Nzambi u Tena Ku u Kuatekesa

MUKONDA DIAHI ATHU ALA NI PHATA: Né muene kioso kia bhindamena kikuatekesu, sai athu a banza kuila ka tokala ku bhinga kikuatekesu kua Nzambi, phala na tene ku di bhana ni maka mâ. Sai muhatu a mu ixana Raquel, uambe: “Kioso ki ngi mona o maka a mu bhita nau o athu ku mundu, ngi mona kuila o mak’ami ki kima, mukonda dia kiki, ngi kala ni hele ia ku bhinga kikuatekesu kua Nzambi.”

IHI I LONGA O MAK’Â NZAMBI: Nzambi ua kuatekesa kiá athu ni ku a kondona o malamba. Athu oso mu ixi a lundula o kituxi, mukonda dia kiki, kiene mu a bhonza ku kumbidila kiambote o itumu ia Nzambi. Maji Nzambi ua “tu zola, iú ua tumikisa Mon’ê [Jezú Kristu] mu kukala kiluuluilu kia ku tu lolokesa o ituxi ietu.” (1 Nzuá 4:10) Bhu kaxi ka sata ia ku kula kua Jezú, Nzambi ua loloka o ituxi ietu, ua tu bhana kitongoluelu kia zele, iu ua tu kanena muenhu ua kalelaku, ni ku kala mu ixi ia ubhe.a O kuila o sata ia kukula, a i bhana mukonda dia athu oso mu ixi inga ilondekesa o henda ia Nzambi ko kuê?

Xinganeka ku phangu ia poxolo Phaulu. Mukonda dia sata ia ku kula kua Jezú, muéne ua soneka: “O kiki o muenhu u ngala na-u mu xitu, nga u muena mu kuxikana Mon’a Nzambi, ió ua tenene ku ngi zola ni ku di bhakula mukonda diami.” (Ngalásia 2:20) Tuejiia kuila Jezú uafu ande dia Phaulu ku kituka Kidistá. Maji né kiki, Phaulu ua monene o sata íii kála ujitu ua Nzambi phala muéne.

O sata ia ku kula kua Jezú, ujitu ua Nzambi phala eie uê. O ujitu iú ulondekesa kuila eie uala ni valolo iavulu kua Nzambi. O kuijiia o kidi kiki, ku bhangesa “kubhua uôma ni kukondoka o malamba sé kufula, ni kudielela kuambote mu kiadi kiê, mu kiki a mi suinise ni mu kuzuela ni mu kubhanga ima ioso iambote.”—2 Tesalonika 2:16, 17.

Tundé kia bhana Jezú o muenhu uê, kua bhiti kiá 2.000 ja mivu. Ihi ilondekesa kuila Nzambi ua mesena ué ku kala kamba diê lelu?