Щьһуда

1 Әз Щьһуда, хӧламе Иса Мәсиһ, бьре Аԛуб, ԝә газикьрийарʹа дьньвисьм, йед кӧ алийе Баве мә Хԝәдеда һʹәзкьри нә у хԝәйкьри нә, ԝәки тʹәви Иса Мәсиһ бьн.

2 Бьра Хԝәде рʹәʹма хԝә, әʹдьлайи у һʹәзкьрьна хԝә ль ԝә һе зедә кә.

3 Дәлално, мьн гәләк дьхԝәст дәрһәԛа хьлазбуна мә ԝәрʹа бьньвисьм. Ле мьн фәʹм кьр кӧ чьԛас фәрз ә ве нәʹмеда дьл бьдьмә ԝә, ԝәки һун һәр тьшти бькьн, сәва баԝәрийа хԝә бьпʹарезьн. Әв баԝәри пирозарʹа щарәке бона һәртʹьм һатийә дайине. 4 Чьмки һьнә кәсед нәпʹак дьзикава кʹәтьнә нава ԝә, дәрһәԛа диԝана кʹижана Ньвисаред Пирозда пешда һатьбу готьне. Әԝана Хԝәде натьрсьн у кʹәрәма мәзьн йа Хԝәдайе мә дькьнә мәʹни, ԝәки рʹабун-рʹуньштьна рʹобәти* һәԛ дәрхьн. У әԝана хԝәйе* мәйи тʹәкрʹа у Хӧдан Иса Мәсиһрʹа, амьн нәманә.*

5 Һәмьки һун ван һʹәму тьшта заньн, ле әз дьхԝазьм биньм бира ԝә, кӧ рʹаст ә Йаһоԝа щьмәʹта хԝә жь Мьсьре хьлаз кьр, паше әԝи ԛьрʹа ԝан ани, йед кӧ баԝәрийа хԝә ԝи нәанин. 6 У мәләкед кӧ кʹьфшкьрьна хԝәйә жь Хԝәде хԝәй нәкьрьн, ле щийе хԝә ль әʹзмен һиштьн, Хԝәде әԝана тәʹристанийеда бь зьнщиред һʹәта-һʹәтайе бона диԝана рʹожа мәзьн хԝәй дькә. 7 Һәма ӧса, Содом у Гомора у бажаред дәр-доре ԝан жи зьнекʹарийа рʹобәти дькьрьн у пәй хԝәстьнед бәдәнейә нәтʹәбийәти дькʹәтьн. Хԝәде әԝана бь агьре һʹәта-һʹәтайе щәза кьрьн, у әԝана бона мә дәрс ьн.

8 Сәрда жи, әԝ мәрьв пәй хәйала дькʹәвьн,* бәдәна хԝә дьһʹәрʹьминьн, сәрԝертийе бәр тьштәки һʹәсаб накьн у кʹьфьрийа кәсед хԝәйирʹумәт дькьн. 9 Ле гава Михайиле сәроке мәләка, тʹәви Мире-щьна бона щьнйазе Муса кʹәтә дәʹԝе, әԝи изьн нәда хԝә кӧ бь кʹьфьрийа ԝи сущдар кә, ле гот: «Бьра Йаһоԝа диԝана тә бькә». 10 Ле әԝ мәрьв кʹьфьрийа ԝан һʹәму тьшта дькьн, кʹижана бь рʹасти фәʹм накьн. У чь жи әԝана фәʹм дькьн, ԛаси һʹәйԝанед кӧ нькарьн бьфькьрьн, фәʹм дькьн, у ӧса хԝә дьһʹәрʹьминьн.

11 Ԝәй ль ԝан, чьмки әԝана рʹийа Ԛайинда чун у мина Бьлам бона кʹара хԝә кʹәтьнә рʹийа нәрʹаст. Әԝана мина Ԛорах бь готьнед хԝә мьԛабьли кәсед хԝәйиһʹӧкӧм рʹадьбун, у ӧса бәла анинә сәр хԝә. 12 Әԝана тʹәви ԝә кʹеф у шайа дькьн, ле бь рʹасти мина зьнаред бьн аведа вәшарти нә. Әԝана мина шьванед бешәрм тʹәне дьхԝазьн зьке хԝә тʹер кьн, мина әʹԝред бе ав бәр ба дьчьн-тен, мина даред кӧ пайизе бәред хԝә надьн, бь тʹәмами һʹьшк бунә* у кʹокева рʹакьри нә. 13 У чаԝа пʹелед бәʹре кʹәфа хԝәйә ԛьреж сәр аве дьхьн, кьред ԝанә шәрми жи әшкәрә дьбьн. Хԝәде әԝана мина стәйркед бәрʹәдайи, ԝе сәр һʹәта-һʹәтайе бькә нава тәʹристанийа шәвәрʹәш.

14 Әре, Һәнох жи, йе кӧ жь Адәм ньсьле һʹәфта бу, дәрһәԛа ԝан пʹехәмбәрти кьрьбу: «Йаһоԝа тʹәви бь дәһа һʹәзара мәләкед хԝәйи пироз һат, 15 ԝәки диԝана һʹәмуйа бькә у гӧнәкʹаред кӧ жь ԝи натьрсьн, щәза кә бона һʹәму кьред ԝанә хьраб у бона һʹәму готьнед хьраб, кӧ һьндава ԝида хәбәр дан».

16 Әԝ мәрьв дәрһәԛа жийина хԝә дькьнә кӧтә-кӧт у газьна дькьн. Әԝана тʹәне пәй хԝәстьнед хԝә дькʹәвьн у бь дәве хԝә гәләк пʹайе хԝә дьдьн. У әԝана сәва кʹара хԝә бәр мәрьва хԝә ширьн дькьн.

17 Ле һун дәлално, гьлийед шандийед Хӧдане мә Иса Мәсиһ кӧ пешда готьнә, биньн бира хԝә. 18 Ԝана ԝәрʹа дьгот: «Рʹожед хьлазийеда,* мәрьвед ԛәрфкʹар ԝе дәрен, йед кӧ пәй хԝәстьнед хԝәйә хьраб кʹәвьн». 19 Әԝана йәктийе хьраб дькьн, мина һʹәйԝана һәрәкʹәт дькьн у бейи рʹӧһʹе Хԝәде нә. 20 Ле һун дәлално, сәр һʹиме баԝәрийа хԝәйә лапә пироз хԝә ԛәԝи кьн* у пе рʹӧһʹе пироз дӧа бькьн. 21 Ӧса һуне һʹәзкьрьна Хԝәдеда бьминьн у һивийа рʹәʹма Хӧдане мә Иса Мәсиһ бьн, ԝәки жийина һʹәта-һʹәтайе бьстиньн. 22 Рʹәʹм бьн һьндава ԝанда, йед кӧ дӧдьли нә. 23 Ԝана жь агьр дәрхьн у хьлаз кьн. У бәрдәԝам кьн рʹәʹма хԝә һьндава кәсед дьнда жи бьдьнә кʹьфше, ле ве йәке фәсал бькьн, ԝәки һәла һе кʹьнщ жи кӧ бь гӧнә ләԝьтʹийә, бәр чʹәʹве ԝә рʹәш бә.

24 Ньһа ԝирʹа, йе кӧ дькарә али ԝә бькә, ԝәки һун жь рʹе дәрнәкʹәвьн у беԛьсур у бь шабунәкә мәзьн бәр рʹумәта ԝи* бьсәкьньн, 25 демәк Хԝәдайе мәйи тʹәкрʹа, йе кӧ мә пе Хӧдане мә Иса Мәсиһ хьлаз дькә, бьра рʹумәт, мәзьнайи, ԛәԝат у һʹӧкӧмәти, бәре, ньһа у һʹәта-һʹәтайе жи бә дайине! Амин.