ЛЬ ГОРА МӘТТА

1 Кʹьтеба дәрһәԛа жийина* Иса Мәсиһ,* кӧрʹе Даԝьд, кӧрʹе* Бьраһим:

17 Демәк жь Бьраһим һʹәта Даԝьд 14 ньсьл бун. Жь Даԝьд һʹәта дилтийа ль Бабилоне 14 ньсьл бун. У жь дилтийа ль Бабилоне һʹәта Мәсиһ 14 ньсьл бун.

18 Буйина Иса Мәсиһ ӧса бу: Дийа ԝи Мәрйәм дәргистийа Усьв бу. Ле пешийа кӧ әԝана бьзәԝьщийана у бьгьһиштана һәв, әԝ бь сайа рʹӧһʹе пироз* һʹәмлә дәркʹәт. 19 Ле чьмки мере ԝе Усьв мәрьвәки ԛәнщ* бу у нәдьхԝәст ԝе бәр хәлԛе бькә рʹобәт, фькьри кӧ дьзикава ле бәрʹдә. 20 Чахе Усьв сәр ве йәке кʹур фькьри, мәләке Йаһоԝа* хәԝнеда ԝирʹа хӧйа бу у ӧса гот: «Усьве кӧрʹе Даԝьд! Нәтьрсә кӧ дәргистийа хԝә Мәрйәме бьстини у бьви мала хԝә. Чьмки әԝ бь сайа рʹӧһʹе пироз һʹәмлә йә. 21 Әԝе кӧрʹәки бинә, у тӧ гәрәке наве ԝи дайни Иса,* чьмки әԝе щьмәʹта хԝә жь гӧнед ԝан хьлаз кә». 22 Әв һәр тьшт ӧса ԛәԝьми, ԝәки готьна Йаһоԝа кӧ әԝи бь пʹехәмбәре хԝә готьбу, бе сери: 23 «Ва ԛиза бькʹьр ԝе һʹәмлә бә у кӧрʹәки бинә, у ԝе наве ԝи дайньн Имануйел», чь кӧ те һʹәсабе: «Хԝәде тʹәви мә йә».

24 Усьв жь хәԝе рʹабу, у чаԝа кӧ мәләке Йаһоԝа ԝирʹа готьбу, әԝи дәргистийа хԝә жьнти ани мала хԝә. 25 Ле Усьв тʹәви ԝе рʹанәза һʹәта ԝерʹа кӧрʹ бу. У әԝи наве зарʹе дани Иса.

2 Иса рʹожед Һеродәс Пʹадшада ль Бәйтләһʹма Щьһустане һатә буйине. Паше, стәйрнас жь Рʹоһьлате һатьн Оршәлиме 2 у пьрсин: «Пʹадше Щьһуйа кӧ һатийә буйине, кʹӧ йә? Гава әм ль Рʹоһьлате бун, мә стәйрка ԝи дит, у әм һатьн ԝәки сәре хԝә ль бәр ԝи дайньн». 3 Гава Һеродәс Пʹадша әв йәк бьһист, тʹәвиһәв бу у тʹәмамийа Оршәлиме жи перʹа. 4 Әԝи һʹәму сәрокед кʹаһина у ԛанунзан тʹәвайи тʹоп кьрьн у жь ԝан пьрси: «Мәсиһ кʹидәре гәрәке бьһата буйине?» 5 Ԝана ԝирʹа гот: «Ль Бәйтләһʹма Щьһудайе, чаԝа кӧ пʹехәмбәр ньвисийә: 6 ‹У тӧ, йа Бәйтләһʹма ль ԝәлате Щьһудайе, тӧ бәр чʹәʹве сәрԝеред Щьһудайе бажарәки беԛимәт нини, чьмки жь тә ԝе рʹебәрәк дәркʹәвә у ԝе шьвантийе щьмәʹта мьн Исраеле бькә›».

7 Паше Һеродәс дьзикава гази стәйрнаса кьр у жь ԝан пеһʹәсийа кӧ стәйрк кʹәнге хӧйа бу. 8 Әԝи әԝ шандьн Бәйтләһʹме у ԝанрʹа гот: «Һәрʹьн у ве зарʹе рʹьнд бьгәрʹьн. Гава ԝә әԝ дит, әʹлами мьн бькьн, ԝәки әз жи һәрʹьм у сәре хԝә ль бәр ԝи дайньм». 9 Гава ԝана гӧһ да пʹадше, рʹе кʹәтьн. Әԝ стәйрка кӧ ԝана ль Рʹоһьлате дитьбу, пешийа ԝан дьчу у сәр ԝи щийи сәкьни, кʹидәре кӧ зарʹок бу. 10 Гава ԝана дит кӧ стәйрк сәкьни, гәләк ша бун. 11 У чахе әԝана кʹәтьнә һьндӧрʹе мале, ԝана зарʹ ль щәм дийа ԝи Мәрйәме дит у кʹәтьн сәр чока, сәре хԝә ль бәр ԝи данин. Ԝана зерʹ, бьхур у рʹуне бинхԝәш дәрхьст у пʹешкʹеши ԝи кьрьн. 12 Ле чьмки ԝана хәԝнеда жь Хԝәде тʹәми станд кӧ вәнәгәрʹьн бал Һеродәс, әԝана рʹекә дьнрʹа вәгәрʹийанә ԝәлате хԝә.

13 Паши чуйина стәйрнаса, мәләке Йаһоԝа хәԝнеда Усьврʹа хӧйа бу у гот: «Рʹабә, ве зарʹе у дийа ԝи һьлдә у бьрʹәвә Мьсьре. Ԝедәре бьминә һʹәта кӧ әз тәрʹа нәбежьм вәгәрʹә, чьмки Һеродәс ве зарʹе дьгәрʹә у дьхԝазә ԝи бькӧжә». 14 Усьв жи рʹабу, ԝе шәве зарʹ у дийа ԝи һьлдан, чу Мьсьре, 15 у һʹәта мьрьна Һеродәс ԝедәре ма. Бь ԝи аԝайи, һатә сери хәбәра кӧ Йаһоԝа бь пʹехәмбәре хԝә готьбу: «Жь Мьсьре мьн гази кӧрʹе хԝә кьр».

16 Гава Һеродәс фәʹм кьр кӧ әԝ алийе стәйрнасада һатийә хапандьне, ԛайим һерс кʹәт. Әԝи фәрман да ԝәки ль Бәйтләһʹме у дәр-доре ԝе, һʹәму кӧрʹед дӧ сали у жь ԝан бьчʹуктьр бенә кӧштьне. Әв сал Һеродәс жь гьлийед стәйрнаса фәʹм кьр. 17 Һьнге әв готьна Йерәмйа пʹехәмбәр һатә сери: 18 «Рʹамайеда дәнге гьри у шина гьран һат бьһистьн. Әԝ Рʹаһел бу, кӧ шина зарʹед хԝә дькьр, у әԝе нәдьхԝәст бәр дьле ԝеда бен, чьмки ида зарʹед ԝе нәмабун».

19 Паши мьрьна Һеродәс, мәләке Йаһоԝа ль Мьсьре хәԝнеда Усьврʹа хӧйа бу 20 у гот: «Рʹабә, тʹәви зарʹе у дийа ԝи вәгәрʹә ԝәлате Исраеле, чьмки йед кӧ дьхԝәстьн зарʹе бькӧжьн, ида мьрьнә». 21 Әԝ жи рʹабу, тʹәви зарʹе у дийа ԝи вәгәрʹийа ԝәлате Исраеле. 22 Ле гава Усьв бьһист кӧ Архелайо дәԝса баве хԝә Һеродәс буйә сәрԝере Щьһустане, тьрсийа һәрʹә ԝедәре. Һьм жи, әԝи хәԝнеда алийе Хԝәдеда тʹәми стандьбу, ԝәки һәрʹә һәрема Щәлиле. 23 Гава әԝ гьһиштә ԝедәре, ль бажарәки бь наве Ньсрәт щиԝар бу, ԝәки әв готьна пʹехәмбәра бе сери: «Сәр ԝи, ԝе йе Ньсрәти бе готьне».

3 Ԝан рʹожада Йуһʹәннайе Ньхӧмдар* һатә бәрʹийа Щьһустане, кӧ хәбәра Хԝәде бәла кә. 2 Әԝи дьгот: «Тʹобә кьн, чьмки Пʹадшатийа әʹзмана незик буйә!» 3 Йуһʹәнна әԝ ә, дәрһәԛа кʹижани Ишайа пʹехәмбәр бәреда готьбу: «Бәрʹийеда кәсәк бь дәнге бьльнд дькә гази: ‹Рʹийа Йаһоԝа һазьр кьн! Рʹийед ԝи рʹаст кьн›». 4 Кʹьнщед Йуһʹәнна жь һьрийа дәве бун у ԛайиша сәр пьшта ԝи жь чʹәрм бу. Хԝарьна ԝи кӧли у һьнгьве чоле бу. 5 Хәлԛ жь Оршәлиме, жь тʹәмамийа Щьһустане у жь һʹәму алийед Чʹәме Урдӧне дьһатьнә бал ԝи. 6 Ԝана гӧнед хԝә дьданә рʹуйе хԝә, у әԝи Чʹәме Урдӧнеда әԝана дьньхӧмандьн.

7 Гава әԝи дит кӧ гәләк Ферьси у Садуԛи бона ньхӧмандьне һатьн бал ԝи, әԝи ԝанрʹа гот: «Һәй зӧрʹәта* мәʹред жәʹрдар, кʹи ԝәрʹа готийә ԝәки һун дькарьн жь хәзәба Хԝәде йа кӧ те, бьрʹәвьн? 8 Дә бь кьред хԝә нишан кьн, кӧ һун тʹобә дькьн.* 9 Дьле хԝәда нәфькьрьн у нәбежьн: ‹Бьраһим баве мә йә›. Әз ԝәрʹа дьбежьм, кӧ Хԝәде дькарә жь ван кәвьра жи Бьраһимрʹа зарʹа чекә. 10 Балтʹә ида ль бәр кʹока дара йә. Һәр дара кӧ бәред баш надә, ԝе бе бьрʹине у авитьне нава агьр. 11 Әз ԝә бь аве дьньхӧминьм, чьмки һун тʹобә дькьн. Ле йе кӧ паши мьн те, жь мьн ԛәԝаттьр ә, у әз нә жи һежа мә кӧ жь ньгед ԝи чарьха бехьм. Әԝе ԝә бь рʹӧһʹе пироз у бь агьр бьньхӧминә. 12 Һащәта* ԝи дәсте ԝида йә у әԝе бедәра* хԝә бь тʹәмами паԛьж кә. Әԝе гәньм ль әʹмбара тʹоп кә у кайе бьшәԝьтинә бь агьре кӧ натәмьрә».

13 Һьнге Иса жь Щәлиле һатә Урдӧне бал Йуһʹәнна, ԝәки әԝ ԝи бьньхӧминә. 14 Ле Йуһʹәнна дьхԝәст ԝи бьдә сәкьнандьн у ԝирʹа гот: «Тӧ тейи щәм мьн? Тӧ гәрәке мьн бьньхӧмини!» 15 Иса щаба ԝи да: «Рʹийа мьн нәгьрә, чьмки бь ви авайи әме һʹәму тьштед кӧ Хԝәде дьхԝазә,* биньн сери». Ида Йуһʹәнна рʹийа ԝи нәгьрт. 16 Һәма ча Иса һатә ньхӧмандьне у жь аве дәркʹәт, һьнге әʹзман вәбун, у Йуһʹәнна дит кӧ рʹӧһʹе Хԝәде мина кәвоткәке дакʹәтә сәр Иса. 17 У дәнгәки жь әʹзмана ӧса гот: «Әв ә Кӧрʹе мьни дәлал, йе кӧ дьле мьн ша дькә».

4 Паше, рʹӧһʹ Иса бьрә бәрʹийе, у әԝ ԝедәре алийе Мире-щьнада һатә щерʹьбандьне. 2 Иса 40 рʹож у 40 шәви рʹожи гьрт, у пәйрʹа бьрʹчи бу. 3 Йе кӧ дьщерʹьбинә незики ԝи бу у жерʹа гот: «Һәрге тӧ кӧрʹе Хԝәде йи, дә бежә ван кәвьра ԝәки бьбьнә нан». 4 Ле Иса щаба ԝи да: «Ньвисаред Пирозда ньвисар ә: ‹Мәрьв нә тʹәне бь нан, ле бь һәр хәбәра кӧ жь дәве Йаһоԝа дәрдькʹәвә, дьжи›».

5 Һьнге Мире-щьна Иса бьрә бажаре пироз у сәр щийе һәри бьльнд йе пʹарьстгәһе, да сәкьнандьне 6 у ԝирʹа гот: «Һәрге тӧ кӧрʹе Хԝәде йи, дә хԝә жь вьр бавежә хԝаре, чьмки ньвисар ә: ‹Әԝе бона тә тʹәмийе бьдә мәләкед хԝә›, у ‹Әԝана ԝе тә сәр дәстед хԝә һьлгьрьн, ԝәки ньге тә кәвьр нәкʹәвә›». 7 Иса ԝирʹа гот: «Ӧса жи ньвисар ә: ‹Хԝәдайе хԝә Йаһоԝа нәщерʹьбинә›».

8 Паше Мире-щьна әԝ бьрә сәр чʹийаки гәләк бьльнд, һʹәму пʹадшатийед дьнйайе рʹумәта ԝанва нишани ԝи кьр 9 у ԝирʹа гот: «Һәрге тӧ бәр мьн бькʹәви сәр чока у сәре хԝә бәр мьн дайни, әзе ван һʹәмуйа бьдьмә тә». 10 Ве гаве Иса ԝирʹа гот: «Жь мьн дур кʹәвә, Шәйтʹан! Чьмки ньвисар ә: ‹Хԝәдайе хԝә Йаһоԝа бьһʹәбинә у тʹәне ԝирʹа хьзмәтийа пироз бькә›». 11 Паши ве йәке Мире-щьна әԝ һишт чу, у мәләк һатьн Исарʹа бәрдәсти кьрьн.

12 Гава Иса бьһист кӧ Йуһʹәнна һатийә гьртьне, чу Щәлиле. 13 Паше, әԝ жь Ньсрәте дәркʹәт у чу Кәпәрнаһума бәр бәʹре, йа кӧ һәрема Зәбулон у Нәфтәлийеда йә. Әԝ ԝедәре щиԝар бу, 14 сәва кӧ әв готьна Ишайа пʹехәмбәр бе сери: 15 «Әй Щәлила мьләта, ԝәлате Зәбулоне у ԝәлате Нәфтәлийе, ль сәр рʹийа бәрбь бәʹре, ԝи алийе Урдӧне! 16 Щьмәʹта кӧ тәʹристанеда рʹуньшти йә, рʹонайикә мәзьн дит, у сәр щьмәʹта кӧ һәрема сийа мьрьнеда рʹуньшти йә, рʹонайе шәԝԛ да». 17 Жь һьнгева, Иса дәстпекьр мьзгинийе бәла кә у дьгот: «Тʹобә кьн, чьмки Пʹадшатийа әʹзмана незик буйә».

18 Гава Иса бәр Бәʹра Щәлиле дьмәшийа, әԝи дӧ бьра дитьн, Шьмһʹун, кӧ жерʹа Пәтрус те готьне, у бьре ԝи Әндраԝьс. Ԝана тʹорʹ давитьнә бәʹре, чьмки мәʹсигьр бун. 19 Әԝи ԝанрʹа гот: «Пәй мьн ԝәрен, у әзе ԝә бькьмә мәʹсигьред мәрьва». 20 Ԝана жи һәма ԝе дәме тʹорʹед хԝә щида һиштьн у пәй ԝи чун. 21 Гава Иса жь ԝи щийи һьнәки пешда чу, рʹасти дӧ бьред дьн жи һат, Аԛубе кӧрʹе Зәбәди у бьре ԝи Йуһʹәнна. Ԝана тʹәви баве хԝә Зәбәди тʹорʹед хԝә ԛәйикеда дьдьрутьн,* у Иса гази ԝан кьр. 22 Ԝана жи һәма ԝе дәме ԛәйик у баве хԝә һишт у пәй ԝи чун.

23 Иса тʹәмамийа Щәлиле дьгәрʹийа, кʹьништед* ԝанда һин дькьр, мьзгинийа Пʹадшатийа Хԝәде бәла дькьр у мәрьв жь һʹәму щурʹә еш у нәхԝәшийа ԛәнщ дькьрьн. 24 Нав у дәнге Иса нав тʹәмамийа Сурйайеда бәла бу. У щьмәʹте һәр щурʹә мәрьвед нәхԝәш анинә щәм ԝи, йед кӧ щурʹә-щурʹә еш у щәфада бун: йед щьнакʹәти, йед бь епилепси у шьлушәʹт. Әԝи әԝ һʹәму жи ԛәнщ кьрьн. 25 Гәләк әʹлаләт жь Щәлиле, жь Декаполисе,* жь Оршәлиме, жь Щьһустане у жь алийе дьнә Чʹәме Урдӧне пәй ԝи чун.

5 Гава Иса әʹлаләт дит, һьлкʹьшийа чʹийе, рʹуньшт у шагьртед ԝи һатьнә щәм ԝи. 2 Әԝи дәстпекьр ԝана һин кә у гот:

3 «Чьԛас бәхтәԝар ьн кәсед кӧ фәʹм дькьн, ԝәки әԝана һʹәԝще Хԝәде нә, чьмки Пʹадшатийа әʹзмана йа ԝан ә.

4 Чьԛас бәхтәԝар ьн кәсед дьлшкәсти,* чьмки дьле ԝан ԝе бе рʹьһʹәткьрьне.

5 Чьԛас бәхтәԝар ьн кәсед шкәсти,* чьмки әԝана ԝе әʹрде ԝар бьн.

6 Чьԛас бәхтәԝар ьн кәсед кӧ тʹи у бьрʹчийе рʹастийе нә, чьмки әԝана ԝе бенә тʹеркьрьне.

7 Чьԛас бәхтәԝар ьн кәсед дьлрʹәʹм, чьмки ԝе һьндава ԝанда дьлрʹәʹм бьн.

8 Чьԛас бәхтәԝар ьн кәсед дьлтʹәмьз, чьмки әԝана ԝе Хԝәде бьвиньн.

9 Чьԛас бәхтәԝар ьн кәсед кӧ әʹдьлайе чедькьн, чьмки ԝе сәр ԝан бе готьне зарʹед Хԝәде.

10 Чьԛас бәхтәԝар ьн кәсед кӧ бона рʹастийе тенә зерандьне, чьмки Пʹадшатийа әʹзмана йа ԝан ә.

11 Чьԛас бәхтәԝар ьн һун гава мәрьв сәва мьн ԝә беһӧрмәт дькьн, дьзериньн у һәр щурʹә бӧхдана ль ԝә дькьн. 12 Әшԛ у ша бьн, чьмки хәлата мәзьн ль әʹзмен* һивийа ԝә йә. Һәма ви щурʹәйи, пʹехәмбәред бәре жи дьзерандьн.

13 Һун хԝейа әʹрде нә, ле һәрге хԝе тәʹма хԝә ӧнда кә, әԝе чаԝа диса шорʹ бә? Ида ԝе кери тьштәки нәйе. Әԝ ԝе бе авитьне дәрва у бьн ньгед мәрьвада бе пʹепәскьрьне.

14 Һун рʹонайа дьнйайе нә. Бажарәки кӧ сәре чʹийе йә, найе вәшартьне. 15 Гава кәсәк чʹьре ведьхә, әԝ накә бьне дәрдане, ле датинә сәр шәмданке, сәва кӧ әԝ рʹонайе бьдә һʹәмуйед малда. 16 Ӧса, бьра рʹонайа ԝә жи бәр мәрьва шәԝԛ бьдә, ԝәки әԝана кьред ԝәйә ԛәнщ бьвиньн у шькьрийе бьдьнә Баве ԝәйи әʹзмана.

17 Нәфькьрьн кӧ әз һатьмә ԝәки Ԛануне у Ньвисаред Пʹехәмбәра бьдьмә һьлдане. Әз һатьм нә кӧ бьдьмә һьлдане, ле ԝан биньм сери. 18 Әз рʹаст ԝәрʹа дьбежьм, һәрге жи әʹрд у әʹзман бәтавәбьн, һʹәрфәкә жь Ԛануне йа һәрә бьчʹук йан жи хәзәкә һʹәрфе жи ԝе ӧнда нәбә, һʹәта кӧ һәр тьшт бе сери. 19 Аԝа кʹи кӧ жь ван тʹәмийа йа һәрә бьчʹук бьтʹәрʹьбинә у мәрьва жи һин кә кӧ ӧса бькьн, әԝ ԝе нәһежа бә бькʹәвә* Пʹадшатийа әʹзмана. Ле кәсе кӧ ԝан тʹәмийа бинә сери у мәрьва жи һин кә, әԝ ԝе һежа бә бькʹәвә* Пʹадшатийа әʹзмана. 20 Әз ԝәрʹа дьбежьм, һәрге рʹастийа ԝә жь йа ԛанунзана у Ферьсийа зедәтьр нибә, һуне тʹӧ щар нәкʹәвьнә Пʹадшатийа әʹзмана.

21 Ԝә бьһистийә кӧ кал-бавед ԝәрʹа һатийә готьне: ‹Нәкӧжә, ле кʹи кӧ бькӧжә, ԝе бе диԝанкьрьне›. 22 Ле әз ԝәрʹа дьбежьм, һәр кәсе кӧ бәрдәԝам дькә сәр бьре хԝә һерс бьминә, әԝ ԝе бе диԝанкьрьне. У һәр кәсе кӧ бьре хԝә беһӧрмәт кә, ԝе бәр Диԝана Бьльнд* бьсәкьнә. У йе кӧ жерʹа бежә ‹Ахмах!›, дькарә бькʹәвә нава агьре Геһенайе.*

23 Һәрге тӧ пʹешкʹеша* хԝә бьви ԛӧрбангәһе,* у ԝедәре бе бира тә, кӧ бьре тә жь тә хәйиди йә, 24 пʹешкʹеша хԝә бәр ԛӧрбангәһе бьһелә, пешийе һәрʹә у тʹәви бьре хԝә ль һәв ԝәрә, паше вәгәрʹә у пʹешкʹеша хԝә бьдә.

25 Рʹева тʹәви кәсе кӧ шькийате тә дькә, зу ль һәв ԝәрә, сәва кӧ әԝ тә нәдә дәсте һʹакьм, у һʹакьм жи тә нәдә дәсте нобәдар, кӧ тә бавежә кәле. 26 Әз рʹаст тәрʹа дьбежьм, һʹәта кӧ тӧ ԛӧрʹуше хԝәйи пашьн нәди, тӧйе жь кәле дәрнәкʹәви.

27 Ԝә бьһистийә кӧ һатьбу готьне: ‹Ԛавийе нәкә›. 28 Ле әз ԝәрʹа дьбежьм, һәр кәсе кӧ бь чʹәʹве хьраб жьнәке бьньһерʹә, ида дьле хԝәда тʹәви ԝе ԛави кьрийә. 29 Һәрге чʹәʹве тәйи рʹасте тә бәрбь гӧнә дьбә, ԝи дәрхә у бавежә. Һе баш ә тӧ әндәмәки бәдәна хԝә ӧнда ки, нә кӧ тʹәмамийа бәдәна тә бе авитьне Геһенайе. 30 У һәрге дәсте тәйи рʹасте тә бәрбь гӧнә дьбә, ԝи жекә у бавежә. Һе баш ә тӧ әндәмәки бәдәна хԝә ӧнда ки, нә кӧ тʹәмамийа бәдәна тә бькʹәвә Геһенайе.

31 Ӧса жи һатийә готьне: ‹Һәр кәсе кӧ жьна хԝә бәрʹдә, гәрәке кʹахаза һәвԛәтандьне бьдә ԝе›. 32 Ле әз ԝәрʹа дьбежьм, һәр кәсе кӧ жьна хԝә нә жь бо зьнекʹарийе* бәрʹдә, дьбә сәбәб кӧ әԝ ԛавийе бькә. У һәр кәсе кӧ жьна бәрʹдайи дьстинә, ԛавийе дькә.

33 Ԝә әв жи бьһистийә кӧ кал-бавед ԝәрʹа һатийә готьне: ‹Сонд нәхԝә һәрге тӧ нькари бини сери, ле сонда кӧ тӧ ль бәр Йаһоԝа дьхԝи, бинә сери›. 34 Ле әз ԝәрʹа дьбежьм: Ԛә сонд нәхԝьн, нә бь әʹзмен, чьмки әԝ тʹәхте Хԝәде йә, 35 нә бь әʹрде, чьмки әԝ щийе бьн пʹийе ԝи йә, нә бь Оршәлиме, чьмки әԝ бажаре Пʹадше мәзьн ә. 36 Нә жи бь сәре хԝә сонд бьхԝьн, чьмки һун нькарьн пʹорʹәки хԝә сьпи йан рʹәш кьн. 37 Бьра хәбәра ԝә ‹Әре›, әре бә, у бьра хәбәра ԝә ‹На›, на бә, чьмки жь ве зедәтьр жь Мире-щьна* те.

38 Ԝә бьһистийә кӧ һатийә готьне: ‹Чʹәʹв дәԝса чʹәʹв у дьран дәԝса дьран›. 39 Ле әз ԝәрʹа дьбежьм: Мьԛабьли хьраба рʹанәбьн. Һәрге кәсәк силәке рʹуйе тәйи рʹасте хә, йе чʹәпе жи бьдә бәр. 40 У һәрге кәсәк тә бьвә бәр диԝане у кьрасе тә жь тә бьхԝазә, пʹоте хԝә жи бьдә ԝи. 41 У һәрге йәки хԝәйиһʹӧкӧм зоре тә бькә, ԝәки тӧ километрәке һәрʹи, дӧ километра тʹәви ԝи һәрʹә. 42 Гава кәсәк тьштәки жь тә бьхԝазә, бьдә ԝи, у гава кәсәк жь тә дәйн бьхԝазә, пьшта хԝә нәдә ԝи.

43 Ԝә бьһистийә кӧ һатийә готьне: ‹Мәрьва һʹәз бькә, ле бьра дьжмьне тә бәр чʹәʹве тә рʹәш бә›. 44 Ле әз ԝәрʹа дьбежьм: Дьжмьнед хԝә һʹәз бькьн, у бона ԝан дӧа бькьн, йед кӧ пәй ԝә дькʹәвьн. 45 Бь ви щурʹәйи һуне нишан кьн, кӧ һун зарʹед Баве хԝәйи әʹзмана нә. Әԝ тәʹве дәрдьхә һьм сәр кәсед хьраб, һьм жи сәр кәсед ԛәнщ, у әԝ баране һьм сәр кәсед рʹаст у һьм жи сәр кәсед нәрʹаст дьбаринә. 46 Һәрге һун тʹәне ԝана һʹәз дькьн, йед кӧ ԝә һʹәз дькьн, һун ида һежайи чь хәлате нә? Нә хәрщгьр жи ӧса дькьн? 47 У һәрге һун тʹәне бьред хԝә сьлав дькьн, һун чь жь йед дьн зедәтьр дькьн? Нә мәрьвед жь мьләтед дьн жи ӧса дькьн? 48 Һун гәрәке кʹамьл бьн, чаԝа кӧ Баве ԝәйи әʹзмана кʹамьл ә.

6 Һаж хԝә һәбьн, кӧ һун кьред хԝәйә ԛәнщ бәр мәрьва нәдьнә кʹьфше сәва кӧ бькʹәвьнә чʹәʹва. Йан на, һуне жь Баве хԝәйи әʹзмана хәлате нәстиньн. 2 Ләма, чахе тӧ кʹәсибарʹа ԛәнщийе дьки, нәкә дәнги,* чаԝа кӧ кәсед дӧрʹу кʹьништ* у кʹучʹада дькьн, ԝәки мәрьв пʹайе ԝан бьдьн. Әз рʹаст ԝәрʹа дьбежьм, ԝана ида хәлата хԝә бь тʹәмами стандийә. 3 Ле чахе тӧ кʹәсибарʹа ԛәнщийе дьки, бьра дәсте тәйи чʹәпе ньзаньбә кӧ дәсте тәйи рʹасте чь дькә, 4 сәва кӧ ԛәнщийа тә вәшарти бьминә. Һьнге Баве тәйи әʹзмана, йе кӧ һәр тьшти дьвинә, ԝе кьред тәйи вәшарти бьвинә у тә кʹәрәм кә.

5 У гава һун дӧа дькьн, мина кәсед дӧрʹу нәкьн, чьмки әԝана һʹәз дькьн кʹьништада у ԛӧлчʹед мәйданада бәр чʹәʹве хәлԛе дӧа бькьн. Әз рʹаст ԝәрʹа дьбежьм, ԝана ида хәлата хԝә бь тʹәмами стандийә. 6 Ле чахе тӧ дӧа дьки, бькʹәвә ода хԝә, дәри сәр хԝә бьгьрә у Баве хԝәйи әʹзманарʹа* дӧа бькә. Һьнге Баве тәйи әʹзмана, йе кӧ һәр тьшти дьвинә, ԝе кьред тәйә вәшарти бьвинә у тә кʹәрәм кә. 7 Гава һун дӧа дькьн, мина мьләтед дьн нибьн, йед кӧ дӧайед хԝәда әʹйни хәбәра диса у диса дьԝәкʹьлиньн. Ԝана тʹьре һәрге пʹьрʹхәбәр бьн, ԝе бенә бьһистьне. 8 Һун мина ԝан нибьн! Чьмки һʹәта кӧ һун тьштәки жь Баве хԝәйи әʹзмана бьхԝазьн, әԝ ида занә чь ԝәрʹа лазьм ә.

9 Ләма жи һун аһа дӧа бькьн:

‹Баве мәйи әʹзмана, бьра наве тә пироз бә. 10 Бьра Пʹадшатийа тә бе. Бьра ԛьрара тә чаԝа ль әʹзмен, ӧса жи ль сәр рʹуйе әʹрде бе сери. 11 Нане мәйи иро бьдә мә, 12 у гӧнед мә* бьбахшинә мә, чаԝа кӧ әм жи гӧнед мәрьва дьбахшиньнә ԝан. 13 Али мә бькә кӧ әм щерʹьбандьнада шаш нәбьн,* ле мә жь дәсте Мире-щьна* хьлаз кә›.

14 Һәрге һун дьбахшиньнә ԝан, йед кӧ һьндава ԝәда гӧнә дькьн, Баве ԝәйи әʹзмана жи ԝе бьбахшиньнә ԝә. 15 Ле һәрге һун гӧнед мәрьва набахшиньн, Баве ԝә жи ԝе гӧнед ԝә нәбахшинә.

16 Чахе һун рʹожи дьгьрьн, мина дӧрʹуйа мәʹдәкьри нибьн, чьмки әԝана мәʹде хԝә дькьн, ԝәки мәрьв бьвиньн кӧ ԝана рʹожи гьртийә. Әз рʹаст ԝәрʹа дьбежьм, ԝана ида хәлата хԝә бь тʹәмами стандийә. 17 Ле чахе тӧ рʹожи дьгьри, сәре хԝә рʹун бькә у сәрчʹәʹве хԝә бьшо. 18 Ӧса мәрьв ԝе нәвиньн ԝәки тә рʹожи гьртийә, ле тʹәне Баве тәйи әʹзмана ԝе бьвинә. Һьнге Баве тәйи әʹзмана ԝе кьред тәйи вәшарти бьвинә у тә кʹәрәм бькә.

19 Ида хԝәрʹа сәр әʹрде хьзна тʹоп нәкьн, чьмки жәнг у бьзуз дькарьн ԝана хьраб кьн, у дьз жи дькарьн бьдьзьн. 20 Ле дәԝсе, хԝәрʹа ль әʹзмен хьзне тʹоп кьн. Ԝедәре жәнг у бьзуз хьраб накьн, дьз жи накʹәвьне у надьзьн. 21 Чьмки хьзна ԝә кʹидәре бә, ԝе дьле ԝә жи ԝедәре бә.

22 Чʹьра бәдәне чʹәʹв ә. Һәрге чʹәʹве тә зәлал ә,* тʹәмамийа бәдәна тә ԝе рʹонайеда бә. 23 Ле һәрге чʹәʹве тә һʹәвсуд ә,* тʹәмамийа бәдәна тә ԝе тәʹри бә. Һәрге рʹонайа нав тәда тәʹри йә, әв тәʹри чьԛас зәʹф ә!

24 Тʹӧ кәс нькарә дӧ ахарʹа хӧламтийе бькә. Чьмки әԝ ԝе йәки нәфрʹәт кә у йе дьн һʹәз бькә, йан жи йәкирʹа амьн бә у ԛәдьре йе дьн нәгьрә. Һун нькарьн һьм Хԝәдерʹа, һьм жи һәбукерʹа хӧламтийе бькьн.

25 Ләма әз ԝәрʹа дьбежьм: Ида бона әʹмьре хԝә хәма нәкьн, кӧ һуне чь бьхԝьн йан чь вәхԝьн. Йан жи бона бәдәна хԝә, кӧ һуне чь ль хԝә кьн. Нә әʹмьр жь хԝарьне ԛимәттьр ә у бәдән жи жь кʹьнща? 26 Дина хԝә бьдьнә чʹьвикед әʹзмен. Әԝана нә дьчиньн, нә дьдьрун у нә жи әʹмбарада тьштәки тʹоп дькьн, диса жи Баве ԝәйи әʹзмана ԝана тʹер дькә. Нә һун жь ԝан ԛимәттьр ьн? 27 Кʹи жь ԝә дькарә бь хәмед хԝә, әʹмьре хԝә дәԛәке зедә кә? 28 Һун чьрʹа ӧса жи бона кʹьнща хәм дькьн? Дина хԝә бьдьнә сосьнед чоле, кӧ әԝана чаԝа шин дьбьн. Әԝана нә дьхәбьтьн у нә жи кʹьнща дьдьрун. 29 Ле әз ԝәрʹа дьбежьм, кӧ һәла һе Сьлеман Пʹадша жи тʹәмамийа хер-хьзна хԝәда мина йәки жь ԝан, кʹьнщ ль хԝә нәдькьр. 30 Кембаԝәрно, һәрге Хԝәде гиһайе чоле, кӧ иро һәйә у сьбе давежьнә тәндуре, ӧса дьхәмьлинә, ле чьԛас зедә ԝе ль ԝә кә? 31 Ләма тʹӧ щар хәма нәкьн у нәбежьн ‹Әме чь бьхԝьн?› йан ‹Әме чь вәхԝьн?› йан жи ‹Әме чь ль хԝә кьн?› 32 Мьләтед дьн пәй ԝан һʹәму тьшта дькʹәвьн. Ле Баве ԝәйи әʹзмана занә, кӧ һун һʹәԝще ԝан һʹәму тьшта нә.

33 Ле бәре пешьн бькʹәвьнә һʹәйра Пʹадшатийа Хԝәде у рʹастийа ԝи, у һʹәму тьштед лазьм ԝе ԝәрʹа бенә дайине. 34 Ләма бона рʹожа сьбе ԛә хәма нәкьн, чьмки сьбе хәмед дьн ԝе һәбьн. Дәрдед рʹоже, бәси рʹоже нә.

7 Ида сущдар нәкьн, ԝәки һун нәйенә сущдаркьрьне. 2 Чьмки һун чь щурʹәйи мәрьва сущдар кьн, Хԝәде жи ԝе ӧса ԝә сущдар кә. У һун һьндава мәрьвада чаԝа бьн, әԝана жи ԝе һьндава ԝәда ӧса бьн.* 3 Тӧ чьрʹа ԛьршьк чʹәʹве бьре хԝәда дьвини, ле кʹеране чʹәʹве хԝәда навини? 4 Йан тӧ ча дькари бьре хԝәрʹа бежи: ‹Ԝәрә әз ԛьршьк жь чʹәʹве тә дәрхьм›, гава чʹәʹве тәда кʹеран һәйә? 5 Дӧрʹу! Пешийе кʹеран жь чʹәʹве хԝә дәрхә у паше тӧйе зәлал бьвини, кӧ чаԝа ԛьршьк жь чʹәʹве бьре хԝә дәрхи.

6 Тьштед пироз нәдьн бәр кучʹька, у кәвьред хԝәйи ԛимәт* нәвежьн бәр хьнзира, сәва кӧ әԝана бьн ньгед хԝәда пʹепәс нәкьн у пәй ԝә нәкʹәвьн, ԝә пʹарчә-пʹарчә нәкьн.

7 Бәрдәԝам кьн бьхԝазьн у ԝе ԝәрʹа бе дайине, бәрдәԝам кьн бьгәрʹьн у һуне бьвиньн, бәрдәԝам кьн дәри хьн у ԝе бәр ԝә вәбә. 8 Чьмки кʹи кӧ дьхԝазә, дьстинә, кʹи кӧ дьгәрʹә, дьвинә, у кʹи кӧ дәри дьхә, бәр ԝи вәдьбә. 9 Гәло жь ԝә кʹи ԝе кәвьр бьдә кӧрʹе хԝә, гава әԝ нан бьхԝазә? 10 Йан гәло әԝе мәʹр бьдә ԝи, гава әԝ мәʹси бьхԝазә? 11 Һәрге һун, мәрьвед гӧнәкʹар, заньн чаԝа тьштед баш бьдьнә зарʹед хԝә, ле Баве ԝәйи ль әʹзмана ԝе чьԛас тьштед баш бьдә ԝан, йед кӧ жь ԝи дьхԝазьн!

12 Ләма чь кӧ һун дьхԝазьн мәрьв бона ԝә бькьн, гәрәке һун жи бона ԝан ӧса бькьн. Һәма әԝ ә мәʹна Ԛануне у Ньвисаред Пʹехәмбәра.

13 Дәре тәнгрʹа дәрбаз бьн, чьмки фьрә йә әԝ дәри у һеса йә әԝ рʹе, кʹижан кӧ дьбә бәрбь мьрьне, у йед кӧ ви дәрирʹа дьчьн, гәләк ьн. 14 Ле тәнг ә әԝ дәри у зәʹмәт ә әԝ рʹе, кʹижан кӧ дьбә бәрбь жийине, у һьндьк ьн әԝед кӧ ԝе рʹе дьвиньн.

15 Һаж пʹехәмбәред ԛәлп һәбьн, йед кӧ пʹосте пезда тенә щәм ԝә, ле бь рʹасти гӧред һар ьн. 16 Һуне ԝана жь кьред ԝан* нас кьн. Ԛә кәсәк жь стьрийа дькарә тьрийа йан жи һежира бьчьнә? 17 Бь ԝи авайи, һәр дара баш бәре баш дьдә, ле һәр дара хьраб бәре хьраб дьдә. 18 Дара баш нькарә бәре хьраб бьдә, у дара хьраб жи нькарә бәре баш бьдә. 19 Һәр дара кӧ бәре баш надә, те бьрʹин у авитьне нава агьр. 20 Бәле, һуне ԝан пʹехәмбәред ԛәлп жь кьред ԝан* нас кьн.

21 Нә кӧ һәр кәсе мьнрʹа дьбежә, ‹Хӧдан, Хӧдан›, ԝе бькʹәвә Пʹадшатийа әʹзмана. Ле тʹәне әԝе кӧ ԛьрара Баве мьни әʹзмана тинә сери, ԝе бькʹәве. 22 Ԝе рʹоже, гәләк кәс ԝе мьнрʹа бежьн: ‹Хӧдан, Хӧдан, нә мә бь наве тә пʹехәмбәрти дькьрьн? Нә мә бь наве тә щьн дәрдьхьстьн? Нә мә бь наве тә кʹәрәмәт* дькьрьн?› 23 Һьнге әзе әшкәрә ԝанрʹа бежьм: ‹Мьн һун тʹӧ щар нас нәкьрьнә! Жь мьн дур кʹәвьн, хьрабно!›

24 Аԝа, һәр кәсе кӧ ван готьнед мьн дьбьһе у тинә сери, мина мәрьвәки сәрԝахт ә, йе кӧ мала хԝә сәр зьнар ава кьр. 25 Баран бари, ав рʹабу у байе мәзьн мале хьст, ле мал һьлнәшийа, чьмки әԝ сәр зьнар һатә авакьрьне. 26 Ле һәр кәсе кӧ ван готьнед мьн дьбьһе у найнә сери, мина мәрьвәки беаԛьл ә, йе кӧ мала хԝә сәр ԛуме ава кьр. 27 Баран бари, ав рʹабу у байе мәзьн мале хьст, мал кʹәт у бь тʹәмами һьлшийа».

28 Гава Иса готьнед хԝә хьлаз кьр, мәрьв сәр һинкьрьна ԝи зәндәгьрти ман, 29 чьмки әԝи мина йәки хԝәйиһʹӧкӧм әԝана һин дькьрьн, нә кӧ мина ԛанунзанед ԝан.

8 Паше Иса жь чʹийе дакʹәт у әʹлаләтәкә мәзьн пәй ԝи чу. 2 Һьнге, йәки кʹоти һатә бал Иса, хԝә авитә сәр чока у лавайа ԝи кьр: «Хӧдан, һәрге тӧ тʹәне бьхԝази, тӧ дькари мьн ԛәнщ ки».* 3 Иса жи дәсте хԝә дайе у готе: «Әз дьхԝазьм! Ԛәнщ бә». Дәрберʹа әԝ жь нәхԝәшийа кʹотибуне ԛәнщ бу. 4 У Иса ԝирʹа гот: «Бьньһерʹә, тʹӧ кәсирʹа тьштәки нәбежи, ле һәрʹә хԝә нишани кʹаһин кә у ԛӧрбана кӧ Муса тʹәми дайә, бьдә, ԝәки әԝ бона ԝан бьбә избатийа ԛәнщкьрьна тә».*

5 Гава Иса кʹәтә Кәпәрнаһуме, сәрсәдәк* һатә бал ԝи, рʹәща ԝи кьр 6 у готе: «Хӧдан, хӧламе мьн шьлушәʹт ә, малда щи-ньвинада йә, у гәләк дьчәрчьрә». 7 Иса щаба ԝи да: «Әзе бем, ԝи ԛәнщ кьм». 8 Сәрсәд ле вәгәрʹанд у готе: «Хӧдан, әз нәһежа мә кӧ тӧ бейи мала мьн. Ле тʹәне хәбәрәке бежә у хӧламе мьне ԛәнщ бә. 9 Чьмки әз жи бьн һʹӧкӧме кәсед дьнда мә, у бьн дәсте мьнда жи әскәр һәнә. Гава әз йәкирʹа дьбежьм ‹Һәрʹә!›, әԝ дьчә, йәки дьнрʹа дьбежьм ‹Ԝәрә!›, әԝ те, у гава әз хӧламе хԝәрʹа дьбежьм ‹Ви тьшти бькә!›, әԝ дькә». 10 Чахе Иса әв йәк бьһист, әʹщебмайи ма у готә ԝан, йед кӧ пәй ԝи дьчун: «Әз рʹаст ԝәрʹа дьбежьм, Исраеледа, мьн баԝәрикә һаԛас ԛәԝи ԛә нәдитийә. 11 Әз ԝәрʹа дьбежьм, жь рʹоһьлате у рʹоавайе гәләк кәс ԝе бен у Пʹадшатийа әʹзманада тʹәви Бьраһим, Исһаԛ у Аԛуб бәр сьфре рʹунен. 12 Ле зарʹед Пʹадшатийа Хԝәде ԝе бенә авитьне дәрва нав тәʹрийе. Ԝедәре әԝана ԝе бьгьрин* у чʹьркә-чʹьрка дьранед ԝан бьн». 13 Паше Иса сәрсәдрʹа гот: «Һәрʹә. Анәгори баԝәрийа тә, бьра хԝәстьна тә бе сери». У һәма ԝе дәме хӧламе ԝи ԛәнщ бу.

14 Гава Иса һатә мала Пәтрус, әԝи дит кӧ хԝәсийа ԝи бь гәрма бьльнд нав ньвинада йә. 15 Иса дәсте хԝә да дәсте ԝе, у гәрма ԝе дани. Әԝ жи рʹабу у ԝирʹа бәрдәсти кьр. 16 Гава бу евар, гәләк мәрьвед щьнакʹәти анинә бал ԝи. Әԝи бь хәбәрәке щьн дәрхьстьн у һʹәму кәсед нәхԝәш ԛәнщ кьрьн. 17 Бь ԝи щурʹәйи, готьна Ишайа пʹехәмбәр һатә сери: «Әԝи әм жь нәхԝәшийед мә хьлаз кьрьн у ешед мә һьлда сәр хԝә».

18 Гава Иса әʹлаләт ль дәр-доре хԝә дит, тʹәми да шагьрта ԝәки тʹәви ԝи һәрʹьн алийе бәʹрейи дьн. 19 Ԛанунзанәк незики ԝи бу у жерʹа гот: «Дәрсдар, тӧ кʹӧда жи һәрʹи, әзе пәй тә бем». 20 Ле Иса ԝирʹа гот: «Һʹолькед рʹувийа* һәнә кӧ теда дьминьн, у һелунед чʹьвикед әʹзмана жи һәнә, ле ԛә щик тʹӧнә ԝәки Кӧрʹе инсен сәре хԝә ле дайнә». 21 Паше йәк жь шагьрта, ԝирʹа гот: «Хӧдан, изьне бьдә мьн, кӧ әз пешийе һәрʹьм баве хԝә чʹәʹл кьм». 22 Ле Иса жерʹа гот: «Тӧ бәрдәԝам кә пәй мьн ԝәрә. Бьра мьри мьрийед хԝә чʹәʹл кьн».

23 У чахе Иса кʹәтә ԛәйике, шагьртед ԝи пәй ԝи чун. 24 Ньшкева сәр бәʹре баки ԛайим рʹабу, у пʹелед аве ԛәйик тʹьжә дькьр, ле Иса рʹазайи бу. 25 Шагьрт незики ԝи бун, әԝ жь хәԝе рʹакьрьн у готьн: «Хӧдан, әме бьхәньԛьн, мә хьлаз кә!» 26 Һьнге Иса ԝанрʹа гот: «Кембаԝәрно, чьрʹа тьрс кʹәтийә дьле ԝә?» Һьнге әԝ рʹабу, фәрман да ба у бәʹре, у паши ԝе йәке ба у бәʹр сәԛьрʹин. 27 Шагьрт әʹщебмайи ман у готьн: «Әв кʹи йә? Һʹәта ба у бәʹр жи ль гора готьна ԝи дькьн».

28 Гава Иса дәрбази алийе бәʹрейи дьн бу у гьһишт һәрема Гәдарине, дӧ мәрьвед щьнакʹәти жь нава мәзәла һатьнә пешийа ԝи. Әв дӧ мәрьв һаԛас һар бун, кӧ тʹӧ кәс нәԝерьбу ԝе рʹерʹа дәрбаз буйа. 29 Ԝана кьрә ԛирʹин у готьн: «Тӧ чь жь мә дьхԝази, Кӧрʹе Хԝәде? Тӧ пешийа ԝәхте кʹьфшкьри һати мә бьчәрчьрини?» 30 Жь ԝана ԝедатьр, гәләк хьнзир дьчʹерийан. 31 Ләма щьна рʹәща жь ԝи кьр у готьне: «Һәрге тӧ мә дәрхи, мә бьшинә нав хьнзира».* 32 У Иса ԝанрʹа гот: «Һәрʹьн!» Һьнге щьн жь ԝан дәркʹәтьн у кʹәтьнә нава хьнзира, у һʹәму хьнзира хԝә жорда авитьнә бәʹре* у аведа хәньԛин. 33 Шьванед хьнзира рʹәвин, чунә бажер у һәр тьшт гьли кьрьн, ӧса жи чь һатә сәре щьнакʹәтийа. 34 Һьнге һʹәму мәрьвед бажер һатьнә пешийа Иса. Гава ԝана Иса дит, һиви жь ԝи кьрьн, ԝәки әԝ жь һәрема ԝан һәрʹә.

9 Һьнге Иса кʹәтә ԛәйике, дәрбази алийе дьн бу у чу бажаре хԝә. 2 Ԝедәре, мәрьв шьлушәʹтәки нав ньвинада* анинә щәм ԝи. Гава Иса баԝәрийа ԝан дит, йе шьлушәʹтрʹа гот: «Нәтьрсә, лаԝо! Гӧнед тә һатьнә бахшандьне». 3 Һьнге һьнә ԛанунзан нав хԝәда фькьрин: «Әԝ кʹьфьрийа дькә». 4 Ле Иса заньбу әԝана чь дьфькьрьн, у гот: «Һун чьрʹа дьле хԝәда тьштед хьраб дьфькьрьн? 5 Чь дьһа һеса йә бежьн? ‹Гӧнед тә һатьнә бахшандьне›, йан ‹Рʹабә у рʹе һәрʹә›? 6 Ле бәле, сәва һун бьзаньбьн кӧ һʹӧкӧме Кӧрʹе инсен сәр әʹрде һәйә, ԝәки гӧна бьбахшинә . . .» Паше әԝи йе шьлушәʹтрʹа гот: «Рʹабә, ньвина хԝә һьлдә у һәрʹә мала хԝә». 7 Әԝ жи рʹабу у чу мала хԝә. 8 Гава әʹлаләте әв йәк дит, әʹщебмайи ма у шькьри да Хԝәде, йе кӧ һʹӧкӧмәки ӧса дайә дәсте мәрьва.

9 Чахе Иса жь ԝедәре чу, әԝи мәрьвәки бь наве Мәтта дит, йе кӧ ль щийе тʹопкьрьна хәрща рʹуньшти бу, у ԝирʹа гот: «Пәй мьн ԝәрә!» Әԝ жи рʹабу у пәй ԝи чу. 10 Паше гава Иса мала Мәттада бәр сьфре рʹуньштьбу, гәләк хәрщгьр у гӧнәкʹар һатьн, тʹәви Иса у шагьртед ԝи бәр сьфре рʹуньштьн. 11 Гава Ферьсийа әв йәк дит, шагьртед ԝирʹа готьн: «Чьрʹа дәрсдаре ԝә тʹәви хәрщгьр у гӧнәкʹара хԝарьне дьхԝә?» 12 Иса готьнед ԝан бьһистьн у гот: «Нә кӧ мәрьвед сьһʹәт-ԛәԝат һʹәԝще һʹәким ьн, ле йед нәхԝәш. 13 Дә һәрʹьн һин бьн, һәла чь те һʹәсабе әв гьли: ‹Әз рʹәʹме дьхԝазьм, нә кӧ ԛӧрбане›. Чьмки әз һатьм, нә кӧ гази йед рʹаст, ле гази гӧнәкʹара кьм».

14 Һьнге шагьртед Йуһʹәнна һатьн бал Иса у пьрсин: «Әм у Ферьси рʹожи дьгьрьн, ле шагьртед тә рʹожи нагьрьн?» 15 Иса щаба ԝан да: «Гәло мәʹнийа һәвалед зәʹве һәйә, ԝәки шине бькьн һʹәта кӧ зәʹва тʹәви ԝан ә? Ле ԝәхт ԝе бе, гава зәʹва жь ԝан бе һьлдане, у һьнге әԝана ԝе рʹожи бьгьрьн. 16 Тʹӧ кәс кʹьнщәкә кәвьнә ԛәльшива пʹәрчʹе тʹәзә надьру, чьмки пʹәрчʹе тʹәзә ԝе кʹьнща кәвьн бькʹьшинә у щийе ԛәльши ԝе һе ль бәр һәв һәрʹә. 17 Ӧса жи тʹӧ кәс шәрава тʹәзә накә мәшкед* кәвьн, ԝәки мәшк нәтʹәԛьн, хьраб нәбьн, у шәрав жи нәрʹьжә. Ле мәрьв шәрава тʹәзә дькьнә мәшкед тʹәзә, у һәр дӧ жи тенә хԝәйкьрьне».

18 Гава Иса бәʹса ван тьшта дькьр, сәрԝерәк* һатә щәм ԝи, бәр ԝи кʹәтә сәр чока у готе: «Ԛиза мьн дьбәкә ида мьрийә. Ле ԝәрә дәсте хԝә дайнә сәр ԝе, у әԝе бьжи».

19 Һьнге Иса рʹабу у тʹәви шагьртед хԝә пәй ԝи чу. 20 Ԝи чахи жьнәкә кӧ 12 сала дьчәрчьри, чьмки сәр хуне вәбьбу, пьштева һат у дәст да рʹишийед кʹьнще ԝи, 21 чьмки әԝе хԝәрʹа дьгот: «Һәрге әз тʹәне дәсте хԝә бьдьм кʹьнще ԝи, әзе ԛәнщ бьм». 22 Иса зьвьрʹи, әԝ дит у гот: «Нәтьрсә, ԛиза мьн! Баԝәрийа тә тӧ ԛәнщ кьри». У ԝе дәме әв жьньк ԛәнщ бу.

23 Гава Иса кʹәтә мала ԝи сәрԝери, әԝи бьлурван у хәлԛе кӧ шина гьран дькьрьн, дит. 24 Һьнге әԝи ԝанрʹа гот: «Жь вьр дәркʹәвьн, чьмки кәчʹьк нәмьрийә, ле рʹаза йә». Сәр ве йәке әԝана ԝи кʹәнийан. 25 Гава щьмәʹт жь мале дәркʹәт, Иса кʹәтә һьндӧрʹ, дәсте кәчʹьке гьрт у әԝ рʹабу. 26 Әв дәнг-бәʹс тʹәмамийа ве һәремеда бәла бу.

27 Чахе Иса жь ԝедәре дьчу, дӧ мәрьвед кор данә пәй ԝи, у дькьрьнә ԛирʹин: «Кӧрʹе Даԝьд, гӧне хԝә мә бинә!»* 28 Гава әԝ кʹәтә мале, әв мәрьвед кор һатьнә бал ԝи, у Иса жь ԝан пьрси: «Һун баԝәр дькьн, кӧ әз дькарьм ԝә ԛәнщ кьм?» Ԝана щаб да: «Бәле, Хӧдан». 29 Иса жи дәсте хԝә да чʹәʹвед ԝан у гот: «Бьра анәгори баԝәрийа ԝә, чʹәʹвед ԝә вәбьн!» 30 У чʹәʹвед ԝан вәбун. Ле Иса сәрт тʹәми ль ԝан кьр: «Бьра тʹӧ кәс ве йәке пенәһʹәсә!» 31 Ле чахе әԝана дәркʹәтьн дәрва, дәрһәԛа ԝи тʹәмамийа һәремеда бәла кьрьн.

32 Гава әԝана жь ԝедәре дьчун, щьнакʹәтики лал анинә бал Иса. 33 Чахе Иса щьн дәрхьст, йе лал дәстпекьр хәбәр дә. Мәрьв әʹщебмайи ман, у готьн: «Тьштәки аһа Исраеледа тʹӧ щар нәԛәԝьмийә». 34 Ле Ферьсийа дьгот: «Әԝ бь дәсте сәрԝере щьна, щьна дәрдьхә».

35 Иса һʹәму гӧнда у бажара дьгәрʹийа, кʹьништед* ԝанда һин дькьр, мьзгинийа Пʹадшатийе бәла дькьр у мәрьв жь һʹәму щурʹә еш у нәхԝәшийа ԛәнщ дькьрьн. 36 Чахе Иса әв мәрьв дитьн, дьле ԝи сәр ԝан шәԝьти, чьмки әԝана мина пәзед бе шьван, бьриндар у бәрʹәдайи бун. 37 Паше әԝи шагьртед хԝәрʹа гот: «Бәле, шьхӧле нандьруне гәләк ә, ле хәбаткʹар һьндьк ьн. 38 Ләма, һиви жь Хԝәйе нандьруне бькьн, ԝәки нандьруна хԝәрʹа хәбаткʹара бьшинә».

10 Иса гази 12 шагьртед хԝә кьр у һʹӧкӧм да ԝан, кӧ әԝана щьна дәрхьн у һәр щурʹә еш у нәхԝәшийа ԛәнщ кьн.

2 Навед ван һәр 12 шандийа әв ьн: Йе пешьн, Шьмһʹун, кӧ ԝирʹа Пәтрус дьбежьн у бьре ԝи Әндраԝьс, Аԛубе кӧрʹе Зәбәди у бьре ԝи Йуһʹәнна, 3 Филипо у Бәртоломәйо, Тʹума у Мәттайе хәрщгьр, Аԛубе кӧрʹе Һалфаԝо у Тәдайо, 4 Шьмһʹуне Канани* у Щьһудайе Исхәрйоти, йе кӧ паше нәмамийа Иса кьр.

5 Иса әв һәр 12 шандьн у әв тʹәми да ԝан: «Нәчьн нава мьләтед дьн у нәкʹәвьн тʹӧ бажарәки Самәрйайе. 6 Ле дәԝсе һәрʹьн бал пәзед Исраелейә ӧндабуйи. 7 Һун һәрʹьн кʹидәре жи, мьзгинийе бәла кьн у бежьн: ‹Пʹадшатийа әʹзмана незик буйә›. 8 Нәхԝәша ԛәнщ кьн, мьрийа рʹакьн, кʹотийа ԛәнщ кьн* у щьна дәрхьн. Ԝә беһәԛ стандийә, беһәԛ жи бьдьн. 9 Һун зерʹ, зив у пʹәред дьн* жи хԝәрʹа нәкьнә кʹиске хԝә у тʹәви хԝә нәбьн. 10 Бона рʹеԝитийе нә тʹорбе хԝарьне хԝәрʹа бьвьн, нә кьрасе зедә, нә чарьх у нә жи шьвдар, чьмки хәбаткʹар һежа йә нане хԝә бьстинә.

11 Гава һун бькʹәвьнә бажар йан гӧндәки, кәсед һежа бьгәрʹьн у бал ԝан бьминьн, һʹәта һун жь ԝедәре һәрʹьн. 12 Чахе һун бькʹәвьнә маләке, сьлаве бьдьнә ԝан. 13 Һәрге әԝ мал һежа бә, бьра әʹдьлайа ԝә сәр ԝе бә. Ле һәрге нәһежа бә, бьра әʹдьлайа ԝә ль ԝә вәгәрʹә. 14 Кʹидәре ԝә ԛәбул нәкьн йан гӧһ нәдьн хәбәра ԝә, гава һун жь ԝе мале йан жь ԝи бажари дәркʹәвьн, тʹоза ньгед хԝә даԝшиньн. 15 Әз рʹаст ԝәрʹа дьбежьм, Рʹожа Диԝане һʹале ԝәлате Содом у Гоморайе ԝе жь һʹале ԝи бажари дьһа һеса бә.

16 Ва әз ԝә чаԝа пәз дьшиньм нава гӧра; ләма мина мәʹра фәсал бьн, ле мина кәвотка дьлсах бьн. 17 Жь мәрьва фәсал бьн, чьмки әԝана ԝе ԝә бьвьнә бәр диԝана у ԝе кʹьништед* хԝәда ԝә бьдьнә бәр ԛамчийа. 18 Рʹуйе мьнда, ԝе ԝә бьдьнә дәсте ԝәлийа у пʹадша, ԝәки һун ԝанрʹа у мьләтед дьнрʹа шәʹдәтийе бьдьн. 19 Ле чахе әԝана ԝә бьдьнә дәсте ԝан, хәм нәкьн кʹа һуне чь бежьн у ча бежьн. Ԝе дәме ԝәрʹа ԝе бе дайине кӧ һун чь бежьн, 20 чьмки нә кӧ һуне хәбәр дьн, ле рʹӧһʹе* Баве ԝә ԝе бь зар-зьмане ԝә хәбәр дә. 21 Бьра ԝе бьре хԝә у бав ԝе зарʹа хԝә бьдә кӧштьне, у зарʹ ԝе һьмбәри де-баве хԝә рʹабьн у ԝана бьдьнә кӧштьне. 22 Бона наве мьн һуне бәр чʹәʹве һʹәмуйа рʹәш бьн, ле йе кӧ һʹәта хьлазийе тәйах кә, әԝе хьлаз бә. 23 Гава бажарәкида пәй ԝә кʹәвьн, бьрʹәвьн бажарәки дьн. Әз рʹаст ԝәрʹа дьбежьм, һʹәта һатьна Кӧрʹе инсен, һуне перʹа нәгьһиньн ԝәки һʹәму бажаред Исраеле жь сәри һʹәта бьни бьгәрʹьн.

24 Шагьрт жь дәрсдаре хԝә мәстьр нинә у нә жи хӧлам жь ахайе хԝә. 25 Шагьрт кӧ мина дәрсдаре хԝә бә, у хӧлам мина ахайе хԝә бә, бәси ԝан ә. Һәрге хԝәйе малерʹа дьбежьн Бәлзәбул,* ижа нәфәред ԝирʹа ԝе ӧса нәбежьн? 26 Ләма ԝана нәтьрсьн, чьмки тʹӧ тьште вәшарти тʹӧнә кӧ нәйе әшкәрәкьрьне, у тʹӧ сӧрʹ тʹӧнә кӧ нәйе әʹйанкьрьне. 27 Тьштед кӧ әз тәʹрийеда ԝәрʹа дьбежьм, һун рʹонайеда бежьн, у чь кӧ һун гӧһада бь дәнге ньмьз* дьбьһен, сәр банийа әʹлам кьн. 28 Жь ԝан нәтьрсьн йед кӧ бәдәне дькӧжьн, ле нькарьн нәфсе* бькӧжьн. Ле жь ԝи бьтьрсьн, йе кӧ дькарә һьм нәфсе һьм жи бәдәне Геһенайеда* кʹӧта кә. 29 Нә дӧ чʹьвик бь ԛӧрʹушәки* тенә фьротане? Диса жи, йәк жь ԝан ӧса накʹәвә әʹрде кӧ Баве ԝә һаж пе тʹӧнә бә. 30 Ле чь ль ԝә дькʹәвә, һʹәму пʹорʹед сәре ԝә жи жьмарти нә. 31 Ләма жи нәтьрсьн, һун жь гәләк чʹьвика ԛимәттьр ьн.

32 Һәр кәсе кӧ бәр мәрьва бежә, ԝәки әԝ шагьрте мьн ә, әзе жи бәр Баве хԝәйи әʹзмана бежьм, кӧ әԝ шагьрте мьн ә. 33 Ле һәр кәсе кӧ мьн бәр мәрьва инкʹар кә, әзе жи бәр Баве хԝәйи әʹзмана ԝи инкʹар кьм. 34 Нәфькьрьн кӧ әз һатьмә әʹдьлайе биньм сәр рʹуйе әʹрде. Әз нәһатьмә кӧ әʹдьлайе биньм, ле шур. 35 Әз һатьмә ԝәки кӧрʹ жь бав, ԛизе жь дайике, у буке жь хԝәсийе бьԛәтиньм. 36 Бь рʹасти, дьжмьнед мерьв ԝе нәфәред мала ԝи бьн. 37 Әԝе кӧ де-баве хԝә жь мьн зедәтьр һʹәз дькә, нәһежайи мьн ә. У әԝе кӧ кӧрʹ йан ԛиза хԝә жь мьн зедәтьр һʹәз дькә, нәһежайи мьн ә. 38 У йе кӧ стуна хԝәйә щәфе һьлнәдә у пәй мьн нәйе, әԝ нәһежайи мьн ә. 39 Йе кӧ дьхԝазә әʹмьре хԝә хьлаз кә, әԝе әʹмьре хԝә ӧнда кә, у йе кӧ бона хатьре мьн әʹмьре хԝә ӧнда дькә, әԝе диса бьвинә.*

40 Йе кӧ ԝә ԛәбул дькә, әԝ мьн жи ԛәбул дькә. У йе кӧ мьн ԛәбул дькә, әԝ Ԝи жи ԛәбул дькә йе кӧ әз шандьмә». 41 Йе кӧ пʹехәмбәр ԛәбул дькә чаԝа пʹехәмбәр, ԝе хәлата мина йа пʹехәмбәр бьстинә. У әԝе кӧ мәрьвәки рʹаст ԛәбул дькә, чьмки әԝ мәрьве рʹаст ә, ԝе хәлата йе рʹаст бьстинә. 42 У йе кӧ һәма тʹасә ава сар дьдә йәк жь ван мьлука,* чьмки әԝ шагьрте мьн ә, әз рʹаст ԝәрʹа дьбежьм, әԝе хәлата хԝә тʹӧ щар ӧнда нәкә».

11 Паши ве йәке кӧ Иса тʹәми данә 12 шагьртед хԝә, әԝ жь ԝедәре чу бажаред дьн, ԝәки мәрьва һин кә у мьзгинийе бәла кә.

2 Гава Йуһʹәнна кәледа бу, дәрһәԛа кьред Мәсиһ бьһист у шагьртед хԝә шандә бал Иса, 3 ԝәки жь ԝи бьпьрсьн: «Гәло йе кӧ гәрәке бьһата тӧ йи, йан гәрәке әм һивийа кәсәки дьн бьн?» 4 Иса щаба ԝан да: «Һәрʹьн, чь кӧ һун дьбьһен у дьвиньн Йуһʹәннарʹа бежьн: 5 Йед кор ньһа дьвиньн, йед сәԛәт дьгәрʹьн, йед кʹоти ԛәнщ дьбьн,* йед кәрʹ дьбьһен, мьри рʹадьбьн у кʹәсибарʹа мьзгини те дайине. 6 Чьԛас бәхтәԝар ә әԝ кәс, йе кӧ мьнда накʹәвә шьке».

7 Гава шагьртед Йуһʹәнна чун, Иса дәстпекьр әʹлаләтерʹа дәрһәԛа Йуһʹәнна хәбәр дә: «Гава һун чун бәрʹийе, ԝә чь дьхԝәст бьдита? Ԝә дьхԝәст ԛамишәки кӧ жь ба дьһʹәжә, бьдита? 8 Йан ԝә дьхԝәст ԝедәре чь бьдита? Һун чун ԝәки мәрьвәки кʹьнщед бьһа ль хԝә кьри бьвиньн? Нә кәсед кӧ кʹьнщед бьһа ль хԝә дькьн, ԛәсьред пʹадшада дьжин? 9 Дә бежьн, һун чьма чун ԝедәре? Пʹехәмбәрәки бьвиньн? Бәле, әз ԝәрʹа дьбежьм, әԝ пʹехәмбәр ә, ле жь пʹехәмбәрәки зедәтьр ә жи. 10 Әва әԝ кәс ә, дәрһәԛа кʹижани ньвисар ә: ‹Әз ԛасьде хԝә пешийа тә дьшиньм. Әԝе пешийа тә рʹе һазьр кә›. 11 Әз рʹаст ԝәрʹа дьбежьм, жь нав һʹәму мәрьвед кӧ һатьнә буйине, кәсәки кӧ жь Йуһʹәннайе Ньхӧмдар* мәзьнтьр бә, тʹӧнә буйә. Ле Пʹадшатийа әʹзманада, йе һәри бьчʹук жь ԝи мәзьнтьр ә. 12 Жь рʹожед Йуһʹәннайе Ньхӧмдар һʹәта ньһа, мәрьв хирәт дькьн кӧ бькʹәвьнә Пʹадшатийа әʹзмана, у йед кӧ чьԛас дькарьн ԛәԝате хәрщ дькьн, дьгьһижьнә ве нете. 13 Чьмки һʹәму Пʹехәмбәра у Ԛануне, һʹәта Йуһʹәнна пʹехәмбәрти кьрьн. 14 У һун ве йәке ԛәбул кьн йан на, әԝ ә ‹Елйасе кӧ гәрәке бе›. 15 Гӧһед кʹе һәнә, бьра бьбьһе.

16 Әз ви ньсьли бәрамбәри кʹе бькьм? Әԝ мина ԝан зарʹа нә, йед кӧ базарада рʹуньшти нә, гази һәвалед хԝә дькьн, 17 у дьбежьн: ‹Мә бона ԝә бьлуре дьхьст, ле һун нәдьрʹәԛьсин. Мә шин дькьр, ле ԝә жь дәрд синге хԝә нәдьхьст›. 18 Мина ве йәке, Йуһʹәнна һат, нә дьхԝар у нә жи вәдьхԝар, ле хәлԛе сәр ԝи дьгот: ‹Щьн ԝида һәйә›. 19 Кӧрʹе инсен һат, дьхԝә у вәдьхԝә, ле хәлԛ дьбежә: ‹Һәла бьньһерʹьн! Әԝ йәки пәй хԝарьн у вәхԝарьне кʹәти йә, у һәвале хәрщгьр у гӧнәкʹара йә›. Ле билани пе кьред хԝәйи рʹаст избат дьбә».

20 Паши ве йәке, Иса дәстпекьр ван бажара сущдар кә, кʹижанада әԝи дьһа зәʹф кʹәрәмәт* кьрьбун, чьмки ԝана тʹобә нәкьр: 21 «Ԝәй ль тә Хоразин! Ԝәй ль тә Бәйтсайда! Һәрге кʹәрәмәтед кӧ нав ԝәда һатьнә кьрьне, Сур у Сайдайеда бьһатана кьрьне, әԝана ԝе зудава кʹӧрх у кʹозийеда тʹобә кьрана. 22 Ле әз ԝәрʹа дьбежьм, Рʹожа Диԝане һʹале Сур у Сайдайе ԝе дьһа һеса бә, нә кӧ һʹале ԝә. 23 У тӧ, Кәпәрнаһум, тә тʹьре те һʹәта әʹзман бьльнд би? На, тӧйе бькʹәви Горʹе!* Һәрге кʹәрәмәтед кӧ нав тәда һатьнә кьрьне, Содомеда бьһатана кьрьне, әԝе һʹәта рʹожа иро бьма. 24 Ле әз ԝәрʹа дьбежьм, Рʹожа Диԝане һʹале ԝәлате Содоме ԝе дьһа һеса бә, нә кӧ һʹале ԝә».

25 Һьнге Иса гот: «Баво, Хӧдане әʹрд у әʹзмана, әз ль бәр һʹәмуйа шькьрийе дьдьмә тә, чьмки тә әв тьшт жь билана у аԛьла вәшарт у зарʹед бьчʹукрʹа әʹйан кьр. 26 Әре Баво, чьмки әв йәк хԝәстьна дьле тә бу. 27 Һәр тьшт жь Баве мьн мьнрʹа һатийә дайине. У кәсәк Кӧрʹ рʹьнд нас накә, пештьри Баве, у кәсәк Баве рʹьнд нас накә, пештьри Кӧрʹ у ԝан кәса, кʹижанарʹа Кӧрʹ дьхԝазә рʹастийа дәрһәԛа Бав әшкәрә кә. 28 Ԝәрен щәм мьн һʹәмуйед ԝәстийайи у баргьран, у әзе рʹьһʹәтийе бьдьмә ԝә. 29 Нире мьн һьлдьнә сәр хԝә у жь мьн һин бьн, чьмки әз йәки шкәсти* у мьлук ьм,* у һуне хԝәрʹа рʹьһʹәтийе бьвиньн. 30 Чьмки нире мьн рʹьһʹәт ә у баре мьн сьвьк ә».

12 Щарәке рʹожа Шәмийе* Иса нава зәвийарʹа дәрбаз бу. Шагьртед ԝи бьрʹчи бун у дәстпекьрьн сьмбьлед гәньм бьчьньн у бьхԝьн. 2 Гава Ферьсийа әв йәк дит, ԝирʹа готьн: «Бьньһерʹә! Шагьртед тә ве йәке дькьн, чь кӧ ԛәдәхә йә рʹожа Шәмийе бькьн». 3 Әԝи ԝанрʹа гот: «Ԝә нәхԝәндийә Даԝьд чь кьр, чахе әԝ у йед тʹәви ԝи, бьрʹчи бун? 4 Нә әԝ кʹәтә мала Хԝәде у ԝана нане пироз* хԝар? Ле әԝ нан бона ԝи у йед тʹәви ԝи ԛәдәхә бу, чьмки әԝ тʹәне бона кʹаһина бу. 5 Йан жи ԝә Ԛанунеда нәхԝәндийә, кӧ рʹожед Шәмийе, кʹаһин пʹарьстгәһеда шьхӧл дькьн у диса жи бесущ дьминьн? 6 Ле әз ԝәрʹа дьбежьм, йәки жь пʹарьстгәһе мәзьнтьр, вьра йә. 7 Һәрге ԝә фәʹм кьра чь те һʹәсабе, ‹Әз рʹәʹме дьхԝазьм, нә кӧ ԛӧрбане›, ԝәйе кәсед бесущ сущдар нәкьра. 8 Чьмки Кӧрʹе инсен Хӧдане рʹожа Шәмийе йә».

9 Чахе Иса жь ԝедәре чу, кʹәтә кʹьништа* ԝан. 10 Ԝедәре мәрьвәк һәбу, дәстәки ԝи кʹьшийайи бу. Ԝана жь Иса пьрси: «Изьн ә кӧ рʹожа Шәмийе нәхԝәша ԛәнщ кьн?» Ԝана мәʹни дьгәрʹийа, ԝәки ԝи сущдар кьн. 11 Иса ԝанрʹа гот: «Һәрге пәзәкә ԝә һәбә у әв рʹожа Шәмийе бькʹәвә чʹәʹле, гәло кʹи жь ԝә ԝе нәчә у пәза хԝә дәрнәхә? 12 Ле мәрьв жь пез чьԛас ԛимәттьр ә! Ләма жи изьн һәйә, ԝәки рʹожа Шәмийе ԛәнщийе бькьн». 13 Паше Иса ԝи мәрьвирʹа гот: «Дәсте хԝә дьреж кә». Әԝи жи дәсте хԝә дьреж кьр, у дәсте ԝи ԛәнщ бу. 14 Ле Ферьси дәркʹәтьнә дәрва у ль һәв шеԝьрин, кӧ чаԝа ԝи бьдьнә кӧштьне. 15 Гава Иса дәрһәԛа ве йәке пеһʹәсийа, жь ԝедәре чу. Гәләк мәрьв жи пәй ԝи чун, у әԝи гьшк ԛәнщ кьрьн. 16 Ле әԝи сәрт тʹәми да ԝан, кӧ дәрһәԛа ԝи нәкьнә дәнги, 17 ԝәки әв готьна Ишайа пʹехәмбәр, бе сери:

18 «Ва йә хьзмәткʹаре мьн, кʹижан кӧ мьн бьжартийә, дәлале мьн, йе кӧ бь дьле мьн ә! Әзе рʹӧһʹе хԝә дайньм сәр ԝи, у әԝе мьләтарʹа әшкәрә кә, ԝәки һәԛи чь йә. 19 Әԝе нәкʹәвә дәʹԝе, нәкә ԛирʹин, у тʹӧ кәс ԝе дәнге ԝи ль кʹучʹед сәрәкә нәбьһе. 20 Әԝе ԛамише зийанкʹәти нәпʹәрчʹьԛинә, у фьтила* кӧ ду дькә нәтәмьринә, һʹәта кӧ һәԛийе бинә. 21 Бәле, һʹәму мьләт ԝе гӧмана хԝә бьдьнә сәр наве ԝи».

22 Һьнге щьнакʹәтики кор у лал анинә бал Иса. У Иса әԝ ԛәнщ кьр, ӧса кӧ әԝи һьм дит, һьм жи хәбәр да. 23 Тʹәмамийа әʹлаләте зәндәгьрти ма у гот: «Дьбәкә әв ә Кӧрʹе Даԝьд?» 24 Гава Ферьсийа әв йәк бьһист, готьн: «Әԝ тʹәне бь сайа сәрԝере щьна Бәлзәбул,* щьна дәрдьхә». 25 Ле Иса заньбу кӧ әԝана чь дьфькьрьн у ԝанрʹа гот: «Һәр пʹадшатийа кӧ нав хԝәда һатийә пʹарәвәкьрьн, ԝеран дьбә. У һәр бажар у малбәта кӧ нав хԝәда һатийә пʹарәвәкьрьн, ԝе нәминә. 26 Ви щурʹәйи, һәрге Шәйтʹан, Шәйтʹан дәрдьхә, ԝәки ӧса нә әԝ нав хԝәда һатийә пʹарәвәкьрьн. Ижа пʹадшатийа ԝи ԝе чаԝа бьминә? 27 Һәрге әз щьна бь сайа Бәлзәбул дәрдьхьм, ле шагьртед ԝә* бь сайа кʹе щьна дәрдьхьн? Ләма жи әԝе бьбьн һʹакьмед ԝә. 28 Ле һәрге әз щьна бь сайа рʹӧһʹе Хԝәде дәрдьхьм, ида Пʹадшатийа Хԝәде һатийә* у ԝә тедәрнәхьстийә. 29 Йан жи, гәло кәсәк дькарә бькʹәвә мала мерхасәки у һәбука ԝи тʹалан кә, һәрге пешийе ԝи мерхаси гьренәдә? Чахе гьредә, тʹәне һьнге ԝе бькарьбә мала ԝи тʹалан кә. 30 Кʹи кӧ алийе мьн нинә, мьԛабьли мьн ә. У кʹи кӧ тʹәви мьн тʹоп накә, һәв бәла дькә.*

31 Ләма жи әз ԝәрʹа дьбежьм, һәр щурʹә гӧнә у кʹьфьр ԝе мәрьварʹа бе бахшандьн, ле йе кӧ кʹьфьрийа рʹӧһʹе Хԝәде дькә, ль ԝи найе бахшандьне. 32 Мәсәлә, һәрге кәсәк тьштәки мьԛабьли Кӧрʹе инсен бежә, әԝе бе бахшандьне, ле һәрге кәсәк тьштәки мьԛабьли рʹӧһʹе пироз бежә, әԝе нәйе бахшандьне, нә ньһа, у нә жи ахьрийеда.

33 Һәрге дара ԝә баш бә, бәре ԝе жи ԝе баш бә, ле һәрге дара ԝә хьраб бә, бәре ԝе жи ԝе хьраб бә. Чьмки һәр дар бь бәре хԝә те наскьрьне. 34 Зӧрʹәта* мәʹред жәʹрдар! Һун чаԝа дькарьн тьштед ԛәнщ хәбәр дьн, һәрге һун хьраб ьн? Дьл бь чь тʹьжә йә, зьман әве жи дьбежә. 35 Мәрьве ԛәнщ тьштед ԛәнщ дьбежә, чьмки дьле ԝи бь тьштед ԛәнщ тʹьжә йә. Ле мәрьве хьраб тьштед хьраб дьбежә, чьмки дьле ԝи бь тьштед хьраб тʹьжә йә. 36 Әз ԝәрʹа дьбежьм: Рʹожа Диԝане, мәрьв ԝе бона һәр готьнәкә хԝәйә бекер, һʹәсаб бьдә. 37 Чьмки һуне бь хәбәред хԝә рʹаст бенә һʹәсабе у бь хәбәред хԝә бенә сущдаркьрьне».

38 Һьнге һьнә ԛанунзан у Ферьсийа Исарʹа готьн: «Дәрсдар, әм дьхԝазьн нишанәке жь тә бьвиньн». 39 Иса щаба ԝан да: «Ньсьләки хьраб у нәамьн һәртʹьм нишанәке дьхԝазә, ле хенщи нишана Уньс пʹехәмбәр, жерʹа тʹӧ нишан ԝе нәйе дайине. 40 Чаԝа кӧ Уньс се рʹож у се шәва зьке мәʹсики мәзьнда ма, Кӧрʹе инсен жи ԝе се рʹож у се шәва дьле әʹрдеда бьминә. 41 Мәрьвед Нинәԝайе ԝе Рʹожа Диԝане тʹәви ви ньсьли рʹабьн у ԝана сущдар кьн, чьмки ԝана гӧһ да хәбәра Уньс у тʹобә кьрьн. Ле ва йә, йәки жь Уньс мәзьнтьр вьра йә. 42 Рʹожа Диԝане, пʹадшайа* башуре ԝе тʹәви ви ньсьли рʹабә у ви сущдар кә. Чьмки әԝ жь сәре дьне һат, ԝәки гӧһ бьдә сәрԝахтийа Сьлеман. Ле ва йә, йәки жь Сьлеман мәзьнтьр вьра йә.

43 Гава щьнәк* жь мәрьвәки дәрдькʹәвә, әԝ щийед беавда дьгәрʹә ԝәки щики рʹьһʹәт бьвинә, ле щики ӧса навинә. 44 Һьнге әԝ хԝәрʹа дьбежә: ‹Кʹа әз вәгәрʹьм мала хԝә, йа кӧ әз же дәркʹәтьмә›. Гава әԝ те, дьвинә кӧ мал вала йә, һәвдайи у хәмьланди йә. 45 Паше әԝ дьчә у һʹәфт щьнед дьнә* жь хԝә хьрабтьр тʹәви хԝә тинә, әԝана дькʹәвьн һьндӧрʹ у ԝедәре дьжин. Ида һʹале ԝи мәрьви жь һʹале ԝийи бәре хьрабтьр дьбә. Һʹале ви ньсьле хьраб жи ԝе һәма ӧса бә».

46 Иса һе хәлԛерʹа хәбәр дьда, дийа ԝи у бьред ԝи дәрва сәкьни бун, у ԝана дьхԝәст тʹәви ԝи хәбәр дьн. 47 Кәсәки ԝирʹа гот: «Дийа тә у бьред тә дәрва сәкьни нә, дьхԝазьн тʹәви тә хәбәр дьн». 48 Иса щаба ԝи да: «Кʹи йә дийа мьн, у кʹи нә бьред мьн?» 49 Һьнге Иса дәсте хԝә дьрежи шагьртед хԝә кьр у гот: «Дийа мьн у бьред мьн әԝ ьн! 50 Чьмки кʹи кӧ хԝәстьна Баве мьни әʹзмана тинә сери, әԝ ә бьре мьн, хушка мьн у дийа мьн».

13 Ԝе рʹоже, Иса жь мале дәркʹәт у чу бәр бәʹре рʹуньшт. 2 Ль дора ԝи һаԛас мәрьв тʹоп бун, кӧ әԝ кʹәтә ԛәйике у теда рʹуньшт, ле әв һʹәму мәрьв бәр дәве бәʹре сәкьни бун. 3 Иса дәстпекьр бь мәсәла гәләк тьшт ԝана һин кә: «Щоткʹарәк дәркʹәт кӧ тʹохьм бьчинә. 4 Гава әԝи тʹохьм дьрʹәшанд, һьнә тʹохьм кʹәтьнә сәр рʹе, чʹьвик һатьн у хԝарьн. 5 Һьнә тʹохьм кʹәтьнә сәр әʹрде кәвьри, кʹидәре кӧ хԝәли кем бу. У тʹохьм зу шин бун, чьмки хԝәли кʹур нибу. 6 Ле гава тәʹв дәркʹәт, әԝ чʹил чʹьлмьсин у һʹьшк бун, чьмки кʹокед ԝан тʹӧнә бун. 7 Һьнә тʹохьм жи кʹәтьнә нава стьрийа, стьри дәркʹәтьн у нәһиштьн әԝ мәзьн бьн. 8 Ле һьнә тʹохьм кʹәтьнә сәр әʹрде баш у дәстпекьрьн бәр бьдьн, йәки 100 щара зедәтьр, йе дьн 60 у йе майин жи 30 щара. 9 Гӧһед кʹе һәнә, бьра бьбьһе».

10 Шагьртед Иса һатьн бал ԝи у же пьрсин: «Тӧ чьрʹа бь мәсәла ԝанрʹа хәбәр дьди?» 11 Әԝи ԝанрʹа гот: «Ԝәрʹа һатийә дайине ԝәки һун сӧрʹед пироз йед Пʹадшатийа әʹзмана фәʹм бькьн, ле ԝанрʹа нәһатийә дайине. 12 Чьмки бал кʹе һәйә, әԝе һе зедә бьстинә, у жь ԝи ԝе кем нәбә. Ле бал кʹе тʹӧнә йә, тьште кӧ бал ԝи һәйә жи ԝе жь ԝи бе стандьне. 13 Әз бона ԝе йәке бь мәсәла тʹәви ԝан хәбәр дьдьм, чьмки әԝана дьньһерʹьн, ле навиньн, әԝана дьбьһен, ле гӧһе хԝә надьнә сәр у мәʹна готьна жи фәʹм накьн. 14 Сәр ԝана пʹехәмбәртийа Ишайа те сери, кӧ дьбежә: ‹Һун бьбьһен жи, ле һуне тʹӧ щар фәʹм нәкьн. Һун бьньһерʹьн жи, ле һуне тʹӧ щар нәвиньн. 15 Чьмки дьле ви мьләти һʹьшк буйә, ԝана бь гӧһе хԝә бьһист, ле һәрәкʹәт нәкьр, у ԝана чʹәʹвед хԝә гьртьнә, ԝәки тʹӧ щар нәвиньн, у бь гӧһед хԝә нәбьһен у бь дьле хԝә фәʹм нәкьн у вәнәгәрʹьн бал мьн, кӧ әз ԝана ԛәнщ кьм›.

16 Ле һун бәхтәԝар ьн, чьмки чʹәʹвед ԝә дьвиньн у гӧһед ԝә дьбьһен. 17 Әз рʹаст ԝәрʹа дьбежьм, гәләк пʹехәмбәр у мәрьвед рʹаст һʹьзрәта дитьна ван тьшта бун чь кӧ һун дьвиньн, ле нәдитьн, у һʹьзрәта бьһистьна ван тьшта бун чь кӧ һун дьбьһен, ле нәбьһистьн.

18 Ньһа гӧһ бьдьн шьровәкьрьна мәсәла щоткʹар. 19 Мәʹна тʹохьмед кӧ кʹәтьнә сәр рʹе, әв ә: Гава кәсәк хәбәра дәрһәԛа Пʹадшатийе дьбьһе, ле мәʹна ԝе фәʹм накә, Мире-щьна* те у тьштед кӧ дьле ԝида һатьнә чандьне, дәрдьхә. 20 Мәʹна тʹохьмед кӧ кʹәтьнә сәр әʹрде кәвьри, әв ә: Кәсәк ве хәбәре дьбьһе у дәрберʹа бь шабун ԛәбул дькә, 21 ле чьмки дьле ԝида кʹок тʹӧнә, әв хәбәр тʹәне дәмәке дьминә. У чахе әԝ жь бо ве хәбәре рʹасти тәнгасийа у зерандьне те, әԝ дәрберʹа баԝәрийа хԝә ӧнда дькә. 22 Мәʹна тʹохьмед кӧ кʹәтьнә нав стьрийа, әв ә: Кәсәк ве хәбәре дьбьһе, ле хәмед ве дьнйайе у дәԝләмәндтийа хапинок әве хәбәре дьфәтьсиньн, у әԝ бе бәр дьминә. 23 У мәʹна тʹохьмед кӧ сәр әʹрде баш һатьнә чандьне, әв ә: Кәсәк ве хәбәре дьбьһе, мәʹна ԝе фәʹм дькә у бәр дьдә, йәк 100 щара зедәтьр, йе дьн 60 у йе майин жи 30 щара».

24 Иса бәʹса мәсәләкә дьн жи кьр у гот: «Пʹадшатийа әʹзмана мина ви мәрьви йә, йе кӧ тʹохьме баш әʹрде хԝәда чанд. 25 Ле гава гьшк рʹазайи бун, дьжмьне ԝи һат нав гәньмда зиԝан чанд у чу. 26 Гава гәньм гьһишт у бәр да, зиԝан жи хӧйа бун. 27 Хӧламед хԝәйе әʹрде һатьнә бал ԝи у ԝирʹа готьн: ‹Ахайе мә, нә тә әʹрде хԝәда тʹохьмед баш чандьбу? Ле әв зиԝан жь кʹӧ һатьн?› 28 Әԝи ԝанрʹа гот: ‹Дьжмьнәки әв йәк кьр›. Хӧлама жь ԝи пьрси: ‹Дьхԝази әм һәрʹьн ԝана рʹакьн?› 29 Әԝи гот: ‹На, чьмки гава һун зиԝане рʹакьн, дьбәкә һун гәньм жи перʹа рʹакьн. 30 Бьһельн, бьра һәр дӧ һʹәта дәма дьруне һәврʹа бьгьһижьн. Ԝи чахи әзе хәбаткʹарарʹа бежьм: Пешийе зиԝане рʹакьн у бона шәԝьтандьне гӧрʹз-гӧрʹз гьредьн. Паше гәньм тʹоп кьн у бькьнә әʹмбара мьн›».

31 Иса бәʹса мәсәләкә дьн жи кьр у гот: «Пʹадшатийа әʹзмана мина тʹохьме хәрдале йә, йе кӧ мәрьвәки әʹрде хԝәда чандьбу. 32 Рʹаст ә әԝ нав һʹәму тʹохьмада йе һәри бьчʹук ә, ле гава әԝ мәзьн дьбә, әԝ жь шинкайед бахчә мәзьнтьр дьбә. Әԝ дьбә дарәкә ӧса, кӧ чʹьвикед әʹзмана сәр чʹьԛьлед ԝе һелунед хԝә чедькьн».

33 Әԝи мәсәләкә дьн жи ԝанрʹа гот: «Пʹадшатийа әʹзмана мина һәвиртьрʹшк ә, кӧ кʹӧлфәтәке һьлда у кьрә нава се чап* ар, һәвир стьра, һʹәта кӧ тʹәмамийа һәвир һьлат».

34 Иса әв һʹәму тьшт бь мәсәла әʹлаләтерʹа гот. Әԝи бе мәсәлә тʹӧ тьшт ԝанарʹа нәдьгот, 35 сәва әв готьнед пʹехәмбәр бенә сери: «Әзе бь мәсәла ԝанрʹа хәбәр дьм. Әзе әшкәрә кьм ԝан тьшта, чь кӧ жь бәреда* вәшарти бун».

36 Паше Иса әʹлаләт шанд у чу кʹәтә мале. Шагьртед ԝи һатьн бал ԝи у ԝирʹа готьн: «Мәʹна мәсәла зиԝанед зәвийеда мәрʹа шьровәкә». 37 Иса щаб да: «Йе кӧ тʹохьме баш чанд Кӧрʹе инсен ә, 38 зәви дьнйа йә, тʹохьме баш кӧрʹед Пʹадшатийе нә, ле зиԝан кӧрʹед Мире-щьна* нә. 39 У дьжмьне кӧ әԝ чандьн Мире-щьна йә. Дьрун рʹожед хьлазийа* ве дьнйайе нә, ле хәбаткʹар жи мәләк ьн. 40 У чаԝа кӧ зиԝан те тʹопкьрьне у нава агьрда те шәԝьтандьне, рʹожед хьлазийа ве дьнйайе жи ԝе ӧса бьн. 41 Кӧрʹе инсен ԝе мәләкед хԝә бьшинә у әԝана ԝе жь Пʹадшатийа ԝи һʹәмуйед кӧ мәрийа жь рʹе дәрдьхьн у хьрабийе дькьн, тʹоп кьн. 42 У әԝе ԝана бавежьнә нава агьрәки мәзьн. Ԝедәре әԝана ԝе бьгьрин* у чʹьркә-чʹьрка дьранед ԝан бьн. 43 Һьнге йед рʹаст ԝе Пʹадшатийа Баве хԝәда мина тәʹве шәԝԛ бьдьн. Гӧһед кʹе һәнә, бьра бьбьһе.

44 Пʹадшатийа әʹзмана мина хьзнәкә әʹрдеда вәшарти йә, кʹижан кӧ мәрьвәк дьвинә у диса вәдьшерә. Паше әԝ бь шабун дьчә, һʹәму мал-мьлкʹе хԝә дьфьрошә у ԝи әʹрди дькʹьрʹә.

45 Диса Пʹадшатийа әʹзмана мина базьрганәки йә, йе кӧ кәвьред ԛимәт* дьгәрʹә. 46 Чахе әԝи кәвьрәки ԛимәт дит, бь ләз чу, һʹәму мал-мьлкʹе хԝә фьрот у әԝ кәвьр кʹьрʹи.

47 Диса Пʹадшатийа әʹзмана мина тʹорʹәке йә, йа кӧ һатийә авитьне нава бәʹре у щурʹә-щурʹә мәʹси дькʹәвьне. 48 Гава тʹорʹ тʹьжә дьбә, мәʹсигьр дькʹьшиньн бәр дәве бәʹре, рʹудьнед у мәʹсийед баш дькьнә дәрдана, ле йед нәбаш давежьн. 49 Рʹожед хьлазийа ве дьнйайеда жи ԝе ӧса бә. Мәләк ԝе бен у ԝе мәрьвед хьраб жь мәрьвед рʹаст вәԛәтиньн. 50 У йед хьраб ԝе бенә авитьне нава агьрәки мәзьн. Ԝедәре әԝана ԝе бьгьрин у чʹьркә-чʹьрка дьранед ԝан бьн.

51 Иса жь шагьртед хԝә пьрси: «Гәло ԝә нета ван һʹәму тьшта фәʹм кьр?» Ԝана гот: «Әре». 52 Паше әԝи ԝанрʹа гот: «Дә бьзаньбьн, ԝәки һәр дәрсдарәк, йе кӧ дәрһәԛа Пʹадшатийа әʹзмана һин буйә, мина мәрьвәки хԝәйимьлкʹ ә, йе кӧ жь хьзна хԝә тьштед тʹәзә у кәвьн дәрдьхә».

53 Чахе Иса әв мәсәлә хьлаз кьрьн, жь ԝедәре чу. 54 Әԝ гьһиштә һәрема хԝә* у дәстпекьр кʹьништа* ԝанда һин кә. Хәлԛ әʹщебмайи дьма у дьгот: «Гәло сәрԝахти у ԛәԝата кӧ ван кʹәрәмәта* бькә, әԝи жь кʹӧ стандийә? 55 Нә әв кӧрʹе нәщар ә? Нә наве дийа ԝи Мәрйәм ә, у Аԛуб, Усьв, Шьмһʹун у Щьһуда бьред ԝи нә? 56 Нә һʹәму хушкед ԝи нав мәда дьжин? Ижа, әв һʹәму тьшт ԝирʹа кʹӧ һат?» 57 Ләма ԝана нәхԝәст ԝи баԝәр кьн.* Ле Иса ԝанарʹа гот: «Пʹехәмбәр һʹәму щийа хԝәйиԛәдьр ә, хенщи бажаре хԝә у мала хԝәда». 58 Әԝи ԝедәре гәләк кʹәрәмәт нәкьрьн, чьмки баԝәрийа ԝан тʹӧнә бу.

14 Һьнге сәрԝере* һәреме Һеродәс,* дәрһәԛа Иса бьһист 2 у хӧламед хԝәрʹа гот: «Әв кәс Йуһʹәннайе Ньхӧмдар ә.* Әԝ жь мьрьне һатийә рʹакьрьне у ләма жи дькарә кʹәрәмәта* бькә». 3 Пешийа ве йәке, Һеродәс* рʹуйе Һеродийайеда, демәк рʹуйе жьна бьре хԝә Филипода, Йуһʹәнна гьредабу у авитьбу кәле. 4 Чьмки Йуһʹәнна ԝирʹа дьгот: «Ль гора ԛануне тӧ нькари Һеродийайе бьстини». 5 Һеродәс дьхԝәст ԝи бькӧжә, ле жь щьмәʹте дьтьрсийа, чьмки ԝана Йуһʹәнна мина пʹехәмбәр ԛәбул дькьр. 6 Ле рʹожа буйина Һеродәс, ԛиза Һеродийайе бәр мевана рʹәԛьси. Әв йәк дьле Һеродәс гәләк хԝәш һат, 7 у әԝи сонд хԝар кӧ һәр хԝәстьнәкә кәчʹьке бинә сери. 8 Кәчʹьк алийе дийа хԝәда һатьбу ширәткьрьне у Һеродәсрʹа ӧса гот: «Сәре Йуһʹәннайе Ньхӧмдар сәр сьнийе бьдә мьн». 9 Пʹадша хәмгин бу, ле фәрман да ԝәки хԝәстьна ԝе биньн сери, чьмки бәр меванед кӧ тʹәви ԝи бәр сьфре рʹуньштьбун, сонд хԝарьбу. 10 Ләма жи әԝи мәрьв шанд у кәледа сәре Йуһʹәнна да жекьрьне. 11 Сәре ԝи сәр сьнийе анин, данә кәчʹьке. Әԝе жи дийа хԝәрʹа бьр. 12 Һьнге шагьртед Йуһʹәнна һатьн, щьнийазе ԝи бьрьн у чʹәʹл кьрьн. Паше әԝ чун бал Иса у һәр тьшт ԝирʹа гьли кьрьн. 13 Гава Иса әв йәк бьһист, бь ԛәйике чу щики ӧса, кʹидәре тʹӧ кәс тʹӧнә бу, ԝәки тʹәне бьминә. Ле хәлԛ жь щурʹә-щурʹә бажара дәрһәԛа ве йәке пеһʹәсийан у ньга чун кӧ бьгьһижьнә ԝи.

14 Чахе Иса жь ԛәйике дәркʹәт, әʹлаләтәкә мәзьн дит, дьле ԝи сәр ԝан шәԝьти, у мәрьвед ԝани нәхԝәш ԛәнщ кьрьн. 15 Гава бу евар, шагьртед ԝи һатьнә бал ԝи у готьн: «Вьра щики хьки-хԝәли йә, у ида дәрәнг ә. Щьмәʹте бьшинә, бьра һәрʹьн гӧнда у хԝәрʹа хԝарьне бькʹьрʹьн». 16 Ле Иса ԝанрʹа гот: «Нәлазьм ә кӧ әԝана һәрʹьн. Һун хԝарьне бьдьнә ԝан». 17 Ԝана ԝирʹа гот: «Хенщи пенщ нана у дӧ мәʹсийа, бал мә тьштәк тʹӧнә». 18 Иса гот: «Ԝан нан у мәʹсийа биньн щәм мьн». 19 Әԝи мәрьварʹа гот ԝәки сәр чʹере рʹунен. Паше әԝи әв пенщ нан у дӧ мәʹси һьлдан, ль әʹзман ньһерʹи у дӧа кьр.* Паши ве йәке, әԝи нан кәр кьрьн* у да шагьртед хԝә, ԝана жи мәрьварʹа бәла кьр. 20 Һʹәмуйа хԝар у тʹер бун. Чахе ԝана нанед бәрмайи тʹоп кьр, 12 сәвәт* тʹьжә бун. 21 Йед кӧ хԝарьн, хенщи жьн у зарʹа, ԝәкә 5 000 мер бун. 22 Паши ве йәке, дәрберʹа Иса шагьртед хԝәрʹа гот, ԝәки әԝана бькʹәвьнә ԛәйике у пешийа ԝи һәрʹьн алийе бәʹрейи дьн, ле хԝәха ԝедәре ма, ԝәки хәлԛе вәрʹекә.

23 Гава Иса хәлԛ вәрʹекьрьн, әԝ тʹәне һьлкʹьшийа сәр чʹийе, ԝәки дӧа бькә. Чахе бу евар, әԝ ԝедәре тʹәне бу. 24 Ле ԛәйик ида бь сәда метра* жь дәве бәʹре дур кʹәтьбу у вьрда-ԝеда пʹела дькʹәт, чьмки ба мьԛабьли ԛәйике бу. 25 Незики сәре сьбәһе,* Иса сәр аверʹа мәшийа чу бал шагьртед хԝә. 26 Гава ԝана дит кӧ Иса сәр аверʹа дьмәшә, тьрс кʹәтә дьле ԝан, у готьн: «Әв хәйал ә!» У жь тьрса кьрьнә ԛирʹин. 27 Ле ԝе дәме Иса ԝанрʹа гот: «Ԛәԝи бьн! Әз ьм, нәтьрсьн!» 28 Пәтрус ԝирʹа гот: «Хӧдан, һәрге тӧ йи, тʹәмийе бьдә ԝәки әз сәр аверʹа бемә щәм тә». 29 Иса готе: «Ԝәрә!» Пәтрус жь ԛәйике пәйа бу, сәр аверʹа чу кӧ һәрʹә щәм Иса. 30 Ле гава чʹәʹве ԝи чу сәр фьртоне, тьрс кʹәтә дьле ԝи. У чахе әԝ ида дькʹәтә бьн аве, кьрә ԛирʹин: «Хӧдан, мьн хьлаз кә!» 31 Иса дәрберʹа дәсте хԝә дьрежи ԝи кьр, әԝ гьрт у жерʹа гот: «Кембаԝәро! Тӧ чьрʹа дӧдьли буйи?» 32 Гава әԝана кʹәтьнә ԛәйике, фьртонә сәкьни. 33 Һьнге әԝед кӧ ԛәйикеда бун, бәр ԝи кʹәтьнә сәр чока у готьн: «Рʹасти жи тӧ Кӧрʹе Хԝәде йи». 34 Чахе әԝана дәрбази алийе бәʹрейи дьн бун, гьһиштьнә әʹрде Щенисарте.

35 Мәрьвед ԝедәре Иса нас кьрьн, дәрһәԛа ԝи әʹлами һʹәму һәремед дәр-дор кьрьн, у хәлԛе һʹәму кәсед нәхԝәш анинә бал Иса. 36 Ԝана жь ԝи лава кьр кӧ һәма тʹәне дәсте хԝә бьдьнә рʹишийед кʹьнще ԝи, у һәр кәсе кӧ дәсте хԝә дьдайе, бь тʹәмами ԛәнщ дьбу.

15 Һьнге жь Оршәлиме, Ферьси у ԛанунзан һатьнә бал Иса, у жь ԝи пьрсин: 2 «Чьма шагьртед тә әʹдәтед кал-бава әʹрде дьхьн? Мәсәлә, әԝана пешийа нанхԝарьне дәстед хԝә нашон».*

3 Иса щаба ԝан да: «Ле һун чьма бона хатьре әʹдәтед хԝә тʹәмийа Хԝәде әʹрде дьхьн? 4 Мәсәлә, Хԝәде готийә: ‹Ԛәдьре де у баве хԝә бьгьрә›, у ‹Әԝе кӧ ньфьрʹа де йан баве хԝә бькә, гәрәке бе кӧштьне›. 5 Ле һун дьбежьн, ‹Кʹи кӧ де йан баве хԝәрʹа дьбежә: «Һәр тьшт, бь чь жи мьн дькарьбу аликʹари бьда тә, мьн соз дайә ԝәки Хԝәдерʹа ԛӧрбан кьм», 6 әԝ ида борщдар нинә ԛәдьре баве хԝә бьгьрә›. Бь ви аԝайи, ԝә хәбәра Хԝәде бона хатьре әʹдәтед хԝә пʹучʹ у бәтал кьрийә. 7 Дӧрʹуно, Ишайа пʹехәмбәр дәрһәԛа ԝә чьԛас рʹаст гот: 8 ‹Әв щьмәʹт бь заре хԝә рʹумәте дьдә мьн, ле дьле ԝан жь мьн дур ә. 9 Әԝана бадиһәԝа мьн дьһʹәбиньн, чьмки һинкьрьнед ԝан сәр һʹиме тʹәмийед мәрьва нә›». 10 Һьнге Иса гази хәлԛе кьр у ԝанрʹа гот: «Рʹьнд гӧһ бьдьн у фәʹм бькьн. 11 Нә кӧ тьште дькʹәвә дәве мерьв, ԝи дьһʹәрʹьминә, ле тьште кӧ жь дәве мерьв дәрдькʹәвә, әԝ ԝи дьһʹәрʹьминә».

12 Паше шагьртед Иса һатьнә бал ԝи у ԝирʹа готьн: «Тӧ зани ԝәки Ферьси жь бо готьнед тә әʹщьз бун?» 13 Иса щаба ԝан да: «Һәр дара кӧ Баве мьни әʹзмана данәчʹькандийә, ԝе кʹокева бе рʹакьрьне. 14 Жь ԝан вәгәрʹьн. Әԝана рʹебәред кор ьн. Һәрге йе кор рʹебәрийе йәки кор бькә, һәр дӧ жи ԝе бькʹәвьнә чʹәʹле». 15 Пәтрус ԝирʹа гот: «Ве мәсәле мәрʹа шьровәкә». 16 Иса ԝанрʹа гот: «Һун жи һәла һе фәʹм накьн? 17 Чьма һун ньзаньн, һәр тьште кӧ дькʹәвә дев, зькрʹа дәрбаз дьбә у паше дәрте дәр? 18 Ле тьштед кӧ жь дев дәртен, жь дьл тен, у һәма әв тьшт мерьв дьһʹәрʹьминьн. 19 Мәсәлә, фькьред хьраб, кӧштьн, ԛави, зьнекʹари,* дьзти, шәʹдәтийа дәрәԝ у кʹьфьр жь дьл дәрдькʹәвьн. 20 Әв һʹәму тьшт мерьв дьһʹәрʹьминьн, ле хԝарьна бь дәстед нәшушти* мәрьва наһʹәрʹьминә».

21 Иса жь ԝедәре чу һәрема Сур у Сайдайе. 22 Жьнәкә жь Финикйайе, йа кӧ ԝедәре дьжит, һат у кьрә гази: «Хӧдан, Кӧрʹе Даԝьд, гӧне хԝә мьн бинә.* Ԛиза мьн щьна кʹәтийә, гәләк дьчәрчьрә». 23 Ле Иса ԛә щаба ԝе нәда. Һьнге шагьртед ԝи һатьнә бал ԝи у готьн: «Ле бьшинә, бьра һәрʹә, чьмки әԝ пәй мә те у дькә ԛарʹә-ԛарʹ». 24 Иса щаб да: «Әз тʹәне бона пәзед Исраелейә ӧндабуйи һатьмә шандьне». 25 Ле әв жьньк һат, бәр Иса кʹәтә сәр чока у гот: «Хӧдан, али мьн бькә!» 26 Иса щаба ԝе да: «Нәрʹаст ә нане бәр зарʹа һьлдьн у бавежьнә бәр тʹула». 27 Әԝе жи гот: «Бәле, Хӧдан, ле тʹулә жи һурькед кӧ жь сьфра хԝәйед ԝан дькʹәвьн әʹрде, дьхԝьн». 28 Һьнге Иса жьнькерʹа гот: «Баԝәрийа тә чьԛас мәзьн ә! Бьра анәгори хԝәстьна тә тәрʹа бә». Һәма ԝе дәме ԛиза ԝе ԛәнщ бу.

29 Иса жь ԝедәре чу у незики Бәʹра Щәлиле бу. Әԝ һьлкʹьшийа сәр чʹийе у ԝедәре рʹуньшт. 30 Гәләк мәрьв һатьнә бал ԝи. Нав ԝанда кәсед тʹопал, сәԛәт, кор, лал у гәләк нәхԝәшед дьн жи һәбун. Ԝана әԝ анин, данә бәр пʹийед Иса у әԝи һʹәму ԛәнщ кьрьн. 31 Гава мәрьва дитьн ԝәки йед лал хәбәр дьдьн, сәԛәт ԛәнщ дьбьн, тʹопал рʹе дьчьн у кор дьвиньн, гәләк әʹщебмайи ман у пәсьне Хԝәдайе Исраеле дан.

32 Иса гази шагьртед хԝә кьр у гот: «Гӧне мьн ве әʹлаләте те. Ида се рʹож ә әԝана тʹәви мьн ьн у хԝарьна ԝан нәмайә. Әз нахԝазьм ԝана бьрʹчи бьшиньм, чьмки әԝана рʹеда дькарьн ԛьдум кʹәвьн». 33 Ле шагьрта ԝирʹа гот: «Ви щийе хәԝлә, әм жь кʹӧ дькарьн һаԛас нан биньн, ԝәки ван һʹәму мәрьва тʹер кьн?» 34 Иса жь ԝан пьрси: «Чәнд нанед ԝә һәнә?» Ԝана гот: «Һʹәфт нан у чәнд мәʹсийед бьчʹук». 35 Иса мәрьварʹа гот ԝәки әԝана сәр әʹрде рʹунен. 36 Әԝи әв һʹәфт нан у чәнд мәʹси һьлдан, шькьри да Хԝәде, у паше нан кәр кьрьн,* данә шагьртед хԝә, у ԝана жи мәрьварʹа бәла кьр. 37 Һʹәмуйа хԝар у тʹер бун. У чахе ԝана нанед бәрмайи тʹоп кьр, һʹәфт сәвәтед* мәзьн тʹьжә бун. 38 Әԝед кӧ хԝарьн, хенщи жьн у зарʹа, 4 000 мер бун. 39 Паше, чахе Иса мәрьв вәрʹекьрьн, кʹәтә ԛәйике у чу һәрема Мәгәдане.

16 Мәгәданеда, Ферьси у Садуԛи һатьн бал Иса, ԝәки ԝи бьщерʹьбиньн, у же хԝәстьн кӧ нишанәке жь әʹзмана нишани ԝан кә. 2 Иса щаба ԝан да: «Гава рʹож дьчә ава, һун дьбежьн, ‹Ԝе һәԝа хԝәш бә, чьмки әʹзман сор ә›. 3 Сәре сьбәһе жи һун дьбежьн, ‹Иро ԝе һәԝа хьраб бә у баране бьбарә, чьмки әʹзман сор ә, ле әʹԝрайи йә›. Һун ль әʹзмен дьньһерʹьн у тедәрдьхьн һәԝа ԝе чаԝа бә, ле мәʹна нишанед кӧ ньһа дьԛәԝьмьн һун тедәрнахьн. 4 Ньсьләки хьраб у нәамьн һәртʹьм нишанәке дьхԝазә, ле хенщи нишана Уньс пʹехәмбәр, жерʹа тʹӧ нишан ԝе нәйе дайине». Паши ве йәке, Иса әԝ һиштьн у чу.

5 Шагьртед ԝи дәрбази алийе бәʹрейи дьн бун, ле бир кьрьн нан хԝәрʹа һьлдьн. 6 Иса ԝанрʹа гот: «Һаж хԝә һәбьн у хԝә жь һәвиртьрʹшке Ферьси у Садуԛийа хԝәй кьн». 7 Әԝана нав хԝәда фькьрин у готьн: «Дьбәкә мә нан хԝәрʹа һьлнәдайә, ләма әԝ ӧса дьбежә». 8 Иса заньбу әԝ чь дьбежьн у жь ԝан пьрси: «Кембаԝәрно, һун чьма нав һәвда хәбәр дьдьн, кӧ нане ԝә тʹӧнә? 9 Һун һе фәʹм накьн? Найе бира ԝә кӧ чаԝа бь пенщ нана 5 000 мер тʹер бун, у ԝә чьԛас сәвәт* бәрмайи тʹьжә кьрьн? 10 Йан найе бира ԝә, кӧ чаԝа пе һʹәфт нана 4 000 мер тʹер бун у ԝә чәнд сәвәтед мәзьн жи тʹьжә кьрьн? 11 Һун ча фәʹм накьн, ԝәки мьн бона нан ԝәрʹа нәгот? Ле әз дьхԝазьм, ԝәки һун хԝә жь һәвиртьрʹшке Ферьси у Садуԛийа хԝәй кьн». 12 Һьнге ԝана фәʹм кьр, кӧ Иса нәдьхԝәст бьгота ԝәки хԝә жь һәвиртьрʹшке нан дур бьгьрьн, ле әԝи гот кӧ хԝә жь һинкьрьнед Ферьси у Садуԛийа дур бьгьрьн.

13 Гава Иса гьһиштә һәрема Ԛәйсәрйа Филипойе, әԝи жь шагьртед хԝә пьрси: «Хәлԛ чь дьбежә? Кӧрʹе инсен кʹи йә?» 14 Ԝана щаба ԝи да: «Һьнәк дьбежьн Йуһʹәннайе Ньхӧмдар,* һьнәкед дьн дьбежьн Елйас, ле һьнәкед майин жи дьбежьн Йерәмйа йан жи йәк жь пʹехәмбәра». 15 Иса жь ԝан пьрси: «Ле һун чь дьфькьрьн, әз кʹи мә?» 16 Шьмһʹун Пәтрус щаба ԝи да: «Тӧ Мәсиһ и, Кӧрʹе Хԝәдайе сах». 17 Иса ԝирʹа гот: «Тӧ чьԛас бәхтәԝар и, Шьмһʹуне кӧрʹе Уньс, чьмки әв йәк нә кӧ мәрьва, ле Баве мьни әʹзмана тәрʹа әʹйан кьр. 18 У әз тәрʹа дьбежьм: Тӧ Пәтрус и,* у әзе щьвата хԝә сәр ви зьнари ава кьм, у дәргәһед Горʹе* ԝе нькарьбьн ле* бьндәст кьн. 19 Әзе кʹьлитед Пʹадшатийа әʹзмана бьдьмә тә. Һәр тьште кӧ тӧ сәр рʹуйе әʹрде гьреди, әԝ ида ль әʹзмана ԝе гьредайи бә. У һәр тьште кӧ тӧ сәр рʹуйе әʹрде вәки, әԝ ида ль әʹзмана ԝе вәкьри бә». 20 Паше әԝи тʹәми да шагьртед хԝә, ԝәки әԝана тʹӧ кәсирʹа нәбежьн кӧ әԝ Мәсиһ ә.

21 Жь ԝи чахи, Иса дәстпекьр шагьртед хԝәрʹа шьровәкә, кӧ әԝ гәрәке һәрʹә Оршәлиме у жь дәсте рʹуспийа, сәрокед кʹаһина у ԛанунзана гәләк щәфа бькʹьшинә, бе кӧштьне у рʹожа сьсийа жь мьрьне бе рʹакьрьне. 22 Һьнге Пәтрус әԝ бьрә алики, ле һьлат у гот: «Һьндава хԝәда ԛәнщ бә, Хӧдан! Әв һʹәму тьшт ԝе нәйе сәре тә». 23 Ле Иса пьшта хԝә да Пәтрус у ԝирʹа гот: «Жь мьн дур кʹәвә, Шәйтʹан! Тӧ бона мьн кәвьре лькʹӧмандьне йи, чьмки тӧ нә кӧ мина Хԝәде дьфькьри, ле мина мәрьва».

24 Паше Иса шагьртед хԝәрʹа гот: «Һәрге кәсәк дьхԝазә пәй мьн бе, әԝ ида гәрәке бона хԝә нәжи. Әԝ гәрәке стуна хԝәйә щәфе һьлгьрә у пәй мьн бе. 25 Чьмки йе кӧ дьхԝазә әʹмьре хԝә хьлаз кә, әԝе ӧнда кә. Ле йе кӧ әʹмьре хԝә бона хатьре мьн ӧнда кә, әԝе диса бьвинә.* 26 Һәрге мәрьв тʹәмамийа дьнйайе ԛазанщ кә, ле әʹмьре хԝә ӧнда кә, кʹара ԝи чь йә? Йан жи мәрьв чь дькарә бьдә, ԝәки әʹмьре хԝә ԛазанщ кә? 27 Чьмки Кӧрʹе инсен ԝе рʹумәта Баве хԝәда тʹәви мәләкед хԝә бе, у һьнге ԝе һәр кәсирʹа анәгори кьред ԝи бьде. 28 Әз рʹаст ԝәрʹа дьбежьм, вьра нав ԝәда һьнә мәрьв һәнә, йед кӧ ԝе нәмьрьн,* һʹәта нәвиньн кӧ Кӧрʹе инсен Пʹадшатийа хԝәда те».

17 Паши шәш рʹожа, Иса тʹәви хԝә Пәтрус, Аԛуб у бьре ԝи Йуһʹәнна бьрьн у һьлкʹьшийа сәр чʹийаки бьльнд. Ль ԝьр әԝана тʹәне бун. 2 У бәр чʹәʹве ԝан Иса рʹува һатә гӧһастьне. Сьфәте ԝи мина тәʹве шәԝԛ да, у кʹьнщед ԝи мина рʹонайе чил-ԛәрԛаш бун. 3 Ньшкева Муса у Елйас ԝанрʹа хӧйа бун у тʹәви ԝи хәбәр дьдан. 4 Пәтрус Исарʹа гот: «Хӧдан, ча баш ә кӧ әм вьра нә. Һәрге тӧ бьхԝази, әзе се һʹолька чекьм, йәке бона тә, йәке бона Муса у йәке жи бона Елйас». 5 Һе әԝи хәбәр дьда, әʹԝрәки рʹонайи дакʹәтә сәр ван, у дәнгәк жь ви әʹԝри һат у гот: «Әв ә Кӧрʹе мьни дәлал, йе кӧ дьле мьн ша дькә. Гӧһ бьдьнә ԝи». 6 Гава шагьрта әв йәк бьһист, тьрсәкә мәзьн кʹәтә дьле ԝан, у ԝана хԝә дәвәрʹу авитьнә әʹрде. 7 Ле Иса незики ԝан бу, дәсте хԝә да ԝан у гот: «Рʹабьн, нәтьрсьн». 8 Гава ԝана сәре хԝә бьльнд кьр, хенщи Иса тʹӧ кәс нәдитьн. 9 Чахе әԝана жь чʹийе дадькʹәтьн, Иса тʹәми да ԝан у гот: «Һʹәта Кӧрʹе инсен жь мьрьне нәйе рʹакьрьне, тьштед кӧ ԝә дитьн тʹӧ кәсирʹа нәбежьн».

10 Шагьрта жь Иса пьрси: «Чьма ԛанунзан дьбежьн, кӧ пешийе Елйас гәрәке бе?» 11 Иса щаба ԝан да: «Елйас бь рʹасти те, у әԝе һәр тьшти рʹаст кә. 12 Ле әз ԝәрʹа дьбежьм, Елйас ида һатийә, ле ԝана әԝ нас нәкьр. Дьле ԝан ча хԝәст, ӧса сәре ԝи кьрьн. Һәма ӧса, Кӧрʹе инсен жи ԝе жь дәсте ԝан бьчәрчьрә». 13 Һьнге шагьрта фәʹм кьр, кӧ Иса дәрһәԛа Йуһʹәннайе Ньхӧмдар гот.

14 Гава әԝана незики әʹлаләте бун, мәрьвәк һатә бал Иса, кʹәтә сәр чока у ԝирʹа гот: 15 «Хӧдан, гӧне хԝә кӧрʹе мьн бинә.* Әԝ бь епилепсийе нәхԝәш ә у һʹале ԝи гьран ә. Әԝ гәләк щара дькʹәвә нав агьр йан жи нав аве. 16 Мьн әԝ ани бал шагьртед тә, ле ԝана нькарьбу ԝи ԛәнщ кьн». 17 Иса гот: «Ньсьле бебаԝәр у гӧнәкʹар, һʹәта кʹәнге гәрәке әз тʹәви ԝә бьм? Һʹәта кʹәнге әз ԝә сәбьр кьм? Ԝи биньн щәм мьн». 18 Паше Иса сәрт фәрман да щьн, у әԝ жь гәдә дәркʹәт. Ԝе дәме гәдә ԛәнщ бу. 19 Паши ԝе йәке, шагьрт башԛә незики Иса бун, у жь ԝи пьрсин: «Мә чьрʹа нькарьбу әв щьн дәрхьста?» 20 Әԝи щаба ԝан да: «Чьмки баԝәрийа ԝә кем ә. Әз рʹаст ԝәрʹа дьбежьм, һәрге баԝәрийа ԝә ԝәкә тʹохьмәки хәрдале бә жи, һун ви чʹийайирʹа бежьн: ‹Жь вьр һәрʹә ԝедәре›, әԝе һәрʹә. У һуне бькарьбьн һʹәму тьшти бькьн».* 21* ——

22 Гава әԝана тʹәвайи Щәлиледа тʹоп бун, Иса ԝанрʹа гот: «Ԝе нәмамийа Кӧрʹе инсен бькьн у ԝи бьдьнә дәсте мәрьва, 23 ԝе ԝи бькӧжьн у рʹожа сьсийа әԝе жь мьрьне бе рʹакьрьне». Гава ԝана готьнед ԝи бьһист, гәләк дьлтәнг бун.

24 Чахе әԝ һатьнә Кәпәрнаһуме, мәрьвед кӧ хәрщед пʹарьстгәһе* тʹоп дькьрьн незики Пәтрус бун у жь ԝи пьрсин: «Дәрсдаре ԝә хәрще пʹарьстгәһе надә?» 25 Әԝи гот: «Бәле, дьдә». Чахе Пәтрус кʹәтә мале, пешийа кӧ әԝи тьштәк бьгота, Иса жь ԝи пьрси: «Шьмһʹун тӧ чь дьфькьри, пʹадшед дьнйайе щурʹә-щурʹә хәрща жь кʹе дьстиньн? Жь кӧрʹед хԝә йан жь хәриба?» 26 Пәтрус гот: «Жь хәриба». Иса ԝирʹа гот: «Ԝәки ӧса йә, кӧрʹ жь хәрщ аза нә. 27 Ле сәва кӧ ԝана әʹщьз нәкьн, һәрʹә бәр бәʹре у шәԝке бавежә. Мәʹсийе пешьн кӧ дәрдькʹәвә, бьгьрә, дәве ԝи вәкә у тӧйе ԛӧрʹушәки* зив* бьвини. Әԝи һьлдә, дәԝса мьн у хԝә бьдә ԝан».

18 Ԝи чахи шагьрт һатьн бал Иса у жь ԝи пьрсин: «Пʹадшатийа әʹзманада кʹи йә йе һәри мәзьн?» 2 Иса гази зарʹәке кьр, әԝ нав ԝанда да сәкьнандьне, 3 у гот: «Әз рʹаст ԝәрʹа дьбежьм: Һәрге һун хԝә нәгӧһерʹьн у нәбьнә мина зарʹа, һуне тʹӧ щара нәкʹәвьнә Пʹадшатийа әʹзмана. 4 Ләма, кʹи хԝә мина ве зарʹе мьлук кә, Пʹадшатийа әʹзманада әԝ ә йе һәри мәзьн. 5 У кʹи кӧ зарʹәкә ӧса бона хатьре наве мьн ԛәбул кә, әԝ мьн жи ԛәбул дькә. 6 Ле кʹи бьбә сәбәб ԝәки йәки жь ван бьчʹука, йе кӧ баԝәрийа хԝә мьн тинә, жь рʹе дәре, бона ԝи һе баш ә ԝәки кәвьрәки мәзьн* стуйе ԝива бе гьредане у бәʹреда бьхәньԛә.

7 Ԝәй ль дьнйайе, чьмки әԝ мәрьва бәрбь гӧнә дьбә! Һәмьки әв тьшт ԝе һәбә, ле ԝәй ль ԝи, йе кӧ дьбә сәбәб кӧ мәрьв бәрбь гӧнә дьчә! 8 Һәрге дәст йан ньге тә, тә бәрбь гӧнә дьбә,* ԝи жекә у бавежә. Дьһа баш ә тӧ пе дәстәки йан пе ньгәки жийине ԛазанщ ки, нә кӧ бь һәр дӧ дәстед хԝә, йан бь һәр дӧ ньгед хԝә бейи авитьне нав агьре һʹәта-һʹәтайе. 9 У һәрге чʹәʹве тә, тә бәрбь гӧнә дьбә, ԝи дәрхә у бавежә. Дьһа баш ә тӧ бь чʹәʹвәки жийине ԛазанщ ки, нә кӧ бь һәр дӧ чʹәʹва бейи авитьне нава агьре Геһенайе.* 10 Һаж хԝә һәбьн, кӧ һун йәки жь ԝан бьчʹука беһӧрмәт нәкьн. Чьмки әз ԝәрʹа дьбежьм, ль әʹзмана мәләкед ԝан тʹьме рʹуйе Баве мьни әʹзмана дьвиньн. 11* ——

12 Һун ча дьфькьрьн? Һәрге 100 пәзед мәрьвәки һәбьн у йәк жь кәри дур кʹәвә у ӧнда бә, гәло әԝе 99 пәзед хԝә нав чʹийада нәһелә у нәчә, кӧ пәза ӧндабуйи бьгәрʹә? 13 Әз рʹаст ԝәрʹа дьбежьм, һәрге әԝ пәза ӧндабуйи бьвинә, әԝе бона ԝе һе зедә ша бә, нә кӧ бона 99 пәзед дьнә кӧ ӧнда нәбунә. 14 Ӧса жи Баве мьни* ль әʹзмана нахԝазә, кӧ йәк жь ван бьчʹука ӧнда бә.

15 Һәрге бьре тә һьмбәри тә гӧнә бькә, жерʹа бежә шашийа ԝи чьда нә, гава һун һәр дӧ тʹәне нә. Һәрге әԝ гӧһ бьдә тә, тә бьре хԝә ԛазанщ кьр. 16 Ле һәрге әԝ гӧһ нәдә тә, йәк йан дӧ кәса хԝәрʹа бьвә, сәва кӧ һәр тьшт бь дәве дӧ йан се шәʹда бе избаткьрьне. 17 Һәрге әԝ нәхԝазә гӧһ бьдә ԝан, щьватерʹа бежә, у һәрге әԝ гӧһ нәдә щьвате жи, бьра әԝ ида бона тә бьбә мина кәсәки жь мьләтед дьн, йан жи мина хәрщгьр.

18 Әз рʹаст ԝәрʹа дьбежьм, һәр тьште кӧ һун сәр рʹуйе әʹрде гьредьн, әԝе ида ль әʹзмана гьредайи бә. У һәр тьште кӧ һун сәр рʹуйе әʹрде вәкьн, әԝе ида ль әʹзмана вәкьри бә. 19 Диса әз рʹаст ԝәрʹа дьбежьм: Һәрге дӧ кәс жь ԝә сәр рʹуйе әʹрде һәврʹа бьшеԝьрьн, ԝәки бона пьрсәкә фәрз дӧа бькьн, Баве мьни ль әʹзмана ԝе әве йәке бинә сери. 20 Чьмки кʹидәре дӧ йан се кәс бь наве мьн тʹәвайи тʹоп бьн, әзе жи ԝедәре нава ԝанда бьм».

21 Паше Пәтрус һатә бал Иса у жь ԝи пьрси: «Хӧдан, һәрге бьре мьн һьмбәри мьн гӧнә дькә, әз чәнд щара гәрәке бьбахшиньмә ԝи? Һʹәта һʹәфт щара?» 22 Иса щаба ԝи да: «Әз тәрʹа дьбежьм, нә кӧ һʹәфт щара, ле 77 щара.

23 Чьмки Пʹадшатийа әʹзмана мина пʹадшаки йә, йе кӧ жь хӧламед хԝә дәйнед хԝә хԝәст. 24 Гава пʹадша дәстпекьр дәйнед хԝә тʹоп кә, йәк анинә щәм ԝи, кӧ 10 000* тәлант дәйндаре ԝи бу. 25 Ле чьмки әԝи мәрьви нькарьбу дәйне ԝи бьдә, пʹадша фәрман да кӧ әԝ, жьна ԝи, зарʹед ԝи у һʹәму мал-мьлкʹе ԝи бенә фьротане, сәва кӧ дәйне ԝи бе дайине. 26 Ләма әв хӧлам бәр пʹадше кʹәтә сәр чока у жь ԝи рʹәща кьр: ‹Һьнәк ԝәʹдә бьдә мьн, әзе һʹәму дәйне тә бьдьм›. 27 Дьле пʹадша сәр ԝи шәԝьти, әԝи әԝ бәрʹда у дәйне ԝи бахшанде. 28 Ле гава әв хӧлам дәркʹәтә дәрва, әԝи хӧламәки дьн дит, йе кӧ 100 динара дәйндаре ԝи бу. Әԝи дәст кьрә хәнәԛа ԝи у гот: ‹Дәйне мьн бьдә!› 29 Һьнге әви хӧлами, хԝә авитә ньгед ԝи у рʹәща кьр: ‹Һьнәк ԝәʹдә бьдә мьн, әзе дәйне тә бьдьм›. 30 Ле әԝи нәхԝәст гӧһ бьде, чу у әԝ авитә кәле һʹәта кӧ әԝ дәйне хԝә бьдә. 31 Гава һәвал-хӧламед ԝи әв йәк дитьн, гәләк дьлтәнг бун. Әԝана чун щәм пʹадше у һʹәму тьшт чь кӧ ԛәԝьми бу, жерʹа гьли кьрьн. 32 Һьнге пʹадша гази ԝи кьр у жерʹа гот: ‹Хӧламе хьраб! Мьн һʹәму дәйне тә бахшандә тә, гава тә лавайа мьн кьр. 33 Нә тӧ жи гәрәке һьндава һәвал-хӧламе хԝәда рʹәʹм буйайи, чаԝа кӧ әз һьндава тәда рʹәʹм бум?› 34 Һерса пʹадша рʹабу у әԝи фәрман да, ԝәки ви хӧлами бавежьнә кәле, һʹәта һʹәму дәйне хԝә бьдә. 35 Баве мьни әʹзмана жи ԝе һьндава ԝәда ӧса бә, һәрге һун бьре хԝә бь дьл нәбахшиньн».

19 Гава Иса готьнед хԝә хьлаз кьрьн, әԝ жь Щәлиле дәркʹәт у чу синоре Щьһустане, алийе дьнә Чʹәме Урдӧне. 2 Гәләк мәрьв жи пәй ԝи чун, у әԝи ԝедәре әԝана ԛәнщ кьрьн.

3 Ферьси һатьнә бал Иса, сәва кӧ ԝи бьщерʹьбиньн. Ԝана жь ԝи пьрси: «Гәло ль гора ԛануне изьн ә, ԝәки мер бона һәр мәʹнике, жьна хԝә бәрʹдә?» 4 Иса щаб да у гот: «Ԝә ԛә нәхԝәндийә, ԝәки сәре серида Хԝәде әԝ ча мер у жьн әʹфьрандьн 5 у гот: ‹Ләма жи, мер ԝе де у баве хԝә бьһелә у тʹәви жьна хԝә бьжи, у һәр дӧ ԝе бьбьнә йәк›?* 6 Аԝа ида әԝана нә дӧдӧ нә, ле йәк ьн. Ләма йед кӧ Хԝәде әԝ кьрьнә йәк,* бьра мәрьв жь һәвдӧ нәԛәтинә». 7 Ԝана ԝирʹа гот: «Ле Муса чьма тʹәми да, кӧ гәрәке мер кʹахаза һәвԛәтандьне бьдә жьна хԝә у ле бәрʹдә?» 8 Иса ԝанрʹа гот: «Жь бо дьлкәвьрийа ԝә Муса изьн да, ԝәки һун жьнед хԝә бәрʹдьн, ле дәстпекеда ӧса нибу. 9 Әз ԝәрʹа дьбежьм: Кʹи кӧ бейи сәбәбийа зьнекʹарийе* жьна хԝә бәрʹдә у кәсәки дьн бьстинә, ԛавийе дькә».

10 Шагьрта Исарʹа гот: «Һәрге ӧса нә, һе баш ә мәри ԛә нәзәԝьщә». 11 Иса щаба ԝан да: «Һәр кәс нькарә ӧса бьжи. Ле тʹәне әԝ, кʹижанарʹа ча пʹешкʹеш* һатийә дайине, дькарьн ӧса бьжин. 12 Һьнә кәс ӧса һатьнә буйине кӧ нькарьн бьзәԝьщьн,* һьнә кәс жь дәсте мәрьва ӧса бунә, у һьнә кәсед дьн жи бона хатьре Пʹадшатийа әʹзмана назәԝьщьн. Йе кӧ дькарә ӧса бьжи, бьра ӧса бьжи».

13 Һьнге мәрьва зарʹед бьчʹук дьанин бал Иса, сәва кӧ әԝ дәстед хԝә дайнә сәр ԝан у бона ԝан дӧа бькә, ле шагьртед ԝи рʹийа ԝан дьгьртьн. 14 Ләма жи Иса ԝанрʹа гот: «Бьһельн бьра зарʹ бенә бал мьн, рʹийа ԝан нәгьрьн. Чьмки Пʹадшатийа әʹзмана бона йед мина ԝан ә». 15 Әԝи зарʹ кʹәрәм кьрьн* у жь ԝедәре чу.

16 Һьнге кәсәк һатә щәм Иса у готе: «Дәрсдар, әз гәрәке чь ԛәнщийе бькьм, ԝәки жийина һʹәта-һʹәтайе бьстиньм?» 17 Иса жерʹа гот: «Тӧ чьма жь мьн дьпьрси, кӧ чь йә ԛәнщи? Тʹәне Хԝәде ԛәнщ ә. Һәрге тӧ дьхԝази жийине бьстини, һәр гав тʹәмийед Хԝәде бинә сери». 18 Әԝи пьрси: «Кʹижан тʹәмийа?» Иса щаба ԝи да: «Нәкӧжә, ԛавийе нәкә, нәдьзә, шәʹдәтийа дәрәԝ нәдә, 19 ԛәдьре де у баве хԝә бьгьрә, у мәрьва һʹәз бькә чаԝа тӧ хԝә һʹәз дьки». 20 Әԝи хорти жерʹа гот: «Әз ван һʹәму тʹәмийа тиньм сери, диса чь мьн кем ә?» 21 Иса ԝирʹа гот: «Һәрге тӧ дьхԝази бекемаси би, һәрʹә мал-мьлкʹе хԝә бьфьрошә у бьдә кʹәсиба. Һьнге ԝе хьзна тә ль әʹзмана һәбә. У паше пәй мьн ԝәрә». 22 Гава әԝи хорти әв йәк бьһист, дьлтәнг бу у чу, чьмки мал-мьлкʹе ԝи гәләк бу. 23 Һьнге Иса шагьртед хԝәрʹа гот: «Әз рʹаст ԝәрʹа дьбежьм, бона мәрьве дәԝләти ԝе чәтьн бә бькʹәвә Пʹадшатийа әʹзмана. 24 Диса әз ԝәрʹа дьбежьм, дәвә ԝе ԛӧла дәрзийерʹа дьһа һеса дәрбаз бә, нә кӧ йе дәԝләти бькʹәвә Пʹадшатийа Хԝәде».

25 Гава шагьрта әв йәк бьһистьн, гәләк әʹщебмайи ман у готьн: «Ида кʹи дькарә бь рʹасти хьлаз бә?» 26 Иса ль ԝан ньһерʹи у гот: «Бона мәрьва әв тьштәки нәбуйи йә, ле бона Хԝәде һәр тьшт дьбә».

27 Һьнге Пәтрус жерʹа гот: «Аԝа мә һʹәму тьшт һиштьнә у пәй тә һатьнә. Ле әме чь бьстиньн?» 28 Иса ԝанрʹа гот: «Әз рʹаст ԝәрʹа дьбежьм, ԝәʹде тʹәзәкьрьна һәр тьшти, гава Кӧрʹе инсен сәр тʹәхте хԝәйи рʹумәт рʹуне, һун йед кӧ пәй мьн һатьн, һуне сәр 12 тʹәхта рʹунен у бьбьнә һʹакьмед 12 әʹширед Исраеле. 29 У һәр кәсе кӧ бона хатьре наве мьн мал, йан хушк, йан бьра, йан де, йан бав, йан зарʹ, йан әʹрде хԝә һиштийә, әԝе 100 щар зедәтьр бьстинә у жийина һʹәта-һʹәтайе ԝар бә.

30 Ле гәләк кәсед пешьн ԝе бьбьнә йед пашьн, у кәсед пашьн ԝе бьбьнә йед пешьн.

20 Пʹадшатийа әʹзмана мина хԝәйе рʹәзе тьрийа йә, йе кӧ сьбәһе зу дәркʹәт, ԝәки бона рʹәзе хԝә хәбаткʹара бьгьрә. 2 Әԝи тʹәви хәбаткʹара хәбәр да, ԝәки бона рʹожәке динарәке бьдә ԝан, у әԝ шандьн нав рʹәзе хԝә. 3 Гава әԝ шәбәԛе незики сьһʹәта нәһа* диса дәркʹәт, әԝи базареда мәрьвед бехәбат дитьн 4 у ԝанрʹа гот: ‹Һун жи һәрʹьн нав рʹәзе мьн, у чь һәԛе ԝә йә, әзе бьдьмә ԝә›. 5 Әԝана жи чун. Хԝәйе рʹәз нивро незики сьһʹәта донздәһа* у нивро незики сьһʹәта сьсийа* диса дәркʹәт у ӧса кьр. 6 Хьлазийе, незики сьһʹәта пенща* әԝ дәркʹәт у кәсед дьн жи дитьн у ԝанрʹа гот: ‹Һун чьрʹа тʹәмамийа рʹоже вьра бехәбат сәкьнинә?› 7 Ԝана ӧса щаба ԝи да: ‹Чьмки тʹӧ кәси хәбат нәдайә мә›. Әԝи ԝанрʹа гот: ‹Һун жи һәрʹьнә нав рʹәзе мьн›.

8 Гава бу евар, хԝәйе рʹәз бәрдәстийе хԝәрʹа гот: ‹Гази хәбаткʹара бькә у һәԛе ԝан бьде. Жь йед пашьн дәстпекә һʹәта йед пешьн›. 9 Гава хәбаткʹаред кӧ сьһʹәта пенща дәстпекьрьбун бьхәбьтьн, һатьн, һәр йәки жь ԝан динарәк станд. 10 Ле чахе дора хәбаткʹаред пешьн һат, әԝ фькьрин кӧ әԝе һе зедә пʹәра бьстиньн, ле ԝанрʹа жи динарәк һатә дайине. 11 Гава ԝана һәԛе хԝә станд, газьне хԝә ль хԝәйе рʹәз кьрьн 12 у готьн: ‹Әԝ хәбаткʹаред пашьн тʹәне сьһʹәтәке хәбьтин, ле мә тʹәмамийа рʹоже бьн тәʹведа хәбата гьран кьр, диса жи тә фьрԛи нәкьрә ортʹа мә у ԝана!› 13 Ле хԝәйе рʹәз жь ԝан йәкирʹа ӧса гот: ‹Һәвало, әз нәһәԛийе ль тә накьм. Тӧ мьнрʹа ԛайил буйи ԝәки динарәке бьстини, ӧса нинә? 14 Һәԛе хԝә бьстинә у һәрʹә. Мьн чь дайә тә, әз дьхԝазьм бьдьм хәбаткʹаред пашьн жи. 15 Изьна мьн сәр пʹәре мьн тʹӧнә, чь кӧ бьхԝазьм ԝе жи бькьм? Йан тӧ чʹәʹвнәбарийе* дьки, чьмки әз һʹәйф ьм?› 16 Бь ви аԝайи, кәсед пашьн ԝе бьбьнә йед пешьн, у кәсед пешьн ԝе бьбьнә йед пашьн».

17 Гава Иса һьлдькʹьшийа Оршәлиме, рʹеда әԝи 12 шагьртед хԝә бьрьнә алики у ԝанрʹа ӧса гот: 18 «Ва әм ньһа һьлдькʹьшьнә Оршәлиме, у Кӧрʹе инсен ԝе бькʹәвә дәсте сәрокед кʹаһина у ԛанунзана. Әԝана ԝе фәрмане бьдьн ԝәки ԝи бькӧжьн 19 у бьдьнә дәсте мәрьвед жь мьләтед дьн, ԝәки әԝана ԛәрфед хԝә ль ԝи бькьн, бьдьнә бәр ԛамчийа у ԝи стуне хьн. У рʹожа сьсийа әԝ ԝе жь мьрьне бе рʹакьрьне».

20 Паши ве йәке, дийа кӧрʹед Зәбәди тʹәви кӧрʹед хԝә һатә щәм Иса, кʹәтә сәр чока у дьхԝәст тьштәки жь ԝи һиви кә. 21 Иса жь ԝе пьрси: «Тӧ чь дьхԝази?» Әԝе щаба ԝи да: «Соз бьдә ԝәки һәр дӧ кӧрʹед мьн Пʹадшатийа тәда йәк алийе мьле тәйи рʹасте у йе дьн алийе мьле тәйи чʹәпе рʹуне». 22 Иса щаб да: «Һун ньзаньн чь дьхԝазьн. Гәло һун дькарьн жь ԝе кʹасе вәхԝьн, йа кӧ әзе вәхԝьм?» Ԝана ԝирʹа гот: «Әре, әм дькарьн». 23 Иса ԝанрʹа гот: «Һуне бь рʹасти жь кʹаса мьн вәхԝьн, ле әв йәк кӧ кʹи алийе мьле мьни рʹасте у алийе мьле мьни чʹәпе рʹуне, дәсте мьнда нинә. Әԝ щи бона ԝан ьн, кʹижанарʹа Баве мьн һазьр кьрийә».

24 Гава дәһ шагьртед дьн әв йәк бьһистьн, һерса ԝан сәр ван дӧ бьра рʹабу. 25 Ле Иса әԝана гази бал хԝә кьрьн у ԝанрʹа гот: «Һун заньн кӧ пʹадшед мьләта сәр мәрьварʹа сәрԝертийе дькьн, у гьрәгьр һʹӧкӧми сәр ԝан дькьн. 26 Гәрәке нав ԝәда ӧса нибә. Ле йе кӧ дьхԝазә нав ԝәда бьбә йе мәзьн, гәрәке бьбә бәрдәстийе ԝә. 27 У йе кӧ дьхԝазә нав ԝәда бьбә йе пешьн, гәрәке бьбә хӧламе ԝә, 28 чаԝа кӧ Кӧрʹе инсен нәһатийә ԝәки ԝирʹа бәрдәстийе бькьн, ле ԝәки әԝ хԝәха бәрдәстийе бькә у әʹмьре хԝә бәр гәләкава бьдә, сәва ԝана аза кә».

29 Гава әԝана жь Әриһайе дәрдькʹәтьн, гәләк мәрьв пәй ԝи чун. 30 У ва дӧ мәрьвед кор кʹеләка ве рʹе рʹуньшти бун. Ԝана бьһист кӧ Иса дәрбаз дьбә у бь дәнгәки бьльнд кьрә ԛирʹин: «Хӧдан, Кӧрʹе Даԝьд, гӧне хԝә мә бинә!»* 31 Һьнге мәрьва сәрт ԝанрʹа дьгот* кӧ хԝә кәрʹ кьн. Ле ԝана һе бьльнд кьрә ԛирʹин: «Хӧдан, Кӧрʹе Даԝьд, гӧне хԝә мә бинә!» 32 Һьнге Иса сәкьни, гази ԝан кьр у гот: «Һун чь дьхԝазьн әз бона ԝә бькьм?» 33 Ԝана ԝирʹа гот: «Хӧдан, бьра чʹәʹвед мә вәбьн». 34 Дьле Иса сәр ԝан шәԝьти, ләма әԝи дәсте хԝә да сәр чʹәʹвед ԝан, у дәрберʹа чʹәʹвед ԝан вәбун, у әԝана пәй ԝи чун.

21 Гава әԝана незики Оршәлиме бун у гьһиштьнә Бәйтфаще, кӧ сәр Чʹийайе Зәйтʹуне йә, Иса дӧ шагьртед хԝә шандьн, 2 у ԝанрʹа гот: «Һәрʹьн гӧнде пешбәри хԝә. Һун һәма ча бькʹәвьнә ԝи гӧнди, һуне кʹәрәкә гьредайи тʹәви щәʹшьке бьвиньн. Ԝана вәкьн у биньн щәм мьн. 3 Һәрге кәсәк тьштәки ԝәрʹа бежә, һун ӧса бежьн: ‹Әԝ Хӧданрʹа лазьм ьн›. У әԝе дәрберʹа ԝана бьдьнә ԝә».

4 Әв йәк ӧса ԛәԝьми, ԝәки готьнед пʹехәмбәр бенә сери, йе кӧ готьбу: 5 «Кәчʹа Сийонерʹа бежьн: ‹Бьньһерʹә, Пʹадше тә те щәм тә! Әԝ йәки шкәсти йә* у ль кʹәре сийар буйә. Әре, әԝ ль сәр щәʹшька кʹәре сийар буйә›».

6 Шагьрт чун у чаԝа кӧ Иса ԝанрʹа готьбу, ӧса кьрьн. 7 Ԝана кʹәр тʹәви щәʹшьке анин, кʹьнщед хԝә авитьн сәр пьшта ԝан, у Иса ль щәʹшьке сийар бу. 8 Жь әʹлаләте гәләка кʹьнщед хԝә сәр рʹе рʹадьхьстьн. Һьнәка жи чʹьԛьлед дара дьбьрʹин у датанин сәр рʹе. 9 Мәрьвед кӧ пешийа ԝи у пәй ԝи дьчун, дькьрьнә гази: «Йа Хԝәде, лава дькьн, Кӧрʹе Даԝьд хьлаз кә! Кʹәрәмкьри йә әԝе кӧ бь наве Йаһоԝа те! Йе Жорьн, әм лава дькьн, ԝи хьлаз кә!»

10 Гава Иса кʹәтә Оршәлиме, тʹәмамийа бажер тʹәвльһәв бу у дьпьрсин: «Гәло әв кʹи йә?» 11 Әʹлаләте жи дьгот: «Әв Иса пʹехәмбәр ә, жь бажаре Ньсрәта Щәлиле!»

12 Иса кʹәтә пʹарьстгәһе у бәри ԝан һʹәмуйа да, йед кӧ ԝедәре дькʹьрʹин у йед кӧ дьфьротьн. Әԝи ӧса жи тʹәхтед пʹәрәгӧһерʹа у кʹӧрсийед кәвоткфьроша ԝәлгәрʹандьн. 13 У әԝи ԝанрʹа гот: «Ньвисар ә: ‹Мала мьн ԝе бе навкьрьне мала дӧа›, ле һун әԝ дькьнә шкәфта ԛачаха». 14 Пʹарьстгәһеда ӧса жи йед кор у сәԛәт һатьнә бал ԝи, у әԝи әԝ ԛәнщ кьрьн.

15 Гава сәрокед кʹаһина у ԛанунзана әԝ кʹәрәмәтед кӧ Иса кьрьн, дитьн у ӧса жи әԝ зарʹед кӧ пʹарьстгәһеда бь дәнге бьльнд дьготьн: «Йа Хԝәде, лава дькьн, Кӧрʹе Даԝьд хьлаз кә!», әԝ гәләк һерс кʹәтьн, 16 у жь ԝи пьрсин: «Тӧ дьбьһейи әв чь дьбежьн?» Иса щаба ԝан да: «Әре. Ԝә ԛә әв йәк нәхԝәндийә: ‹Тә ӧса кьр ԝәки зарʹ у дәргуш бь дәве хԝә пәсьне тә бьдьн›?» 17 Иса әԝ һиштьн, жь бажер дәркʹәт у чу бажаре Бәйтанйайе у ԝе шәве ԝедәре ма.

18 Сьбәһе зу гава әԝ вәгәрʹийа бажер, бьрʹчи бу. 19 Әԝи кʹеләка рʹе дарәкә һежире дит у незики даре бу, ле хенщи бәлга тьштәки пева нәдит. Һьнге әԝи дарерʹа гот: «Бьра жь вьр шунда тӧ һʹәта-һʹәтайе бәре хԝә нәди». У әв дара һежире перʹа-перʹа һʹьшк бу. 20 Гава шагьрта әв йәк дит, гәләк әʹщебмайи ман у готьн: «Әв дара һежире чаԝа ньшкева ӧса һʹьшк бу?» 21 Иса ԝанрʹа гот: «Әз рʹаст ԝәрʹа дьбежьм, һәрге баԝәрийа ԝә һәбә у һун дӧдьли нәбьн, һуне нә тʹәне чь кӧ һатә сәре ве дара һежире бькьн, ле һәрге һун ви чʹийайирʹа бежьн ‹Рʹабә хԝә бавежә бәʹре›, ԝе ӧса бьбә. 22 У һʹәму тьштед кӧ һун дӧада бь баԝәрийе бьхԝазьн, һуне бьстиньн».

23 Гава Иса һатә пʹарьстгәһе у мәрьв һин дькьрьн, сәрокед кʹаһина у рʹуспийед щьмәʹте һатьнә бал ԝи у пьрсин: «Тӧ бь чь һʹӧкӧми ван тьшта дьки? У кʹи әв һʹӧкӧм дайә тә?» 24 Иса ԝанрʹа гот: «Әзе жи пьрсәке бьдьмә ԝә. Һәрге һун щаба мьн бьдьн, һьнге әзе жи ԝәрʹа бежьм кӧ әз бь чь һʹӧкӧми ван тьшта дькьм: 25 Гава Йуһʹәнна мәрьв дьньхӧмандьн,* әԝи әв һʹӧкӧм жь Хԝәде* стандьбу йан жь мәрьва?» Һьнге әԝана нав хԝәда шеԝьрин у готьн: «Һәрге әм бежьн ‹Жь Хԝәде›,* әԝе мәрʹа бежә, ‹Ле ԝә чьрʹа әԝ баԝәр нәкьр?› 26 Ле һәрге әм бежьн ‹Жь мәрьва›, әм дьтьрсьн кӧ хәлԛ тьштәки бинә сәре мә, чьмки әԝана гьшк дьфькьрьн кӧ Йуһʹәнна пʹехәмбәр ә». 27 Ләма ԝана Исарʹа гот: «Әм ньзаньн». Әԝи жи ԝанрʹа гот: «Әз жи ԝәрʹа набежьм кӧ әз бь чь һʹӧкӧми ван тьшта дькьм.

28 Һун чь дьфькьрьн? Дӧ кӧрʹед мәрьвәки һәбун, у әԝ чу бал йе мәзьн у ԝирʹа гот: ‹Кӧрʹе мьн, иро һәрʹә нав рʹәзе тьрийада бьхәбьтә›. 29 Әԝи гот: ‹Әз начьм›. Ле паше әԝ пʹошман бу у чу. 30 Һьнге бав чу щәм кӧрʹе хԝәйи бьчʹук у ԝирʹа жи ӧса гот. Кӧрʹ жи гот: ‹Тʹәмам, әзе һәрʹьм баво›. Ле әԝ нәчу. 31 Жь ван дӧ кӧрʹа, кʹижани хԝәстьна баве хԝә ани сери?» Ԝана гот: «Йе мәзьн». Иса ԝанрʹа гот: «Әз рʹаст ԝәрʹа дьбежьм, хәрщгьр у ԛав ԝе пешийа ԝә бькʹәвьнә Пʹадшатийа Хԝәде. 32 Чьмки Йуһʹәнна һат у рʹийа рʹастийе нишани ԝә кьр, ле ԝә ԝи баԝәр нәкьр. Ле хәрщгьра у ԛава баԝәрийа хԝә ԝи анин. Ԝә чьԛас әв йәк дит жи, йәкә һун пʹошман нәбун у ԝә диса жи ԝи баԝәр нәкьр.

33 Мәсәләкә дьн жи бьбьһен: Мәрьвәк һәбу, йе кӧ хԝәйи әʹрд бу. Әԝи рʹәзе тьрийа чанд, дора ԝе сур кьр, һʹәԝзәк кʹола бона һʹьнщьрʹандьна тьрийа у бьрщәкә нобәдарийе чекьр. Паше әԝи әв рʹәз кʹьре да рʹәзвана у чу ԝәлатәки дьн. 34 Гава ԝәхте бәрчьнине һат, әԝи хӧламед хԝә шандьн бал рʹәзвана, ԝәки бәред пʹара хԝә һьлдә. 35 Ле рʹәзвана хӧламед ԝи гьртьн, йәк кʹӧтан, йе дьн кӧштьн у йәки дьн жи данә бәр кәвьра. 36 Әԝи диса хӧламед дьн шандьн, жь йед пешьн зедәтьр, ле ԝана ӧса ани сәре ԝан жи. 37 Ахьрийеда әԝи кӧрʹе хԝә шандә бал ԝан у фькьри: ‹Әԝана ԝе ԛәдьре кӧрʹе мьн бьгьрьн›. 38 Гава рʹәзвана кӧрʹе ԝи дит, һәврʹа готьн: ‹Әв ԝаре ԝи йә. Ԝәрен әм ԝи бькӧжьн у миратʹа ԝи бьстиньн!› 39 Һьнге ԝана әԝ гьрт, жь рʹәз авитьнә дәрва у кӧштьн. 40 Гава хԝәйе рʹәз бе, әԝе чь сәре ԝан рʹәзвана бькә?» 41 Ԝана щаба ԝи да: «Чьмки әԝана зӧлм ьн, ләма жи әԝе бь тʹәмами ԛьрʹа ԝан бинә. У әԝе рʹәзе хԝә, кʹьре бьдә рʹәзванед дьн, ԝәки әԝана ԝәхтда пʹара ԝи бьдьне».

42 Иса ԝанрʹа гот: «Ԝә әв йәк Ньвисаред Пирозда ԛә нәхԝәндийә, ‹Кәвьре кӧ авакʹара инкʹар кьр, буйә кәвьре сәрәкә;* Йаһоԝа әв йәк кьр у әв йәк бәр чʹәʹве мә ча кʹәрәмәт ә›? 43 Ләма әз ԝәрʹа дьбежьм, Пʹадшатийа Хԝәде ԝе жь ԝә бе стандьне у мьләтәкирʹа бе дайине, кʹижан кӧ ԝе бәр бинә. 44 Ӧса жи, кʹи кӧ бькʹәвә сәр ви кәвьри, әԝе һур-һури бә. У әԝ кәвьр бькʹәвә сәр кʹе, ԝе ԝи бьһʹьнщьрʹинә».

45 Гава сәрокед кʹаһина у Ферьсийа әв мәсәлед ԝи бьһистьн, ԝана фәʹм кьр кӧ әԝ бона ԝан дьбежә. 46 Рʹаст ә ԝана дьхԝәст ԝи бьгьрьн, ле жь хәлԛе дьтьрсийан, чьмки ԝана ԝи ча пʹехәмбәр ԛәбул дькьр.

22 Иса диса пе мәсәла ԝанрʹа хәбәр да: 2 «Пʹадшатийа әʹзмана мина пʹадшаки йә, йе кӧ дәʹԝата кӧрʹе хԝә кьр. 3 Әԝи хӧламед хԝә шандьн, ԝәки мевана тʹәглифи дәʹԝате кьн, ле ԝана нәхԝәст бен. 4 Әԝи хӧламед дьн жи шандьн у гот: ‹Меванарʹа бежьн: «Мьн бона дәʹԝате хԝарьн һазьр кьрийә, га у дәԝаред хԝәйи һәри баш* сәржекьрьнә. Һәр тьшт һазьр ә. Ԝәрьнә дәʹԝате»›. 5 Ле ԝана әв тʹәглиф пьшт гӧһе хԝәва авит. Йәк чу зәвийа хԝә, йе дьн чу базьрганийа хԝә. 6 Йед майин жи, хӧламед ԝи гьртьн, кʹӧтан у кӧштьн.

7 Һерса пʹадша рʹабу, у әԝи әскәред хԝә шандьн, әԝ меркӧж кӧштьн у бажаре ԝан шәԝьтанд. 8 Паше әԝи хӧламед хԝәрʹа гот: ‹Дәʹԝат һазьр ә, ле меван нәһежа бун. 9 Ләма һәрʹьн сәр рʹийед жь бажер дәр, у һәр кәсе кӧ һун бьвиньн, тʹәглифи сәр дәʹԝате кьн›. 10 Хӧлам жи чун сәр рʹийа, у һʹәмуйед кӧ рʹасти ԝан һатьн, йед ԛәнщ у хьраб, тʹоп кьрьн. Бь ԝи аԝайи, ода дәʹԝате бь мевана тʹьжә бу.

11 Гава пʹадша кʹәтә һьндӧрʹ, ԝәки мевана бьвинә, әԝи ԝедәре мәрьвәк дит, йе кӧ кʹьнщед дәʹԝате ль хԝә нәкьрьбу. 12 У пʹадша жь ԝи пьрси: ‹Һәвало, тӧ чаԝа бе кʹьнщед дәʹԝате кʹәти һьндӧрʹ?› Әԝи нькарьбу тьштәк бьгота. 13 Һьнге пʹадша хӧламед хԝәрʹа гот: ‹Дәст у ньгед ԝи гьредьн, ԝи бавежьнә дәрва нав тәʹрийе. Ԝедәре әԝе бьгьри* у ԝе чʹьркә-чʹьрка дьранед ԝи бә›.

14 Чьмки йед кӧ һатьнә газикьрьне гәләк ьн, ле йед кӧ һатьнә бьжартьне һьндьк ьн».

15 Паше Ферьси чун һәв шеԝьрин, кӧ чаԝа Иса сәр гьлийа бьгьрьн. 16 Ԝана шагьртед хԝә тʹәви пьштгьред Һеродәс шандьн бал ԝи, у ԝана Исарʹа гот: «Дәрсдар, әм заньн тӧ тʹьме рʹастийе дьбежи у рʹийа Хԝәде ль гора рʹастийе һин дьки. Тӧ накʹәви һʹәйре кӧ мәрьва хԝәш бейи, чьмки нав мәрьвада фьрԛийе данайни. 17 Кʹа мәрʹа бежә, тӧ ча дьфькьри, рʹаст ә кӧ хәрщ бьдьнә Ԛәйсәр, йан на?» 18 Ле чьмки Иса ԛәлпийа ԝан заньбу, ӧса гот: «Дӧрʹуно, һун чьма мьн дьщерʹьбиньн? 19 Кʹа ԛӧрʹуше* кӧ хәрщ пе те дайине, бьдьнә мьн». Ԝана динарәк данә ԝи. 20 Иса жь ԝан пьрси: «Әв сьфәт у ньвисар йед кʹе нә?» 21 Ԝана гот: «Йед Ԛәйсәр ьн». Һьнге Иса ль ԝан ԝәгәрʹанд: «Дә тьштед Ԛәйсәр бьдьнә Ԛәйсәр, ле тьштед Хԝәде бьдьнә Хԝәде». 22 Гава ԝана әв йәк бьһист, гәләк әʹщебмайи ман. Ԝана Иса һишт у чун.

23 Ԝе рʹоже Садуԛийед кӧ дьбежьн ԝәки рʹабуна мьрийа тʹӧнә, һатьнә бал Иса у жь ԝи пьрсин: 24 «Дәрсдар, Муса ӧса готьбу: ‹Һәрге зарʹед мәрьвәки тʹӧнә бьн у әԝ бьмьрә, бьре ԝи гәрәке жьна ԝи бьстинә у бь ви аԝайи зӧрʹәта бьре хԝә бәрдәԝам кә›. 25 Аԝа һʹәфт бьра һәбун. Бьре пешьн зәԝьщи у безӧрʹәт мьр, жьна ԝи жи бьре ԝирʹа ма. 26 Әв йәк һатә сәре бьре дӧда, йе сьсийа, ӧса һʹәта йе һʹәфта. 27 Пәй һʹәмуйарʹа әв жьн жи мьр. 28 Ижа ԝәʹде рʹабуна мьрийа, әв жьн ԝе бьбә жьна кʹижани жь ԝан һʹәфт бьра? Чьмки һәр һʹәфт бьра жи әԝ стандьбун».

29 Иса жи щаба ԝан да: «Һун шаш дьбьн, чьмки һун нә Ньвисаред Пироз заньн у нә жи ԛәԝата Хԝәде. 30 Ԝәʹде рʹабуна мьрийа, ԝе нә бьзәԝьщьн у нә жи мер кьн, ле әԝана ԝе мина мәләкед әʹзмана бьн. 31 Ле дәрһәԛа рʹабуна мьрийа, ԝә ԛә нәхԝәндийә кӧ Хԝәде ԝәрʹа чь готийә: 32 ‹Әз ьм Хԝәдайе Бьраһим, Хԝәдайе Исһаԛ у Хԝәдайе Аԛуб›? Әԝ нә кӧ Хԝәдайе мьрийа йә, ле Хԝәдайе саха йә». 33 Гава хәлԛе әв йәк бьһист, сәр һинкьрьна ԝи зәндәгьрти ма.

34 Чахе Ферьсийа бьһист кӧ Иса Садуԛи данә кәрʹкьрьне, һәв тʹоп бун у һатьнә бал ԝи. 35 У жь ԝан кәсәки кӧ Ԛанун рʹьнд заньбу, сәва кӧ Иса бьщерʹьбинә, же пьрси: 36 «Дәрсдар, Ԛанунеда тʹәмийа һәрә фәрз кʹижан ә?» 37 Иса ӧса щаб да: «‹Йаһоԝа Хԝәдайе хԝә бь тʹәмамийа дьле хԝә, бь тʹәмамийа щанийа хԝә у бь тʹәмамийа һʹьше хԝә һʹәз бькә›. 38 Әва тʹәмийа пешьн у һәрә фәрз ә. 39 Тʹәмийа дӧда жи мина ве йә: ‹Мәрьва һʹәз бькә чаԝа тӧ хԝә һʹәз дьки›. 40 Әв һәр дӧ тʹәми, сәр һʹиме тʹәмамийа Ԛануне у Ньвисаред Пʹехәмбәра нә».

41 Гава Ферьси һе тʹәвайи бун, Иса жь ԝан пьрси: 42 «Һун дәрһәԛа Мәсиһ чь дьфькьрьн? Тʹәхмина ԝә әԝ кӧрʹе кʹе йә?» Ԝана ԝирʹа гот: «Кӧрʹе Даԝьд ә». 43 Иса пьрс да ԝан: «Ԝәки ӧса нә, ле Даԝьд чьма бь рʹебәрийа рʹӧһʹе Хԝәде, сәр ԝи дьбежә ‹Хӧдан›, гава ньвисийә: 44 ‹Йаһоԝа Хӧдане мьнрʹа гот: «Алийе мьле мьни рʹасте рʹуне, һʹәта кӧ әз дьжмьнед тә бькьмә бьн ньгед тә»›? 45 Һәрге Даԝьд сәр ԝи дьбежә ‹Хӧдан›, әԝ ча дькарә кӧрʹе ԝи бә?» 46 Ида кәсәки нькарьбу щаба ԝи бьда, у жь ԝе рʹоже тʹӧ кәси нәԝерьбу пьрс бьда ԝи.

23 Паше Иса хәлԛерʹа у шагьртед хԝәрʹа гот: 2 «Ԛанунзан у Ферьсийа щийе Муса гьртьнә. 3 Ләма һʹәму тьштед кӧ әԝана ԝәрʹа дьбежьн, бькьн у биньн сери, ле мина ԝан нәкьн. Чьмки әԝана дьбежьн, ле ль гора готьнед хԝә накьн. 4 Әԝана баред гьран гьредьдьн у дьдьнә сәр стийе мәрьва. Ле хԝәха нахԝазьн тʹьлийа хԝә жи бьһʹәжиньн, ԝәки али ԝан бькьн. 5 Әԝана һәр тьшти сәва ве йәке дькьн, ԝәки бькʹәвьнә чʹәʹва. Ләма жи әԝана ԛӧтʹийед бьчʹук,* кʹижанада пʹаред Ньвисаред Пироз һәнә, мәзьн дькьн у рʹишийед кʹьнщед хԝә дьреж дькьн. 6 Әԝана һʹәз дькьн ԝәʹде шиве щийе һәри баш у кʹьништада* жи щийе пешьн рʹунен. 7 Әԝана һʹәз дькьн кӧ мәрьв базарада ԝана сьлав кьн у ԝанарʹа бежьн ‹Дәрсдар›.* 8 Ле бьра ԝәрʹа нәбежьн ‹Дәрсдар›, чьмки Дәрсдаре ԝә йәк ә, у һун гьшк бьред һәв ьн. 9 Хенщи ԝе йәке, сәр рʹуйе әʹрде тʹӧ кәсирʹа нәбежьн ‹Баво›, чьмки Баве ԝә йәк ә, йе әʹзмана. 10 Бьра ԝәрʹа нәбежьн ‹Рʹебәр› жи, чьмки Рʹебәре ԝә йәк ә, Мәсиһ ә. 11 Ле йе һәри мәзьн нав ԝәда гәрәке бәрдәстийе ԝә бә. 12 Кәсе кӧ хԝә бьльнд дькә, ԝе бе ньмьзкьрьне. У кәсе кӧ хԝә ньмьз дькә, ԝе бе бьльндкьрьне.

13 Ԝәй ль ԝә, ԛанунзан у Ферьсино! Дӧрʹуно! Чьмки һун дәре Пʹадшатийа әʹзмана ль бәр мәрьва дьгьрьн. Нә һун дькʹәвьне у нә жи дьһельн әԝед кӧ дьхԝазьн бькʹәвьне. 14* ——

15 Ԝәй ль ԝә, ԛанунзан у Ферьсино! Дӧрʹуно! Һун сәр бәʹре у әʹрде дьгәрʹьн, ԝәки кәсәки биньн сәр баԝәрийа хԝә. У гава һун ԝи тиньн сәр баԝәрийа хԝә, һун ԝи дькьнә кәсе кӧ дӧ щара жь ԝә зедәтьр һежайи Геһенайе йә.*

16 Ԝәй ль ԝә, рʹебәред кор! Һун дьбежьн: ‹Һәрге кәсәк бь пʹарьстгәһе сонд дьхԝә, сонда ԝи пʹучʹ у бәтал ә. Ле һәрге бь зерʹе пʹарьстгәһе сонд дьхԝә, гәрәке сонда хԝә бинә сери›. 17 Һәй беаԛьл у корно! Чь бь рʹасти дьһа фәрз ә, зерʹ йан пʹарьстгәһа кӧ зерʹ пироз дькә? 18 Хенщи ԝе йәке, һун дьбежьн: ‹Һәрге кәсәк бь ԛӧрбангәһе* сонд дьхԝә, сонда ԝи пʹучʹ у бәтал ә. Ле һәрге кәсәк бь пʹешкʹеша* кӧ сәр ԛӧрбангәһе йә, сонд дьхԝә, әԝ гәрәке сонда хԝә бинә сери›. 19 Һәй корно! Чь бь рʹасти дьһа фәрз ә, пʹешкʹеш йан ԛӧрбангәһа кӧ пʹешкʹеше пироз дькә? 20 Ләма жи һәр кәсе кӧ бь ԛӧрбангәһе сонд дьхԝә, әԝ нә тʹәне бь ԛӧрбангәһе, ле бь һʹәму тьштед сәр ԝе жи сонд дьхԝә. 21 У һәр кәсе кӧ бь пʹарьстгәһе сонд дьхԝә, әԝ нә тʹәне бь пʹарьстгәһе, ле ӧса жи бь йе кӧ теда дьжи сонд дьхԝә. 22 У һәр кәсе кӧ бь әʹзмен сонд дьхԝә, әԝ бь тʹәхте Хԝәде у бь йе кӧ сәр ви тʹәхти рʹуньшти йә сонд дьхԝә.

23 Ԝәй ль ԝә, ԛанунзан у Ферьсино! Дӧрʹуно! Чьмки һун дәһәке* пунге, шьԝите у зирәйе дьдьн, ле чь кӧ Ԛанунеда дьһа фәрз ә, ԝә пьшт гӧһе хԝәва авитийә, демәк һәԛи, рʹәʹмти у амьни. Рʹаст ә гәрәке дәһәк жи бе дайине, ле диса жи лазьм бу, кӧ ԝә тьштед дьн жи пьшт гӧһе хԝәва нәавита. 24 Рʹебәред кор! Һун мьхмьхке дьпарзьньн, ле дәве дадьԛӧртиньн.

25 Ԝәй ль ԝә, ԛанунзан у Ферьсино! Дӧрʹуно! Һун кʹас у тʹасе рʹуйе дәрвава дьшон, ле һӧндӧрʹе ԝан тʹьжи тьмайи* у хԝәнәгьртьн ә. 26 Һәй Ферьсийе кор! Пешийе һьндӧрʹе кʹас у тʹасе бьшо, ԝәки әԝ рʹуйе дәрвава жи тʹәмьз бьн.

27 Ԝәй ль ԝә ԛанунзан у Ферьсино! Дӧрʹуно! Һун мина мәзәлед сьпикьри нә, йед кӧ дәрвава бәдәԝ тенә кʹьфше, ле һьндӧрʹва бь һәстийе мьрийа у бь һʹәму һʹәрамийева тʹьжи нә. 28 Бь ви щурʹәйи, һун дәрвава бәр чʹәʹве мәрьва рʹаст хӧйа дьбьн, ле һьндӧрʹва һун бь дӧрʹути у беԛанунийева тʹьжи нә.

29 Ԝәй ль ԝә ԛанунзан у Ферьсино! Дӧрʹуно! Чьмки һун мәзәлед пʹехәмбәра чедькьн, тʹьрбед мәрьвед рʹаст дьхәмьлиньн 30 у дьбежьн: ‹Һәрге мә рʹожед кал-бавед хԝәда бьжита, мәйе тʹәви ԝан хуна пʹехәмбәра нәрʹета›. 31 Бь ве йәке, һун хԝәха избат дькьн кӧ һун кӧрʹед ԝан ьн, йед кӧ пʹехәмбәр кӧштьнә. 32 Дә кьред кал-бавед хԝә, кӧ ԝана дәстпекьрийә, тʹәмам кьн.

33 Һәй мәʹрно, зӧрʹәта* мәʹред жәʹрдар! Һуне чаԝа жь щәзайа Геһенайе бьрʹәвьн? 34 Ләма әз пʹехәмбәра, билана у дәрсдара дьшиньм щәм ԝә. Һуне жь ԝан һьнәка бькӧжьн у стуна хьн, һьнәка жи кʹьништада бьдьнә бәр ԛамчийа у һәр бажарәкида бьзериньн. 35 Бь ви аԝайи, һʹәму хуна кәсед рʹаст йа кӧ сәр рʹуйе әʹрде һатийә рʹетьне, ԝе бькʹәвә стийе ԝә, жь хуна мәрьве рʹаст Һабил һʹәта хуна Зәкәрйайе кӧрʹе Бәрәхийа, йе кӧ ԝә ортʹа пʹарьстгәһеда у ԛӧрбангәһеда кӧшт. 36 Әз рʹаст ԝәрʹа дьбежьм, әв һʹәму тьшт ԝе бенә сәре ви ньсьли.

37 Ԝах Оршәлим, Оршәлим, тӧ пʹехәмбәра дькӧжи у йед кӧ һатьнә шандьне щәм тә, дьди бәр кәвьра! Чәнд щара мьн дьхԝәст зарʹед тә тʹоп кьра, чаԝа кӧ мьришк щущукед хԝә бьн пʹәрʹе хԝәда тʹоп дькә! Ле ԝә нәхԝәст. 38 Ва мала ԝә ԝе ԝеран бьминә.* 39 Ләма жи әз ԝәрʹа дьбежьм, ида һуне мьн нәвиньн һʹәта кӧ һун нәбежьн: ‹Кʹәрәмкьри йә әԝе кӧ бь наве Йаһоԝа те!›»

24 Гава Иса жь пʹарьстгәһе дәрдькʹәт, шагьртед ԝи незики ԝи бун, ԝәки дина ԝи бькʹьшиньн сәр авайед пʹарьстгәһе. 2 Әԝи ԝанрʹа ӧса гот: «Һун ван һʹәму тьшта дьвиньн? Әз рʹаст ԝәрʹа дьбежьм, вьра кәвьр ԝе сәр кәвьр нәминә. Һәр тьшт ԝе ԝеран бә».

3 Чахе Иса сәр Чʹийайе Зәйтʹуне рʹуньшти бу, шагьртед ԝи тʹәне һатьнә бал ԝи, у же пьрсин: «Кʹа мәрʹа бежә, әв тьшт ԝе кʹәнге бьԛәԝьмьн? Чь ԝе бьбә нишана һатьна тә у рʹожед хьлазийейә* ве дьнйайе?»

4 Иса щаба ԝан да: «Һаж хԝә һәбьн, ԝәки тʹӧ кәс ԝә нәхапинә, 5 чьмки гәләк кәс ԝе бь наве мьн бен у бежьн, ‹Әз Мәсиһ мә›, у ԝе гәләка бьхапиньн. 6 Һуне дәрһәԛа шәрʹед щурʹә-щурʹә щийада бьбьһен. Ле нәтьрсьн, чьмки әв тьшт гәрәке бьԛәԝьмьн, ле әв һе хьлази нинә.

7 Мьләте һьмбәри мьләт у пʹадшати ԝе һьмбәри пʹадшатийе рʹабә. У гәләк щийа ԝе хәлайи у әʹрдһʹәж һәбьн. 8 Әв һʹәму тьшт дәстпека кӧл-дәрда нә.*

9 Һьнге ԝе мәрьв ԝә бьзериньн у бькӧжьн. У бона наве мьн һуне бәр чʹәʹве һʹәму мьләта рʹәш бьн. 10 Гәләк кәс ԝе жь рʹе дәркʹәвьн, нәмамийа һәв бькьн у бәр чʹәʹве һәв рʹәш бьн. 11 Гәләк пʹехәмбәред ԛәлп ԝе дәркʹәвьн у гәләка бьхапиньн. 12 У жь бо зедәбуна беԛанунийе, һʹәзкьрьна гәләка ԝе сар бә. 13 Ле йе кӧ һʹәта хьлазийе тәйах кә, әԝе хьлаз бә. 14 У әв мьзгинийа Пʹадшатийе ԝе сәр тʹәмамийа дьнйайе бе бәлакьрьне, кӧ һʹәму мьләтарʹа бьбә шәʹдәти, у һьнге хьлази ԝе бе.

15 Гава һун һʹәрамийа кӧ пәй хԝә ԝеранкьрьне тинә, дәрһәԛа кʹижане Данийел пʹехәмбәр готьбу, щийе пирозда сәкьни, бьвиньн, (әԝе кӧ дьхунә бьра фәʹм бькә),* 16 һьнге бьра йед кӧ Щьһустанеда нә, бьрʹәвьнә чʹийа. 17 Кәсе кӧ сәр бани бә, бьра данәкʹәвә, ԝәки жь мала хԝә тьшта һьлдә. 18 У йе кӧ зәвийеда бә, бьра пашда вәнәгәрʹә, ԝәки пʹоте хԝә һьлдә. 19 Ԝәй ль жьнед һʹәмлә у йед дәстдәргуш ԝан рʹожада! 20 Тʹьме дӧа бькьн, ԝәки рʹәва ԝә нәкʹәвә зьвьстане йан жи рʹожа Шәмийе.* 21 Чьмки һьнге ԝе тәнгасийа мәзьн бә, йа кӧ жь дәстпека дьнйайе һʹәта ньһа нәбуйә у ԝе нә жи бьбә. 22 Һәрге әԝ рʹож нәйед кьнкьрьне, тʹӧ мәрьв ԝе хьлаз нәбә. Ле бона хатьре йед бьжарти, әԝ рʹож ԝе бенә кьнкьрьне.

23 Һьнге, һәрге кәсәк ԝәрʹа бежә: ‹Бьньһерʹә, Мәсиһ вьра йә!› йан жи ‹Әԝ ԝедәре йә!›, баԝәр нәкьн. 24 Чьмки Мәсиһед ԛәлп у пʹехәмбәред ԛәлп ԝе дәркʹәвьн, у ԝе кʹәрәмәтед мәзьн у нишанед мәзьн бькьн, ԝәки һәрге бе стандьне, йед бьжарти жи бьхальфиньн. 25 Бир нәкьн, мьн ида пешда ԝәрʹа готийә. 26 Ләма жи, һәрге мәрьв ԝәрʹа бежьн: ‹Ва йә, әԝ бәрʹийеда йә›, нәчьн ԝедәре, йан жи: ‹Ва йә, әԝ һьндӧрʹе маледа йә›, баԝәр нәкьн. 27 Чаԝа кӧ бьруск жь рʹоһьлате һʹәта рʹоавайе шәԝԛ дьдә, һатьна Кӧрʹе инсен жи ԝе ӧса бә. 28 Щьнйаз* кʹидәре бә, ԝе тәйр жи ԝедәре тʹоп бьн.

29 Һәма паши ԝан рʹожед тәнгасийе, тәʹв ԝе тәʹри бә у һив ԝе рʹонайа хԝә нәдә. Стәйрк ԝе жь әʹзмен бькʹәвьн у ԛәԝатед әʹзмана ԝе бенә һʹәжандьне. 30 Һьнге нишана Кӧрʹе инсен ԝе ль әʹзмен хӧйа бә, у һʹәму мьләтед* дьнйайе ԝе шине бькьн у ль синге хԝә хьн. У әԝана ԝе Кӧрʹе инсен бьвиньн, йе кӧ сәр әʹԝред әʹзмен бь ԛәԝат у рʹумәта мәзьн те. 31 У Кӧрʹе инсен ԝе мәләкед хԝә бь дәнге борʹийейә бьльнд бьшинә, у мәләкед ԝи ԝе жь һәр чар алийед дьнйайе,* жь алики әʹзмана һʹәта алийе дьн, бьжартийед ԝи тʹоп кьн.

32 Жь дара һежире хԝәрʹа әве дәрсе һин бьн: Чахе чʹьԛьлед ԝе мәзьн дьбьн у бәлгед ԝе шин дьбьн, һун фәʹм дькьн кӧ һавин ида незик буйә. 33 Бь ви щурʹәйи жи, гава һун ван һʹәму тьшта бьвиньн, бьзаньбьн кӧ әԝ* незик ә, бәр дери йә. 34 Әз рʹаст ԝәрʹа дьбежьм, пешийа кӧ әв ньсьл дәрбаз бә, әв һʹәму тьшт ԝе бенә сери. 35 Әʹрд у әʹзман ԝе бәтавәбьн, ле хәбәред мьн ԝе һәр у һәр бьминьн.

36 Ле тʹӧ кәс ньзанә кӧ әԝ рʹож у сьһʹәт ԝе кʹәнге бә, нә мәләкед әʹзмана, нә жи Кӧрʹ, ле тʹәне Бав занә. 37 Чаԝа кӧ рʹожед Нӧһда бу, һатьна Кӧрʹе инсен жи ԝе ӧса бә. 38 Чьмки рʹожед пешийа Тофане,* мәрьва дьхԝар, вәдьхԝар, дьзәԝьщин у мер дькьрьн, һʹәта рʹожа кӧ Нӧһ кʹәтә гәмийе. 39 У мәрьва дина хԝә нәдьдане кӧ чь дьԛәԝьмә һʹәта Тофан рʹабу у һʹәму тʹәви хԝә бьрьн. Һатьна Кӧрʹе инсен жи ԝе һәма ӧса бә. 40 Һьнге дӧ мәрьв ԝе нав зәвийеда бьн, йәк ԝе бе һьлдане у йе дьн ԝе бе һиштьне. 41 У дӧ кʹӧлфәт ԝе гәньм бьһерьн,* йәк ԝе бе һьлдане у йа дьн ԝе бе һиштьне. 42 Ләма һʹьшйар бьминьн, чьмки һун ньзаньн Хӧдан ԝе кʹижан рʹоже бе.

43 Ле ве йәке заньбьн, һәрге хԝәйе мале бьзаньбә дьз ԝе кʹәнге* бькʹәвә мала ԝи, әԝе һʹьшйар бьминә у нәһелә дьз бькʹәвә мале. 44 Бона ве йәке, һун жи һазьр бьн, чьмки Кӧрʹе инсен ԝе ԝәʹдәки ӧсада бе,* гава һун һивийе нибьн.

45 Хӧламе амьн у сәрԝахт* бь рʹасти кʹи йә, йе кӧ ахайе ԝи әԝ сәр хӧламед мала хԝәрʹа кʹьфш кьрийә, ԝәки әԝ хԝарьна ԝан ԝәʹдәда бьдә ԝан? 46 Чьԛас бәхтәԝар ә әԝ хӧлам, гава ахайе ԝи бе у бьвинә кӧ әԝ һәма ӧса дькә! 47 Әз рʹаст ԝәрʹа дьбежьм, әԝе ԝи хӧлами сәр һʹәму һәбука хԝәрʹа кʹьфш кә.

48 Ле һәрге әԝ хӧлам хьраб дәркʹәвә у дьле хԝәда бежә: ‹Ахайе мьн дәрәнги дькʹәвә›, 49 у әԝ дәстпекә һәвал-хӧламед хԝә бькʹӧтә у тʹәви йед сәрхԝәш бьхԝә у вәхԝә, 50 ахайе ԝи рʹожәкә ӧсада ԝе бе, кӧ әԝ хӧлам һивийе нинә, у сьһʹәтәкә ӧсада, кӧ әԝ ньзанә, 51 у әԝе ԝи сәрт щәза кә у ԝи бавежә щийе дӧрʹуйа. Ԝедәре әԝе бьгьри* у ԝе чʹьркә-чʹьрка дьранед ԝи бә.

25 Һьнге Пʹадшатийа әʹзмана ԝе мина ве йәке бә: Дәһ ԛизед бькʹьр чʹьред хԝә һьлдан у чунә пешийа зәʹве. 2 Жь ԝана пенщ бефәʹм бун, ле пенщ сәрԝахт* бун. 3 Ԛизед бефәʹм чʹьред хԝә һьлдан, ле рʹун хԝәрʹа һьлнәдан, 4 ле ԛизед сәрԝахт хенщи чʹьред хԝә, рʹун жи дәрданада хԝәрʹа һьлдан. 5 Чахе зәʹва дәрәнги дькʹәт, хәԝа ԝан һʹәмуйа һат у әԝана хәԝрʹа чун. 6 Ниве шәве дәнгәк һат: ‹Ва йә, зәʹва те! Дәркʹәвьн, һәрʹьн пешийа ԝи›. 7 Һьнге һʹәму ԛиз рʹабун у чʹьред хԝә һазьр кьрьн. 8 Ԛизед бефәʹм йед сәрԝахтрʹа готьн: ‹Ща һьнәк рʹуне хԝә бьдьнә мә, чьмки һьндьк майә чʹьред мә бьтәмьрьн›. 9 Ԛизед сәрԝахт щаба ԝан дан: ‹Дьԛәԝьмә рʹуне мә тʹера мә у ԝә нәкә, ләма һәрʹьн бал ԝан йед кӧ рʹун дьфьрошьн, у хԝәрʹа бькʹьрʹьн›. 10 Гава әԝана чун ԝәки рʹун бькʹьрʹьн, зәʹва һат. Ԛизед кӧ һазьр бун, тʹәви ԝи кʹәтьнә щийе дәʹԝате у дәри һатә дадане. 11 Паше, ԛизед дьн жи һатьн у готьн: ‹Ахайе мә, Ахайе мә, дәри ль мә вәкә!› 12 Әԝи ԝанрʹа гот: ‹Әз рʹаст ԝәрʹа дьбежьм, әз ԝә нас накьм›.

13 Ләма һʹьшйар бьминьн, чьмки һун нә рʹоже у нә жи сьһʹәте заньн.

14 Ӧса жи, Пʹадшатийа әʹзмана мина мәрьвәки йә, йе кӧ пешийа бьчуйа ԝәлатәки дьн, гази хӧламед хԝә кьр, у мал-мьлкʹе хԝә тʹәсмили ԝан кьр. 15 Әԝи ль гора фәрәсәтед хӧлама тәлант* данә ԝан: пенщ тәлант дан йәки, дӧ тәлант дан йе дьн у тәлантәк жи да йе сьсийа. Паши ве йәке, әԝ чу ԝәлатәки дьн. 16 Хӧламе кӧ пенщ тәлант стандьбун, дәрберʹа чу у бь ван тәланта арш-верш кьр. Бь ви аԝайи, әԝи пенщ тәлантед дьн жи ԛазанщ кьрьн. 17 Ӧса жи хӧламе дӧда, йе кӧ дӧ тәлант стандьбун, дӧ тәлантед дьн жи ԛазанщ кьрьн. 18 Ле хӧламе кӧ тәлантәк стандьбу, чу, әʹрд кʹола у пʹәре* ахайе хԝә әʹрдеда вәшарт.

19 Паши ԝәʹдәки дьреж, ахайе ԝан хӧлама вәгәрʹийа у дәстпекьр һʹәсабе хԝә тʹәви ԝан рʹаст кә. 20 Хӧламе кӧ пенщ тәлант стандьбун, һат пенщ тәлантед дьн жи хԝәрʹа анин у гот: ‹Ахайе мьн, тә пенщ тәлант тʹәсмили мьн кьр. Ва бьньһерʹә, мьн пенщ тәлантед дьн жи ԛазанщ кьрьн›. 21 Ахайе ԝи готе: ‹Әʹфәрьм, хӧламе ԛәнщ у амьн! Тӧ нав тьштед һьндькда амьн майи, ләма жи әзе гәләк тьшт тʹәсмили тә кьм. Ԝәрә тʹәви ахайе хԝә ша бә›. 22 Паше хӧламе кӧ дӧ тәлант стандьбун, һат у гот: ‹Ахайе мьн, тә дӧ тәлант тʹәсмили мьн кьр. Ва бьньһерʹә, мьн дӧ тәлантед дьн жи ԛазанщ кьрьн›. 23 Ахайе ԝи ԝирʹа гот: ‹Әʹфәрьм, хӧламе ԛәнщ у амьн! Тӧ нав тьштед һьндькда амьн майи, ләма жи әзе гәләк тьшт тʹәсмили тә кьм. Ԝәрә тʹәви ахайе хԝә ша бә›.

24 Хьлазийе, хӧламе кӧ тәлантәк стандьбу һат у гот: ‹Ахайе мьн, мьн заньбу тӧ мәрьвәки сәрт и. Ль щийе кӧ тә нәчандийә, тӧ дьдьруйи у ль щийе кӧ тә нәрʹәшандийә, тӧ бәрәв дьки. 25 Ләма әз тьрсийам у мьн тәланте тә әʹрдеда вәшарт. Һане бьра тәланте тә тәрʹа бә›. 26 Ахайе ԝи ԝирʹа гот: ‹Һәй хӧламе хьраб у тʹәмбәл! Нә тә заньбу ԝәки ль щийе кӧ мьн нәчандийә, әз дьдьрум, у ль щийе кӧ мьн нәрʹәшандийә, бәрәв дькьм? 27 Ԝәки ӧса нә, тә гәрәке пʹәре* мьн бьда базьргана* у гава әз вәгәрʹийама, мьне пʹәре хԝә бь сәләфа бьстанда.

28 Ләма әви тәланти жь ԝи бьстиньн у бьдьнә хӧламе кӧ дәһ тәлантед ԝи һәнә. 29 Чьмки бал кʹе һәйә, әԝе һе зедә бьстинә у ԝе жь дәсте ԝи кем нәбә. Ле бал кʹе тʹӧнә йә, тьште кӧ бал ԝи һәйә жи, ԝе жь ԝи бе стандьне. 30 Ви хӧламе бекер бавежьн дәрва, нав тәʹрийе. Ԝедәре әԝе бьгьри* у ԝе чʹьркә-чʹьрка дьранед ԝи бә›.

31 Гава Кӧрʹе инсен рʹумәта хԝәва тʹәви һʹәму мәләка бе, паше ԝе сәр тʹәхте хԝәйи рʹумәте рʹуне. 32 Һʹәму мьләт ԝе бәр ԝи бьщьвьн у әԝе мәрьва жь һәвдӧ вәԛәтинә, чаԝа кӧ шьван пез жь бьзьна вәдьԛәтинә. 33 Әԝе пез бьдә алийе мьле хԝәйи рʹасте у бьзьна бьдә алийе мьле хԝәйи чʹәпе.

34 Һьнге Пʹадша ԝе йед алийе хԝәйи рʹастерʹа, бежә: ‹Ԝәрен бал мьн, һун йед кӧ жь алийе Баве мьнда һатьнә кʹәрәмкьрьне. У Пʹадшатийа кӧ жь дәстпека дьнйайеда бона ԝә һатийә һазьркьрьне, ԝар бьн. 35 Чьмки әз бьрʹчи бум, ԝә хԝарьн да мьн. Әз тʹи бум, ԝә ав да мьн. Әз хәриб бум, ԝә әз мала хԝәда ԛәбул кьрьм. 36 Әз тәʹзи бум, ԝә кʹьнщ ль мьн кьрьн. Әз нәхԝәш бум, һун мьԛати мьн дьбун. Әз кәледа бум, һун һатьн щәм мьн›. 37 Һьнге кәсед рʹаст ԝе бежьн: ‹Хӧдан, кʹәнге мә тӧ бьрʹчи дити у хԝарьн да тә, йан тӧ тʹи дити у ав да тә? 38 Кʹәнге мә тӧ ча хәриб дити у мә тӧ мала хԝәда ԛәбул кьри, йан тәʹзи дити у кʹьнщ ль тә кьрьн? 39 Кʹәнге мә тӧ нәхԝәш йан кәледа дити у һатьн щәм тә?› 40 Һьнге Пʹадша ԝе ԝанрʹа бежә: ‹Әз рʹаст ԝәрʹа дьбежьм, һәр тьште кӧ ԝә бона йәк жь бьред мьни һәри бьчʹук кьрийә, ԝә бона мьн кьрийә›.

41 Һьнге әԝе йед алийе хԝәйи чʹәперʹа бежә: ‹Һун йед кӧ һатьнә ньфьрʹкьрьне, жь мьн дур кʹәвьн! Бькʹәвьн нав агьре һәр-һәйи, кʹижан кӧ бона Мире-щьна у щьнед* ԝи һатийә һазьркьрьне. 42 Чьмки әз бьрʹчи бум, ле ԝә хԝарьн нәда мьн. Әз тʹи бум, ле ԝә ав нәда мьн. 43 Әз хәриб бум, ле ԝә әз мала хԝәда ԛәбул нәкьрьм. Әз тәʹзи бум, ле ԝә кʹьнщ ль мьн нәкьрьн. Әз нәхԝәш бум у кәледа бум, ле һун мьԛати мьн нәдьбун›. 44 Һьнге әԝана жи ԝе ԝирʹа ӧса бежьн: ‹Хӧдан, кʹәнге мә тӧ бьрʹчи, йан тʹи, йан хәриб, йан тәʹзи, йан нәхԝәш, йан кәледа дити у мә аликʹари нәда тә?› 45 Ԝи чахи әԝе ԝанрʹа ӧса бежә: ‹Әз рʹаст ԝәрʹа дьбежьм, һәр тьште кӧ ԝә бона йәк жь бьред мьни һәри бьчʹук нәкьрийә, ԝә бона мьн жи нәкьрийә›. 46 Әԝана ԝе сәр һʹәта-һʹәтайе ԛьрʹ бьн,* ле йед рʹаст ԝе жийина һʹәта-һʹәтайе бьстиньн».

26 Гава Иса әв һʹәму гьлийе хԝә хьлаз кьр, шагьртед хԝәрʹа гот: 2 «Һун заньн кӧ дӧ рʹож шунда Щәжьна Дәрбазбуне йә, у Кӧрʹе инсен ԝе бьдьнә дәсте дьжмьна, сәва кӧ әԝ сәр стуне бе кӧштьне».

3 Һьнге сәрокед кʹаһина у рʹуспийед щьмәʹте ль һʹәԝша кʹаһине мәзьн, наве кʹижани Ԛәйафа бу, тʹоп бун. 4 Әԝана һәв шеԝьрин, ԝәки Иса бь фелбази бьгьрьн у бькӧжьн. 5 Ле ԝана дьгот: «Бьра әв йәк ԝәʹде щәжьне нибә, ԝәки щьмәʹт тʹәвльһәв нәбә».

6 Гава Иса ль Бәйтанйайе, мала Шьмһʹуне кʹотида бу, 7 жьнәк пе дәрданәкә жь кәвьре мәрмәр, кʹижанеда рʹуне бинхԝәш у бьһа һәбу, һатә бал ԝи. Ԝәʹде шиве әԝе әв рʹун сәр сәре Исада рʹет. 8 Гава шагьрта әв йәк дит, әʹщьз бун у готьн: «Йазьх әв рʹун бадиһәԝа те рʹетьне! 9 Әв рʹун бьһа ԝе бьһата фьротане у пʹәрә кʹәсибарʹа бьһата бәлакьрьне». 10 Әв йәк Исава әʹйан бу у әԝи ԝанрʹа гот: «Һун чьма дьле ԝе дешиньн? Әԝе бона мьн тьштәки ԛәнщ кьр. 11 Йед кʹәсиб һәр гав тʹәви ԝә нә, ле әзе һәр гав тʹәви ԝә нибьм. 12 Әԝе әв рʹуне бинхԝәш рʹетә сәр мьн, ԝәки бәдәна мьн бона дәфьнкьрьне* һазьр кә. 13 Әз рʹаст ԝәрʹа дьбежьм: Сәр тʹәмамийа дьнйайе, һʹәму щийа кʹидәре әв мьзгини бе бәлакьрьне, ԝе кьрьна ве кʹӧлфәте жи бона биранина ԝе бе готьне».

14 Һьнге йәк жь Донздәһа,* наве кʹижани Щьһудайе Исхәрйоти бу, чу бал сәрокед кʹаһина, 15 у гот: «Һәрге әз ԝи бьдьмә дәсте ԝә, һуне чь бьдьнә мьн?» Ԝана соз да кӧ 30 зиви бьдьнә ԝи. 16 Жь ԝе дәме, әԝи мәщал дьгәрʹийа ԝәки нәмамийа Иса бькә.

17 Рʹожа пешьнә Щәжьна Нане Шкәва,* шагьрт һатьнә бал Иса у же пьрсин: «Тӧ дьхԝази әм тәрʹа кʹидәре бона Щәжьна Дәрбазбуне хԝарьне һазьр кьн?» 18 Әԝи гот: «Һәрʹьн бажер бал фьлан мәрьви у ԝирʹа бежьн: ‹Дәрсдар дьбежә: «Ԝәʹде мьн незик буйә. Әзе Щәжьна Дәрбазбуне тʹәви шагьртед хԝә мала тәда дәрбаз кьм»›». 19 Иса шагьртарʹа чаԝа готьбу, ԝана һәма ӧса кьр у һʹәму тьшт бона Щәжьна Дәрбазбуне һазьр кьрьн.

20 Гава бу евар, Иса тʹәви 12 шагьртед хԝә бәр сьфре рʹуньштьбу. 21 Гава ԝана һе дьхԝар, әԝи гот: «Әз рʹаст ԝәрʹа дьбежьм, йәк жь ԝә ԝе нәмамийа мьн бькә». 22 Әԝана жь бо гьлийед ԝи гәләк хәмгин бун у һәр йәки жь ԝи пьрси: «Хӧдан, әԝ әз ьм?» 23 Әԝи щаба ԝан да: «Әԝе кӧ пәʹрийе хԝә тʹәви мьн тʹаседа дькә, әԝе нәмамийа мьн бькә. 24 Бәле, Кӧрʹе инсен гәрәке һәрʹә, чаԝа кӧ һатийә ньвисаре. Ле ԝәй ль ԝи, йе кӧ нәмамийа Кӧрʹе инсен бькә! Бона ԝи кәси ԝе баш буйа, ԝәки әԝ нәһата буйине». 25 Щьһудайе кӧ ԝе нәмамийа ԝи бькьра, щаба ԝи да: «Дәрсдар, әԝ әз ьм?» Иса ԝирʹа гот: «Тә хԝәха гот».

26 Гава ԝана һе хԝарьн дьхԝар, Иса нан һьлда, дӧа кьр,* паше нан кәр кьр,* да шагьртед хԝә у гот: «Һьлдьн у бьхԝьн. Әв бәдәна мьн те һʹәсабе». 27 Пәйрʹа әԝи кʹас һьлда, шькьри да Хԝәде, паше да ԝан у гот: «Һун һʹәму жи жь ве вәхԝьн, 28 чьмки әв кʹас те һʹәсабе ‹хуна мьнә пәймане›. Әԝе бона гәләка бе рʹетьне, сәва бахшандьна гӧна. 29 Ле әз ԝәрʹа дьбежьм: Әзе ида жь ве шәраве вәнәхԝьм һʹәта рʹожа кӧ әз Пʹадшатийа Баве хԝәда тʹәви ԝә шәрава ну вәхԝьм». 30 Хьлазийе, ԝана бона пәсьндайина Хԝәде стьра* у паше дәркʹәтьн чунә Чʹийайе Зәйтʹуне.

31 Һьнге Иса ԝанрʹа гот: «Ишәв һун һʹәмуйе мьн бьһельн.* Чьмки ӧса һатийә ньвисаре: ‹Әзе ль шьван хьм у кәрийе пез ԝе жь һәв бәла бә›. 32 Ле чахе әз жь мьрьне рʹабьм, әзе пешийа ԝә һәрʹьмә Щәлиле». 33 Пәтрус жи ле вәгәрʹанд у готе: «Һәрге һʹәму тә бьһельн жи,* әзе тʹӧ щар тә нәһельм!» 34 Иса ԝирʹа гот: «Әз рʹаст тәрʹа дьбежьм, ишәв пешийа кӧ дик банг бьдә, тӧйе се щара мьн инкʹар ки». 35 Пәтрус ԝирʹа гот: «Һәрге лазьм бә әз тʹәви тә бьмьрьм жи, әзе тʹӧ щар тә инкʹар нәкьм». Һʹәму шагьрта жи ӧса дьгот.

36 Һьнге Иса тʹәви шагьртед хԝә һатә щики бь наве Гетшәмани, у ԝанрʹа гот: «Вьра рʹунен, әзе һәрʹьм дәра һан дӧа бькьм». 37 Әԝи тʹәви хԝә Пәтрус у дӧ кӧрʹед Зәбәди бьрьн. Ԝи чахи Иса хәмгин бу у зәʹф дьлтәнг бу. 38 Һьнге әԝи ԝанрʹа гот: «Дәрде дьле мьн ӧса гьран ә, мина бәр мьрьне. Вьра бьн у тʹәви мьн һʹьшйар бьминьн». 39 Иса һьнәки пешда чу, дәвәрʹу кʹәтә сәр чока у дӧа кьр: «Баво, һәрге дьбә, ве кʹасе жь мьн дур хә. Ле бьра ӧса бә нә кӧ чаԝа әз дьхԝазьм, ле чаԝа тӧ дьхԝази».

40 Гава әԝ вәгәрʹийа бал шагьртед хԝә, дит кӧ әԝана хәԝрʹа чунә. Һьнге әԝи Пәтрусрʹа гот: «Ԝә нькарьбу һәма сьһʹәтәке тʹәви мьн һʹьшйар бьмана? 41 Һʹьшйар бьминьн у тʹьме дӧа бькьн, сәва кӧ һун нәкʹәвьнә щерʹьбандьне. Рʹаст ә, дьл* дьхԝазә, ле бәдән сьст ә». 42 Иса щара дӧда жи чу у дӧа кьр: «Баво, һәрге набә кӧ әв кʹас жь мьн дур кʹәвә у әз же вәнәхԝьм, бьра хԝәстьна тә бе сери». 43 Иса диса һат у шагьрт хәԝеда дитьн, чьмки чʹәʹвед ԝан жь хәԝе гьран бьбун. 44 Иса әԝ һиштьн, чу щара сьсийа дӧа кьр у диса әԝ гьли гот. 45 Паше әԝ диса вәгәрʹийа бал шагьртед хԝә у ԝанрʹа гот: «Һун чаԝа дькарьн ԝәʹдәки ӧсада рʹазен у рʹьһʹәт бьн! Ида сьһʹәт һатийә, ԝәки нәмамийа Кӧрʹе инсен бькьн у ԝи бьдьнә дәсте гӧнәкʹара. 46 Рʹабьн әм һәрʹьн. Ва нәмаме мьн ида незик ә». 47 Гава әԝ һе хәбәр дьда, Щьһудайе кӧ йәк жь Донздәһа* бу, тʹәви гәләк мәрьва һат. Әԝана жь алийе сәрокед кʹаһина у рʹуспийед щьмәʹтеда һатьбун шандьне, у дәсте ԝанда шур у дар һәбун.

48 Аԝа нәмаме ԝи сәва кӧ нишанәке бьдә ԝан, ԝанрʹа ӧса готьбу: «Әз кʹижани пачʹ кьм, һәма әԝ ә, ԝи бьгьрьн». 49 Әԝ дәрберʹа незики Иса бу у ԝирʹа гот: «Сьлав ль тә, Дәрсдар!», у әԝи Иса пачʹ кьр. 50 Ле Иса ԝирʹа гот: «Тӧ бона чь һати ԝьра?» Һьнге әԝана пешда һатьн у Иса гьртьн. 51 Ле йәк жь ԝан, йе кӧ тʹәви Иса бу, шуре хԝә дәрхьст, хӧламе кʹаһине мәзьн хьст у гӧһе ԝи жекьр. 52 Иса ԝирʹа гот: «Шуре хԝә бькә щи. Чьмки һәр кәсе кӧ шур һьлдьдә ԝе бь шур бе кӧштьне. 53 Тә тʹьре әз нькарьм жь Баве хԝә бьхԝазьм, ԝәки әԝ һәма ньһа бь һʹәзара* мәләка бона мьн бьшинә? 54 Ле һьнге Ньвисаред Пироз, йед кӧ дьбежьн ԝәки гәрәке ӧса бьԛәԝьмә, ԝе чаԝа бенә сери?» 55 Һәма паши ве йәке, Иса ԝан мәрьварʹа гот: «Чьрʹа әз ԛачах ьм, һун бь дара у шура һатьнә мьн бьгьрьн? Һәр рʹож әз пʹарьстгәһеда рʹудьньштьм у мьн һин дькьр, чьрʹа һьнге ԝә әз нәдьгьртьм? 56 Ле әв һәр тьшт ӧса ԛәԝьми, ԝәки Ньвисаред Пʹехәмбәра бенә сери». Һьнге һʹәму шагьртед ԝи әԝ һиштьн у рʹәвин.

57 Мәрьвед кӧ Иса гьртьбун, әԝ бьрьнә бал кʹаһине мәзьн, Ԛәйафа. Ԝедәре ԛанунзан у рʹуспи ль һәв тʹоп бьбун. 58 Ле Пәтрус дурва пәй Иса дьчу һʹәта һʹәԝша кʹаһине мәзьн, у паше кʹәтә һьндӧрʹ тʹәви хӧламед мале рʹуньшт, ԝәки бьвинә чь ԝе бьԛәԝьмә.

59 Сәрокед кʹаһина у тʹәмамийа Диԝана Бьльнд* йа Щьһуйа мьԛабьли Иса шәʹдед дәрәԝ дьгәрʹийан, ԝәки ԝи бьдьнә кӧштьне. 60 Гәләк шәʹдед дәрәԝин һатьн, ле ԝана тʹӧ тьшт нәдьдит ԝәки Иса сущдар кьн. Паше дӧ кәс һатьн, 61 у готьн: «Әви мәрьви ӧса гот: ‹Әз дькарьм пʹарьстгәһа Хԝәде һьлшиньм у нава се рʹожада тʹәзәда ава кьм›». 62 Һьнге кʹаһине мәзьн рʹабу сәр пʹийа у жь Иса пьрси: «Тӧ нахԝази щаба хԝә бьди? Тӧ сә дьки әв мәрьв мьԛабьли тә чь дьбежьн?» 63 Ле Иса дәнге хԝә нәкьр. Һьнге кʹаһине мәзьн гот: «Бәр Хԝәдайе сах сонд бьхԝә у мәрʹа бежә, тӧ йи Мәсиһ, Кӧрʹе Хԝәде?» 64 Иса ԝирʹа гот: «Тә хԝәха гот. Ле әз ԝәрʹа дьбежьм: Жь вьр шунда һуне бьвиньн Кӧрʹе инсен алийе мьле рʹасте кʹеләка Йе Һәри Ԛәԝат рʹуньшти у сәр әʹԝред әʹзмен те». 65 Һьнге кʹаһине мәзьн кʹьнщед хԝә ԛәлаштьн у гот: «Әԝи кʹьфьр кьр! Ида шәʹдед зедә чи мәрʹа ньн? Ԝә хԝәха ньһа бьһист, ԝәки әԝ кʹьфьрийа дькә. 66 Һун сәр ве йәке чь дьфькьрьн?» Ԝана гот: «Әԝ һежайи кӧштьне йә!» 67 Һьнге ԝана дәстпекьр тʹуйи рʹуйе ԝи бькьн, у бь кʹӧлма ль ԝи хьн. Йед дьн силә ле дьхьстьн, 68 у дьготьн: «Һәй Мәсиһ, һәрге тӧ пʹехәмбәр и, һәла бежә кʹи тә хьст?»

69 Ԝе дәме, Пәтрус дәрва һʹәԝшеда рʹуньшти бу. Щарик һатә щәм ԝи у гот: «Тӧ жи тʹәви Исайе Щәлиле буйи!» 70 Ле әԝи бәр һʹәмуйа әв йәк инкʹар кьр у гот: «Әз ньзаньм тӧ дәрһәԛа чь дьбежи». 71 Гава әԝ дәркʹәт бәр дәре һʹәԝше, щарикә дьн әԝ дит у готә ԝан, йед кӧ ԝедәре бун: «Әв мәрьв тʹәви Исайе Ньсрәти бу». 72 Әԝи диса әв йәк инкʹар кьр у сонд хԝар: «Әз ви мәрьви нас накьм!» 73 Һьнә ԝәʹдә шунда, йед кӧ ԝедәре сәкьни бун, незики Пәтрус бун у готьн: «Тӧ бь рʹасти йәк жь ԝан и, чьмки щурʹе хәбәрдана* тә, тә дьфьрошә». 74 Һьнге әԝи ньфьрʹ ль хԝә кьр у сонд хԝар: «Әз ви мәрьви нас накьм!» У дәрберʹа дикәки банг да. 75 Ԝе дәме гьлийед Иса кʹәтьнә бира Пәтрус: «Пешийа кӧ дик банг бьдә, тӧйе се щара мьн инкʹар ки». Әԝ дәркʹәтә дәрва у кʹәлә-кʹәл гьрийа.

27 Гава сьбәһ сафи бу, сәрокед кʹаһина у рʹуспийед щьмәʹте һәв шеԝьрин, ԝәки Иса бьдьнә кӧштьне. 2 Ԝана дәстед ԝи гьреда, әԝ бьрьн у данә дәсте Пилатойе ԝәли.

3 Щьһудайе кӧ нәмамийа Иса кьр, гава дит кӧ Исарʹа щәзайе мьрьне һатә дайине, пʹошман бу. Ләма әԝи әв 30 зив пашда вәгәрʹандә сәрокед кʹаһина у рʹуспийа, 4 у ԝанрʹа гот: «Мьн гӧнә кьр, мьн нәмамийа мәрьвәки бесущ кьр». Ле ԝана гот: «Ижа әм чь бькьн? Әв ише тә йә!» 5 Һьнге Щьһуда әв зив авитьн нав пʹарьстгәһе, дәркʹәт чу, у паше хԝә дарда кьр. 6 Сәрокед кʹаһина әв зив һьлдан у готьн: «Изьн тʹӧнә кӧ әм ван пʹәра бькьнә хьзна пʹарьстгәһе, чьмки жь бо ван пʹәра хун һатә рʹетьне». 7 Һьнге әԝана һәв шеԝьрин, у бь ван пʹәра әʹрде щерʹкәрәки* кʹьрʹин, сәва йед хәриб ԝедәре бенә чʹәʹлкьрьне. 8 Ләма жи һʹәта рʹожа иро ви әʹрдирʹа «Әʹрде Хуне» те готьне. 9 Һьнге әв готьнед кӧ Йерәмйа пʹехәмбәр бәреда готьбу, һатьнә сери: «Ԝана 30 зив һьлдан, демәк әв баһе кӧ кӧрʹед Исраелийа ԛайил бьбун, ԝәки бона ԝи бьдьн. 10 У ԝана бь ԝан пʹәра әʹрде щерʹкәр кʹьрʹи, чаԝа кӧ Йаһоԝа тʹәми дабу мьн».

11 Иса ль бәр ԝәли сәкьни, у ԝәли жь ԝи пьрси: «Тӧ йи Пʹадше Щьһуйа?» Иса щаба ԝи да: «Тә хԝәха гот». 12 Ле гава сәрокед кʹаһина у рʹуспийа әԝ нәһәԛ дькьрьн, әԝи щаба ԝан нәдьда. 13 Һьнге Пилато жь ԝи пьрси: «Тӧ дьбьһейи кӧ әԝана һьмбәри тә чьԛас тьшт дьбежьн?» 14 Ле әԝи щаба ԝи нәда, ԛә гьлик жи нәгот, у ԝәли жь бо ве йәке гәләк әʹщебмайи ма.

15 Ԝәʹде һәр щәжьне әʹдәте ԝәли әв бу, кӧ ль гора хԝәстьна щьмәʹте гьртики бәрʹдә. 16 Ԝи чахи, ԛачахәки навдар бь наве Барабас, гьрти бу. 17 Ләма жи Пилато щьмәʹта тʹопбуйирʹа ӧса гот: «Һун дьхԝазьн әз кʹижани бона ԝә бәрʹдьм? Барабас йан Исайе кӧ сәр ԝи Мәсиһ те готьне?» 18 Чьмки Пилато заньбу кӧ ԝана жь һʹәвсудийе Иса дабунә дәсте ԝи. 19 Хенщи ԝе йәке, гава әԝ сәр кʹӧрсийа диԝане рʹуньштибу, жьна ԝи ԝирʹа хәбәр шанд у гот: «Дәсте хԝә нәдә ԝи мәрьве рʹаст, чьмки иро шәв әз хәԝнеда гәләк жь бо ԝи чәрчьрим». 20 Ле сәрокед кʹаһина у рʹуспийа щьмәʹт рʹази кьр, кӧ Барабас бе бәрʹдане, ле Иса бе кӧштьне. 21 Ԝәли диса жь ԝана пьрси: «Һун дьхԝазьн әз жь ԝан һәрда кʹижани бәрʹдьм?» Ԝана жи гот: «Барабас». 22 Пилато ԝанрʹа гот: «Ле Исайе кӧ сәр ԝи Мәсиһ те готьне, әз чаԝа бькьм?» Һʹәмуйа гот: «Ԝи стуне хә!» 23 Әԝи гот: «Чьрʹа? Әԝи чь хьраби кьрийә?» Ле ԝана бь дәнге һе бьльнд дькьрә ԛирʹин: «Ԝи стуне хә!»

24 Гава Пилато дит кӧ тьштәк жь дәсте ԝи найе у щьмәʹт һе тʹәвиһәв дьбә, әԝи ав һьлда, бәр щьмәʹте дәстед хԝә шушт у гот: «Хуна ви мәрьви сәр стийе мьн нинә, ле сәр стийе ԝә йә». 25 Ле һʹәмуйа ԝирʹа гот: «Бьра хуна ԝи сәр стийе мә у зарʹед мә бә». 26 Һьнге әԝи Барабас бәрʹда, у фәрман да ԝәки Иса бьдьнә бәр ԛамчийа у ԝи стуне хьн.

27 Паше әскәред ԝәли Иса бьрьнә ԛәсьра ԝәли у тʹәмамийа кʹома әскәра сәр сәре ԝи щьвандьн. 28 Ԝана кʹьнщед ԝи же ехьстьн у чӧхәки сор ль ԝи кьрьн. 29 Паше ԝана тʹащәк жь стьрийа чекьр дани сәр сәре ԝи у ԛамишәк жи да дәсте ԝийи рʹасте. Әԝана бәр ԝи кʹәтьнә сәр чока, ԛәрфед хԝә ԝи кьрьн у готьн: «Сьлав ль тә, йа Пʹадше Щьһуйа!» 30 У тʹуйи ԝи кьрьн, ԛамиш жь дәсте ԝи стандьн у сәре ԝи дьхьстьн. 31 Пәй ԛәрфкьрьнерʹа чӧх жь ԝи ехьстьн, кʹьнщед ԝи диса ль ԝи кьрьн у әԝ бьрьн ԝәки стунева мьх кьн.

32 Гава әԝана жь бажер дәркʹәтьн, мәрьвәки жь Курене дитьн, наве кʹижани Шьмһʹун бу. Ԝана зоре ль ԝи кьр, ԝәки стуна Иса һьлгьрә. 33 Гава әԝана гьһиштьнә щийе бь наве Голгота, чь кӧ те һʹәсабе «Щийе Ԛаф», 34 ԝана шәрав у тьштәки тәʹл тʹәвһәв кьрьн у данә Иса. Ле чахе әԝи тәʹм кьр, нәхԝәст вәхԝә. 35 Чахе ԝана әԝ сәр стуне мьх кьр, сәр кʹьнщед ԝи пʹәшк авитьн у нав хԝәда пʹарәвәкьрьн. 36 Паше әԝана ԝедәре рʹуньштьн у ԛәрәԝьлийа ԝи дькьрьн. 37 Ԝана ӧса жи ньвисара мәʹнийа сущдаркьрьна ԝи дани феза сәре ԝи: «Әв Иса йә, Пʹадше Щьһуйа».

38 Һьнге дӧ ԛачах жи кʹеләка ԝи стуне хьстьн, йәк алийе ԝийи чʹәпе у йе дьн жи алийе ԝийи рʹасте. 39 Кәсед кӧ бәр ԝирʹа дәрбаз дьбун, әԝ беһӧрмәт дькьрьн, сәре хԝә дьһʹәжандьн, 40 у дьготьн: «Нә тәйе пʹарьстгәһ һьлшанда у се рʹожада чекьра. Дә хԝә хьлаз кә! Һәрге тӧ кӧрʹе Хԝәде йи, дә жь ве стуне бәржер бә!» 41 Ӧса жи сәрокед кʹаһина тʹәви ԛанунзан у рʹуспийа дәстпекьрьн ԛәрфед хԝә ԝи бькьн у дьготьн: 42 «Әԝи хәлԛ хьлаз кьрьн, ле нькарә хԝә хьлаз кә! Әԝ Пʹадше Исраеле йә, дә бьра ньһа жь стуне бәржер бә, у әме ԝи баԝәр кьн. 43 Әԝи гӧмана хԝә дайә сәр Хԝәде, һәрге Хԝәде жь ԝи рʹази йә, дә бьра ԝи хьлаз кә. Чьмки әԝи дьгот: ‹Әз Кӧрʹе Хԝәде мә›». 44 Ԛачахед кӧ кʹеләка ԝи сәр стуна дардакьри бун, һәла һе ԝана жи ӧса әԝ беһӧрмәт дькьр.

45 Нивро незики сьһʹәта донздәһа* һʹәта незики сьһʹәта сьсийа,* тәʹри кʹәтә сәр рʹуйе ви әʹрди. 46 Незики сьһʹәта сьсийа,* Иса бь дәнгәки бьльнд кьрә гази у гот: «Ели, Ели, лама сабахтани?», чь кӧ те һʹәсабе: «Хԝәдайе мьн, Хԝәдайе мьн, тә чьрʹа әз һиштьм?» 47 Һьнә кәсед кӧ ԝедәре сәкьни бун, әв йәк бьһистьн у готьн: «Әԝ гази Елйас дькә». 48 У йәк жь ԝан ләзә-ләз чу, луфьк һьлда, шәрава тьрʹшда кьр, пе ԛамишәки бьльнд кьр у да Иса, ԝәки әԝ вәхԝә. 49 Ле йед майин готьн: «Ле бьһелә! Әм дьхԝазьн бьвиньн, һәла Елйасе бе ԝи хьлаз кә?» 50 Иса диса щарәке бь дәнгәки бьльнд кьрә гази у мьр.*

51 Һьнге пʹәрʹда пʹарьстгәһе жь сәри һʹәта бьни ԛәльши у бу дӧ пʹара. Әʹрд һʹәжийа у зьнар ԛәльшин. 52 Тʹьрб вәбун у гәләк щьнйазед мәрьвед пироз, жь тʹьрбе хӧйа бун 53 у гәләк мәрьва әԝана дитьн. (Паши рʹабуна Иса жь мьрьне, мәрьвед кӧ жь нав мәзәла дьһатьн, кʹәтьнә бажаре пироз). 54 Гава сәрсәд у кәсед кӧ тʹәви ԝи нобәдарийа Иса дькьрьн, әʹрдһʹәж у әв тьштед кӧ ԛәԝьмин, дитьн, гәләк тьрсийан у готьн: «Рʹасти жи әв Кӧрʹе Хԝәде бу».

55 Ԝедәре гәләк жьн жи һәбун, кӧ дурва дьньһерʹин. Әԝана жь Щәлиле тʹәви Иса һатьбун, бәрдәсти ԝирʹа кьрьбун. 56 Мәрйәма Мәгдәлани, Мәрйәма дийа Аԛуб у Йусес, у дийа кӧрʹед Зәбәди нав ԝанда бун.

57 Бәре еваре, мәрьвәки дәԝләти һат, йе кӧ жь Аримәтйайе бу. Наве ԝи Усьв бу, у әԝ жи шагьрте Иса бу. 58 Әԝ чу бал Пилато у щьнйазе Иса же хԝәст. Пилато фәрман да, ԝәки жерʹа бе дайине. 59 Усьв щьнйазе ԝи һьлда у бь кʹьтане рʹьнд у тʹәмьз әԝ пʹечʹа. 60 Усьв әв щьнйаз дани тʹьрба хԝәйә ну, кʹижан кӧ әԝи зьнарда кʹола бу. Паше әԝи кәвьрәки мәзьн гьлори бәр дәре тʹьрбе кьр у жь ԝедәре чу. 61 Ле Мәрйәма Мәгдәлани у Мәрйәма дьн, ԝедәре бәр дәре тʹьрбе рʹуньшти ман.

62 Рʹожа дьн, паши Рʹожа Һазьркьрьне,* сәрокед кʹаһина у Ферьси бәр Пилато һәв тʹоп бун, 63 у жерʹа готьн: «Ахайе мә, те бира мә, әԝе дәрәԝин чахе һе сах бу ӧса готьбу: ‹Паши се рʹожа әзе жь мьрьне рʹабьм›. 64 Ләма фәрмане бьдә, ԝәки ԛәрәԝьлийа тʹьрба ԝи бькьн һʹәта рʹожа сьсийа, сәва кӧ шагьртед ԝи нәйен, щьнйазе ԝи нәдьзьн у хәлԛерʹа нәбежьн: ‹Әԝ жь мьрьне һатийә рʹакьрьне!› Һьнге әв дәрәԝа пашьн ԝе жь йа пешьн хьрабтьр бә». 65 Пилато ԝанрʹа гот: «Әзе ԛәрәԝьла бьдьмә дәсте ԝә. Һәрʹьн чаԝа кӧ һун заньн ӧса жи мьԛати тʹьрбе бьн». 66 Әԝ жи чун у мьԛати тʹьрбе дьбун. Ԝана кәвьр мор кьр у ԛәрәԝьл данә бәр.

28 Пәй Шәмийерʹа,* сьбәһе зу рʹожа пешьн йа һʹәфтийе, Мәрйәма Мәгдәлани у Мәрйәма дьн һатьн, сәва кӧ тʹьрбе бьньһерʹьн.

2 Ԝедәре әʹрдһʹәжәкә мәзьн бьбу, чьмки мәләке Йаһоԝа жь әʹзмен һатьбу хԝаре, кәвьре бәр тʹьрбе дабу алики у сәр рʹуньштьбу. 3 Рʹува әԝ мина бьруске бу, у кʹьнщед ԝи мина бәрфе сьпи бун. 4 Нобәдар жь тьрса ԝи, ләрьзин у рʹәнге ԝан бу мина рʹәнге мьрийа.

5 Ле мәләк ван кʹӧлфәтарʹа гот: «Нәтьрсьн! Әз заньм һун Исайе кӧ сәр стуне һатә дардакьрьне, дьгәрʹьн. 6 Әԝ вьра нинә. Чаԝа кӧ әԝи готьбу, әԝ жь мьрьне һатийә рʹакьрьне. Ԝәрен ԝи щийе кӧ щьнийазе ԝи бу, бьньһерʹьн. 7 Паше зу һәрʹьн бал шагьртед ԝи у ԝанрʹа бежьн: ‹Әԝ жь мьрьне һатийә рʹакьрьне у пешийа ԝә дьчә Щәлиле. Һуне ԝи ԝедәре бьвиньн›. Әв ә чь жи мьн дьхԝәст ԝәрʹа бьгота».

8 Әв кʹӧлфәт бь тьрс у шабунәкә мәзьн бь ләз жь тʹьрбе дәркʹәтьн чун, ԝәки һәр тьшти шагьртарʹа гьли кьн. 9 У ва Иса рʹасти ԝан һат у гот: «Сьлав ль ԝә!» Әԝана незики ԝи бун, хԝә авитьнә ньгед ԝи у сәре хԝә бәр ԝи данин. 10 Һьнге Иса ԝанрʹа гот: «Нәтьрсьн! Һәрʹьн у һәр тьшти бьред мьнрʹа бежьн, ԝәки әԝана һәрʹьн Щәлиле у ԝедәре ԝе мьн бьвиньн».

11 Гава әв жьн һе рʹеда бун, һьнә нобәдар чун бажер у тьштед кӧ ԛәԝьмибун сәрокед кʹаһинарʹа гьли кьрьн. 12 Сәрокед кʹаһина жи тʹәви рʹуспийа тʹоп бун, һәв шеԝьрин, паше гәләк зив данә әскәра, 13 у ԝанрʹа готьн: «Бежьн: ‹Шәв, гава әм рʹазайи бун, шагьртед ԝи һатьн у щьнийазе ԝи дьзин›. 14 У һәрге әв хәбәр бьгьһижә гӧһе ԝәли, һун ԛә хәм нәкьн. Әме һәр тьшти ԝирʹа шьровәкьн».* 15 Ԝана әв зив һьлдан у чаԝа кӧ ԝанрʹа готьбун, ӧса кьрьн. У әв дәрәԝи һʹәта рʹожа иро нава Щьһуйада бәла буйә.

16 Һәр 11 шагьрт жи чунә Щәлиле, сәр ԝи чʹийайе кӧ Иса ԝанрʹа готьбу. 17 Гава ԝана әԝ дит, бәр ԝи кʹәтьнә сәр чока. Ле һьнәк жь ԝан дӧдьли бун гәло әԝ Иса йә. 18 Иса незики ԝан бу у ԝанрʹа гот: «Мьнрʹа һʹәму һʹӧкӧм һатийә дайине ль сәр әʹзмен у ль сәр әʹрде. 19 Ләма жи һәрʹьн, мәрьвед жь һʹәму мьләта бькьнә шагьртед мьн у ԝана бь наве Бав, Кӧрʹ у рʹӧһʹе пироз бьньхӧминьн, 20 у һин кьн, ԝәки әԝ һʹәму тʹәмийед кӧ мьн данә ԝә, биньн сери. У әзе һәр рʹож, һʹәта рʹожед хьлазийейә* ве дьнйайе тʹәви ԝә бьм».