O Difukunukinu dia Jezú Dilombolola Muenhu!

O DIFUKUNUKINU dia Jezú, ki di bhitile mu kasuekele mu ukulu, kala dia kambe valolo phala etu lelu. O poxolo Phaulu ua zuela o valolo ia difukunukinu dia Jezú kioso muéne kia soneka: ‘Kristu a dianga ku mu fukununa mu’alunga, iú ua di bhange ngunji ia tu dielelesa kuila athu oso afú kiá hádia ué a ka a fukununa. Kuma o ki ejila o kalunga ku muthu umoxi, ni ku muthu umoxi ué kuene ku ejila o ku fukununa o madifundu. Kala ene oso kia fuila mua Adá, kiene ué kia a phaphumuna mua Kristu.’—1 Kolindu 15:20-22.

Jezú a mu fukununa mu kizuua 16 kia mbeji ia Nizá ku muvu ua 33, K.K., o kizuua kia Jijudé ku bhana o idima iâ ia dianga kua Jihova Nzambi, mu kalatódio ka tembulu mu Jeluzaleme. Mu ku tanga kuila Jezú muéne a dianga o ku mu fukununa, Phaulu ua kexile mu zuela kuila athu a mukuá eji ku a fukununa uá.

O izuelu ia kamúkua ia Phaulu, ilondekesa ihi ia-nda bhita mukonda dia difukunukinu dia Jezú. Phaulu uambe: ‘Kuma o ki ejila o kalunga ku muthu umoxi, ni ku muthu umoxi ué kuene ku ejila o ku fukununa o madifundu.’ Mukonda dia ituxi i tua lundula ku Adá, etu enioso tufuá. Maji mu ku bhana o muenhu uê ua iuka phala ku tu kula, Jezú ua jikula o njila phala o athu ku a bhulula ku ubhika ua kituxi ni kufuá bhu kaxi ka difukunukinu. Phaulu ua soneka mu divulu dia Loma 6:23: “Kuma o futu ia ituxi kufua. Maji o ujitu-phe ua Nzambi muenhu ki uabhua, mua Kristu Jezú, Ngana ietu.”

Jezú ua tu tangela o valolo ia difukunukinu diê. Mu kuzuela ia lungu ni muéne, muéne uambe: “Mon’a Muthu kiene ue kia bhingi o ku mu zangula, phala uoso u mu xikana muène, a kale ni muenhu ki uábhua. Mbata Nzambi ua zola o mundu, katé kia suku mu kubhana Mon’ê umoxi-èlele, phala uoso u mu xikana muène, káfue, maji a kale ni muenhu ki uábhua.”—Nzuá 3:14-16.

Xinganeka—muenhu ua kalelaku sé ndolo, sé hadi mba mukôndo! (Dijingunuinu 21:3, 4) Ku zediua kua dikota! Saí diiala uambe: “O mbalale i tu lembalesa kuila o muenhu ua butu, o difukunukinu di tu lembalesa kuila o kalunga ka-nda bhua.” Kienhiki, o difukunukinu dia Jezú, dilombolola Muenhu!