Eye Wadyelela mu Ukexilu wa Jihova Kubhanga o Ima?

1-2. (a) Mukonda dyahi avulu lelu kya abhonza kudyelela kwa yó ala ni ungana? (b) Ihi itwandadilonga mu mbandu yiyi?

LELU athu avulu kya abhonza kudyelela ku athu ala ni ungana. Ene amona kuma, o afundixi ni jinguvulu afundisa kyambote o jimvwama ni yó ala ni kutena, maji o jingadyama, kana. O Bibidya yamba ni kidi kyoso: “Muthu ukala mu kutumina mukwá phala ngó ku mu sengulula.” (Ndo. 8:9) Kumbandu yengi, sayi atwameni a jingeleja, ene mubhanga ima yayibha. Kiki kyene mubhangesa amoxi kukamba kudyelela kwa Nzambi. Kyenyiki, se muthu uxikina kudilonga o Bibidya n’etu, etu twala ni kikalakalu kya kumukwatekesa kudyelela kwa Jihova ni ku athu amukwendesa o kilunga Kyê mu ixi.

² Mukidi, o maxibulu a Bibidya ki ene ngó atokala kudyelela kwa Jihova ni ku athu amukwendesa o kilunga mu ixi. Né mwene yó ala mukilunga mu mivu yavulu kya, katokala kujimba kwila, o ukexilu wa Jihova kubhanga o ima wene wabetakota, mu ithangana yoso. Sayi ithangana, kubhita ima itena kulola o kidyelelu kyetu kwa Jihova. Mu milongi yiyi twandilonga ima itatu itena kulola o kixikanu kyetu: (1) kyoso ki tutanga misoso ya Bibidya, (2) kyoso kitutambula itendelesu mu kilunga kya Jihova, ni (3) kyoso kitwandadibhana ni ibhidi kuhádya.

DYELELA KWA JIHOVA KYOSO KI UTANGA O BIBIDYA

3. Sayi misoso yala mu Bibidya, itena kulola o kidyelelu kyetu kwa Jihova. Kyebhi?

³ Kyoso kituya ni kutanga o Mak’â Nzambi, mu kilunji kyetu mutena kumoneka ibhwidisu yalungu ni ukexilu wadibhana Jihova ni athu ni kubatula o maka. Mu kifika, mudivulu dya Dyalwilu tutanga kwila, Jihova wabalakala kufwa ku muthu mu Izalayele, mukonda dya kuxanga jihwinyi mu kizuwa kya Sabhalu. O mudivulu dya kayadi dya Samuwele, tutanga kwila, mukubhita mivu yavulu, Jihova waloloka Sobha Davidi watele phanda ni kujibha mukwa. (Dya. 15:32, 35; 2 Sam. 12:9, 13) Tutena kudibhwidisa: ‘Mukonda dyahi Jihova waloloka Davidi watele o phanda ni kujibha, maji wabalakala kufwa o diyala watele kituxi kyatolo dingi?’ Phala kutambwijila o kibhwidisu kiki, xinganeka mu ima itatu itwatokala kulembalala mu ithangana yoso itutanga o Bibidya.

4. Dimatekenu 18:20, 21 ni Matendelelu 10:17 akolesa kyebhi o kidyelelu kyetu mu ukexilu wa Jihova wa kufundisa?

⁴ Sayi ithangana o Bibidya ki ijimbulula yoso yalungu ni musoso. Mukifika, twejiya kwila Davidi wadyela o ituxi yê ni muxima woso. (Jisá. 51:2-4) Maji o diyala dya kambe kuxila o kizuwa kya Sabhalu, wexile muthu wakidifwa kyahi? O kwila wadyela o ituxi yê? O kwila m’ukulu mwene wabhukumukine kya o ijila ya Jihova? O mwene kabhanene matwi mba waditunu kyoso akwa kyamudimuna? O Bibidya ki ijimbula. Maji tutena kudyelela kwila, mwa Jihova “ki mwene mangonya.” (Mate. 32:4) Jihova wabatula kyambote o maka mukonda wejidile yoso yabhiti, kakayela yamutangela akwa, katombo, mba kima kyengi hanji kyene mubhangesa o athu muxitu kukamba kubatula kyambote o maka. (Tanga Dimatekenu 18:20, 21; Matendelelu 10:17.) O kwijiya kyambote Jihova ni jingonge jê, kutukwatekesa kudyelela dingi mu ukexilu wê wakufundisa. Sumbala sayi misoso ya Bibidya ivulumuna ibhwidisu yakambe o itambwijilu kindala kiki, etu twejiya kyambote Jihova Nzambi yetu, twadyelela kwila, mwene “mukwa kidi mu njila jê joso.”—Jisá. 145:17.

5. O kukamba o kuyuka kutufidisa kyebhi kufundisa kyambote? (Tala o kaxa “O Kukamb’o Kuyuka Kutubhangesa Kufundisa mu Ukexilu Wayibha.”)

⁵ Kitutena kufundisa kyambote mu ithangana yoso mukonda dya kukamba o kuyuka. Nzambi watubhange mukidifwanganu kyê, kyenyiki, tumesena kwila, o athu a atalatala ni kuyuka kwoso. (Dim. 1:26) Maji, mukonda dya kukamba o kuyuka, tutena kubatula kyayibha o maka, né mwene kyoso kituxinganeka kwila, twejiya yoso yabhiti. Mukifika, lembalala o kuluwala kwa Jona, kyoso Jihova kyaloloka akwa Ninive. (Jona 3:10–4:1) Maji xinganeka o mbote yabhekela o muloloki wa Jihova, 120.000 ndenge akwa Ninive adyela, abhulula o myenyu yâ! Kudisukilu yoso yalondekesa kwila, Jona mwéne wexile mufundisa kyayibha o athu, ki Jihova kana.

6. Mukonda dyahi Jihova kabhingi kututangela o maukexilu asola kubatula o maka?

⁶ Jihova kabhingi kujimbulula ku athu o ukexilu wasola kubatula o maka. M’ukulu, Jihova wehela jiselevende jê kuzwela kyebhi kyadivu mu kima kyasolo mwene, mba kyexile phala kusola. (Dim. 18:25; Jona 4:2, 3) Sayi ithangana, mwene wajimbulula o ima yamubhangesa kubatula o maka. (Jona 4:10, 11) Maji séku kima kijijidika Jihova kututangela se mukonda dyahi wasolo kubatula o maka. Kuma mwéne o Mubhangi wetu, mwene kabhingi kwila, etu tuxikina o kima kyasolo, kikale ande mba kyoso kyasola ukexilu wakubatula o maka.—Iza. 40:13, 14; 55:9.

DYELELA KWA JIHOVA KYOSO KI UTAMBULA ITENDELESU

7. Kibhidi kyebhi kitutena kudibhana nakyu ni mukonda dyahi?

⁷ Sé phata, etu tuxikina ni muxima woso kwila, Jihova ubhanga ngó kyayuka ithangana yoso. Maji o kibhidi kyalaku, o kudyelela ku mayala asola mwene. Etu tutena kukala ni jiphata, mukudibhwidisa se o jiphange amukwendesa o kilunga, amukayela mwene o itendelesu ya Jihova inga amukayela o ixinganeku yâ. Muthembu yasoneka o Bibidya, sayi yá exile we ni ixinganeku yiyi. Xinganeka mu phangu yotumbule mu kaxi 3. O ndandu ya diyala amujibha mukonda dya kubhukumukina o kizuwa kya Sabhalu, wejitena kudibhwidisa: O kwila Mozé wasoto kwijiya o kixinganeku kya Jihova ande dya kufundisa ndandu yami? O dikamba dya Udiya mukwa Hite, mwadi wa Bateseba, watele phanda ni Davidi, wejitena kuxinganeka kwila, Davidi, bhukaxi ka kutena kwê kala Sobha, walenge kutambula o kaxtiku kamutokalele. Jihova wadyelela o athu asolo phala kwendesa o kilunga kyê. Kyenyikiphe, se tukamba kudyelela o mayala yá, kitutena kuzwela kwila, twadyelela kwa Jihova.

8. Kala kilondekesa Ikalakalu 16:4, 5 ihi yexile mubhita mu thembu ya jipoxolo yene mubhita we mu kilunga lelu?

⁸ Lelu, Jihova wendesa o kilunga kyê mu ixi bhukaxi ka ‘kimbadi kya fiyele kya dimuka.’ (Mat. 24:45) Kala o kibuka kya utuminu mu thembu ya Jikidistá ja dyanga, o kimbadi kya fiyele, lelu, kyendesa o mundu wa Nzambi mu ngongo yoso, kibhana we itendelesu kutufunga mu ilunga. (Tanga Ikalakalu 16:4, 5.) Mukusuluka, tufunga abhanga yoso phala kukayela o itendelesu yiyi mukilunga. Tulondekesa kwila twadyelela mu ukexilu wa Jihova wa kubhanga o ima, mukubelesela o itendelesu itubhana o kilunga ni tufunga.

9. Kithangana kyebhi kitena kubhonza kuxikina o kima kyasolo o tufunga ni mukonda dyahi?

⁹ Sayi ithangana, kitubhonza kuxikina o ima yasolo o tufunga. Mukifika, mumivu kudima, ilunga yavulu a isokejeka. Sayi jimbandu, o tufunga abhingi ku aboki phala kukwatekesa kilunga kyengi, phala kwizalesa kyambote o ididi yakuxikama mu Ididi ya Ubhezelu. Se akubhinga phala kuya kilunga kyengi, kitena kukubhonza kuxisa o makamba ni jindandu jé. O kwila o tufunga atambula itendelesu tunde kudyulu, mukwa tangela kwebhi kwatokala kutumikisa o aboki? Kana. O kiki, kitena kutubhonzesa kuxikina o itendelesu yatubhana. Maji Jihova wadyelela o tufunga phala kubatula o maka, etu we twatokala kuwa adyelela.b

10. Kala kilondekesa Jihebelewu 13:17, mukonda dyahi twatokala kutumaka o tufunga?

¹⁰ Mukonda dyahi twatokala kutumaka o tufunga ni kuxikina o ima yasolo, né mwene se kitwakiwabhela kyavulu? Mukonda mukubhanga kiki, o mundu wa Nzambi wandakala jinga ni muxima umoxi. (Efe. 4:2, 3) O kilunga kyenda dingi kyambote kyoso kitubelesela o kima kisola o kibuka kyatufunga, ni kulenduka kwoso. (Tanga Jihebelewu 13:17.) Kyabeta dingi kota, mu kutumaka yó a asolo phala kutulanga, tulondekesa kwa Jihova kwila twamudyelela.—Ika. 20:28.

11. Ihi itena kukolesa o kidyelelu kyetu mu itendelesu itubhana o tufunga?

¹¹ Tutena kubandekesa o kidyelelu kyetu mu itendelesu itubhana o tufunga, mukulembalala kwila, ene abhinga o nzumbi ikôla mumusambu, kyoso kyabatula maka mukilunga. Ene atokwesa we itumu ya Bibidya ni madivulu mba mikanda ibhana o kilunga kya Jihova. Ene amesena kyavulu kusangulukisa Jihova ni kulanga kyambote o mundu wê. O mayala yá afiyele, ejiya kwila, andabhakula jikonda kwa Jihova mu ukexilu wakumbidila o ikalakalu yâ. (1 Phe. 5:2, 3) Xinganeka ngó: O athu kumundu adiwanuna mu ibuka ibuka bhukaxi ka kikonda, ngeleja ni atwameni ajinguvulu asola kukayela. Maji o mundu wa Jihova ala ngó ni muxima umoxi, amubheza o Nzambi yakidi. Kiki kyene mubhita ngó, mukonda Jihova wene mubesowala o kilunga kyê!

12. Ihi yene muxinganeka o tufunga phala kumona se o muthu wadyela mwene?

¹² Jihova wabhana kutufunga o kikalakalu kyadikota kya kuzelesa jinga o kilunga. Se kukala Kidistá uta kituxi kyadikota, Jihova umesena kwila, o tufunga asota kumona se o muthu utena hanji kukala mu kilunga. Bhukaxi ka ima yavulu, ene atokala kutonginina se o muthu ku muxima wê, udivwa kyayibha mukonda dya kituxi kyate. Mwene utena kwamba kwila wadyela, maji o kwila wazembe o kima kyabhange? Mwene wasolo kumuxima wê kubhanga yoso phala kavutukile dingi o kituxi kyate? Se o makamba ayibha éne amwambata mu ituxi, o kwila wamesena kubatula o ukamba ni ene? O tufunga asamba kwa Jihova, asota kutendela yoso yabhiti, asota kwijiya yamba o Bibidya, axinganeka mu maka, atokwesa o Bibidya, atonginina we o ukexilu wamuxima wamuthu wate o kituxi. Mukusuluka, ene asola se o muthu wate o kituxi utena kukala mukilunga. Muveji jamukwa, kwabhingi kumuta mu kamukonde.—1 Kol. 5:11-13.

13. Ihi itutena kudibhwidisa se o muthu amute mukamukonde dikamba mba ndandu yetu?

¹³ Kyebhi kyatena kulola o kidyelelu kyetu kutufunga? Se o muthu amute mukamukonde ki ndandu mba kamba dyetu dya muxima, nange kikubhonzwe kuxikina kyasolo o tufunga. Abha se kamba dyetu dya muxima? Tutena kumateka kukala ni jiphata ni kudibhwidisa se o tufunga atale mwene yoso, mba se afundisa mwene kala kibanza Jihova. Ihi yandatukwatekesa kukala ni ixinganeku yambote se tudibhana ni maka ya?

14. Ihi itena kutukwatekesa se o muthu amute mukamukonde dikamba mba ndandu yetu?

¹⁴ Twatokala kulembalala kwila, o kuta muthu mukamukonde, kitumu kya Jihova, kilanga o kilunga, kitena kulanga yó wate o kituxi. Se o muthu wate o kituxi ukale mwene mu kilunga, mwene utena kufwinyisa akwa. (Nga. 5:9) Mwene utena we kuxinganeka kwila, o kituxi kyate, kimaka adikota, kabhingye kulungulula o ixinganeku yé phala Jihova n’a mu xikina dingi. (Ndo. 8:11) Tutena kudyelela ni kidi kyoso kwila, o tufunga atonginina mwene kyambote o maka, ande dyakusola kuta mukamukonde o muthu wate o kituxi. Kala o afundixi mu Izalayele yokulu, o tufunga lelu ejiya kwila, o ‘kufundisa kwâ ki kwa tundu ku muthu, maji kwa tundu kwa Jihova.’—2 Mal. 19:6, 7.

KUDYELELA KWA JIHOVA LELU KWANDATUKWATEKESA MU IBHIDI YANDAMOKENA KUHÁDYA

15. Mukonda dyahi lelu twabhingi dingi kudyelela mu ukexilu wa Jihova wa kubhanga o ima?

¹⁵ Kuma o dizubhilu dya mundu yú dyazukama, twatokala kudyelela dingi mu ukexilu wa Jihova kubhanga o ima, m’ukulu ndenge. Mukonda dyahi? Mukonda mukithangana kya hadi yadikota, tutena kutambula itendelesu imoneka kala kiyafwame, ki itutokala, ki yabhingye. Mu kidi, Jihova kanda tufwetela o maka muditwi dyetu, kana. Mwene utena kutubhana o itendelesu bhukaxi ka jiphange amukwendesa o kilunga kyê mu ixi. Kyokyo ki kyandakala kithangana kya kukala ni jiphata mu kudibhwidisa: ‘O kwila o kitendelesu kiki kyatundu mwene kwa Jihova, inga kixinganeku kya jiphange ala kupholo?’ O kwila wandabelesela mu kithangana kyokyo? O kitambwijilu utena kukijiya bhukaxi ka ukexilu uwene mudivwa kyoso ki utambula itendelesu kindala kiki. Se udyelela kyoso kya kubhana itendelesu kindala kiki, anga ubelesela, kyene we kiwandabhanga mu kithangana kya hadi yadikota.—Luka 16:10.

16. Kyebhi kyatena kulola o kidyelelu kyetu mu ukexilu wa Jihova wakubatula o maka?

¹⁶ Twatokala kuxinganeka we kyambote, kyebhi kitwandadivwa kyoso Jihova kyandafundisa o mundu yú wayibha. Kindala, twamukinga o kithangana kyoso jindandu jetu kamusidivila Jihova, atena kumusidivila. Maji mu Alumajedone, Jihova, bhukaxi ka Jezú, wandasola muveji yasukina se éne andabhuluka mba kana. (Mat. 25:31-33; 2 Tes. 1:7-9) K’etu twandasola nanyi watokala ni yó katokala kutambula o muloloki wa Jihova. (Mat. 25:34, 41, 46) Wandatena kuxikina o ima yandasola Jihova inga wandadibhukana? Sé phata, twabhingi kukolesa kindala kiki o kidyelelu kyetu mu uhete wa Jihova kubatula kyambote o maka, phala kuhádya kitukale ni phata.

17. Mbote yahi itwandakatula mu ukexilu wa Jihova kufundisa kudizubhilu dya mundu yú wayibha?

¹⁷ Xinganeka ngó kyebhi kiwandadivwa ku mundu wobhe, ni mu mbote yandabheka o ifundisu ya Jihova. O jingeleja jamakutu kijandakalaku dingi, o akwa kusumbisa ni jinguvulu jene mutatesa o athu ni kubhekela o windwa, kandakalaku dingi. O mauhaxi, kukuka ni kalunga kikanda kalaku dingi we. Satanaji ni madimonyo, anda ku akuta mu midi yamivu. O ibhidi yabheka o kubhukumuka kwâ kiyandakalaku dingi. (Dij. 20:2, 3) Twandasanguluka kyavulu, mukonda dya kudyelela mu ukexilu wa Jihova wa kubhanga o ima!

18. Madisá ebhi ututena kukatula muphangu ya akwa Izalayele kala kyakisoneka mu divulu dya Dyalwilu 11:4-6 ni 21:5?

¹⁸ O kwila o mwenyu kumundu wobhe utena we kulola o kidyelelu kyetu mu ukexilu wa Jihova wa kubhanga o ima? Xinganeka yabhiti ni akwa Izalayele kyoso kyatundu mu ubhika ku Ijitu. Amoxi mudya amateka kudikalanganza mukonda kexile dingi ni kudya kwexile naku ku Ijitu, amateka kusebhulula o maná exile mu abhana Jihova. (Tanga Dyalwilu 11:4-6; 21:5.) Tutena we kukala ni ixinganeku yiyi kyoso kyandabhita o hadi yadikota? Kitwejiya kyambote kyebhi kyandakala o kikalakalu kyakukomba ni kusokejeka kyambote o ixi kate ki ikituka palayizu. Maji nange kudimatekenu, kwandakala ikalakalu yavulu ni itatesu yamukwa. O kwila twandadikalanganza ni ima yandatubhana Jihova kudimatekenu? O kima kitwejiya ngó kyenyiki: Se kindala kiki tulondekesa kya kisakidilu mu yoso yene mutubhana Jihova, kuhádya kyene kitwandabhanga we.

19. Kyebhi kiweji jimbulula o jipondo jabetakota ja milongi yiyi?

¹⁹ O ukexilu wa Jihova kubhanga o ima wene wabetakota, mu ithangana yoso. Twabhingi kuxikina ni muxima woso. Twabhingi we kudyelela kwa yó a asolo kwala Jihova phala kwendesa o kilunga kyê. Kitwatokala kujimba yazwela Jihova bhukaxi ka polofeta Izaya: ‘O kudyelela ni kuximbakata, kwandakumibhekela uzônda.’—Iza. 30:15.