DISÁ 46
Mukonda Dyahi Twabhingi Kudibhakula ni Kudibatizala?
O kima kyabeta kota kitwatokala kusola ku mwenyu wetu, o kudibhakula kwa Jihova. Etu tudibhakula kwa Jihova kyoso kitusamba, tu mukanena ku mubheza ngó mwene, o vondadi yê yene ikala kupholo ku mwenyu wetu. (Jisálamu 40:8) Mukusuluka atubatizala. Kubatizu tulondekesa ku athu kwila, twadibhakula kwa Jihova. O kusola kudibhakula kwa Jihova, kulungulula o mwenyu wa muthu. Mukonda dyahi watokala kudibhakula ni kudibatizala?
1. Ihi ibhangesa o muthu kudibhakula kwa Jihova?
Etu tudibhakula kwa Jihova, mukonda twamuzolo. (1 Nzwá 4:10, 19) O Bibidya yamba: ‘Zola Jihova Nzambi yé, ni muxima wé woso, ni mwenyu wé woso, ni kilunji kyé kyoso ni nguzu yé yoso.’ (Máluku 12:30) Tulondekesa kwila twazolo Nzambi bhukaxi ka izwelu ni ibhangelu yetu. Mu kifika, se diyala ni muhatu adizolo mukidi, ene asola kukazala. Kyene kimoxi we ni henda yetu kwa Jihova, yene itubhangesa kudibhakula kwa mwene ni kudibatizala.
2. Mabesá ebhi atambula o muthu kwa Jihova kyoso kya mu batizala?
Kyoso ki udibatizala, umateka kubhanga mbandu ku mwiji wa Jihova. Mwene wanda kulondekesa henda mu maukexilu avulu. Wanda mu zukama dingi, mukulu ndenge. (Tanga Malakiya 3:16-18.) Wandakala ni Tata yé Jihova, wandakala ni mwiji wajiphange jamala ni ja ahatu ku mundu woso azolo Jihova, akuzolo we eye. (Tanga Máluku 10:29, 30.) Mukidi, sayi ima iwatokala kubhanga ande dya kudibatizala. Wabhingi kudilonga ya lungu ni Jihova, ku muzola ni kukala ni kixikanu kwa Mon’ê Jezú. Mukusukaku watokala kubhakula o mwenyu we kwa Jihova. Se ubhanga o ima yiyi anga udibatizala, wandakala ni ujitu wakukala ni mwenyu wakalelaku. O Mak’â Nzambi amba: “Batizu . . . yala ku mi bhulula mu lelu’idi.”—1 Phetele 3:21.
DILONGE DINGI
Tala se mukonda dyahi kima kyambote phala eye kudibhakula kwa Jihova ni kudibatizala
3. Etwenyoso twatokala kusola nanyi twanda mubheza
Sayi athu ku mundu wa akwa Izalayele mukulu, exile mubanza kwila ejitena kubheza Jihova ni Nzambi yamakutu Bahale mu kithangana kimoxi. Maji Jihova watumikisa polofeta yê Elija phala kwatangela kwila, o kixinganeku kiki kyayibha. Tanga 1 Jisobha 18:21, mukusuluka bhanga o kibhwidisu kya kayela:
Ihi yatokalele kusola akwa Izalayele?
Kala o akwa Izalayele, etu we twatokala kusola se nanyi twanda mubheza. Tanga Luka 16:13, mukusuluka bhanga o ibhwidisu ya kayela:
Sayi yá abanza kwila atena kubheza Jihova, muthu wengi mba kima kyengi mu kithangana kimoxi. Mukonda dyahi kitutokala kubhanga kiki?
Kyebhi kitulondekesa kwa Jihova kwila twasolo kumubheza mwene?
4. Xinganeka mu henda yala nayu Jihova kokwé
Jihova watubhana ima yavulu yambote. Ihi itutena ku mubhana? Tala OVIDYU.
Jihova ulondekesa kwila wakuzolo mu maukexilu ebhi? Tanga Jisálamu 104:14, 15 ni 1 Nzwá 4:9, 10, mukusuluka bhanga o ibhwidisu ya kayela:
Maujitu ebhi a Jihova u wa wabhela dingi?
Kutambula o maujitu yá akubhangesa kudivwa kyebhi ya lungu ni Jihova?
Eye watambwile kya ujitu wa kusangulukisa kyavulu? Mukidi wamesenene kusakidila o muthu wa kubheyu. Tanga Matendelelu 16:17, mukusuluka bhanga o kibhwidisu kya kayela:
Mu kuxinganeka mu maujitu oso akubhana Jihova, ihi iwamesena kubhanga phala mwene?
5. O kudibhakula kwa Jihova kubhekela mabesá avulu
Athu avulu axikina kwila, kukala ni fuma, salu yambote mba kitadi kwanda kwabhekela kusanguluka kwa kidi. O kwila kiki kidi? Tala OVIDYU, mukusuluka bhanga o ibhwidisu ya kayela.
Sumbala Andrey wazolele kyavulu o malunda afiti, ihi ya mu bhangesa kuyeha?
Mwene wasolo kudibhakula kwa Jihova, muveji dya kudibhakula mu malunda afiti. O kwila mwene wasolo kyambote? Mukonda dyahi?
Poxolo Phawulu ande dya kukituka Kidistá, wexile ni ufunu wambote weji mubhangesa kukala ni fuma. Mwene wadilongele o kijila kya Jijudé ni mulongexi wafuma. Maji Phawulu waxisa yoso kudima phala kukituka kidistá. O kwila Phawulu wadyela? Tanga Filipe 3:8, mukusuluka bhanga o ibhwidisu ya kayela:
Mukonda dyahi Phawulu wasokesa o ima yexile mubhanga ande dya kukituka Kidistá ni “ixete”?
Futu yebhi yatambula mukuxisa o ufunu wê wokulu?
O kwila utena kusokesa o kusidivila Jihova ni kima kyosokyoso ki utena kukala nakyu ku mwenyu? Mukonda dyahi uzwela kiki?
Kukala Kidistá kwabhekela mabesá avulu kwa Phawulu o ima yexile nayu mukulu ndenge
ATHU AVULU AMBA: “Ngejiya kwila kiki kidi, maji ki ngimesena kudibhakula.”
Mukonda dyahi eye uxikina kwila kima kyambote kudibhakula kwa Jihova?
IHI IWADILONGO
O henda yene ibhangesa kubhakula o myenyu yetu kwa Jihova ni kutubatizala.
Kubhitulula
Mukonda dyahi twatokala kuzola Jihova ni ku mubheza ngó mwene?
Mabesá ebhi abhana Jihova kujiselevende jê adibatizala?
O kwila wamesena kudibhakula kwa Jihova?
TOKWESA DINGI
Tala se mukonda dyahi ngimbidi ni mukwa kujokala kya solo kubhakula o myenyu yâ kwa Jihova.
O Minzangala Ebhula—Ihi i Nga-nda Bhanga ku Muenhu Uami?—Kulembalala (6:54)
Tala ima yamukwa ibhangesa o muthu kudibhakula kwa Nzambi.
“Mukonda Dyahi Twatokala Kudibhakula Kwa Jihova?” (O Mulangidi, 15 wa Katatu wa 2010 mu Phutu)
Tala o kusanguluka kwa yó adibhakula kwa Jihova mu vidyu yiyi.
Tanga o milongi, “Eme Ngexile Mudibhwidisa, ‘Mukonda dyahi twala kumwenyu?’” phala kumona ihi ya bhangesa o muhatu kumusoso yú kulungulula o kima kya solele kya ku mwenyu wê..
“O Bibidya Ilungulula o myenyu ya Athu” (O Mulangidi, 1 wa Kamoxi wa 2012)