Nga Xikina o Kidi Kia Bibidia sé Maku

Mam’etu ua kexile ni 17 dia mivu kioso kia ngi vuala ku muvu ua 1960. Tat’etu ua tu xisa ande dia ku ngi vuala. Mam’etu n’eme tua kudila ni jikuku jami, mu sanzala ia Burg, mu Ixi ia Alemanha iokulu. Athu avulu ka xikinine kuila kuene Nzambi, eme ni muiji uami, tua xikinine ué mu maka enhá. Mudietu ki kuexile Nzambi.

Kioso ki nga kexile mu kula, nga zolele o ukexilu ua kexile mu ngi talatala kukuetu. Muéne ua ngi bhanene ikalakalu iavulu, kala o kuhaba mu mixi phala kubatula o jithangu. Mukonda dia kukala mona-ndenge, nga zolele kiavulu o ikalakalu íii. Ku muenhu uami uoso nga kexile ni kutululuka ni kisangusangu.

KILUEZU KIA LUNGULULA O MUENHU UAMI

Kua bhitile kima kia iibha kioso ki nga kexile ni sambuadi dia mivu. Nga kexile ngó mu mateka kudilonga mu xikola. Kioso ki nga kexile muia kubhata, nga habe ku postu ia mukengeji. Kioso ki nga kexile kia 8 dia jimetulu ku postu, o ngoji ia mukengeji ia ngi kuata, eme nga mbuka. Kioso ki nga fundumuka, nga kexile kiá mu inzo ia kusaka, ki ngi tenene kuivua o maku’ami. A jokotele kiavulu, o jifidila ja kexile ja makota, kiki kia bhangesa ku ngi batula o maku phala o manhinga a bolo ka di muange mu mukutu uoso. Kiki kia bhangesa mam’etu ni jikuku jami kudivua kia iibha. Maji mukonda dia kukala ngi mona-ndenge, ki ngijiidile o ibhidi i ngeji kala na-iu sé o maku’ami.

Kioso ki nga tundu mu inzo ia kusaka, nga vutuka dingi ku dilonga mu xikola. O ana ndenge a kexile mu ngolela kiavulu, a kexile ué mu ngi ta bhu kaxi ni ku ngi takula ima mukonda ki ngeji tena kudifikidila. Nga kexile mu divua kia iibha mukonda dia izuelu iâ ni ukexilu ua kexile mu ngi talatala. Mu ku suluka a ngi tumikisa mu mbanza ia Birkenwerder mua kexile o xikola ia inema, iexile kála inzo mua kexile mu kala o inema. Kuma o xikola ia kexile dikanga dia inzo, mam’etu ni jikuku jami ka tenene ku ngi kunda. Nga kexile ngó mu a mona mu ithangana ia kunhoha. Mu kuinhi dia mivu ia kaiela nga kulu sé mam’etu né o jikuku jami.

NGA KULU SÈ MAKU

Nga dilongo kubhanga ikalakalu iavulu ni inama iami. U tena kuxinganeka kukuata ngalafu ni milembu ia inama? Eme ngi hete mu kubhanga kiki. Nga dilongo ué kusukula o mazu ni kusamuna o ndemba ni milembu ia inama. Nga kexile mu bhanga ijimbuete ni milembu iami mu ku zuela ni athu. Ima ioso nga kexile mu i bhanga ni inama.

Kioso ki nga kexile mu kula, nga zolele kutanga madivulu a jingijiie. Saí ithangana nga kexile mu xinganeka kukala ni maku a tena kubhanga ima ioso. Mu 14 kia mivu nga mateka kubuakula. Kiki kia ngi bhangesele kudivua kiambote, kala ki divua athu a disanze. Nga kexile mu zuela kiki: ‘Ngi tena ué kubhanga kiki. O athu ene mu buakula, adiakime, amoxi ala ni maku a mukuá kana.’

Nga kexile mu bhanga ikalakalu iavulu, phala ki ngi divue kiaiibha. Nga bhangele mbandu ia kisangela kia minzangala, kia kexile ni kikuatekesu kia jinguluvu ja Alemanha. Nga sidivila kala seketa, kididi kia dikota bhu kaxi k’akuetu. Nga bhangele ué mbandu ku kibuka kia kuimba, nga kexile ué mu ta jisabhu ni misoso. Nga bhangele ué mbandu ia jijoko ja inema. Nga dilongo ufunu, eme nga mateka kukalakala. Kioso ki nga kexile mu kula, nga kexile mu kalakala ni lukuaku lua pustiçu, mukonda nga mesenene kukala ngi diiala dia tenena.

NGA XIKINA O KIDI KIA BIBIDIA

Saí kizuua kioso ki nga kexile mu kingila o komboio, phala kuia mu kalakala, saí diiala dieza mu zuela n’eme. Ua ngi bhuidisa sé ngi xikina kuila Nzambi u tena ku ngi bhana o maku. Nga diuanene mu kuivua o izuelu íii. Mu kidi, nga mesenene o maku’ami, maji mu diami sé-ku muthu ueji tena ku ki bhanga! Mukonda eme ki ngi xikinene kuila kuene Nzambi. Tundé mu kithangana kienhokio, ki ngi mesenene dingi kuzuela ni diiala diodio.

Mu kubhita thembu, koleka iami ku salu ua ngi bhingi phala kuia mu kunda o muiji uê. Mu kithangana kia kudia, tata jê a mateka kuzuela maka alungu ni Nzambi—Jihova Nzambi. Kiene o kithangana kia dianga ki ngevu kuila Nzambi uala ni dijina. (Jisálamu 83:18) Maji moxi diami nga ditunu, ngambe: ‘Ki kuene Nzambi, né muene se amba kuila uala ni dijina. Nga-nda kua londekesa kuila, ene k’ejiia kima.’ Nga dielele ku ibanzelu iami, maji né kiki nga xikina kudilonga o Bibidia. Maji ki ngi tenene kulondekesa kuila ki kuene Nzambi.

Mu kudilonga o ikanenu ia Bibidia, bhofele-bhofele nga mateka kulungulula o ibanzelu iami ia lungu ni Nzambi. Ima iavulu ia tange Nzambi ia mu dikumbidila sumbala a i sonekene jimidi ja mivu kudima. Mu kudilonga o Bibidia, tua sokesa o izulukutu ku mundu ni ikanenu i tu sanga mu divulu dia Matesu 24, Luka kibatulu 21, ni 2 Timote kibatulu 3. Mu kifika, o jindolo ja mu kuivua o muthu, ji kuatekesa o dotolo kuijiia o uhaxi ua muthu, kiene kimoxi ué, o izulukutu i tu sanga mu ikanenu íii ia ngi kuatekesa kumona kuila tuala mu “izuua isukidila-ku,” kála kiamba o Bibidia.a Uôma ua ngi kuatele, mukonda nga kexile mu mona o ikanenu ioso kudikumbidila.

Nga kijiidile kuila o ima i nga kexile mu dilonga, ima ia kidi. Nga mateka kusamba kua Jihova Nzambi, nga xisa o makanha​—sumbala nga kexile mu buakula kiá dikuinhi dia mivu ndenge. Nga dilongo o Bibidia mu muvu umoxi. Mu kizuua kia 27 ia mbeji ia Kasamanu ka 1986, a ngi batizala mu kasuekele mu mbasia, mukonda mu izuua ióio, o Jimbangi ja Jihova ka kexile ni ufolo ku Alemanha, ku mbandu Kutundila-o-Dikumbi.

NGI KUATEKESA AKUETU

Mukonda dia kukamba o ufolo, tua kexile mu dibhongolola mu ibuka iofele mu jinzo, mukonda dia kiki ki ng’ejiidile phange javulu. Ki ngi ki fikile, o jingana ja ixi ja ngi tumu kuia ku Alemanha ku mbandu Kufuila-o-Dikumbi. Kuenhoko o Jimbangi ja Jihova akexile ni ufolo ua kubheza. Kiene o kithangana kia dianga ki ngai mu kiônge kia dikota ni kumona jiphange javulu, ja mala ni ja ahatu. Nuka nga-nda jimba o kithangana kieniokio.

Kioso kia buika o Mulundu ua Berlin, o Jimbangi ja Jihova a tambula o ufolo ua kubheza. Mu kiki, tua kexile kiá mu bheza Jihova Nzambi ni ufolo uoso. Nga mesenene kubandekesa o kikalakalu kiami kia kuboka. Maji nga kexi ni uôma ua kuzuela ni athu engi. Mukonda dia unema uami, ni kubhita mivu iavulu mu jinzo ja inema, ki ngi kexile mu dibhana valolo. Maji ku muvu ua 1992, nga fikisa kubhanga 60 a jiola ku mbeji. Nga ditundu kiambote, nga sangulukile kiavulu. Mukonda dia kiki, nga banze kubhanga kiki mbeji joso, nga suluka mu mivu itatu.

Ngi di lembalala o izuelu ia Bibidia: ‘Ki bhu kala muthu ua bhuila, eme uami ngi bhuila.’ (2 Kolindo 11:29) Ngi kinema kidi, maji ngi tena hanji kubanza ni kuzuela. Mu kiki, nga bhange ioso phala kukuatekesa akuetu. Mukonda dia kukamba o maku, ngi tena kuivua o ndolo ivua ió ala uá ni unema. Ngejiia kiebhi ki divua o muthu ua mesena kubhanga kima kiejiia muéne kuila ka tena ku ki bhanga. Ngi sota kusuinisa ió a mu divua kiki. Mu kubhanga kiki, eme ngi sanguluka kiavulu.

JIHOVA U NGI KUATEKESA IZUUA IOSO

Maji ngi mi tangela kuila saí ithangana ngi toloka o muxima. Ngi mesena kukala ngi diiala dia tenena. Ngi tena kubhanga ikalakalu iavulu kubhata, maji ngi laleka kiavulu, ngi bhanga ué nguzu iavulu phala ku i bhanga. Izuua ioso ngi lembalala o kitumu kiki: “Ima ioso nga soko na-iu mua Kristu ió mukua ku ngi bhana o kutena.” (Filipe 4:13) Izuua ioso Jihova u ngi bhana o nguzu phala kubhanga o ikalakalu ia “kizuua ni kizuua.” Ng’ejiia kuila Jihova ka bhuila mu ku ngi kuatekesa. Mukonda dia kiki, nuka nga-nda bhuila mu ku mu sidivila.

Mu undenge uami ki ngi kexile ni muiji ua tenena, maji lelu Jihova ua ngi besoala ni muiji. Ngala ni muhatu uambote, Elke, muhatu ua henda. Jimidi ni jimidi ja Jimbangi ja Jihova ku mundu uoso a kituka jiphange jami​—muiji ua dikota.

Ngi sanguluka ué kiavulu mu kuívua o kikanenu kia Nzambi kia Palaízu, kuenhoko ‘ima ioso ia-nda kala ia ubhe,’ ni maku’ami. (Dijingunuinu 21:5) Ngi tendela kiambote o kikanenu kiki kioso ki ngi xinganeka o ima ia bhangele Jezú kioso kia kexile mu ixi. Saí kizuua muéne ua sakele kinema ni diiala a mu batuile o ditui. (Matesu 12:13; Luka 22:50, 51) O kikanenu kia Jihova ni madiuanu a bhangele Jezú, a ngi suinisa kuila ku hádia nga-nda tena kukala ngi diiala dia tenena.

Maji o dibesá dia dikote-lele o kuijiia Jihova Nzambi. Muéne ua dibhange tat’etu, dikamba, mukuatekexi ni nguzu iami. Ngi divua kala kia divuile Sobha Davidi, uambe: “Jihova muene nguzu iami . . . eme nga bhuluka; kia bhangesa o muxima uami kukala ni ngalasa iavulu.” (Jisálamu 28:7) O kidi kiki nga mesena ku ki bhaka ku muxima izuua ioso katé ku disukilu. Nga xikina o kidi né muene ni kukamba maku.