Ihi i zuela o Bibidia ia lungu ni ku ta manhinga mu mukutu?
O Bibidia i tambuijila
O Bibidia i tu tangela kuila ki tu tokala ku ta manhinga mu mukutu. Kienhiki, ki tu tokala ku xikina manhinga, né muene bhu kaxi ka kudia mba ku a ta mu mukutu uetu. Tala o ibatulu ia Bibidia:
Dimatekenu 9:4. Kioso kia bhiti o dilúvio, Nzambi uehela Noué ni muiji uê o kudia xitu, maji ua a tangela kuila ka tokalele kudia o manhinga. Nzambi uambela Noué, uixi: “O xitu-phe ki mu i die ni muenhu uê, o manhinga; kuma manhinga ene o muenhu.” O kitumu kiki kia tokala athu oso mu ngongo mukonda athu oso ejila ku muiji ua Noué.
Ijila 17:14. ‘Kana kudia manhinga ma kibhaku kioso-kioso, kuma o muenhu ua xitu ioso uene mu manhinga mê muenhomo; uoso-phe ué, u ma dia a kà mu jimisa o mbutu.’ Nzambi u mona o muenhu kala uala mu manhinga ni kuila o muenhu ua tokala kua muéne. Sumbala o kitumu kiki a ki bhele ngó ku akua Izalaiele, kiene kilondekesa kuila Nzambi ua fidisile o athu o kudia o manhinga.
Ikalakalu 15:20. ‘A ditune . . . kúdia manhinga.’ Nzambi ua tumina ué o Jikidistá kuila ka tokala kudia manhinga kála kia tuminine kua Noué. O musoso ulondekesa kuila o Jikidistá ja dianga ka kexile mu dia manhinga né muene mu ku a saka.
Mukonda diahi Nzambi u tu tangela kuila ki tu tokala ku ta manhinga mu mukutu?
Kuene ima iavulu ilondekesa kuila ki tu tokala ku ta manhinga mu mukutu. Maji o kima kia beta o kota o kuijiia kuila Nzambi u tu tangela kuila tua tokala ku dituna o manhinga mukonda o manhinga muenhu, o muenhu ukôla phala muéne.—Ijila 17:11; Kolose 1:20.