Mukonda Dyahi o Jimbangi ja Jihova Kene Mubhanga o Jifesa ja Uvwalukilu?

O Jimbangi ja Jihova kene mubhanga o jifesa ja uvwalukilu mukonda o jifesa jiji ji lwalesa Nzambi. Sumbala, mu Bibidya kitusangamu kitumu kifidisa kubhanga o jifesa ja uvwalukilu, maji itukwatekesa kuxinganeka mu ima yalungu ni jifesa jiji ni kumone se ihi banza Nzambi yalungu ni jifesa ja uvwalukilu. Tu dilonge ima iwana yalungu ni jifesa jiji ni milongi ya Bibidya yalungu ni ima iwana yiyi.

1. O jifesa ja uvwalukilu jatundu ku jiphagão. Kala kyazwela o Dicionário-Padrão de Folclore, Mitologia e Lendas, de Funk e Wagnalls, o jifesa jiji jamateka mukonda o athu a dyelele kwila, mu kizuwa kya uvwalukilu kya muthu o “madimonyu ejitena kubhanga kyaiybha ku muthu watenesa mivu” ni kwila “o kukala ni makamba mu kizuwa kiki ni umenekenu wakuzediwisa kweji kwatekesa kulanga o muthu watenesa mivu.” O divulu A Tradição dos Aniversários Natalícios dizwela kwila mukulu o kusoneka o kizuwa kya uvwalukilu kya muthu “kyabetele kota phala kukwatekesa yo a dyelela mu maka alungu ni horoscopo ni astrologia.” O divulu diwela we kwila “athu avulu a dyelela kwila o jivela ja fesa ja uvwalukilu jala ni kutena kwa kubhanga o vondadi ya muthu wa tenesa o mivu kudikumbidila.”

   Maji o Bibidya, i fidisa maka alungu ni wanga, kuzambula ni “ima yoyo” yalungu ni maka enya. (Matendelelu 18:14; Ngalásya 5:19-21) Mu kidi, o kima kyabhange Jihova kudituna o mbanza ya Babilonya, mukulu o kumona kwila o athu akexile mubhanga astrologia, kima kyalungu ni kuzambula. (Izaya 47:11-15) O Jimbangi ja Jihova kene mutokwesa maka oso alungu ni ima idyelela o athu yangulu ni wanga; Maji kyoso ki tusanga itendelesu mu Bibidya ya lungu ni maka enya, kala o maka alungu ni madimonyu tu ibelesela.

2. O jikidista ja dyanga kexile mubhanga jifesa ja uvwalukilu. O Enciclopédia Delta Universal dizwela kwila “ene akexile mutala jifesa joso ja uvwalukilu kala jifesa ja jipagão.” O Bibidya ilondekesa kwila o jipoxolo ni athu engi a alongo kwa Jezú, a xisa phangu phala o Jikidista joso kwikayela.—2 Tesalonika 3:6.

3. O jikidista a atumu ngo phala kubhanga o fesa ya kufwa kwa Jezú ko fesa ya uvwalukilu, kana. (Luka 22:17-20) O kiki ki kima kyakudiwana kana, mukonda o Bibidya yamba kwila “o kizuwa we kya kúfwa kota, o kya kuvwala muthu ndenge.” (Ndongixi 7:1) Ku disukilu dya mwenyu we mu ixi, Jezú wabhange ima yambote ku pholo ya Nzambi, kiki kyabhangesa kwila o kizuwa kya ufwilu wê betakota mu kukala ni valolo o kizuwa kya uvwalukilu wê ndenge.—Jihebelewu 1:4.

4. Mu Bibidya kitusangamu kwila selevende ya Jihova wabhange fesa ya uvwalukilu. Ki twamuzwela kwila a ikatulamu mukonda o Bibidya itumbula fesa jiyadi ja uvwalukilu ya athu kexeke abhezi a Nzambi. Maji, o jifesa jiji a jitumbula mu ukexilu wayibha.—Dimatekenu 40:20-22; Máluku 6:21-29.

O kwila o twana twa Jimbangi ja Jihova twene mu divwa kyayibha mukonda dya kukamba kubhanga o fesa ya uvwalukilu?

Kala kibhanga o jitata jambote, o jitata Jimbangi ja Jihova ene mu londekesa henda ku twana twe izuwa yoso mu muvu, ki mu kizuwa kya uvwalukilu ngo, ene a bhana mawijitu kala itonekenu ni ima yengi, a katula kithangana na sanguluke kumoxi ni twana twe. Ene a bhanga yoso phala kukayela o phangu ya Nzambi, u bhana ni henda yoso ima yambote ku twana twe. (Matesu 7:11) O twana twa Jimbangi ja Jihova kene mu divwa kyayibha, tala o izwelu ya twana twa Jimbangi ja Jihova:

• “O kutambula mawujitu kuwabhela dingi se a kubhana mu kithangana ki wa kifikile.”—Tammy, wala ni 12 amivu.

• “Ne nwene ki ngene mu tambula mawjitu mu kizuwa kya uvwalukilu, maji o jitata jami a ngibhana mu ithangana yengi. Ngi wabhela kyavulu mukonda ngitambula se kwa bhinga.”—Gregory, wala ni 11 amivu.

• “Se wevu mimbu mu 10 dya ithangana, akubhana bolo, o kwila udivwa kwila a kubhange fesa? Za mu inzo yami ni umone o fesa yakidi!”—Eric, wala ni 6 amivu.