Jobe
40 Jihova wasuluka ni kuvutwila Jobe, wixi:
2 “O muthu wala ni kikuma utena kuzoka n’eme ngi Muteni wa Yoso?
Se bhwala muthu wamesena kubelesa Nzambi, azwele.”
3 Jobe wavutwila Jihova, wixi:
4 “Éme nanyi,
Phala ku kutambwijila?
Nganda dixibha ngo!
5 Ngazwela kya kyavulu.
Kinganda zwela dingi kima mba ku kutambwijila.”
6 Bhenyobho, Jihova watambwijila Jobe mukaxi ka kitembwe, wixi:
7 “Ngakudyondo, disokejeke,
Nganda kubhanga ibhwidisu n’ungitambwijile.
8 Kuxikina kwila ngi muthu wayuka?
U ngibelesa éme ni udilungisa eye?
9 O kwila o nguzu yé yasoko ni nguzu ya Nzambi?
O kwila o dízwi dyé dyasokela ni dya Nzambi, dinuma kala nzaji?
10 Londekesa hanji o fuma ni kutena kwé.
Londekesa o kijingu ki wala-nakyu ni unene wé.
11 Talesa o athu oso adizangeleka.
U akwatela njinda anga u atulula.
12 Tonginina oso adizangeleka ni u asebhulule.
Akwa phulu u adyota-dyota mu ididi yâ.
13 U asweka mu mavu,
U akutila mu mbila.
14 Se ukibhanga, nganda xikina kwila
Utena kudibhulula mudyé.
15 Tala o nguvu,* kyama ki ngabhange kala ki nga kubhange eye.
Yene idya yangu mukwa ni ngombe.
16 Nguzu yê ya mukala mu malombo,
O kuswina kwa kutena kwê kwa mukala mu muswinyi!
17 Ikolesa o mukila wê mukwa ni mbasá,
O mixibha ya matabela mê, yadibhidijika,
18 O ifuba yê yedi kala a ibhange ni ngondo,
O inama yê yedi kala a ibhange ni felu.
19 Ku yama yabhange Nzambi ya kidifwa kiki, yéne yadyanga, yéne we yabeta kota.
O Yó wa ibhange mwéne ngo utena ku ijibha ni xibhata.
20 Kudya kwê kutunda ku milundu,
Kwene mutonokena o yama yoso ya mukáwu.
21 Izeka koxi a ingombo-ngombo, ku jimbamba,
Ni mu menya.
22 O kilembeketa kya ingombo-ngombo ki muvungina,
O mixi ikudila mu honga i mukondoloka.
23 Kyoso ngiji ki izala, ki i mukwatesa wôma.
Itululuke mwene, né mwene se o menya a Njolodá a musanga ni nguzu.
24 Nanyi utena ku ikwata,
Mba ku ikubula o dizulu se yatono?