Kiebhi Kia Tena ku Longa o Mak’â Nzambi ku Tuana Kiebhi kia Tokala ku Bhanga Kiki?

“Maka u ngala ku ku tendelela lelu’idi u ma lunda ku muxima ué. An’é u a longa muene o ku a bhaka ni ku a kumbidila; o ki u xikama m’onzo ié, banza maka enhá; o ki u kala mu kuenda njila, enda ni maka enhá; o ki u zeka, zeka ni maka enhá; o ki u balumuka ku kilu, kuata maka enhá.”​—MATENDELELU 6:6, 7.

SAÍ ithangana o jitata a thandanganha kiavulu ni kikalakalu kia ku longa o tuana. Kioso kia sota milongi ku athu, mba mu madivulu ene a kamba kuijiia se a-nda kuívua milongi ia nanhi. O jindandu ni makamba, ene mu bhana ué milongi iâ. O madivulu ni Internete, ene mu bhana ué milongi iavulu ku jitata, maji o milongi íii ki i difu.

O Bibidia ki i bhana ngó milongi ia tokala ku jitata phala ku longa o tuana tuâ, maji i longa ué kiebhi kia tena ku bhanga kiki. Kála kia londekesa o jivelusu ja dianga, o jitata a tokala ku kala ni kithangana phala kuzuela ni tuana tuâ maka alungu ni Nzambi. Tua-nda mona pondo jiuana ja tundu mu Bibidia, iene mu kuatekesa jitata javulu ku longa o tuana tuâ maka alungu ni Nzambi.

1. Longa o tuana tuê bhu kaxi ka ibhangelu. O poxolo Phaulu ua soneka: “Kuma tunde Nzambi kia bhanga oxi, o ima iê-muène ia kambe kumoneka ku mesu, kutale o nguzu iê inanga, uixi o unzambi uê, ki [u] jimbi, mukonda ia di monekena. Kuma athu ia a jimbulukila mu imbamba ia bhanga Nzambi.” (Loma 1:20) O jitata a tena ku kuatekesa o tuana kuijiia kuila Nzambi Muthu ua kidi, ni ku a kuatekesa kuijiia o ibhangelu, ni kuijiia o ídifua iê bhu kaxi ka ibhangelu.

Jezú ua bhange kiki kioso kia longo o maxibulu mê. Mu kifika muéne uambe: “Talesenu jinjila ji bhita bhulu, kuma ki jene ku kuua, ki jene kumuna, ki jene kubhongolola mu itula; Tat’enu ia diulu-phe u ji disa! Ni enu-phe ni jinjila, kífua enu ki mu kot’èlele?” (Matesu 6:26) Jezú ua kexile mu londekesa o henda ia Jihova. Maji ka suku bhobha. Muéne ua kuatekesa o maxibulu mê kuijiia kiebhi Nzambi kia londekesa o kídifua kiki ku an’ê.

O unjimu Sobha Solomá, ua tange o unjimu ua bhana Nzambi ku ji xixikinha, iu ua katula phangu ku ibamba íii, phala ku longa disá. Muéne ua soneka: “Eie u musonde, ndé kà di kunde ni xixikinha; tongolola kiambote o jinjila jê, u dimuke. Sumbala ka moneka dikota, ka moneka fixiiadi, kene ni sobha, [maji-phe], bhu mvula u huka kúdia kuê; o bhu thembu ia kumuna, muene ue u bhongolola idima hé u bhaka.” (Jisabhu 6:6-8) Iú ukexilu uambote ua ku longa ku bhana valolo ku ikalakalu ietu, ni jimbambe ji tu suua bhu kaxi ka nguzu i tu bhana Nzambi!

O jitata a tena ku kaiela o ukexilu uambote ua Jezú ua ku longa, ni ua Solomá, mu ku bhanga kiki: (1) Ebhuidisa o tuana tuê se ithulu iebhi, mba iama iebhi ia beta ku uabhela. (2) Ejiia dingi ia lungu ni ithulu, mba o iama ia beta ku uabhela. (3) Ihi ia tena kuijiia ia lungu ni Nzambi bhu kaxi ka ibhangelu.

2. Kaiela o ukexilu uambote ua Jezú ku longa athu. Jezú ua kexile ni kima kia beta-kota phala ku longa, o athu a mukuá a tungile mu ngongo, ndenge. Muéne ua bhiti thembu iavulu mu ku bhanga ibhuidisu. Muéne ua mesenene o mbote ia ió akexile mu longa. (Matesu 17:24, 25; Marku 8:27-29) Lelu o jitata ala ué ni ima iavulu ia valolo phala ku longa o tuana. Phala ku di tunda kiambote, ene a tokala ku kaiela o phangu ia Jezú mu ku suínisa o tuana ku a tangela ihi ia banza ia lungu ni ima.

Ihi i tuamba se o mona ulondekesa ídifua ia iibha, mba u kokoloka ku di longa disá dia valolo? Xinganeka ihi ia bhange Jezú kia longo o jipoxolo. Saí ithangana, o maxibulu akexile mu zoka, ene a kokoloka ku di longa o valolo ia ku lenduka. Jezú ua kexile ni muanhu, ua longo veji javulu o valolo ia ku lenduka. (Marku 9:33, 34; Luka 9:46-48; 22:24, 25) O jitata ji kaiela o phangu ia Jezú, a-nda longa o tuana tuâ, se ku bhinga ku bhanga kiki, veji javulu ene a tokala ku ki bhanga katé o ana kuijiia.a

3. Longa mu ku bhana phangu iambote. O jitata a tokala ku xinganeka mu milongi ia bhana Phaulu ku Jikidistá mu Loma. Muéne ua a sonekena: “Ki’ual’okio-phe, eie u longesa akuenu, ku di longela-hi eie-muene? U mukua kuboka, uixi muthu ka nhane, eie-muene u nhana?”​—Loma 2:21.

Milongi íii iambote, mukonda o ana-ndenge a beta ku kaiela o ima i bhanga o jitata, kana o ima ia zuela. O jitata ji bhanga o ima iambote ia zuela, nange a kala ni ana a belesela.

4. Longa o tuana tundé mu undenge. O Timote soko dia poxolo Phaulu mu ukunji, ua kexile ni ukexilu uambote mu diembu diê. (Ikalakalu 16:1, 2) Mukonda “tundé undenge” muéne uejidile o “Mikanda Ikôla.” O mama a Timote, ni kuk’ê ka kexile ngó ku mu tangela o Mikanda Ikola, maji a mu kuatekesa ué kuijiia o valolo iê.​—2 Timote 1:5; 3:14, 15.

Kuebhi ku u Tena ku Sanga o Kikuatekesu

O Jimbangi ja Jihova ala ni madivulu avulu phala ku kuatekesa o jitata ku longa o tuana tuâ kuijiia ia alungu ni Nzambi. Saí iá a a bhange muene phala ana-ndenge. O madivulu a mukuá phala ku kuatekesa o jitata, ni tuana tuâ kuijiia ku di zuelesa kiambote.b

O jitata a tena ku longa o tuana maka alungu ni Nzambi, maji ene a tokala kuijiia ku tambuijila o ibhuidisu ia bhonzo i bhanga o tuana. Mu kifika, kiebhi ki ueji tambuijila o ibhuidisu íii: Mukonda diahi Nzambi uehela o hadi? Iebhi o vondadi ia Nzambi phala o ixi? Kuebhi kuala athu afú? O Jimbangi ja Jihova a mesena ku ku kuatekesa kuijiia o maka enhá phala eie, ni muiji uê u tena ku zukama kua Nzambi.​—Tiiaku 4:8.

[Tanga mu luji]