“Nanhi o Kimbadi Kia Fiiele?”

1, 2. Jezú ua mu tu bhana kudia bhu kaxi ka nanhi, ni mukonda diahi tua tokala ku bhana valolo ku kimbadi kiki?

“PHANGE jami, eme ki ngi tena ku tanga o ithangana ioso i nga tambula o madivulu u mua soneka mua kexile o milongi i nga bhindamene kiavulu.” Kiene kia zuela o phang’etu ia muhatu, kioso kia sonekena o jiphange jetu ku Betele ia Brooklyn phala ku a sakidila. O kuila u divua ué kála kia divu muéne? Avulu a divua kiki. O kuila kiki, ki tu tukumukisa? Kana.

² O kudia mu nzumbi ku tu tambula mu kithangana kia tokala, kulondekesa kuila Jezú, uala ku Pholo ia kilunga, ua mu kumbidila o kikanenu kiê kia ku tu bhana o kudia. Muéne ua mu tu bhana o kudia bhu kaxi ka nanhi? Jezú uambe kuila kioso kieji mateka o ku tumina, muéne ueji sola o ‘kimbadi kia fiiele’ phala ku ‘uanena kúdia mu ola joso ja tokala’ ku dibhata diê.a (Tanga Matesu 24:45-47.) Jezú ua mu bhana o kudia ku jiselevende jê ja kidi bhu kaxi ka kimbadi kia fiiele, mu izuua íii i sukidila-ku. Mu kiki, tua tokala ku bhana valolo ku kimbadi kia fiiele. O sauidi ietu mu nzumbi ni ukamba uetu ni Nzambi, uijila bhu kaxi ka kimbadi kia fiiele.—Mat. 4:4; Nzuá 17:3.

3. Ihi ia zuela o madivulu metu ia lungu ni kimbadi kia fiiele?

³ Kiebhi ki tu tena ku tendela o kifika kia Jezú kia lungu ni kimbadi kia fiiele? Mu ukulu, o madivulu metu a zuelele kiki: Ku Pendekoxi, ku muvu ua 33 K.K., Jezú ua bhanene ku kimbadi kia fiiele, o kikalakalu kia ku tambula konda ia dibhata diê. Tundé mu kithangana kieniókio, o kimbadi ki lombolola o kibuka kia Jikidistá joso a a undu mu ixi. O dibhata diê, di lombolola o Jikidistá jimoxi eji a a undu, kala muthu mu diâ. Ku muvu ua 1919 Jezú ua solo o kimbadi kia fiiele phala ku tambula konda ia “ima ioso iala na-iu”—o ima iê ioso ia tokala ku Utuminu iala mu ixi. Maji kioso ki tua di longo dingi o milongi íii ni ku xinganeka ni musambu, tua mono kuila ki tu tendela kiambote o izuelu ia Jezú, mu kiki, kua bhingi ku jimbulula kiambote o milongi íii. (Jisa. 4:18) Tua-nda di longa o kifika kiki, ki kale tua dielela kuia ku diulu mba ku kala mu ixi.

KIEBHI KIA DI KUMBIDILA O KIFIKA?

4-6. Mukonda diahi tu xikina kuila o kifika kia Jezú kia lungu ni kimbadi kia fiiele, kia mateka ngó ku di kumbidila ku muvu ua 1914?

⁴ O jivelusu ja mukuá mu kibatulu 24 kilondekesa kuila o kifika kia kimbadi kia fiiele, ki ki mateka ku di kumbidila ku muvu 33 mu Pendekoxi, maji ia mateka mu izuua íii isukidila-ku. Tua-nda di longa kiebhi ki tu kuatekesa o Bibidia kuijiia kiambote o maka enhá.

⁵ O kifika kia Jezú kia lungu ni kimbadi kia fiiele, kia tokala ku kikanenu kiê kia ‘kijimbuete kia kutukuluka kué, ni kia dizubhilu dia mundu.’ (Mat. 24:3) O mbandu ia dianga ia kikanenu kiki, ki tu sanga mu divulu dia Matesu 24:4-22, ia di kumbidila mu veji jiiadi—kia dianga, tundé ku muvu ua 33 K.K., katé ku muvu ua 70 K.K., o kikanenu kia kaiiadi, kia beta-o-kota, kia di kumbidila mu izuua ietu. O kuila kiki ki lombolola kuila o izuelu ia Jezú ia lungu ni kimbadi kia fiiele kieji di kumbidila ué mu veji jiiadi? Kana.

⁶ O izuelu i tu sanga mu divulu dia Matesu 24:29, i londekesa kuila Jezú ua kexile mu zuela ia lungu ni izulukutu ieji bhita mu izuua ietu. (Tanga Matesu 24:30, 42, 44.) Mu kuzuela ia lungu ni izulukutu ia-nda bhita mu kizuua kia hadi ia dikota, muéne uambe kuila o athu a-nda mona “Mon’a Muthu iú uiza ku matuta ma diulu.” Mu ku suluka, muéne ua zuelela o athu ió eji kala ku muenhu mu izuua isukidila-ku phala ku di langa kioso kia zuela: “Mbata kizuua kià Keza Ngana ienu ki mua k’ijiia,” ni kuila o “kithangana ki mua ki fikile, kiene kia kà tukuluka o Mon’a Muthu.”b Mu izuelu íii—Jezú ua zuela ia lungu ni izulukutu ieji bhita mu izuua isukidila-ku—muéne ua zuela ué ia lungu ni kifika kia kimbadi kia fiiele. Mu kiki, o izuelu iê ia lungu ni kimbadi kia fiiele ia mateka ku di kumbidila ngó kioso kia mateka o izuua isukidila-ku, ku muvu ua 1914. Tu tena ku xikina mu kidi kiki. Mukonda diahi?

7. Kibhuidisu kiebhi kia dikota kia moneka kioso kia mateka o kithangana kia ku bhongolola, ni mukonda diahi?

⁷ Xinganeka mu kibhuidisu kiki: ‘Nanhi o kimbadi kia fiiele?’ Ku hama ia dianga, ki ku bhingile ku bhanga o kibhuidisu kiki. Kála ki tua mono kiá mu milongi ia dianga, o jipoxolo a kexile ni kutena kua ku bhanga madiuanu, ni ku bhana ué o kutena kuku ku athu, kiki kilondekesa kuila a kexile mu bhanga madiuanu ni kikuatekesu kia Nzambi. (Ika. 5:12) Mu kiki, mukonda diahi o athu a tokalele kuibhula se nanhi a mu solo kua Kristu phala ku kala ku pholo dia ima? Maji ku muvu ua 1914, o ima ki i difuile. O kithangana kia ku bhongolola kia mateka ku muvu uenió. O kithangana kia bhixile phala ku tungula o jimbutu jambote ku jimbundu ja iangu. (Mat. 13:36-43) Kioso kia mateka o sidivisu ia ku bhongolola kua moneka kibhuidisu kia dikota: Mukonda kuene Jikidistá javulu ja makutu ji zuela kuila akaiedi a kidi a Jezú, kiebhi o mbutu iambote—o Jikidistá a a undu—eji ku a ijiia? O kifika kia kimbadi kia fiiele kia tambuijila o kibhuidisu kiki. O Jikidistá a a undu, akaiedi a Jezú, ene eji tambula o kudia kuavulu mu nzumbi.

NANHI O KIMBADI KIA FIIELE?

8. Mukonda diahi o Jikidistá a a undu ene ngó a tokala ku bhanga mbandu ku kibuka kia kimbadi kia fiiele?

⁸ O Jikidistá a a undu mu ixi, ene ngó a tokala ku bhanga mbandu ku kibuka kia kimbadi kia fiiele. O jiphange jiji a exana ‘akunji a sobha,’ a a tumina ‘ku jimbulula o imbamba ia madiuanu iene mu bhanga Nzambi ió ua a katula mua vundu iú ua a bheka mu mukengeji uê u diuanesa.’ (1 Phe. 2:9) Kiki kilombolola kuila o jiphange jiji, o ‘akunji a sobha,’ ene ngó a tokala ku longa o kidi kia Mak’â Nzambi ku jiphange.—Mal. 2:7; Dij. 12:17.

9. O kuila o Jikidistá joso a a undu a bhanga mbandu ku kibuka kia kimbadi kia fiiele? Jimbulula.

⁹ O kuila o Jikidistá joso a a undu ala mu ixi, a bhanga mbandu ku kibuka kia kimbadi kia fiiele? Kana. Mu kidi, o Jikidistá joso a a undu kala ni kikalakalu kia ku uana o kudia ku jiphange joso ku mundu. Mu jimbutu jambote, muala ué jiphange a a undu a mu kalakala kala tufunga mba akuatekexi a tufunga mu ilunga iâ. Ene a longa kioso kiaia mu boka ku mabhata ni mu ilunga, ene a kaiela ué o itendelesu i bhana o Betele ia Brooklyn ni ufiiele uoso. Maji ene kene mu uana o kudia ku jiphange joso ku mundu. Bhu kaxi ka Jikidistá a a undu saí ué o jiphange jetu ja ahatu a a undu, maji ene kene mu longa mu kilunga.—1Kol. 11:3; 14:34.

10. Nanhi o kimbadi kia fiiele?

¹⁰ Nanhi-phe o kimbadi kia fiiele? Phala ku kumbidila o izuelu ia Jezú ia lungu ni ku bhana kudia ku athu avulu bhu kaxi ka maku a athu ofele, o kimbadi kiki, kibuka kiofele kia jiphange a a undu a mu pelepalala ni ku uana o kudia mu nzumbi phala o jiphange mu izuua íii i sukidila-ku ia mu tumina Kristu. Mu izuua íii i sukidila-ku, o jiphange a a undu a tokala ku kibuka kia kimbadi kia fiiele, ene mu sidivila kumoxi ku Betele ia Brooklyn. Mu izuua ietu o kimbadi kia fiiele, kiene o Kibuka Kia Utuminu kia Jimbangi ja Jihova. O kizuelu ‘kimbadi,’ mu kifika kia Jezú, kia mu londekesa kála muthu umoxi ngó, kiki ki lombolola kuila o kimbadi, kibuka kia athu. O Kibuka Kia Utuminu a batula o maka kumoxi.

O DIBHATA DIÊ A NANHI?

11, 12. (a) Iebhi o ikalakalu iiadi ia tambula o kimbadi kia fiiele? (b) Kizuua kuxi kia bhana Jezú o kikalakalu kia ku tambula konda ia dibhata diê ku kibuka kia fiiele, ni a nanhi a solo?

¹¹ O kifika kia Jezú ki londekesa kuila o kimbadi kia fiiele kia tambula ikalakalu iiadi ki i difu. Kia dianga, o ku tambula konda ia dibhata diê, kaiiadi, o ku tambula konda ia ima ioso ia ngana. Mukonda o kikanenu kia mu di kumbidila ngó mu izuua íii isukidila-ku, o ikalakalu iiadi íii, eji ku i bhana ngó ku muvu ua 1914 kioso Jezú kieji mateka ku tumina.

¹² Kizuua kuxi kia bhana Jezú o kikalakalu kia ku tambula konda ia dibhata diê ku kimbadi kia fiiele? Phala ku tambuijila o kibhuidisu kiki, tua tokala ku xinganeka o ima ia bhitile ku muvu ua 1914—kioso kia mateka o ku bhongolola. Kala ki tua di longo kiá, mu kithangana kieniókio, ibuka iavulu ia athu ambele kuila exile Jikidistá. Mu kibuka kiebhi mueji sola Jezú o kimbadi kia fiiele? O kibhuidisu kiki a ki tambuijila kioso Jezú ni Tat’ê eza mu kuongola phala ku mona kiebhi kia mu kuenda o ima mu tembulu mba o ubhezelu ua kidi, tundé ku muvu ua 1914 katé ku dimatekenu dia muvu ua 1919.c (Mal. 3:1) Ene a sangulukile ni kibuka kiofele kia Adilongi a Bibidia akexile fiiele, a londekesele kuila a kexile ni Jihova ni Mak’â me ku mixima iâ. Mu kidi, ene a bhingile hanji ku a zelesa, maji ni ku lenduka kuoso ene a kaiela o itendelesu mu kithangana kia phaxi ni kithangana kia ku a zelesa. (Mal. 3:2-4) O Adilongi ió a Bibidia exile muene mbutu iambote ia Jikidistá. Ku muvu ua 1919, kiexile o kithangana kia ku fukunuka mu nzumbi, Jezú ua solo bhu kaxi ka Jiphange a a undu, o jiphange ala ni uhete, phala ku kala kimbadi kia fiiele anga u a bhana o kikalakalu kia ku tambula konda ia dibhata diê.

13. A nanhi ué a tokala ku dibhata ni mukonda diahi?

¹³ O dibhata diê a nanhi? O athu oso a a bhana o kúdia. Ku dimatekenu dia izuua isukidila-ku, o dibhata diê, exile o Jikidistá joso a a undu. Mu ku bhita kithangana, o dibhata diê, diexile uê o jimbudi ja mukuá. Kindala, o jimbudi ja mukuá ene a beta kuvula mu “kilunga kimoxi” kia mu tumina Jezú. (Nzuá 10:16) O ibuka iiadi i tambula o kudia ku uana o kimbadi kia fiiele mu kithangana kia tokala. O kuila o jiphange a bhanga mbandu ku Kibuka Kia Utuminu, a tokala ku kibuka kia kimbadi kia fiiele lelu, a bhanga ué mbandu ku dibhata? O jiphange jiji a bhingi ué ku a uanena o kudia mu nzumbi. Mu kiki, kala phange mudiâ mu kibuka kiki, uejiia kuila muéne ua tokala ué ku dibhata, kála kia tokala o akaiedi oso a Jezú.

14. (a) Kikalakalu kiebhi kia tambula o kimbadi kia fiiele, kia lungu ni Ihi? (b) Ihi ia tendelesa Jezú ku kimbadi kia fiiele? (Tala o kaxa ‘Se o Selevende’oio ia Iibha-phe . . . ’)

¹⁴ Jezú ua bhana kikalakalu kia dikota ku kimbadi kia fiiele. Mu izuua ia Bibidia, o kimbadi kia fiiele, mba o kimbadi, uexile muthu u tambula konda ia dibhata. (Luka 12:42) Mu kiki, o kimbadi kia fiiele kia tambula o kikalakalu kia ku tambula o konda ia ima mu nzumbi. O kikalakalu kiki kia lungu ni ku langa o jimbongo joso, o sidivisu ia ku boka, o iônge ia ilunga ni ia makota, o ku bhanga o madivulu phala ku boka, ku di longa ubheka ni mu kilunga. O dibhata di dielela o kudia kuoso mu nzumbi kua a bhana o kimbadi kia fiiele.

KIZUUA KUXI—KIA MU BHANA O KIKALAKALU KIA KU TAMBULA KONDA IA IMA IOSO IA NGANA IÊ?

15, 16. Kizuua kuxi kia-nda tumina Jezú o kimbadi kia fiiele ku tambula konda ia ima ioso iala na-iu?

¹⁵ Kizuua kuxi kia bhana Jezú o kikalakalu kia kaiiadi kia—‘ku tambula konda ia ima ioso iala na-iu?’ Jezú uambe: ‘O kimbadi’okio ki zediua, k’iza ngana iê ni a mu sange kiene kiala mu bhanga! Kidi kiene ngi mi ambela, kuma u mu bhana ku tambula konda ia ima ioso iala na-iu.’ (Mat. 24:46, 47) Tala kuma Jezú ua bhana o kikalakalu kia kaiiadi kioso kia sange “kiene kiala mu bhanga” o kimbadi, ku uana o kudia mu nzumbi ni ufiiele uoso. Mu kiki, kua bhiti kithangana ande dia ku bhana o kikalakalu kia kaiiadi. Phala kuijiia kiebhi ni kizuua kuxi kia bhana Jezú o kikalakalu kia ku tambula konda ia ima ioso iala na-iu, tua bhingi kuijiia ima iiadi: Kizuua kuxi kia bhixila ni iebhi o ima iê?

¹⁶ Kizuua kuxi kia bhixila Jezú? O kitambuijilu tu ki sanga mu izuelu ia Jezú, mu divulu dia matesu mu kibatulu kia 24, mu jivelusu ja dianga. Lembalala kuila o ibatulu i tua di longo kiá i zuela kuma Jezú ‘ua mu kuíza’, o kizuelu kiki kilondekesa o kithangana kioso Jezú kia-nda kuíza mu tangela ni ku fundisa o athu ku disukilu dia mundu iú.d (Mat. 24:30, 42, 44) Mu kiki o ‘uejilu’ mba ‘kuíza,’ kua Jezú kala kia zuela mu kifika kiê kia kimbadi kia fiiele kia-nda di kumbidila mu kithangana kia hadi ia dikota.

17. O ima ia Jezú ihi?

¹⁷ Ihi i lombolola o ‘ima ioso ia Jezú?’ Jezú ka tumbula o kizuelu “ima ioso” phala kulondekesa ngó o ima iala mu ixi. Mu kidi, muéne uala ni kutena ku diulu. Muéne uambe: “O kutena kuoso a ngi bhana-ku eme, ni mu diulu, ni mu ngongo.” (Mat. 28:18; Efe. 1:20-23) O ima iê ia lungu ué ni Utuminu ua Mexiia, ua tambula tundé ku muvu ua 1914, ua-nda tumina kumoxi ni akaiedi’ê a a undu.—Dij. 11:15.

18. Mukonda diahi Jezú ua-nda sanguluka mu ku tumina ku tambula konda ia ima ioso iala na-iu?

¹⁸ Ihi i tua tendela mu milongi ioso i tua di longo? Kioso kia-nda kuíza Jezú mu ku fundisa o athu mu kithangana kia hadi ia dikota, muéne ua-nda mona kuila o kimbadi kia fiiele, kia mu bhana kudia mu nzumbi ku dibhata diê ni ufiiele uoso. Mu kiki, Jezú ua-nda sanguluka, ua-nda bhana o kikalakalu kia kaiadi kia—ku tambula konda dia ima ioso iala na-iu. O ió a tokala ku kibuka kia kimbadi kia fiiele, a-nda tambula o kifutu kiâ ku diulu, kia ku tumina ni Kristu.

19. O kuila o kibuka kia fiiele kia-nda beta ku tambula o kifutu ku diulu, o jiphange ja mukuá a a undu ndenge? Jimbulula.

¹⁹ O Kuila o kibuka kia fiiele kia-nda beta-o-kota mu ku tambula o kifutu ku diulu, o jiphange ja mukuá a a undu ndenge? Kana. O kifutu kia kanena o kibuka kiofele mu veji imoxi, mu ku suka-ku, a-nda ku i uana ni akuâ. Mu kifika, xinganeka ia zuela Jezú ku 11 a jipoxolo jê mu usuku ande dia kufuá kuê. (Tanga Luka 22:28-30.) Jezú ua kanena o kibuka kieniókio kiofele kia maiala kuma, eji tambula o kifutu kiambote mukonda dia ufiiele uâ. Muéne ua-nda tumina kumoxi ni êne ku ungana uê. Maji mu ku bhita mivu muéne uambe kuila, o 144.000 oso eji xikama ku kiandu mu ku tumina né ku ungana uê. (Dij. 1:1; 3:21) Kiene kimoxi uê, kala kia zuela o divulu dia Matesu 24:47, muéne ua kanena kuila o kibuka kiofele kia maiala—o jiphange a a undu a tokala ku kibuka kia kimbadi kia fiiele—eji ku a bhana o kikalakalu kia ku tambula konda ia ima ioso ia mu tokala. Mu kidi, o 144.000 oso a-nda tumina nê ku diulu.—Dij. 20:4, 6.

20. Mukonda diahi Jezú ua solo o kimbadi kia fiiele, ni ihi i tua tokala ku bhanga?

²⁰ Bhu kaxi ka kimbadi kia fiiele, Jezú ua mu kumbidila o kikanenu kia bhange ku hama ia dianga—kia ku bhana kudia ku athu avulu bhu kaxi ka maku a athu a tolo. Jezú ua solo o kimbadi kia fiiele phala o akaiedi’ê a kidi—ki kale o Jikidistá a a undu mba o jimbudi ja mukuá—a tambule o kudia kuavulu mu nzumbi mu izuua íii isukidila-ku. Tua tokala ku sakidila, mu ku kuatekesa ni ufiiele uoso o jiphange a a undu, a tokala ku kimbadi kia fiiele.—Jihe. 13:7, 17.