Etu Oso Tua Bhingi ku tu Konda o Malamba

U di lembalala hanji mu undenge ué, kioso ki ua di bhukana ku ditadi, eie ua dibhale? Nange ua di kuama ku lukuaku mba ua xolomoka o phuna. U di lembalala kiebhi mam’enu kia ku kondo o malamba? Nange muéne ua sukula o fidila iu ua i kutu ni kaditele. Eie ua didi, maji izuelu iê ia henda, ni ukexilu ua ku ku ondeleka, ua kubhangesa kudivua kiambote. Mu kithangana kienhokio, ki kubhingile kusota muthu phala ku kukonda o malamba.

Maji kioso ki tu kula, o muenhu u bhonza dingi. O ibhidi i vula dingi, kubhonza dingi kusanga kikuatekesu. O ibhidi i moneka mu kitala kia uadiakime, ki i tena kubhita ni kaditele mba mu ku tu ondeleka kua mam’etu. Tanga ifika íii.

• O kuila uevuile kiá o ndolo ia ku kukaia ku salu? Julian uambe kuila, kioso kia mu kaie ku salu, ua thandanganhele kiavulu, muéne uexile mu dibhuidisa: ‘Kiebhi ki nga-nda langa o muiji uami? Nga kalakala mivu iavulu phala o ditenda didi, mukonda diahi lelu ki ngi sidivila dingi?’

• Nange o muxima uê ua toloka mukonda, ua di senge ni muhatu’ê mba muadi uê. Raquel uambe: “Kioso muadi uami kia ngi senge, 18 dia jimbeji ku dima, muxima uami ua tolokele. Ngevu ndolo iavulu, mu mukutu ni ku muxima.”

• Nange uala ni uhaxi ua bhonzo, kuijiia se ua-nda disanza. Nange saí ithangana u divua kála kia divuile Jobe, ua di tende: “Muenhu uami ua ngi kumu, nguami kukola muenhu izuua ioso kiki.” (Jobe 7:16) Nange u dívua kála kiene mu dívua Luis, uala mu kitala kia 80 a mivu, muéne uambe: “Saí ithangana ngi dívua kala kua ngi kambe kia ngó kúfua.”

• Nange o kufunda ndandu ku kubhangesa kumesena ku ku konda o malamba. Robert uambe: “Kioso mon’ami kiafu mu kiluezu kia kiphululu, kia ngi bhonzele ku ki xikina. Mu kiki kua ngiza dilamba, o dilamba di sokesa o Bibidia ni xibhata i ku tubula muxima.”—Luka 2:35.

Robert, Luis, Raquel, ni Julian a a kondo o malamba. Ene a sange o Muthu ua beta kota mu kua konda o malamba, o Nzambi Muteni-a-Ioso. Kiebhi muéne kia konda o malamba? O kuila muéne ua-nda kukonda o malamba, kala ki ua mesena?