova mwéne o Fixi ya kidi?

⁴ Jihova mwéne o Fixi ya kidi. Yoso izwela mwene, ima ya kidi. Mu kifika, kyoso kyatutangela o ima yawabha ni ima yayibha, mwene uzwela o kidi. (Jisá. 19:9; 119:​142, 151) Kyoso kyazwela o ima yanda bhita ku hadya, yene idikumbidila. (Iza. 55:​10, 11) Mwene katange makutu. (Dya. 23:19) Mu kidi “Nzambi . . . katena kutanga makutu.” (Jih. 6:18) Mukonda dya kiki Jihova mwéne o “Nzambi ya kidi.”—Jisá. 31:5.

5. Mukonda dyahi ki kyabhonzo kwijiya o “Nzambi ya kidi”? (Ikalakalu 17:27)

⁵ Ki kyabhonzo kwijiya Jihova o “Nzambi ya kidi.” O ibhangelu yoso ilondekesa kwila kwene Nzambi. (Lom. 1:20) Kyoso poxolo Phawulu kyazwela ni jindongixi mu mbanza ya Atena, mwene wambe kwila Nzambi wamesena kwila tu “musanga” ni kwila “sé-ku muthu wa mukala dikanga.” (Tanga Ikalakalu 17:27.) Mu kidi, Jihova ubheka mu kilunga kyê athu alenduka amusota o kidi kyalungu ni mwene.—Nzw. 6:44.

6. O Bibidya izwela yalungu ni ihi, ni ujitu webhi watubhana Jihova?

⁶ Ukexilu umoxi wa kwijiya Jihova, o kudilonga o Bibidya. O mayala asoneka o Bibidya, Jihova mwéne wa atumu. (2 Ph. 1:​20, 21) Mu kidi tutena kudyelela kwila yoso yala mu Bibidya, ya kidi. Mu kifika tutena kudyelela kwila o ima izwela o Bibidya yalungu ni dimatekenu dya ngongo ni dimatekenu dya mwenyu mu ixi, ima ya kidi. (Dim. 1:​1, 26) Tutena we kudyelela kwila izwela o Bibidya yalungu ni kituxi ni kalunga, ima ya kidi. (Lom. 5:12; 6:23) O Bibidya yamba we kwila bhukaxi ka Mon’ê, Jihova wanda sasujula o kuyibha kwoso kwabheka Dyabhu, “o tata ya makutu.” Tutena kudyelela kwila o izwelu yiyi, ya kidi. (Nzw. 8:44; Lom. 16:20) Tuxikina kwila Jezú wanda bwika o athu ayibha, kufukununa o madifundu, kukitula o ixi Palayizu ni kutukwatekesa kukala tu athu ayuka. (Nzw. 11:​25, 26; 1 Nz. 3:8) Jihova watubhana ujitu wa dikota: Mwene watulongo o kidi kya Bibidya, yu watubhana o ujitu wa kulonga o kidi kiki ku athu.—Mat. 28:​19, 20.

MUKONDA DYAHI TUZWELA O KIDI?

7-8. Mukonda dyahi twatokala kuditonginina se mukonda dyahi tuzwela o kidi? Bhana phangu. (Máluku 3:​11, 12) (Tala we o jifoto.)

⁷ Kala kitwamono kya, phala kubhanga mbandu ku mwiji wa Jihova twatokala kuzwela o kidi. Maji phala Jihova, o kubhanga kiki ki kyasoko. Jihova wandala we kwila tuditonginina se mukonda dyahi tuzwela o kidi. Tala yabhiti ni Jezú kyoso kyexile mu ixi. (Tanga Máluku 3:​11, 12.) Sayi kizuwa mwene wexile muboka mu mbandu ya Kalunga ka Ngalileya, o athu amukondoloka phala kumwivwa. Mwaxaxi kâ mwexile athu akexile ni madimonyo. O athu yá afukamene Jezú, anga exile mudikola: “Eye u Mon’a Nzambi.” Mukonda dyahi o madimonyo azwela o kidi kyalungu ni Jezú? Nange ene amesenene kwila o athu exile mwa evwa a adyelela, mu kusuluka o madimonyo eji kwafunyisa phala kasidivile Jihova. O madimonyo azwela o kidi, maji kazwela phala kukwatekesa o athu kubheza Jihova. Kuma Jezú wejidile o maka enyá, kasangulukile ni ene, mu kiki wa atumu phala kaboke yalungu ni mwene.

⁸ O musoso yu utulonga ihi? Utulonga kwila Jihova wandala kuma tuditonginina se mukonda dyahi tuzwela o kidi. Mu kiki, twatokala kulonga o kidi ku athu mukonda twazolo Jihova. Se tumona kwila o athu amutufumanesa mukonda dya njimbu i twamwabokela, etu twatokala kufumanesa ngo Jihova!—Mat. 5:16; sokesa ni Ikalakalu 14:​12-15.

9. Ihi kitutokala ku kibhanga, ni mukonda dyahi?

⁹ Sayi kima kyamukwa kitena kubhangesa o athu kutufumanesa. Mu kifika, xinganeka kwila sayi phange wala ni ungana ututangela kikutu, anga o kikutu kiki tukitangela athu engi. Kyoso o athu kyanda kwijiya kwila o kima kyatutangela, kima kya kidi mwene, ene anda diwana, ya anda banza kwila etu twejiya ikutu yavulu. Kiki kitena kwabhangesa kutufumanesa, se kiki kibhita Jihova wanda luwala n’etu. (Jisa. 11:13) Mukonda dyahi? Mukonda etu kitwala ni ungana wa kuzwela o kima kyatutangela, o kyamukwá twazwela o kidi phala natufumanese ngo ku athu.

KYEBHI KI TUTENA KUZWELA O KIDI?

10. O Bibidya yamba kwila o kuzwela kwetu kwatokala kukala “kwa ujitu.” O izwelu yiyi ilombolola ihi? (Kolose 4:6)

¹⁰ Tanga Kolose 4:6. Poxolo Phawulu walembalesa o Jikidistá mu mbanza ya Kolose kwila o kuzwela kwetu kwatokala kukala “kwa ujitu.” Kiki kilombolola ihi? O izwelu yotumbule mu vélusu yiyi, mu dimi dya Ngeleku ilombolola kwila o kima kituzwela ki kyatokala kukwatekesa ngo akwetu, maji kyatokala we kukala izwelu ya henda.

11-12. Mukonda dyahi twatokala kuzwela o kidi kya Bibidya ni kuxila kwoso? Bhana phangu. (Tala we o jifoto.)

¹¹ Twatokala kukayela o kitendelesu kya Phawulu kyalungu ni kuzwela ni ujitu mba ni kuxila kwoso, kyoso kitulonga o kidi kya Bibidya ku athu. O Bibidya yamba kwila o kidi kitusanga-mu kyedi kala xibhata yatu, itena kutungula mwenyu ni nzumbi, kifwa o kidi kiki kilondekesa o ima yala moxi dyetu. (Jih. 4:12) Maji se kituzwela ni kuxila kwoso, tutena kuxinga o athu ni kudibhekela maka. Kiki kibhita kyebhi?

¹² Xinganeka kwila mu kikalakalu kya kuboka tusanga-mu muthu utubhana matwi. Mwene wene musamba ku iteka, ubhanga o fesa ya Natale kumoxi ni mwiji wê. Tutena kumulondekesa mu Bibidya kwila wowa, kubheza iteka kiyala ni mwenyu ni kwila o Natale, fesa yalungu ni ubhezelu wa makutu. (Iza. 44:​14-20; 2 Ko. 6:​14-17) Se tubhanga kiki mu veji ya dyanga, twanda zwela mwene o kidi, maji kitwanda zwela ni kuxila kwoso.

13. Ihi ilombolola ‘kutowalesa’ o izwelu yetu ni mongwa?

¹³ Phawulu wambe we kwila o izwelu yetu twatokala ku itowalesa ni mongwa. O kwila kiki kilondekesa kwila twatokala kusweka o kidi kya Bibidya mba kukibhilula? Kana! Mu kidi, mwene wexile muzwela kwila twatokala ‘kutowalesa’ o izwelu yetu phala o jingivwidi jetu jixikine o kidi kya Bibidya. (Jobe 12:11) Kiki kitena kubhonza. Xinganeka mu ima ibhita kyoso ki ulambela akwenu. Eye utena kubanza kwila se o mongwa mu kudya wawabha phal’eye, wawabha we phala akwenu. Kyene we kimoxi, tutena kubanza kwila o ukexilu wetu wa kuzwela wanda sangulukisa athu oso. O kibanzelu kiki kitondalu kyadikota. Mu kifika, sayi jixi o athu azwela o kidi sé jihonda, né mwene se amuzwela ni adyakime. Maji mu jixi ja mukwa o kubhanga kiki, ndaka yadikota. Phawulu wambe kwila twabhingi kwijiya ‘kyebhi ki tutena kutambwijila woso u tu ibhula kima.’ Kiki kilombolola kwila kitutokala kutowalesa o izwelu yetu kala kitwamesena mba kala kyene mubhanga o athu akwa ixi yetu, maji twatokala ku itowalesa kala kyamesena o jingivwidi jetu.

MU KITHANGANA KYEBHI KI TWATOKALA KUZWELA O KIDI?

14. Mukonda dyahi Jezú kexile mulonga ku maxibulu mê o ima yoso yejidile mwene?

¹⁴ Mu ithangana yoso Jezú wexile muzwela ni maxibulu mê ni kuxila kwoso, yu wexile mwalonga ima yavulu. (Mál. 6:34) Maji kwexile hanji ima yavulu yatokalele kudilonga o maxibulu mê. Jezú kexile mwalonga o ima yoso yejidile mwene. Mwene wejidile kwila sayi ima o maxibulu mê keji tena luwa ku itetuluka ni kwila kyokyo ki kyexile hanji o kithangana phala kwalonga o ima yiyi. (Nzw. 16:12) Kiki kitulonga ihi?

15. O kwila twatokala kulonga ku maxibulu metu o ima yoso i twejiya mu kithangana kimoxi? Jimbulula. (Jisabhu 25:11) (Tala we o foto.)

¹⁵ Kyebhi kitutena kukayela o phangu ya Jezú? O phangu ya Jezú itulonga kwila, o kwijiya o kidi ki kilombolola kwila twanda zwela ku maxibulu metu yoso i twejiya mu kithangana kimoxi. Twatokala kuxinganeka o mwenyu wa athu u twamwalonga o Bibidya. Lwamukwa dingi, xinganeka mu kifika kya mukwa dibhata wene mubhanga o fesa ya Natale kumoxi ni mwiji wê. Etu twejiya kwila o fesa yiyi yalungu ni ubhezelu wa jinzambi ja makutu. Maji xinganeka kwila eye wamateka kudilonga o Bibidya ni muthu yu semana jiyadi ande dya Natale. Se eye umujimbulula kya izwela o Bibidya yalungu ni fesa ya Natale ni kwila mwene katokala kubhanga o fesa yiyi, o kwila mwene wanda sanguluka? Kana! Kidi kwila sayi maxibulu akumbidila o itendelesu ya Bibidya ni lusolo, maji amukwa abhinga hanji kithangana kyavulu. Mu kiki, phala o maxibulu metu kukula mu nzumbi, ene abhingi kwijiya o ima yatokala kubhanga mu kithangana kyatokala.—Tanga Jisabhu 25:11.

16. Kyebhi kitutena kukwatekesa o maxibulu metu kukolokota “mukwenda mu kidi”?

¹⁶ Tusanguluka kyavulu kyoso kitukwatekesa o maxibulu metu kwijiya o kidi kyalungu ni Jihova. Phala kwakwatekesa kukolokota “mukwenda mu kidi”, twatokala kwabhana phangu yambote. (3 Nz. 3, 4) Bhukaxi ka ibhangelu yetu, tu alondekesa kwila etu tudyelela mu ikanenu yala mu Mak’â Nzambi. Tuzwela o kidi mu ukexilu watokala, mu kithangana kyatokala ni mu ukexilu ubhangesa o athu kuximana ni kufumanesa Jihova. Se tubhanga kiki, twanda londekesa kwila tusidivila Jihova, o “Nzambi ya kidi.”