Atangi a Madivulu Metu Ebhula
Mukonda diahi o musoso ua soneka Matesu ua lungu ni ima ia bhiti ande dia uvualelu ua Jezú, ki u difu ni ua soneka Luka?
O musoso ua soneka Matesu ua lungu ni ima ia bhiti ande dia uvualelu ua Jezú, ki u difu ni ua soneka Luka. Mukonda, kiiadi kiâ ka zuela ia lungu ni muthu umoxi.
O divulu dia Matesu, dia jimbulula o ima ia bhiti ni Zuze. O divulu didi di jimbulula kiebhi kia divu Zuze kioso kia mu tangela kuila Madiia uemita, kiebhi o anju kia jimbulula o maka iâ mu nzoji, ni kiebhi muene kia kaiela o itendelesu ia anju. (Matesu 1:19-25) O divulu dia Matesu, di jimbulula ue kiebhi o anju kia dimuna Zuze phala ku lengela ku Ijitu ni muiji uê, ni kiebhi muene kia belesela o kitendelesu. Mu ku suluka, Zuze ua loto nzoji iamukuá. Mu nzoji iii, o anju ia mu tangela phala ku vutuka ku ixi ia Izalaiele. Kioso kia vutuka, muene ua solo ku tunga ni muiji uê mu Nazalé. (Matesu 2:13, 14, 19-23) Mu kibatulu kia dianga ni kia kaiadi kia divulu dia Matesu, muene u tumbula o dijina dia Zuze mu sambuadi dia veji, maji o dijina dia Madiia u di tumbula ngó veji jiuana.
Maji, o divulu dia Luka di jimbulula dingi ia bhiti ni Madiia. Luka u jimbulula kioso o anju Ngabidiiele kia zuela ni Madiia, kioso Madiia kiai mu kunda ndandu iê Nzebele, ni kioso Madiia kia ximana Jihova mu musambu. (Luka 1:26-56) O musoso ua Luka u jimbulula ue ia zuela Ximinhá ia lungu ni hadi ieji tala Jezú. Mu suluka, Luka u zuela o kithangana kiai Jezú mu tembulu ni muiji uê, kiexile ni 12 kia mivu. Mu kithangana kiki, Luka ua soneka o izuelu ia Madiia, kana ia Zuze. Luka ua londekesa kuila, Madiia ua thandanganhele ni izulukutu iii. (Luka 2:19, 34, 35, 48, 51) Mu kibatulu kia dianga ni kia kaiiadi, o dijina dia Madiia di moneka 17 dia ji veji, o dia Zuze 5 kia ji veji. Mu kiki-phe, Matesu u tu tangela dingi ia lungu ni ixinganeku ni ibhangelu ia Zuze, o ku mbandu iengi, Luka u tu tangela dingi ia lungu ni ibhangelu ia Madiia.
Mu madivulu a iadi iá, o majina a muiji ua Jezú a a soneka mu maukexilu ki u difu. Matesu u londekesa dingi o muiji ua Zuze, phala ku londekesa kuila, Jezú mon’a Zuze, ua tundile ku mbutu ia Davidi, mu kiki, o ungana ua Davidi ua mu tokalele. Mukonda diahi? Mukonda Zuze ua tundile ku mbutu ia sobha Davidi, bhu kaxi ka Solomá, mon’a Davidi. (Matesu 1:6, 16) Maji Luka, ua soneka o muiji ua Madiia, phala ku londekesa kuila, “mu kidifua kia muthu,” Jezú o ungana ua Davidi ua mu tokalele. (Loma 1:3) Mukonda diahi? Mukonda Madiia ua tundile ku mbutu ia sobha Davidi, bhu kaxi ka Natane mona Davidi. (Luka 3:31) Maji, mukonda diahi Luka ka tumbula kuila Madiia uexile mona Heli? Kiki kia bhiti mukonda, mu majina a miji, akexile mu tumbula ngó o maiala o ahatu kana. Kienhiki, kioso Luka kiambe kuila Zuze uexile mona a Heli, muene ua kexile mu zuela kuila, Zuze uexile holome a Heli.—Luka 3:23.
O majina a muiji ua Jezú a moneka mu madivulu a Matesu ni Luka, a londekesa kuila Jezú muéne o Mexiia a mu kanene kuala Nzambi. Katé muene o Jifalizeu ni Jisaduseu a xikinine kuila Jezu ua tundile ku mbutu ia Sobha Davidi. Oso a kijidile. O ia soneka Matesu ni Luka, ia lungu ni muiji ua Jezú i kolesa kixikanu kietu, i tu kuatekesa ku dielela kuila ioso ia kanena Nzambi ia-nda dikumbidila.