O Kituxi Ihi?
O Bibidya i tambwijila
O kituxi o kubhanga kima mba kibanzelu, kyofidise mu maka a Nzambi. Woso uta kituxi uxibhaka o itumu ya mak‘â Nzambi, ubhanga o ima ya ibhila Nzambi. (1 Nzwá 3:4; 5:17) O Bibidya ijimbulula we kwila o yo wejiya o kima kyatokala maji kakibhange, wamuta we kituxi.—Tiyaku 4:17.
Mu madimi a soneka o Bibidya, a jimbulula o kizwelu kituxi kala “kilwezu.” Mukifika mu Izalayele yokulu kwexile kibuka kya masoladi exile ni uhete wa kutakula matadi se “kulweza”, mu izwelu yengi “sé kuta kituxi.” (Afundixi 20:16) Kyenyiki, o kuta kituxi o kulweza mukukayela o itumu yayuka ya Nzambi.
Kala Mubhangi wetu, Nzambi wala ni ufôlo wa kubhana o itumu phala o athu. (Dijingunwinu 4:11) Twanda bhakula jikonda kwa mwene.—Loma 14:12.
O kwila o muthu utena kulenga o kituxi mu maukexilu oso?
Kana. O Bibidya yamba kwila “Kuma athu oso akwa ituxi, o bhu fuma ya Nzambi katena ku bhixila-bhu.” (Loma 3:23; 1 Jisobha 8:46; Ndongixi 7:20; 1 Nzwá 1:8) Mukonda dyahi kiki kibhita?
Kudimatekenu, Adá ni Eva kexile akwa ituxi, ene a abhange kala athu ayuka mu kidifwanganu kya Nzambi. (Dimatekenu 1:27) Maji kyoso ene kya bhukumukina Nzambi atexi o ukexilu wâ, wayuka. (Dimatekenu 3:5, 6, 17-19) Kyoso ene kya vwala twana a sambukisa o kituxi kiki kala uhaxi wa mwiji (hereditária). (Loma 5:12) O Sobha Davidi waxikina mu maka ya kyoso kyambe: “Eme angivwalela mu lusebhu.”—Jisálamu 51:5
O kwila sayi ituxi yabetakota o ya mukwá ndenge?
Xe, sayi. Mu kifika o Bibidya yamba kuma o akwa Sodoma akexile “athu a bhukumuka kinéne,” ni kwila o ‘ituxi ya kubhukumuka kwâ yavudile dingi.’ (Dimatekenu 13:13; 18:20) Tala ima itatu, ilondekesa kwila o muthu wate kituxi kyadikota.
O kituxi. O Bibidya itudimuna phala kitute kituxi kyadikota kala, o undumbu, kubheza iteka, kunyana, o uhôlwa, kudyodya, ujibhanganga ni ima ya wanga. (1 Kolindu 6:9-11; Dijingunwinu 21:8) O Bibidya ilondekesa kuma o ituxi yiyi ki isokela ni itondalu ya mukwá kala o kuzwela mba kubhanga ima ibhangesa akwetu kudivwa kyayibha. (Jisabhu 12:18; Efezu 4:31, 32) Maji ku mbandu ya mukwá, o Bibidya ilondekesa kwila, ki tu tokala kumona o kituxi kyadikota kala kima kyofele ngó.—Matesu 5:27, 28.
O kima kibhangesa o muthu kuta kituxi. Sayi athu ata ituxi mukonda kejiya o itumu ya Nzambi. (Ikalakalu 17:30; 1 Timote 1:13) Ne kiki, bhu pholo ya Nzambi kituxi mwene. Ku mbandu ya mukwá o Bibidya ilondekesa kwila o ituxi yiyi ki yadifu ni kubhukumukina o itumu ya Nzambi mu lwelu. (Dyalwilu 15:30, 31) O muthu ubhukumukina mu lwelu, “wala ni muxima wabhukumuka.”—Jelemiya 16:12.
O kithangana. O Bibidya ilondekesa kwila, o kuta kituxi muveji imoxi ngó ki kyasoko ni kuta ituxi mu ithangana yavulu. (1 Nzwá 3:4-8) Nzambi wazembe o muthu uta o “kituxi mu lwelu,” sumbala mwene wejiya o kidi kya mak’â mê.—Jihebelewu 10:26, 27.
Woso uta kituxi kyadikota, o kitongolwelu kyê kimutatela. Mu kifika sobha Davidi wasoneka: “Mukonda ikuma yami ya ngibhiti kuthandu, nga jikinina mwene; ya ngixina ni yene kala kimbamba kyadikota.” (Jisálamu 38:4) Maji o Bibidya ibhana o kikanenu kiki: “Mukua-ituxi ehe o njila yê, o wa ibha muxima atule mabanzelu mê; a vutuke kwa Ngana, u mu kwatela henda; n’alukile kwa Nzambi yetu, kuma mwene mukwa kuloloka kyavulu.”—Izaya 55:7.