Milongi phala Ukexilu wa Ukidistá ni Ukunji Wetu Milongi Phala o Yônge

2-8 YA KASAMANU

O VALOLO YA MAK’Â NZAMBI | MATESU 26

“O Phasu ni Lembalasa—o Ima ya Difu ni Ima ki Idifu”

(Matesu 26:17-20) Mu kizuwa kya dyanga kya Fesa ya Jimbolo ji Kamba Kithûthume, jixibulu jiza kwa Jezú, exi: Tu ku yudikila kwebhi, Ngana, ku wa mesena kudila o Phasu? ¹⁸ Kwala mwène: Ndenu mu mbonge, kwa nganji, mwa kà mu ambele, mwixi: Mesene wixi kiki: Thembu yami ya ngi bhixila. O Phasu ngi i bhitisila m’onzo yé ni jixibulu jami. ¹⁹ Jixibulu anga ji bhanga kala ki a tumu Jezú; anga a yudika o Phasu. ²⁰ Kutula mu ngoloxi, mwène u xikama ku meza ni kwinyi dya xibulu ni kiyadi phala kúdya.

nwtsty jividyu ni jifikula

O Fesa ya Phasu

O ima ya tokalele kwambata ku fesa ya Phasu, yexile: (1) mbudi yo zuze (ka tokalele kubukujula o ifuba ya kyama); (2) jimbolo jya kambe felemendu; (3) mafe a lulu. (Mak 12:5, 8; Dya 9:11) O mafe a lulu, kala kilondekesa o divulu Míxena, o mafe yá a ejiya mu majina kala alface, chicória, guindaste, endive mba dente de leão, (mu phutu) nange kiki kyexile phala kulembalesa o hadi ya akwâ Izalayele, kyoso kya kexile ku ubhika mu Ijitu. Jezú wa londekesa o jimbolo jya kambe kithuthume mba felemendu phala kulombolola o mukutu wê wa yuka, weji satela. (Mat 26:26) O poxolo Phawlu wexana Jezú kala: “O Kambudi ka Phasu yetu.” (1Ko 5:7) (4) Ku hama ya dyanga, o vinyu a kexile mu i sidivila we mu fesa ya Phasu. Jezú wa londekesa o vinyu phala kulombolola o manyinga mê, eji zunzumuna kala sata.—Mat 26:27, 28.

(Matesu 26:26) O kya kala mù kúdya, Jezú u katula mbolo, u sakidila Nzambi, hé u i bukujula, anga u i wanena jixibulu, wixi: Amenu, mu dye. Wene o mukutu wami.

nwtsty milongi phala kutokwesa Mat 26:26

Wene o . . . mba kilombolola: O kizwelu estinʹ mu Ngeleku (kilombolola “kukala”) bhabha i moneka kala “kilombolola; mba kulombolola.” O ilombolwelu yiyi a ijidile kyambote kwala o maxibulu, mukonda o mukutu wa Jezú wa kexile hanji bhu kaxi kâ, mu kiki a tendela kwila yexile o mbolo se felemendu yeji dya ene. Mu kiki, o mbolo ki yeji kala o mukutu wa xitu wa Jezú. Kima kyambote kumona kwila o kizwelu kimoxi kiki mu Ngeleku, a ki tumbula we mu divulu dya Mat 12:7, ni mu Jibibidya jyavulu ki moneka kala kiki: “kilombolola.”

(Matesu 26:27, 28) Anga u katula kopho, u sakidila Nzambi, anga u a bhana, wixi: Nwenu-ku enwenu oso. ²⁸ Kuma yá ene o manyinga mami, ma di zunza mukonda dya mundu phala kuloloka o ituxi. Mene o manyinga ma kwatesa o Kikutu kyòbhe bhu kaxi ka athu ni Nzambi.

nwtsty milongi phala kutokwesa Mat 26:28

manyinga ma kwatesa o Kikutu: O kikutu kyobhe kya Jihova ni jikidistá a undu a ki bhange bhu kaxi ka sata ya kukula kwa Jezú. (Jihe 8:10) Jezú wa zwela we o kizwelu kya tumbula Mozé kyoso kyexile mukunji ni kyoso kya mateka o kikutu kya Kitumu ku Mulundu wa Sinay (Mak 24:8; Jihe 9:19-21) Mu kiki, kala o manyinga a jingombe ni jihombo a kexile mu bhana valolo mu Kikutu kya Kitumu kya bhange Nzambi ni kifuxi kya akwá Izalayele, o manyinga a Jezú a bhana valolo mu kikutu kyobhe kyeji bhanga Jihova ni Izalayele mu nzumbi. O kikutu kiki kya mateka mu Pendekoxi ya muvu wa 33 K.K.—Jihe 9:14, 15.

Tokwesa o Milongi ya Nzambi

(Matesu 26:17) Mu kizuwa kya dyanga kya Fesa ya Jimbolo ji Kamba Kithûthume, jixibulu jiza kwa Jezú, exi: Tu ku yudikila kwebhi, Ngana, ku wa mesena kudila o Phasu?

nwtsty milongi phala kutokwesa Mat 26:17

Mu kizuwa kya dyanga kya Fesa ya Jimbolo ji Kamba Kithûthume mba Felemendu: O Fesa ya Jimbolo sé Felemendu ya mateka mu kizuwa kya 15 kya mbeji ya Nisá, kyoso ki bhita o Phasu (Nisá 14), i bhanga sambwadi dya izuwa . (Tala o Apêndice. B15, mu Bibidya ya phutu) Mu izuwa ya Jezú, o Phasu ya lungile ni fesa yiyi mu nake dya izuwa, kumoxi ni kizuwa kya 14 kya Nisá, say bhabha a ijidile kala “o Fesa ya jimbolo jya kambe o kithûthume.” (Luka 22:1) O izwelu yiyi “Mu kizuwa kya dyanga kya” tu tena kuzwela “ande dya kizuwa.” (sokesa Nz 1:15, 30, mu Ngeleku o kizwelu “kya dyanga” [proʹtos] a i lungulula kala “ande” kyoso kyambe, “mwène wa ngi dyangela [proʹtos].”) O dimi dya Ngeleku ni ukexilu wa akwá Judá, kilondekesa kwila o kibhwidisu kya bhange o maxibulu kwa Jezú a ki bhangele mu kizuwa 13 kya Nisá. Mu kizuwa kya 13 kya Nisá o maxibulu a sokejeka o ima phala o Phasu, mu kizuwa kya kayela a i bhange mu “Kutula mu ngoloxi” mba kyoso kya boba o dikumbi ku dimatekenu dya kizuwa kya 14 kya Nisá.—Mar 14:16, 17.

(Matesu 26:39) Anga u sondoloka-bhu kòfele, u fukama, u ta pholo bhoxi, hé u samba, wixi: Tata yami, se ki xikina, dikaw dyenyidi dya phaxi yiyi, ngi katule-dyu. Maji-phe ki ngi sola eme, kana, inda ki u sola eye.

nwtsty milongi phala kutokwesa Mat 26:39

dikawu dyenyidi dya phaxi yiyi, ngi katule-dyu: Mu Bibidya o Kizwelu “dikaw” mba Kopho, say ithangana a kizwela phala kulombolola o vondadi ya Nzambi mba kikalakalu kya bhana ku muthu umoxi. (Tala o milongi phala kutokwesa mu divulu dya Mat 20:22.) Sé phata Jezú wa thandanganyele kyavulu mukonda weji fwa kuma a mu tatele makutu ni kubanza se ihi yeji zwela o athu ya lungu ni Nzambi ni itatelu ya kwila mwene muthu wa yibha ni kwila wa kexile mu swinisa o athu kubhukumuka, kyene kya mu bhangesa kusamba: “dikaw dyenyidi dya phaxi yiyi, ngi katule-dyu.

Kitangelu Kya Bibidya

(Matesu 26:1-19) Kya zubha Jezú ku longa maka moso’ama, u ambela jixibulu jê, wixi: ² Enu mwa k’ijiya kwila kwa kambe ngó izuwa iyadi, kwa-nda kwiza Fesa ya Phasu, o Mon’a Muthu-phe a-nda ku mu thelekala phala ku mu phaphela ku taka. ³ Kyenyókio jinganga jya makota, ni adyakimi ku mundu, a bhongoloka ku lumbu lwa Ngana ya dikota, a mu ixana Kayafa; ⁴ anga a kala mu di longesa kyoso kya kwata Jezú mu ndunge, phala ku mu jibha. ⁵ Exi-phe: Mu thembu ya fesa kana; imoxi ki bheka mvunda ku mundu. ⁶ Kiki Jezú kya kala mu Betaniya, m’onzo ya Ximá, mukwa dibhute, ⁷ kwiza muhatu wambata thenda ya alabasa ya maji ma dizumba, ma te itadi yavulu. Anga u ma lundulula ku mútwe wa Jezú, kyoso kya xikama ku meza mu kúdya. ⁸ Jixibulu-phe, kya ki mono, a longolola muhatu, exi: o kutexi kwos’uku, mukonda dahi? ⁹ Hinu wa ma sumbisa mu itadi yavulu, ni a i bhane ku jingadyama! ¹⁰ Jezú-phe kuma wa k’ijiya, wa ambela, wixi: Muhatu mu mu tateselahi? Mwèbe wa ngi bhange kima kyambote. ¹¹ Mukonda jingadyama mwa xalela na-ju; eme-phe ki ngi xalela, kana! ¹² Mwène kya ngi lundulwila maji’ama ku mukutu, wa ki bhangela o ku ngi yudika phala ku ngi funda. ¹³ Kidi kyene ngi mi ambela: Kwoso-kwoso kwa kà tula Njimbu yiyi Yambote mu ngongo yoso, ni kiki kya ngi bhange o muhatu yú a kà ki tanga phala dilembalelu dyê. ¹⁴ Kyenyókyo umoxi ku kwinyi ni kiyadi, a mu ixana Juda, mukwa Kadyota, uya ku jinganga jya makota, ¹⁵ wixi: Mu ngi bhana-hi se Jezú ngi mi thelekala-nê? Ene anga a mu pezalela makwinyi atatu a itadi ya phalata, hé a mu bhana. ¹⁶ Tunde bhobho, Juda mwène u kala mu sota o kithangana kyambote kya ku mu thelekala. ¹⁷ Mu kizuwa kya dyanga kya Fesa ya Jimbolo ji Kamba Kithûthume, jixibulu jiza kwa Jezú, exi: Tu ku yudikila kwebhi, Ngana, ku wa mesena kudila o Phasu? ¹⁸ Kwala mwène: Ndenu mu mbonge, kwa nganji, mwa kà mu ambele, mwixi: Mesene wixi kiki: Thembu yami ya ngi bhixila. O Phasu ngi i bhitisila m’onzo yé ni jixibulu jami. ¹⁹ Jixibulu anga ji bhanga kala ki a tumu Jezú; anga a yudika o Phasu.

9-15 YA KASAMANU

O VALOLO YA MAK’Â NZAMBI | MATESU 27-28

“Ndenu, Mwa ka Longe Maxibulu—Mukonda Dyahi, Kwebhi, ni Kyebhi?”

(Matesu 28:18) Jezú anga wiza, u a ambela, wixi: O kutena kwoso a ngi bhana-ku eme, ni mu diwlu, ni mu ngongo.

Sentinela 01/07/04 pág. 9 parág. 4

“Ndenu, Mwa ka Longe Maxibulu”

⁴ Jezú mwène wala ni kutena mu kilunga kyê, tunde ku muvu wa 1914 mwene wala ni kutena mu Utuminu wa Nzambi (Kolose 1:13; Dijingunwinu 11:15) Mwéne o kota dya jyanju, mu kiki mwene wala ni kutena kwa kutumina kifuxi kyonene kya hama a ji midi jya jyanju. (1 Tesalonika 4:16; 1 Phetele 3:22; Dijingunwinu 19:14-16) A mu solo kwala Tat’ê phala ku “zubha-ku o mawtuminu oso a nzumbi, ni mawngana moso, ni nguzu joso” ene mu dituna o itendelesu ya yuka ya Nzambi. (1 Kolindo 15:24-26; Efezo 1:20-23) O kutena kwa Jezú ki kwa lungu ngó ni athu ala ku mwenyu. Mwene wala “Mufundixi wa athu a mwenyu ni madifundu” Nzambi wa mu bhana kutena phala kufukununa o athu afu kyá. (Ikalakalu 10:42; Nzwá 5:26-28) Ni kidi kyoso twa tokala kubhana valolo yavulu ku kitumu kiki kyo bhane kwala o muthu wala ni kutena kwavulu. Mu kiki, ni kuxila ni vondadi yoso tu belesela o kitumu kya Kidistu kya ‘kuya ni kubhanga maxibulu.’

(Matesu 28:19) Enu-phe ndenu, mwa ka longe jixibulu ku akwa jixi joso, ni ku a batizala mu dijina dya Tata ni dya Mona, ni dya nzumbi ikôla;

nwtsty milongi phala kutokwesa Mat 28:19

kubhanga maxibulu: O kizwelu mu Ngeleku matheteuʹo tu tena ku ki tendela kala “kulonga” phala kubhanga maxibulu. (Sokesa ni Mat 13:52, a ki lungulula kala “u longa”) O kizwelu kwa “batizala” ni kwa “longa” kilondekesa kwila o ima yiyi ya lungu ni kubelesela o kitumu kya “kubhanga maxibulu.”

athu akwa jixi joso: Say Bibidya i zwela “jixi joso,” maji o ima ya mukwá i tu sanga mu kibatulu kiki kilondekesa kwila o kizwelu kiki, kya lungu ni muthu ni muthu ku jixi joso, mukonda o kizwelu “ku a,” mu kizwelu ku a batizala mu Ngeleku kya lungu ngó ni mayala, maji a ki tumbula phala kulombolola o athu mu veji dya jixi, mu Ngeleku o kizwelu kiki ki kwatekesa kwijiya se ya lungu ni ihi. O kitumu kiki kya kulonga “athu akwa jixi joso” kyexile kya ubhe. O Bibidya i londekesa kwila ande dya ukunji wa Jezú mu ixi, Jihova wa kexile mu xikina o akwá jixi jyengi ku mu bheza kumoxi ni mundu wê. (1Ji 8:41-43) Ni kitumu kiki, Jezú wa tumina o maxibulu mê kusanzumuna o kikalakalu kya kuboka mu kulonga o athu kexile Jijudé, mu kiki wa londekesa o valolo ya kubhanga o kikalakalu kya kuboka ni kubhanga maxibulu ku mundu woso.—Mat 10:1, 5-7; Dij 7:9; Mat 24:14 tala o milongi phala kutokwesa mu divulu dya Mat 24:14.

(Matesu 28:20) Ni ku a longa kwaluka o ima yoso kyá i nga mi tumu eme. Talenu, eme-mwène ngà kala ni enu izuwa yoso, katé ku dizubhilu dya mundu.

nwtsty milongi phala kutokwesa Mat 28:20

kwa longa: O kizwelu mu Ngeleku kyo lungulule kala “kulonga” ya lungu ni kubhana itendelesu, kujimbulula, ni kubhangesa o athu kuxikina mu ima i wa mu zwela, ni kulondekesa. (Tala o milongi phala kutokwesa Mat 3:1; 4:23.) O kwa longa o kwaluka o ima yoso kala kya tumu Jezú, kwa bhingile kusuluka, kiki kya lungu ni kulonga o ima ya longo Jezú, kubelesela o ima ya longo mwene ni kukayela o phangu ya Jezú.—Nz 13:17; Ef 4:21; 1Ph 2:21.

Tokwesa o Milongi ya Nzambi

(Matesu 27:51) Kibatulu kya Tembulu anga ki tanduka mu’axaxe, tunde ku thandu katé bhoxi. Oxi anga i tunguta, matadi ma baza.

nwtsty milongi phala kutokwesa Mat 27:51

kulutina: O kulutina yiyi ya fwamene kyavulu, yene ya wanene o Kididi Kikôla Kinene mu tembulu. O ijila ya Jijudé i londekesa kwila o kulutina yiyi ya nemene kyavulu, ya kexile ni 18 a jimetulu mu kulebha, o kuzanza kwê 9 dya jimetulu, o mukomo wê 7,4 a jisentimetulu. Mu ku wanuna o kulutina ya tembulu, Jihova ka kexile ngó mu londekesa kwila wa luwalele kyavulu mu kumona o kufwa kwa mon’ê Jezú, maji kiki kilombolola we o disesa dya kubokona ku dyulu.—Jih 10:19, 20; tala o Glossário.

kididi ki kola: O kizwelu mu Ngeleku naosʹ bhabha kilombolola o Kididi Kikôla Kinene mu ididi yoso mu tembulu.

(Matesu 28:7) Endelenu-ku, mwa kà tangele jixibulu jê: Mwene wa fukunuka ku’alunga. Talesenu, mwène wa mi twamenena ku Ngalileya; kwene ku mwa kà di mona-nê. Eme nga mi jimbwil’ó.

nwtsty milongi phala kutokwesa Mat 28:7

endelenu-ku, mwa kà tangele jixibulu jê: O ahatu enyá ka a dyangela ngó ku a tukulukila phala ku a tangela ya lungu ni difukunukinu dya Jezú, kana, maji ene ngó a a tendelesa kutangela o maxibulu amukwa. (Mat 28:2, 5, 7) Mu ijila ya Jijudé m’ukulu, o kitumu kya jinguvulu ka kexile mu xikina o umbangi wa ahatu. Maji kiki, ki kyene kya bhange o anju ya Jihova, mwene wa xila o ahatu mu kwa bhana o kikalakalu kiki kya katunda.

Kitangelu Kya Bibidya

(Matesu 27:38-54) Kyenyókyo ni ifumbe iyadi a i phaphela-nê kumoxi ku ji taka, yú ku mbandu ya dilu, o yú ku kyasu. ³⁹ Oso ala ku bhita-bhu anga a mu xinga, ni kubhuka ku mítwe, exi: ⁴⁰ Eye’ó, tata! U bula o Tembulu, anga u i tunga mu izuwa itatu! O ki kala-phe u Mon’a Nzambi, tuluka ku taka! ⁴¹ Ni jinganga jya makota ni jimesene jya kulonga o Kitumu, ni adyakimi a Jijudé, kyene we kya mu sebulula, exi: ⁴² Wa bhulula athu enge, o ku di bhulula mwène ka tena! Abha ki mwene Sobha ya Izalayele? Kiki-phe a tuluke ku taka, etu ni tu mu xikane! ⁴³ Wa kexi mu kudyelela Nzambi, kiki a mu kudile, se wa mu mesena; kuma wambe, wixi: Ngi Mon’a Nzambi! ⁴⁴ Ni ifumbe we, a a phaphela-nê kumoxi ku ji taka, a mu’ondolola kyeny’iki. ⁴⁵ Kiki tunde ku mediya mu ola ya kasamanu, k’oxi yoso ku kala usuku mu ola jitatu, katé mu ola ya kàvwa. ⁴⁶ Ku bhixila mu ola ya kàvwa, Jezú u di kola ni dízwi dya swina, wixi: Eli, Eli, lama sabachthani? Ku ki jimbulula, wedi: Nzambi yami, Nzambi yami, wa ng’ehelela-hi’á? ⁴⁷ Amoxi emana-bhu, kya k’ivu, exi: Wexana Elija. ⁴⁸ Mukwá anga u lenga kindala, u zangula jiponja, u ji bonda mu vindangele, u ji swikika ku kamuxi, u mu nwisa. ⁴⁹ Akwá-phe exi: Ambula, tu mu mone mba Elija wiza ku mu kudila! ⁵⁰ Jezú anga u di kola dingi lwamukwá ni dízwi dya swina, anga u zubha mwenyu wê. ⁵¹ Kibatulu kya Tembulu anga ki tanduka mu’axaxe, tunde ku thandu katé bhoxi. Oxi anga i tunguta, matadi ma baza; ⁵² jimbila anga ji jikuka; mikutu yamukwá ya akwa Ngana aya òkulu ku kilu, anga i fukunuka, ⁵³ Jezú mwène we kya zubha kufukunuka, ene a tunda mu jimbila, hé a bokona mu Mbonge Iangene, anga a tukulukila athu avulu. ⁵⁴ Bhenyobho, kabhitangu ni masoladi yá oso ala-nê mu langidila Jezú, kya mono oxi ya tunguta, ni ima yoso ya bhiti, a kala kyavulu ni wôma, exi: Kya kidi kyene, mwenyú mon’a Nzambi!

16-22 YA KASAMANU

O VALOLO YA MAK’Â NZAMBI| MARKU 1-2

“Ituxi yé Yòloloke”

(Marku 2:3-5) A mu bhekela haxi ya kila, a mu ambata kwala kiwana. ⁴ O ki a sange kwila ka a tena ku mu bhixila mukonda dya mundu, a mwanga onzo kuthandu bhwoso bhwemana Mwène; o ki a zubha kubhanga dizungu, mwanza bhwala mu katela o haxi ya kila, a u zoza ni mikolo. ⁵ Jezú kya mono o kuxikana kwâ, u ambela o haxi ya kila, wixi; Mona, ituxi yé yòloloke.

Jesus—o Caminho cap. 26 pág. 67 parág. 3-5

“Ituxi yé Yòloloke”

Kyoso Jezú kya kexile mu longa mu inzo mwezalele ni athu, mala awana a mu bhekela diyala dya katele uhaxi wa kila mba huhi-a lenge bhu hama. Ene a mesene kwila Jezú u saka kamba dyâ. Maji, kuma m’onzo mwezalele ni athu, ene ka tenene “ku mu bhixila” kwa Jezú mukonda dya mundu. (Marku 2:4) Xinganeka kyebhi kya luwalele. Ene a soto ndunge, ene a habe ku thandu dya inzo a zamgumuna o mateya mba o jixapa. Anga a mu tulula ni hama yê bhwa xaxi ka athu.

O kwila Jezú wa kexile ni njinda mukonda dya ene kubhanga kiki? Kana! Mwene u diwana mu kumona o kixikanu kyâ, mu kiki mwene wambe ku diyala dya katele uhaxi wa kila mba huhi-a lenge “ituxi yé yóloloke” (Matesu 9:2) Maji o kwila Jezú wala ni kutena kwa kuloloka o ituxi? O Jifalizew ni jimesene jya kulonga o kitumu a mateka kubanza kyaybha ni kudibhwidisa: ‘Mukonda dyahi o muthu yú wa zwela kiki? Muthu yú wa mu xongwena Nzambi! Wa tena ku loloka ituxi, mukwa-hi? Ki Nzambi ngó!’—Marku 2:7.

Kuma Jezú wejidile o ibanzelu yâ, mwene wa a tangela: “Muthu yú wa mu xongwena Nzambi! Wa tena ku loloka ituxi, mukwa-hi? Ki Nzambi ngó! Kyebhi kya wabha-bhu ku ki bhanga?, O kwambela haxi ya kila kwila, ituxi yé yóloloke? Inga kwila: zangula mwanza wé, uye ni kwenda?” (Marku 2:8,9) Mukonda dya kubhana o mwenyu wê kala sata, Jezú u tena kuloloka o ituxi ya athu.

(Marku 2:6-12) Bhu kala-phe amoxi ku jimesene jya kulonga Kitumu, a xikama bhenyobho, a kwata ku longolola ku muxima, exi: ⁷ Ial’ ú wala ku tangela-hi kisunji kiki? Muthu yú wa mu xongwena Nzambi! Wa tena ku loloka ituxi, mukwa-hi? Ki Nzambi ngó! ⁸ Kithangan’okyo Jezú kuma wevu ku muxima wê yoso yala mu banza ene, wixi: Enu mu xinganekena-hi kyenyókyo? ⁹ Kyebhi kya wabha-bhu ku ki bhanga? O kwambela haxi ya kila kwila, ituxi yé yóloloke? Inga kwila: zangula mwanza wé, uye ni kwenda? ¹⁰ Phala-phe mu k’ijiye kuma Eme ngi Mon’a Muthu ngala ni ungana mu ngongo wa kuloloka ituxi, eye u haxi ya kila: ¹¹ Nga ku tumu kubalumuka, u zangule mwanza wé, uye ku bhata. ¹² Mwène anga u balumuka, kithangan’okyo, u zangula mwanza, anga u tubhuka bhu pholo ya ene oso. Ene oso anga a diwana, hé a ximana Nzambi, exi: Kyenyiki kiluwa tu ki mona.

nwtsty milongi phala kutokwesa Mar 2:9

Kyebhi kya wabha-bhu ku ki bhanga? Kima kya bhebhuluka phala muthu kuzwela kwila o ituxi yê yòloloke, mukonda ki kyeji bhinga kulondekesa kima phala kubhangesa o athu kuxikina kwila kiki kidi. Maji o kuzwela, zangula . . . ni kwenda kwa bhingile madiwanu phala kubhangesa o athu kuxikina kwila Jezú wala ni kutena phala kuloloka o ituxi. O milongi yiyi ni milongi i tu sanga mu divulu dya Izaya 33:24 i londekesa kwila twene mu kata mukonda tu akwa ituxi.

Tokwesa o Milongi ya Nzambi

(Marku 1:11) Anga dízwi di tunda ku dyulu, dixi: Eye-mwène u Mon’ami nga ku zola, wa ngi wabhela kyambote.

nwtsty milongi phala kutokwesa Mar 1:11

mu dituta anga mu tunda dízwi: Mu veji jitatu ji tu sanga mu madivulu a zwela ya lungu ni mwenyu wa Jezú mu Bibidya, yiyi yene o veji ya dyanga i tu mona kwila Jihova wa zwela ni athu tundé ku dyulu.—Tala milongi phala kutokwesa Mar 9:7; Nz 12:28

Eye mwene u Mon’ami: Kala muthu mu nzumbi Jezú wexile Mon’a Nzambi. (Nz 3:16) Tundé mu kithangana kya mu vwala kala muthu mu xitu, Jezú wexile “mon’a Nzambi” wexile muthu wa yuka kala Adá ande dya kuta kituxi. (Lu 1:35; 3:38) Maji kima kya valolo kumona kwila mu kithangana kiki, Jihova ka mu zwela ngó ya lungu ni dijina dya Jezú. Bhu kaxi ka izwelu yiyi ni ku mu unda bhu kaxi ka nzumbi ikola, Nzambi wa mu londekesa kwila a mu vwala kala Mon’a Nzambi mu nzumbi, a “ mu vwala lwa mukwá” ni kidyelelu kya kuvutuka dingi ku dyulu ni ku mu sola kwala Nzambi bhu kaxi ka nzumbi phala kukala Sobha ni Mukunji wa Dikota.—Sokesa ni Nz 3:3-6; 6:51; Lu 1:31-33; Jih 2:17; 5:1, 4-10; 7:1-3.

Wa ngi wabhela kyambote: Mba ‘Nga sanguluka n’eye, wa ngi wabhela ku muxima.’ O kizwelu kiki kyene ki tu sanga mu divulu dya Mat 12:18, di tumbula Iz 42:1 mu kuzwela ya lungu ni Mexiya, mba Kidistu a mu kanene. O ku mu unda ni nzumbi ikola ni kizwelu kya Jihova kya kwila mwene Mon’ê ya londekesa ni kidi kyoso kwila Jezú mwene o Mexiya a mu kanene.—Tala milongi phala kutokwesa Mat 3:17; 12:18.

(Marku 2:27, 28) Anga Jezú wa ambela, wixi: O sabhalu a i bhangela o muthu; muthu ka mu bhangela o sabhalu. ²⁸ Wila kiki, o Mon’a Muthu wala we Ngana katé ni ya sabhalu.

nwtsty milongi phala kutokwesa Mar 2:28

Ngana . . . ya Sábhalu: Jezú wa dixana mu dijina didi, phala kulondekesa kwila mwene weji tena kubhanga ikalakalu yoso-yoso ya mu tumina Tat’ê ya dyulu, mu kizuwa kya Sábhalu. (Sokesa ni Nzwá 5:19; 10:37, 38.) Say madiwanu a beta-o-kota, Jezú wa a bhange kya Sábhalu, kala o kusaka jihaxi. (Lu 13:10-13; Nz 5:5-9; 9:1-14) Nange kiki kyexile kizuzumbya ngó, kya kusaka kwa dikota kwa-nda bhita ku hádya, kyoso o Utuminu wa Nzambi wa-nda tumina o ixi yoso, kya-nda kala kála dinyohenu dya Sábhalu.—Jih 10:1.

Kitangelu Kya Bibidya

(Marku 1:1-15) O njimbu yambote ya Jezú Kidistu, mon’a Nzambi, ya mateka. ² Kala kya ki soneka mwa polofeta Izaya, exi: Nzambi wambe: Talesa, ngi tuma mukunji wami ku pholo yé, u ku yudikila o njila; ³ U kala dízwi di di kola mu ditutu, kwila: Iudikenu njila ya Ngana, yukisenu o ikoka yê ya ku bhitila. ⁴ Kyenyiki Nzwá dya Batizu kya tukuluka mu ditutu, hé u kala mu batizala o mundu ni kukola o batizu ya kudyela kubhekela o muloloko wa ituxi, wixi: Ambulenu o ituxi yenu, nda a mi batizale, o Nzambi ni a mi loloke. ⁵ O athu a tungu mu ixi yoso ya Judeya anga a tunda ku mu sanga, ni akwa Jeluzaleme, mwène anga u a batizala mu ngiji ya Njolodá, kyoso ene ki aya ni kufisala o ituxi yâ. ⁶ O Nzwá mwène wa zwata ndemba jya kamelu, wa di kutu phonda ya kibha mu mbunda, u dya mahoho ni wiki ua ditutu. ⁷ Anga u kala mu tangela o mundu, wixi: Ku dima dyami, ku kwiza muthu wa ngi tundu. Eme ku mu bhetamena ngó ni ngi mu jitwina o mbala ya hayi jê ki kya ngi fwama. ⁸ Eme nga mi batizala ni menya, mwène-phe wa kà mi batizala ni nzumbi ikôla. ⁹ Anga ki bhita mu izu’omo kuma Jezú u tunda ku Nazalé, ku Ngalileya, anga a mu batizala kwala Nzwá mu ngiji ya Njolodá. ¹⁰ Kithangana kya kala mu zawka ku menya, Jezú wa mono ku dyulu kwa jikuka, ni nzumbi yedi kala dyembe, yala mu tuluka ku thandu dyê. ¹¹ Anga dízwi di tunda ku dyulu, dixi: Eye-mwène u Mon’ami nga ku zola, wa ngi wabhela kyambote. ¹² Kithangana o Nzumbi i mu takula ku ditutu. ¹³ Anga u kala kwenyoko, ku ditutu, makwinyi awana a izuwa, ni ku mu thendala kwala Satana. Hé u kala kumoxi mi yama, maji o ji-anju ji kala mu ku mu langidila. ¹⁴ Kya zubha Nzwá ku mu ta mu’aleya, Jezú wiza ku Ngalileya ni kutanga o maka ma Njimbu Yambote ya tundu kwa Nzambi, wixi: ¹⁵ O thembu ya tenena kyá, Utuminu wa Nzambi wa zukama. Dyelenu o ituxi yenu, mu xikane o Njimbu Yambote i mi bhana o kubhuluka.

23-29 YA KASAMANU

O VALOLO YA MAK’Â NZAMBI| MARKU 3-4

‘Kusaka Kya Sábhalu’

(Marku 3:1, 2) Mwène anga u bokona dingi mu dilombe dya kusambela Nzambi, anga mu kala muthu wa kukuta o lúkwaku. ² Ene anga a kala ku mu tonginina mba u mu saka kya sábhalu, phala a mu tatele.

Jesus—o Caminho pág. 78 parág. 1-2

Ima Yahi ya Tokala ku i Bhanga Kya Sábhalu?

Kizuwa kyengi Jezú wa íle mu kunda dilombe dyéngi, nange ku Ngalileya. Bhenyobho anga bhu kala muthu lukwaku lwa kadilu lwa mu kukuta. (Luka 6:6) O akwá kulonga o Kitumu ni Jifalizew a kexile mu tala Jezú. Mukonda dyahi? Ene a londekesa se ihi ya kexile mu mixima yâ, kyoso kya bhwidisa: “O kusaka muthu mu kizuwa kya Sábhalu ki kôla mu kitumu kyetu, inga kana?”—Matesu 12:10.

O atumini a Jijudé a xikinine kwila o muthu eji mu saka ngó se wa mu fwa mba se o mwenyu wê wala mu ilwezu. Kyenyiki, mu kifika o muthu wa bukuka o kinama, wa tolokele o kifuba, mba wa kexile ni kifunate, ka tokalele ku mu saka kya Sábhalu, mukonda o ima yiyi ki ya kexile mu ta o myenyu mu ilwezu. Mu kidi, o atwameni a jingeleja ni Jifalizew ka kexile mu ditenda, mukonda dya Jezú kulondekesa henda ku diyala didi, kana. Maji a kexile mu sota ndunge phala kutatela Jezú.

(Marku 3:3, 4) Anga u ambela o muthu wa kukuta lukwaku wixi: Imana bhu’ axaxi’abha. ⁴ Anga wa ambela, wixi: O sábhalu a i tange kyebhi mu Kitumu kyetu? Kya kidi o kubhanga mbote kya sábhalu, inga kidi o kubhanga phulu? O kubhulula mwenyu, inga o kujibha. Ene-phe a di xibhâ. Ki bhwala muthu wa vutula kima.

Jesus—o Caminho pág. 78 parág. 3

Ima Yahi ya Tokala ku i Bhanga Kya Sábhalu?

Jezú wejiya o ibanzelu yâ ya yibha. Mwene wejiya kwila ene a mu kayela ijila yengi, o ya Mikanda Ikôla, ki yene, ya lungu ni kubhukumukina o kitumu kya Sábhalu, mu kubhanga ima yoso-yoso. (Makatukilu 20:8-10) Jezú a mu tatele kyá makutu, mukonda dya ibhangelu yê yambote. Mu kithangana kyenyiki, mwene u bhanga kima kya-nda thandanganyesa o atwameni a Jijudé, mu kutangela o diyala wa ku kutile o lukwaku, wixi: “Imana bhu’ axaxi’abha.”—Marku 3:3.

(Marku 3:5) Mwène wa exi swí, ene oso, ni dilamba ni njinda, mukonda kya mu yibhila o kukola kwâ kwa muxima, mbata ngwá-wâ ku tongolola, n’ejiye. Anga u ambela kya o diyala: Sunununa, lúkwaku. Mwéne kya sunununa, lúkwaku lwê lwa disanze kala lwa mukwá.

nwtsty milongi phala kutokwesa Mar 3:5

ni dilamba ni njinda, mukonda kya mu yibhila o kukola kwâ: Marku mwene ngó wa soneka kyebhi kya divu Jezú, kyoso kya mono o kukola kwâ kua muxima kwa atwameni, mu kithangana kyenyókyo. (Mat 12:13; Lu 6:10) Phetele we, wexile diyala dya henda, nange mwéne wa bhana o milongi yiyi kwa Marku, ya lungu ni kyebhi kya divu Jezú.—Tala o “Kilombolwelu Kya Divulu Dya Marku.”

Tokwesa o Milongi ya Nzambi

(Marku 3:29) Woso-phe u xongwena o nzumbi Ikôla, ki kwene dingi ku mu loloka, maji kituxi kyê ki xalela.

nwtsty milongi phala kutokwesa 3:29

u xongwena o nzumbi Ikôla: O kuxongwena kwa lungu ni kutatela umbangi wa makutu, kulongolola, kulokalala, kuzwela ima ya yibha ya lungu ni Nzambi mba ya lungu ni ima Ikôla. Kuma o nzumbi ikôla i tunda kwa Nzambi, mu kiki o kudituna o kutena kwa nzumbi ikôla, kwa difu ni kuxongwena Nzambi. Kala kilondekesa o divulu dya Mat 12:24, 28 ni Mar 3:22, o atumini a Jijudé, kyoso kya mono o nzumbi ikôla ya Nzambi kwa Jezú, phala kubhanga madiwanu, ene a zwelele kwila o kutena kwa kexile na-ku Jezú, kwa tundile kwa Satanaji o Dyabhu.

kituxi kyê ki xalela: O izwelu yiyi nange ilombolola kuta ituxi mu lwelu, nange o muthu kya ta o kituxi kiki ka tena ku mu loloka dingi katé ku hádya ni hádya; ka tena we kubhanga kima phala kujima o kituxi kiki.—Tala o milongi phala kutokwesa: u xongwena o nzumbi ikôla mu velusu yiyi ni milongi phala kutokwesa, mu divulu dya Mat 12:31, o musoso wene umoxi.

(Marku 4:26-29) Ngana Jezú wixi: Kyenyiki o Utuminu wa Nzambi wedi kala muthu u ta mbutu mu mavu. ²⁷ Anga u zeka, u balumuka, ngoloxi ni kimene, o mbutu-phe kyoso ki i sabhuka, ki i ku la, mwéne ka k’ijiya. ²⁸ O mavu a di imina ene, ku dyanga o kixina, kwiza o disa, hé ku kayela o jimbundu jadisanza ku disa. ²⁹ O kibundu-phe ki kya-nda kúbhya, kithangan’okyo u sunga kibhôlola, kuma thembu ya bhixila ya tokala o kumuna.

Mulangidi 15/12/14 difwe 11 kaxi 6-8

O Kwila wa ‘Tendela Kyambote o Dilombolwelu?’

⁶ Ihi i tu tena ku dilonga mu kifika kiki? Kya dyanga, twa tokala kwijiya kwila, etu ki tu tena ku bhangesa o maxibulu metu a Bibidya, ku kula mu nzumbi ni lusolo. Né mwene tu bhanga yoso phala kukwatekesa o dixibulu, maji ki tu tokala ku mu jijidika phala ku mu batizala. Mu veji dya kiki, twa tokala kuxikina kwila, o dixibulu, mwene wa tokala o kusola se wa-nda bhakula o mwenyu wê kwa Nzambi mba kana. Jihova wa-nda xikina ngó o ku di bhakula kwetu, se tu mu zola ni muxima woso.—Jisálamu 51:12; 54:6; 110:3.

⁷ Kya kayadi, o kutendela kyambote o dilombolwelu dya kifika kiki, kwa-nda tu kwatekesa ku kamba o kuluwala, se tu mona kwila, o maxibulu metu ka mu kula mu nzumbi. Twa tokala kukala ni mwanu. (Tiyaku 5:7, 8) Se tu bhanga yoso phala ku kwatekesa o dixibulu, maji o kidi ki ki tula ku muxima wê, ki kilombolola kwila tu alongexi a yibha. Jihova wehela ngó o mbutu ya kidi ku kula ku muxima wa muthu wa lenduka wala polondo phala kulungulula o ukexilu wê. (Matesu 13:23) Mu kiki, ki tu tokala wé kubanza kwila twa mu di tunda kyambote mu ukunji, mukonda dya ku kwatekesa athu avulu ku a batizala. O kya mukwá, Jihova ka mono se twa mu di tunda kyambote mu ukunji mba kana, mukonda dya athu a xikina o njimbu i tu boka. Mu veji dya kiki, mwéne u bhana valolo yavulu mu nguzu i tu bhanga phala ku boka o njimbu ku athu.—Tanga Luka 10:17-20; 1 Kolindo 3:8.

⁸ Kya katatu, etu ki tu tena kwijiya kyoso o muthu kya lungulula o ima ku muxima wê. Mu kifika, say dikaza kya kexile mu dilonga o Bibidya ni mukunji wa jixi jengi, dyambe kwila a mesenene kukala aboki ka a batizala luwa. O mukunji wa a tangela kwila, ene a tokalele kweha o kubwakula. O mukunji wa di wana kyoso o dikaza kyambe kwila, a kexile kyá thembu sé kuxibha makanya. Ene a mono kwila, né mwéne se a bwakule makanya mu kaswekele, Jihova weji ku a mona, ni kwila mwéne wa zembe o mangonya. Mu kiki, ene ambe dingi kwila, se a mesenene eji bwakula bhu pholo ya mukunji, mba eji kweha. Né mwene o mukunji kejidile ihi ya bhangele o dikaza, o henda yâ kwa Jihova ya a kwatekesa kusola o kima kyambote.

Kitangelu Kya Bibidya

(Marku 3:1-19a) Mwène anga u bokona dingi mu dilombe dya kusambela Nzambi, anga mu kala muthu wa kukuta o lúkwaku. ² Ene anga a kala ku mu tonginina mba u mu saka kya sábhalu, phala a mu tatele. ³ Anga u ambela o muthu wa kikuta lúkwaku wixi: Imana bhu’ axaxi’abha. ⁴ Anga wa ambela, wixi: O sabhalu a i tange kyebhi mu Kitumu kyetu? Kya kidi o kubhanga mbote kya sábhalu, inga kidi o kubhanga phulu? O kubhulula mwenyu, inga o kujibha. Ene-phe a di xibhâ. Ki bhwala muthu wa vutula kima. ⁵ Mwène wa exi swí, ene oso, ni dilamba ni njinda, mukonda kya mu yibhila o kukola kwâ kwa muxima, mbata ngwá-wâ ku tongolola, n’ejiye. Anga u ambela kya o diyala: Sunununa, lúkwaku. Mwéne kwa sunununa, lúkwaku lwê lwa disanze kala lwa mukwá. ⁶ Jifalizew anga a tunda, kithagan’okyo a mu tela kyonge kumoxi ni akwa Helode, mbe kumona kyoso kya bhanga phala ku mu jibha. ⁷ Jezú-phe u tunda bhenyobho ni jixibulu jê, hé uya ku kizanga kya Ngalileya. Hé kifuxi kyavulu kya akwa Ngalileya a mu kayela, ni ku Judeya, ⁸ ni ku Jeluzaleme, ni ku Idumeya, ni ku sámbwa dya Njolodá, ni ku akya Tilu ni Sidónya. Kifuxi kya dikota, ki evu imbamba yala kubhanga Jezú eza hé a mu sanga. ⁹ Mwéne anga u ambela jixibulu jê ku mu sotela bote mu a di longa jinga, mukonda dya kifuxi ku mu bhaka bhu’axaxi. ¹⁰ Kuma wa sukula mundu wavulu, kya bhangesa athu ku mu phopheka, mukonda oso ala ni mabhebhu a-lu sota ku mu kwata. ¹¹ Ni oso ala ni jinzumbi ja xidi,kya mu mona, a dibhala bhu pholo yê ni kudikola, exi: Eye, Ngana u Mon’a Nzambi! ¹² Jezú mwène anga nzumbi ja xidi u ji kidika kyavulu phala ka mu tange. ¹³ Anga Jezú u banda ku mulundu, hé u tuma kwixana oso a mesena mwéne; anga a mu sanga. ¹⁴ Anga u sola kwinyi ni kiyadi oso a-nda kala-nâ, ni ku a tuma kuboka o Njimbu ya Ubhulukilu. Anga o kwinyi ni kiyadi dyenyidi u a luka wixi: Jipoxolo. ¹⁵ Hé wa bhana o kusaka mahaxi ni kutundisa o madimonyo. ¹⁶ O kwinyi ni kiyadi enhá: Ximá, a mu luku dingi dijina dya Phetele; ¹⁷ Ni Tiyaku, mon’a Zebedew, ni Nzwá phange Tiyaku; enhá wa a luka dingi dijina dya Beneleja, dijina dya kwila: An’a Kinuminu kya Nzaji; ¹⁸ ni Mandele, ni Felipe, ni Matulu, ni Matesu, ni Tomé, ni Tiyaku dya Lufew, ni Tadew ni Ximá mukwa Kanana ¹⁹ ni Juda mukwa Kadyota, u mu thelekala.

30 YA KASAMANU–6 YA KASAMBWADI

O VALOLO YA MAK’Â NZAMBI | MARKU 5-6

“Jezú Wala ni Kutena Kwa Kufukununa o Jindandu Jetu Jafu”

(Marku 5:38) Anga a bhixila k’onzo ya dikota dya dilombe, u sanga o mundu edi ngó bulukutu ni kudila ni kubhana jingololo.

(Marku 5:39-41) O Mwène kya zubha kubokona, wixi: Mwedila-hi bulukutu, ni kudila? Mona k’afu, wayi ngó ku kilu. ⁴⁰ Anga a mu olela wôwa. Mwene-phe u a tubhula bhu kanga ene oso, u katula ngó tata ni mama avu kamona kâ, ni yó oso weza-nâ, anga u bokona mwala o mona. ⁴¹ Anga u kwata o mona mu lukwaku, u mu ambela, wixi: Talita, kumi! Wambe, mu ku ki jimbulula: Kilumba, aga ku tumu kubalumuka!

nwtsty milongi phala kutokwesa Mar 5:39

k’afu, wayi ngó ku kilu: Mu ithangana yavulu o Bibidya i sokesa o kufwa ni kilu. (Jis 13:3; Nz 11:11-14; Ik 7:60; 1Ko 7:39; 15:51; 1Te 4:13) Jezú weji fukununa o kilumba, maji nange wa zwela kiki phala kulondekesa kwila o muthu wa fu u tena kuvutuka ku mwenyu kala muthu u balumuna o muthu ku kilu. O kutena kwa Jezú kwa kufukununa o kilumba kwa tundu kwa Tat’ê, “mukwa kuphaphumuna athu afu kyá, hé u bhangesa kukala ku mwenyu o ima kiluwa i kala-ku, anga i di bhanga mwene”—Lo 4:17.

(Marku 5:42) Kithangan’okyo o kilumba u balumuka, hé u enda, kuma wala kyá mu kwinyi dya muvu ni’yadi. Enyoso kithangan’okyo anga a diwana kisuma kya dikota.

Jesus—o Caminho pág. 118 parág. 6

Mona Kilumba u vutuka ku Mwenyu!

Mu ithangana ya mukwa ku dima, Jezú wa tendelesa yó a sakele phala ka ki tangele muthu ya lungu ni ima ya a bhangele, mu veji yiyi Jezú wa tendelesa we o jitata jya kilumba phala ka ki tangele muthu. Maji mukonda dya kusanguluka kwavulu, o jitata jya kilumba ni athu engi mu dyembu a tangela o njimbu yiyi yambote ku athu oso (Matesu 9:26) Mu kumona o jindandu jé jafu kufukununa, o kwila ni kusanguluka kwoso ki weji ki tangela ku athu? Yiyi yene o veji ya kayadi ya Jezú kufukununa muthu.

Tokwesa o Milongi ya Nzambi

(Marku 5:19, 20) Jezú-phe ka mu ehela, wixi: Ndeye ku bhata, ku jindandu jê, wa ká a tangele ima ya ku bhange Ngana Nzambi, ni kya ku kwatela henda. ²⁰ Mwène anga u katuka, u kwata ku ki fumanesa mu Dekapolo ima yoso ya mu bhange Jezú: Athu oso anga a diwana.

nwtsty milongi phala kutokwesa Mar 5:19

wa ka a tangele: Mu kithangana kiki Jezú ka tendelesa o muthu phala ka ki tangele muthu kala kya kexile mu tendelesa (Mar 1:44; 3:12; 7:36), mwene u mwambela phala kutangela o jindandu jê o ima yoso ya mu bhangele. Jezú nange wa bhange kiki mukonda a mu tangela phala kuxisa o dyembu dyenyódyo, mu kiki mwene keji tena dingi kwa bhana umbangi, mu kutangela yoso ya bhange Jezú, kyeji kwatekesa o athu phala ka banze kya yibha ya lungu ni Jezú kyoso mwene kya kaye o jinzumbi jya xidi, jene ji jya bokona ku jingulu, o jingulu ji jya di takula mu kalunga.

(Marka 6:11) Bhwoso-phe bhwa kamba ku mi tambula, ni ku m’ívwa, ki mu tunda-bhu mu a khukhumwina fufuta ya mi naminina ku inama, mu ku a bhana umbangi wa kwêla kwâ. Kidi kyene ngi mi ambela, kuma akwa Sodoma ni Ngomola a kà beta ku a lendukila mu kizuwa kya kufundisa, akwa kididi yókyo kana.

nwtsty milongi phala kutokwesa Mar 6:11

khukhumwina fufuta ya mi naminina ku inama: Kiki kilombolola kwila o maxibulu ejidile kwila k’ene eji kala ni kikuma kya ima mba kaxtiku keji bheka Nzambi kwa yó a dituna o njimbu. O kizwelu kiki kyene we ki tu sanga mu divulu dya Mat 10:14; Lu 9:5. O Marku ni Luka a bandekesa o kizwelu phala kubhana umbangi [mba , “kwa bhakela umbangi”] kwa ene. Phawlu ni Barnabé a kumbidila o kitendelesu kiki mu mbanza ya Andiyokya ya Pisídya. (Ik 13:51) Phawlu wa bhangele kiki kyoso kya íle mu mbanza ya Kolindo, mu ku khukhumwina o izwatu yê, ni kuzwela wixi: “Enu se mu texika o manyinga menu ma kala ku thandu dyenu! Eme nga zele. (Ik 18:6) O maxibulu nange ejidile kya o kitendelesu kiki; o Jijudé a sotele kukala athu ambote a bhangele njila mu jixi jya akwa jixi jyengi a kexile mu khukhumwina o fufuta ya a naminine ku inama yâ ande dya kubokona mu ixi ya Jijudé. Maji kyoso kya bhane o kitendelesu kiki mwene wa kexile mu lombolola kima kyengi mu ku ki bhana ku maxibulu mê.

Kitangelu Kya Bibidya

(Marku 6:1-13) Mwène anga u tunda bhenyobho, u vutuka k’oxi yê, mu sanzala ya Nazalé, mwa tungile, mwène ni jixibulu jê jiza-nê kumoxi. ² Kutula kya sábhalu, u kwata kulonga mu dilombe. Anga athu ki a mu ivu, a diwana, exi: Mwenyú ima yoso yiyi, wa di longela na-yu kwebhi? Kwebhi kwa mu bhana o kwijiya kwos’uku? Ni isuma yoso yiyi, ya mu di bhanga kyebhi bhu maku mê? ³ Manyi ki mwene musongi a mabay’ú, mon’a Madiya, phange ya Tiyaku ni Zuze ni Juda, ni Ximá? Ni jiphange jê jya ahatu, ki etu-nâ mu’axaxe k’etu? Anga a mu lebhula. ⁴ Jezú-phe wixi: O polofeta kana bhama bhu mu kamba ujitu, kikale ngó k’oxi yê, ni ku jindandu jê, ni ku bhata dyê. ⁵ Mwène mwene’omo mu Nazalé ka tenene dingi kubhanga-mu kisumwa; kima ngó ki abhange, wa tula maku mê ku thandu’a jihaxi jimoxi-moxi-mu, yu wa ji sake. ⁶ Anga u diwana mukonda dya kuxibhaka kwâ. Jezú anga u uhunga kyá ngó mu jisanzala ni kulonga. ⁷ Anga u ixana o kwinyi dya xibulu ni kiyadi, u kwata ku a tuma ku ukunji mu kiyadi-kiyadi, ni ku a bhana o kutena kwa ku kaya ni kutumina jinzumbi jaxidi. ⁸ Anga u a tendelela kuma: Ki mu ambate huta ya njila, kabasa mbangala; kana mbolo, kana muxila, kana kitadi mu phóda; ⁹ Maji mu zuata jihayi, wixi-phe o madivunga ki mu zwate mayadi. ¹⁰ wixi dingi: Dyoso dibhata di mwa tula, inzo yoso i mu bokona, mwene mu mu kala, katé ki mu katuka. ¹¹ Bhwoso-phe bhwa kamba ku mi tambula, ni ku m’ívwa, ki mu tunda-bhu mu a kukumwina fufuta ya mi naminina ku inama, mu ku a bhana umbangi wa kwêla kwâ. Kidi kyene ngi mi ambela, kuma akwa Sodoma ni Ngomola a kà beta ku a lendukila mu kizuwa kya kufundisa, akwa kididi yókyo kana. ¹² O maxibulu anga a mwagana, hé a longa maka kuma athu a tokala kudyela ni kweha o ituxi yâ. ¹³ A tundisa madimonyo, o jihaxi a ji waya maji, hé a ji saka.