Ene a Kolokotele mu “Kithangana Kia Phaxi”

KIOSO kia mateka o Ita ia Dianga ku Mundu Uoso, ku muvu ua 1914, o athu a mono kuila, o Adilongi a Bibidia ka mesenene kuia mu ita. (Iza. 2: 2-4; Nzuá 18:36; Efe. 6:12) Kiebhi kia di tundu o jiselevende ja Nzambi mu ixi ia Grã-Bretanha?

Ku muvu ua 1916 kua tundu kitumu ku ixi ia Grã-Bretanha kiambele kuila, o maiala oso exile akudi mu kitala kia 18 mba 40 a mivu mu ixi, a tokalele kuia mu usoladi. Kua tundile ué kitumu kia bhanene o ufôlo kua ió ka tenene kuia mu ita mukonda “dia ubhezelu uâ.” O nguvulu ia bhangele inzo ia kufundisa phala ku sola se nanhi ka tokalele kuia mu ita mukonda dia kitumu kiki.

Ki ku bhitile thembu iavulu 40 a Adilongi a Bibidia, a a tele mu kaleia ka masoladi, o 8 a a tumikisine ku pholo dia ita mu ixi ia França. O jiphange mu Grã-Bretanha kia mono kiki a soneka mukanda ku Mutuameni ua Kaiiadi mu ixi íii, Herbert Asquith, phala ku xitala, mukonda dia ku balakala o jiphange jetu, mu mukanda a te-mu kijimbuete kiâ 5.500 ia jiphange.

Kua tundu mukanda ku França uambele kuila, o dinake dia jiphange a a balakele kufuá, mukonda a ditunine o usoladi. Maji kioso kia a kutu o mesu a jiphange phala ku a jibha, a lungulula o kitumu, kiambe kuila, keji ku a jibha dingi maji ene eji bhita dikuinhi dia mivu mu kalakala mu kaleia. Ene a a vutula ku ixi ia Inglaterra phala ku sidivila mu kaleia ki ka tokalele ku masoladi.

Mu ku suluka o ita, a bhana dingi kitumu kia kuila o maiala a kazala a tokalele ué kuia mu ita. Mu kifika mu mbanza ia Manchester, mu ixi ia Inglaterra, o Henry Hudson uexile dotolo, muéne uexile ué Mudilongi a Bibidia, a mu balakele mukonda dia ku dituna kuia mu usoladi. Ku muvu ua 1916 ku mbeji ia kakuinhi mu kizuua kia 3, o inzo ia kufundisa iambe kuila muéne ua bhukumukina o kitumu, mukonda dia kiki, a mu bhangesa ku futa kitadi, ia mu tumikisa dingi mu usoladi. Kuexile ué phange ia mukuá akexile ué ku mu fundisa mu mbanza ia Edinburgh, mu ixi ia Escócia. James Frederick Scott, uexile muboki ua thembu ioso, uexile mu 25 a mivu, kexile ni kikuma kia kima. O inzo ia ku fundisa ia bhingile ku tala kiambote o maka a phangetu James Frederick Scott, maji kuma kua monekene maka engi mu mbanza ia Londres, o inzo ia ku fundisa uaxi hanji o maka ia. Mu veji íii o phange Herbert Kipps, a mu mono ni kikuma, a mu bhingi ku futa kitadi, iá mu tumikisa ku usoladi.

Ku mbeji ia Katutu ku muvu ua 1916, 264 a jiphange a soneka mukanda mu ku bhinga, phala kaie mu usoladi. Mu jiphange jiji, ki 5 a eha, o 154 a a bhana “ikalakalu ia katunda mu nguvulu,” o 23 a a bhana ikalakalu ki i tokala ku usoladi, o 82 a tumikisa mu ita, o a mukuá a a balakala mukonda dia ku kamba ku belesela. O athu ka di xibha kioso kia mono kuila akexile mu zukutisa o maiala enhó, mukonda dia kiki o nguvulu ua a katula mu kaleia iu ua a tumikisa dikanga phala ku bhanga ikalakalu ki ia tokala ku usoladi.

O jiphange Edgar Clay ni Pryce Hughes, a sidivila ku kibuka kia filiiale mu ixi ia Grã-Bretanha, ene ué a kalakalele mu ku tunga ilumbu ia ixi ia Gales. Ku mbandu ia mukuá, ku dinake a a tumikisile mu ita, Herbert Senior ua tundile ku França a mu tumikisa mu kaleia ka Wakefield ku Yorkshire. A kamukuá a kumbidila o kaleia mu kalakala kiavulu mu Kaleia ka Dartmoor, kuene kua bhangele o kibuka kia betele-kota, kia athu ka xikina ku luua ita.

Frank Platt, uexile Mudilongi a Bibidia, ka xikinine ku bhanga ikalakalu ia lungu ni ita, a mu zukutisa kiavulu kioso kia mu tumikisa mu ita. Atkinson Padgett, ua di sonekene phala kuia mu usoladi, kioso kia mateka ku di longa o Bibidia, ua ditunu kuia mu ita, mukonda dia kiki a mu zukutisa ku ji xefe ja masoladi.

Sumbala o vondadi ietu ia ku dituna kuia mu ita, ka i tendele luua kiambote ku jiphange jetu ku hama ia muvu ua bhiti, né kiki ene a solele ku bhanga o vondadi ia Jihova Nzambi. O athu u tua tange mu milongi íii, a tu longo phangu iambote mu “kithangana kia phaxi.” (Dij. 3:10)—Ima ietu io bhakele mu ixi ia Grã-Bretanha.