O Kuila Nzambi Ua-nda Tambuijila o Misambu Iami?

O Bibidia i tambuijila

Kiene, ua-nda tambuijila. Ki kale o Bibidia mba o misoso ia athu ilondekesa kuila Nzambi u tambuijila o misambu. O Bibidia i zuela: ‘Nzambi u bhanga o vondadi ia ió oso a mu kala ni uôma; uívua nzongo iâ, ia ku dikola, hé u a bhulula.’ (Jisálamu 145:19) Maji phala Nzambi kuívua o misambu iê, eie ua tokala ku samba mu ukexilu ua tokala.

Ihi ia Mesena Nzambi

Samba kua Nzambi kana kua Jezú, ku jisandu, ji-anju mba ku iteka. Jihova muéne ngó o ‘Mukua kuívua o misambu.’—Jisálamu 65:2.
Samba kála kia mesena Nzambi mu ku belesela o itumu iê i tu sanga mu Bibidia.—1 Nzuá 5:14.
Samba mu dijina dia Jezú mu kulondekesa kuila ua mu bhana kijingu kua muéne. Jezú uambe: “Kana muthu u bhixila kua Tata, ua kambe kuijila ko kuami.”—Nzuá 14:6.
Kana ku kala ni phata, mu ku samba bhinga kua Nzambi ku vudisa o kixikanu kiê kua muéne.—Matesu 21:22; Luka 17:5.
Samba ni muxima ni kulenduka kuoso. O Bibidia i zuela: “Kuma Jihova sumbala kota dia ngana, maji u suua ió ua batama.”—Jisálamu 138:6.
Kana ku bhuila. Jezú uambe: “Bhingenu, nda a mi bhane.”—Luka 11:9.

O ima ka i mesena kuala Nzambi

O kikonda kiê mba ixi. “Nzambi kene ni kathombo ka athu. Maji ku akua jixi joso, uoso u mu xila muène, hé u bhanga ioso iaiuka, Muène u mu tambulula.”—Ikalakalu 10:34, 35.
O ukexilu uê ua ku samba. Né muene se ua xikama, ua bhetama o pholo bhoxi, ua fukama mba uemana, u tena ku samba mu maukexilu oso iá.—1 Malunda 17:16; Nehemiia 8:6; Daniiele 6:10; Marku 11:25.
U tena ku samba ku muxima mba ni dízui dia suína. Nzambi uivua katé muene kioso ki tu samba ku muxima.—Nehemiia 2:1-6.
Né muene se o ima i ua bhingi, ima ia makota mba iofele, Nzambi u kuívua. Nzambi u ku suínisa ‘Héle iê ioso takula-iu Nzambi, kuma muéne ua ku kuatela muanu.’—1 Phetele 5:7.