A Nanhi Ene mu Boka o Njimbu Iambote?

“. . . ia bhingi ku i tula mu ngongo ioso.”—MATESU 24:14.

O NJIMBU iambote, ene mu i tula ku mundu uoso ku Jimbangi ja Jihova. Ene mu bhanga kiki, mu maukexilu avulu. Kia dianga . . .

Mu Kuboka. Kála kia bhangele Jezú, ni maxibulu mê, o Jimbangi ja Jihova, ene mu sota ué o athu phala ku a tudila o njimbu iambote. (Luka 8:1; 10:1) Ene ka kingila kuila o athu eza mu ku a sanga. Ene a bhana Umbangi ku athu ia lungu ni Utuminu ua Nzambi—Sambuadi dia mazunda ndenge—ene mu bhanga o kikalakalu kiki. Ene a boka mu inzo, ni inzo, mu ikoka, ni mu kaxi ka mutelembe ua kafuetele, ni mu kaxi ka ima ia mukuá dingi. Ku muvu ua tundumu, o Jimbangi a bhange mazunda a ji ola mu kikalakalu kiki.

Ene kene mu boka ngó ku athu, o ima ia lungu ni Utuminu ua Nzambi, a longa ué ‘kualuka ima ioso ia tumu Jezú.’ (Matesu 28:20) Ene izuua ioso a longa o Bibidia ku nake dia mazunda a athu ku mabhata mâ mu ngalasa.

O Umbangi ene mu u bhana ku mundu uoso—236 a ixi ndenge. Ene mu bokela athu a kikonda kioso. Ene a bokela mu jixi, ni mu jimbanza, mu mixitu kála ia Amazônia, ni ia Siberia, mu ikangalakata ia África, ni mu Milundu ia Himalaya. Ene kene mu tambula kitadi mu kikalakalu kiki, ene a bhanga kiki, mu vondadi iâ, ni kitadi kiâ, mukonda dia henda iâ kua Nzambi, ni ku athu. Ene a boka uê mu kaxi ka . . .

Madivulu. O kadivulu kaka, kala ni diambu, O Mulangidi u Bhana Ngolokela ia Utuminu ua Jihova, a ka bhange mu 42 a mazunda, mu 185 a madimi. O kadivulu kamúkua, o Despertai!, a ka bhange ué mu 40 a mazunda, mu 83 a madimi.

O madivulu, ni tudivulu tuofele, ni tumikanda ni ji CDs/MP3s, ni DVDs, iene mu jimbulula o milongi ia Bibidia mu 540 a madimi ndenge. O Jimbangi a bhana kiá 20 a mazunda mu dikuinhi dia muvu ia bhiti, ku athu oso a tungu mu ixi!

O Jimbangi ja Jihova ene mu bhanga ué o Bibidia mu madimi avulu. O Tradução do Novo Mundo das Escrituras Sagrada—ene mu i bhanga ku Jimbangi ja Jihova—tu i sanga mu ixi ioso mu 96 a madimi. Ene ué a bhana kiá ku athu 166 a mazunda a ji Bibidia ndenge. O Jimbangi, ene uâ mu tula o njimbu iambote ia Utuminu mu . . .

Iônge ia Jikidistá. Semana joso, o iônge ene mu i bhanga mu Kididi kia Kubheza, ki sidivisu ioso-ioso ngó ia lungu i ubhezelu; o iônge íii, a i bhanga phala ku longa o athu. O Madiskursu ene mu bhanga mu kididi kiki, a zuela maka alungu ni Bibidia, ene mu di longa o Bibidia ni kikuatekesu kia Mulangidi, ni madivulu a mukuá. Mu iônge íii, o Jimbangi ja Jihova, a di longa uê o ukexilu uambote ua ku tula o njimbu iambote.

O Jimbangi ja Jihova a di longa o milongi imoxi mu 107.000 a ilunga mu ixi ioso, phala ene oso ku kala ni muxima umoxi. Mu iônge íii, muthu uoso-uoso u bokona. Phala ku bokona, ka bhinga-mu kitadi. O ima ioso íii, ki ieji kala ni valolo, se o Jimbangi ka kumbidila o milongi iene mu boka. Mu kiki ene a boka ué o njimbu iambote mu kaxi ka. . .

Ukexilu uambote. Ene a bhanga ioso phala ku kala ni ukexilu uambote ku muenhu uâ, mu ku bhanga ima iambote ku akuâ, kála kia mesena ene. (Matesu 7:12) Sumbala akua ituxi, saí ithangana a lueza uâ, ene a bhanga ioso phala kulondekesa o henda ku athu oso, ki ku a tudila ngó o njimbu iambote, maji ene mu ku a kuatekesa uâ, mu ithangana ia ku bhindama.

O Jimbangi ja Jihova, ka-nda tena ku bhangesa kuila o athu oso a xikina o kidi, mu kaxi ka ulongelu uâ. Maji, kioso ene kia bhanga o kikalakalu kiki, ki sangulukisa o muxima ua Jihova, o dizubhilu dia-nda kuíza muene kála kia kanena Jezú. Kiki kia-nda lombolola ihi phala o ixi, ni athu a tungu mu ixi?

[Foto ku bandu 7]

O njimbu iambote ene mu i tula ku mundu uoso ku Jimbangi ja Jihova

O “Dizubhilu” Ihi?

‘. . . kiene kia kèza o dizubhilu.’—MATESU 24:14.

MU izuua íii, athu ene mu zuela kiavulu ia lungu ni dizubhilu dia mundu. Madivulu, jifilme, tudivulu, a tanga o kizuua kia kufundisa, kuila kizuua kia jiphaxi. A tanga kibuikilu kia ixi ioso, ibamba i jibha, ni kuila o ixi ia-nda tema kiavulu.

O jingeleja ene mu banza ué kiki; athu avulu a longa kuila o “dizubhilu” dia-nda tula ku athu oso a tungu mu ngongo. Saí ngijiie uambe ia lungu ni divulu dia Matesu 24:14, kuila: “O velusu íii, iene ia beta-kota mu Mak’â Nzambi . . . Etu tua zukama ku kibuikilu, se-ku muthu ua-nda xikina kuila o kibuikilu kia bhixila muene.”

O ibanzelu íii, ilondekesa kuila athu ka mu bhana valolo ku kidi kiki: Jihova Nzambi, ua tenene kumba ixi, “ua i xikika” muéne “ka i’xia kiphulungunzu kia hatu, kana; [maji] ua i bhanga phala athu ku tunga-mu.” (Izaia 45:18) Kienhiki, kioso Jezú kiambe ia lungu ni “dizubhilu,” ka kexile mu zuela kuila o ixi a-nda ku i buika; né muene kuila o athu oso mu ngongo a-nda ku a buika. Muéne ua kexile mu zuela kuila o athu a iibha—a dituna ku belesela o itumu ia Jihova— ene ngó a-nda ku a buika.

Xinganeka mu kifika kiki. Eie uala ni nzo ia uabha, iu ua i bhana athu phala ku kala-mu mu ngalasa. Saí iá, a dibhana kiambote ni akuâ, o inzo a i langa kiambote. Maji a mukuá a sota maka, a bhânga ni akuâ ala ni ukexilu uambote. Ene a zanga o inzo iê, a dituna o kikuatekesu ki ua a bhana phala kueha o ukexilu uâ, ua iibha.

Kiebhi ki ueji batula o maka enhá? O kuila ueji bula o inzo iê? Ki ueji ku i bula kana. Nange ueji katula-mu ngó o athu aiibha, ni ku iudika o ima ioso ia zange.

Kiene ué kia-nda bhanga Jihova. Muéne ua tumina o mukua jisalamu ku soneka: “Mukonda oso a bhanga ima iaiibha, a xikamena ku a batula bhoxi; oso-phe a kinga Jihova, ene a lundula ixi. Bhu bhita ngó kathangana, mukua phulu-ó ubhua athu ku mesu; u tala kiambote, bhu kididi kiê kala-bhu dingi. Oso-phe alenduka, ene a lundula o ixi; A kala ku ngalasa ni kutululuka kuavulu.”—Jisálamu 37:9-11.

O poxolo Phetele ua tange ué o maka enhá. Mu kaxi ka nzumbi ikôla, muéne ua soneka: “Kua kexile maulu m’okulu, ni oxi, ia tomboloka mu menha, mu’axaxi ka menha, mu kizuelu kia Nzambi. Ni kuila ue, mu kizuelu kia Nzambi oxi ioio ia kexile-ku, ia bobele mu Diluvio dia menha, anga i jima.” (2 Phetele 3:5, 6) O poxolo ua kexile mu zuela o Dilúvio mu izuua ia Noué. O athu ngó a a buika, o ixi kana. O Dilúvio dia bhiti ku mundu uoso, dia xisa “kijimbuete kua ió oso enda ni kubhuma.”—2 Phetele 2:6.

Phetele uambe dingi: “O maulu ala-ku, ni ixi-phe, ia xikamena túbhia.” Se tu xinganeka ngó mu izuelu íii, tua-nda banza kuila kiki kidi muene. Maji tua tokala ku tanga o mbandu ioso ia velusu iambe: “Kia ku buikisa athu abhumu.” O kibuikilu ki kia-nda buika o ixi, maji kia-nda buika ngó o athu a iibha. Kioso kia-nda bhita o kibuikilu kia athu abhumu ihi ia-nda bhita dingi? Phetele ua soneka: “Maji etu-phe, tua kinga, uila kia bhana Nzambi muéne o kizuelu, maúlu m’obhe, [o Utuminu ua Nzambi mu kaxi ka Mexiia] ni ixi i’obhe, [o athu a iuka o mixima] mua tunga ubatuilu ua kuiuka.”—2 Phetele 3:7, 13, NW.

O ikanenu ia Bibidia ilondekesa ué kuila o “dizubhilu” dia mundu dia zukama. Tanga o madivulu a Matesu 24:3-14; ni 2 Timote 3:1-5, ia-nda kulondekesa kuila tuala ku dizubhilu.a

Ki ku bhangesa ku mesena kuijiia se mukonda diahi athu ene mu bhanga kavuanza kavulu ka lungu ni divulu dia Matesu 24:14, se o velusu íii, katé muene ni mona ndenge u tena ku i tendela kiambote? Saí kima kiene mu ku a bhangesa ku bhanga o kavuanza kuoso kaka. Satanaji kene mu kuehela athu kuijiia o kidi ki tu sanga mu Mak’â Nzambi. (2 Kolindo 4:4) Nzambi, uene mu sueka ué o ikanenu iê ku jinjimu, maji ua idikisa ku athu a lenduka o mixima. Jezú uambe ia lungu ni maka enhá: “Nga ku ximana Tata, Ngana ia diulu ni oxi, mukonda im’iii ua i sueka, jinjimu ni adimuka ka i mono, maji ua idikiza anandenge.” (Matesu 11:25) Kima kiambote ku kala mu kaxi ka athu a lenduka o mixima, ejiia se o Utuminu ua Nzambi ihi, a kingila ku tambula o mabesá a-nda bheka o utuminu iú, phala athu enioso a u dielela!