Eie ua Kijidile?
O kuila m’ukulu kuexile muene athu akexile mu kuna jimbundu ja iangu mu mábhia a akuá?
Kopia ia divulu Digesto, dia sonekene o Nguvulu Justiniano, io bhange ku muvu ua 1468. O divulu didi, dia zuela ima iavulu ia lungu ni itumu ia bhangele m’ukulu. Maji kuene dingi madivulu amukuá, alondekesa ué o kidi kiki
MU DIVULU dia Matesu 13:24-26, Jezú uambe: “Utuminu ua Diulu ua difangana ni muthu u kuua jimbutu jambote mu díbhia diê. Kioso-phe kiai athu ku kilu, nguma iê uiza, mu jimbutu jambote anga u kuua-mu jimbundu ja iangu, iu uaiê. O kia sabhuka jimbutu, hé ji mateka kuima, ku moneka dingi ni jimbudu ja iangu.” Saí athu a tokuesa o milongi ia Bibidia, ka xikina kuila, o kifika kia tele Jezú, kia lungu ni ima ia kexile mu bhita m’ukulu. Maji saí madukumendu a Loma o soneke m’ukulu, alondekesa kuila, o ima íii ia kexile mu bhita.
Saí divulu dia zuela kuila, o kitumu kia Loma kia zuelele kuila, o kukuna o jimbundu ja iangu mu dibhia dia muthu, phala ku mu vutula phonzo, kiexile kituxi. Se a bhangele o kitumu kiki, kilombolola kuila, akexile mu bhanga muene o ima ienióio. Alastair Kerr, mukuá kutokuesa o itumu iokulu, uambe kuila, ku muvu ua 533, mu kithangana kia Kristu, Justiniano, o Nguvulu ia Loma, ua soneka madivulu avulu a lungu ni kitumu kia Loma. O madivulu oso a soneka, a a bhana o dijina dia Digesto. Mu madivulu iá, a tumbula-mu o izuelu ia athu ejiidile kiambote o itumu, akexile ku muenhu ku muvu ua 100-250 mu kithangana kia Kristu. O divulu Digesto di zuela kuila, Ulpian, ua kexile ué bhu kaxi ka athu iá ejidile kiambote o kitumu. O diiala didi, dia zuela ia lungu ni muthu ua kunine jimbundu ja iangu mu dibhia dia ngene, anga u buika o idima ioso. O ima íii ia bhiti ku hama ia kaiadi. O madivulu a zuela ué kuila, o muthu ua buika o idima ia ngene ua tokalele kubhana kitadi, phala kufuta o idima ia buika.
O ima íii, ilondekesa kuila, m’ukulu, saí athu akexile mu kuna o jimbundu ja iangu mu mábhia a akuá kala kia zuela Jezú.