Mukonda Diahi Nzambi Uehela o Hadi?

KIEBHI KI DIVUA NZAMBI KIA MONA O HADI IETU?

Mixela: Sofiia. Nga sanguluka kiavulu mu ku ku sanga kubhata.

Sofiia: N’eme uami.

Mixela: O kizuua ki nga kexile bhabha, tua zuela ia lungu se kiebhi ki divua Nzambi ia lungu ni hadi ietu.a Eie ua ngi tangela kuila uene mu xinganeka mu maka enhá tunde ukulu, bhenge-bhenge kioso mam’enu kia mu lanvula ku dikalu. Kiebhi mam’enu kiala?

Sofiia: Saí izuua u kala kiambote, izuua ia mukua kana. Maji lelu muéne uala kiambote.

Mixela: Nga sanguluka kiavulu. Ku bhonza kiavulu ku di bhana ni maka enhá.

Sofiia: Kiene muene. Saí ithangana ngi di ebhudisa, se muéne ua-nda tala hadi mu thembu jikuxi.

Mixela: Ki kima kia iibha ku banza kiki. Nange ua mu di lembalala hanji o maka u tua tele, se mukonda diahi Nzambi ka zubhu luua o ibhidi ietu se muéne uala ni kutena kua ku i zubha.

Sofiia: Kiene, nga mu di lembalala.

Mixela: Ande dia ku mona kiebhi ki tambuijila o Bibidia o maka enhá, tu bhitulule hanji phondo ji tua zuela o semana ia tundu-mu.

Sofiia: Kiambote.

Mixela: Tua di longo kuma, katé muene ni diiala dia fiiele m’ukulu ua di ebhudisa se mukonda diahi Nzambi uehela o hadi ku bhita. Maji Nzambi ka mu bazela mukonda dia ku bhanga o kibhuidisu kiki, ka mono ué kuila o diiala didi dia bhingile dingi ku kala ni kixikanu.

Sofiia: O maka enhá nuka nga ivuile.

Mixela: Tua di longo ué kuila Jihova Nzambi ka mesena kuila tu tala hadi. Mu kifika, o Bibidia i zuela kuila, kioso o mundu uê kia kexile mu kema ni dilamba, muéne ué “uevile dilamba.”b Ki kima kiambote kuijiia kuila Nzambi uivua ué o ndolo ietu kioso ki tu tala hadi?

Sofiia: Kiene muene.

Mixela: Ku di sukilu, tua mono kuila o kutena kua Mubhangi uetu, ku tu londekesa kuila muéne u tena ku bhuisa o hadi.

Sofiia: bhabha bhene bhuala o maka. Mukonda diahi Nzambi uehela o ima ioso ia iiabha o ku bhita se muéne uala ni kutena kua ku u bhuisa?

NANHI UA KEXILE MU TANGA O KIDI?

Mixela: Phala ku tambuijila o kibhuidisu kiê, tu tange o divulu dia dianga dia Bibidia, o divulu dia Dimatekenu. Uejiia o musoso ua Adá ni Eva ni kibundu kia a fidisele o ku kidia?

Sofiia: A ngi longo o musoso iú mu katekeze. Nzambi uambe kuila ene ka tokalele ku dia o kibundu, maji ene a kidi.

Mixela: Kidi muene. Tu mone ihi ia bhangesa Adá ni Eva ku ta o kituxi. O misoso íii i tu kuatekesa ku tendela se mukonda diahi tuene mu tala hadi. Ua mesena ku tanga o divulu dia Dimatekenu 3, velusu 1-5, NW?

Sofiia: Nga mesena. “Tala, o nhoka-phe i beta kudimuka, jixitu joso ja iangu ndenge, ja bhanga Jihova Nzambi. Nhoka anga i ambela muhatu, ixi: ‘Kifua Nzambi ua mi kidika kúdia ku mixi ioso mu jaludim?’ Muhatu u ambela o nhoka, uixi: ‘Ku ibundu ia mixi ioso mu jaludim, tu dietu; maji muxi ngó umoxi uala mu kaxi ka jaludim, uene ua tu kidika kúdia ibundu iê; kuma Nzambi uambe, uixi: “Kana kudia-ku, mba kukuata-ku ngó, phala ki mu fue.”’ Nhoka-phe anga u ambela muhatu, uixi: ‘Makutu ki mua-nda kufuá. Mukonda Nzambi ua kijiia kuma kizuua ki mu dia-ku, mua-nda ku tona mesu, mu sokela ni Nzambi, mu ijiia kia uabha ni kia iibha.’”

Mixela: Nga sakidila. Tu xinganeke mu velusu jiji. Kia dianga, tala kuma o nhoka ua dianga kuzuela ni muhatu, Eva. O velusu ia mukuá ia Bibidia ilondekesa kuila Satanaji o Diabhu muéne ua kexile mu zuela ni Eva bhu kaxi ka nhoka.c Satanaji uebhula Eva ia lungu ni kijila kia Nzambi kia lungu ni muxi. Ua mono ihi ia zuela Nzambi ieji bhita ni Adá ni Eva se adile o kibundu?

Sofiia: Ene eji kufuá.

Mixela: Kiene muene. Bhu kaxi ka izuelu iê, Satanaji ua tatela Nzambi. Tala ihi ia zuela muéne: “Ki mua-nda kufuá.” Satanaji ua kexile mu zuela kuila Nzambi mukua makutu!

Sofiia: O musoso iú eme nuka nga u ivuile.

Mixela: Kioso Satanaji kia zuela kuila Nzambi mukua makutu, muéne ua balumuna maka eji bhinga thembu iavulu phala ku a batula. Uejiia se mukonda diahi?

Sofiia: Kana, ki ngejiia kiambote.

Mixela: Nange ngi tena ku ku jimbulula kiki. Tu xinganeke kuila saí kizuua, ngi ku zukama, anga ngi ku tangela kuila, eme nga beta ku kala ni nguzu ku mukutu eie ndenge. Kiebhi ki ueji londekesa kuila makutu u nga zuela?

Sofiia: Nange mu ku bhanga polova.

Mixela: Kiene muene. Nange tueji sola kima kia neme kiavulu, ni ku mona nanhi mudietu ueji tena o ku ki zangula. Mu kidi o ku polovala se nanhi ua beta ku kala ni nguzu ku mukutu ki kima kia iibha.

Sofiia: Eme ngi tendela.

Mixela: Maji mu veji dia kuzuela kuila, nga beta ku kala ni nguzu ku mukutu, ngi zuela kuila, eme nga beta ku kala muthu ua kidi eie ndenge? Enhá maka a dikota, ki kiene?

Sofiia: Kiene muene.

Mixela: Mukonda o ku kala muthu ua kidi, ki kima kia tena ku ki polovala kala o ku mona se nanhi ua beta ku kala ni nguzu.

Sofiia: Kana.

Mixela: Mu kidi, phala o athu ku mona se nanhi mudietu ua beta o ku kala muthu ua kidi, kueji bhinga ku a bhana kithangana kia soko.

Sofiia: Kidi muene.

Mixela: Tala dingi o musoso iú mu divulu dia Dimatekenu. O kuila Satanaji uambe kuma muéne ua beta kota mu nguzu, Nzambi ndenge?

Sofiia: Kana.

Mixela: Ki kieji bhonza Nzambi ku polovala kuila Satanaji ua kexile mu tanga makutu. Mu veji dia kiki, Satanaji uambe kuila muéne ua beta ku kala muthu ua kidi, Nzambi ndenge. Muéne uambela Eva: ‘Nzambi ua mu ku dinga, maji eme nga mu ku tangela o kidi.’

Sofiia: Kidi muene.

Mixela: Kienhiki-phe, mu unjimu uê, Nzambi uejidile kuila, o ukexilu ua tokala phala ku batula o maka, o ku bhana kithangana kia soko. Ku disukilu oso eji kuijiia se nanhi ua kexile mu zuela o kidi ni nanhi ua kexile mu tanga makutu.

MAKA A DIKOTA

Sofiia: Maji o kufuá kua Eva, ki kua londekesa kiá kuila Nzambi ua kexile mu zuela o kidi?

Mixela: Kiene muene. Maji kua kexile dingi kima mu maka a tele Satanaji. Tanga dingi o velusu 5. Ua mono ihi ia zuela dingi Satanaji kua Eva?

Sofiia: Muéne uambe kuila, Eva se ua dile o kibundu, muéne ueji tona mesu.

Mixela: Ni kuila muéne ueji ‘sokela ni Nzambi, ni kuijiia kia uabha ni kia iibha.’ Kienhiki, Satanaji uambe kuma Nzambi ua kexile mu sueka kima kiambote ku athu.

Sofiia: Eme ngi tendela.

Mixela: O maka enhá kia bhonzele ué phala ku a batula.

Sofiia: Kia bhonzele kiebhi?

Mixela: Mu izuuelu iê, Satanaji uambela Eva—ni athu oso mu ixi—kuma eji kala kiambote sé ku bhinga ku a tumina kua Nzambi. Mu maka enhá ué, Jihova uejidile kuila o ukexilu uambote ua ku batula o maka, o kuehela Satanaji ku polovala o ima ia zuela. Mukonda dia kiki, Nzambi ua bhana kithangana phala Satanaji ku tumina o mundu. Kiki kiene ki bhangesa o mundu ku kala ni hadi iavulu​—mukonda Satanaji, muéne ua mu tumina o mundu, ki Nzambi kana.d Maji saí-ku njimbu iambote.

Sofiia: Njimbu iebhi?

Mixela: O Bibidia i longa ima iiadi ia kidi ia lungu ni Nzambi. Kia dianga, Jihova ua mu mona o hadi i tu tala iu ua mesena o mbote ietu. Mu kifika, xinganeka o izuelu ia Sobha Davidi mu divulu dia Jisálamu 31:7. Davidi ua tale hadi iavulu ku muenhu, maji tala ia zuela muéne mu musambu kua Nzambi. O kuila ua mesena o ku tanga?

Sofiia: Kiambote. Di mateka kiki: “Ngi sanguluka, ngi kala ni kutana mu ku lenduka kuè; kuma eie ua ngi xinganeka mu ku bhindamana kuami; eie ua ngi jidila mu jiphaxi mu nga bhiti.”

Mixela: Kienhiki, sumbala Davidi ua talele hadi iavulu, muéne ua sange kutuluka mu kuijiia kuila Jihova ua kexile mu mona o hadi ioso ia bhitile ni muéne. O kuila kiki ki ku tululukisa—kuijiia kuila Jihova uejiia ioso, katé muene ni ibanzelu ku muxima uetu ia bhonzo o ku i tendela?

Sofiia: Kiene muene.

Mixela: O kima kia kaiiadi kia kidi kia lungu ni Nzambi, o kuijiia kuila Nzambi ka-nda kuehela o hadi ietu ku nangenena. O Bibidia i longa kuila kua kambe ngó bhofele, muéne ua-nda buikisa o unguvulu ua iibha ua Satanaji. Ni ku zubha o ima ioso ia iibha iene mu bhita ku mundu, katé muene ni hadi íii i ua mu tala eie ni mam’enu. Kienhiki nga-nda vutuka mu semana iza-mu phala ku kulondekesa se mukonda diahi tua tokala ku xikina kuila Nzambi ua-nda zubha o hadi ioso?e

Sofiia: Se-ku maka.