DISÁ 13
Makutu Ebhi Alungu ni Nzambi Ene mu Longa o Jingeleja?
Se Nzambi henda, mukonda dyahi sayi ima yavulu ya yibha yene mu bhanga akwa jingeleja ene mu kwamba kwila akunji a Nzambi? Mukonda ene atokala mu jingeleja jamakutu. Ene kazwela o kidi kya lungu ni Nzambi. Kyebhi kyene mu tanga makutu alungu ni mwene? Kyebhi kya divwa Nzambi? Ihi yandabhanga mwene ya lungu ni maka yá?
1. Kyebhi akwa jingeleja jamakutu kyene mu longa makutu alungu ni Nzambi bhu kaxi ka ulongelu wâ?
Akwa jingeleja jamakutu “abhilula o kidi kya Nzambi mu makutu.” (Loma 1:25) Mu kifika, jingeleja javulu kene mulonga o dijina dya Nzambi ku athu. Maji o Bibidya ilonga kwila o dijina dya Nzambi atokala kuditumbula. (Loma 10:13, 14) O atwameni ajingeleja alonga kwila kyoso kikubhita kima kya yibha, yene o vondadi ya Nzambi. Maji yá makutu. Nzambi kimwene wene mu tubhekela o ima ya yibha. (Tanga Tiyaku 1:13.) O makutu ajingeleja, ene mu fidisa o athu kuzukama kwa Nzambi.
2. Kyebhi akwa jingeleja jamakutu kyene mu longa makutu alungu ni Nzambi bhu kaxi ka ibhangelu yâ?
Akwa jingeleja jamakutu kene mutalatala kyambote o athu, kala kibhanga Jihova. O Bibidya ilonga kwila akwa jingeleja jamakutu “o ituxi yâ ya bhixila katé ku dyulu.” (Dijingunwinu 18:5) Mu mivu yavulu akwa jingeleja jamakutu ene mu funyisa o jinguvulu, kukwatekesa mu ita, ene mu bhangesa mazunda ni mazunda a athu kufwa. Sayi atwameni ajingeleja amesena kukala jimvwama. Kyenyiki, ene abhinga kitadi kyavulu ku akayedyâ. O ibhangelu yâ ilondekesa kwila ene kejiya Nzambi, ene kafwama we kukala akunji a Nzambi.—Tanga 1 Nzwá 4:8.
3. Kyebhi Nzambi kya divwa ya lungu ni akwa jingeleja jamakutu?
Se o ima yene mubhanga akwa jingeleja jamakutu ikukwatesa njinda, xinganeka kyebhi kya divwa Jihova! Mwene wazolo o athu, maji uluwala ni atwameni ajingeleja ene mu longa o makutu alungu ni mwene, ni kutalatala kya yibha o akayedyâ. Mwene wakanena kubwika o jingeleja jamakutu. O Bibidya yamba: ‘Ki jandamoneka dingi ku mesu.’ (Dijingunwinu 18:21) Kwakambe ngó bhofele, Nzambi wandabwika o jingeleja joso jamakutu.—Dijingunwinu 18:8.
DILONGE DINGI
Dilonge dingi kyebhi Nzambi kya divwa ya lungu ni jingeleja jamakutu. Dilonge we ya lungu ni ima ya bhange akwa jingeleja, ni mukonda dyahi o ima yiyi, ki itokala kukufidisa kwijiya Jihova.
4. Nzambi kaxikina jingeleja joso
Athu avulu axikina kwila, o jingeleja jedi kala jinjila kijidifu maji joso jizukamesa kwa Nzambi. O kwila kiki kidi? Tanga Matesu 7:13, 14, mukusuluka bhanga o kibhwidisu kya kayela:
Ihi izwela o Bibidya ya lungu ni njila ya mwenyu?
Tala OVIDYU, mukusuluka bhanga o kibhwidisu kya kayela.
O kwila o Bibidya ilonga kwila, sayi jingeleja javulu jisangulukisa Nzambi?
5. Akwa jingeleja jamakutu kene mu londekesa o henda ya Nzambi
Akwa jingeleja jamakutu, ene mu tanga makutu alungu ni Nzambi mu maukexilu avulu. Ukexilu umoxi ulondekesa dingi o makutu yá, o kubhanga mbandu mu ita. Tumone kifika, tala OVIDYU. Mukusuluka bhanga o ibhwidisu ya kayela.
Ima yebhi ya bhange akwa jingeleja mu kithangana kya Ita ya Kayadi ya bhiti ku Mundu?
Kyebhi ki udivwa ya lungu ni ima ya bhange?
Tanga Nzwá 13:34, 35 ni 17:16. Mukusuluka bhanga o ibhwidisu ya kayela:
Kyebhi kya divwa Jihova kyoso akwa jingeleja kya bhanga mbandu mu ita?
Ima yavulu ya yibha yene mu bhita mu ngongo, mukonda dya jingeleja jamakutu. Ima yebhi yene mu bhanga akwa jingeleja jamakutu iwene mumona, ilondekesa kwila kene mu londekesa o henda ya Nzambi?
Akwa jingeleja jamakutu kene mu londekesa o henda ya Nzambi
6. Nzambi wamesena kukwatekesa o athu kutunda mu jingeleja jamakutu
Tanga Dijingunwinu 18:4,a mukusuluka bhanga o kibhwidisu kya kayela:
Akwa jingeleja jamakutu ene mu nganala o athu. Kyebhi ki udivwa mu kwijiya kwila, Nzambi wamesena kukwatekesa o athu kutundamu?
7. Suluka ni kwijiya o Nzambi ya kidi
O kwila o ima yene mubhanga akwa jingeleja jamakutu, jikubhangesa kudisandula kwa Nzambi? Xinganeka mona kabelesela o itendelesu ya umjimu imubhana tat’ê. O mona usola kutunda kubhata ni kubhanga ima ya yibha. O tata kaxikina o ima ibhanga o mona. O kwila kyeji fwama kutatela o tata mu ima ya yibha ibhanga o mona?
O kwila kyeji fwama kutatela Jihova ni kweha kudilonga ya lungu ni mwene mukonda dya ima ya yibha ibhanga akwa jingeleja jamakutu?
ATHU AVULU AMBA: “Eme kingimesena kwijiya Nzambi mukonda dya ima ya yibha yene mu bhanga akwa jingeleja.”
O kwila kyene we ki ubanza?
Mukonda dyahi o ima ya yibha yene mubhanga akwa jingeleja jamakutu ki itusandula kwa Jihova?
IHI IWADILONGO
Akwa jingeleja jamakutu ene mu bhanga ima isondolola o athu kwa Nzambi. Ene abhanga kiki mu kulonga ni kuzwela ima ya yibha. Nzambi wandabwika o jingeleja jamakutu.
Kubhitulula
Ihi i ubanza ya lungu ni ima yene mu longa akwa jingeleja jamakutu ni ima ya bhanga?
Ihi ibanza Jihova ya lungu ni jingeleja jamakutu?
Ihi yandabhanga Nzambi ni jingeleja jamakutu?
TOKWESA DINGI
Dilonge ima iyadi ilondekesa kwila, akwa jingeleja jamakutu kene mu bhanga o vondadi ya Nzambi.
“O Kwila Jingeleja Joso Jadifwengo? Okwila Jene Joso Jituzukamesa Kwa Nzambi?” (Milongi ya jw.org)
Mukonda dyahi Jihova wamesena kwila, tumubheza kumoxi ni akwetu?
“O Kwila Kubhinga Mwene Kudyongeka Phala Kubheza Nzambi?” (Milongi ya jw.org)
Tala musoso walungu ni padele wexile ni jiphata jalungu ni milongi ya ngeleja yê. Maji né kiki, mwene kabhwila mu kusota o kidi kya lungu ni Nzambi.
“Sayi Padele Watundu mu Ngeleja Mwatokalele. Mukonda Dyahi?” (Despertai!, Fevereiro 2015)
Akwa jingeleja ene mu tanga makutu alungu ni Nzambi mu mivu yavulu. Mu kiki, athu avulu abanza kwila, mwene katuzolo, mwene muthu wayibha. Dilonge o kidi kya lungu ni makutu atatu yá.
“Makutu a Bhangesa Athu ku Kamba ku Zola Nzambi” (O Mulangidi, 1 wa Kamoxi wa 2013)
a Phala kwijiya se mukonda dyahi o divulu dya dijingunwinu disokesa o jingeleja jamakutu ni muhatu a mwixana Babilonya ya Dikota, tala o Kibandekesu 1.