‘Tua Sange Mexiia!’

Mu ku bhita hama jiuana ja mivu, kioso kia zubha o ku soneka o divulu dia sukina mu Bibidia mu dimi dia Hebalaiku, o kikanenu kia Mikeia kia lungu ni Mexiia kia di kumbidila: Jezú a mu vuala mu mbanza ia Beleme. Mu ku bhita 30 a mivu, ku 29 K.K. o kikanenu kia Daniiele kia lungu ni uijilu ua Mexiia kia di kumbidila. Jezú a mu batizala, Nzambi ua mu undu ni nzumbi ikôla. Mu kithangana kia tokala, o Mexiia akexile ku mu kingila, o Mbutu, ua bhixila!

Jezú ua mateka o ukunji uê “ni kutula o Njimbu Iambote ia Utuminu ua Nzambi.” (Luka 8:1) Kala kia ki kanene, Jezú uexile muthu uambote, ua lenduka, iu ua zolele o athu. O milongi ia kexile mu longa muéne, ia kexile mu kuatekesa o athu, ua kexile mu saka ué “jihaxi ni inema mu’axaxi ka mundu” ni kulondekesa kuila Nzambi ua kexile n’â. (Matesu 4:23) Athu a itala ioso ni mundu uoso, akexile mu kuíza kua Jezú ni ku dikola: ‘Etu tua sange Mexiia!’—Nzuá 1:41.

Jezú ua kanene kuila, ande dia Utuminu uê ku mateka o ku tumina o ngongo, kueji bhita ita ku mundu, kitungutu kia ixi, ni phaxi ja mukuá. Muéne uambe: “Di langienu!”—Marku 13:37.

Jezú uexile muthu ua fiiele, ua kolokota mu ku belesela Nzambi, maji muéne ua kexile ni jinguma javulu eji ku mu jibha. O kufuá kuê kua sidivila phala ku tu bhana o kima kia texi Adá ni Eva​—o muenhu ua kalelaku mu Palaízu.

Ki kale o kufuá kua Jezú ni ku mu fukununa kua Nzambi kala muthu mu nzumbi mu ku bhita izuua itatu mu mbila, ia kumbidila o kikanenu. Mu ku bhita ithangana, Jezú ua monekena 500 a maxibulu mê. Ande dia ku banda ku diulu, Jezú ua tumu akaiedi’ê ku tula o njimbu iambote ia lungu ni muéne ni Utuminu uê ku “akua jixi joso.” (Matesu 28:19) Kiebhi ene kia kumbidila o kikalakalu kiki?

—O milongi íii ia tundu mu divulu dia Matesu, Marku, Luka, Nzuá ni 1 Kolindo.