3 Йуһʹәнна

1 Әз каләмер,* Гайосе дәлалрʹа дьньвисьм, кʹижани бь рʹасти һʹәз дькьм.

2 Бьре дәлал, әз дӧа дькьм ԝәки тӧ тʹьме һʹәму алийава баш би у сьһʹәт-ԛәԝат би, чаԝа ньһа. 3 Әз гәләк ша бум, гава бьра һатьн у гьли кьрьн, кӧ тӧ хԝә ль рʹастийе дьгьри у бәрдәԝам дьки рʹийа рʹастийеда дьчи. 4 Шабуна* мьнә жь ве мәстьр тʹӧнә, гава дьбьһем кӧ зарʹед мьн рʹийа рʹастийеда дьчьн.

5 Бьре дәлал, әв йәк чь кӧ тӧ бона бьра дьки, һәла һе кӧ ԝана нас наки жи, амьнийа тә әʹйан дькә. 6 Ԝана ль бәр щьвате бәʹса һʹәзкьрьна тә кьрийә. Жь кʹәрәма хԝә ԝана ӧса вәрʹекә, чаԝа кӧ ль Хԝәде хԝәш те. 7 Чьмки әԝана бона хатьре наве Хԝәде рʹе кʹәтьн, у жь мьләтед дьн* тьштәк һьлнәдан. 8 Ләма әм борщдар ьн меванһʹәзийе мәрьвед ӧсарʹа бьдьнә кʹьфше, сәва кӧ әм рʹастийеда бьбьнә һәвалхьзмәткʹар.

9 Мьн щьватерʹа һьнә тьшт ньвисин, ле Дийотрәфис, йе кӧ һʹәз дькә сәр һʹәмуйарʹа бә, ԛәдьре гьлийед мә нагьрә. 10 Ләма һәрге әз бем, әзе кьред ԝи бьдьмә рʹуйе ԝи, чьмки әԝ дәрһәԛа мә дәрәԝа бәла дькә. Әв йәк бәси ԝи нинә, сәрда жи әԝ бьра бь ԛәдьр ԛәбул накә, у әԝед кӧ дьхԝазьн ԝана ԛәбул кьн, әԝ ӧса дькә ԝәки рʹийа ԝан бьгьрә у ԝана жь щьвате дәрхә.

11 Бьре дәлал, чʹәʹв нәдә хьрабийе, ле чʹәʹв бьдә ԛәнщийе. Кәсе кӧ ԛәнщийе дькә, жь Хԝәде йә, ле кәсе кӧ хьрабийе дькә, Хԝәде нәдитийә. 12 Гьшк дәрһәԛа Димитрийо баш хәбәр дьдьн, у әв йәк избат дькә, кӧ әԝ ль гора рʹастийе дьжи. Бь рʹасти әм жи дәрһәԛа ԝи шәʹдәтийа ӧса дьдьн, у чаԝа тӧ зани, шәʹдәтийа мә рʹаст ә.

13 Гәләк тьшт һәнә, чь кӧ әз дьхԝазьм тәрʹа гьли кьм, ле нахԝазьм ве йәке пе ԛәләм у һʹӧбьре бьньвисьм. 14 Әз гӧман ьм кӧ зутьрәке әзе тә бьвиньм, у әме рʹу бь рʹу һәврʹа хәбәр дьн.

Бьра Хԝәде әʹдьлайе бьдә тә.

Һәвал-һогьр тә сьлав дькьн. Тӧ жи алийе мьнда һәвала нав бь нав сьлав кә.