Филимонрʹа
1 Әз Паԝлос, йе кӧ бона баԝәрийа һьндава Мәсиһ Исада гьрти мә, у бьре мә Тимотʹейо, ве нәʹме һәвалкʹаре мәйи дәлал Филимонрʹа, 2 хушка мә Афийайерʹа, у Архипойе һәваләскәре мәрʹа, у щьватерʹа кӧ мала тәда тʹоп дьбә, дьньвисьн:
3 Бьра кʹәрәма мәзьн у әʹдьлайа Баве мә Хԝәде у Хӧдан Мәсиһ сәр ԝә бә!
4 Гава әз тә дӧайед хԝәда тиньм бира хԝә, әз һәр гав шькьрийе дьдьмә Хԝәдайе хԝә. 5 Чьмки мьн бьһистийә кӧ баԝәрийа тә һьндава Хӧдан Иса чьԛас ԛәԝи йә у тӧ чьԛас ԝи у һʹәму пироза һʹәз дьки. 6 Әз дӧа дькьм ԝәки баԝәрийа тә, йа кӧ бал мә жи һәйә, ԝе али тә бькә кӧ тӧ фәʹм ки, ԝәки һәр тьште ԛәнщ чь кӧ бал мә һәйә, мә бь сайа Мәсиһ стандийә. 7 Бьре мьн, гава мьн дәрһәԛа һʹәзкьрьна тә бьһист, әз гәләк ша бум у дьле мьн рʹьһʹәт бу, чьмки дьле пироза бь сайа тә һатийә ԛәԝикьрьне.
8 Ләма әз чаԝа шандийе Мәсиһ дькарьм аза тʹәмийе бьдьмә тә, ԝәки ве йәке бьки, чь кӧ щайиз ә, 9 ле әз дьхԝазьм бона һʹәзкьрьна тә тьштәки һиви жь тә бькьм, чьмки әз, Паԝлос, ида кал бумә у бона баԝәрийа һьндава Мәсиһ Иса ньһа жи гьрти мә. 10 Һивикьрьна мьн, кӧрʹе мьн Онисимова гьредайи йә. Гава әз гьрти бум,* әз ԝирʹа бумә бав. 11 Бәре әԝ кери тә нәдьһат, ле ньһа әԝ һьм кери тә те, һьм жи кери мьн. 12 Әз ԝи, демәк кʹижани әз гәләк һʹәз дькьм,* пашда дьшиньм бал тә.
13 Мьн дьхԝәст кӧ әԝ щәм мьн бьминә, ԝәки дәԝса тә мьнрʹа бәрдәстийе бькә һʹәта кӧ әз бона мьзгинийе гьрти бьм. 14 Ле әз нахԝазьм тʹӧ тьшти бе изьна тә бькьм, ԝәки ԛәнщийа тә нә бь мәщбури бә, ле бь рʹәзәдьли. 15 Дьбәкә Онисимо бона ве йәке сәр ԝәхтәке жь тә чу, ԝәки вәгәрʹә у һәртʹьм щәм тә бә, 16 нә кӧ чаԝа хӧлам, ле жь хӧламәки зедәтьр, чаԝа бьре тәйи дәлал. Әз ԝи гәләки һʹәз дькьм, у те жи ԝи гәләки һʹәз бьки, һьм чаԝа хӧламе хԝә, һьм жи чаԝа бьраки дәлал хьзмәтийа Хӧданда. 17 Аԝа һәрге тӧ мьн чаԝа һәвале хԝә һʹәсаб дьки, ԝи бь дьлгәрми ԛәбул кә, чаԝа тәйе әз ԛәбул кьрама. 18 Һәрге әԝи тьштәкида нәһәԛи ль тә кьрьбә, йан жи әԝ тьштәкида дәйндаре тә йә, сәр мьн һʹәсаб кә. 19 Әз Паԝлос, ве йәке бь дәсте хԝә дьньвисьм: Онисимо чьԛас жи дәйндаре тә йә, әзе ль тә вәгәрʹиньм. Нахԝазьм бежьм, ле тӧ хԝәха жи дәйндаре мьн и. 20 Бәле, бьре мьн жь кʹәрәма хԝә ве йәкеда али мьн бькә, чьмки әм тʹәви Хӧдан йәктийеда ньн. Бона хатьре Мәсиһ дьле мьн рʹьһʹәт кә.
21 Әз тәрʹа дьньвисьм, чьмки баԝәр ьм, ԝәки тӧйе һивикьрьна мьн бини сери. У әз заньм кӧ тӧйе жь готьна мьн зедәтьр жи бьки. 22 Хенщи ве йәке, мьнрʹа щики һазьр кә кӧ әз бьминьм, чьмки гӧмана мьн һәйә, ԝәки әзе бь сайа дӧайед ԝә вәгәрʹьм щәм ԝә.*
23 Епафрас, йе кӧ мина мьн бона баԝәрийа хԝәйә һьндава Мәсиһ Иса гьрти йә, тә сьлав дькә. 24 Ӧса жи һәвалкʹаред мьн Маркос, Әристархо, Димас у Луԛа жи тә сьлав дькьн.
25 Бьра кʹәрәма мәзьн йа Хӧдан Иса Мәсиһ сәр ԝә бә бона ви рʹӧһʹи, кʹижани һун дьдьнә кʹьфше!