Kaiela o Phangu ia Jipolofeta—Hozeia
1. Kibhuidisu kiahi nange ki ua di bhange kiá?
1 Mu ku xinganeka mu henda ia Jihova, nange u dibhuidisa: ‘Mbambe iahi i nga tokala o ku suua mu sidivisu ia Jihova’? (Jisá. 103:2-4; 116:12) Hozeia, ua kexile polondo phala ku bhanga o vondadi ia Jihova, né muene se kua bhingile ku di bhakula. Kiebhi ki tu tena ku kaiela o phangu ia Hozeia?
2. Kiebhi ki tu tena ku kaiela o phangu ia Hozeia mu ukunji uetu?
2 Mu ku Boka mu Ithangana ia Bhonzo: O njimbu ia Hozeia, ia tokalele ku dikuinhi dia ifuxi ia Izalaiele, mukonda kuexile athu avulu akexile mu bhanga o ubhezelu ua makutu. O Sobha Jelobouamu II, ua bhangele ima ia iibha bhu pholo ia Jihova, iú ua suluka ni ku bhanga o kiteka kia ku bheza kia bhangele Jelobouamu I. (2 Jis. 14:23, 24) O ji sobha ja kaiela, a suluka ni ku bhanga o ima ia iibha, mu dikuinhi dia ifuxi ia Izalaiele, katé kia i buika ku muvu ua 740 A.K.K. Né muéne ni ubhezelu ua makutu ua kexile mu dimendala, Hozeia ua kolokotele mu ku sidivila Nzambi ni ufiiele uoso, mu 59 a mivu. O kuila tua mesena ku boka ni ku suína kuoso, mu mivu ni mivu, né muene se athu ka-ndala ku tuívua, mba a tu zukutisa?—2 Tim. 4:2.
3. Kiebhi Hozeia kia londekesa o henda ia Jihova?
3 Mu ku Xinganeka mu Henda ia Jihova: Jihova ua tumu Hozeia ku ‘sota muhatu ua undumbu.’ (Hoz. 1:2) Hozeia ni muhatu ué Ngomele, akexile ni mona, maji mu ku bhita kithangana Ngomele ua vuala tuana tu iiadi ni diiala diéngi. O ukexilu ua Hozeia ua ku loloka o muhatu ué, ulombolola o henda ia Jihova ku akua Izalaiele a diele o ituxi iâ. (Hoz. 3:1; Lom. 9:22-26) O kuila, tuala polondo phala ku di bhakula, mu ku boka ku athu oso, o njimbu ia lungu ni henda ia Jihova?—1 Kol. 9:19-23.
4. Ima iahi i tu tena o ku bhanga mu sidivisu ia Jihova?
4 Saí jiselevende ja Jihova, ene mu di bhakula mu sidivisu ia ku boka, a xisa o salu iâ. Saí iâ a kala hanji akudi, mba ka mesena ku kala ni tuana phala ku ta o Utuminu ua Nzambi ku pholo. Kioso ki tu xinganeka mu phangu ia Hozeia, nange tu banza kuila ‘Kieji ngi bhonza o ku bhanga ia bhangele Hozeia.’ Kioso ki tu xinganeka mu henda ia Jihova ni ku dielela mu nzumbi iê, tu kala dingi ni nguzu ia ku bhanga o sidivisu iê, kála kia bhangele Hozeia.—Mat. 19:26; Fil. 2:13.