Kididi Kya Madivulu Bhumaku mé

“Tumivu kudima kitwakifikile kwila tweji tambula kudya kwetu munzumbi mu ukexilu wadijitale.” O kwila kyene we ki waxinganekene? O izwelu yiyi ibhanga mbandu ya diskulusu dya bhange Phange Geoffrey Jackson mu 2020 Jihundu jaubhe ja Kibuka kya Utuminu #6. Mwene wasuluka: “Kindala nange tudibhwidisa, kyebhi kitwejidibhana ni dibhebhu didi se kitwakexile ni jifalamenda kala JW Library. Jihova wexile mutupelepalala kyá tumivu kudima phala kukala polondo mukudibhana ni ima kala o dibhebhu didi.”

Kyebhi Jihova kyexile kutupelepalala? Ihi yabhingile phala kubhanga o apilikativu JW Library, ni ihi yabhingi phala yene isuluke ni kukalakala kyambote?

O Apilikativu ya Dyanga

Mu mbeji ya Kasambwadi wa muvu wa 2013, o Kibuka kya Utuminu kyabhingi kukibuka kikalakala mu Programasa ya MEPS, phala kubhanga apilikativu mweji kala o Bibidya Tradução do Novo Mundo. Phange Paul Willies ukalakala ni Programasa ya MEPS wambe: “Katé o kithangana kyenyokyo nuka twabhangele apilikativu yejikala mudiloja dya jiapilikativu [app stores]. Maji twasolo jiphange mukibuka phala kubhanga o kikalakalu kiki, twemanesa ikalakalu yamukwa, twadibundu ni ibuka yengi phala kubhanga o apilikativu ni milongi yejikalamu. Etu twasambe kyavulu, ni kikwatekesu kya Jihova twatena kuzubha o kubhanga o apilikativu mu kubhita mbeji jitanu, mu kyônge kya muvu, a ibhana!”

O kibhidi kyamukwa kyexile o kubhanga o apilikativu yejitena kwambata madivulu avulu ni madimi avulu. Tunde ku mbeji ya Katatu wa 2015, madivulu metu avulu mu Kingileji exile kyá mu apilikativu yiyi, mukubhita mbeji jisamanu o athu exile kyá ni apilikativu, ejitena kukatula o madivulu mu jihama jamadimi engi.

Tunde o kithangana kyenyokyo o jiphange ayi ni kufwamesa dingi o apilikativu mu maukexilu avulu, kala kubandekesa jividyu ni kubunda o madivulu avulu ni jifoto, jiaudyu phala o yônge mu kididi kimoxi ngó, phala kukwatekesa o athu andakatula o milongi atene kusanga o njila ya Kadivulu ka Kutokwesa bhukaxi ka velusu ya Bibidya.

O Ima Yabhingi Phala Yene Isuluke ni Kukalakala Kyambote

Izuwa yoso 8 dya mazunda amitelembe yenemujikula o JW Library, mujimbeji joso 15 amazunda amitelembe ndenge! Ihi yabhingi phala kukwatekesa o apilikativu kusuluka ni kukalakala kyambote mu mitelembe yiyi? Phange Willies wajimbulula: “Mu kidi, o ikalakalu ya apilikativu kiyala ni disukilu. Etu tukalakala ithangana yoso phala kubandekesaku ima yaubhe phala yene ibhebhuluke dingi ni ikwatekese yó amukalakala nayu. Kuma o jiprograma jakomputadolo ni mitelembe enemubandekesamu jinga ima yaubhe, twabhingi we kubandekesa ima yaubhe phala o apilikativu ilunge ni jiprograma jiji. Etu we twabhingi kusuluka ni kufwamesa o programa yetu mukonda o madivulu ni milongi yongalavele yamusuluka ni kudibandekesa mu JW Library.” Mu apilikativu JW Library mwala kyá madimi avulu. Kindala tutena kusangamu 200 ajimidi amadivulu ni 600 ajimidi ajiaudyu ni jividyu.

Phala kusuluka mukubandekesa o jiprogama jiji kikwabhingi ngó jikomputadolo. Ene na abhingi kusumba jiprograma jakomputadolo. Phala kukala ni ufolo wakukalakala ni jiprograma jiji kubhinga 1.500 ajidolari (888.000 ajikwanza) kumuvu. Katuku o kitadi kiki, o Kibuka kya Programasa ya MEPS kingastala 10 dya jimidi ajidolari (5.920.000 ajikwanza) mukusumba o iseleketa ya maukexilu avulu phala kumona se o apilikativu yiyi yandasuluka mwene ni kukalakala kyambote mu jikomputadolo yaubhe, mu jitablete ni mu mitelembe yakafwetele.

Kukatula Madivulu mu Apilikativu Yiyi Kuphopheka Kitadi

Mukonda dya JW Library kitungastala dingi kitadi kyavulu mukukatula madivulu mu jipapela ni kutumikisa madivulu. Mukifika, tala yabhiti ni kamukanda ketu Tanga o Mikanda Ikôla Izuwa Yoso. O kamukanda ketu Tanga o Mikanda Ikôla Izuwa—2013 kwakambele ngó bhofele phala kutenesa 12 amazunda ajikopiya. Maji o kamukanda ka 2020, twakatula ngó mazunda atanu ajikopiya, sumbala kwadibandekesele 700.000 aboki kumundu woso. Mukonda dyahi o muxinda yu wasosoloka? Mukonda kindala jiphange javulu amutanga o kibatulu kya kizuwa mu JW Library.a

“Ujitu Wakatunda Mwene”

O athu akalakala ni JW Library akatula mbote mu maukexilu avulu. Geneviève, watungu mu ixi ya Canadá, wamono kwila o apilikativu yiyi yamukwatekesa kudilonga dingi o Bibidya. Mwene wambe: “Mu kidi, ngifika kwila se ngejikatula madivulu avulu a jipapela phala kudilonga, kingejitena kudilonga o kamene koso. Maji ni apilikativu yiyi, ngikwata ngó o tablete yami, yoso ingabhindamena yalamu kyá. O kudilonga jinga kwakolesa o kixikanu kyami, kwangizukamesa dingi kwa Jihova.”

O apilikativu yiyi yenemukwatekesa kyavulu bengebenge mu kithangana kiki kya dibhebhu dya COVID-19. Charlyn, mukwa Estados Unidos wambe: “Mukonda dya dibhebhu dya COVID-19, kwabhiti kyá muvu umoxi ndenge nuka dingi ngakwatele divulu dya ubhe mu papela. Maji o JW Library yenemutukwatekesa kudidikila mu nzumbi. Ngisakidila Jihova mukonda dya dibesá didi dya henda.”

Athu avulu adivwa kala Faye, watungu mu ixi ya Filipinas. Mwene wambe: “Ngenemukalakala ni apilikativu yiyi yakatunda phala kukolesa o ukamba wami ni Jihova. Kyoso kingibalumuka kyene o kima kyadyanga kingikwata phala kutanga. Kyoso kingamubhanga o kikalakalu kubhata, yene ingikwata phala kwivwa o milongi yongalavale. Ngisokejeka o yônge ni kikwatekesu kya apilikativu yiyi. Ngikalakala nayu phala kusokejeka o milongi ya Bibidya ya maxibulu mami. Yene ingikwata phala kutala o jividyu kyoso kingikala ni kithangana. Ngitanga o milongi yalamu mba Bibidya kyoso kingamukingila kumunono. O apilikativu yiyi ujitu wakatunda mwene.”

O apilikativu yiyi yenemutukwatekesa we mu ukunji. Mukifika, phange ya muhatu watungu mu ixi ya Camarões kyoso kyexile muboka wamesenene kutanga velusu ya Bibidya yamonene ku phange yamukwa ya muhatu kutanga ni mukwa dibhata tusemana kudima. Maji katenene kulembalala kwebhi kwejisanga o velusu yiyi mu Bibidya. Mwene wambe: “Ni kisangusangu, ngalembalala izwelu ya velusu yiyi. Ngajikula o apilikativu, ngayi mu Bibidya, ngatokwesa o velusu bhukaxi ka izwelu. Sé kulaleka, ngasange o velusu. Mukukalakala ni apilikativu, ngenemusanga o jivelusu jingene mujimba.”

O kitadi kimwene musangela ni henda yoso bhukaxi ka sayite donate.jw.org kyene mukwatekesa phala o JW Library isuluke ni kukalakala kyambote ni tutene kubandekesamu ima ya ubhe phala ikwatekese o jiphange jetu mu ngongo yoso. Twamisakidila kyavulu mu ukexilu wenu wakubhana ni henda yoso.

Ithangana ya Bhiti Ima ya Katunda ya JW Library

1. 

   Mu mbeji ya Kamusasadi ka 2013—O apilikativu a ibhana ku athu ni Bibidya Tradução do Novo Mundo, mu kingileji

2. 

   Mu mbeji ya Katatu ka 2015—Atemu madivulu amukwa mu Kingileji, mu kusuluka abandekesamu jihama ja madimi engi

3. 

   Mu mbeji ya Kamoxi ka 2015—Abandekesaku jimbandu ja jikolo jitukwatekesa kupindala o milongi itwamesena

4. 

   Mu mbeji ya Kasambwadi ka 2016—Abandekesa mbandu ya kyônge

5. 

   Mu mbeji ya Kasambwadi ka 2017—Abandekesa mbandu phala kubhaka milongi itwadilongo

6. 

   Mu mbeji ya Kayadi ka 2017—Abandekesa o Bibidya ya Kudilonga

7. 

   Mu mbeji ya Katanu ka 2019—Abandekesa mbandu yakukatula milongi yongalavale ni yakutala jividyu, ni kutanga o milongi ya Kadivulu ka Kutokwesa

8. 

   Mu mbeji ya Katatu ka 2021—Abandekesa milongi phala kufwamesa o kadivulu Sanguluka Katé Kuhádya ni Hádya!