Mulangidi KIDIDI KYA KUBHAKA MADIVULU MU INTERNETE
Mulangidi
KIDIDI KYA KUBHAKA MADIVULU MU INTERNETE
Kimbundu
  • BIBIDYA
  • MADIVULU
  • YÔNGE
  • w17 Mbeji Ia Kamoxi jimb. 9-14
  • O Kuila Jihova Muene o Dilengelu Dié?

O vidyu iwasolo seku luwa.

Tuloloke, kwamoneka kibhidi mu kujikula o vidyu.

  • O Kuila Jihova Muene o Dilengelu Dié?
  • O Mulangidi U Bhana Ngolokela ia Utuminu Ua Jihova (Phala ku di Longa)—2017
  • Tudyambu
  • Milongi Yadifu
  • ‘SOLENU JIMBONGE JA KULENGELA’
  • MUENE UA TOKALA KU “TANGA O MULONGA UÊ” KU TUFUNGA
  • ‘MUENE UA TOKALA KULENGELA KU JIMBONGE’
  • ‘O JIMBONGE JI KALE DILENGELU PHALA ENU’
  • Kaiela o Phangu ia Jihova ia Kuloloka ni Kufundisa ni Kuiuka
    O Mulangidi U Bhana Ngolokela ia Utuminu Ua Jihova (Phala ku di Longa)—2017
  • “Mu Dielela O Dijina Dia Jihova”
    O Mulangidi—2011
  • Lengela Kwa Jihova
    Ukexilu ua Ukidistá ni Ukunji Uetu—Milongi Phala o Iônge—2021
O Mulangidi U Bhana Ngolokela ia Utuminu Ua Jihova (Phala ku di Longa)—2017
w17 Mbeji Ia Kamoxi jimb. 9-14
Muthu ua jibha mukuá sé ku ki mesena, u bhixila mu mbonge ia kulengela

O Kuila Jihova Muene o Dilengelu Dié?

“Jihova-phe u tambula konda ia muenhu ua jiselevende jê; kana muthu u sekala ua mu dielela muene.”​—JISÁLAMU 34:22.

MIMBU: 49, 32

O KUKALA NI JIMBONGE JA KU LENGELA MU IZALAIELE, I TU LONGA IHI IA LUNGU NI . . .

  • tufunga kukuatekesa phange ua te kituxi kia dikota?

  • ima i tua tokala kubhanga phala kutambula o muloloki ua Nzambi?

  • Jihova ku loloka ni muxima uoso?

1. Kiebhi kiene mu divua jiselevende javulu ja Nzambi, mukonda dia kituxi kia tele?

POXOLO Phaulu ua soneka: “Kokolo diami dia kuxixima kiki!” (Loma 7:24) Mu izuua ietu, jiselevende javulu ja Jihova, a divuua kála kia divuile Phaulu. Mukonda diahi? Mukonda etu enioso tu akuâ ituxi. Mu ithangana iavulu, tu bhanga ima ia zembe Jihova. Kiki, ki tu luualesa kiavulu. Sai jiphange a tele ituxi, akexile mu divuua kuila, Jihova keji kua loloka dingi.

2. (a) Kiebhi o divulu dia Jisálamu 34:22 dilondekesa kuila, o jiselevende ja Nzambi ka bhingi kukala ni kikote ku muxima? (b) Ihi i tua-nda dilonga mu milongi íii? (Tala o kaxa “Ihi i tu Tena Kudilonga?”)

2 O Mikanda ikola i tu tangela kuila, se tu lengela kua Jihova, ki tua-nda kala ni kikote ku muxima mukonda dia kituxi ki tua tele m’ukulu. (Tanga Jisálamu 34:22.) Maji ihi ilombolola o kulengela kua Jihova? Ihi i tua bhingi o kubhanga phala kutambula o muloloki ni henda ia Jihova? Tu tena kusanga o itambuijilu ia ibhuidisu iii, mu kudilonga ia lungu ni jimbonge mba jimbanza ja kulengela jexile mu izuua ia akua Izalaiele. O Kitumu kia Mozé kia suínisine kutunga o jimbanza jenhojo. Maji o kitumu kiki, a ki bhinganesa mu Pendekoxi ia muvu ua 33. Tuejiia kuila, Jihova muene ua bhanene o Kitumu. Mukonda dia kiki, mu kubhana o jimbanza ja kulengela, tu tena kudilonga kiebhi Jihova kia mona o ituxi, o muthu u ta o kituxi, ni kiebhi kia mona o kudiela kua muthu. Mu kiki, tua-nda dianga kumona se mukonda diahi a bhingile kutunga jimbanza ja kulengela, ni kiebhi kia kexile mu kalakala.

‘SOLENU JIMBONGE JA KULENGELA’

3. Ihi ia tokalele kubhanga akua Izalaiele ku kijibhangânga?

3 Jihova ua kexile mu mona o ujibhangânga ua kexile mu bhita mu ixi ia Izalaiele. Se mukua Izalaiele u jibha muthu mu luelu, a tokalele ue ku mu jibha. O muthu ua tokalele kujibha o kijibhangânga, a mu ixanene “muzokedi’a manhinga.” Muene ua tokalele kukala ndandu ia muthu a mu jibhile kuala o kijibhangânga. (Dialuilu 35:19) Mu kiki, o kijibhangânga kieji futa o manhinga a muthu ua jibha, ni muenhu uê. O Kitumu kiki kia kuatekesa akua Izalaiele ku zelesa o ixi iâ. Jihova ua a tangela uixi: ‘Ixi i mua tungu ki mu i xidise, kuma o manhinga a xidisa o ixi.’—Dialuilu 35:33, 34.

4. Ihi ieji bhanga muthu ua jibha mukuâ sé ku ki mesena?

4 Maji ihi ieji bhita se mukua Izalaiele ua jibhile muthu sé ku ki mesena? Sumbala o muthu ka ki bhange mu luelu, maji muene uala hanji ni kikuma kia kubhubha manhinga. (Dimatekenu 9:5) Mu kithangana kiki, Jihova ua tumine kima ku akua Izalaiele, kieji londekesa o henda ni muloloki uê. Kuma kuexile, jimbonge jisamanu ja kulengela, o muthu ua jibhile mukuâ sé ku ki mesena, ueji lengela mu mbonge ia ku lengela, phala kulenga o muzokedi’a manhinga. Mu mbonge, sé-ku muthu ua tokalele dingi ku mu jibha. Maji, ua tokalele kukala-mu, katé mu ufuilu ua mukunji ua dikota.—Dialuilu 35:15, 28.

5. Kiebhi o kuijiia kuila, mu Izalaiele mua kexile jimbonge ja kulengela, ku tu kuatekesa kuijiia dingi Jihova?

5 Jihova muéne ua tumu kutunga o jimbanza ja kulengela. Ki kiexile kibanzelu kia muthu, kana. Nzambi ua tangela Josuué, uixi: ‘Solenu jimbonge ja kulengela.’ (Josuué 20:1, 2, 7, 8) Jihova ua mesenene kuila, o jimbanza jiji ji di kexidila. Mu kiki, o jimbonge ji tu longa ima iavulu ia lungu ni muene. Mu kifika, tu tendela kiambote o henda ni muloloki uê, ni kiebhi ki tu tena kulengela kua Nzambi.

MUENE UA TOKALA KU “TANGA O MULONGA UÊ” KU TUFUNGA

6, 7. (a) Kikalakalu kiebhi kia kexile na-kiu o tufunga? (Tala o foto ia dianga.) (b) Mukonda diahi o muthu ua jibhile mukuá sé ku ki mesena, ua bhingile kuzuela ni tufunga?

6 O mukua Izalaiele ua jibhile mukuá sé ku ki mesena, ua tokalele kulenga katé ku mbonge ia kulengela. Muene ua tokalele ku “tanga o mulonga uê” ku tufunga, bhu muelu ua mbonge. O tufunga a tokalele kutambulula kiambote o muthu iú. (Josuué 20:4) Mu kubhita thembu, ene a tokalele ku mu tumikisa ku tufunga tua mbanza, mua bhitile o kiluezu. (Tanga Dialuilu 35:24, 25.) Se o tufunga a mona kuila, o muthu ka jibha mu luelu, muene ueji vutuka dingi mu mbonge ia kulengela.

7 Mukonda diahi o muthu ua kexile mu lenga, ua bhingile kuzuela ni tufunga? O tufunga exile ni kikalakalu kia kuzelesa o kifuxi kia Izalaiele. Kiki kiexile mu kuatekesa ió ka jibhile mu luelu, ku katula mbote mu henda ia Jihova. Sai mukua ku tokuesa o Bibidia, uambe kuila se o muthu ka ile ku tufunga, eji ku mu jibha. Muene uambe dingi: “Kuma ka bhangele o kima kia tumine Nzambi, muéne ueji kala ni kikuma kia manhinga mê.” Phala kukala ku muenhu, o muthu ua tokalele kusota kikuatekesu, ni ku ki xikina. Se ka lengele ku mbonge ia mu zukamene dingi, o muthu uavu o ndandu ia jibha muene, ueji kala ni ufolo ua ku mu jibha ué.

8, 9. Mukonda diahi Daniiele ua tokalele kuzuela ni tufunga?

8 Mu izuua ietu, phala kukala dingi ni ukamba uambote ni Jihova, o phange ua te kituxi kia dikota, ua bhingi kuzuela ni tufunga. Mukonda diahi kima kiambote kubhanga kiki? Kia dianga, Jihova muéne ua solo o tufunga phala kubatula o maka a lungu ni ió a ta ituxi ia makota mu kilunga. (Tiiaku 5:14-16) Kaiiadi, o tufunga ala mu kilunga phala ku kuatekesa o athu a diela, kukala dingi ni ukamba uambote ni Nzambi, ni kuxisa o kituxi. (Ngalásia 6:1; Jihebeleu 12:11) Katatu, o tufunga ala ni ujitu, a a longa ué, kukuatekesa o athu a diela kumona kuila ala hanji ni valolo bhu pholo ia Jihova. Kiki, ki kuatekesa o muthu ku tolola o kikote ku muxima. Jihova u mona o tufunga kala “disuamenu kiza o kitembu.” (Izaia 32:1, 2) Mu ku tu bhana o tufunga, Nzambi u londekesa o henda iê kokuetu, ni ukexilu uê ua dikota ua kuloloka.

9 Jiselevende javulu ja Jihova, a mono kuila kima kiambote kusota o kikuatekesu kia tufunga. Mu kifika, sai phange a mu ixana Daniiele ua tele kituxi kia dikota, maji ua bhiti thembu iavulu sé kusota o tufunga. Muene uambe: “Mu ku bhita thembu, nga mono kuila o tufunga keji tena kubhanga dingi kima phala ku ngi kuatekesa. Maji nga kijidile kuila, kupholo dia kuenda o athu eji kuijiia o kituxi ki nga tele. Nga mono kuila, izuua ioso mu kusamba, o kima ki nga kexile mu dianga o kubhinga o muloloki ua ituxi iami.” Mu kubhita thembu muene ua bhingi o kikuatekesu kia tufunga. Daniiele ua zuela, uixi: “Mu kidi, ngexile ni uôma ua kuzuela nau. Maji, kindala nga mu divua kiambote, kala a ngi katula kinemenu ku dikunda.” Daniiele uala dingi ni ukamba uambote ni Jihova, uala ue ni kitongoluelu kia zele. Lelu, muene mukuatekexi ua tufunga.

‘MUENE UA TOKALA KULENGELA KU JIMBONGE’

10. Phala kutambula o muloloki ua Nzambi, ihi ia tokalele kubhanga o muthu ua jibha mukuá, sé ku ki mesena?

10 Phala kutambula o muloloki ua Nzambi, o muthu ua jibha mukuâ, ua tokalele kuia mu mbanza ia kulengela, ni kukala-mu. (Tanga Josuué 20:4.) Phala kukala ku muenhu muene ua tokalele kulengela mu mbonge ni kukala-mu, katé kieji fua o mukunji ua dikota. O kuia mu mbonge ia kulengela, kua bhingile nguzu. O muthu ua bhingile kuxisa o kikalakalu kiê, ni jimbote joso ja kexile na-ju.a (Tala ku luiji.) (Dialuilu 35:25) Maji kubhanga kiki, kuexile phala o mbote iê muene. Se ua tundile ku mbanza ia lengele, muene ueji londekesa kuila, o kujibha muthu ki kimé. Mu kubhanga kiki, o muenhu ua muene ueji kala mu kiluezu.

11. Kiebhi o muthu ua diela o kituxi, u tena kulondekesa kuila, u sakidila o muloloki ua Nzambi?

11 Lelu, o muthu u diela o kituxi kiê, ua tokala ue kubhanga kima phala kutambula o muloloki ua Nzambi. Muene ua tokala kuxisa o kituxi, mba o ima ia bhange. Kubhinga ue kudituna kubhanga o ima ieji tena ku mu suinisa ku ta kituxi kua Nzambi. Poxolo Phaulu ua zuela ia lungu ni ima ia bhangele akuâ Kolindo a diele o kituxi kiâ. Muene uambe: ‘Talesenu kioso kia bhange Nzambi ni mukôndo uenu: Muene ua mi bhangesa kukala mu athu a ujitu dingi. Enu mu edikisa kuma ki muala ni kuêla! Maji mua londekesa uôma, muanu, ni lusolo mu ku iudika ia bhengalala!’ (2 Kolindo 7:10, 11) Se tu bhanga ioso phala ki tu te dingi kituxi, tua-nda londekesa kua Jihova kuila, tua diela. Tua-nda londekesa ue kuila, ki tu tondala mu luelu mu kuijiia kuila Nzambi ua-nda tu loloka.

12. Ihi ia tokala kubhanga o muthu phala kutambula o muloloki ua JIhova?

12 Ihi ia tokala kubhanga o Kidistá, se ua mesena o muloloki ua Jihova? Muene ua tokala kukala polondo phala kuxisa kima kioso-kioso ki tena ku mu bhangesa ku ta kituxi, né muene se ima ia zolo kiavulu. (Matesu 18:8, 9) Mu kifika, se o makamba mê a ku fuinhisa kubhanga ima ia zembe Jihova, o kuila ua-nda xikina ku batula o ukamba ni ene? Se ua mu bhanga nguzu phala kulenga o ku kodiua, o kuila uene mu bhanga ioso phala kulenga ue o ididi, ieji kubhangesa kukala ni vondadi ia kunua uhôlua uavulu? Se kia mu ku bhonza kulanga o jihânji jê, o kuila uene mu dituna kumona jifilme jaiibha, mba kubokona mu ji site ja internete ji tena ku kubhangesa kumona ufusa? Lembalala kuila, o kuxisa kima kioso-kioso, phala kubelesela Jihova kua beta-o-kota. Lembalala kuma, o ku divua kuila Jihova ua tu bhana dikunda, kubhekela kuxixima kua dikota. O kima ki tu sangulukisa o kumona o “jihenda ja nzungule” ja Jihova.—Izaia 54:7, 8.

‘O JIMBONGE JI KALE DILENGELU PHALA ENU’

13. Mukonda diahi o muthu ua lengela mu mbanza, ua tenene kudivua kiambote?

13 Kioso o muthu kia bhixila mu mbonge ia ku lengela ueji tena ku tululuka. Jihova ua tangela ia lungu ni jimbonge jiji: ‘Bhu kale-phe dilengelu phala enu.’ (Josuué 20:2, 3) Jihova ka bhingile kuila o muthu ua lenge a mu fundisa lua mukuá mukonda dia kituxi kimoxi kia tele. Ku mbandu ia mukuá o muzokedi ua manhinga ka tokalele ku mu kenga mu mbonge ia ku lengela phala ku mu jibha. Kioso o muthu ua lenge u bhixila ku mbonge ueji kala ni kikuatekesu kia Jihova. O mbonge ja kulengela ki jexile jikaleia kana. Mu jimbonge jenhojo, o muthu ueji tena kukuatekesa akuâ ni kubheza Jihova ni kutululuka. Muene ueji tena kusanguluka ni kuzediua ku muenhu!

Phange ia muhatu u samba, anga u suina dingi, u boka o njimbu ni phange ia mukuá ia muhatu

Dielela kuila, Jihova ua kuloloka (Tala o kaxi 14-16)

14. O muthu ua diela o kituxi ua bhingi kuijiia ihi?

14 Sai jiphange a tele kituxi kia dikota maji a diela. Né kiki, sai bhabha a divua hanji kala Jihova nuka ua-nda jimba o ituxi iâ. Se ua mu divua kiki, lembalala kuila kioso Jihova kia tu loloka, muene u jimba o kituxi ki tua tele. Eie ku tokala dingi kukala ni kikote ku muxima. Kiene kia bhiti ni Daniiele, tua mu tumbula ku dimatekenu. Kioso o tufunga kia zuelele né phala ku mu kuatekesa kukala dingi ni kilunji kia zele, muene ua mateka kudivua kiambote. Muene uambe: “Nga mu divua kiá kiambote. Kioso kia tu loloka ki kubhingi dingi kukala ni kikote. Jihova ituxi ietu u i takula dikanga. Kifua eie nuka dingi ua-nda ku ki mona.” Kioso o muthu kia bhixila mu mbonge ia kulengela ka tokalele dingi ku kala ni uôma ua kuila o muzokedi ua manhinga ueji ku mu kenga phala ku mu jibha. Kiene kimoxi ue ki bhita kioso Jihova u loloka o ituxi ietu, ki tua tokala dingi kukala ni uôma ua kuila muene ua-nda tu kaxtikala mukonda dia ituxi i tua tele.—Tanga Jisálamu 103:8-12.

15, 16. Kiebhi kuijiia kuila Jezú ua tu fuila ni kuila, muéne o Mukunji uetu ua Dikota, ku tu bhangesa kudielela dingi ku muloloki ua Nzambi?

15 Mu kidi, o kidielelu kietu kua Jihova kia tokala kukala kota, kia kexile nakiu akua Izalaiele ndenge. Kioso Phaulu kia dikola uixi: “Kokolo diami dia kuxixima” mukonda dia kukamba kubelesela Jihova ni kuiuka kuoso, muene uambe dingi: “Nga sakidila-phe Nzambi, kuma sai-ku kubhanduluka mua Jezú Kristu, Ngana ietu!” (Loma 7:25) Ihi ilombolola o izuelu ia Phaulu? Sumbala muene uexile mu bhanga nguzu phala kutolola o kikote ku muxima mukonda dia ituxi ia tele m’ukulu, muene ua diele o ituxi iê. Mu kiki, muene ua dielele ni kidi kioso kuila, bhu kaxi ka sata ia kukula kua Jezú, Jihova ua mu loloka o ituxi iê. Mukonda dia ku tu kula kuala Kristu, tu tena kukala ni kitongoluelu kia zele, kusidivila Nzambi ni kutululuka. (Jihebeleu 9:13, 14) Kuma Jezú muéne o Mukunji uetu ua Dikota, “muène ua soko-bho kubhulula katé kia zubha, ene oso ejila kua muène, ni a bhixile kua Nzambi. Kuma Jezú ua kalé kiá ku muenhu mu ku a diondela jinga.” (Jihebeleu 7:24, 25) M’ukulu o akunji a makota, exile ni kikalakalu kia ku kuatekesa o akua Izalaiele kuijiia ni kidi kioso kuila, Jihova ueji ku a loloka o ituxi iâ. Jezú muéne o Mukunji uetu ua Dikota, mu kiki, tu tena kuijiia ni kidi kioso kuila, “tua kà tambula o kiadi ki tena ku tu bhandulula mu kumbi dia kubhondalala.”—Jihebeleu 4:15, 16.

16 Phala kulengela kua Jihova, tua bhingi kukala ni kixikanu ku sata ia kukula ia Jezú. Kana kumona ngó o sata ia kukula, kala ujitu phala o athu oso mu ngongo. Mu veji dia kiki, sota kumona o sata ia kukula kala ujitu ua ku bhana Jihova phala kubhulula o muenhu ué. (Ngalásia 2:20, 21) Xikina kuila, bhu kaxi ka sata ia kukula, Jihova ua loloka o ituxi ié. Ejiia kuila, o sata ia kukula, i ku bhana o kidielelu kia kukala ni muenhu ua kalela-ku. O sata ia kukula, ujitu ua dikota ua ku bhana Jihova Nzambi.

17. Mukonda diahi ua mesena kulengela kua Jihova?

17 O jimbonge ja kulengela ji londekesa kiambote o ukexilu ua Jihova ua kuloloka. O jimbonge jenhojo, ja tumine Nzambi ku ji tunga, ji tu longesa kuila, o muenhu kima kikôla. Kiki, ki londekesa ue kiebhi o tufunga kia tena ku tu kuatekesa, ni ihi ilombolola o kudiela mu kidi. Ki tu londekesa ue se mukonda diahi tu tena kuxikina ni kidi kioso kuila, Jihova u loloka o ituxi ietu. O kuila Jihova muéne o dilengelu diê? Ki bhuala dingi kididi kia kondama, ki kale ngó kua Jihova! (Jisálamu 91:1, 2) Mu milongi ia-nda kaiela tua-nda mona kiebhi o jimbonge ja kulengela, ji tu kuatekesa ku kaiela o phangu ia dikota ia Jihova, ia kulondekesa o kuiuka ni ia kuloloka mu kidi.

a O Encyclopaedia Judaica, i zuela kuila, o muiji ua muthu ua jibhile mukuá, ua tokalele ue kuia kutunga ku mbonge ia kulengela.

IZUELU IO JIMBULULE

  • Se tu ta kituxi kia dikota, tu tena kulengela kua Jihova, mu ku diela o kituxi kietu ni kidi kioso, ni kusota o kikuatekesu ki tu bhana Jihova bhu kaxi ka tufunga. Tu tena kudielela kuila, Jihova u loloka mu kidi, ni kuila o sata ia kukula ujitu ua bhana Nzambi phala muthu ni muthu. Se tu bhanga kiki, tua-nda kala ni kitongoluelu kia zele, ni kusanguluka ku muenhu

Ihi I tu Tena Kudilonga??

O Mulangidi ua 1 ua Katutu ua muvu 1895, ua jimbulula kuila o jimbonge ja kulengela jexile ni dilomboluelu. O mulangidi ua zuelele kuila, “o jimbanza jexile mu lombolola o kukondama kusanga o mukua kituxi u lengela kua Kristu.” O muthu u tena kusanga o kukondama se muene u londekesa kixikanu kua Jezú. Mu kubhita hama ia mivu, o Mulangidi uambe kuila o jimbonge ja kulengela “jexile mu lombolola o ima ioso i tu bhana Nzambi phala ku tu langa, phala ki tu fué mukonda dia kuxibhaka o kitumu kiê kia lungu ni manhinga.”

O Mulangidi ua 15 ua Katanu ua 2015, ua jimbulula se mukonda diahi mu izuua iii, o madivulu metu kene mu sota dingi kujimbulula o ifika mba o dilomboluelu dia ikanenu ia Bibidia. O Mulangidi uambe: “Kioso o Bibidia ki i tu longa kuila, muthu, kima mba kizulukutu, kilombolola kima kia-nda bhita ku hádia, etu tu xikina o dijimbuluilu. Maji etu ki tu tokala kulondekesa o dilomboluelu dia milongi ioso-ioso ia Bibidia, se o Bibidia ki i jimbulula.” Ia lungu ni Jimbonge ja kulengela, o Bibidia ki i zuela se iene ia kexile mu lombolola kima kiéngi. Mukonda dia kiki o milongi ia semana iii, ni ia semana iza-mu, ia-nda tu longa o madisá i tu tena kukatula mu kudilonga ia lungu ni jimbonge mba jimbanza ja kulengela jexile mu ixi ia Izalaiele.

    Madivulu Muoso Kimbundu (2008-2025)
    Kutunda
    Kubokona
    • Kimbundu
    • Kuwanena akwenu
    • Yakuwabhela
    • Copyright © 2025 Watch Tower Bible and Tract Society of Pennsylvania
    • Ijila
    • Kikutu Kyetu
    • Definições de privacidade
    • JW.ORG
    • Kubokona
    Kuwanena akwenu