O Muzangala ua Zeka

TALENU! Ihi ia mu bhita bhabha? O kuila o muzangala ua zeka bhoxi ua dikuama? Tala! o diiala ua mu tunda m’onzo Phaulu! Utena ku mona ué, Timote bhabha? O kuila o muzangala ua lauka mu njanela?

Kiene, kiki kiene ki kia bhitile. Phaulu uakexile mu bokela o maxibulu ku Tolóua. Muéne uejidile kuma keji ku disanga dingi, mukonda ua-nda kuata baluku mu kizuua kia kaiela-ku. Kienhiki, muéne ua zuela nâ katé mu kaxaxi ka usuku.

O muzangala iú dijina diê, Eutiku, ua xikamene bhu njanela iu ua zekele. Muéne ua lauka mu njanela mu tala dia katatu katé bhoxi! Mukonda dia kiki ua mu mona o athu bhobha a tandanganha. Kioso o maiala kia bongo o muzangala, a fikile kuma muéne uafú. Muéne uafú muene!

Kioso Phaulu kia mono kuma o muzangala uafú, ua zeka ku thandu diê, ni ua mu koteka. Kienhiki uambe: ‘Ki mu tandanganhe. Muéne uale kiambote!’ Uakexile muene kiambote! Kiki kiexile madiuanu! Phaulu ua mu bheka ku muenhu! O mundu ua sangulukile kiavulu.

Ene oso a bande ni ai mudia. Phaulu ua kolokota mu ku zuela katé mu makolombolo. Maji utena ku kala ni kixikinu, kuma Eutiku ka zekele dingi! Kienhiki, Phaulu, ni Timote, ni ió akexile mu kuenda nê, a bande ku baluku. Eie uejiia se ai kuebhi?

Phaulu ua zubha o njila iê ia katatu ia kuboka o njimbu iambote, ni uakexile mu vutuka kubhata. Mu njila ienioió, Phaulu ua bhange mivu itatu mu mbanza ia Efezo ubheka uê. O njila íii iexile ia dikota, o njila ia kaiadi ndenge.

Kioso kia xisa Tolóua, o baluku ia tula ku Miletu. Kia zukamene ku Efezo, Phaulu ua tumu ku ixana adiakimi a kilunga kia Miletu, phala ku zuela nâ mu veji ia sukina. Kioso kia bhixila o thembu phala ku xalesa Phaulu, ene a luualele kiavulu mu ku mona Phaulu kuia!

Mu kusukáko, o baluku ia bhixila mu Sezaleia. Mu dibhata dia dixibulu Filipe mua kexile Phaulu, o polofeta Akabo ua dimuna Phaulu. Muéne uambe kuma Phaulu a-nda mu ta mu kaleia kioso kia-nda bhixila mu Jeluzaleme. Kiki kiene ki kia bhitile muene. Mu ku bhita mivu iiadi mu Sezaleia, Phaulu, a mu tumikisa ku Loma phala ku mu fundisa kua Sézalu. Ndoko tu tale se ihi ia bhiti mu njila ia Loma.