Atangi Amadivulu Metu Ebhula

Kyebhi o kixinganeku kudima dya kitumu kitusanga mu divulu dya Ijila 19:16, kitufidisa “kusota kujimisa o mwenyu” wamukwetu, ni disá dyahi ditudilonga mu kitumu kiki?

Jihova watangela akwa Izalayele phala kukala athu azele. Phala ku akwatekesa kukaIa mundu wazele, mwene wa atangela: “Kana kukala ukitoka kya jimbwémbwe mu’axaxi ka akwenu; kana kusota kujimisa o mwenyu wa mukwenu, Eme-mwene Jihova.”—Iji. 19:2, 16.

O izwelu “kusota kujimisa” ijimbulula kyambote o isoneku mu dimi dya Hebalayiku. Majiphe, ilombolola ihi? Sayi divulu dya Jijudé, dyajimbulula kiki o divulu dya Ijila: “O mbandu yiyi ya velusu . . . ibhonza ku ijimbulula mukonda kitwejiya kyambote se o izwelu mba sabhu yiyi ilombolola ihi mu dimi dya Hebalayiku, [bhabha kilombolola], ‘kana kwimanena kuthandu, kana kwimanena bhumbandu mba kwazukama.’”

Sayi akwa kutokwesa amba kwila, o izwelu yiyi yalungu ni izwelu mu velusu ya 15, yamba: “Kana kufundisa ni mangonya; o ki mu fundisa kana kuzamena ngadyama, mba kusuwa muthu wonéne; mukwenu mu batwile mulonga wê kala kya fwama mu kidi.” (Iji. 19:15) Se kyene, o kitumu kitusanga mu velusu 16, kitena kulombolola kwila, mu kufundisa, o mundu wa Nzambi kiwatokalele kubhanga phulu kwa mukwa ukalakalane kumoxi, mu maka awenji mba mu maka amwiji, ka tokalele kulungulula o kidi phala o mbote yâ. Mukidi, etu kitwatokala kubhanga o ima yiyi. Maji sayi dingi kima kitukwatekesa kutendela o izwelu mu velusu 16.

Banza ngó o izwelu ya dyanga ya velusu yiyi. Nzambi wambe kwila, o mundu wê kiwatokalele kumwanga jimbwembwe mba umbangi wamakutu. Lembalala kwila, o kutatela o umbangi wamakutu ki kwene kumoxi ni kuta jimbwembwe, maji o jimbwembwe jitena we kubhekela maka. (Jisa. 10:19; Ndo. 10:12-14; 1 Tim. 5:11-15; Tiya. 3:6) Muveji javulu, o muthu utatela o umbangi wamakutu, ukibhanga ni phulu mukonda wamesena kuxidisa o dijina dya mukwa. O mukwa kutatela, uzwela ima yamakutu phala kubhanga phulu kwa mukwa, ne mwene se kiki kitena kubhekela kalunga kwa yo amumutatela. Lembalala o umbangi wamakutu wabhana o mayala ayadi. O izwelu yâ yabhangesa kwila, Nabote amububa ni matadi sé kikuma. (1 Jis. 21:8-13) Kyene mwene, o umbangi wamakutu utena kujimisa o mwenyu wamuthu, kala kyalondekesa o mbandu ya kayadi ya divulu dya Ijila 19:16.

Kumbandu yengi, o muthu utena kutatela mukwa ni phulu, mukonda wamuzembe. O mukanda wa 1 Nzwá 3:15, wambe: “Muthu woso uzemba phang’yê, kijibhangânga. Enu mwa k’ijiya-phe kuma, kana kijibhangânga wala ni mwenyu ki wàbhwa.” Kyoso Nzambi kyambe “kana kusota kujimisa o mwenyu wa mukwenu,” mwene wabandekesaku dingi, wixi: “Mukwenu ku mu bhakele unguma ku muxima.”—Iji. 19:17.

Kyenyikiphe, o izwelu itusanga mu divulu dya Ijila 19:16 ibhana kitendelesu kya nguzu ku Jikidistá joso. Twabhingi kudituna o ixinganeku yayibha, kitwatokala kutatela umbangi wamakutu kwa akwetu. Mu izwelu yofele, se ‘tusota kujimisa o mwenyu’ wamukwetu, kifwa, se tutatela umbangi wamakutu kwa mukwetu mukonda kitwamuwabhela mba mukonda dya lwimbi, kiki kyandalondekesa kwila, etu twamuzembe. O Jikidistá katokala kuzemba muthu ni mukwâ.—Mat. 12:36, 37.