Bhana Kijingu ku Muthu ua Tokala

1. Mukonda diahi sai athu a bhingi ku a jingisa, ni ihi i tua-nda dilonga?

KIEBHI ki tu jingisa akuetu? Tu bhanga kiki, mu ku a talatala kiambote ni ku a xila. Tuene mu jingisa o athu a bhange kima kia katunda, mba ió ene mu bhanga ikalakalu ia katunda mba ala ni maungana. Mu milongi iii, tua-nda dilonga se a nanhi u tua tokala ku a jingisa ni mukonda diahi.

2, 3. (a) Mukonda diahi Jihova ua fuama dingi ku mu jingisa? (Tala o foto ia dianga.) (b) Nanhi o Kambudi a mu tange mu divulu dia Dijingunuinu 5:13, ni mukonda diahi ua fuama kutambula kijingu?

² O divulu dia Dijingunuinu 5:13, dizuela kuila, o “Ió ua xikama bhu kiandu,” ni “Kambudi,” a fuama kutambula kijingu. O “ua xikama bhu kiandu,” Jihova. Mu divulu dia Dijingunuinu kibatulu kia 4, o an’a Nzambi a tu londekesa se mukonda diahi Jihova, ió “uene ni muenhu uê mu mivu ia kambe dizubhilu,” ua fuama ku mu jingisa. Ene a zuela: “Eie u Ngana ietu, Nzambi ietu! Kia ku fuama o kutambula fuma, ni ujitu ni unéne. Mukonda é’Muène ua bhanga ioso, o vondadi ié iene ia i bhangesa kuiza-ku . . . íi iala-ku.”​—Dijingunuinu 4:9, 11.

³ O “Kambudi” mu divulu dia Dijingunuinu 5:13, Jezú Kristu. Kiebhi ki tuejiia o maka enhá? Kioso Jezú kiexile mu ixi, akexile ku muixana kala o “Kambudi ka Nzambi, ka katula o ituxi ia mundu.” (Nzuá 1:29) O kuila sai dingi sobha iéngi, ua xikina kufua phala kubhulula o mundu uê? Sé phata, kiki kima ki bhangesa ku mu ximana. Jezú ua fuama ku mu jingisa, mukonda muéne o “Ngana ia jingana, Sobha ia jisobha.” (Dijingunuinu 17:14) Nange eie u divua ue kala o mazunda a an’a Nzambi embi, exi: “Kambudi a mu jibhile, kia mu fuama ku tambula o unéne ni umvuama, ni unjimu, ni uzonda, ni ujitu, ni fuma ni diximanu.”​—Dijingunuinu 5:12.

4. Mukonda diahi unjimu ku jingisa Jihova ni Kristu?

⁴ O divulu dia Nzuá 5:22, 23, dizuela kuila, Jihova ua bhana kua Kristu, o kikalakalu kia kufundisa o athu. Kiki, kima kia mukuá ki tu bhangesa kubhana kijingu kua Jezú. Kioso ki tu bhanga kiki, tu bhana ue kijingu kua Jihova. Se tu sola ku jingisa Jezú ni Tat’ê, tua-nda tambula o muenhu ua kalelaku.​—Tanga Jisálamu 2:11, 12.

5. Mukonda diahi athu oso a bhingi ku a jingisa, ni kua xila?

⁵ O athu a a bhange “mu kidifuanganu” kia Nzambi. (Dimatekenu 1:27) Kiki kilondekesa kuila, o athu ala ni mauhete, ni idifua ia difu ni ia Nzambi. Mu kifika, o athu a tena kulondekesa henda, ni kubhanga o mbote ku akuâ. O athu a a bhange ni kitongoluelu, o ujitu ua kuijiia kiauabha ni kiaiibha, ni ua kuijiia o ima ia kidi, ni ia makutu. (Loma 2:14, 15) Athu avulu a uabhela o ima ia zele ni ia iuka. Ene a mesena kudibhana kiambote ni akuâ. Maji ki tu diuana mu kumona o ima iii, mukonda Jihova Nzambi, mukua kuiuka ni kutululuka. Mu kidi, o athu oso a a bhange ni uhete ua kukaiela o idifua ia Jihova mu maukexilu uoso. Mukonda dia kiki, ene a bhingi ue ku a jingisa, ni ku a xila.​—Jisálamu 8:5.

BHANA KIJINGU MU UKEXILU UA TOKALA

6, 7. Mu ukexilu uebhi o Jimbangi ja Jihova ka difu ni athu engi, mu ku jingisa akuâ?

⁶ Tuejiia kuila, sai athu a bhingi ue ku a jingisa mba ku a ximana. Maji nange ki tena kubhonza kutungula, se kiebhi ki tua tokala ku a jingisa mba ku a ximana. Kiki ki bhita mukonda, o athu ene mu a fuinhisa kua Satanaji ni mundu iú uaiibha. Avulu ene mu bheza athu. Mu veji dia ku a ximana kala kia mesena Jihova, o athu a a jingisa kiavulu, mu ku a talatala kala jinzambi. Nange a kaiela o uendelu ni ukexilu ua kuzuata ua jinguvulu, atuameni a jingeleja, akua ku jokala, akua kubhanga jifilme, ni athu a mukuá a fuma.

⁷ O Jikidistá ja kidi ejiia kuila, ka tokala ku jingisa o athu mu ukexilu iú. Jezú muéne ngó ua tu xila o phangu ia iuka phala o athu ku i kaiela. (1 Phetele 2:21) Tua tokala kulembalala kuila, o athu “oso ituxi a i te, a bhondalala, o bhu fuma ia Nzambi, i bhulula, ka tena-bhu.” (Loma 3:23) Sé-ku muthu ua fuama ku mu bheza. Kioso ki tu jingisa kiavulu o athu, Jihova u luuala.

8, 9. (a) Kiebhi o Jimbangi ja Jihova kia mona o jinguvulu? (b) Mu kithangana kiebhi ki tu xikina kubelesela o jinguvulu?

⁸ Sai athu a fuama kutambula kijingu ni ku a xila, mukonda ala ni maungana. Mu kifika, xinganeka o kikalakalu kiene mu bhanga o jinguvulu phala o mbote ié. Ene a kuatekesa o madiembu metu kukala ni kutuluka, a langa ue o ibhindamu ia athu. Tu katula mbote iavulu ku ikalakalu iâ. Poxolo Phaulu ua zuela kuila, tua tokala kumona o jinguvulu jiji, kala “maungana.” Muene ua zuela ue kuila, tua tokala kukaiela o itumu iâ. Muene uambe: “Bhanenu-phe kua ene oso kioso ki mua tokala ku a bhana: Lubhaku kua ió ua tokala o lubhaku,” ni “ujitu kua ió ua tokala o ujitu.”​—Loma 13:1, 7.

⁹ Kuma tu Jimbangi ja Jihova, tu bhanga ioso i tu tena phala kuxila o jinguvulu. Mu kidi, o jixi joso ki jala ni itumu imoxi. Mu kiki, o ima ia mesena o jinguvulu mu ixi ietu, ki iene i mesena o jinguvulu ja jixi jengi. Mukonda dia kiki, tuene mu belesela o jinguvulu kioso kia bhanga o ikalakalu iâ. Maji se a tu bhinga phala kubhanga kima kia-nda tu bhangesa kubhukumukina o itumu ia Jihova, ki tu xikina ku ki bhanga. Se kiki ki bhita, tu sota ku jingisa Jihova mu veji dia athu.​—Tanga 1 Phetele 2:13-17.

10. Kiebhi o jiselevende ja Jihova jo’ukulu, ja bhanene phangu iambote phala etu?

¹⁰ Tu tena kudilonga mu phangu ia jiselevende ja Jihova jo’ukulu, a ximanene o jinguvulu. Zuze ni Madiia a tu xila phangu iambote. Kioso o akua Loma kia mesenene kuijiia se athu akuxi a tungile mu ixi, Zuze ni Madiia endele katé mu ixi ia Beleme phala ku di soneka, sumbala kua kambele kia ngó phala Madiia kuvuala. (Luka 2:1-5) Poxolo Phaulu ua bhana ue phangu iambote ia ku xila o jinguvulu. Kioso kia mu tatele kuila, ua bhangele kima kiaiibha, ni kuxila kuoso, muene ua londekesa kuila kexile ni kikuma. Muene ua bhange kiki bhu pholo ia Sobha Helode Ngilipa, ni Festu, o nguvulu ia mbanza ia Judeia, ia tokalele mu ixi ia Loma.​—Ikalakalu 25:1-12; 26:1-3.

11, 12. (a) Mukonda diahi ki tu tokala kubhana kijingu kia katunda ku atuameni a jingeleja? (b) Ihi ia bhiti kioso o phange mukua Áustria, ua xila o nguvulu?

¹¹ Ihi i tuamba ia lungu ni atuameni a jingeleja? O kuila tua tokala ku a jingisa? Tua tokala ku a kijingisa kala ki tuene mu bhanga ni athu amukuá. Maji ki tu tokala ku a jingisa mu ukexilu ua katunda, né muene se ene a mesena mba a uabhela kutambula kijingu. Mukonda diahi? Mukonda o jingeleja ja makutu, ki jene mu longa o kidi kia lungu ni Nzambi ni Maka mê, o Bibidia. Jezú ua bazela o jimesene ja jingeleja ja makutu. Muene uambe kuila, ene exile akua mangonha, atuameni aiibha. (Matesu 23:23, 24) Maji ki kima kiaiibha kuxila ni kuximana o jinguvulu ni akalakadi. Mukonda dia kubhanga kiki, sai ithangana, ene mu tu kuatekesa.

¹² Mu kifika, sai nguvulu a muixana, Heinrich Gleissner, ua tokala ku ixi ia Áus-tria, ua bhange kiki. Mu kithangana kia Ita ia Kaiiadi ia Bhiti ku Mundu Uoso, a mu kuatele ku masoladi a Nazista. Kioso kia mu te mu komboio phala ku muambata mu kibende, muene ua di sange ni Leopold Engleitner, Mbangi ia Jihova mukua Áus-tria. Ni kuxila kuoso, phange Engleitner ua zuela-né ia lungu ni kixikanu kiê. O nguvulu uevu ni muanhu uoso. Kioso kiabhu o ita, o nguvulu Gleissner, ua kuatekesa kiavulu o Jimbangi ja Jihova mu ixi ia Áustria. Nange eie uejiia misoso ia mukuá, ia lungu ni ima iambote ia bhiti, mukonda dia Jikidistá ku xila o jinguvulu.

BHANA KIJINGU KU AKUENU

13. A nanhi a fuama ku a ximana ni ku a xila? Mukonda diahi?

¹³ O jiphange jetu joso a fuama kua bhana kijingu ni kua xila. Benge-benge o jiphange jala, ku pholo kala o tufunga mu ilunga, tufunga tua ilunga, Kibuka Kia Filiiale, ni Kibuka Kia Utuminu. (Tanga 1 Timote 5:17.) O athu oso iá, a langa o ibhindamu ia mundu ua Nzambi. Mukonda dia kiki, o Bibidia i zuela kuila, o maiala iá, “maujitu” a Nzambi. (Efezo 4:8) Kiki kilondekesa kuila, tua tokala muene ku a jingisa, ni ku a xila. Tua tokala kubhanga kiki, né muene se ene a tokala mu jixi jéngi, se a dilongo kiavulu mba kana, se jimvuama mba kana. O Jikidistá ja dianga, a tu xila phangu iambote. Ene akexile mu xila o maiala akexile ku pholo, kiene ue ki tua tokala kubhanga lelu. Kioso ki tu kala ni athu iâ, ki tu tokala ku a talatala kala jianju mba athu a fuma. Maji tu a xila ni ku a ximana, mukonda dia ku kalakala kiavulu, ni kulenduka kuâ.​—Tanga 2 Kolindo 1:24; Dijingunuinu 19:10.

14, 15. Mu ukexilu uebhi o tufunga tua kilunga ka difu ni atuameni a jingeleja?

¹⁴ O tufunga ala kala abhidi a lenduka. Ene ka mesena kuila, a a mona kala athu a fuma. Mukonda dia kiki, ene ka difu ni atuameni a jingeleja ja lelu, ni atuameni a jingeleja mu izuua ia Jezú. Muene ua zuela ia lungu ni ene: “A zola ididi ioso ia beta kuiuka mu jifesa, ni ibhuna ia ukota mu jinzu ja kusambela Nzambi. A uabhela ue ku a menekena ni ujitu bhu itanda kuala athu.”​—Matesu 23:6, 7.

¹⁵ O tufunga mu ilunga ene mu belesela o izuelu ia Jezú, kioso kiambe: “Enu-phe kana ku m’ila Mesene. Kuma sai Mesene ienu imoxi, enu oso mu jiphange. Ki mu ile muthu mu ngongo, Tata, kuma sai Tata ienu imoxi, uene mu diulu. Kana ku m’ila ue Jingana, kuma sai Ngana ienu imoxi, muène Kristu. Uoso-phe dikota mudienu, a kale ngàmba ienu. Uoso u di zangeleka, a kà mu tululula; ni ió uoso u di tolesa, a kà mu zangeleka.” (Matesu 23:8-12) Se o tufunga ku mundu uoso a londekesa o kulenduka, ni kubelesela o izuelu ia Jezú, o jiphange mu kilunga a-nda ku a zola, ku a xila, ni ku a jingisa.

16. Mukonda diahi tua tokala kubhanga nguzu, phala ku jingisa akuetu?

¹⁶ Nange ku bhinga kithangana phala kuijiia kiebhi ki tua tokala ku jingisa akuetu. Kiki, kiene kia bhitile ni Jikidistá ja dianga. (Ikalakalu 10:22-26; 3 Nzuá 9, 10) Maji kima kiambote kubhanga nguzu. Se tu sota ku jingisa akuetu kala kia mesena Jihova, tua-nda tambula mabesá avulu.

MABESÁ EJILA MU KUXILA O ATHU

17. Mabesá ebhi ejila mu ku xila o athu ala ni maungana?

¹⁷ Kioso ki tu jingisa ni kuxila o athu ala ni maungana mu madiembu metu, nange ku hádia ene a tena ku zokela o sidivisu ietu ia kuboka. Ene a tena kumona o sidivisu ietu mu ukexilu uambote. Kiki kiene kia bhitile ni phang’ietu muboki ua thembu ioso mu ixi ia Alemanha, a mu ixana Birgit. Kioso mon’ê kia zubha o xikola, muene uai mu xikola phala ku mu tala. O jimesene a zuela kua Birgit kuila, a sangulukile kiavulu mu ku longa o tuana tua Jimbangi ja Jihova. O jimesene a mono kuila, o tuana tua Jimbangi ja Jihova, a bhekesa kutululuka mu xikola. Birgit ua a tangela uixi: “Tuene mu longa o tuana tuetu ku kaiela o itumu ia Nzambi. Kubhanga kiki, kubhinga ue kubelesela ni kuxila o jimesene mu xikola.” Sai mulongexi mba mesene uambe kuila, se o tuana tuoso tuexile kala o Jimbangi ja Jihova, ki kieji bhonza ku a longa. Ene akexile mu mona o tuana tua Jimbangi ja Jihova mu ukexilu uambote. Mukonda dia kiki, mu kubhita ji semana, sai mesene, uai mu kiônge kietu kia dikota.

18, 19. Kiebhi ki tua tokala kutalatala o tufunga?

¹⁸ O ijila i tu sanga mu Mak’â Nzambi, i tena ku tu kuatekesa kutendela se kiebhi ki tua tokala kuxila o tufunga mu ilunga. (Tanga Jihebeleu 13:7, 17.) Tua tokala ku a ximana, mukonda ene a kalakala kiavulu. Se tu belesela o itendelesu ia tufunga, tua-nda ku a kuatekesa kusidivila ni kisangusangu. O Bibidia i zuela kuila, etu tua tokala ue kukaiela o kixikanu kiâ. Maji ki kilombolola kuila, tua tokala kukaiela o ukexilu uâ ua kuzuata, ua kuzuela, ni ua kulonga. O kubhanga kiki, kua-nda londekesa kuila, etu tua mu kaiela athu, mu veji dia kukaiela Kristu. Ki tu tokala kujimba kuila, o tufunga akua ituxi uâ, kala etu.

¹⁹ Mu kidi, kioso ki tu jingisa ni kuxila o tufunga, mu veji dia ku a talatala kala athu a fuma, tu a kuatekesa. Kiki ki bhita kiebhi? Kioso ki tu bhanga kiki, tu a kuatekesa kulondekesa o ukexilu ua kulenduka, ni ku kamba kubanza kuila, ene a beta-o-kota, akuâ ndenge. Ene ka-nda banza ue kuila, o ima ia bhanga, iene ngó ia uabha.

20. Mbote iebhi i tu katula, kioso ki tu xila mba tu jingisa akuetu?

²⁰ O kuxila akuetu, kua-nda tu kuatekesa kulenga o ukumbu. Kua-nda tu kuatekesa ue kulondekesa o kulenduka, kioso akuetu kia tu bhana itendelesu. Ku tu langa ue, mukonda ku tu kuatekesa ku kamba kuzoza, se muthu tu mu xila kiavulu u bhanga kima ki tu luualesa, mba u ta kituxi. O kuxila akuetu, ku tu kuatekesa ue kukala kumoxi ni kilunga kia Jihova. O kilunga kia Jihova, ki kiene mu bhana kijingu kia katunda ku muthu uoso-uoso mu ixi, kikale Mbangi ia Jihova mba kana.

21. Mbote iebhi ia beta-o-kota, i tu katula kioso ki tu ximana akuetu?

²¹ O mbote ia dikota ijila mu ku jingisa akuetu, o kuijiia kuila, o kubhanga kiki, ku sangulukisa Nzambi. Mu kubhanga kiki, tua mu mu belesela, ni kukolokota mu ufiiele uetu kua muene. Mu kiki, Jihova ua-nda tena kutambuijila Satanaji, ua zuela kuila, sé-ku muthu u tena kukolokota fiiele. (Jisabhu 27:11) Athu avulu ku mundu, kejiia kiebhi kia tena ku jingisa akuâ mu ukexilu ua tokala. Tu sakidila kiavulu, mukonda tuejiia ku jingisa o athu mu ukexilu ua mesena Jihova!