KIKWATEKESU PHAL’O MWIJI
Kyebhi ki Utena Kulanga Onjinda Yé
Xinganeka kuma kaza dyé wazwela mba wabhange kima kyakuthathamesa eye anga ubhanga nguzu phala kulondekese kwila wala ni njinda. Maji kyoso mwene kyamona kuma eye kwale kyambote, mwene umateka kukubhanga ibhwidisu, bhenyobho onjinda ikukwata dingi kyavulu. Mu ithangana yiyi kyebhi ki utena kulanga onjinda yé?
Ihi iwabhingi okwijiya?
Okwehela onjinda kukutumina, kutena kukubhekela uhaxi. Akwa kutokwesa amba kuma, okukamba kulanga onjinda, kubandekesa otesá, kubheka mauhaxi kuthulu, kutoloka omuxima ni ibhidi ku idyandu yalungu ni kudya. Onjinda itena we kubheka xixi kumuthu, ibandekesa ohele, ibheka uhaxi bhukikonda ni ku wongo wamuthu. Mukonda dya kiki, o Bibidya yalungue mukuzwela kwila: “Eye-phe, ku njinda tunda-ku . . . , kuma o kuthathamana kukubhangesa ngó kyayibha.”—Jisálamu 37:8.
Okubhaka phonzo kutena kukubhanga we kyayibha. Okweha onjinda kudibandekesa kwadifu ni uhaxi ubolesa omukutu moxi dya muthu. Mukifika, eye utena kukala ni ukexilu wa ukumbu ni kutatela akwenu. O ifwa yiyi itena kubhonzesa o ima kubhata ni kuzanga kyavulu o ukaza wé.
Ihi i watokala okubhanga?
Sota kutala o idifwa yambote kwa kaza dyé. Soneka ima itatu yakuwabhela dingi kwa mwene. Kizuwa kyengi ki ukala ni njinda ya mwene, mukonda dya ima yabhange, xinganeka mu idifwa yiyi yakuwabhela dingi kwa mwene. Kiki kitena kukukwatekesa kulanga onjinda yé.
Kitumu kya Bibidya: “Mwila we ni kusakidila.”—Kolose 3:15.
Kala ni ukexilu wakuloloka. Kyadyanga, sota kutala o ima kala kyamutala kaza dyé. Kiki kyandakukwatekesa kukala ni henda—ohenda yiyi a itanga kwala o Bibidya kwila kulombolola kukala ni “kixinganeku kimoxi.” (1 Phetele 3:8) Mukusuluka, dibhwidise, ‘Okwila mwene wabhange kima kyayibha kinene, kingitokala kumuloloka dingi?’
Kitumu kya Bibidya: “Okuloloka o itondalu ya akwâ, wene o ujingilu wê.”—Jisabhu 19:11.
Zwela o ixinganeku yé ni henda yoso ni kulenduka. Mu izwelu yé, zwela “eme”. Mukifika muveji dya kuzwela: “Eye kwene mungisuwa, mukonda kwene mungixinda phala kungitangela se wala kwebhi.” Zwela kiki: “Eme ngithandanganya kyavulu kyoso ki ulaleka okubhixila kubhata, mukonda kingijiya se wala kyambote.” Okuzwela kiki ni kulenduka kwoso, kutena kukukwatekesa kulanga onjinda.
Kitumu kya Bibidya: “O kuzwela kwenu kukale kwa ujitu, kwotowe ni môngua.”—Kolose 4:6.
Ivwa ni kuxila kwoso. Kyoso ki uzubha okuzwela yoso iwamudivwa, ivwa we kyoso kaza dyé kyandaya ni kuzwela. Kyoso mwene kyandazubha okuzwela, bhitulula ima iwevu kwa mwene phala kumona se eye wevu mwene kyambote yazwela mwene. Okwivwa kyambote kutena kukukwatekesa kulanga onjinda yé.
Kitumu kya Bibidya: “Muthu ni muthu phe a lenguluke kwivwa, maji akokoloke kuzwela.”—Tiyaku 1:19.