Ngabatula o Maka ni Tat’etu, Étu Twakala Dingi Kumoxi

MUSOSO WAMI

Athu avulu akwa makanga ene mu kwiza mu mbanza ya Pagsanjanu, mu ixi ya Filipinas, phala kumonamu o dibhubha dya menya. Mu mbanza mwenyomo mwene mwakudila tat’etu amwixana Nardo Leron, mwene wakudila mu wadyama. Mu kumona o kuyibha ku mbandu ya jinguvulu, ni ku axiku dya ngoji, ni mu kididi kyê kya kukalakela, tat’etu wakituka muthu wa yibha, mukwa njinda.

Jitata jami akexile mu kalakala kyavulu phala kutusasa. Twexile tudinake dya ana. Mu veji javulu akexile mubhita ithangana yavulu mu milundu mukusota kudya. Mu ithangana yavulu, kota dyami Rodelio neme twatokalele kudilanga etu ubheka, twakexile mukala ni njinda yavulu. Sumbala twexile tu anandenge, maji kitwakexile ni ithangana yavulu phala kutonoka. Kyoso kitwatenesa sambwadi dya mivu, kiyadi kyetu twamateka kukalakala mu dibhya, kututa imbamba yaneme ya jikokonote mu milundu. Se dibunda kitwatenene kiditwika nadyu, akexile mutujijidika kudikoka.

Tat’etu wakexile mu tubeta kyavulu, maji kyatuyibhile dingi kumona tat’etu kubeta manyetu. Twafikisa kuzokela manyetu maji twalembwa, kitwatenene. Rodelio neme twafunyu ndunge mu kaswekele yakujibha tat’etu kyoso kitweji kula. Ngamesenene kyavulu kukala ni tata utuzola kyavulu!

Mukonda dya kufutuluka kyavulu mukonda dya usweya wa tat’etu, ngatundu kubhata kyoso kingatenesa 14 kya mivu. Ngakexile muzekela mu ikoka, ngamateka kuxibha lyamba. Ku pholo dya kwenda, ngatena kukala ni ulungu éme ngamateka kwendesa o asonyi akwa jixi ja makanga phala kuya kumona o dibhubha dya menya.

Mu kubhita tumivu, ngai mu xikola yakatunda mu mbanza ya Manila. Maji kingikexile mukala ni ithangana yavulu phala kudilonga mukonda kudisukilu dya semana ngakexile muvutuka ku mbanza ya Pagsanjanu phala kukalakala. Mwenyu wami wabhonzele kyavulu, kingijidile se ngibhanga kyebhi, ngexile ni hele yavulu, o makanya kakexile dingi mu ngitululukisa. Benyobho ngamateka kunwa jidroga jakamukwa phala kungibhana nguzu, mu kifika kuxibha kokaina ni heroina. Mukonda dya jidroga, ngakituka we ngi ndumbu. Wadyama wavudile, ni kuyibha ni hadi. Mukonda dya kiki, ngazembele kyavulu o jinguvulu. Ngebhula Nzambi, “Mwenyu wala kiki mukonda dyahi?” Ngasoto jingeleja javulu maji ne ngo imoxi ki yatenene kungitambwijila. Bhenyobho ngamateka dingi kunwa jidroga phala kungibhangesa kudivwa kyambote.

Mu muvu wa 1972, o adilongi mu jixikola ja Filipinas axikama ya axinganeka kubhanga jinvunda ni kulungulukila o jinguvulu. Ngadite we mu kaxi ka athu yó, kudisukilu kwamoneka usweya. Mundu wavulu a akwata kwala axiku dya ngoji, mukubhita jimbeji, abhange o kitumu kya masoladi kulanga o athu mu ithangana ya windwa mba dikwatu mu ixi yoso.

Ngavutuka dingi mu ikoka, maji ngakexile kya ni woma wa kwila o axiku dya ngoji andangikwata mukonda ngaditele wami mu kibuka kya lungulukile o jinguvulu. Phala kukala ni kitadi kyakusumba o jidroga, ngamateka kunyana ni kuxikina kubhanga ikalakalu ya ufusa phala o jinvwama ni asonyi. Kingikexile dingi ni woma wa mwenyu mba wa kufwa.

Mu kithangana kyenyokyo, mametu ni ndengyami akexile mudilonga o Bibidya ni Jimbangi ja Jihova. Tat’etu wa futulukile kyavulu, wate ku tubhya o madivulu mâ alungu ni Bibidya. Maji kiyadi kyâ akolokota yá a abatizala kala Jimbangi ja Jihova.

Kizuwa Mbangi ya Jihova wazwela ni tat’etu yalungu ni ikanenu ya Bibidya ya kwila ku hádya kikwanda kala dingi kuyibha, ixi yoso yanda yuka. (Jisálamu 72:12-14) Izwelu yiyi yawabhela kyavulu tat’etu mukonda dya kiki mwene wamateka kudilonga ubheka. Mu Bibidya, mwene kasangemu ngo o ikanenu ya Nzambi yalungu ni nguvulu ya yuka maji wasangemu we o ijila ya Nzambi yatokala ku anumi ni ku jitata. (Efezu 5:28; 6:4) Mu kubhita thembu, mwene ni jiphange jami jakamukwa akituka Jimbangi ja Jihova. Kuma ngexile dikanga dya mwiji, kingijidile o ima yoso yiyi yakexile mubhita kubhata.

O BIBIDYA YA LUNGULULA O UKEXILU WA MWENYU WAMI

Mu muvu wa 1978, ngai mutunga mu ixi ya Australia. Maji nemwene mu ixi yoyo yatululuka, kingatenene kukala ni kutululuka ku muxima. Ngasuluka ni kifwa kyami kya kunwa jidroga ni kunwa uholwa. Kudisukilu dya muvu wenyó, angikundu kwalo Jimbangi ja Jihova. Ngawabhelele kyavulu yatangele mu Bibidya yalungu ni ixi ya tululuka maji ngakexile ni woma wa ku adyelela.

Mu kubhita tu izuwa, ngavutuka mu ixi ya Filipinas phala kukalamu ngo tusemana. Jiphange jami angitangela kwila tat’etu wakexile mubhanga nguzu yavulu phala kukala muthu wambote maji kingimesenene kudisanga ni mwene.

O ndengyami ya muhatu wangilondekesa mu Bibidya se mukonda dyahi o mwenyu wezala ni hadi ni kuyibha. Ngadiwanene kyavulu mu kumona kakilumba wamutena kutambwijila o ibhwidisu yami. Ande dya kudilekela, tat’etu wangibhana o divulu Poderá Viver Para Sempre na Terra.a Mwene wambe: “Kana kusota dingi kwengi o kutululuka. O divulu didi dyanda kukwatekesa kusanga yoso iwamusota.” Mwene wangitendelesa kusota Jimbangi ja Jihova kyoso kingeji vutuka mu ixi ya Australia.

Ngabhange kala kyangitendelesa tat’etu, ngasange Kididi kya Ubhezelu kya Jimbangi ja Jihova kyazukamene ni inzo yami mu mbanza ya Brisbane. Ngaxikina kudilonga o Bibidya semana joso. O ikanenu ya Bibidya kala yoyo itusanga mu divulu dya Daniyele kibatulu 7 ni Izaya kibatulu 9 kyangilondekesa kwila o unguvulu wa Nzambi, wakambe o kuyibha, wene wandatutumina ku hádya. Ngadilongo kwila twandakala ni mwenyu wambote mu Palayizu mu ixi. Ngamesenene kwila Nzambi ungixikina, maji ngamono kwila ngabhingile kulanga o njinda yami, kweha kunwa jidroga ni uholwa ni kweha we o ukexilu wami wa undumbu. Ngasenge o kilumba ngasakanene, ngatula o ifwa yami yoso ya ibha. O kudyelela kwami kwa Jihova kwakexile mudibandekesa dingi, mukonda dya kiki ngasambe, ngamubhingi kikwatekesu phala ngitene kutula o ifwa yakamukwa yaibha.

Bhofelebhofele, ngamono kwila o ima ingakexile mu dilonga mu kidi itena kulungulula o ukexilu wa muthu. O Bibidya yamba kwila ni nguzu itubhanga, tutena kuzwata o “ukexilu wa ubhe.” (Kolose 3:9, 10) Kyoso kingabhange kiki, ngamono kwila mbe yoso yangitangele kwila tat’etu wakexile mulungulula o ukexilu wê mbe kyexile mwene kidi. Mu veji yakukala ni njinda ni kufutuluka, ngamesenene kudibhana kyambote ni mwene. Ngaloloka tat’etu, ngakatula o unguma woso ungabhakele ku muxima tunde ku undenge.

MABESÁ U NGA TAMBULA

Kuma ngexile ngi munzangala, mu ithangana yavulu ngakexile mu kayela akwetu mu kubhanga imbamba ya ibha. O yatange o Bibidya kidi mwene, o makamba a ibha angijimbidisa. (1 Kolindu 15:33) Maji ngabhange makamba ambote mu kaxi ka Jimbangi ja Jihova, ene angikwatekesa kukituka ngi muthu wambote. Ngasange we muhatu wami wambote, mana Loretta. Kiyadi kyetu, twene mulonga o athu kyebhi o Bibidya itena ku akwatekesa.

Ngisakidila kyavulu o Bibidya, tat’etu wakituka muthu nuka ngafikile kwila kyene kyejikala mwene—mwene wakituka diyala dyambote phala mametu, wakituka we Kidistá yalenduka, wawabhela o paze. Kyoso kitwadisange mu kithangana kyoso kyangibatizala kala ngi Mbangi ya Jihova mu muvu wa 1987, tat’etu wangindwakuna. Mwene nuka wangindwakwine tundé kyangivwalele!

Mu 35 a mivu, tat’etu ni mametu asuluka ni kukalakala kumoxi, mukutula o njimbu ya kidyelelu itusanga mu Bibidya ku athu. Mwene wakituka kidimakaji, amwijidile kwila muthu ukwatekesa woso wabhindama. Mu mivu yoso yoyo, ngadilongo ku mu xila ni ku mu zola. Ngidivwa kyambote kukala tata ya mwene! Mwene wafu mu muvu wa 2016, maji ngimuxinganeka kyambote mukonda kiyadi kyetu twalungulula o ukexilu wetu ni kikwatekesu kya Bibidya. Kingimubhakela dingi phonzo kana. Ngisakidila we kyavulu mu kwila ngasange Tat’etu ya dyulu, Jihova Nzambi wakanena kuzubha o jinvunda joso mu kaxi ka miji mu ngongo yoso.