Eme Ngamesena Kufwa—O Kwila o Bibidya Itena Kungikwatekesa se Ngala ni Ixinganeku ya Kudijibha?
O Bibidya itambwijila
Kyene! O Bibidya yatundu kwa “Nzambi o mukwa kukonda o malamba a yó atoloka o mixima.” (2 Kolindu 7:6) Sumbala o Bibidya ki divulu dya mawuhaxi a kilunji, maji yene ya kwatekesa kya athu avulu kutolola o ixinganeku ya kudijibha. O itendelesu yambote itusangamu itena we ku kukwatekesa.
Ndunge jebhi jambote jitusanga mu Bibidya?
● Zwela kyebhi ki wamudivwa.
Ihi yamba o Bibidya: “Dikamba u zola mu thembu joso; o ndandu u di monekena mu jiphaxi.”—Jisabhu 17:17.
Ihi ilombolola o velusu yiyi: Kyoso kitudibhana ni ixinganeku yayibha, tu bhindamena o kikwatekesu kya akwetu.
Se ki uzwela ni akwenu kyebhi ki wamudivwa, kwanda bhixila kithangana eye kiwanda tena dingi kutolola o ixinganeku yiyi yayibha. Se uzwela ku kamba dyê kyebhi ki wamudivwa, o ixinganeku yayibha yanda zoza dingi, eye nange wanda tena kulungulula o ibanzelu yê.
Fikisa o ndunge yiyi: Mukizuwa kya lelu, zwela ni muthu ku mwiji we mba dikamba dyê wa mudyelela.a Eye we utena kusoneka kyebhi ki wamudivwa.
● Sota o kikwatekesu kya asaki.
Ihi yamba o Bibidya: “O athu adisanze ka bhindamena musaki, maji yó akate.”—Matesu 9:12.
Ihi ilombolola o velusu yiyi: Kyoso ki twamukata, tusota o kikwatekesu kya asaki.
O kukala ni ibanzelu yalungu ni kudijibha, nange kitena kukala dimatekenu dya uhaxi wa kilunji. Kala o uhaxi woso woso kitubhingi kukala ni jisonyi. O uhaxi wa kilunji atena ku usaka.
Fikisa o ndunge yiyi: Se kibhana sota o kikwatekesu kya musaki wala ni uhete wa kutalatala o uhaxi yu.
● Lembalala kwila Nzambi ukuswa.
Ihi yamba o Bibidya: “O athu kene mu sumbisa tudyédye tutanu mu iphaka iyadi yakambe valolo yavulu? Né kamoxi ngó, Nzambi katena ku kajimba. . . . Ki mukale ni wôma, mukonda enu mwa betakota, tudyédye twavulu ndenge.”—Luka 12:6, 7.
Ihi ilombolola o velusu yiyi: Eye wala ni valolo ya vulu bhu phulo ya Nzambi.
Eye utene kumona kwila seku muthu uku bhana valolo, maji Nzambi umona o hadi yoso i ubhita. Mwene wa kuzolo kyavulu—nemwene se eye ki wamesenene dingi kukala ku mwenyu. O divulu dya Jisálamu 51:17 dyamba kwila: “muxima watoloka, wadyela mwene, eye Nzambi ku dituna-u.” Nzambi wakuzolo, mwene wamesena kwila eye ukala ku mwenyu.
Fikisa o ndunge yiyi: Tala o ima yala mu Bibidya ilondekesa kwila Nzambi waku zolo. Mu kifika, tanga o kibatulu 24 mu divulu Achegue-se a Jeová.
● Samba kwa Nzambi.
Ihi yamba o Bibidya: “Hele yenu yoso xilenu-yu Nzambi, mukonda mwene wene mu milanga.”—1 Phetele 5:7.
Ihi ilombolola o velusu yiyi: Nzambi wamesena kwila eye umu tangela kyebhi kiwa mudivwa ni ihi ya muku thandaganyesa.
Nzambi utena kukubhana o kutululuka mu nzumbi ni nguzu phala utene kusuluka. (Filipe 4:6, 7, 13) Yu wene o ukexilu wa Nzambi wa ku kwatekesa yó ene mu samba ni muxima woso kwa mwene.—Jisálamu 55:22.
Fikisa o ndunge yiyi: Lelu samba kwa Nzambi. Tumbula o dijina dya mwene, Jihova, mukusuluka mu tangele kyebhi ki wamudivwa. (Jisálamu 83:18) Mubhinge phala mwene kukuswinisa.
● Xinganeka mu ikanenu ya Bibidya phala o hádya.
Ihi yamba o Bibidya: “O kidyelelu kitwala nakyu ku mwenyu wetu kyedi kala o kifikidilu kya naviyu, kyene kyakolo”—Jihebelewu 6:19.
Ihi ilombolola o velusu yiyi: Sayibhabha tutena kudivwa kyambote mba tutena kudivwa kyayibha, kala o naviyu amuyambata kukitembu, mbamdu ni mbandu. Maji o ikanenu itusanga mu Bibidya itena kutukwatekesa kudivwa kyambote.
O kidyelelu kiki ki nzoji kana. Kima kyalungu ni ikanenu ya Nzambi, mwene wanda zubha o hadi yoso.—Dijingunwinu 21:4.
Fikisa o ndunge yiyi: Dilonge dingi yalungu ni ikanenu ibhana o Bibidya. Mukusuluka tanga o kadivulu Njimbu Yambote Ya Nzambi! mu disa dya 5.
● Bhanga yoso i wa wabhela.
Ihi yamba o Bibidya: “Muxima wa sanguluka, u di bhanga milongo.”—Jisabhu 17:22.
Ihi ilombolola o velusu yiyi: O kubhanga ima itubhangesa kusanguluka itena kutukwatekesa kukala ni sawidi yambote mu kilunji.
Fikisa o ndunge yiyi: Bhanga kima kitena kukubhangesa kudivwa kyambote. Mu kifika, kwivwa mimbu ikusangulukisa, tanga kima ki kuswinisa, mba xinganeka mu ima yambote. Wanda sanguluka we se ukwatekesa akwenu ne mwene mu ima yofele.—Ikalakalu 20:35.
● Langa o sawidi yê mu xitu.
Ihi yamba o Bibidya: “O kutungutisa o mukutu kubhanga kyambote.”—1 Timote 4:8.
Ihi ilombolola o velusu yiyi: O kutungutisa o mukutu, kuzeka kwasoko, ni kudya we makudya ambote.
Fikisa o ndunge yiyi: Lenga bhofele nemwene se 15 kya tu itangana.
● Lembalala kwila o ukexilu wê ni ima yala ku mwenyu ilunguluka.
Ihi yamba o Bibidya: “Enu kimwejiyenu kyebhi kyanda kala o mwenyu wenu mungu.”—Tiyaku 4:14.
Ihi ilombolola o velusu yiyi: O maka u twa mudibhana nawu amoneka kala abhonzo kyavulu, maji nange ki anda nangenena.
Nemwene se lelu kumoneka maka abhonzo, ene mungu atena kulunguluka. Mu kiki sota kubhanga kima phala ki ubanze mu maka enya. (2 Kolindu 4:8) Nange kupholu o maka u wa mudibhananwu alunguluka, nemwene se udijibha o maka kanda bhwa.
Fikisa o ndunge yiyi: Tanga misoso ya athu o tumbule mu Bibidya akexile mutala hadi yavulu anga amesenene kufwa, tala we kyebhi o ukexilu wa mwenyu waluguluka mu itangana ka ifikidilyawu. Tala ifika yamukwa.
O kwila o Bibidya itutangela yalungu ni athu amesenene kufwa?
Xe itutangela. O Bibidya itutangela yalungu ni athu azwela kwila: “Eme ngamesena kufwa.” Nzambi ka abazela, maji wa akwatekesa. Mwene we utena ku kukwatekesa.
Elija
● Nayi wexile Elija? Elija wexile polofeta waswina. Sayi bhabha mwene we wa zozele. Kala kyambe o divulu dya Tiyaku 5:17 “Elija wexile muthu kala etu.”
● Mukonda dyahi mwene wa mesenene kufwa? Sayi ithangana Elija wadivu ubheka, wedile kala kexile ni valolo. Mwene wa sambe: “Jihova katula o mwenyu wami.”—1 Jisobha 19:4.
● Ihi ya mukwatekesa? Elija watangela kwa Nzambi yoso yexile mu dibhana nayu ni kyebhi kyexile mudivwa. Kyebhi Nzambi kya mukwatekekesa? Nzambi walondekesa kwa Elija kuma wa muzolo, mu kumulondekesa o kutena kwê. Nzambi wadyelelesa Elija kwila mwene wexile muthu wala ni valolo phala mwene, mukusuluka wamubhana mukwatexi wexile ni idifwa yambote.
▸ Tanga yalungu ni Elija: 1 Jisobha 19:2-18.
Jobe
● Nayi wexile Jobe? Jobe wexile nvwama, wexile ni mwiji wadikota, ene exile mubheza Nzambi ni ufyele woso.
● Mukonda dayhi mwene wa mesenene kufwa? O ima kumwenyu wa Jobe ya lunguluka ni lusolo, mwene wamateka kudibhana ni ima yayibha. O unvwama wê woso wadiboto. Twana twê twoso twafu. Kiki kikyene ngó, mwene wakwata uhaxi wabhonzo. Amateka kumutatela we kwila o ima yoso yiyi yayibha yexile mubhita mukonda dya mwene. Mu ibhidi yoso yiyi, Jobe wambe: “Mwenyu wami wa ngi kumu, ngwami kukola mwenyu.”—Jobe 7:16.
● Ihi ya mukwatekesa?Jobe wasambe kwa Nzambi, wazwela we ni akwa. (Jobe 10:1-3) Sayi dikamba dyê dyakazola, wa mukwatekesa, Edihu wakwatekesa Jobe kumona o maka mu ukexilu watokala. Kyabeta dingi kota, Jobe waxikina o kikwatekesu ni itendelesu ya Nzambi.
▸ Tanga yalungu ni Jobe: Jobe 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Mozé
● Nayi wexile Mozé? Mozé wexile o mutwameni wa kifuxi kya Izalayele, wexile polofeta, mwene wexile ni kixikanu kya kidi.
● Mukonda dayhi mwene wa mesenene kufwa? Mozé wexile ni kikalakalu kya dikota, exile mu mutatela ithangana yoso, o kiki kyexile mu mukuma. Mukonda dya kiki mwene wambe kwa Nzambi: “Ngi jibhe kyá, nga ku dyondo.”—Dyalwilu 11:11, 15.
● Ihi ya mukwatekesa? Mozé wajimbulula kwa Nzambi kyebhi mwene kyexile mudivwa. Nzambi wa mukwatekesa mu kikalakalu kyê yu wamateka kudivwa dingi kyambote.
▸ Tanga yalungu ni Mozé: Dyalwilu 11:4-6, 10-17.
a Se wala ni ibanzelu yavulu yalungu ni kudijibha, anga mu kithangana kyokyo kiwala ni muthu wa mudyelela, exana o asaki ni lusolo mba yo ene mubhanga o kikalakalu kiki.