O kuila ua banzele kiá kutanga o Bibidia, maji kua kexidié ni vondadi kala o athu u tua tange ku dima? Athu avulu a banza kuila, kutanga o Bibidia kima kia bhonzo. Abha se uejiidile kuila o Bibidia i tena ku ku kuatekesa kukala ni kisangu-sangu ni kuzediua ku muenhu? Se uejiidile kuila kuala maukexilu avulu a kutanga o Bibidia a tena ku ku kuatekesa kukatula mbote? O kuila ueji kala ni kithangana kia kutokuesa dingi, phala kuijiia o valolo iala na-iu o Bibidia?

Tala o izuelu ia athu a katula mbote kioso kia mateka o kutanga o Bibidia.

Ezekiel, uala ni 20 a mivu uambe: “M’ukulu nga kexile kala ngi muthu ua mu kuendesa dikalu, maji kala ni kididi kia kubhixila. Maji o kitangelu kia Bibidia, kiene mu ngi kuatekesa kukala ni muenhu uambote. Mu Bibidia muala itendelesu ia tokala i ngi kuatekesa izuua ioso.”

Frieda uala ni 20 a mivu uambe: “Nga kexile ngi muthu ua teme kiavulu. Maji o kitangelu kia Bibidia kia ngi kuatekesa ku di tonginina kiambote o idifua iami. Kiki kia ngi kuatekesa kukala ngi muthu ua lenduka. Kindala, ngala dingi ni makamba avulu m’ukulu ndenge.”

Eunice uala ni 50 a mivu, uambe ia lungu ni Bibidia: “O Bibidia ia mu ngi kuatekesa kukala ngi muthu uambote, ni kueha o idifua iaiibha.”

O athu iá ni mazunda a athu ku mundu uoso, a mono kuila o kitangelu kia Bibidia, ki tena ku ku kuatekesa kukala ni muenhu uambote lelu. (Izaia 48:17, 18) O Bibidia i tena ku ku kuatekesa (1) kubatula kiambote o maka (2) kusola makamba a kidi (3) kudibhana ni hele (4) o kima kia beta-o-kota, o kuijiia o kidi kia lungu ni Nzambi. O itendelesu ia Bibidia i tunda kua Nzambi, mu kiki nuka ua-nda lueza se u belesela o itendelesu ioso. Nzambi nuka u tu bhana itendelesu iaiibha.

O kia beta-o-kota, o kumateka. Mbambe jebhi jambote ja-nda ku ku kuatekesa phala kumateka, ni kuuabhela dingi o kitangelu kié kia Bibidia?

Ndunge jebhi ja-nda ku kuatekesa kuuabhela ni kukatula mbote mu kitangelu kié kia Bibidia? Tala ndunge jitanu jene mu kuatekesa athu avulu.

Sola kididi kia tululuka. Sota kukala mu kididi kia kondama. Katula o ima i tena ku ku landukisa, phala kutonginina kiambote o maka u ua mu tanga. Kukala mu kididi kiala ni mukengeji uambote, kia mu bhusa kiambote, kutena ku ku kuatekesa kukatula mbote mu kitangelu kié.

Pelepalala o muxima ué. Kuma o Bibidia divulu dia Tat’etu ia diulu, phala kukatula mbote, ua tokala kukala kála u mon’a ndenge u sanguluka mu kuívua o misoso ia tat’ê ia henda. Se uala ni ibanzelu iaiibha ia lungu ni Bibidia, tula-iu phala Nzambi n’a tene ku ku longa.—Jisálamu 25:4.

Bhanga musambu ande dia kutanga. Mu Bibidia muala ibanzelu ia Nzambi, mukonda dia kiki, ua tokala kubhinga o kikuatekesu kiê phala ku i tendela. Nzambi u kanena “kubhana o Nzumbi Ikôla kua ió oso a mu bhinga.” (Luka 11:13) O nzumbi ikôla i ku kuatekesa kutendela o ibanzelu ia Nzambi. Mu kubhita ithangana, ia-nda jikula o kilunji kié phala ku “tungulula ima ioso, katé ni ima ia zongo ia sueka Nzambi.”—1 Kolindo 2:10.

Xinganeka ku ima i ua mu tanga. Kana kutanga ngó phala kuzubha o jimbandu. Xinganeka ku ima i ua mu tanga. Dibhuidise: Idifua iebhi i ngi mona ku muthu iú? Kiebhi ki ngi tena kukumbidila o milongi íii ku muenhu uami?’

Xinda jimbambe. Phala kukatula mbote mu kitangelu kia Bibidia, sota kutanga kima kia-nda ku kuatekesa ku muenhu. Eie u tena kuxinda o jimbambe jiji: ‘Nga mesena kudilonga ngó ia lungu ni idifua ia Nzambi.’ ‘Nga mesena kukala ngi muthu uambote, munumi mba muhatu uambote.’ Mu kusuka-ku sola jimbandu ja Bibidia ji tena ku ku kuatekesa kukumbidila o jimbambe jiji.a

O jindunge jitanu jiji, ja-nda ku ku kuatekesa kumateka kutanga o Bibidia. Maji ihi i u tena kubhanga phala kusanguluka mu kutanga o Bibidia? O milongi ia-nda kaiela ia-nda ku bhana jindunge.

O kuila o kitangelu kié kia Bibidia ki ku bhekela usudi, mba kusanguluka? O kusanguluka kuijila mu ukexilu uambote ua kutanga. Tu mone se ihi i u tena kubhanga phala kuuabhela dingi o kitangelu kié.

Sola Bibidia io lungulule ni kidi kioso, ki i bhonzo ku i tendela. Se u tanga divulu diala ni izuelu iavulu ia bhonzo mba izuelu iókulu kiá, eie kua-nda kala ni vondadi ia kutanga o divulu didi. Mu kiki, sola Bibidia iala ni izuelu ia bhebhuluka i u tendela kiambote, i tula ku muxima ué, io lungulule ni kidi kioso.a

Tanga ni kikuatekesu kia internete. Lelu, o Bibidia ki iala ngó mu jipapela mba divulu di tu tena kukuata bhu maku, maji iala uê mu internete. Sai Jibibidia a tena ku ji tanga bhu kaxi ka internete mba ku ji katula phala ku ji tanga mu jikomputadolo, jitablete, ni mitelembe ia kafuetele. Sai Jibibidia ué, jala ni jifalamenda ji tena ku ku kuatekesa kutala jivelusu ja mukuá, mba ku ji sokesa ni jibibidia ja mukuá, kioso ki uia ni kutanga. Se ua mesena kuívua, mu veji dia kutanga, sé-ku maka, mukonda sai Jibibidia jo ngalavale kiá. Athu avulu a uabhela kuívua o milongi ia Bibidia kioso kiendela mu maximbombo, kioso kia mu sukula, mba kubhanga kima kioso-kioso kia ehela kuívua. O kuila u tena kufikisa o maukexilu iá?

Tokuesa o milongi i ua mu tanga. O jifalamenda ja kutokuesa o Bibidia, ji tena ku ku kuatekesa kukatula mbote mu kitangelu kié. Kuene jimapa ja jixi jo tange mu Bibidia. O jimapa jiji ja-nda ku ku kuatekesa kusanga ididi, ni kuijiia se kithangana kiahi kia bhiti o misoso i ua mu tanga. O milongi iala mu kadivulu kaka, mba iala mu mbandu “Ensinos Bíblicos” mu kijimbuete kia jw.org, i tena ku ku kuatekesa kuijiia kiambote o dilomboluelu dia jimbandu ja Bibidia.

Tanga mu maukexilu avulu. Se kutanga o Bibidia tundé ku dimatenu ndú ku disukilu, kua mu ku bhonza, o kuila u tena kumateka mu kutanga o jimbandu ji ua zolo dingi? Se ua mesena kudilonga dingi ia lungu ni muthu a mu tange kiavulu mu Bibidia, u tena kusola jimbandu ji zuela ia lungu ni muthu muenhú. Mu kifika mu kaxa, “Ejiia o mienhu ia athu a a tange mu Bibidia.” muala maukexilu aiiadi. Nange ua mesena kutanga o Bibidia mu ukexilu kala kia bhitile o misoso. U tena kufikisa o maukexilu iá?

O Bibidia ki i sokela ni divulu dioso-dioso. Mu Bibidia muala itendelesu ia Mubhangi uetu. (2 Timote 3:16) O njimbu ia Bibidia i tena kutula ku muxima uetu. Mu kidi, o Bibidia iamba: “O kizuelu kia Nzambi kima kia muenhu, kiala ni kutena.” (Jihebeleu 4:12) O Bibidia iala ni kutena kua kulungulula o muenhu uetu, mu maukexilu aiiadi— i tu bhana itendelesu se kiebhi ki tua tokala kuenda ku mundu iú lelu, i tu kuatekesa ue kuijiia kiambote Nzambi ni ikanenu iê.​—1 Timote 4:8; Tiiaku 4:8

I tena kulungulula o muenhu ué kindala. O Bibidia i tena ku ku kuatekesa mu maukexilu avulu ku muenhu ué. Iene i bhana itendelesu ia tokala ia lungu ni ima íii.

• Ku di bhana kiambote ni athu.​—Efezo 4:31, 32; 5:22, 25, 28, 33.

• Kukala ni muxima ua zele, ni sauidi iambote.​—Jisálamu 37:8; Jisabhu 17:22.

• Kuijiia o ima iambote ni iaiibha.​—1 Kolindo 6:9, 10.

• Kukalakala phala kukala ni kitadi kia soko.​—Jisabhu 10:4; 28:19; Efezo 4:28.a

Sai dikaza mu ixi ia Asia, a mono o valolo ia itendelesu ia Bibida. Kala ki bhita ni makaza a ubhe, ene akexile mu dibhana ni ibhidi iavulu ia lungu ni kudijiia kiambote mudiâ, ni kukala ni ukamba uambote mu ukaza. Mu kiki, ene a mateka kukumbidila o milongi ia kexile mu dilonga mu Bibidia. Ihi ia bhiti ni ene? O diiala Vicent, uambe: “O milongi i tua kexile mu dilonga mu Bibidia, ia tu kuatekesa ku di bhana ni ibhidi mu ukaza uetu, ni henda ioso. Kukumbidila o milongi kala ki zuela o Bibidia, kuene mu tu kuatekesa kukala ni kusanguluka ku muenhu.” O muhatu uê Annalou, uambe ue kiki: “O misoso ia athu a a tange mu Bibidia ia tu kuatekesa kiavulu. Lelu nga sanguluka dingi mu ukaza ni mu kukumbidila jimbambe ji tua xindi ku muenhu.”

I ku kuatekesa kuijiia Nzambi. Phala Vicent, o Bibidia ki ia kuatekesa ngó o ukaza uê, muene uambe dingi: “Mukonda dia kutanga o Bibidia, lelu nga zukama dingi kua Jihova mukulu ndenge.” O izuelu ia Vicent ilondekesa o kima kia beta-o-kota—o Bibidia i tena ku ku kuatekesa kukala ni ukamba ni Nzambi. Mu kubhanga kiki, eie kua-nda katula ngó mbote ku itendelesu ia Bibidia, maji ua-nda kuijiia ue Nzambi kala kamba dié. Eie ua-nda mona ue kuila, muene u kanena ia lungu ni hádia, kioso ki ua-nda sanguluka ni “muenhu ua kidi”—ua-nda xalela katé ku hádia ni hádia. (1 Timote 6:19) Sé-ku divulu dia mukuá di tena ku kubhana o kidielelu kia muenhu iú.

Se u kolokota mu kutanga o Bibidia, ua-nda tena ue kutambula o mabesá iá​—kubhanga kiki kua-nda ku kuatekesa kukala ni muenhu uambote ni kuijiia kiambote Nzambi. Maji kioso ki uia ni kutanga o Bibidia, eie ua-nda banza mu ibhuidisu iavulu. Se kiki ki bhita, xinganeka mu phangu iambote ia ngolambole mukua Etiiopia, ua tungile 2000 a mivu ku dima. Muene ua kexile ni ibhuidisu iavulu ia lungu ni Bibidia. Kioso kia mu ebhuidisa se ua tendela o musoso ua kexile mu tanga, muene ua tambuijila: “Ki ngala kutanga ki ngi jimbulukila kiebhi, sé muthu ku ngi lomboluela-kiu?”b Muene ua xikinine o kikuatekesu kia Felipe uexile dixibulu dia Jezú, Felipe uexile mulongexi uambote ua Bibidia. (Ikalakalu 8:30, 31, 34) Kiene kimoxi ue, se ua mesena kuijiia dingi ia lungu ni Bibidia, eie u tena kubhinga o milongi ia Bibidia bhu kaxi ka kijimbuete kia www.pr418.com mba kusonekena mu ijimbuete iala mu Mulangidi iú. Eie u tena ue kubhinga ku Jimbangi ja Jihova, ala mu diembu dié mba kuia mu Kididi kia Ubhezelu bhua zukama ku inzo ié. Mukonda diahi ku tange o Bibidia kindala, phala o milongi iala-mu i ku kuatekese kukala ni muenhu uambote?