kiambote kia kexile ku muzeu ki tua tange ku dimatekenu dia milongi. Iene ki i difu ni milongi ia madivulu a mukua, kioso ki bhita thembu ki i kala dingi ni valolo. O kuila kiki ki bhita mukonda o Bibidia a isoneka mu ukexilu uengi? O kuila iene iala ni ibanzelu ia Nzambi mba o ibanzelu ia athu?—1 Tesalonika 2:13.

Nange eie uene mu mona kuila o muenhu ki u nange kubhita, uezala ue ni ibhidi. Kioso ki u dibhana ni ibhidi, kuebhi ku u tena kusanga o ku kondama, kikuatekesu ni itendelesu i ku suínisa?

Tua-nda dilonga mbandu jitatu ji londekesa kuila o Bibidia i tena ku ku kuatekesa. O Bibidia i tena ku ku kuatekesa mu:

1. kubhanga ioso phala kulenga o ibhidi.

2. kubatula o maka kioso kia moneka.

3. kudibhana kiambote ni maka ki u tena kua batula.

O milongi ia-nda kaiela-ku ia-nda zuela o maka enhá.

MAKA A LUNGU NI SAUIDI

O BIBIDIA KI DIVULU DIA KUSAKA, MAJI MUALA MILONGI IA KATUNDA IA LUNGU NI SAUIDI.

O muthu ua kate u di kexidila.

Mu Kitumu kia Mozé, se muthu ua kexile ni dibhute ka tokalele kukala muaxaxe ka athu, maji ua tokalele ku di kexidila. Kioso kia moneka o mauhaxi a bhonzo mu kithangana kia Idade Média, kiene ngó o jidotolo kia mateka kukaiela o itendelesu íii, katé kiki o ukexilu iú uene hanji mu kuatekesa.—Ijila, kibatulu 13 ni 14.

Se ua kuata kimbi u di sukula.

Ande dia disukilu dia hama ia 19, o jidotolo a kexile mu kuata o imbi ni ku saka o jihaxi sé kusukula o maku. O ukexilu iú ua bhekela kufua kuavulu. Maji o Kitumu kia Mozé kiambele kuila, se muthu u kuata ku kimbi u kasana. Katé muene kiambele ue kuila, kua bhingile menha phala ku mu zelesa. O ukexilu iú ua bhekela mbote iavulu ku athu.—Dialuilu 19:11, 19.

Kididi kia kutexa o ixete.

Kala muvu, kaxaxi ka jimidi a tumbonga ene mu fua ni kabualala mukonda dia ixete iene mu buazeka o athu. O Kitumu kia Mozé kiambele kuila, o muthu ua tokalele ku kandela o ixete bhoxi phala ki i kale muaxaxe ka athu.—Matendelelu 23:13.

Kithangana kia kusaia.

O Kitumu kia Nzambi kiambele kuila, o kabuetele ka diiala a tokalele ku mu saia kioso kieji tenesa dinake dia izuua. (Ijila 12:3) O tubuetele a bhingile kubhita semana phala ka bhubhe manhinga avulu mu kithangana kia kua saia. Mu kulu ande dia kuijiia ima iavulu ia lungu ni kusaka, o ku kingila semana ande dia kusaia o kabuetele kiexile kikuatekesu kia dikota.

O kusanguluka kua muxima ku bhekela sauidi iambote.

O jingijiie ni jidotolo amba kuila o kusanguluka kua muxima, ni kidielelu, kusakidila, ni ukexilu ua kuloloka ku bhekela sauidi iambote. O Bibidia iamba: “Muxima ua sanguluka, u di bhanga milongo ia mbote mu mukutu ua muthu; maji o muxima-phe ua budika ni dilamba, u kukutisa ifuba”—Jisabhu 17:22.