DIAMBU DIA KAPA
Ihi i Tena Kukuatekesa o Muthu ua Fundu Ndandu?
“Mon’ami, Nzambi muéne ua kiandala . . . kana . . . kudila.”
O izuelu íii a i tangela muhatu uavu o dijina dia Bebe. Muéne ua kexile mu funda tat’ê, ua fuile mu kiluezu kia dikalu.
Bebe ua zolele kiavulu tat’ê. Diiala, dikamba dia muiji ua Bebe, muéne ua zuela o izuelu ioió. Maji Bebe kioso kiévu o izuelu ioió, muéne ka divu kiambote kana, o ndolo iê ia dibandekesa dingi. Muéne ua kexile mu zuela “Nzambi ka bhange kima kiambote.” Sé phata, mivu ku pholo kioso Bebe kia kexile mu soneka o ufuilu ua tat’ê, muéne ua kexile hanji ni kikote ku muxima.
Bebe ua mono kuila, kubhinga thembu phala muthu ua fundu ndandu kudivua kiambote, benge-benge se muthu ua zolele kiavulu o difundu. O Bibidia ixana o kalunga kala “nguma i sukidila.” (1 Kolindo 15:26) O kufua ku tu katula o muenhu, ki tu tena kubhanga kima, saí bhabha sé ku kingila, ndandu ietu u fua. Etu oso tu dila, tuívua ndolo iavulu. Mu kiki, o muthu ua fundu ndandu kejiia ihi ia bhanga, muxima uê u toloka.
Nange u dibhuidisa: ‘Thembu kuxi kia-nda bhua o kikote ku muxima? Ihi i tena kukuatekesa o muthu ua toloka o muxima? Kiebhi ki ngi tena kukonda o malamba a ió a toloka o muxima? O kuila hádia o jindandu jetu jafu, ja-nda vutuka dingi?’