“O Kwila Kubhinga Mwene Kudyongeka Phala Kubheza Nzambi?”

O Bibidya i tambwijila

Kyene, mukonda Nzambi wamesena kwila o athu adyongeka phala kumubheza. O Bibidya yamba: “Tu dixinganekyenu mudyetu ni kudiswinisa mu kudizola ni kubhanga ima yambote. Kitufule kudyongeka.”— Jihebelewu 10:24, 25, nota.

Jezú wambe kwila o akayedyê eji kala kibuka kyosokejeke, kyoso mwene kyambe: “Kyenyiki, o athu oso anda mijiya kwila mu maxibulu mami, se mudizola mudyenu.” (Nzwá 13:35) Phala kulondekesa o henda yiyi, o maxibulu a Kidistu eji bhinga kudyongeka ni jiphange jâ mu nzumbi. Eji kwa ongeka mu ilunga, eji dyongeka jinga phala kubheza Nzambi. (1 Kolindu 16:19) Enyoso eji kala mwiji umoxi ku mundu woso.—1 Phetele 2:17.

Kubhinga kubhanga dingi kima, o kutokala ngó mu ngeleja ndenge

O Bibidya ilonga kwila o athu abhingi kudyongeka phala kubheza Nzambi. Maji yene ki ilongo kwila o muthu utena kusangulukisa Nzambi mukonda dya kutokala mu ngeleja. Phala kusangulukisa Nzambi, o ilongesu ya ngeleja mwatokala o muthu, ya tokala kumukwatekesa kulungulula o ukexilu wa mwenyu wê. Mukifika o Bibidya yamba: “O ubhezelu wazele wayuka bhupholo ya Tata yetu ni Nzambi yetu, wenyú: O kulanga o ana itungu ni atudi mu ibhindamu yâ ni kukala sé dixaka dya mundu yú.”—Tiyaku 1:27.