“Eye Wanda Kala N’eme mu Palayizu”

1. Ande dya kufwa, ihi yazwela Jezú ku kifumbe kyakexile kumbandu yê? (Luka 23:39-43)

JEZÚ ni ifumbe iyadi kumbandu yê exile mutala hadi yavulu kyoso kyakexile mufwa bhofele bhofele. (Luk. 23:32, 33) O ifumbe iyadi exile mu xongwena Jezú, kiki kilondekesa kwila ene kexile maxibulu mê. (Mat. 27:44; Mál. 15:32) Maji umoxi mudya walungulula o kibanzelu kyê. Mwene wambe: “Jezú, ngi lembalale kyoso kiwanda bokona mu Utuminu wé.” Jezú wamutambwijila: “Lelu, ngi kutangela o kidi kwila: Eye wanda kala n’eme mu Palayizu.” (Tanga Luka 23:39-43.) Seku kima kilondekesa kuma o kifumbe kyokyo waxikinine o njimbu ya kwila ‘o Utuminu wa dyulu wazukamene.’ Jezú we kazwelele kuma o kifumbe kyokyo wabokona mu Utuminu wa dyulu. (Mat. 4:17) Jezú wexile muzwela yalungu ni Palayizu mu ixi. Mukonda dyahi tutena kuzwela kiki?

2. Ihi ilondekesa kuma nange o kifumbe kyokyo wexile Judé?

² Nange o kifumbe kyadyela o kituxi kyê, wexile Judé. O kifumbe kyokyo wambe kwa mukwa: “Eye ki wala ni wôma wa Nzambi? O kaxitiku ké ki kasoko ni ka mwene?” (Luk. 23:40) O Jijudé akexile mubheza Nzambi imoxi ngó, maji o athu a jixi jengi akexile mubheza jinzambi javulu. (Mak. 20:2, 3; 1 Ko. 8:5, 6) Se o diyala dyódyo kexile Judé, nange weji kwibhula: “Eye kiwala ni woma wa jinzambi?” Jihova kamutumikisa Jezú phala o athu akwa jixi jengi, maji phala o “jimbudi ja jimbidila ja dibhata dya Izalayele.” (Mat. 15:24) Nzambi walondekesa ku akwa Izalayele kuma mwene utena kufukununa o madifundu. Nange o kifumbe kyadyela o kituxi kyê wejidile o maka enya, ni kwila Jihova weji fukununa Jezú phala kutumina mu Utuminu wa Nzambi. Nange o kifumbe kyokyo wexile ni kidyelelu kwila Nzambi weji mufukununa. Mukonda dya kiki, twamba kuma o kifumbe kyokyo wexile Judé.

3. Kyoso Jezú kyazwela yalungu ni Palayizu, nange ihi yexile muxinganeka o kifumbe? Jimbulula. (Dimatekenu 2:15)

³ Kuma o kifumbe kyokyo wexile Judé, nange mwene wejidile o musoso walungu ni Adá ni Eva, ni kwila Jihova wa atele mu Palayizu. O kifumbe kyokyo wa xikinine kwila o Palayizu yazwela Jezú yejikala kididi kyafwama mu ixi.—Tanga Dimatekenu 2:15.

4. O ima yazwela Jezú ku kifumbe, itubhangesa kuxinganeka mu ihi?

⁴ O ima yazwela Jezú ku kifumbe, itubhangesa kuxinganeka se kyebhi kyanda kala o mwenyu mu Palayizu. Tutena kudixinganeka mu Palayizu, mukubanza o kutululuka kwexile mu Utuminu wa Sobha Solomá. O Bibidya yamba kuma Jezú mwene wabetakota Solomá ndenge. (Mat. 12:42) O “jimbudi ja mukwá” abhingi we kwijiya o ima yatokala o kubhanga phala kutambula o mwenyu wakalelaku mu Palayizu.—Nzw. 10:16.

KYEBHI KYANDAKALA O MWENYU MU PALAYIZU?

5. Mu kixinganeku kyé, kyebhi kyandakala o mwenyu mu Palayizu?

⁵ Mu kixinganeku kyé, kyebhi kyandakala o mwenyu mu Palayizu? Nange eye uxinganeka kididi kyafwama kala o njaludim ya Edene. (Dim. 2:7-9) Nange ulembalala o izwelu ya polofeta Mikeya yamba kwila o jiselevende ja Nzambi, kala muthu mudyâ wandaxikama “bhoxi dya muvide wê, . . . bhoxi dya mufiku wê.” (Mik. 4:3, 4) Nange ulembalala jivelusu mu Bibidya jamba kwila kwandakala kudya kwavulu. (Jisá. 72:16; Iza. 65:21, 22) Udixinganeka we, eye waxikama ku meza mu njaludim, ku meza kwala nzungule dya makudya atowala kyavulu. Ubanza ku dizumba dyambote dya ithulu. Eye uxinganeka we ku jindandu ni makamba mé, amoxi a afukununa, mwamukwolela ni kutonoka nawu kumoxi. Yiyi ki nzoji ngó, kana. Tutena kudyelela ni kidi kyoso kwila o ima yoso yiyi yanda dikumbidila mwene mu ixi. Maji, mu Palayizu twandabhanga ikalakalu yanda tusangulukisa.

6. Ikalakalu yebhi itwandabhanga mu Palayizu? (Tala o foto.)

⁶ Jihova watubhange ni uhete wa kuwabhela o ikalakalu yetu. (Ndo. 2:24) Mu Utuminu wa Kidistu wa Midi ya Mivu, twandakala ni ikalakalu yavulu. O athu andabhuluka ku hadi yadikota ni mazunda a athu anda kwafukununa, andabhindamena izwatu, kudya ni jinzo. Phala kwabhana o ima yiyi, twandabhanga ikalakalu yavulu yanda tusangulukisa! Kala Adá ni Eva atambula o kikalakalu kya kusanzumuna o njaludim, etu we twandakala ni kikalakalu kya kukitula o ixi kukala Palayizu. Xinganeka o kusanguluka ku twandakala naku mu kulonga o mazunda ni mazunda a athu andakwafukununa ejiya ima yofele yalungu ni Jihova ni vondadi yê, ni kukwatekesa o athu afiyele afu ande dya Jezú kwiza mu ixi.

7. Ihi itutena kudyelela ni mukonda dyahi?

⁷ Tutena kudyelela kuma mu Palayizu mwandakala kutululuka, yoso itwabhindamena twandakala nayu, o ima yoso anda isokejeka kyambote. Mukonda dyahi twala ni kidyelelu kiki? Mukonda Jihova watubhana kyá phangu kyebhi kyandakala o mwenyu mu ixi, mu Utuminu wa Mon’ê. Tutena kumona o kidi kiki ku musoso wa Utuminu wa Sobha Solomá.

O UTUMINU WA SOLOMÁ UTULONDEKESA KYEBHI KYANDAKALA O MWENYU MU PALAYIZU

8. Kyebhi o izwelu ya Davidi mu Jisálamu 37:10, 11, 29 yadikumbidila kyoso Solomá kya kituka Sobha? (Tanga o mbandu “Atangi Amadivulu Metu Ebhula” mu Mulangidi yu.)

⁸ Sobha Davidi wasoneka kyebhi kyejikala o mwenyu, kyoso sobha wala ni unjimu ni ufiyele kwa Jihova kyeji tumina. (Tanga Jisálamu 37:10, 11, 29.) Kyoso ki tuzwela ni athu yalungu ni Palayizu yanda kwiza ku hádya, twene mutanga nawu o divulu dya Jisálamu 37:11. Twalungwetu mu kubhanga kiki mukonda Jezú watumbula o izwelu yiyi mu diskulusu dyabhange ku Mulundu, mu kulondekesa kwila o izwelu ya Davidi yandadikumbidila ku hádya. (Mat. 5:5) Maji o izwelu ya Davidi yalondekesa we kyebhi kyejikala o mwenyu kyoso Sobha Solomá kyeji tumina. Kyoso Solomá kyexile sobha, o akwa Izalayele exile ni kutululuka kwavulu ni kisangusangu. O Bibidya yamba kuma ene exile mu ‘ixi yazunzumukine lete ni wiki.’ Nzambi wambe: “Se mukwata kwendela mu jingonge jami, . . . , Ngi mi bhana we o ku di bhola ku mátwi, anga mu zeka kilu kyambote, u mi sasumwisa ka moneka.” (Iji. 20:24; 26:3, 6) O ima oso yiyi yadikumbidila kyoso Solomá kya kituka Sobha. (1 Mal. 22:9; 29:26-28) Jihova wambe kwila o athu ayibha exile mubheza jinzambi jengi, keji kalaku dingi. (Jisá. 37:10) Mu kiki o izwelu yala mu divulu dya Jisálamu 37:10, 11, 29 yadikumbidila mu ukulu, yanda dikumbidila we ku hádya.

9. Ihi yambe o mona mvwale mukwa Sabá yalungu ni Utuminu wa Solomá?

⁹ Kyoso Solomá kyexile Sobha, o na mvwale mukwa Sabá wevu o njimbu yalungu ni kutululuka ni kusanguluka kwexilenaku o akwa Izalayele. Mwene wende njila yalebha tunde kubhata dyê kate ku Jeluzaleme phala kumona se o njimbu yexile mu kwivwa yakidi mwene. (1 Jis. 10:1) Kyoso kya mono o ima ni mesu mê, o Utuminu wa Solomá mwene wambe: “Nga mono-phe kuma ka ngi tangela kaxaxi, . . . Azediwa o athu é, [azediwa] o akwa mbèle yé, ala bhu pholo yé izuwa yoso, mu kwivwa jinga o kwijiya kwé!” (1 Jis. 10:6-8) Maji o ima mu Utuminu wa Solomá yexile ngó kifika kya ima yandabhanga Jihova mu Utuminu wa Mon’ê Jezú.

10. Jezú watundu Solomá mu ima yebhi?

¹⁰ Jezú watundu Solomá mu ima yoso. Solomá wexile mukwa ituxi, mwene walweza kyavulu mu kufundisa, mukonda dya kiki o mundu wa Nzambi watale hadi yavulu. Maji Jezú Sobha yayuka, kala ni kituxi, mwene kene mulweza. (Luk. 1:32; Jih. 4:14, 15) Né mwene ni jitendasá javulu ja Satanaji, Jezú wakolokota fiyele kwa Nzambi. Kidistu walondekesa kya kwila, nuka wandata kituxi mba kubhanga kima kitalesa hadi ku jiselevende ja Jihova. Seku sobha yasoko ni mwene.

11. Ananyi anda tumina kumoxi ni Jezú?

¹¹ Jezú wanda tumina kumoxi ni 144.000 a Jikidistá ja undu. Ene anda kalakala kumoxi ni Jezú phala kulanga o ibhindamu ya athu ni kukumbidila o vondadi ya Jihova phala o ixi. (Dij. 14:1-3) O Jikidistá ja undu adibhele ni ibhidi yavulu kyoso kyexile mu ixi, kyenyiki andatendela o ima yene mudibhana nayu o athu mu ixi. Ikalakalu yebhi yandabhanga o athu anda tumina kumoxi ni Jezú?

IKALAKALU YEBHI YANDABHANGA O JIKIDISTÁ JA UNDU?

12. Kikalakalu kyebhi kyabhana Jihova ku 144.000 a Jikidistá ja undu?

¹² Jezú ni yó andatumina nê kumoxi ala ni ikalakalu yavulu, o yexile nayu Solomá, ndenge. Sobha Solomá watokalele kulanga o ibhindamu ya mazunda a athu mu ixi imoxi ngó. Maji, o yó andatumina mu Utuminu wa Nzambi andakwatekesa mazunda ni mazunda a athu ku mundu woso. Jihova wabhana ujitu wadikota ku 144.000 a Jikidistá ja undu!

13. Kikalakalu kyahi kya katunda kyandabhanga o athu andatumina kumoxi ni Jezú?

¹³ Kala Jezú, o 144.000 a Jikidistá ja undu andakalakala kala jisobha ni akunji. (Dij. 5:10) Mu Kijila kya Mozé, o akunji exile ni kikalakalu kya kukwatekesa o athu kukala ni sawidi yambote ni kukolokota mu ufiyele wâ kwa Jihova. Kuma o Kijila kyexile “kizuzumbya ngó kya ima yambote yanda kwiza ku hádya,” tutena kuzwela ni kidi kyoso kwila, o yó andatumina ni Jezú andakwatekesa o athu kukala ni sawidi yayuka ni kukolokota fiyele kwa Jihova. (Jih. 10:1) Kitwejiya hanji se o akunji ni jisobha jiji kyebhi kyandazwela ni athu mu ixi. Kabasa kima kyandabhanga Jihova, tutena kudyelela kwila, mu Palayizu, o athu mu ixi andatambula o itendelesu yabhindamena.—Dij. 21:3, 4.

O “JIMBUDI JA MUKWÁ” JATOKALA KUBHANGA IHI PHALA KUTUNGA MU PALAYIZU?

14. Ihi yamubhanga o athu atokala mu “kakilunga kófele” ni yó atokala ku “jimbudi ja mukwá”?

¹⁴ Jezú wexana o athu andatumina nê kumoxi kala “kakilunga kófele.” (Luk. 12:32) Mwene wazwela we yalungu ni kibuka kyengi, wa exana kala “jimbudi ja mukwá.” O ibuka iyadi yiyi ibhanga ngó kilunga kimoxi. (Nzw. 10:16) O athu atokala mu ibuka iyadi yiyi, amukalakala kyá kumoxi. Ene andasuluka mu kukalakala kumoxi kyoso o ixi ki yandakituka Palayizu. Maji o athu atokala mu “kakilunga kófele” andakala ku dyulu, o athu atokala ku “jimbudi ja mukwá” andakala mu ixi ni kidyelelu kya kukala ni mwenyu wakalelaku. Maji kwene ima yatokala kubhanga kindala o “jimbudi ja mukwá” phala kutunga mu Palayizu.

15. (a) Kyebhi o “jimbudi ja mukwá” kyakalakala kumoxi ni jiphange ja Kidistu? (b) Kyebhi kitutena kukayela o phangu ya phange wamusumba milongo? (Tala o foto.)

¹⁵ O kifumbe wadyela o kituxi kyê wafu sé kulondekesa bhukaxi ka ibhangelu yê kwila, wasakidila Kidistu mu yoso yabhange phala mwene. Ku mbandu yengi, o “jimbudi ja mukwá” ala ni kithangana kya kulondekesa bhukaxi ka ibhangelu yâ kwila azolo Jezú. Mu kifika, tulondekesa kwila twazolo Jezú mu ukexilu ututalatala o jiphange jê, o Jikidistá ja undu. Jezú wambe kuma wandafundisa o jimbudi mu ukexilu wakutalatala o jiphange jê. (Mat. 25:31-40) Etu tutena kukwatekesa o jiphange ja Kidistu mu kuboka ni nguzu yoso ni mu kubhanga maxibulu. (Mat. 28:18-20) Tutena kubhanga kiki, mu kukalakala kyambote ni jifalamenda ja kulonga jitwene mutambula, kala o divulu Sanguluka Katé Kuhádya ni Hádya! Se ki wamutena luwa kulonga o Bibidya ku muthu, bhana kixanu ku athu avulu phala kudilonga o Bibidya n’eye.

16. Mu kudisokejeka phala kutunga mu Palayizu, ihi itutena kubhanga kindala?

¹⁶ Kitubhingi kukingila kukala mu Palayizu phala kulondekesa o idifwa ya athu amesena Jihova phala kutunga mwenyomo. Tundé kindala, tutena kyá kukala tu athu a kidi mu ima ituzwela, mu ima itubhanga ni kukala ni wendelu wambote. Twatokala kukala fiyele kwa Jihova, kwa kaza dyetu ni ku jiphange jetu. Se tubelesela Jihova ku mundu yú wayibha, ki kyanda tubhonza ku mubelesela ku hádya, mu Palayizu. Tutena kukala ni mauhete ni idifwa ilondekesa kwila twamudisokejeka phala kutunga mu Palayizu. Tanga o milongi “Eye Wala Polondo Phala ‘Kulundula o Ixi?” mu Mulangidi yú.

17. O kwila twatokala kwehela o ituxi itwatele mu ukulu kutukatula o kisangusangu? Jimbulula.

¹⁷ Twatokala we kubhanga nguzu phala kweha kuditatela mukonda dya ituxi itwatele mu ukulu. Maji, kitutokala kuta “jinga kituxi mu lwelu” mukonda dya sata ya kukula. (Jih. 10:26-31) Maji tutena kudyelela kwila Nzambi wanda tuloloka se tudyela o kituxi kitwate, tubhinga we o kikwatekesu kya Jihova ni kya tufunga, ni kulungulula o ukexilu wetu. (Iza. 55:7; Ika. 3:19) Kana kujimba o izwelu ya Jezú kyoso kyambe ku Jifalizewu: “Ki ngeza mu kwixana o athu a yuka, maji o akwa ituxi.” (Mat. 9:13) Xikina kwila, Jihova uloloka o ituxi yetu bhukaxi ka sata ya kukula ya Jezú.

EYE UTENA KUKALA NI MWENYU WAKALELAKU MU PALAYIZU

18. Ihi dingi iwandawabhela kuzwela ni kifumbe wafu ku mbandu ya Jezú?

¹⁸ Dixinganeke mu Palayizu, eye wamuzwela ni kifumbe wexile ku mbandu ya Jezú. Sé phata kiyadi kyenu mwandalondekesa o kisakidilu kyenu mu sata ya Jezú. Eye wandamubhinga phala ku kutangela se ihi yabhiti ni Jezú kyoso kyexile mutaka ande dya kufwa, ni kyebhi kyadivu kyoso Jezú kyamutambwijila. Nange mwene wanda kwibhula se kyebhi kyexile o mwenyu mu izuwa isukidilaku ku mundu wa Satanaji. Kyandakala ujitu wa dikota kudilonga o Mak’â Nzambi ni athu adifu ni diyala dyodyo!—Efe. 4:22-24.

19. Mukonda dyahi o mwenyu mu Palayizu kiwandatukuma? (Tala ofoto yakapa.)

¹⁹ O mwenyu mu Palayizu nuka wandatukuma! Twandakala jinga ni athu avulu phala kwa ejiya ni ikalakalu yambote phala kubhanga. Kyabeta dingi kota, kala kizuwa kibhita twandakwijiya kyambote o Tata yetu ya dyulu, ni kukatula mbote mu yoso yandatubhana mwene. Kwandakala jinga ima yavulu phala kudilonga yalungu ni mwene, ni ibhangelu yê. Ku mwenyu wakalelaku, twandazola dingi Jihova. Tusakidila kyavulu Jihova ni Jezú mu kutubhana o kidyelelu kya kukala ni mwenyu wakalelaku mu Palayizu!