Eie ua Kijidile?

Mukonda diahi Jezú ua zembele o kifua kia kuloka?

O KITUMU kia Mozé ki kia fidisile o athu kuloka. Mu kuloka o athu a kexile mu zuela: “Ngi loka mu dijina dia Nzambi,” mba “ngi loka muene mu dijina dia Jihova.” Maji mu izuua ia Jezú, o athu a uabhelele kiavulu o kuloka. O Jijudé akexile mu loka mu kima kioso-kioso. Ene akexile mu bhanga kiki, phala kulondekesa kuila, akexile mu zuela o kidi, maji mu ithangana iiadi, Jezú ua londekesa kuila, kiki kima kiaiibha. Muene uambe: “O kudikunda kuenu-phe ku kale kua kuila: Kiene, kiene; kana, kana.”​—Matesu 5:33-37; 23:16-22.

O Dicionário Teológico do Novo Testamento, di zuela kuila, o divulu dia Jijudé a di xana Talmude di tu kuatekesa kumona kuila, o Jijudé exile ni kifua kia kuloka, mba kufisala kuila a mu zuela kidi. O divulu didi dilondekesa kuila, sai iloko ia bhingile muene ku i kumbidila, ia mukuá kana.

Jezú ki muene ngó ua fidisa o ukexilu ua kuloka. Mu kifika, o mukua musoso Flávio Josefo, ua soneka ia lungu ni kibuka kia athu mu Izalaiele, akexile mu ku dituna ue o ukexilu ua kuloka. O kibuka kiki, akexile mu zuela kuila, o kuloka kua betele kota mu ku iibha o ku tanga o makutu ndenge. Ene ue a banzele kuila, se muthu u bhinga kuloka phala akuâ n’a mu xikina, muthu ió mukua makutu. Sai divulu dia Jijudé a dixana Eclesiástico (23:11), diamba: “O muthu uala ni kifua kia kuloka, muthu ua bolo muxima.” Jezú ua fidisa o kifua kia kuloka mu ima ia ki ngoho. Se tu zuela o kidi izuua ioso, ki tua-nda bhinga kuloka phala athu n’a tu xikina.