Jihova ki Nzambi ya kavwanza. (1 Kolindu 14:33) Kyene kya tokala we kukala o mundu wê. Kyebhi kya mu kwendesa o kilunga? Kala muthu wene mu kwatekesa kyebhi?

1. Nanyi o mutwameni wakilunga?

‘Kidistu mwene o mutwameni wakilunga.’ (Efezu 5:23) Jezú wala kudyulu, maji mwene wamulanga o ikalakalu yoso wamundu wa Jihova mu ixi yoso. Mwene wasolo “o kimbadi kya fiyele kya dimuka” kibuka kyofele kya mayala ala ni uhete a exana we Kibuka kya Utuminu.(Tanga Matesu 24:45-47.) Mu ukulu, o jipoxolo ni tufunga mu Jeluzame, exile mubhana itendelesu mu ilunga mu thembu yenyoyo. Kyene kimoxi we lelu, o Kibuka kya Utuminu kya mubhana itendelesu mu ilunga yoso mu ngongo. (Ikalakalu 15:2) Maji o mayala enya kene o atwameni akilunga. Ene adilonga o Bibidya phala kwijiya ihi ya mesena Jihova kokwâ, akayela we o ungana wa Jezú.

2. Ananyi o tufunga ni ihi yene mubhanga?

O tufunga mayala a Jikidistá akulu mu nzumbi, ene mulonga o mundu wa Nzambi bhu kaxi ka Bibidya. Ala we polondo phala kukwatekesa ni kuswinisa yó amusidivila Jihova. Kene mu afuta kima. Mu veji dya kiki asidivila ‘ni vondadi yoso bhu pholo ya Nzambi. Kakibhangela nganyu yaxidi, akibhangela o muxima wa atumu kudibheka mu kusidivila.’ (1 Phetele 5:1, 2) O tufunga ene mu akwatekesa ku akwatekexi atufunga. Se akwatekexi ya akumbidila o itendelesu ya Bibidya, kupholo atena we kukituka tufunga.

O Kibuka kya Utuminu asola tufunga phala kukala tufunga twa ilunga. O mayala yá, akunda ilunga yavulu phala kubhana itendelesu ni kuswinisa o jiphange. O tufunga twa ilunga akayela o itendelesu ya Bibidya, phala kumona se phange utena kusidivila kala mukwatekexi watufunga mba kafunga.—1 Timote 3:1-10, 12; Titu 1:5-9.

3. Kikalakalu kyebhi kyala nakyu o Jimbangi joso ja Jihova?

Enoso mu kilunga “aximana o dijina dya Jihova” mu kubhanga mbandu mu yônge ni kuboka o njimbu yambote kate bhwoso bhwasuku o nguzu yâ.—Tanga Jisálamu 148:12, 13.

DILONGE DINGI

4. Jezú mutwameni wa henda

Jezú utwixana phala kumuxikina kala mutwameni wetu. Tanga Matesu 11:28-30, mukusuluka bhanga o ibhwidisu ya kayela:

• Kyebhi kya divwa o athu amwatumina kwa Jezú?

VIDYU: Tufunga Amukwatekesa o Jiphange ku Nepal Kwabhiti o Kitungutisu Kya Ixi (4:56)

O Bibidya izwela ni kidi kyoso kyebhi o tufunga kya tokala kubhanga o kikalakalu kyâ.

Tanga Izaya 32:2 ni 1 Phetele 5:1-3, mukusuluka bhanga o ibhwidisu ya kayela:

• Kyebhi ki udivwa mu kwijiya kwila, o tufunga abhanga nguzu phala kulondekesa henda kala kyene mu bhanga Jezú?

• O tufunga ene mu kayela o phangu ya Jezú mu maukexilu ebhi dingi?

5. O tufunga alonga bhu kaxi kaphangu yâ

VIDYU: Tufunga Kalakalenu Phala o Mbote ya Akwenu! (7:39)

Jezú wabhana itendelesu kwa yó ala kupholo dya ikalakalu mu ilunga. Tanga Matesu 23:8-12, mukusuluka bhanga o kibhwidisu kya kayela:

• Yebhi o itendelesu ya Bibidya phala o tufunga? O kwila o atwameni a jingeleja ene mu kayela we o itendelesu yiyi ya Bibidya?

1. O tufunga akolesa o ukamba wâ ni Jihova, asota we kukwatekesa o miji yâ kubhanga kiki

2. O tufunga akwatekesa oso mu kilunga

3. O tufunga aboka ithangana yoso

4. O tufunga alonga o mak’â Nzambi. Akwatekesa kuzelesa o kididi kya ubhe-zelu ni kubhanga o ikalakalu ya mukwa

6. Tutena kukwatekesa o tufunga

O Bibidya itutangela se mukonda dyahi twabhingi kukwatekesa o tufunga. Tanga Jihebelewu 13:17, mukusuluka bhanga o kibhwidisu kya kayela:

• Mukonda dyahi o Bibidya yamba kwila twabhingi kubelesela o tufunga ni muxima woso? Mukonda dyahi uzwela kiki?

Tanga Luka 16:10, mukusuluka bhanga o kibhwidisu kya kayela:

• Mukonda dyahi kima kyambote kubelesela o tufunga né mwene mu ima yofele?

IHI IWADILONGO

Jezú mwene o mutwameni wakilunga, o tufunga akayela o itendelesu ibhana mwene. Tusanguluka mu kukwatekesa o tufunga mukonda ene akwa henda, atulonga bhu kaxi kaphangu yâ.

Kubhitulula

• Nanyi o mutwameni wakilunga?

• Kyebhi o tufunga kya kwatekesa o kilunga?

• Kyebhi o kikalakalu kya Jimbangi joso ja Jihova mu kilunga?

TOKWESA DINGI

Tala kyebhi o Kibuka kya Utuminu ni tufunga kya thandanganya ni ibhindamu ya Jikidistá lelu.

Kuswinisa o Jiphange Kyoso Kya Fidisa o Ubhezelu Wetu (4:22)

Ijiya o kikalakalu kyene mu bhanga o tufunga twa ilunga.

O Mwenyu wa Kafunga ka Ilunga mu Kukunda o Ilunga Yala ku Maxokololo (4:51)

Tanga ya lungu ni ikalakalu yene mu bhanga o ahatu mu kilunga.

“O Kwila o Ahatu Jimbangi ja Jihova Atena Kulonga mu Kilunga?” (O Mulangidi, 1 wa Katutu wa 2012)

Tala kyebhi o tufunga kya kalakala kyavulu phala kuswinisa o jiphange.

“O Tufunga Twa Jikidistá—‘Akwatekesa Phala o Kusanguluka Kwetu’” (O Mulangidi, 15 wa Katatu wa 2013)

1. Kitendelesu kyebhi kibhana o Bibidya ku anumi?

Jihova wasolo o diyala phala kukala o mutwameni wa mwiji. (Tanga Efezu 5:23.) Mwene ukingila kwila, o ukexilu wadiyala kubatula o maka ukwatekesa o mwiji. O Bibidya itendelesa o anumi: ‘Sulukenu mu kuzola ahatu enu.’ (Efezu 5:25) Kiki kilombolola ihi? O diyala dya henda utalatala kyambote o muhatu wê kikale kubhata mba bhupholo ya athu avulu. Mwene umulanga, ubhanga yoso yatena phala kudikila o ibhindamu yê mu xitu. (1 Timote 5:8) O kyabeta dingi kota, mwene usota kudikila o ibhindamu yê mu nzumbi. (Matesu 4:4) Mu kifika, mwene utena kusamba ni kutanga o Bibidya kumoxi ni muhatu wê. O diyala utalatala o muhatu wê ni henda, ukolesa o ukamba wê ni Jihova.—Tanga 1 Phetele 3:7.

Jezú mwene o Mutwameni wa kilunga. (Efezu 5:23) Kala sobha kudyulu, lelu Jezú wamukwendesa o akayedi’ê mu ixi bhukaxi ka “kimbadi kya fiyele kya dimuka.” (Tanga Matesu 24:45.) Jezú mwene wasolo o “kimbadi” yu wa abhana ungana. Sumbala ni ungana yú, o kimbadi kya musuluka ni kubelesela Kidistu ni kusidivila o jiphange jê. Nanyi o kimbadi kya fiyele kya dimuka? Kyebhi o kimbadi kyene mu tulanga?