DIAMBU DIA KAPA | JEZÚ U TU BHULULA—KU IHI?
Mukonda Diahi Kua Bhingi ku tu Bhulula
“O muthu, a mu vuala ku mon’a muhatu, u bhanga ngó tu izuua, kene ku nanga ku muenhu iú ua vula malamba. A mu vuala mukua ni kitulu [ni] iangu, kuma kathangana ngó ua kukuta; u lenga lusolo kala kizúzumbia kene mu nanga kithangana kiavulu.”—Jobe 14:1, 2.
Tundé ukulu o athu ene mu xinganeka kiebhi kieji kala o muenhu mu ixi, sé ku kuka ni ku kata, ku kala ngó ni muenhu ua kalela-ku. Maji etu enioso tu fuá. O izuelu ia Jobe i tua tange ku dimatekenu, a isoneka ukulu, kua bhiti kiá midi jitatu ja mivu, maji iene mu di kumbidila lelu.
Athu oso mu ngongo a mesena ku kala ni muenhu ua kalelaku. O Bibidia izuela kuila Nzambi ua te ku mixima ietu o vondadi ia ku kala ni muenhu ua kalelaku. (Ndongixi 3:11) Xinganeka hanji, o kuila o Nzambi ia henda ueji ta ku muxima uetu o vondadi ia ku kala ni muenhu ua kalelaku né muene ni kuijiia kuila etu ki tu tena ku kala ni muenhu iú? Se u tambuijila kana, eie ua banze kiambote. O Mak’â Nzambi amba kuila o kalunga nguma, maji a-nda ‘ku i bhuisa-ku.’—1 Kolindo 15:26.
Sé-ku phata kuila o kalunga nguma. Sé-ku muthu uala ni kilunji kiambote u mesena o kufua. Mu kifika, kioso ki tu mona kiluezu etu tu lenga ni lusolo. Kioso ki tu kata tu bhanga ioso i tua tena phala ku di sanza. Tu di langa ku ima ioso ieji tu bhekela o kalunga.
O kuila kiki kiene ki tu bhangesa ku xikina kuila o nguma iokulu, o kalunga a-nda i bhuisa-ku? Kiene muene. Jihova Nzambi, o Mubhangi ua ngongo, ka bhange o athu phala ku kala mu ixi kathangana ngó, anga a fuá. Nzambi ka bhange o athu phala kufua. Muéne ua mesenene kuila o athu a kala ni muenhu ua kalelaku mu ixi. Ima ioso i tunda mu kanu dia Nzambi, muéne u i kumbidila.—Izaia 55:11.
Kiebhi-phe kia-nda buisa o kalunga? Tundé ukulu o athu a mu bhanga ioso phala ku sosolola o maka a bheka o kalunga maji ka mu tena. Mu izuua ietu o athu ene hanji mu di bhuidisa kiebhi kia-nda zubha o kalunga. Lelu o jingijiie a mu bhanga milongo phala ku sosolola o mauhaxi. Ene mu jikula moxi ia mukutu ua athu. Saí jixi, o athu a kola dingi o muenhu lelu, m’ukulu ndenge. Maji né kiki sé-ku muthu u tena ku tolola o kalunga. Kala ki zuela o Bibidia: “Ene oso muene a kà biluka fufutila.”—Ndongixi 3:20.
Kima kiambote kuijiia kuila ki tu bhingi ku dielela ku athu a fua kála etu, phala ku ku zubha o kalunga. Jihova Nzambi ietu ua bhange kiá kima phala ku tu bhulula mba ku tu kula ku kalunga, muéne ua tu bhana mon’ê Jezú Kristu.