ЛЬ ГОРА МАРКОС

1 Дәстпека мьзгинийа дәрһәԛа Иса Мәсиһ, Кӧрʹе Хԝәде: 2 Чаԝа кӧ кʹьтеба Ишайа пʹехәмбәрда һатийә ньвисаре: «(Әз ԛасьде хԝә пешийа тә дьшиньм. Әԝе пешийа тә рʹе һазьр кә.) 3 Бәрʹийеда кәсәк бь дәнге бьльнд дькә гази: ‹Рʹийа Йаһоԝа һазьр кьн! Рʹийед ԝи рʹаст кьн›». 4 Йуһʹәннайе Ньхӧмдар* һатә бәрʹийе. Әԝи мәрьварʹа дьгот, ԝәки тʹобә кьн у ве йәке бь ньхӧмандьне нишан кьн, сәва кӧ гӧнед ԝан бенә бахшандьне. 5 Тʹәмамийа Щьһустане у һʹәму бьнәлийед Оршәлиме дьһатьнә щәм ԝи. Ԝана гӧнед хԝә дьданә рʹуйе хԝә, у әԝи әԝана Чʹәме Урдӧнеда дьньхӧмандьн.* 6 Кʹьнщед Йуһʹәнна жь һьрийа дәве бун у ԛайиша сәр пьшта ԝи жь чʹәрм бу. Әԝи кӧли у һьнгьве чоле дьхԝар. 7 Әԝи ӧса дьгот: «Йе кӧ паши мьн те, жь мьн ԛәԝаттьр ә, у әз нәһежа мә ԝәки ԛуз бьм у чарьхед ԝи бехьм.* 8 Мьн һун бь аве ньхӧмандьн, ле әԝе ԝә бь рʹӧһʹе пироз бьньхӧминә».

9 Ԝан рʹожада, Иса жь Ньсрәта Щәлиле һат у бь дәсте Йуһʹәнна Чʹәме Урдӧнеда һатә ньхӧмандьне. 10 У һәма ча Иса жь аве дәркʹәт, дит кӧ әʹзман вәбун у рʹӧһʹе Хԝәде мина кәвоткәке дакʹәтә сәр ԝи. 11 У дәнгәк жь әʹзмана һат: «Тӧ йи Кӧрʹе мьни дәлал, йе кӧ дьле мьн ша дькә».

12 У дәрберʹа рʹӧһʹ әԝ бьрә бәрʹийе. 13 Иса 40 рʹожи бәрʹийеда нава тәрәԝьлада бу, у алийе Шәйтʹанда дьһатә щерʹьбандьне, ле мәләка ԝирʹа бәрдәсти дькьрьн.

14 Пәй гьртьна Йуһʹәннарʹа, Иса чу Щәлиле мьзгинийа Хԝәде бәла дькьр 15 у дьгот: «Ԝәхт перʹа гьһиштийә. Пʹадшатийа Хԝәде незик буйә. Тʹобә кьн у баԝәрийа хԝә ве мьзгинийе биньн».

16 Гава Иса бәр Бәʹра Щәлиле дьмәшийа, әԝи Шьмһʹун у бьре ԝи Әндраԝьс дитьн. Ԝана тʹорʹ давитьнә бәʹре, чьмки мәʹсигьр бун. 17 Иса ԝанрʹа гот: «Пәй мьн ԝәрен, у әзе ԝә бькьмә мәʹсигьред мәрьва».* 18 Ԝана жи һәма ԝе дәме тʹорʹед хԝә һиштьн у пәй ԝи чун. 19 Гава Иса һьнәки пешда чу, әԝи Аԛубе кӧрʹе Зәбәди у бьре ԝи Йуһʹәнна дитьн. Әԝана ԛәйикеда бун у тʹорʹед хԝә дьдьрутьн.* 20 Дәрберʹа Иса гази ԝан кьр. У ԝана жи баве хԝә Зәбәди тʹәви хәбатчийа* ԛәйикеда һишт у пәй Иса чун. 21 Әԝана чунә Кәпәрнаһуме.

Чаԝа кӧ рʹожа Шәмийе һат, Иса кʹәтә кʹьниште* у дәстпекьр һин кә. 22 Мәрьв сәр һинкьрьна ԝи зәндәгьрти ман, чьмки әԝи ча йәки хԝәйиһʹӧкӧм әԝана һин дькьрьн, нә кӧ мина ԛанунзана. 23 Һьнге кʹьништеда мәрьвәки щьнакʹәти һәбу, у әԝи кьрә ԛирʹин: 24 «Исайе Ньсрәти, тӧ чь жь мә дьхԝази? Тӧ һати ԛьрʹа мә бини? Әз рʹьнд заньм кӧ тӧ кʹи йи. Тӧ Пироз и, йе кӧ Хԝәде шандийә!» 25 Ле Иса сәрт фәрман да ԝи у гот: «Кәрʹ бә у жь ԝи дәркʹәвә!» 26 Щьн әԝ мәрьв вәһәжанд, бь дәнгәки бьльнд кьрә ԛирʹин у жь ԝи дәркʹәт. 27 Мәрьв гәләк әʹщебмайи ман, дәстпекьрьн һәврʹа бьшеԝьрьн у бежьн: «Әв чь йә? Әва һинкьрьнәкә тʹәзә йә! Әԝ бь ԛәԝата Хԝәде һәла һе фәрмане дьдә щьна жи, у әԝана жи гӧрʹа ԝи дькьн». 28 Нав у дәнге ԝи ль тʹәмамийа һәрема Щәлиле зу бәла бу.

29 Чахе Иса, Аԛуб, Йуһʹәнна, Шьмһʹун у Әндраԝьс жь кʹьниште дәркʹәтьн, чунә мала Шьмһʹун у Әндраԝьс. 30 Хԝәсийа Шьмһʹун бь гәрма бьльнд нав ньвинада бу, у дәрһәԛа ве йәке дәрберʹа Исарʹа готьн. 31 Иса чу бал ԝе, дәсте ԝе гьрт у ле рʹакьр. Һьнге гәрма ԝе дани, у әԝе ԝанрʹа бәрдәсти кьр.

32 Еваре, гава рʹо чу ава, мәрьва һʹәму кәсед нәхԝәш у йед щьнакʹәти анинә бал ԝи. 33 Тʹәмамийа щьмәʹта бажер бәр дери тʹоп бу. 34 Иса гәләк мәрьвед бь щурʹә-щурʹә нәхԝәшийа ԛәнщ кьрьн у гәләк щьн жи дәрхьстьн. Ле әԝи нәдьһишт щьн тьштәки бежьн, чьмки ԝана заньбу кӧ әԝ Мәсиһ ә.*

35 Бәрбанге, гава һе тәʹри бу, Иса рʹабу чу щики ӧса, кʹидәре тʹӧ кәс тʹӧнә бу, у дәстпекьр дӧа бькә. 36 Ле Шьмһʹун у йед кӧ тʹәви ԝи бун, һʹәму дәра Иса дьгәрʹийан. 37 Гава ԝана әԝ дит, ԝирʹа готьн: «Гьшк тә дьгәрʹьн». 38 Ле әԝи ԝанрʹа гот: «Ԝәрен әм һәрʹьн щики дьн, нав бажаред дәр-дор, сәва кӧ әз ԝедәре жи мьзгинийе бәла кьм, чьмки әз бона ве йәке һатьмә». 39 У Иса чу нав тʹәмамийа Щәлиле кʹьништед ԝанда мьзгини бәла дькьр у щьн дәрдьхьстьн.

40 Ԝедәре йәки кʹоти һатә бал Иса, кʹәтә сәр чока у лавайа ԝи кьр: «Һәрге тӧ тʹәне бьхԝази, тӧ дькари мьн ԛәнщ ки».* 41 Дьле Иса сәр ԝи шәԝьти, дәсте хԝә дайе у готе: «Әз дьхԝазьм! Ԛәнщ бә». 42 Дәрберʹа кʹотибун же чу у әԝ ԛәнщ бу. 43 Пешийа кӧ әԝ бьчуйа, Иса сәрт тʹәми ль ԝи кьр 44 у готе: «Бьньһерʹә, тʹӧ кәсирʹа тьштәки нәбежи, ле һәрʹә хԝә нишани кʹаһин кә, у чаԝа кӧ Муса тʹәми дайә, бона паԛьжбуна хԝә ԛӧрбане бьдә, ԝәки әԝ бона ԝан бьбә избатийа ԛәнщкьрьна тә».* 45 Ле әԝ мәрьв жь ԝедәре чу у дәстпекьр һʹәму дәра гьли кә, кӧ чь ԛәԝьми. Иса ида нькарьбу әшкәрә бьчуйа бажарәки, ләма жи әԝ жь бажер дәр, щийед хәԝлә дьма. Ле йәкә жь һʹәму дәра мәрьв дьһатьнә бал ԝи.

2 Паши чәнд рʹожа Иса вәгәрʹийа Кәпәрнаһуме, у дәнг бәла бу кӧ әԝ малда йә. 2 Һаԛас мәрьв тʹоп бун, кӧ бәр дери жи щи-сьтʹар тʹӧнә бу. У Иса дәстпекьр дәрһәԛа мьзгинийе тʹәви ԝан хәбәр дә. 3 У чар мәрьва шьлушәʹтәк анинә бал ԝи. 4 Ле жь бо әʹлаләте ԝана нькарьбу әԝ бьвьра бал Иса. Ләма ԝана бане мале сәр Исарʹа һәв дәрхьстьн у йе шьлушәʹт ньвинава* дахьстьнә жере. 5 Гава Иса баԝәрийа ԝан дит, йе шьлушәʹтрʹа гот: «Лаԝо, гӧнед тә һатьнә бахшандьне». 6 Ԝедәре һьнә ԛанунзан жи рʹуньшти бун у дьле хԝәда дьготьн: 7 «Әв мәрьв чьрʹа ӧса дьбежә? Әԝ кʹьфьрийа дькә. Хенщи Хԝәде кʹи дькарә гӧна бьбахшинә?» 8 Ле Иса дәрберʹа тедәрхьст* кӧ әԝана чь дьфькьрьн у жь ԝан пьрси: «Һун чьрʹа дьле хԝәда ӧса дьфькьрьн? 9 Чь дьһа һеса йә шьлушәʹтрʹа бежьн, ‹Гӧнед тә һатьнә бахшандьне›, йан ‹Рʹабә, ньвина хԝә һьлдә у рʹе һәрʹә›? 10 Ле сәва һун бьзаньбьн кӧ һʹӧкӧме Кӧрʹе инсен сәр әʹрде һәйә, ԝәки гӧна бьбахшинә . . .» У әԝи готә йе шьлушәʹт: 11 «Әз тәрʹа дьбежьм, рʹабә, ньвина хԝә һьлдә у һәрʹә мала хԝә». 12 Әԝ рʹабу, дәрберʹа ньвина хԝә һьлда у бәр чʹәʹве һʹәмуйа дәркʹәтә дәрва. Гьшк зәндәгьрти ман, у шькьри дьданә Хԝәде, дьготьн: «Мә тьштәки ӧса ԛә тʹӧ щар нәдитийә!»

13 Иса диса чу бәр дәве бәʹре. Гәләк мәрьв дьһатьнә бал ԝи у әԝи әԝана һин дькьрьн. 14 Гава Иса рʹеда дьчу, әԝи Леԝийе кӧрʹе Һалфаԝо дит, йе кӧ ль щийе тʹопкьрьна хәрща рʹуньшти бу, у ԝирʹа гот: «Пәй мьн ԝәрә!» Әԝ жи рʹабу у пәй ԝи чу. 15 Паше гава Иса мала ԝида бәр сьфре рʹуньштьбу, гәләк хәрщгьр у гӧнәкʹар жи тʹәви Иса у шагьртед ԝи рʹуньштьбун, чьмки гәләк жь ԝан пәй ԝи дьчун. 16 Ле гава ԛанунзан у Ферьсийа дит кӧ әԝ тʹәви гӧнәкʹар у хәрщгьра хԝарьне дьхԝә, шагьртед ԝирʹа готьн: «Әԝ ча тʹәви хәрщгьр у гӧнәкʹара хԝарьне дьхԝә?» 17 Иса әв йәк бьһист у ԝанрʹа гот: «Нә кӧ йед сьһʹәт-ԛәԝат һʹәԝще һʹәким ьн, ле йед нәхԝәш. Әз һатьм, нә кӧ гази йед рʹаст, ле гази гӧнәкʹара кьм».

18 Шагьртед Йуһʹәнна у Ферьсийа рʹожи дьгьртьн. Ләма әԝана һатьн бал Иса у жь ԝи пьрсин: «Чьрʹа шагьртед Йуһʹәнна у шагьртед Ферьсийа рʹожи дьгьрьн, ле шагьртед тә рʹожи нагьрьн?» 19 Иса щаба ԝан да: «Гәло мәʹнийа һәвалед зәʹва һәйә ԝәки рʹожи бьгьрьн, һʹәта зәʹва тʹәви ԝан ә? Һʹәта зәʹва щәм ԝан бә, нә лазьм ә әԝана рʹожи бьгьрьн. 20 Ле ԝәхт ԝе бе, гава зәʹва жь ԝан бе һьлдане, у һьнге әԝана ԝе рʹожи бьгьрьн. 21 Тʹӧ кәс кʹьнщәкә кәвьнә ԛәльшива пʹәрчʹе тʹәзә надьру, чьмки пʹәрчʹе тʹәзә ԝе кʹьнща кәвьн бькʹьшинә, у щийе ԛәльши ԝе һе ль бәр һәв һәрʹә. 22 Ӧса жи тʹӧ кәс шәрава тʹәзә накә мәшкед* кәвьн. Һәрге кәсәк ӧса бькә, шәрав ԝе мәшка бьтʹәԛинә, һьнге ԝе шәрав бьрʹьжә у мәшк жи ида кери тьштәки нәйен. Ле шәрава тʹәзә дькьнә мәшкед тʹәзә».

23 Гава Иса рʹожа Шәмийе* нава зәвийарʹа дәрбаз дьбу, шагьртед ԝи рʹева дәстпекьрьн сьмбьлед гәньм бьчьньн. 24 Чахе Ферьсийа әв йәк дит, ԝирʹа готьн: «Бьньһерʹә! Чьрʹа әԝана ве йәке дькьн, чь кӧ ԛәдәхә йә рʹожа Шәмийе бькьн?» 25 Ле әԝи ԝанрʹа гот: «Ԝә нәхԝәндийә Даԝьд чь кьр, чахе әԝ у йед тʹәви ԝи, бьрʹчи бун? 26 Чаԝа сәрһатийа дәрһәԛа Абийатʹарда ньвисар ә, йе кӧ сәроке кʹаһина бу, әԝ кʹәтә мала Хԝәде у нане пироз* хԝар, кʹижан кӧ һʹәмуйарʹа ԛәдәхә бу хенщи кʹаһина. У һьм жи әԝи әв нан да мәрьвед тʹәви хԝә жи». 27 Паше Иса ԝанрʹа гот: «Рʹожа Шәмийе бона мәрьва һатә данине, нә кӧ мәрьв бона рʹожа Шәмийе. 28 Ләма Кӧрʹе инсен Хӧдане рʹожа Шәмийе йә жи».

3 Иса диса кʹәтә кʹьниште* у ԝедәре мәрьвәк һәбу, дәстәки ԝи кʹьшийайи бу. 2 Чʹәʹвед Ферьсийа сәр Иса бу, һәла әԝе рʹожа Шәмийе* ԝи мәрьви ԛәнщ кә, сәва кӧ ԝи нәһәԛ кьн. 3 Иса мәрьве дәсткʹьшийайирʹа гот: «Рʹабә у ԝәрә ортʹе бьсәкьнә». 4 Паше Иса жь ԝан пьрси: «Чь изьн ә рʹожа Шәмийе бькьн, ԛәнщийе йан хьрабийе? Әʹмьр хьлаз кьн йан бькӧжьн?» Ле ԝана хԝә кәрʹ кьрьбу. 5 Иса жь бо дьлкәвьрийа ԝан гәләк хәмгин бу у бь һерс ль ԝан ньһерʹи. Әԝи мәрьве дәсткʹьшийайирʹа гот: «Дәсте хԝә дьреж кә». Әԝи жи дәсте хԝә дьреж кьр, у дәсте ԝи ԛәнщ бу. 6 Һьнге Ферьси дәркʹәтьнә дәрва у дәрберʹа тʹәви пьштгьред Һеродәс шеԝьрин, кӧ чаԝа Иса бьдьнә кӧштьне.

7 Ле Иса тʹәви шагьртед хԝә чу бәр дәве бәʹре, у гәләк мәрьв жь Щәлиле у Щьһустане пәй ԝи чун. 8 Һәла һе жь Оршәлиме, жь Идумәйайе, жь алийе дьнә Чʹәме Урдӧне у жь дәр-доре Сур у Сайдайе жи әʹлаләтәкә мәзьн һатә щәм ԝи, гава дәрһәԛа гәләк кьред ԝи бьһист. 9 Иса шагьртед хԝәрʹа гот, ԝәки ԛәйикәкә бьчʹук ԝирʹа һазьр кьн, сәва кӧ мәрьв ԝи дәʹф нәдьн. 10 Чьмки Иса гәләк мәрьв ԛәнщ кьрьн, ләма жи һʹәмуйед бь нәхԝәшийед гьран ль дора ԝи тʹоп бун, ԝәки дәсте хԝә бьдьнә ԝи. 11 Һʹәта щьна жи чахе Иса дьдитьн, хԝә ль бәр ԝи давитьнә әʹрде у дькьрьнә ԛирʹин: «Тӧ Кӧрʹе Хԝәде йи!» 12 Ле әԝи гәләк щара сәрт тʹәми дьда ԝан, кӧ дәрһәԛа ԝи нәкьнә дәнги.

13 Иса һьлкʹьшийа чʹийе, гази һьнә шагьртед хԝә кьр, у әԝана һатьнә бал ԝи. 14 Әԝи 12 мәрьв бьжартьн у әԝана нав кьрьн шанди, сәва кӧ щәм ԝи бьн, ԝәки ԝана бона бәлакьрьна мьзгинийе бьшинә 15 у һʹӧкӧм бьдә ԝан, кӧ щьна дәрхьн.

16 Навед ԝан 12 мәрьвед бьжарти, әв бун: Шьмһʹуне кӧ Иса наве ԝи ӧса жи дани Пәтрус, 17 Аԛубе кӧрʹе Зәбәди у бьре ԝи* Йуһʹәнна (Иса наве ԝан Боанәрщәс жи дани, чь кӧ те һʹәсабе «Кӧрʹед Гӧрʹинийа Әʹзмен»), 18 Әндраԝьс, Филипо, Бәртоломәйо, Мәтта, Тʹума, Аԛубе кӧрʹе Һалфаԝо, Тәдайо, Шьмһʹуне Канани,* 19 у Щьһудайе Исхәрйоти, йе кӧ паше нәмамийа Иса кьр.

Паше Иса кʹәтә мале, 20 у диса һаԛас мәрьв тʹоп бун, кӧ ԝана нькарьбу нан жи бьхԝара. 21 Гава мәрьвед ԝи әв йәк бьһистьн, чун ԝәки ԝи бь дәсте зоре жь ԝедәре бьвьн, чьмки ԝана дьгот: «Әԝи һʹьше хԝә ӧнда кьрийә!» 22 У ԛанунзанед кӧ жь Оршәлиме дакʹәтьбун, дьготьн: «Бәлзәбул* ԝида һәйә. Әԝ щьна бь сайа сәрԝере щьна дәрдьхә». 23 Гава Иса әԝ гази бал хԝә кьрьн, бь мәсәла ԝанрʹа гот: «Шәйтʹан чаԝа дькарә Шәйтʹан дәрхә?» 24 Һәрге пʹадшатик нав хԝәда һатийә пʹарәвәкьрьн, әв пʹадшати нькарә бьминә. 25 У һәрге малбәтәк нав хԝәда һатийә пʹарәвәкьрьн, әв малбәт ԝе нькарьбә бьминә. 26 Ви щурʹәйи, һәрге Шәйтʹан мьԛабьли хԝә рʹабуйә у нав хԝәда һатийә пʹарәвәкьрьн, әԝ нькарә бьминә, ле бәле хьлазийа ԝи незик буйә. 27 Тʹӧ кәс нькарә бькʹәвә мала мерхасәки у һәбука ԝи тʹалан кә, һәрге пешийе ԝи мерхаси гьренәдә. Ле гава ԝи гьредә, ԝе бькарьбә мала ԝи тʹалан кә. 28 Әз рʹаст ԝәрʹа дьбежьм, бәндарʹа һʹәму щурʹә гӧнә у кʹьфьред кӧ ԝана кьрийә, ԝе бе бахшандьне. 29 Ле йе кӧ кʹьфьрийа рʹӧһʹе пироз дькә, ԝе тʹӧ щар ԝи нәйе бахшандьне. Әв гӧнә ԝе һʹәта-һʹәтайе стийе ԝида бьминә». 30 Иса әв йәк гот, чьмки ԝана дьгот: «Щьн ԝида һәйә».

31 Һьнге дийа Иса у бьред ԝи һатьн у дәрва сәкьнин. Ԝана кәсәк шанд ԝәки гази ԝи бькьн. 32 Гәләк мәрьв кӧ дәр-доре ԝи рʹуньшти бун, жерʹа готьн: «Дийа тә у бьред тә дәрва нә у пьрса тә дькьн». 33 Ле Иса щаб да: «Дийа мьн кʹи йә у бьред мьн кʹи нә?» 34 Һьнге әԝи мәрьвед дәр-доре хԝә ньһерʹи у гот: «Дийа мьн у бьред мьн әԝ ьн! 35 Кʹи кӧ хԝәстьна Хԝәде тинә сери, әԝ ә бьре мьн, хушка мьн у дийа мьн».

4 Иса диса дәстпекьр бәр дәве бәʹре һин кә. Дора ԝи гәләк мәрьв тʹоп бун, ләма жи әԝ кʹәтә ԛәйике, рʹуньшт у жь дәве бәʹре һьнәки дур кʹәт. Ле әв һʹәму мәрьв бәр дәве бәʹре ман. 2 Әԝи дәстпекьр бь мәсәла гәләк тьшт ԝана һин кә у гот: 3 «Гӧһ бьдьн! Щоткʹар дәркʹәт кӧ тʹохьм бьчинә. 4 Гава әԝи тʹохьм дьрʹәшанд, һьнә тʹохьм кʹәтьнә сәр рʹе, чʹьвик һатьн у хԝарьн. 5 Һьнә тʹохьм кʹәтьнә сәр әʹрде кәвьри, кʹидәре кӧ хԝәли кем бу. У тʹохьм зу шин бун, чьмки хԝәли кʹур нибу. 6 Ле гава тәʹв дәркʹәт, әԝ чʹил чʹьлмьсин у һʹьшк бун, чьмки кʹокед ԝан тʹӧнә бун. 7 Һьнә тʹохьм жи кʹәтьнә нава стьрийа, стьри дәркʹәтьн, нәһиштьн әԝ мәзьн бьн у бәр бьдьн. 8 Ле һьнә тʹохьм кʹәтьнә сәр әʹрде баш, дәстпекьрьн шин бьн, гәш бьн у бәр бьдьн, йәк 30 щара, йе дьн 60 у йе майин жи 100 щара зедәтьр». 9 Һьнге әԝи ԝанрʹа гот: «Гӧһед кʹе һәнә, бьра бьбьһе».

10 Гава Иса тʹәне ма, Донздәһа* у мәрьвед дәр-доре ԝи, дәрһәԛа ван мәсәла жь ԝи пьрсин. 11 Әԝи ԝанрʹа гот: «Ԝәрʹа сӧрʹа пироз йа Пʹадшатийа Хԝәде һатийә вәкьрьне, ле кәсед дьнрʹа һәр тьшт ча мәтʹәлок дьминә, 12 сәва кӧ әԝана бьньһерʹьн, ле нәвиньн, бьбьһен, ле мәʹна ԝе фәʹм нәкьн. Әԝе тʹӧ щар вәнәгәрʹьн бал Хԝәде, у ԝе ԝан нәйе бахшандьне. 13 Паше Иса ԝанрʹа гот: «Һәрге һун ван мәсәла фәʹм накьн, һуне чаԝа һʹәму мәсәлед дьн фәʹм бькьн?

14 Щоткʹар хәбәра Хԝәде дьчинә. 15 Тʹохьмед кӧ дькʹәвьн сәр рʹе, хәбәра Хԝәде йә, йа кӧ дьле ԝан мәрьвада һатийә чандьне, кʹижан кӧ һәма ча дьбьһен, Шәйтʹан те у ве хәбәре жь дьле ԝан дәрдьхә дьбә. 16 Мина ве йәке, әв тʹохьмед кӧ дькʹәвьнә сәр әʹрде кәвьри, те һʹәсабе хәбәра Хԝәде, кʹижан кӧ нава ԝан мәрьвада те чандьне, йед кӧ чаԝа дьбьһен, дәрберʹа бь шабун ԛәбул дькьн. 17 Ле чьмки дьле ԝанда кʹок тʹӧнә, әв хәбәр тʹәне дәмәке дьминә. У чахе әԝ жь бо ве хәбәре рʹасти тәнгасийа у зерандьне тен, әԝана дәрберʹа баԝәрийа хԝә ӧнда дькьн. 18 Ле тʹохьмед кӧ нава стьрийада һатьнә чандьне, әԝ ьн, йед кӧ хәбәра Хԝәде бьһистьнә, 19 ле хәмед ве дьнйайе, дәԝләмәндтийа хапинок у щурʹә-щурʹә хԝәстьн дькʹәвьн дьле ԝан у хәбәра Хԝәде дьфәтьсиньн, у әԝ бе бәр дьминә. 20 Ле тʹохьмед кӧ сәр әʹрде баш һатьнә чандьне әԝ ьн, кӧ хәбәра Хԝәде дьбьһен, бь дьл у щан ԛәбул дькьн у 30, 60 у 100 щара зедәтьр бәр дьдьн».

21 Иса бь ван готьна бәрдәԝам кьр: «Гәло кʹи чʹьре дькә бьне дәрдане йан бьне ньвине? Нә тиньн кӧ дайньн сәр шәмданке? 22 Тʹӧ тьште вәшарти тʹӧнә кӧ нәйе әшкәрәкьрьне, у тʹӧ тьште дьзива тʹӧнә кӧ нәйе әʹйанкьрьне. 23 Гӧһед кʹе һәнә, бьра бьбьһе».

24 Иса ӧса жи гот: «Рʹьнд гӧһ бьдьнә тьштед кӧ һун дьбьһен. Һун һьндава мәрьвада чаԝа бьн, әԝе жи һьндава ԝәда ӧса бьн.* Әре, ль гора ве йәке һуне һе зедә бьстиньн. 25 Чьмки бал кʹе һәйә, әԝе һе зедә бьстинә. Ле бал кʹе тʹӧнә йә, тьште кӧ бал ԝи һәйә жи, ԝе жь ԝи бе стандьне».

26 Паше Иса гот: «Пʹадшатийа Хԝәде мина мәрьвәки йә, кʹижан кӧ тʹохьм ль әʹрде дьрʹәшинә. 27 Дьбә шәв әԝ рʹадьзе у дьбә рʹож әԝ рʹадьбә. Тʹохьм шин дьбә у мәзьн дьбә, ле әԝ ньзанә кӧ әв йәк чаԝа дьбә. 28 Гав бь гав әʹрд бәр дьдә, пешийе чʹил, паше сьмбьл у хьлазийе сьмбьлда гәньме гьһишти дьдә. 29 Гава бәр дьгьһижә, мәрьв бь дәʹсе* дьдьру, чьмки дәма дьруне һатийә».

30 Иса бәрдәԝам кьр: «Әм дькарьн Пʹадшатийа Хԝәде бәрамбәри чь бькьн? Йан әм дькарьн бь кʹижан мәсәле шьровәкьн? 31 Әԝ мина тʹохьме хәрдале йе, кʹижан кӧ жь һʹәму тʹохьмед кӧ сәр рʹуйе әʹрде тенә чандьне, йе һәри бьчʹук ә. 32 Ле чахе әԝ те чандьне у шин дьбә, әԝ жь һʹәму шинкайед бахчә мәзьнтьр дьбә, у чʹьԛьлед ԝе ӧса мәзьн дьбьн, кӧ чʹьвикед әʹзмана бьн сийа ԝеда һелунед хԝә чедькьн».

33 Иса бь гәләк мәсәлед ви щурʹәйи мәрьварʹа һаԛас дәрһәԛа хәбәра Хԝәде хәбәр дьда, чьԛас кӧ ԝана дькарьбу фәʹм кьра. 34 Әԝи бе мәсәлә тʹӧ тьшт ԝанарʹа нәдьгот. Ле гава әԝ тʹәви шагьртед хԝә тʹәне дьма, һәр тьшт ԝанрʹа шьровәдькьр.

35 Һәма ԝе рʹоже, гава бу евар, Иса шагьртед хԝәрʹа гот: «Ԝәрен әм дәрбази алийе бәʹрейи дьн бьн». 36 Шагьрта әʹлаләт шанд у бь ԛәйике тʹәви Иса чун, ԛәйикед дьн жи тʹәви ԝан чун. 37 Ньшкева баки ԛайим рʹабу, у пʹелед аве ӧса ԛәйике дьхьстьн, кӧ һьндьк мабу ԛәйик бь аве тʹьжи буйа. 38 Ле Иса ль пашийа ԛәйике сәре хԝә данибу сәр бәʹлги у рʹаза бу. Ԝана әԝ жь хәԝе рʹакьр у готьн: «Дәрсдар, хәма тә нинә әм дьхәньԛьн?» 39 Әԝ жи рʹабу, фәрман да ба, у бәʹрерʹа гот: «Кәрʹ бә! Бьсәԛьрʹә!» Ба сәкьни у бәʹр жи сәԛьрʹи. 40 Һьнге Иса ԝанрʹа гот: «Чьрʹа тьрс кʹәтийә дьле ԝә? Һәла һе баԝәрийа ԝә тʹӧнә йә?» 41 Ле саԝәкә гьран ԝана гьрт у һәвдӧрʹа готьн: «Гәло әв кʹи йә? Һʹәта ба у бәʹр жи ль гора готьна ԝи дькьн».

5 Паше әԝана дәрбази алийе бәʹрейи дьн бун, у гьһиштьнә һәрема Гьрасинийа. 2 Һәма ча Иса жь ԛәйике пәйа бу, мәрьвәки щьнакʹәти* жь нава мәзәла һатә пешийа ԝи. 3 Әԝ нава мәзәлада дьма, у һʹәта ԝе дәме тʹӧ кәси нькарьбу ԝи бь зьнщира гьреда. 4 Дәст у ньгед ԝи гәләк щара бь зьнщира гьредьдан, ле әԝи һәр щар зьнщир дьԛәтандьн у ԛәйд дьшкенандьн. У тʹӧ кәси нькарьбу әԝ зәфт кьра. 5 Әԝи шәв у рʹож нава мәзәлада у сәр чʹийа дькьрә ԛирʹин у хԝә бь кәвьра бьриндар дькьр. 6 Ле гава әԝи дурва Иса дит, ләзә-ләз һат бәр ԝи кʹәтә сәр чока, 7 бь дәнгәки бьльнд кьрә ԛирʹин у гот: «Тӧ чь жь мьн дьхԝази, Исайе Кӧрʹе Хԝәдайе Һәри Жорьн? Бәр Хԝәде сонд бьхԝә, ԝәки тӧйе мьн нәчәрчьрини!» 8 Әԝи әв йәк гот, чьмки Иса щьнрʹа готьбу: «Жь ви мәрьви дәркʹәвә!» 9 Иса жь ԝи пьрси: «Наве тә чь йә?» Әԝи щаб да: «Наве мьн Ләжйон ә,* чьмки әм гәләк ьн». 10 У әԝи лавайа Иса дькьр, кӧ ԝана жь ве һәреме дәрнәхә.

11 Ԝедәре сәр чʹийе гәләк хьнзир* дьчʹерийан. 12 Ләма жи щьна рʹәща жь ԝи кьр у готьн: «Мә бьшинә нава хьнзира, кӧ әм бькʹәвьнә нав ԝан». 13 Иса жи изьн да ԝан. Һьнге щьн жь ви мәрьви дәркʹәтьн у кʹәтьнә нав хьнзира. Әԝ кәри ԝәкә 2 000 хьнзира бу, ԝана хԝә жорда авитә бәʹре* у хәньԛин. 14 Шьванед ԝан рʹәвин у дәрһәԛа ве йәке бажар у гӧндада бәла кьрьн. Мәрьв һатьн кӧ бь чʹәʹве хԝә бьвиньн чь ԛәԝьмийә. 15 Гава әԝана һатьнә бал Иса у дитьн мәрьве кӧ Ләжйонәкә щьна навда бу, ԝа рʹуньшти йә, кʹьнще ԝи ле йә у сәр һʹьше хԝә йә, гәләк тьрсийан. 16 Хенщи ве йәке, әԝед кӧ әв йәк дитьбун, ԝанрʹа гьли кьрьн кӧ чь һатә сәре ԝи мәрьве щьнакʹәти у хьнзира. 17 У ԝана жь Иса рʹәща кьр, ԝәки әԝ жь һәрема ԝан һәрʹә.

18 Гава Иса ԛәйикеда рʹуньшт, мәрьве кӧ жь щьна аза бьбу рʹәща кьр, кӧ тʹәви ԝи һәрʹә. 19 Ле Иса нәһишт кӧ әԝ тʹәви ԝи һәрʹә у жерʹа гот: «Вәгәрʹә мала хԝә, щәм мәрьвед хԝә у ԝанрʹа һʹәму тьшти бежә, чь кӧ Йаһоԝа бона тә кьр у ча ль тә һатә рʹәʹме. 20 Әв мәрьв чу у дәстпекьр һʹәму тьштед кӧ Иса бона ԝи кьрьбу, Декаполиседа* бәла кә, у һәр кәс әʹщебмайи дьма.

21 Иса бь ԛәйике диса дәрбази алийе бәʹрейи дьн бу. Гава әԝ һе ль бәр бәʹре сәкьни бу, гәләк мәрьв дора ԝи тʹоп бун. 22 Сәрԝерәки кʹьниште* жи һат, наве ԝи Йайиро бу. Гава әԝи Иса дит, хԝә авитә ньгед ԝи, 23 гәләк щар жь ԝи лава кьр у гот: «Ԛиза мьнә бьчʹук бәр мьрьне йә. Жь кʹәрәма хԝә ԝәрә у дәстед хԝә дайнә сәр ԝе, сәва әԝ ԛәнщ бә у бьжи». 24 Иса рʹәх ԝи кʹәт чу. Гәләк мәрьв жи ль пәй ԝи дьчун у дәр-доре ԝи тәнг дькьрьн.

25 Ԝедәре жьнәк һәбу, кӧ ида 12 сал бу сәр хуне вәбьбу. 26 Әԝ дәсте гәләк һʹәкимада зәʹф чәрчьрибу у һʹәму һәбуна хԝә хәрщ кьрьбу. Диса жи һʹале ԝе баш нәдьбу, ле һе хьраб бьбу. 27 Гава әԝе дәрһәԛа Иса бьһист, пьштева һатә нава хәлԛе у дәст да кʹьнще ԝи. 28 Чьмки әԝе хԝәрʹа дьгот: «Һәрге әз дәсте хԝә һәма бьдьм кʹьнще ԝи, әзе ԛәнщ бьм». 29 Дәрберʹа хуна кӧ же дьчу, сәкьни, у әԝе тʹәхмин кьр ԝәки жь ве нәхԝәшийа гьран ԛәнщ буйә.

30 Иса дәрберʹа фәʹм кьр кӧ ԛәԝат жь ԝи чу. Әԝ зьвьрʹи, хәлԛе ньһерʹи у пьрси: «Кʹи дәсте хԝә да кʹьнще мьн?» 31 Ле шагьрта ԝирʹа гот: «Тӧ навини кӧ дәр-доре тә тʹьжи хәлԛ ә, ле тӧ жи дьпьрси: ‹Кʹи дәсте хԝә да мьн?›» 32 Ле Иса дәр-доре хԝә ньһерʹи, кӧ бьвинә кʹи әв йәк кьр. 33 Чахе әве жьньке фәʹм кьр, кӧ чь тʹәви ԝе ԛәԝьми, жь тьрса ләрьзи, һат хԝә авитә бәр ньгед ԝи у һʹәму тьшт жерʹа рʹаст гот. 34 Иса ԝерʹа гот: «Ԛиза мьн, баԝәрийа тә тӧ ԛәнщ кьри. Бь хер у сьламәт һәрʹә, у бьра әв нәхԝәшийа гьран ида тә нәчәрчьринә».

35 Гава Иса һе хәбәр дьда, һьнә мәрьв жь мала сәрԝере кʹьниште һатьн у готьн: «Ԛиза тә мьр! Ида зәʹмәте нәдә Дәрсдар». 36 Ле гава Иса әв йәк бьһист, сәрԝере кʹьништерʹа гот: «Нәтьрсә, тʹәне баԝәр кә!» 37 Иса нәһишт тʹӧ кәс тʹәви ԝи һәрʹә, хенщи Пәтрус, Аԛуб у Йуһʹәннайе бьре Аԛуб.

38 Чахе Иса гьһиштә мала ви сәрԝере кʹьниште, әԝи дит ԝәки мәрьв дькьнә ԛарʹә-ԛарʹ, дьгьрин у шине дькьн. 39 Гава әԝ кʹәтә һьндӧрʹ, ԝанрʹа гот: «Һун чьма дьгьрин у дькьнә ԛарʹә-ԛарʹ? Зарʹ нәмьрийә, ле рʹаза йә». 40 Сәр ве йәке әԝана ԝи кʹәнийан. Һьнге Иса һʹәму дәрхьстьнә дәрва, ле де-баве зарʹе у шагьртед кӧ тʹәви ԝи бун хԝәрʹа бьрьн у кʹәтә ԝедәре, кʹидәре зарʹ бу. 41 Әԝи дәсте зарʹе гьрт у жерʹа гот: «Талита куми», чь кӧ те һʹәсабе: «Кәчʹе, әз тәрʹа дьбежьм: ‹Рʹабә!›» 42 Һәма ԝе гаве кәчʹьк рʹабу у гәрʹийа. (Әԝ 12 сали бу.) Кәсед кӧ әв йәк дитьн шабуна ньге ԝан әʹрд нә дьгьрт. 43 Ле Иса чәнд щара тʹәми да ԝан,* кӧ дәрһәԛа ве йәке тʹӧ кәсирʹа нәбежьн, у гот ԝәки хԝарьне бьдьнә кәчʹьке.

6 Иса жь ԝедәре чу, гьһиштә һәрема хԝә,* у шагьртед ԝи пәй ԝи чун. 2 Рʹожа Шәмийе* әԝи дәстпекьр кʹьништеда* һин кә, у гәләкед кӧ гӧһ дьданә ԝи, әʹщебмайи ман у дьготьн: «Гәло әв мәрьв һаԛас тьшт жь кʹӧ занә? Чьма әв сәрԝахти ԝирʹа һатийә дайине, у чьма кʹәрәмәтед* ӧса бь дәсте ԝи тенә кьрьне? 3 Нә әԝ нәщар ә, кӧрʹе Мәрйәме у бьре Аԛуб, Усьв, Щьһуда у Шьмһʹун ә? Нә һʹәму хушкед ԝи нав мәда дьжин?» Ләма ԝана нәхԝәст ԝи баԝәр кьн.* 4 Ле Иса ԝанарʹа гот: «Пʹехәмбәр һʹәму щийа хԝәйиԛәдьр ә, хенщи бажаре хԝәда, нава мәрьвед хԝә у мала хԝәда». 5 Ләма жи әԝи ԝедәре тʹӧ кʹәрәмәт нәкьрьн, тʹәне дәстед хԝә дани сәр чәнд нәхԝәша у әԝ ԛәнщ кьрьн. 6 Иса әʹщебмайи ма сәр ве йәке кӧ баԝәрийа ԝан тʹӧнә бу. У әԝ ль гӧндед дәр-дор дьгәрʹийа у һин дькьр.

7 Һьнге әԝи гази Донздәһа* кьр, у әԝ дӧдӧ-дӧдӧ шандьн у һʹӧкӧм да ԝан, кӧ әԝана щьна* дәрхьн. 8 У әԝи тʹәми да ԝана кӧ бона рʹеԝитийе, хенщи шьвдаре тʹӧ тьшти хԝәрʹа нәбьн, нә нан, нә тʹорбе хԝарьне у нә жи кʹиске пʹәра.* 9 Әԝи гот кӧ чарьха пʹе кьн у кьрасе зедә хԝәрʹа нәбьн. 10 Паше әԝи ԝанрʹа гот: «Гава һун бькʹәвьнә маләке, бал ԝан бьминьн һʹәта һун жь ԝи щийи һәрʹьн. 11 Ле кʹидәре ԝә ԛәбул нәкьн йан гӧһ нәдьнә ԝә, гава һун жь ԝедәре дәркʹәвьн, тʹоза ньгед хԝә даԝшиньн, ԝәки ԝанрʹа бьбә шәʹдәти».* 12 Һьнге әԝана чун у хәлԛерʹа дьготьн, ԝәки тʹобә кьн. 13 У ԝана гәләк щьн дәрдьхьстьн у гәләк нәхԝәш рʹун дькьрьн у әԝана ԛәнщ дькьрьн.

14 Һеродәс Пʹадша әв йәк бьһист, чьмки нав у дәнге Иса бәла бьбу, у хәлԛе дьгот: «Йуһʹәннайе Ньхӧмдар* жь мьрьне һатийә рʹакьрьне, у ләма жи дькарә кʹәрәмәта бькә». 15 Ле һьнә кәсед дьн дьготьн: «Әԝ Елйас ә». У һьнәка жи дьготьн: «Әва пʹехәмбәрәки мина пʹехәмбәред бәре йә». 16 Ле гава Һеродәс әв йәк бьһист, әԝи гот: «Йуһʹәннайе кӧ мьн сәре ԝи жекьр, жь мьрьне рʹабуйә». 17 Пешийа ве йәке Һеродәс хԝәха мәрьв шандьбун, ԝәки Йуһʹәнна бьгьрьн, гьредьн у бькьнә кәле. Әԝи рʹуйе жьна Филипойе бьре хԝә, Һеродийайеда әв йәк кьр, чьмки әԝ жьнти стандьбу, 18 ле Йуһʹәнна Һеродәсрʹа дьгот: «Ль гора ԛануне тӧ нькари жьна бьре хԝә бьстини». 19 Ләма Һеродийайе кʹина ԝи гьртьбу у дьхԝәст ԝи бьдә кӧштьне, ле нькарьбу. 20 Чьмки Һеродәс жь Йуһʹәнна дьтьрсийа у әԝ ча мәрьвәки рʹаст у пироз һʹәсаб дькьр у дьпараст. Гава Һеродәс гӧһ дьда ԝи, тʹәвльһәв дьбу у ньзаньбу чь бькә. Ле диса жи ԝи хԝәш дьһат гӧһ бьде.

21 Ле рʹожәке мәщал кʹәтә дәсте ԝе. Һеродәс рʹожа буйина хԝә, гьрәгьрарʹа, сәрокед әскәрарʹа* у мәрьвед Щәлиләйе һәри нав-дәнгрʹа сьфрә вәкьр. 22 Ԛиза Һеродийайе кʹәтә һӧндӧрʹ у рʹәԛьси. Әв йәк Һеродәс у меванед ԝи хԝәш һат, у пʹадша кәчʹькерʹа гот: «Тӧ жь мьн чь бьхԝази, әзе бьдьмә тә». 23 Әԝи жерʹа сонд хԝар: «Тӧ жь мьн чь бьхԝази, әзе бьдьмә тә, һʹәта ниве пʹадшатийа хԝә жи». 24 Һьнге кәчʹьк дәркʹәт у жь дийа хԝә пьрси: «Әз чь бьхԝазьм?» Әԝе гот: «Сәре Йуһʹәннайе Ньхӧмдар бьхԝазә». 25 Кәчʹьк жи ләзә-ләз чу бал пʹадша у хԝәстьна хԝә жерʹа гот: «Әз дьхԝазьм ԝәки тӧ һәма ньһа сәре Йуһʹәннайе Ньхӧмдар сәр сьнийе бьди мьн». 26 Пʹадша гәләк хәмгин бу, ле жь бо сонда хԝә у меванед кӧ бәр сьфре рʹуньшти бун, нәхԝәст хԝәстьна кәчʹьке инкʹар кә. 27 Ләма пʹадша дәрберʹа нобәдарәк шанд у фәрман да, ԝәки сәре Йуһʹәнна бинә. Нобәдар жи чу, кәледа сәре ԝи жекьр, 28 у сәр сьнийе ани да кәчʹьке. Әԝе жи әв бьр у да дийа хԝә. 29 Гава шагьртед Йуһʹәнна әв йәк бьһистьн, һатьн, щьнйазе ԝи һьлдан у кьрьнә тʹьрбе.

30 Шанди вәгәрʹийанә бал Иса у һʹәму тьштед кӧ ԝана кьрьбу у һин кьрьбун, жерʹа гьли кьрьн. 31 Иса ԝанрʹа гот: «Ԝәрә әм һәрʹьн щики хәԝлә, ԝәки һун һьнәки һеса бьн». Чьмки гәләк мәрьв дьчун-дьһатьн, ԝәʹде ԝан тʹӧнә бу хԝарьне жи бьхԝьн. 32 Һьнге әԝана бь ԛәйике чунә щики хәԝлә, ԝәки тʹәне бьминьн. 33 Ле мәрьва дит кӧ әԝана дьчьн, у гәләк дәрһәԛа ве йәке пеһʹәсийан. Жь һʹәму бажара хәлԛ рʹәвин у пешийа ԝан гьһиштьнә ԝедәре. 34 Чахе Иса жь ԛәйике пәйа бу, әԝи әʹлаләтәкә мәзьн дит, у дьле ԝи сәр ԝан шәԝьти, чьмки әԝана мина пәзед бе шьван бун. У әԝи дәстпекьр гәләк тьшта ԝана һин кә.

35 Ле чьмки ида дәрәнг бу, шагьртед Иса һатьнә бал ԝи у готьн: «Вьра щики хьки-хԝәли йә у ида дәрәнг ә. 36 Ԝана бьшинә, бьра һәрʹьн гӧнда у щийед дәр-дор, кӧ хԝәрʹа хԝарьне бькʹьрʹьн». 37 Иса ԝанрʹа гот: «Һун хԝарьне бьдьнә ԝан». Ԝана жи гот: «Әм гәрәке һәрʹьн баһе 200 динари нан бькʹьрʹьн у бьдьнә ԝан?» 38 Иса жь ԝан пьрси: «Һәла чәнд нанед ԝә һәнә? Һәрʹьн бьньһерʹьн!» Чахе ԝана ньһерʹи, готьн: «Пенщ нан у дӧ мәʹси һәнә». 39 Иса әʹлаләтерʹа гот, ԝәки кʹом-кʹом сәр чʹере рʹунен. 40 Әԝана жи бь 100 у бь 50 кәса кʹом-кʹом рʹуньштьн. 41 Иса әԝ пенщ нан у дӧ мәʹси һьлдан, ль әʹзмен ньһерʹи у дӧа кьр.* Паше әԝи нан кәр кьрьн* у да шагьртед хԝә, сәва кӧ әԝана мәрьварʹа бәла кьн, у һәр дӧ мәʹси жи һʹәмуйарʹа пʹарәвәкьр. 42 Һʹәмуйа хԝар у тʹер бун. 43 У ԝана 12 сәвәт* тʹьжә бәрмайи тʹоп кьрьн, хенщи мәʹсийа. 44 Кәсед кӧ нан хԝарьн 5 000 мер бун.

45 Паши ве йәке, дәрберʹа Иса шагьртед хԝәрʹа гот, ԝәки әԝана бькʹәвьнә ԛәйике у һәрʹьн алийе бәʹрейи дьн, у дәрбази Бәйтсайдайе бьн. Ле хԝәха ԝедәре ма, ԝәки хәлԛе вәрʹекә. 46 Чахе әԝи хатьре хԝә жь хәлԛе хԝәст, һьлкʹьшийа сәр чʹийе, ԝәки дӧа бькә. 47 Гава бу евар, ԛәйик нава бәʹреда бу, ле Иса һе ԝедәре тʹәне бу. 48 Гава Иса дит кӧ шагьртед ԝирʹа зәʹмәт ә берька бькʹьшиньн, чьмки ба мьԛабьли ԝан бу, әԝ незики сәре сьбәһе* сәр аверʹа мәшийа у бәрбь ԝан чу. Ле ӧса һатә кʹьфше, ԝәки әԝ дьхԝазә бәр ԝанрʹа дәрбаз бә. 49 Чахе ԝана дит кӧ Иса сәр аверʹа дьмәшә, фькьрин: «Әв хәйал ә!», у кьрьнә ԛирʹин, 50 чьмки ԝан һʹәмуйа әԝ дитьн, у тьрс кʹәтә дьле ԝан. Ле Иса дәрберʹа ԝанрʹа гот: «Ԛәԝи бьн! Әз ьм, нәтьрсьн!» 51 Һьнге әԝ кʹәтә ԛәйике щәм ԝан, у ба сәкьни. Шагьрт сәр ве йәке зәндәгьрти ман, 52 чьмки әԝана мәʹна кʹәрәмәта дәрһәԛа нан жи һе фәʹм нәкьрьбун. Дьле ԝан бона фәʹмкьрьне һе һазьр нибу.

53 Гава әԝана дәрбази алийе бәʹрейи дьн бун у гьһиштьнә әʹрде Щенисарте, ләнгәр авитьн. 54 Ле чахе әԝана жь ԛәйике пәйа бун, мәрьва дәрберʹа Иса нас кьрьн. 55 У әԝана рʹәвинә ль тʹәмамийа һәреме, сәва бьнәлийед ԝедәрерʹа әʹлам кьн, у кәсед нәхԝәш ньвинава* дьбьрьнә щәм Иса. 56 У һәр гӧнд, бажар у щийед дәр-дорда кʹидәре кӧ Иса дьчу, мәрьва кәсед нәхԝәш дьанинә мәйдана. Ԝана жь ԝи лава дькьр, кӧ һәма тʹәне дәсте хԝә бьдьнә рʹишийед кʹьнще ԝи, у һәр кәсе кӧ дәсте хԝә дьдайе, ԛәнщ дьбу.

7 Ферьси у һьнә ԛанунзанед кӧ жь Оршәлиме һатьбун, дора Иса тʹоп бун. 2 У ԝана дит кӧ һьнә шагьртед ԝи пе дәстед нәпаԛьж, демәк пе дәстед нәшушти* хԝарьне дьхԝьн. 3 (Чьмки Ферьси у һʹәму Щьһу хԝә ль әʹдәтед кал-бава дьгьрьн, у һʹәта кӧ дәстед хԝә һʹәта әʹнишке нәшон, хԝарьне нахԝьн. 4 У чахе әԝана жь базаре тен, пешийа кӧ хԝарьне бьхԝьн, дәстед хԝә дьшон. Хенщи ԝе йәке әԝана хԝә ль гәләк әʹдәтед дьн дьгьрьн. Мәсәлә, тʹас, кʹуп у фьраԛед сьфьр дькьнә бьн аве.*) 5 Һьнге Ферьси у ԛанунзана жь Иса пьрсин: «Чьма шагьртед тә хԝә ль әʹдәтед кал-бава нагьрьн у пе дәстед нәпаԛьж хԝарьне дьхԝьн?» 6 Әԝи щаб да: «Дӧрʹуно, Ишайа пʹехәмбәр дәрһәԛа ԝә чьԛас рʹаст гот, гава ньвиси: ‹Әв щьмәʹт бь заре хԝә рʹумәте дьдә мьн, ле дьле ԝан жь мьн дур ә. 7 Әԝана бадиһәԝа мьн дьһʹәбиньн, чьмки һинкьрьнед ԝан сәр һʹиме тʹәмийед мәрьва нә›. 8 Һун тʹәмийед Хԝәде пьшт гӧһе хԝәва давежьн у хԝә ль әʹдәтед кал-бава дьгьрьн».

9 Әԝи ӧса жи ԝанрʹа гот: «Һун бь һостәти мәщала дьгәрʹьн, ԝәки гӧһ нәдьнә тʹәмийед Хԝәде, сәва кӧ әʹдәтед хԝә хԝәй кьн. 10 Мәсәлә, Муса готийә: ‹Ԛәдьре де у баве хԝә бьгьрә›, у ‹Әԝе кӧ ньфьрʹа де йан баве хԝә бькә, гәрәке бе кӧштьне›. 11 Ле һун дьбежьн, ‹Һәрге мәрьвәк де йан баве хԝәрʹа бежә: «Һәр тьшт, бь чь жи мьн дькарьбу аликʹари бьда тә, ԛӧрбан ә (демәк ԛӧрбанәкә бона Хԝәде)»›, 12 бь ве йәке ида һун наһельн кӧ әԝ тьштәки бона де йан баве хԝә бькә. 13 Бь ви щурʹәйи, һун хәбәра Хԝәде бона хатьре әʹдәтед хԝә пʹучʹ у бәтал дькьн. У һун гәләк тьштед ӧса дькьн». 14 Һьнге Иса диса гази хәлԛе кьр у ԝанрʹа гот: «Гӧһ бьдьнә мьн у мәʹна готьнед мьн фәʹм бькьн. 15 Тьштед кӧ дькʹәвьнә һьндӧрʹе мерьв ԝи һʹәрам накьн, ле тьштед кӧ жь һьндӧрʹе мерьв дәрдькʹәвьн, ԝи һʹәрам дькьн». 16* ——

17 Чахе Иса хәлԛ һишт у кʹәтә мале, шагьрта жь ԝи пьрсин һәла мәʹна ԝе мәсәле чь йә. 18 Иса ԝанрʹа гот: «Һун жи фәʹм накьн? Чьма һун ньзаньн, чь кӧ дькʹәвә һьндӧрʹе мерьв, нькарә ԝи бьһʹәрʹьминә? 19 Чьмки әԝ тьшт накʹәвә дьл, ле дькʹәвә зьк у паше дәрдькʹәвә». Бь ви аԝайи, әԝи зәлал кьр ԝәки һʹәму хԝарьн паԛьж ә. 20 Паше әԝи гот: «Тьште кӧ жь мерьв дәрдькʹәвә, әԝ ԝи дьһʹәрʹьминә. 21 Чьмки жь дьле мерьв дәрдькʹәвьн фькьред хьраб, зьнекʹари,* дьзти, кӧштьн, 22 ԛави, тьмайи, кьред хьраб, дәрәԝи, рʹабун-рʹуньштьна рʹобәти,* чʹәʹвнәбари, кʹьфьр, ԛӧрʹәбун у беаԛьли. 23 Әв һʹәму тьштед хьраб жь һьндӧрʹ дәртену мерьв һʹәрам дькьн».

24 Иса жь ԝедәре рʹабу у чу һәрема Сур у Сайдайе. Ԝедәре, әԝ кʹәтә мале, у нәхԝәст кәсәк ве йәке пебьһʹәсә, ле диса жи мәрьв пеһʹәсийан. 25 Ԝе гаве жьнәкә кӧ щьн* ԛиза ԝейә бьчʹукда бу, дәрһәԛа Иса бьһист у дәрберʹа һат хԝә авитә бәр ньгед ԝи. 26 Әԝ жьньк Йунан бу у жь Финикйа Сурйайе* бу. Әԝе гәләк жь Иса рʹәща дькьр, кӧ щьн жь ԛиза ԝе дәрхә. 27 Ле әԝи жерʹа гот: «Пешийе бьра зарʹ тʹер бьн. Чьмки нә рʹаст ә нане бәр зарʹа һьлдьн у бавежьнә бәр тʹула». 28 Ле әԝе щаба ԝи да: «Бәле, ахайе мьн, нә тʹулә жи һурькед бәр зарʹа бьне сьфреда кʹәти, дьхԝьн». 29 Һьнге Иса жерʹа гот: «Жь бо ве готьна тә, һәрʹә, щьн жь ԛиза тә дәркʹәт». 30 Гава жьньк чу мал, дит кӧ ԛиза ԝе нав-ньвинада пʹалда йә у щьн же дәркʹәтийә.

31 Гава Иса жь һәрема Суре вәгәрʹийа, әԝ нав Сайдайе у һәрема Декаполисерʹа* дәрбаз бу у гьһиштә Бәʹра Щәлиле. 32 Ԝедәре мәрьвәки кәрʹ, кӧ нькарьбу зәлал хәбәр да, анин бал Иса у жь ԝи рʹәща кьрьн кӧ дәсте хԝә дайнә сәр ԝи. 33 Иса әԝ дури хәлԛе хьст у бьрә алики. Паше әԝи тʹьлийед хԝә кьрә гӧһед ԝи, тʹу кьр у дәсте хԝә да зьмане ԝи. 34 Паше әԝи ль әʹзмен ньһерʹи, кʹәсәрәкә кʹур һате у гот: «Әфата», чь кӧ те һʹәсабе «Вәбә». 35 Һьнге гӧһед ԝи мәрьви вәбун, зьмане ԝи вәбу, у әԝи дәстпекьр зәлал хәбәр дә. 36 Иса тʹәми да ԝан кӧ ве йәке тʹӧ кәсирʹа нәбежьн. Ле әԝи чьԛас зәʹф тʹәми дьда ԝан, ԝана һаԛас һе зедә дәрһәԛа ве йәке гьли дькьр. 37 Һʹәму мәрьв мәтʹал ман у дьготьн: «Әԝ һәр тьшти баш дькә. Әԝ һʹәта кәрʹа жи дьдә бьһистьне у лала дьдә хәбәрдане».

8 Ԝан рʹожада диса гәләк мәрьв тʹоп бун, у щәм ԝан тьштәк тʹӧнә бу кӧ бьхԝьн. Ләма Иса гази шагьртед хԝә кьр у ԝанрʹа гот: 2 «Гӧне мьн ве әʹлаләте те. Ида се рʹож ә әԝана тʹәви мьн ьн, у хԝарьна ԝан нәмайә. 3 Һәрге әз ԝана бьрʹчи бьшиньмә мал, әԝана рʹеда ԝе ԛьдум бькʹәвьн. Һьнәк жь ԝан жи, жь щийед дур һатьнә». 4 Ле шагьртед ԝи щаба ԝи дан: «Ви щийе хәԝлә әм жь кʹӧ дькарьн һаԛас нан биньн, ԝәки ван мәрийа тʹер кьн?» 5 Иса жь ԝан пьрси: «Чәнд нанед ԝә һәнә?» Ԝана гот: «Һʹәфт». 6 Иса мәрьварʹа гот ԝәки сәр әʹрде рʹунен. Паше әԝи һʹәфт нан һьлдан, шькьри да Хԝәде, нан кәр кьрьн* у дан шагьртед хԝә, у ԝана жи мәрьварʹа бәла кьр. 7 У чәнд мәʹсийед бьчʹук жи бал ԝан һәбун. Бона ван жи Иса шькьри да, у гот ԝәки ван жи бәла кьн. 8 Ԝана хԝар у тʹер бун. У чахе ԝана нанед бәрмайи тʹоп кьр, һʹәфт сәвәтед* мәзьн тʹьжә бун. 9 Ԝедәре ԝәкә 4 000 мер бун. Паше әԝи щьмәʹт шанд.

10 Иса дәрберʹа тʹәви шагьртед хԝә кʹәтә ԛәйике, у әԝ чун гьһиштьнә һәрема Далманутайе. 11 Ԝедәре Ферьси һатьн у дәстпекьрьн ԝирʹа бькʹәвьнә дәʹԝе. Сәва кӧ ԝи бьщерʹьбиньн, ԝана жь ԝи нишанәк жь әʹзмен дьхԝәст. 12 Кʹәсәрәкә кʹур һатә Иса у әԝи гот: «Чьрʹа әв ньсьл нишанәке дьгәрʹә? Әз рʹаст дьбежьм, ви ньсьлирʹа тʹӧ нишан ԝе нәйе дайине». 13 Һьнге әԝи әԝ һиштьн, диса кʹәтә ԛәйике у дәрбази алийе бәʹрейи дьн бу.

14 Ле шагьрта бир кьрьбу нан хԝәрʹа һьлдьн. Ԛәйикеда пештьри нанәки, тьштәки ԝани хԝарьне тʹӧнә бу. 15 Иса тʹәми ль ԝан кьр у гот: «Һаж хԝә һәбьн у хԝә жь һәвиртьрʹшке Ферьсийа у жь һәвиртьрʹшке Һеродәс хԝәй кьн». 16 Һьнге шагьрт һәврʹа кʹәтьнә дәʹԝе сәва ԝе йәке, кӧ нан щәм ԝан тʹӧнә бу. 17 Иса әв йәк дит у готә ԝан: «Һун чьма һәврʹа дькʹәвьнә дәʹԝе, кӧ нане ԝә тʹӧнә? Һун һʹәта ньһа фәʹм накьн? Дьле ԝә бона фәʹмкьрьне һе һазьр нинә? 18 ‹Чʹәʹве ԝә һәнә, һун навиньн? Гӧһед ԝә һәнә, һун набьһен?› Найе бира ԝә, 19 чахе мьн бь пенщ нана 5 000 мер тʹер кьрьн, ԝә чьԛас сәвәт бәрмайи тʹьжә кьрьн?» Ԝана ԝирʹа гот: «Донздәһ». 20 «У чахе мьн пе һʹәфт нана 4 000 мер тʹер кьрьн, ԝә чәнд сәвәтед мәзьн тʹьжи бәрмайи тʹоп кьрьн?» Ԝана ԝирʹа гот: «Һʹәфт». 21 Сәр ве йәке Иса ԝанрʹа гот: «Һун һе фәʹм накьн?»

22 Әԝана гьһиштьнә Бәйтсайдайе. Ԝедәре, мәрьва йәки кор ани бал Иса у же лава кьрьн, ԝәки дәсте хԝә бьде. 23 Иса дәсте йе кор гьрт у әԝ жь гӧнд дәрхьст. Паше тʹуйи чʹәʹвед ԝи кьр, дәстед хԝә дани сәр ԝи у же пьрси: «Тӧ тьштәки дьвини?» 24 Әԝи дәр-доре хԝә ньһерʹи у гот: «Әз мәрьва дьвиньм, әԝана мина баха нә, ле дьгәрʹьн». 25 Иса диса дәстед хԝә дани сәр чʹәʹвед ԝи, әԝ ԛәнщ бу у һәр тьшт зәлал дит. 26 Әԝи әԝ шандә мале у готе: «Нәкʹәвә нава ви гӧнди».

27 Иса тʹәви шагьртед хԝә чу гӧндед Ԛәйсәрйа Филипойе, у рʹеда әԝи жь ԝан пьрси: «Бь тʹәхмина хәлԛе, әз кʹи мә?» 28 Ԝана щаба ԝи да: «Дьбежьн Йуһʹәннайе Ньхӧмдар,* ле һьнәк дьбежьн Елйас, һьнәк жи дьбежьн йәк жь пʹехәмбәра». 29 Һьнге Иса жь ԝан пьрси: «Ле һун чь дьфькьрьн, әз кʹи мә?» Пәтрус щаба ԝи да: «Тӧ Мәсиһ и». 30 Һьнге әԝи сәрт тʹәми ль шагьртед хԝә кьр, ԝәки дәрһәԛа ԝи тʹӧ кәсирʹа тьштәки нәбежьн. 31 Паше әԝи дәстпекьр шагьртед хԝә һин кә, кӧ гәрәке Кӧрʹе инсен гәләк щәфа бькʹьшинә, у жь алийе рʹуспийа, сәрокед кʹаһина у ԛанунзанада бе инкʹаркьрьне, бе кӧштьне, у паши се рʹожа жь мьрьне бе рʹакьрьне. 32 Әԝи әв йәк зәлал дьгот. Ле Пәтрус әԝ бьрә алики у ле һьлат. 33 Һьнге Иса зьвьрʹи, шагьртед хԝә ньһерʹи у сәрт Пәтрусрʹа гот: «Жь мьн дур кʹәвә, Шәйтʹан! Чьмки тӧ нә кӧ мина Хԝәде дьфькьри, ле мина мәрьва».

34 Паше Иса гази әʹлаләте у шагьртед хԝә кьрьн у ԝанрʹа гот: «Һәрге кәсәк дьхԝазә пәй мьн бе, әԝ ида гәрәке бона хԝә нәжи. Әԝ гәрәке стуна хԝәйә щәфе һьлгьрә у пәй мьн бе. 35 Чьмки йе кӧ дьхԝазә әʹмьре хԝә хьлаз кә, әԝе ӧнда кә. Ле йе кӧ әʹмьре хԝә бона хатьре мьн у бона мьзгинийе ӧнда кә, ԝе ԝи хьлаз кә. 36 Һәрге мәрьв тʹәмамийа дьнйайе ԛазанщ кә, у әʹмьре хԝә ӧнда кә, кʹара ԝи чь йә? 37 Йан жи мәрьв чь дькарә бьдә, ԝәки әʹмьре хԝә ԛазанщ кә? 38 Кʹи кӧ бәр ви ньсьле нәамьн у гӧнәкʹар мьн у гьлийед мьн шәрм бькә, Кӧрʹе инсен жи ԝе ԝи шәрм бькә, гава рʹумәта Баве хԝәда тʹәви мәләкед пироз бе».

9 Әԝи ӧса жи ԝанрʹа гот: «Әз рʹаст ԝәрʹа дьбежьм, вьра нав ԝәда һьнә мәрьв һәнә, йед кӧ ԝе нәмьрьн,* һʹәта нәвиньн кӧ Пʹадшатийа Хԝәде бь ԛәԝат һатийә». 2 Паши шәш рʹожа, Иса тʹәви хԝә Пәтрус, Аԛуб у Йуһʹәнна бьрьн у һьлкʹьшийа сәре чʹийаки бьльнд. У бәр чʹәʹве ԝан Иса рʹува һатә гӧһастьне. 3 Кʹьнщед ԝи дьбьрьԛин у ӧса сьпи бун, кӧ сәр рʹуйе әʹрде тʹӧ кәси нькарьбу ӧса сьпи кьра. 4 Ӧса жи, Елйас у Муса ԝанрʹа хӧйа бун у тʹәви Иса хәбәр дьдан. 5 Пәтрус Исарʹа гот: «Дәрсдар, ча баш ә кӧ әм вьра нә. Ԝәрә әм се һʹолька чекьн, йәке бона тә, йәке бона Муса у йәке жи бона Елйас». 6 Бь рʹасти Пәтрус тʹәвльһәв бьбу, чьмки әԝана гәләки тьрсийа бун. 7 Һьнге әʹԝрәк хӧйа бу у дакʹәтә сәр ван, у дәнгәк жь ви әʹԝри һат: «Әв ә Кӧрʹе мьни дәлал. Гӧһ бьдьнә ԝи!» 8 Паше ньшкева шагьрта дәр-доре хԝә ньһерʹи, хенщи Иса кәсәк нәдитьн.

9 Гава әԝана жь чʹийе дадькʹәтьн, әԝи сәрт тʹәми да ԝан, ԝәки тʹӧ кәсирʹа тьштед кӧ ԝана дит, нәбежьн, һʹәта Кӧрʹе инсен жь мьрьне нәйе рʹакьрьне. 10 Ԝана гӧрʹа Иса кьр,* ле нав һәвда хәбәр дьдан, һәла мәʹна рʹабуна ԝи жь мьрьне, чь йә. 11 У ԝана жь Иса пьрси: «Чьма ԛанунзан дьбежьн, кӧ пешийе Елйас гәрәке бе?» 12 Әԝи ԝанрʹа гот: «Рʹаст ә, пешийе Елйас гәрәке бе у һәр тьшти рʹаст кә. Ле чьма дәрһәԛа Кӧрʹе инсен һатийә ньвисаре, кӧ әԝ гәрәке гәләк щәфа бькʹьшинә у бе инкʹаркьрьне? 13 Ле әз ԝәрʹа дьбежьм кӧ Елйас ида һатийә, у дьле ԝан ча хԝәст ӧса сәре ԝи кьрьн, чаԝа кӧ дәрһәԛа ԝи һатьбу ньвисаре».

14 Гава әԝана вәгәрʹийанә бал шагьртед дьн, ԝана дит кӧ дәр-доре ԝан гәләк мәрьв тʹоп бунә, у ԛанунзан ԝанрʹа кʹәтьнә дәʹԝе. 15 Ле чахе мәрьва Иса дит, әʹщебмайи ман у бь ләз бәрбь ԝи чун, кӧ сьлаве бьдьне. 16 Иса жь ԝан пьрси: «Һун бона чь ԝанрʹа дькʹәвьнә дәʹԝе?» 17 Жь әʹлаләте йәки щаб да: «Дәрсдар, мьн кӧрʹе хԝә анийә бал тә, чьмки щьнәк нав ԝида йә, кӧ ԝи лал дькә.* 18 Һәр гав кӧ щьн ԝи дьгьрә, әԝ ԝи ль әʹрде дьхә, кʹәф бәр дев дькʹәвә, бь дьранед хԝә дькә чʹьркә-чʹьрк, у ԛәԝата ԝи наминә. Мьн жь шагьртед тә рʹәща кьр, кӧ ви щьни дәрхьн, ле ԝана нькарьбу». 19 Иса ԝанрʹа гот: «Ньсьле бебаԝәр, һʹәта кʹәнге гәрәке әз тʹәви ԝә бьм? Һʹәта кʹәнге әз ԝә сәбьр кьм? Ԝи биньн щәм мьн». 20 У ԝана жи кӧрʹьк ани бал ԝи. Ле гава щьн Иса дит, дәрберʹа зарʹ вәһәжанд. Әԝ кʹәтә сәр әʹрде, пʹьрпьти у кʹәф бәр дев дькʹәт. 21 Иса жь баве ԝи пьрси: «Жь кʹәнгева һʹале ԝи ӧса йә?» Әԝи гот: «Жь зарʹотийе. 22 Щьн әԝ гәләк щара давитә нав агьр у ӧса жи нав аве, ԝәки ԝи бькӧжә. Ле һәрге тӧ дькари, тьштәки бькә, гӧне хԝә мә бинә у али мә бькә». 23 Иса ԝирʹа гот: «Тә чьма гот: ‹Һәрге тӧ дькари›? Баԝәрийа кʹе һәйә, бона ԝи һәр тьшт дьбә». 24 Һәма ве дәме баве зарʹе бь дәнгәки бьльнд гот: «Әз баԝәр дькьм! Али мьн бькә кӧ баԝәрийа мьн ԛәԝи бә!»

25 Гава Иса дит кӧ гәләк мәрьв рʹәвә-рʹәв бәрбь ԝан тен, әԝи сәрт фәрман да щьн у гот: «Щьне кӧ кәр у лал дькә, әз фәрмане дьдьмә тә, кӧ жь ԝи дәркʹәви у щарәкә дьн нәкʹәви нав ԝи!» 26 Щьн кьрә ԛирʹин, зарʹ гәләк щара вәһәжанд у паше жь ԝи дәркʹәт. Ӧса дьһатә кʹьфше кӧ зарʹ мьрийә. Ләма гәләка дьгот: «Әԝ мьр!» 27 Ле Иса дәсте зарʹе гьрт у әԝ рʹакьр. 28 Чахе әԝ кʹәтә мале, шагьртед ԝи башԛә жь ԝи пьрсин: «Мә чьрʹа нькарьбу әв щьн дәрхьста?» 29 Әԝи щаба ԝан да: «Щьнед ӧса тʹәне бь дӧа тенә дәрхьстьне».

30 Әԝана жь ԝедәре чун у нав Щәлилерʹа дәрбаз бун, ле Иса нәхԝәст кӧ кәсәк ве йәке бьзаньбә. 31 Чьмки әԝи шагьртед хԝә һин дькьр у ԝанрʹа дьгот: «Ԝе нәмамийа Кӧрʹе инсен бькьн у ԝи бьдьнә дәсте мәрьва, ԝе ԝи бькӧжьн, ле паши се рʹожа, әԝе жь мьрьне бе рʹакьрьне». 32 Ле ԝана готьнед ԝи фәʹм нәкьр у дьтьрсийан жь ԝи бьпьрсьн.

33 Әԝана гьһиштьнә Кәпәрнаһуме. Гава Иса малда бу, әԝи жь ԝан пьрси: «Һун рʹеда бона чь һәврʹа кʹәтьбунә дәʹԝе?» 34 Ԝана дәнге хԝә нәкьр, чьмки рʹеда бона ԝе йәке һәврʹа кʹәтьбунә дәʹԝе, кӧ жь ԝана йе һәри мәзьн кʹи йә. 35 Һьнге Иса рʹуньшт, гази Донздәһа* кьр у ԝанрʹа гот: «Йе кӧ дьхԝазә бьбә йе пешьн, гәрәке бьбә йе пашьн у бәрдәстийе һʹәмуйа». 36 Паше әԝи зарʹәк ани, нав ԝанда да сәкьнандьне, зарʹ да һʹәмеза хԝә у ԝанрʹа гот: 37 «Кʹи кӧ зарʹәкә ӧса бона хатьре наве мьн ԛәбул дькә, әԝ мьн жи ԛәбул дькә. У кʹи кӧ мьн ԛәбул дькә, нә тʹәне мьн, ле Йе кӧ әз шандьмә жи ԛәбул дькә».

38 Йуһʹәнна ԝирʹа гот: «Дәрсдар, мә дит кӧ кәсәк бь наве тә щьна дәрдьхә. Мә хԝәст ԝи бьдьнә сәкьнандьне, чьмки әԝ пәй мә найе». 39 Ле Иса гот: «Рʹийа ԝи нәгьрьн, чьмки кәсе ӧса тʹӧнә, кӧ бь наве мьн кʹәрәмәтәке* бькә у перʹа-перʹа тьштәки хьраб сәр мьн бежә. 40 Чьмки кʹи кӧ мьԛабьли мә нинә, алийе мә йә. 41 У кәсе кӧ тʹасә ав бьдә ԝә, чьмки һун пʹара Мәсиһ нә, әз рʹаст ԝәрʹа дьбежьм, әԝе хәлата хԝә тʹӧ щар ӧнда нәкә. 42 Ле кʹи бьбә сәбәб ԝәки йәки жь ван бьчʹука, йе кӧ баԝәрийа хԝә мьн тинә, жь рʹе дәре, бона ԝи һе баш ә кӧ кәвьрәки мәзьн* стуйе ԝива бе гьредане у әԝ бе авитьне нава бәʹре.

43 Һәрге дәсте тә, тә бәрбь гӧнә дьбә,* ԝи жекә. Дәԝса кӧ тӧ бь һәр дӧ дәстед хԝә бькʹәви Геһенайе,* нав агьре кӧ найе тәмьрандьне,* бона тә дьһа баш ә, кӧ тӧ дәстәки ӧнда ки, ле жийине* бьстини. 44* —— 45 У һәрге ньге тә, тә бәрбь гӧнә дьбә, ԝи жекә. Дәԝса кӧ тӧ бь һәр дӧ ньгед хԝә бькʹәви Геһенайе, бона тә дьһа баш ә, кӧ тӧ ньгәки ӧнда ки, ле жийине бьстини. 46* —— 47 У һәрге чʹәʹве тә, тә бәрбь гӧнә дьбә, ԝи бавежә. Дәԝса кӧ тӧ бь һәр дӧ чʹәʹвед хԝә бькʹәви Геһенайе, бона тә дьһа баш ә, кӧ тӧ чʹәʹвәки ӧнда ки, ле бькʹәви Пʹадшатийа Хԝәде. 48 Ль Геһенайе кӧрм намьрьн у агьр найе тәмьрандьне.

49 Чьмки һәр кәс гәрәке бь агьр бе хԝекьрьне. 50 Хԝе тьштәки баш ә, ле һәрге әв шорʹайа хԝә ӧнда кә, әԝе чаԝа диса шорʹ бә? Бьра нав ԝәда хԝе һәбә у һәврʹа әʹдьлайеда бьминьн».

10 Иса жь ԝедәре чу у гьһиштә синоре Щьһустане, алийе дьнә Чʹәме Урдӧне. Диса гәләк мәрьв дәр-доре ԝи тʹоп бун, у ча һәр гав әԝи диса дәстпекьр ԝана һин кә. 2 Ферьси незики ԝи бун, ԝәки ԝи бьщерʹьбиньн. Ԝана жь ԝи пьрси һәла изьн ә ԝәки мер жьна хԝә бәрʹдә. 3 Әԝи щаба ԝан да: «Муса чь тʹәми да ԝә?» 4 Ԝана гот: «Муса изьн да ԝәки мер кʹахаза һәвԛәтандьне бьдә жьна хԝә у ле бәрʹдә». 5 Ле Иса ԝанрʹа гот: «Жь бо дьлкәвьрийа ԝә, әԝи әв тʹәми бона ԝә ньвиси. 6 Ле сәре серида ‹Хԝәде* әԝ ча мер у жьн әʹфьрандьн. 7 Ләма жи, мер ԝе де у баве хԝә бьһелә, 8 у һәр дӧ ԝе бьбьнә йәк›.* Аԝа ида әԝ нә дӧдӧ нә, ле йәк ьн. 9 Ләма йед кӧ Хԝәде әԝ кьрьнә йәк,* бьра мәрьв жь һәвдӧ нәԛәтинә». 10 Гава әԝана диса малда бун, шагьрта дәрһәԛа ве йәке жь ԝи пьрсин. 11 Әԝи ԝанрʹа гот: «Кʹи кӧ жьна хԝә бәрʹдә у кәсәки дьн бьстинә, һьндава ԝеда ԛавийе дькә. 12 У һәрге жьнәк жь мере хԝә бьԛәтә у кәсәки дьн бьстинә, әԝ жи ԛавийе дькә».

13 Һьнге мәрьва зарʹед бьчʹук дьанин бал Иса, ԝәки әԝ дәстед хԝә дайнә сәр ԝан, ле шагьртед ԝи рʹийа ԝан дьгьртьн. 14 Гава Иса әв йәк дит, һерс кʹәт у ԝанрʹа гот: «Бьһельн бьра зарʹ бенә бал мьн. Рʹийа ԝан нәгьрьн, чьмки Пʹадшатийа Хԝәде бона йед мина ԝан ә. 15 Әз рʹаст ԝәрʹа дьбежьм, кәсе кӧ Пʹадшатийа Хԝәде мина зарʹәке ԛәбул нәкә, әԝе тʹӧ щар нәкʹәвә ԝе». 16 Әԝи зарʹ һʹәмез дькьрьн, дәстед хԝә датани сәр ԝан у әԝана кʹәрәм дькьрьн.

17 Гава Иса рʹийа хԝәда дьчу, мәрьвәк һатә пешийа ԝи, хԝә бәр ԝи авитә сәр чока у же пьрси: «Дәрсдаре ԛәнщ, әз гәрәке чь бькьм, ԝәки жийина һʹәта-һʹәтайе бьстиньм?» 18 Иса ԝирʹа гот: «Тӧ чьма мьнрʹа дьбежи ԛәнщ? Пештьри Хԝәде тʹӧ кәс ԛәнщ нинә. 19 Тӧ ван тʹәмийа зани: ‹Нәкӧжә, ԛавийе нәкә, нәдьзә, шәʹдәтийа дәрәԝ нәдә, нәхапинә, ԛәдьре де у баве хԝә бьгьрә›». 20 Әԝи мәрьви гот: «Дәрсдар, әз жь бьчʹуктайе ван һʹәму тʹәмийа тиньм сери». 21 Иса ԝи ньһерʹи, һьндава ԝида бь һʹәзкьрьне тʹьжә бу у готе: «Тʹәне тьштәк тә кем ә: Һәрʹә тьштед хԝә бьфьрошә у бьдә кʹәсиба. Һьнге ԝе хьзна тә ль әʹзмана һәбә. У паше пәй мьн ԝәрә». 22 Ле әԝ сәр ван гьлийа гәләк дьлтәнг бу у чу, чьмки мал-мьлкʹе ԝи гәләк бу.

23 Паше Иса ль дора хԝә ньһерʹи у шагьртед хԝәрʹа гот: «Дәԝләтийарʹа ԝе чьԛас чәтьн бә бькʹәвьнә Пʹадшатийа Хԝәде!» 24 Ле шагьрт сәр ван гьлийед ԝи шаш ман. Һьнге Иса диса гот: «Зарʹно, чьԛас чәтьн ә кӧ мәрьв бькʹәвә Пʹадшатийа Хԝәде! 25 Дәвә ԝе ԛӧла дәрзийерʹа дьһа һеса дәрбаз бә, нә кӧ йе дәԝләти бькʹәвә Пʹадшатийа Хԝәде». 26 Шагьрт һе зедә шаш ман у жь ԝи* пьрсин: «Ида кʹи дькарә хьлаз бә?» 27 Иса ль ԝан ньһерʹи у гот: «Бона мәрьва әв тьштәки нәбуйи йә, ле нә бона Хԝәде, чьмки бона Хԝәде һәр тьшт дьбә». 28 Һьнге Пәтрус ԝирʹа гот: «Аԝа мә һʹәму тьшт һиштьнә у пәй тә һатьнә». 29 Иса гот: «Әз рʹаст ԝәрʹа дьбежьм, һәр кәсе кӧ бона хатьре наве мьн у мьзгинийе, мал, йан хушк, йан бьра, йан де, йан бав, йан зарʹ, йан әʹрде хԝә һиштийә, 30 әԝе ньһа 100 щар зедәтьр мал, хушк, бьра, де, зарʹ, әʹрд тʹәви зерандьна бьстинә у дьнйа тʹәзәда жи жийина һʹәта-һʹәтайе. 31 Ле гәләк кәсед пешьн ԝе бьбьнә йед пашьн, у кәсед пашьн ԝе бьбьнә йед пешьн».

32 Әԝана рʹеда бун у һьлдькʹьшийанә Оршәлиме. Иса пешийа ԝан дьчу, шагьрт жи зәндәгьрти ман, ле кәсед кӧ пәй ԝан дьһатьн дьтьрсийан. Әԝи диса Донздәһ* дан алики у дәстпекьр ԝанрʹа гьли кә кӧ ԝе чь бе сәре ԝи: 33 «Ва әм ньһа һьлдькʹьшьнә Оршәлиме, у ԝе Кӧрʹе инсен бьдьнә дәсте сәрокед кʹаһина у ԛанунзана. Әԝана ԝе фәрмане бьдьн, ԝәки ԝи бькӧжьн у бьдьнә дәсте мәрьвед жь мьләтед дьн. 34 Әԝе ԛәрфед хԝә ԝи бькьн, тʹуйи ԝи бькьн, бьдьнә бәр ԛамчийа у бькӧжьн. Ле паши се рʹожа әԝе жь мьрьне бе рʹакьрьне».

35 Кӧрʹед Зәбәди Аԛуб у Йуһʹәнна незики Иса бун у готьн: «Дәрсдар, әм дьхԝазьн тьштәки жь тә һиви кьн, ԝәки тӧ бона мә бьки». 36 Әԝи жь ԝан пьрси: «Һун чь дьхԝазьн әз бона ԝә бькьм?» 37 Ԝана гот: «Изьне бьдә ԝәки жь мә йәк алийе мьле тәйи рʹасте, йе дьн жи алийе мьле тәйи чʹәпе, Пʹадшатийа тәда* рʹуне». 38 Ле Иса ԝанрʹа гот: «Һун ньзаньн чь дьхԝазьн. Гәло һун дькарьн жь ԝе кʹасе вәхԝьн, йа кӧ әз же вәдьхԝьм? Йан жи бь ԝе ньхӧмандьне* бенә ньхӧмандьне, бь кʹижане әз темә ньхӧмандьне?» 39 Ԝана ԝирʹа гот: «Әре, әм дькарьн». Һьнге Иса гот: «Кʹаса кӧ әз же вәдьхԝьм, һуне жь ԝе вәхԝьн, у бь ве ньхӧмандьне бенә ньхӧмандьне, йа кӧ әз пе темә ньхӧмандьне. 40 Ле әв йәк кӧ кʹи алийе мьле мьни рʹасте у алийе мьле мьни чʹәпе рʹуне, дәсте мьнда нинә. Әԝ щи бона ԝан ьн, кʹижанарʹа һатьнә һазьркьрьне».

41 Гава дәһ шагьртед дьн әв йәк бьһистьн, һерса ԝан сәр Аԛуб у Йуһʹәнна рʹабу. 42 Ле Иса әԝана гази бал хԝә кьрьн у ԝанрʹа гот: «Һун заньн ԝәки кәсед кӧ нав мьләтада сәрԝер тенә һʹәсабе, хԝә сәр ԝанрʹа дьгьрьн, у гьрәгьред ԝан һʹӧкӧми сәр ԝан дькьн. 43 Гәрәке нав ԝәда ӧса нибә. Ле йе кӧ дьхԝазә нав ԝәда бьбә йе мәзьн, гәрәке бьбә бәрдәстийе ԝә. 44 У йе кӧ дьхԝазә нав ԝәда бьбә йе пешьн, гәрәке бьбә хӧламе һʹәмуйа. 45 Чьмки Кӧрʹе инсен жи нәһатийә ԝәки ԝирʹа бәрдәстийе бькьн, ле ԝәки әԝ хԝәха бәрдәстийе бькә у әʹмьре хԝә бәр гәләкава бьдә, сәва ԝана аза кә».

46 Паше әԝана гьһиштьнә Әриһайе. Ле гава Иса тʹәви шагьртед хԝә у тʹәви гәләк мәрьва жь Әриһайе дәрдькʹәт, мәрьвәки кор наве кʹижани Бартимәйо бу (кӧрʹе Тимәйо), кʹеләка рʹе рʹуньшти бу у пʹарс дькьр. 47 Гава әԝи бьһист кӧ Исайе Ньсрәти дәрбаз дьбә, бь дәнгәки бьльнд кьрә гази: «Исайе кӧрʹе Даԝьд, гӧне хԝә мьн бинә!»* 48 Гәләк кәс әʹщьз бун у ԝирʹа готьн ԝәки хԝә кәрʹ кә. Ле әԝи бь дәнге һе бьльнд дькьрә гази: «Кӧрʹе Даԝьд, гӧне хԝә мьн бинә!» 49 Һьнге Иса сәкьни у гот: «Гази ԝи кьн». Ԝана жи гази ви мәрьве кор кьр у жерʹа готьн: «Нәтьрсә! Рʹабә, әԝ гази тә дькә». 50 Әԝи жи пʹоте хԝә авит, дәрберʹа рʹабу сәр хԝә у чу бал Иса. 51 Иса ԝирʹа гот: «Тӧ чь дьхԝази әз бона тә бькьм?» Мәрьве кор гот: «Дәрсдар,* әз дьхԝазьм ԝәки чʹәʹвед мьн диса бьвиньн». 52 Иса ԝирʹа гот: «Һәрʹә, баԝәрийа тә тӧ ԛәнщ кьри». У һәма ве дәме чʹәʹвед ԝи вәбун, у әԝ пәй Иса чу.

11 Гава әԝ незики Оршәлиме бун у һатьнә Бәйтфаще у Бәйтанйайе, кӧ сәр Чʹийайе Зәйтʹуне нә, Иса дӧ шагьртед хԝә шандьн 2 у ԝанрʹа гот: «Һәрʹьн гӧнде пешбәри хԝә. Һун һәма ча бькʹәвьнә ви гӧнди, һуне щәʹшькәкә гьредайи бьвиньн, кӧ һе кәсәк ле сийар нәбуйә. Ԝе щәʹшьке вәкьн у биньн вьра. 3 У һәрге кәсәк жь ԝә бьпьрсә: ‹Һун чьма ӧса дькьн?›, бежьн: ‹Әԝ Хӧданрʹа лазьм ә, у әԝе зу пашда вәгәрʹинә›». 4 Һьнге шагьрт чун, у ль кʹучʹе бәр дәре маләке щәʹшьк гьредайи дитьн у вәкьрьн. 5 Ле һьнә мәрьвед кӧ ԝедәре сәкьни бун, жь ԝан пьрсин: «Һун чь дькьн? Чьма щәʹшьке вәдькьн?» 6 Шагьрта щаба ԝан ӧса дан, чаԝа кӧ Иса ԝанрʹа готьбу, у әԝан мәрьва әԝ һиштьн.

7 Ԝана щәʹшьк ани бал Иса, кʹьнщед хԝә авитьнә сәр щәʹшьке, у Иса ле сийар бу. 8 Хенщи ԝе йәке, гәләка кʹьнщед хԝә сәр рʹе рʹадьхьстьн, ле һьнәка жи чʹьԛьлед кӧ дәштеда дьбьрʹин, датанин сәр рʹе. 9 Мәрьвед кӧ пешийа ԝи у пәй ԝи дьчун, дькьрьнә гази: «Йа Хԝәде, лава дькьн, ԝи хьлаз кә! Кʹәрәмкьри йә әԝе кӧ бь наве Йаһоԝа те! 10 Пʹадшатийа баве мә Даԝьд, йа кӧ те, кʹәрәмкьри йә! Йе Жорьн, әм лава дькьн, ԝи хьлаз кә!» 11 Иса кʹәтә Оршәлиме у чу пʹарьстгәһе. Ԝедәре әԝи ль һәр тьшти ньһерʹи, ле чьмки ида дәрәнг бу, тʹәви Донздәһа* чу Бәйтанйайе.

12 Рʹожа дьн, гава әԝана жь Бәйтанйайе дәрдькʹәтьн, Иса бьрʹчи бу. 13 Әԝи дурва дарәкә һежире бь бәлга дит у чу бьвинә һәла бәр пева һәнә. Ле гава әԝ незики даре бу, хенщи бәлга тʹӧ тьшт сәр нәдит, чьмки нә ԝәхте һежира бу. 14 Һьнге әԝи дарерʹа гот: «Бьра ида тʹӧ кәс бәре тә нәхԝә». У шагьртед ԝи әв гьли бьһистьн.

15 Паше әԝана чун гьһиштьнә Оршәлиме. Иса кʹәтә пʹарьстгәһе у дәстпекьр бәри ԝан һʹәмуйа бьдә, йед кӧ ԝедәре дькʹьрʹин у йед кӧ дьфьротьн. Әԝи ӧса жи тʹәхтед пʹәрәгӧһерʹа у кʹӧрсийед кәвоткфьроша ԝәлгәрʹандьн. 16 Әԝи нәһишт кәсәк тьштәки пʹарьстгәһерʹа дәрбаз кә. 17 Иса мәрьв һин дькьрьн у дьгот: «Һун ньзаньн чь һатийә ньвисаре? ‹Мала мьн ԝе бе навкьрьне мала дӧа бона һʹәму мьләта›, ле ԝә әԝ кьрийә шкәфта ԛачаха». 18 Гава сәрокед кʹаһина у ԛанунзана әв йәк бьһистьн, дәстпекьрьн мәщале бьгәрʹьн ԝәки Иса бьдьнә кӧштьне. Әԝана жь ԝи дьтьрсийан, чьмки тʹәмамийа әʹлаләте сәр һинкьрьна ԝи әʹщебмайи дьма.

19 Гава бу евар, әԝ тʹәви шагьртед хԝә жь бажер дәркʹәт. 20 Сәре сьбәһе, әԝана бәр дара һежирерʹа дәрбаз дьбун, у дитьн кӧ дар кʹокева һʹьшк буйә. 21 Әԝ дар һатә бира Пәтрус у әԝи Исарʹа гот: «Дәрсдар, бьньһерʹә! Дара кӧ тә ньфьрʹ ле кьр, һʹьшк буйә». 22 Иса ԝанрʹа гот: «Баԝәрийа хԝә Хԝәде биньн. 23 Әз рʹаст ԝәрʹа дьбежьм, кʹи ви чʹийайирʹа бежә: ‹Рʹабә хԝә бавежә бәʹре›, у дӧдьли нәбә, ле баԝәр кә кӧ готьна ԝи ԝе бе сери, әв йәк ԝе бьбә. 24 Ләма жи әз ԝәрʹа дьбежьм, һәр тьште кӧ һун дӧайед хԝәда дьхԝазьн, баԝәр кьн кӧ ԝә стандийә, у һуне бьстиньн. 25 У гава һун дьсәкьньн дӧа дькьн, һәрге тьштәки ԝә һьндава кәсәкида һәбә бьбахшиньн, сәва кӧ Баве ԝәйи әʹзмана жи гӧнед ԝә бьбахшинә ԝә». 26* ——

27 Әԝана диса һатьн Оршәлиме. Гава Иса пʹарьстгәһеда дьгәрʹийа, сәрокед кʹаһина, ԛанунзан у рʹуспи һатьн 28 у жь ԝи пьрсин: «Тӧ бь чь һʹӧкӧми ван тьшта дьки? Кʹи әв һʹӧкӧм дайә тә, ван тьшта бьки?» 29 Иса щаба ԝан да: «Әзе пьрсәке бьдьмә ԝә, щаба мьн бьдьн, у әзе ԝәрʹа бежьм кӧ әз бь чь һʹӧкӧми ван тьшта дькьм. 30 Гава Йуһʹәнна* мәрьв дьньхӧмандьн, әԝи әв һʹӧкӧм жь Хԝәде* стандьбу йан жь мәрьва? Щаба мьн бьдьн». 31 Һьнге әԝана нав хԝәда шеԝьрин у готьн: «Һәрге әм бежьн ‹Жь Хԝәде›, әԝе бежә, ‹Ле ԝә чьрʹа әԝ баԝәр нәкьр?› 32 Әм нькарьн бежьн ‹Жь мәрьва› жи». Әԝана жь хәлԛе дьтьрсийан, чьмки әԝана гьшк дьфькьрин кӧ Йуһʹәнна бь рʹасти пʹехәмбәр бу. 33 Ләма ԝана Исарʹа гот: «Әм ньзаньн». Әԝи жи ԝанрʹа гот: «Әз жи ԝәрʹа набежьм кӧ әз бь чь һʹӧкӧми ван тьшта дькьм».

12 Паше Иса дәстпекьр бь мәсәла ԝанрʹа хәбәр дә: «Мәрьвәки рʹәзе тьрийа чанд, дора ԝе сур кьр, һʹәԝзәк кʹола бона һʹьнщьрʹандьна тьрийа у бьрщәкә нобәдарийе чекьр. Паше әԝи әв рʹәз кʹьре да рʹәзвана у чу ԝәлатәки дьн. 2 Гава ԝәʹде чьнина тьрийа һат, әԝи хӧламәк шандә бал рʹәзвана, ԝәки жь ви рʹәзи пʹара хԝә бьстинә. 3 Ле рʹәзвана әԝ гьрт, кʹӧтан у дәствала шандьн. 4 Паше әԝи хӧламәки дьн шандә бал ԝан, ле ԝана сәре ԝи шкенанд у әԝ беһӧрмәт кьрьн. 5 Әԝи йәки дьн шанд, у ԝана әԝ кӧшт. Гәләк кәсед дьн жи һатьнә шандьне, ле һьнәк жь ԝан кʹӧтан у һьнәк жи кӧштьн. 6 Тʹәне кәсәки ԝи мабу, кӧрʹе ԝийи дәлал. Хьлазийе, әԝ жи шанд у хԝәрʹа гот: ‹Әԝана ԝе ԛәдьре кӧрʹе мьн бьгьрьн›. 7 Ле рʹәзвана һәврʹа готьн: ‹Әв ԝаре ԝи йә. Ԝәрен әм ле бькӧжьн у миратʹа ԝи ԝе мәрʹа бьминә›. 8 Һьнге ԝана әԝ гьрт у кӧштьн, у жь рʹәз авитьнә дәрва. 9 Ижа хԝәйе рʹәз ԝе чь бькә? Әԝе бе ван рʹәзвана бькӧжә у рʹәз бьдә йед дьн. 10 Ԝә ԛә әв ньвисар нәхԝәндийә: ‹Кәвьре кӧ авакʹара инкʹар кьр, буйә кәвьре сәрәкә;* 11 Йаһоԝа әв йәк кьр у әв йәк бәр чʹәʹве мә ча кʹәрәмәт ә›?»

12 Ԝана фәʹм кьр кӧ әԝи бь ве мәсәле дәрһәԛа ԝан гот, у хԝәстьн ԝи бьгьрьн. Ле жь хәлԛе дьтьрсийан, ләма жи ԝана әԝ һиштьн у чун.

13 Паше ԝана һьнә Ферьси у пьштгьред Һеродәс шандьнә бал ԝи, ԝәки Иса сәр гьлийа бьгьрьн. 14 Гава әԝана һатьн, ԝирʹа готьн: «Дәрсдар, әм заньн тӧ тʹьме рʹастийе дьбежи, у тӧ накʹәви һʹәйре кӧ мәрьва хԝәш бейи, чьмки нав мәрьвада фьрԛийе данайни. Ле тӧ рʹийа Хԝәде ль гора рʹастийе һин дьки. Тӧ ча дьфькьри, рʹаст ә кӧ хәрщ бьдьнә Ԛәйсәр, йан на? 15 Әм гәрәке пʹәра бьдьн, йан на?» Ле Иса дӧрʹутийа ԝан заньбу у ԝанрʹа гот: «Һун чьма мьн дьщерʹьбиньн? Кʹа динарәки бьдьнә мьн». 16 Ԝана жи динарәк данә ԝи у Иса жь ԝан пьрси: «Әв сьфәт у ньвисар йед кʹе нә?» Ԝана гот: «Йед Ԛәйсәр ьн». 17 Һьнге Иса гот: «Дә тьштед Ԛәйсәр бьдьнә Ԛәйсәр, ле тьштед Хԝәде бьдьнә Хԝәде». У әԝана сәр ԝи әʹщебмайи ман.

18 Паше Садуԛийед кӧ дьбежьн ԝәки рʹабуна мьрийа тʹӧнә, һатьнә бал Иса у жь ԝи пьрсин: 19 «Дәрсдар, Муса мәрʹа ньвисийә, һәрге мерәк бьмьрә у жьна хԝә безӧрʹәт бьһелә, гәрәке бьре ԝи жьна ԝи бьстинә у бь ви щурʹәйи зӧрʹәта бьре хԝә бәрдәԝам кә. 20 Аԝа һʹәфт бьра һәбун. Бьре пешьн зәԝьщи, ле безӧрʹәт мьр. 21 Паше бьре дӧда жьна ԝи станд, у әԝ жи безӧрʹәт мьр. Әв тьшт һатә сәре бьре сьсийа жи. 22 У һәр һʹәфт бьра безӧрʹәт мьрьн. Пәй һʹәмуйарʹа әв жьн жи мьр. 23 Ԝәʹде рʹабуна мьрийа, әв жьн ԝе бьбә жьна кʹижани? Чьмки һәр һʹәфт бьра жи әԝ стандьбун». 24 Иса щаба ԝан да: «Һун шаш дьбьн, чьмки һун нә Ньвисаред Пироз заньн у нә жи ԛәԝата Хԝәде. 25 Гава әԝана жь мьрьне рʹабьн, ԝе нә бьзәԝьщьн у нә жи мер кьн, ле әԝана ԝе мина мәләкед әʹзмана бьн. 26 Ле дәрһәԛа ве йәке кӧ мьри ԝе рʹабьн, ԝә кʹьтеба Мусада нәхԝәндийә, кӧ Хԝәде бәр тʹуме стьрийа ԝирʹа чь гот: ‹Әз ьм Хԝәдайе Бьраһим, Хԝәдайе Исһаԛ у Хԝәдайе Аԛуб›? 27 Әԝ нә кӧ Хԝәдайе мьрийа йә, ле Хԝәдайе саха йә. Һун гәләк шаш дьбьн».

28 Ԝедәре ԛанунзанәки бьһист кӧ ча әԝана һәврʹа кʹәтьнә дәʹԝе. Әԝи дит кӧ Иса рʹьнд щаба ԝан да, у жь ԝи пьрси: «Ԛанунеда тʹәмийа һәрә пешьн* кʹижан ә?» 29 Иса щаба ԝи да: «Тʹәмийа һәрә пешьн әв ә: ‹Бьбьһе, йа Исраел, Йаһоԝа Хԝәдайе мә, йәк ә Йаһоԝа. 30 Йаһоԝа Хԝәдайе хԝә бь тʹәмамийа дьле хԝә, бь тʹәмамийа щанийа хԝә, бь тʹәмамийа һʹьше хԝә у бь тʹәмамийа ԛәԝата хԝә һʹәз бькә›. 31 Тʹәмийа дӧда жи әв ә: ‹Мәрьва һʹәз бькә чаԝа тӧ хԝә һʹәз дьки›. Жь ван мәзьнтьр тʹӧ тʹәми тʹӧнә». 32 Ԛанунзан Исарʹа гот: «Дәрсдар тә рʹьнд у рʹаст гот, ‹Хԝәде йәк ә, у хенщи ԝи хԝәдеки дьн тʹӧнә›. 33 У әв йәк кӧ мәрьв бь тʹәмамийа дьле хԝә, бь тʹәмамийа һʹьше хԝә у бь тʹәмамийа ԛәԝата хԝә ԝи һʹәз бькә у чаԝа кӧ хԝә һʹәз дькә мәрьва жи һʹәз бькә, жь һʹәму ԛӧрбанед шәԝьтандьне у ԛӧрбанед дьн ԛимәттьр ә». 34 Гава Иса дит кӧ әԝи бь аԛьлайи щаба хԝә да, жерʹа гот: «Тӧ жь Пʹадшатийа Хԝәде нә дур и». Паши ве йәке тʹӧ кәси нәԝерьбу тьштәки жь ԝи бьпьрсә.

35 Чахе Иса һе пʹарьстгәһеда һин дькьр, әԝи гот: «Ԛанунзан чьма дьбежьн кӧ Мәсиһ кӧрʹе Даԝьд ә? 36 Нә Даԝьд бь сайа рʹӧһʹе пироз хԝәха гот, ‹Йаһоԝа Хӧдане мьнрʹа гот: «Алийе мьле мьни рʹасте рʹуне, һʹәта кӧ әз дьжмьнед тә бькьмә бьн ньгед тә»›. 37 Даԝьд хԝәха сәр ԝи дьбежә ‹Хӧдан›, ижа әԝ ча дькарә кӧрʹе ԝи бә?»

У гәләк мәрьва бь дьл у щан гӧһ дьданә ԝи. 38 Әԝи бәрдәԝам кьр ԝана һин кә у гот: «Хԝә жь ԛанунзана дур бьгьрьн, йед кӧ һʹәз дькьн бь кʹьнщед дьреж бьгәрʹьн у дьхԝазьн мәрьв базарада ԝана сьлав кьн. 39 Әԝана һʹәз дькьн кʹьништада* щийед пешьн бьгьрьн у ԝәʹде шиве ль щийед һәри баш рʹунен. 40 Әԝана мал-мьлкʹе жьнәбийа жь ԝан дьстиньн, у дӧайед хԝә дьреж дькьн, кӧ хԝә бькьнә чʹәʹва. Диԝана ԝан ԝе һе гьран бә».

41 Иса щики ӧса рʹуньшт кӧ пʹәрәданга пʹарьстгәһе ԝирʹа бе хане, у дина хԝә дьдайе кӧ хәлԛ чаԝа пʹәра давежьне. Гәләк мәрьвед дәԝләти пʹәрә зәʹф давитьне. 42 Жьнәбикә бәләнгаз жи һат у дӧ ԛӧрʹушед* бьчʹук авите. 43 Һьнге Иса шагьртед хԝә гази бал хԝә кьрьн у ԝанрʹа гот: «Әз рʹаст ԝәрʹа дьбежьм, әв жьнәбийа бәләнгаз жь һʹәму мәрьвед кӧ пʹәрә авитьнә пʹәрәданге, зедәтьр авите. 44 Чьмки ԝан һʹәмуйа жь зедәйа һәбука хԝә авитьне, ле әԝе бәләнгазийа хԝәда, чи ԝе һәбу кӧ пе әʹбура хԝә бькә, гьшк авите.

13 Гава Иса жь пʹарьстгәһе дәрдькʹәт, йәк жь шагьртед ԝи жерʹа гот: «Дәрсдар, һәла бьньһерʹә әв чь кәвьр ьн у чь авайи нә!» 2 Ле Иса ԝирʹа гот: «Тӧ ван авайед мәзьн дьвини? Вьра кәвьр ԝе сәр кәвьр нәминә. Һәр тьшт ԝе ԝеран бә».

3 Чахе Иса сәр Чʹийайе Зәйтʹуне пешбәри пʹарьстгәһе рʹуньшти бу, Пәтрус, Аԛуб, Йуһʹәнна у Әндраԝьс башԛә же пьрсин: 4 «Кʹа мәрʹа бежә, әв тьшт ԝе кʹәнге бьԛәԝьмьн? Чь ԝе бьбә нишана ве йәке, кӧ хьлазийа ван һʹәму тьшта незик ә?» 5 Иса жи дәстпекьр ԝанрʹа бежә: «Һаж хԝә һәбьн, ԝәки тʹӧ кәс ԝә нәхапинә. 6 Гәләк кәс ԝе бь наве мьн бен у бежьн, ‹Әԝ әз ьм›, у ԝе гәләка бьхапиньн. 7 Хенщи ве йәке, гава һун дәрһәԛа шәрʹед щурʹә-щурʹә щийада бьбьһен, нәтьрсьн. Әв тьшт гәрәке бьԛәԝьмьн, ле әв һе хьлази нинә.

8 Мьләте һьмбәри мьләт у пʹадшати ԝе һьмбәри пʹадшатийе рʹабә. Гәләк щийа ԝе әʹрдһʹәж һәбьн у ӧса жи хәлайи. Әв тьшт дәстпека кӧл-дәрда нә.*

9 Ле һун һаж хԝә һәбьн. Мәрьв ԝе ԝә бьвьнә бәр диԝана, у ԝе кʹьништада ԝә бькʹӧтьн. Рʹуйе мьнда ԝе ԝә бәр ԝәлийа у пʹадша бьдьнә сәкьнандьне, ԝәки һун ԝанрʹа шәʹдәтийе бьдьн. 10 Хенщи ве йәке, гәрәке пешийе нав һʹәму мьләтада мьзгини бе бәлакьрьне. 11 У чахе әԝана ԝә бьгьрьн у бьдьнә дәсте ԝан, пешда хәм нәкьн һуне чь бежьн. Ле ԝе дәме чь ԝәрʹа бе дайине, ԝе жи бежьн, чьмки нә кӧ һун, ле рʹӧһʹе пироз ԝе хәбәр дә. 12 Хенщи ве йәке, бьра ԝе бьре хԝә у бав ԝе зарʹа хԝә бьдә кӧштьне, у зарʹ ԝе һьмбәри де-баве хԝә рʹабьн у ԝана бьдьнә кӧштьне. 13 Бона наве мьн һуне бәр чʹәʹве һʹәмуйа рʹәш бьн, ле йе кӧ һʹәта хьлазийе тәйах кә, әԝе хьлаз бә.

14 Ле гава һун һʹәрамийа кӧ пәй хԝә ԝеранкьрьне тинә, ль щийе кӧ гәрәке әԝ ԝедәре нибә, сәкьни, бьвиньн (әԝе кӧ дьхунә бьра фәʹм бькә*), һьнге бьра йед кӧ Щьһустанеда нә, бьрʹәвьнә чʹийа. 15 Кәсе кӧ сәр бани бә, бьра данәкʹәвә у нәкʹәвә һӧндӧрʹе мала хԝә, кӧ тьштәки һьлдә. 16 У йе кӧ зәвийеда бә, бьра пашда вәнәгәрʹә, кӧ пʹоте хԝә һьлдә. 17 Ԝәй ль жьнед һʹәмлә у йед дәстдәргуш ԝан рʹожада! 18 Тʹьме дӧа бькьн, ԝәки әԝ йәк зьвьстанеда нәԛәԝьмә. 19 Чьмки әԝ рʹож ԝе бьбьнә рʹожед тәнгасийе. Жь дәстпека кӧ Хԝәде дьнйа әʹфьранд, һʹәта ньһа тьштәки ӧса нәбуйә у ԝе нә жи бьбә. 20 Һәрге Йаһоԝа ԝан рʹожа кьн нәкә, тʹӧ мәрьв ԝе хьлаз нәбә. Ле бона хатьре ԝан бьжартийед кӧ әԝи бьжартийә, әԝе ԝан рʹожа кьн кә.

21 Һьнге, һәрге кәсәк ԝәрʹа бежә: ‹Бьньһерʹә, Мәсиһ вьра йә!›, йан жи ‹Бьньһерʹә, әԝ ԝедәре йә!›, баԝәр нәкьн. 22 Чьмки Мәсиһед ԛәлп у пʹехәмбәред ԛәлп ԝе дәркʹәвьн, у ԝе нишан у кʹәрәмәта бькьн, ԝәки һәрге бе стандьне, йед бьжарти жи бьхальфиньн. 23 Ләма жи һаж хԝә һәбьн. Мьн һʹәму тьшт ԝәрʹа пешда гот.

24 Ԝан рʹожада, паши ԝе тәнгасийе, тәʹв ԝе тәʹри бә у һив ԝе рʹонайа хԝә нәдә. 25 Стәйрк ԝе жь әʹзмен бькʹәвьн, у ԛәԝатед әʹзмана ԝе бенә һʹәжандьне. 26 У һьнге мәрьв ԝе Кӧрʹе инсен бьвиньн, йе кӧ әʹԝред әʹзманада бь ԛәԝат у рʹумәта мәзьн те. 27 Әԝе мәләкед хԝә бьшинә у жь һәр чар алийед дьнйайе,* жь сәре әʹрде һʹәта сәре әʹзмен, бьжартийед хԝә тʹоп кә.

28 Жь дара һежире хԝәрʹа әве дәрсе һин бьн: Чахе чʹьԛьлед ԝе мәзьн дьбьн у бәлгед ԝе шин дьбьн, һун фәʹм дькьн кӧ һавин ида незик буйә. 29 Бь ви щурʹәйи жи, гава һун бьвиньн кӧ әв тьшт дьԛәԝьмьн, бьзаньбьн кӧ әԝ* незик ә, бәр дери йә. 30 Әз рʹаст ԝәрʹа дьбежьм, пешийа кӧ әв ньсьл дәрбаз бә, әв һʹәму тьшт ԝе бенә сери. 31 Әʹрд у әʹзман ԝе бәтавәбьн, ле хәбәред мьн ԝе һәр у һәр бьминьн.

32 Ле тʹӧ кәс ньзанә кӧ әԝ рʹож йан сьһʹәт ԝе кʹәнге бә, нә мәләкед әʹзмана, нә жи Кӧрʹ, ле тʹәне Бав занә. 33 Һаж хԝә һәбьн, һʹьшйар бьминьн, чьмки һун ньзаньн кӧ ԝәхте кʹьфшкьри кʹәнге йә. 34 Әв йәк мина мәрьвәки йә, йе кӧ дьчә ԝәлатәки дьн, ле мала хԝә тʹәсмили хӧламед хԝә дькә. Әԝ ԝан һәр йәкирʹа шьхӧл дьдә у тʹәмийе дьдә дәргәһван кӧ һʹьшйар бьминә. 35 Ләма һʹьшйар бьминьн, чьмки һун ньзаньн кӧ хԝәйе мале ԝе кʹәнге бе, еваре, ниве шәве, бәрбанге* йан сәре сьбәһе. 36 Нәбә кӧ әԝ ньшкева бе у ԝә хәԝеда бьвинә. 37 Ле чь кӧ әз ԝәрʹа дьбежьм, һʹәмуйарʹа дьбежьм: Һʹьшйар бьминьн».

14 Аԝа дӧ рʹож мабу кӧ Щәжьна Дәрбазбуне у Щәжьна Нане Шкәва* бьбуйа. Сәрокед кʹаһина у ԛанунзана мәщал дьгәрʹийан, ԝәки Иса бь фелбази бьгьрьн у бькӧжьн, 2 ле ԝана дьгот: «Бьра әв йәк ԝәʹде щәжьне нибә, чьмки дьԛәԝьмә щьмәʹт тʹәвльһәв бә».

3 Гава әԝ ль Бәйтанйайе, мала Шьмһʹуне кʹотида бәр сьфре рʹуньштьбу, жьнәк һатә ԝедәре. Бал ԝе дәрданәкә жь кәвьре мәрмәрда рʹуне бинхԝәш* у бьһа һәбу. Әԝе сәре дәрдане шкенанд у рʹун сәр сәре Исада рʹет. 4 Һьнге һьнә мәрьв әʹщьз бун у һәврʹа дьготьн: «Чьма әв рʹуне бинхԝәш бадиһәԝа һатә рʹетьне? 5 Әв рʹуне бинхԝәш дькарьбу 300 динари зедәтьр бьһата фьротане у әв пʹәрә кʹәсибарʹа бьһата бәлакьрьне». У әԝана сәр жьньке гәләк һерс кʹәтьн.* 6 Иса гот: «Ле вәгәрʹьн. Һун чьма дьле ԝе дешиньн? Әԝе бона мьн тьштәки ԛәнщ кьр. 7 Йед кʹәсиб һәр гав тʹәви ԝә нә, у һун кʹәнге бьхԝазьн дькарьн ԛәнщийе ԝанрʹа бькьн, ле әзе һәр гав тʹәви ԝә нибьм. 8 Чь жь дәсте ԝе һат әԝе кьр. Әԝе пешда бәдәна мьн бона дәфьнкьрьне* рʹун кьр. 9 Әз рʹаст ԝәрʹа дьбежьм: Сәр тʹәмамийа дьнйайе, һʹәму щийа кʹидәре әв мьзгини бе бәлакьрьне, ԝе кьрьна ве кʹӧлфәте жи бона биранина ԝе бе готьне».

10 Һьнге Щьһудайе Исхәрйоти, йәк жь Донздәһа,* чу бал сәрокед кʹаһина, сәва кӧ Иса бьдә дәсте ԝан. 11 Гава ԝана әв йәк бьһист, ша бун у соз дан кӧ пʹәред зив бьдьнә ԝи. Жь ԝе дәме, әԝи мәщал дьгәрʹийа ԝәки нәмамийа Иса бькә.

12 Рʹожа пешьнә Щәжьна Нане Шкәва,* гава ль гора әʹдәт ԛӧрбана Щәжьна Дәрбазбуне дьһатә дайине, шагьрта жь Иса пьрсин: «Тӧ дьхԝази әм тәрʹа кʹидәре бона Щәжьна Дәрбазбуне хԝарьне һазьр кьн?» 13 Һьнге Иса дӧ шагьртед хԝә шандьн у ԝанрʹа гот: «Һәрʹьн бажер. Мәрьвәк ԝе рʹасти ԝә бе, йе кӧ щерʹәки аве һьлгьртийә. Пәй ԝи һәрʹьн, 14 у әԝ мәрьв бькʹәвә кʹижан мале, һун хԝәйе ве малерʹа бежьн: ‹Дәрсдар дьбежә: «Кʹидәре йә әԝ ода мевана, кʹижанеда әз дькарьм тʹәви шагьртед хԝә хԝарьна Щәжьна Дәрбазбуне бьхԝьм?»› 15 Һьнге әԝе ль ԛате жорьн одәкә мәзьнә һәвдайи у һазьркьри нишани ԝә бькә. Ԝедәре бона мә шиве һазьр кьн». 16 Шагьрт чун кʹәтьнә бажер, у һʹәму тьшт ӧса бу чаԝа Иса ԝанрʹа готьбу. Ԝана бона Щәжьна Дәрбазбуне һʹәму тьшт һазьр кьр.

17 Чахе бу евар, Иса тʹәви Донздәһа һат. 18 Гава әԝана бәр сьфре рʹуньштьбун у хԝарьн дьхԝарьн, Иса гот: «Әз рʹаст ԝәрʹа дьбежьм, йәк жь ԝә, йе кӧ тʹәви мьн хԝарьне дьхԝә, ԝе нәмамийа мьн бькә». 19 Әԝана хәмгин бун, у йәк пәй йәкерʹа жь ԝи пьрсин: «Әԝ әз ьм?» 20 Әԝи ԝанрʹа гот: «Әԝ кәс йәк жь Донздәһа йә, йе кӧ пәʹрийе хԝә тʹәви мьн тʹаседа дькә. 21 Чьмки Кӧрʹе инсен гәрәке һәрʹә, чаԝа кӧ һатийә ньвисаре. Ле ԝәй ль ԝи, йе кӧ нәмамийа Кӧрʹе инсен бькә! Бона ԝи кәси ԝе баш буйа, ԝәки әԝ нәһата буйине».

22 Гава ԝана һе хԝарьн дьхԝар, Иса нан һьлда, дӧа кьр,* нан кәр кьр,* да шагьртед хԝә у гот: «Һьлдьн, әв бәдәна мьн те һʹәсабе». 23 Пәйрʹа әԝи кʹас һьлда, шькьри да Хԝәде, паше да ԝан у һʹәмуйа же вәхԝар. 24 У әԝи ԝанрʹа гот: «Әв кʹас те һʹәсабе ‹хуна мьнә пәймане›, йа кӧ ԝе бона гәләка бе рʹетьне. 25 Әз рʹаст ԝәрʹа дьбежьм: Әзе ида шәраве вәнәхԝьм, һʹәта рʹожа кӧ әз Пʹадшатийа Хԝәдеда тʹәви ԝә шәрава ну вәхԝьм». 26 Хьлазийе, ԝана бона пәсьндайина Хԝәде стьра* у паше дәркʹәтьн чунә Чʹийайе Зәйтʹуне.

27 Һьнге Иса ԝанрʹа гот: «Һун һʹәмуйе мьн бьһельн,* чьмки ӧса һатийә ньвисаре: ‹Әзе ль шьван хьм у пәз ԝе жь һәв бәла бьн›. 28 Ле чахе әз жь мьрьне рʹабьм, әзе пешийа ԝә һәрʹьмә Щәлиле». 29 Пәтрус жи ԝирʹа гот: «Һәрге һʹәму тә бьһельн жи,* әзе тә нәһельм!» 30 Һьнге Иса ле вәгәрʹанд у готе: «Әз рʹаст тәрʹа дьбежьм, ишәв, пешийа кӧ дик дӧ щара банг бьдә, тӧйе се щара мьн инкʹар ки». 31 Ле Пәтрус сәр готьна хԝә ма у дьгот: «Һәрге лазьм бә әз тʹәви тә бьмьрьм жи, әзе тʹӧ щар тә инкʹар нәкьм». У йед дьн жи дәстпекьрьн ӧса бежьн.

32 Пәйрʹа әԝана һатьн щики бь наве Гетшәмани, у Иса шагьртед хԝәрʹа гот: «Вьра рʹунен, һʹәта әз дӧа бькьм». 33 Әԝи тʹәви хԝә Пәтрус, Аԛуб у Йуһʹәнна бьрьн. Һьнге Иса гәләк хәмгин бу у зәʹф дьлтәнг бу. 34 Әԝи ԝанрʹа гот: «Дәрде дьле мьн ӧса гьран ә, мина бәр мьрьне. Вьра бьн у һʹьшйар бьминьн». 35 Иса һьнәки пешда чу, дәвәрʹу кʹәтә сәр чока у дәстпекьр дӧа кә, ԝәки һәрге дьбә, әв сьһʹәт бьра сәр ԝирʹа дәрбаз бә. 36 У әԝи гот: «Абба,* Баво, бона тә һәр тьшт дьбә. Ве кʹасе жь мьн дур хә. Ле бьра ӧса бә нә кӧ чаԝа әз дьхԝазьм, ле чаԝа тӧ дьхԝази». 37 Гава әԝ вәгәрʹийа бал шагьрта, дит кӧ әԝана хәԝрʹа чунә. Һьнге әԝи Пәтрусрʹа гот: «Шьмһʹун, тӧ рʹазайи? Тә нькарьбу һәма сьһʹәтәке һʹьшйар бьмайи? 38 Һʹьшйар бьминьн у тʹьме дӧа бькьн, сәва кӧ һун нәкʹәвьнә щерʹьбандьне. Рʹаст ә, дьл* дьхԝазә, ле бәдән сьст ә». 39 Иса диса чу, у дӧада диса әԝ хәбәр дьгот. 40 Иса диса һат у шагьрт хәԝеда дитьн, чьмки чʹәʹвед ԝан жь хәԝе гьран бьбун, у ԝана ньзаньбу чь ԝирʹа бежьн. 41 Гава Иса щара сьсийа вәгәрʹийа, әԝи ԝанрʹа гот: «Һун чаԝа дькарьн ԝәʹдәки ӧсада рʹазен у рʹьһʹәт бьн! Бәс ә! Ида сьһʹәт һатийә! Ва нәмамийа Кӧрʹе инсен дькьн у ԝи дьдьнә дәсте гӧнәкʹара. 42 Рʹабьн әм һәрʹьн. Ва нәмаме мьн ида незик ә».

43 Һәма ве дәме, гава әԝи һе хәбәр дьда, Щьһудайе кӧ йәк жь Донздәһа* бу, тʹәви гәләк мәрьва һат. Әԝана жь алийе сәрокед кʹаһина, ԛанунзан у рʹуспийа һатьбун шандьне, у дәсте ԝанда шур у дар һәбун. 44 Аԝа нәмаме ԝи сәва кӧ нишанәке бьдә ԝан, ԝанрʹа ӧса гот: «Әз кʹижани пачʹ кьм, һәма әԝ ә, ԝи бьгьрьн у бь нобәдара бьвьн». 45 Әԝ дәрберʹа чу бал Иса, незики ԝи бу у гот: «Дәрсдар!» У әԝи Иса пачʹ кьр. 46 Һьнге ԝана Иса гьрт. 47 Ле йәк жь ԝан, йе кӧ ԝедәре сәкьни бу, шуре хԝә дәрхьст, хӧламе кʹаһине мәзьн хьст у гӧһе ԝи жекьр. 48 Иса ԝанрʹа гот: «Чьрʹа әз ԛачах ьм, һун бь дара у шура һатьнә мьн бьгьрьн? 49 Һәр рʹож әз тʹәви ԝә пʹарьстгәһеда бум у мьн һин дькьр, чьрʹа һьнге ԝә әз нәдьгьртьм? Ле әв һәр тьшт ӧса ԛәԝьми, ԝәки Ньвисаред Пʹехәмбәра бенә сери».

50 Һьнге һʹәму шагьрта әԝ һишт у рʹәвин. 51 Ле хортәки щаһьл незиква пәй ԝи дьчу у тʹәне кʹьнщәкә кʹьтанейә хас ль бәдәна ԝийә тәʹзи бу. Ԝана хԝәст ԝи бьгьрьн, 52 ле әԝи кʹьнща хԝәйә кʹьтани һишт у тәʹзи* рʹәви.

53 Ԝана Иса бьрә бал кʹаһине мәзьн, у һʹәму сәрокед кʹаһина, рʹуспи у ԛанунзан ԝедәре тʹоп бун. 54 Ле Пәтрус дурва пәй Иса чу, һʹәта һʹәԝша кʹаһине мәзьн. Әԝ тʹәви хӧламед мале рʹуньшт у бәр агьр хԝә гәрм дькьр. 55 Сәрокед кʹаһина у тʹәмамийа Диԝана Бьльнд* йа Щьһуйа мьԛабьли Иса шәʹдә дьгәрʹийан, ԝәки ԝи бьдьнә кӧштьне, ле тʹӧ кәс нәдитьн. 56 Гәләка мьԛабьли ԝи шәʹдәтийа дәрәԝ дьдан, ле готьнед ԝан һәв нәдьгьртьн. 57 Чәнд кәс жи рʹадьбун, мьԛабьли ԝи шәʹдәтийа дәрәԝ дьдан у дьготьн: 58 «Мә бьһист кӧ әԝи гот: ‹Әзе ве пʹарьстгәһе кӧ бь дәсте мәрьва һатийә авакьрьне, һьлшиньм у нава се рʹожада әзе йәкә дьн ава кьм, кʹижан кӧ ԝе нә бь дәсте мәрьва чекьри бә». 59 Ле ве йәкеда жи, готьнед ԝан һәв нәдьгьртьн.

60 Һьнге кʹаһине мәзьн нав ԝан һʹәмуйада рʹабу сәр пʹийа у жь Иса пьрси: «Тӧ нахԝази щаба хԝә бьди? Тӧ сә дьки әв мәрьв мьԛабьли тә чь дьбежьн?» 61 Ле Иса дәнге хԝә нәкьр у тʹӧ тьшт нәгот. Һьнге кʹаһине мәзьн диса жь ԝи пьрси: «Тӧ йи Мәсиһ, Кӧрʹе Хԝәдейи Пироз?» 62 Иса гот: «Әре, әз ьм. У һуне Кӧрʹе инсен алийе мьле рʹасте кʹеләка Йе Һәри Ԛәԝат рʹуньшти у бь әʹԝред әʹзмен те, бьвиньн». 63 Һьнге кʹаһине мәзьн кʹьнщед хԝә ԛәлаштьн у гот: «Ида шәʹдед зедә чи мәрʹа ньн? 64 Ԝә хԝәха бьһист, ԝәки әԝ кʹьфьрийа дькә. Һун сәр ве йәке чь дьфькьрьн?» Һʹәмуйа әԝ сущдар кьр у готьн кӧ әԝ һежайи кӧштьне йә. 65 У һьнәка дәстпекьр тʹуйи ԝи бькьн, сәр чʹәʹве ԝи гьредан, бь кʹӧлма ль ԝи дьхьстьн у ԝирʹа дьготьн: «Һәрге тӧ пʹехәмбәр и, һәла бежә кʹи тә хьст». Нобәдара силә ль рʹуйе Иса дьхьстьн у бьрьн.

66 Чахе Пәтрус жере һʹәԝшеда бу, щарикә кʹаһине мәзьн һатә ԝедәре. 67 Гава әԝе дит кӧ Пәтрус хԝә гәрм дькә, ԝи ньһерʹи у гот: «Тӧ жи тʹәви Исайе Ньсрәти буйи». 68 Ле әԝи әв йәк инкʹар кьр у гот: «Әз нә ԝи нас дькьм у нә жи фәʹм дькьм тӧ дәрһәԛа чь дьбежи». У әԝ жь ԝедәре дәркʹәт, чу бәр дәре һʹәԝше. 69 Щарийе гава ԝедәре жи әԝ дит, готә әԝед кӧ кʹеләке сәкьни бун: «Әԝ йәки жь ԝан ә». 70 Пәтрус диса әв йәк инкʹар кьр. Һьнә ԝәʹдә шунда, йед кӧ ԝедәре сәкьни бун, Пәтрусрʹа готьн: «Тӧ бь рʹасти йәк жь ԝан и, чьмки тӧ жь Щәлиле йи». 71 Ле әԝи ньфьрʹ ль хԝә кьр у сонд хԝар: «Әз ви мәрьви нас накьм, бәʹса кʹижани кӧ һун дькьн!» 72 Дәрберʹа дик щара дӧда банг да. Ԝе дәме гьлийед Иса кʹәтьнә бира Пәтрус: «Пешийа кӧ дик дӧ щара банг бьдә, тӧйе се щара мьн инкʹар ки». У әԝи тәйах нәкьр, гьрийа.

15 Һәма ча сьбәһ сафи бу, сәрокед кʹаһина, рʹуспи у ԛанунзан, демәк тʹәмамийа Диԝана Бьльнд йа Щьһуйа* һәврʹа шеԝьрин. Паше Иса гьредан у бьрьн данә дәсте Пилато. 2 Пилато жь ԝи пьрси: «Тӧ йи Пʹадше Щьһуйа?» Әԝи щаб да: «Тә хԝәха гот». 3 Ле сәрокед кʹаһина, гәләк тьштада шәрʹ давитьнә Иса. 4 Һьнге Пилато диса жь ԝи пьрси: «Тӧ нахԝази щаба хԝә бьди? Бьньһерʹә әԝана мьԛабьли тә чьԛас тьшт дьбежьн». 5 Ле Иса ида тʹӧ щаб нәда, у Пилато сәр ве йәке әʹщебмайи ма.

6 Ԝәʹде һәр щәжьне, әԝи ль гора хԝәстьна щьмәʹте гьртик бәрʹдьда. 7 Ԝе дәме, мәрьвәки бь наве Барабас тʹәви мьԛабьлед дьн кәледа бу, чьмки ԝана ԝәʹде мьԛабьлибуне мәрьв кӧштьбун. 8 Щьмәʹт ль һәв тʹоп бу у хԝәст кӧ Пилато анәгори ԝи әʹдәте хԝә, хԝәстьна ԝан бинә сери. 9 Әԝи ԝанрʹа гот: «Һун дьхԝазьн ԝәки әз бона ԝә Пʹадше Щьһуйа бәрʹдьм?» 10 Чьмки Пилато заньбу кӧ сәрокед кʹаһина жь бо һʹәвсудийе Иса дабунә дәсте ԝи. 11 Ле сәрокед кʹаһина әʹлаләт ширәт кьрьн, ԝәки бьхԝазьн кӧ әԝ дәԝса ԝи Барабас бәрʹдә. 12 Диса Пилато ԝанрʹа гот: «Ле әз ԝи, кʹижанирʹа һун Пʹадше Щьһуйа дьбежьн, чаԝа бькьм?» 13 Ԝана диса кьрә ԛирʹин: «Ԝи стуне хә!» 14 Ле Пилато пьрси: «Чьрʹа? Әԝи чь хьраби кьрийә?» Ԝана һе дькьрә ԛирʹин: «Ԝи стуне хә!» 15 Пилато дьхԝәст щьмәʹте рʹази кә, ләма жи бона ԝан Барабас бәрʹда. Паше әԝи фәрман да, ԝәки Иса бьдьнә бәр ԛамчийа у ԝи стуне хьн.

16 Һьнге әскәра Иса бьрьн һʹәԝша ԛәсьра ԝәли у тʹәмамийа кʹома әскәра тʹоп кьрьн. 17 Ԝана кʹьнщәкә ширк* ле кьр, тʹащәк жь стьрийа чекьрьн данинә сәр сәре ԝи, 18 у бь дәнгәки бьльнд жерʹа дьготьн: «Сьлав ль тә, йа Пʹадше Щьһуйа!» 19 Ӧса жи ԝана пе ԛамиш сәре ԝи дьхьст, тʹуйи ԝи дькьрьн у дькʹәтьнә сәр чока у сәре хԝә бәр ԝи датанин. 20 Пәй ԛәрфкьрьнерʹа кʹьнща ширк жь ԝи ехьстьн, кʹьнщед ԝи диса ле кьрьн. У әԝ бьрьн ԝәки ԝи стунева мьх кьн. 21 Һьнге Шьмһʹуне Курени, баве Скәндәр у Рʹуфо, жь зәвийе дьһат у ԝедәрерʹа дәрбаз дьбу. Ԝана зоре ль ԝи кьр, ԝәки стуна Иса һьлгьрә.

22 У ԝана Иса бьрә щийе бь наве Голгота, чь кӧ те һʹәсабе «Щийе Ԛаф». 23 Ԝедәре ԝана шәрава тʹәв зьмьр* һәвхьсти данә ԝи, ле әԝи вәнәхԝар. 24 Ԝана әԝ сәр стуне мьх кьр, у пʹәшк авитьн, ԝәки кʹьнщед ԝи нав хԝәда пʹарәвәкьн у сафи кьн кӧ кʹи чь бьстинә. 25 Чахе ԝана әԝ сәр стуне мьх кьр, незики сьһʹәта нәһа* бу. 26 У феза сәре ԝи, ньвисара мәʹнийа сущдаркьрьна ԝи ӧса бу: «Пʹадше Щьһуйа». 27 Дӧ ԛачах жи кʹеләка ԝи стуне хьстьн, йәк алийе ԝийи чʹәпе у йе дьн жи алийе ԝийи рʹасте. 28* —— 29 Кәсед кӧ бәр ԝирʹа дәрбаз дьбун, әԝ беһӧрмәт дькьрьн, сәре хԝә дьһʹәжандьн, у дьготьн: «Нә тәйе пʹарьстгәһ һьлшанда у се рʹожада чекьра. 30 Дә хԝә хьлаз кә у жь ве стуне бәржер бә!» 31 Ӧса жи сәрокед кʹаһина тʹәви ԛанунзана нав хԝәда ԛәрфед хԝә ԝи дькьрьн у дьготьн: «Әԝи хәлԛ хьлаз кьрьн, ле нькарә хԝә хьлаз кә! 32 Бьра Мәсиһ, Пʹадше Исраеле ньһа жь стуне бәржер бә, ԝәки әм бьвиньн у ԝи баԝәр бькьн». Әԝед кӧ кʹеләка ԝи сәр стуна дардакьри бун, һәла һе ԝана жи әԝ беһӧрмәт дькьр.

33 Нивро незики сьһʹәта донздәһа* һʹәта незики сьһʹәта сьсийа,* тәʹри кʹәтә сәр рʹуйе ви әʹрди. 34 Сьһʹәта сьсийа,* Иса бь дәнгәки бьльнд кьрә гази у гот: «Ели, Ели, лама сабахтани?», чь кӧ те ԝәлгәрʹандьне: «Хԝәдайе мьн, Хԝәдайе мьн, тә чьрʹа әз һиштьм?» 35 Һьнә кәсед кӧ незик сәкьни бун, әв йәк бьһистьн у готьн: «Бьньһерʹьн! Әԝ гази Елйас дькә». 36 Һьнге кәсәк рʹәви чу, луфьк нава шәрава тьрʹшда кьр, пе ԛамишәки бьльнд кьр у да Иса, ԝәки әԝ вәхԝә, у гот: «Ле бьһельн! Әм дьхԝазьн бьвиньн, һәла Елйасе бе, ԝи бинә хԝаре йан на?» 37 Ле Иса бь дәнгәки бьльнд кьрә ԛирʹин у мьр.* 38 У пʹәрʹда пʹарьстгәһе жь сәри һʹәта бьни ԛәльши у бу дӧ пʹара. 39 Сәрсәде кӧ пешбәри Иса сәкьни бу, гава дит кӧ әԝ чаԝа мьр, гот: «Рʹасти жи әв мәрьв Кӧрʹе Хԝәде бу».

40 Ԝедәре һьнә жьн жи һәбун кӧ дурва дьньһерʹин. Нав ԝанда бун Мәрйәма Мәгдәлани, Мәрйәма дийа Аԛубе Бьчʹук у Йусес, у Сәлома. 41 Гава Иса ль Щәлиле бу, әԝ жьн тʹәви ԝи бун у бәрдәсти ԝирʹа кьрьбун, ӧса жи гәләк жьнед дьн, йед кӧ тʹәви ԝи һатьбунә Оршәлиме, нав ԝанда бун.

42 Ида бәре евар бу, у чьмки рʹожа Һазьркьрьне* бу, демәк рʹожа пешийа Шәмийе,* 43 Усьве Аримәтйайи, йе кӧ Диԝана Бьльндә Щьһуйада әндәмәки хԝәйиԛәдьр бу, у хԝәха жи һивийа Пʹадшатийа Хԝәде бу, бь мерхаси чу бал Пилато у щьнйазе Иса же хԝәст. 44 Ле Пилато әʹщебмайи ма, кӧ Иса ида мьрийә. Әԝи гази сәрсәд кьр у же пьрси һәла Иса бь рʹасти мьрийә, йан на. 45 Чахе Пилато жь сәрсәд пеһʹәсийа кӧ Иса мьрийә, щьнийазе Иса да Усьв. 46 Әԝи кʹьтане рʹьнд кʹьрʹи, щьнийазе Иса ани хԝаре, бь ви кʹьтани пʹечʹанд у дани нав тʹьрба кӧ зьнарда кʹолайи бу. Паше әԝи кәвьрәки мәзьн гьлори бәр дәре тʹьрбе кьр. 47 Ле Мәрйәма Мәгдәлани у Мәрйәма дийа Йусес, ль щийе кӧ щьнийазе Иса һатьбу данин, дьньһерʹин.

16 Пәй Шәмийерʹа,* Мәрйәма Мәгдәлани, Мәрйәма дийа Аԛуб, у Сәломайе бьһарәт* кʹьрʹин, ԝәки һәрʹьн у ль щьнйазе Иса хьн. 2 Рʹожа пешьн йа һʹәфтийе, сәре сьбәһе зу, гава рʹо дәркʹәт, әԝ чунә бәр тʹьрбе, 3 у һәврʹа дьготьн: «Кʹи ԝе бона мә кәвьре бәр дәре тʹьрбе гьлор кә?» 4 Ле гава ньһерʹин, дитьн әв кәвьре кӧ гәләк мәзьн бу, жь щийе хԝә һатийә гьлоркьрьн. 5 Гава әԝана кʹәтьнә тʹьрбе, ԝана хортәки бь чӧхе сьпи хԝәкьри дит, йе кӧ алийе рʹасте рʹуньшти бу, у әԝана гәләк зәндәгьрти ман. 6 Әԝи ԝанрʹа гот: «Зәндәгьрти нәминьн. Һун Исайе Ньсрәти, йе кӧ сәр стуне һатә дардакьрьне, дьгәрʹьн. Әԝ жь мьрьне һатийә рʹакьрьне. Әԝ вьра нинә. Ва йә, щийе кӧ щьнйазе ԝи ле бу. 7 Дә ньһа һәрʹьн шагьртед ԝирʹа у Пәтрусрʹа бежьн: ‹Әԝ пешийа ԝә дьчә Щәлиле. Һуне ԝи ԝедәре бьвиньн, чаԝа кӧ әԝи ԝәрʹа готьбу›». 8 Әԝана жи жь тʹьрбе дәркʹәтьн рʹәвин, чьмки зәндәгьрти ман у тьрса дьләрьзин. Ԝана тʹӧ кәсирʹа тьштәк нәгот, чьмки тьрс кʹәтьбу дьле ԝан.*