Mukonda Diahi Eie u Tena Kuxikina Kuila o Athu Afu a Tena Dingi Kuvutuka?

O kuila uôua kubanza kuila o athu afu a-nda vutuka dingi ku muenhu? O poxolo Phaulu ki kiene kia kexile mu banza. Muéne ua soneka: ‘Se o Kristu tua mu dielela ngó kunu ku muenhu iú, ku athu oso mu ngong, etu ene tuala kota mu kuxixima! Maji kiki-phe, Kristu a dianga ku mu fukununa mu’alunga, iu ua di bhange ngunji ia tu dielelesa kuila athu oso afú kiá hádia ué a ka a fukunuka.’ (1 Kolindo 15:19, 20 ) Phaulu ua dielele mu difukunukinu kuila kidi. Mu kidi, tu tena kudielela mu difukunukinu mukonda dia difukunukinu dia Jezú.a (Ikalakalu 17:31) Kiene kia bhangesa Phaulu kuixana kuila, Jezú “a dianga ku mu fukununa mu’alunga”—muéne o muthu a dianga ku mu fukununa ni kutambula o muenhu ua kalela-ku. Se Jezú muéne a dianga o ku mu fukununa, kiki kilombolola kuila, athu a mukuá eji kua fukununa.

Kuala dingi kima kia mukuá ki tena ku kuatekesa ku xikina kuila o athu afu a-nda vutuka dingi ku muenhu. Jihova Nzambi ia kidi. “Nzambi ka moneka makutu.” (Tito 1:2) Jihova nuka ua tangele makutu, nuka ua-nda tanga ué makutu. O kuila muéne ueji tu kanena o difukunukinu katé muene mu kulondekesa kuila uala ni kutena kua kufukununa o madifundu, maji mu kusuka-ku u dituna kubhanga kála kia kanena? Kana, kiki ki ki tena kubhita!

Mukonda diahi Jihova ua mesena kufukununa o athu afu? Mukonda dia henda iê. Jobe uebhuidisa: “Muthu n’a fu, mbé ua kà kala dingi ni muenhu?” Muéne uambe dingi: “Eie-phe ueje ku ng’ixana, eme hé ngi ku’itaia; Ngana, kuatela henda ku kikalakalu kia maku mê.” (Jobe 14:14, 15) Jobe ua kexile ni kixikanu kia kuila Tat’ê ia henda uene ku diulu ueji kala ni vondadi ia ku mu fukununa. O kuila Nzambi ua lunguluka? ‘Eme ngi Jihova, ki ngi lunguluka.’ (Malakiia 3:6) Nzambi ua mesena hanji kiavulu kufukununa oso afu ni kua bhana sauidi iambote ni kusanguluka kuavulu. Kiki kiene ki mesena tata ioso-ioso kia funda mon’ê ua kazola. Maji Nzambi ka soko ni jitata akua ituxi, mukonda Nzambi uala ni kutena kua kubhanga kála kia mesena.​—Jisálamu 135:6.

Jihova ua-nda bhana kutena kua Mon’ê phala kubheka kusanguluka ku athu oso ala ni jindandu ja fu. Kiebhi kia divua Jezú ia lungu ni kufukununa athu afu? Ande dia kufukununa Lázalu, Jezú ua mono o kikote kia kexile naiu o jiphange ja Lázalu ni makamba, “Jezú anga u dila.” (Nzuá 11:35) Mu kubhita thembu, Jezú ua sange o mutudi mukua Naíne ua kexile mu dila mon’ê umoxi-élele ua fuile. Jezú “henda ia mu kuata, anga u mu ambela uixi: Ku dile.” Bhenhobho, muéne ua fukununa mon’ê. (Luka 7:13) Kiki kilondekesa kuila, Jezú ua divuile ué kia iibha mu kumona o athu a mu fua. Kisangusangu kiahi ngó kia-nda kala na-kiu Jezú mu kuzubha o jiphaxi joso mu ngongo ni kubheka kisangusangu ku athu!

Ua fundile kiá ndandu? Nange u banza kuila se-ku kidielelu phala ió afu. Maji saí hanji kidielelu​—Nzambi ua-nda fukununa oso afu bhu kaxi ka Mon’ê. Ijiia na-kiu kuma, Nzambi ua mesena kuila eie u mona o difukunukinu dia athu. Muéne ua mesena kuila eie u di sanga dingi ni jindandu jê ja fu. Xinganeka kubanza kumoxi ni jindandu jê ja-nda fukunuka, o ima i mua-nda bhanga ku hádia sé kukala dingi ni uôma ua kufua!

Lionel, tua mu tange kiá, uambe: “Kioso kia ngi longo o kidielelu kia difukunukinu, ku dimatekenu ki ngi xikinine kuila kiki kidi, eme ué ki ngi kexile mu dielela o muthu ua kexile mu ngi tangela o ima íii. Maji nga tokuesa mu Bibidia, eme nga mono kuila mbé kidi muene! Nga mesena kiavulu ku di sanga dingi ni kuku’ami uafu.”

Ua mesena kuijiia dingi o maka enhá? O Jimbangi ja Jihova a-nda sanguluka kiavulu ku kulondekesa mu Bibidia iê, se mukonda diahi ene a xikina ni mixima iâ kuila o athu afu a-nda vutuka dingi ku muenhu.b