Jobe
39 “Eye wejiya o kithangana kya jihombo ja milundu kukala ni twana?
Wamwene kya o mbambi kuteta o twana twê?
2 O jimbeji jâ ja kusangita, eye utena kujikwata konda?
Eye wejiya o kithangana kyanda teta?
3 Jene jibutama phala kuteta o twana twâ,
O misusu yâ ya kuteta anga ibhwa.
4 O twana twâ tukudila mu mikáwu, tukala mwene ni nguzu.
Kyoso kituya, kituvutuka dingi kwa manyâ.
5 Nanyi wabhana o ufôlo ku jumendu ya mukáwu?
Nanyi wajituna o jumendu ya mukáwu?
6 Nga mubhangesa kukala ngundu,
O ixi ya môngwa yéne o dibhata dyê.
7 Mwene kasuwu o jibuya ja athu mu mbanza,
K’evu o kudikola kwa muthu wa mu kwambata o ibhaku phala kudima.
8 Yendela ku milundu mu kusota isasa yawisu,
Phala kudya.
9 O kwila o phakasa yanda kwiza ku kusidivila?
Mba mu usuku iza muzeka mu kibhanga kyé?
10 O kwila o phakasa weji ikutila mabaya ni ukalakala-nayu?
O kwila yeji kukayela phala kudima mu honga?
11 Weji dyelela mu nguzu yê yavulu,
Ni kuyehelela kubhanga o kikalakalu kyé kyadikota?
12 O kwila weji idyelela phala ku kwambatela kubhata,
O idima i wabhongolola?
13 O kihendembumba kibhuka o mabhabha mê ni kusanguluka.
Maji o kwila o mabhabha mê asokela ni mabhabha a nyange?*
14 O mayaki mê u axisa mu mavu,
N’atema.
15 Kyene kijimba kwila, o muthu utena ku adyota n’abudika,
Mba atena ku adyota-dyota ku kyama kya mukáwu.
16 An’ê u asasa kyayibha, kala ki an’ê.
Kitululuke mwene, sumbala ni hadi yatale.
17 Mukonda Nzambi kamubhana unjimu,
Kamubhana we kutongoloka.
18 Maji kyoso ki kibalumuka anga kijikula o mabhabha,
Kyolela o kabalu ni yó wasambela-ku.
19 Éye ubhana o nguzu ku kabalu?
Éye we ukezalesa o xingu ni ndemba?
20 O kwila utena ku katukisa kala dihoho?
O kubhwima kwê kukwatesa wôma.
21 Ikoto yê ikanda-kanda bhoxi mu honga, kasanguluka ni nguzu yala-nayu,
Hé katunda ni lusolo phala kubhânga mu ita.
22 O kilwezu ki kimubhekela wôma, kibhwala we kima ki mu sasumukisa,
Kavutuka we kudima mukonda dya xibhata.
23 O kizu* kya misongo, ki dikola-kola ku thandu dyê,
O jisosa jisedima.
24 Mukonda dya kukamba o mwanyu, kadikukumuna, katunda ni makidi-kidi.
O jibuya jakoloneta, kijimwimanesa.
25 Mukwivwa o jibuya ja koloneta, kene kadikola ni dízwi dyaswina.
O dizumba dya ita, udivwila dikanga.
Wívwa o kudikola kwa ilamba ni nzongo ya ita.
26 O kwila o kaháwula éye wa kalongo o kutuka?
O kwila éye wa kalongo kulungila o mabhabha ku mbandu ya lwiji, kyoso ki katuka?
27 O kwila éye utuma o holokoko kudileka bhulu,
Ni kuta o kikalanga kyê bhu kididi kyadileka?
28 O kwila éye watumu o holokoko kutunga ku matadi alebha,
Ku dizokozoko dya ditadi, bhu kididi kyakondama?
29 Bhenyobho, bhwene bhamwena o kudya kwê,
O mesu mê akumwena mwene dikanga.
30 An’ê anwa manyinga,
O bhwoso bhwala o imbi, mwene kakambe-bhu.”