ЛЬ ГОРА ЛУԚА

1 Гәләк мәрьва хирәт кьрьнә ԝәки дәрһәԛа һʹәму тьштед кӧ ԛәԝьминә, бьньвисьн, чь кӧ әм жи баԝәр дькьн. 2 Мә әԝ тьшт һьм жи жь ԝан бьһистийә, йед кӧ шәʹдед ԝан тьшта бун у хәбәра Хԝәде бәла дькьрьн. 3 Ләма жи, Тʹейофилойе хԝәйиԛәдьр, мьн һәр тьшт һур у кʹур лекʹолин кьр у сафи кьр тәрʹа ӧса бьньвисьм, чаԝа кӧ жь дәстпеке һәр тьшт ԛәԝьмийә, 4 сәва кӧ тӧ бьзаньби ԝәки тьштед кӧ тӧ һин кьрьнә, рʹаст ьн.

5 Рʹожед пʹадше Щьһустане Һеродәсда, кʹаһинәки жь кʹома Әбийа һәбу, наве ԝи Зәкәрйа бу. Жьна ԝи жь рʹькʹьнийата Һарун* бу у наве ԝе Елизабет бу. 6 Әԝана һәр дӧ жи бәр Хԝәде мәрьвнә рʹаст бун, чьмки бь тʹәмами гӧрʹа һʹәму тʹәми у ԛанунед Йаһоԝа дькьрьн. 7 Ле зарʹед ԝан тʹӧнә бун, чьмки Елизабете нькарьбу зарʹ бьанийа у һәр дӧ жи ида кал у пир бун.

8 Аԝа чахе Зәкәрйа бәр Хԝәде хьзмәткʹарийа кʹаһинтийе дькьр, чьмки дора кʹома ԝи бу, 9 ль гора әʹдәтед кʹаһина әԝ һатә һьлбьжартьне, кӧ бькʹәвә пʹарьстгәһа Йаһоԝа у бьхуре бьшәԝьтинә. 10 Ԝәʹде шәԝьтандьна бьхуре, тʹәмамийа щьмәʹте дәрва дӧа дькьр. 11 Һьнге Зәкәрйарʹа мәләке Йаһоԝа хӧйа бу, йе кӧ алийе рʹастева кʹеләка ԛӧрбангәһа бьхуре сәкьни бу. 12 Гава Зәкәрйа мәләк дит, тʹәвһәв бу у тьрс кʹәтә дьле ԝи. 13 Ле мәләк ԝирʹа гот: «Нәтьрсә Зәкәрйа, чьмки һивикьрьна тә һатә бьһистьне, жьна тә Елизабет ԝе тәрʹа кӧрʹәки бинә, у тӧ гәрәке наве ԝи дайни Йуһʹәнна. 14 Тӧйе гәләк әшԛ у ша би, у гәләк мәрьв ԝе буйина ԝирʹа ша бьн. 15 Чьмки әԝе бәр чʹәʹве Йаһоԝа бьбә йәки мәзьн. Ле әԝ гәрәке нә шәраве вәхԝә, нә жи ичкед дьн. У һе зьке дийа хԝәда әԝе рʹӧһʹе пироз бьстинә.* 16 Әԝе гәләк Исраелийа вәгәрʹинә щәм Хԝәдайе ԝан Йаһоԝа. 17 Ӧса жи әԝе бь рʹӧһʹ у ԛәԝата Елйас пешийа Хԝәдева һәрʹә, ԝәки дьле бава диса бькә мина дьле зарʹа, у али нәгӧһдара бькә кӧ мина йед рʹаст билан бьн. Бь ви аԝайи әԝе бона Йаһоԝа щьмәʹтәке һазьр кә».

18 Зәкәрйа мәләкрʹа гот: «Әз ча дькарьм бьзаньбьм кӧ әв йәк рʹаст ә? Әз ида кал ьм, у жьна мьн жи әʹмьрда мәзьн ә». 19 Мәләк щаба ԝи да: «Әз Щьбрайил ьм, йе кӧ ль бәр Хԝәде дьсәкьнә. Әз һатьмә шандьне, ԝәки мьзгинийа ван тьшта тәрʹа әʹлам кьм. 20 Тӧйе лал би у нькарьби хәбәр ди һʹәта ԝе рʹожа кӧ әԝ тьшт бенә сери, чьмки тә гьлийед мьн баԝәр нәкьр, йед кӧ ԝәʹде кʹьфшкьрида ԝе бенә сери». 21 Ле ԝе дәме щьмәʹт һивийа Зәкәрйа бу у әʹщебмайи дьма, кӧ әԝ һаԛас ԝәхт пʹарьстгәһеда нә. 22 Гава әԝ дәркʹәтә дәрва, нькарьбу хәбәр да, у ԝана фәʹм кьр кӧ әԝи пʹарьстгәһеда тьштәки әʹщеб* дитийә. Жь бо ԝе йәке кӧ лал ма, әԝи бь дәста ԝанрʹа хәбәр дьда. 23 Гава рʹожед хьзмәтийа ԝийә пироз хьлаз бун, әԝ вәгәрʹийа мала хԝә.

24 Чәнд рʹож шунда, жьна ԝи Елизабет һʹәмлә дәркʹәт, у пенщ мәһа жь мале дәрнәдькʹәт. Әԝе дьгот: 25 «Бьньһерʹьн Йаһоԝа бона мьн чь кьрийә! Әԝи алийе мьнда ньһерʹи, ԝәки мьн жь ве шәрме хьлаз кә».

26 Чахе ида шәш мәһ бу кӧ Елизабет һʹәмлә бу, Хԝәде Щьбрайил мәләк шандә бажарәки Щәлиле, Ньсрәте, 27 бал ԛизәкә бькʹьр, йа кӧ мерәкирʹа нишанкьри бу, йе кӧ жь мала Даԝьд бу, у наве ԝи Усьв бу. Наве ве ԛизьке жи Мәрйәм бу. 28 Мәләк һатә щәм ԝе у жерʹа гот: «Сьлав ль тә, ԛизька кʹәрәмкьри. Йаһоԝа тʹәви тә йә». 29 Мәрйәм жь бо готьнед ԝи гәләк тʹәвльһәв бу у дьфькьри гәло нета ԝан гьлийа чь йә. 30 Ләма жи мәләк ԝерʹа гот: «Нәтьрсә Мәрйәм, чьмки Хԝәде жь тә рʹази йә. 31 Ва тӧйе һʹәмлә би у кӧрʹәки бини, у тӧ гәрәке наве ԝи дайни Иса. 32 Әԝе бьбә йәки мәзьн у ԝирʹа Кӧрʹе Хԝәдайе Жорьн ԝе бе готьне, у Йаһоԝа Хԝәде ԝе тʹәхте баве ԝи Даԝьд бьдә ԝи. 33 Әԝе һʹәта-һʹәтайе сәр тʹәмамийа мала Аԛуб сәрԝертийе бькә, у хьлазийа Пʹадшатийа ԝи ԝе тʹӧнә бә».

34 Ле Мәрйәме мәләкрʹа гот: «Әв йәк ԝе чаԝа бьбә? Әз һе бькʹьр ьм». 35 Мәләк жерʹа гот: «Рʹӧһʹе пироз ԝе бе сәр тә, у тӧйе бькʹәви бьн сийа ԛәԝата Хԝәдайе Жорьн. Ләма жи әԝ зарʹа кӧ бе буйине, ԝе бе навкьрьне йе пироз у Кӧрʹе Хԝәде. 36 Мәрьва тә Елизабет жи, әʹмьре хԝәйи мәзьнда кӧрʹәкида һʹәмлә йә. Жерʹа дьготьн йа безӧрʹәт, ле ида мәһа шәша йә кӧ әԝ һʹәмлә йә; 37 чьмки һәр тьшт дәсте Хԝәде те». 38 Һьнге Мәрйәме гот: «Әз хӧлама Йаһоԝа мә! Бьра ль гора готьна тә бә». Паши ве йәке мәләк чу.

39 Һьнә ԝәʹдә шунда, Мәрйәм рʹабу у бь ләз чу бажарәки нав чʹийайед һәрема Щьһудайе. 40 Әԝ кʹәтә мала Зәкәрйа у сьлав да Елизабете. 41 Гава Елизабете сьлава Мәрйәме бьһист, зарʹа зьке ԝеда львийа. Елизабете рʹӧһʹе пироз станд 42 у бь дәнгәки бьльнд гот: «Нав һʹәму жьнада тӧ кʹәрәмкьри йи, у зарʹа зьке тәда кʹәрәмкьри йә! 43 Һӧрмәтәкә чьԛас мәзьн ә, кӧ дийа Хӧдане мьн һатийә бал мьн! 44 Гава дәнге сьлава тә кʹәтә гӧһе мьн, зарʹа зьке мьнда жь шабуне львийа. 45 Чьԛас бәхтәԝар ә әԝ, йа кӧ баԝәр кьр, чьмки һʹәму тьштед кӧ Йаһоԝа ԝерʹа готьбу, ԝе бенә сери».

46 Һьнге Мәрйәме гот: «Әз пәсьне Йаһоԝа дьдьм, 47 у рʹӧһʹе мьн бь Хьлазкʹаре мьн Хԝәде гәләк ша дьбә. 48 Чьмки әԝи дина хԝә дайә бәләнгазийа хӧлама хԝә. Жь вьр шунда һʹәму ньсьл ԝе мьнрʹа бежьн йа бәхтәԝар. 49 Чьмки Хԝәдайе зор кьред пʹьрʹ мәзьн бона мьн кьрьн. Наве ԝи пироз ә. 50 У рʹәʹма ԝи ньсьл бь ньсьл сәр ԝан ә, йед кӧ жь ԝи дьтьрсьн. 51 Әԝи бь ԛәԝата дәсте хԝә кьред мәзьн кьрьн у йед кӧ дьле хԝәда кʹӧбар-бабах ьн, жь һәв бәла кьрьн. 52 Әԝи йед хԝәйиһʹӧкӧм жь тʹәхтед ԝан авитьн у йед мьлук бьльнд кьрьн. 53 Әԝи йед бьрʹчи бь тьштед баш тʹер кьрьн, ле йед дәԝләти дәствала шандьн. 54 Әԝ һатийә һәԝара хӧламе хԝә Исраел, у бь ве йәке нишан кьр, кӧ созе хԝә бир накә. 55 Әԝи соз дайә кӧ ԝе һʹәта-һʹәтайе рʹәʹма хԝә һьндава Бьраһим у зӧрʹәта ԝида бьдә кʹьфше, чаԝа кӧ кал-бавед мәрʹа готьбу». 56 Мәрйәм ԝәкә се мәһа щәм Елизабете ма у паше вәгәрʹийа мала хԝә.

57 Ԝәʹдә перʹа гьһишт кӧ Елизабетерʹа зарʹ бьбә, у әԝе кӧрʹәк ани. 58 Щинар у мәрьвед ԝе бьһистьн, кӧ Йаһоԝа рʹәʹма хԝәйә мәзьн жерʹа дайә кʹьфше, у тʹәви ԝе ша дьбун. 59 Рʹожа һʹәйштада әԝана һатьн ԝәки кӧрʹьк сьнәт кьн, у дьхԝәстьн наве баве ԝи Зәкәрйа бьдьнә сәр. 60 Ле дийа ԝи гот: «На! Наве ԝи гәрәке Йуһʹәнна бә». 61 Ԝана ԝерʹа гот: «Ле нава мәрьвед тәда әв нав тʹӧнә йә». 62 Һьнге ԝана бь дәста жь баве ԝи пьрсин, кӧ чь нави дьхԝазә бьдә сәр. 63 Зәкәрйа тʹәхтәк хԝәст у ль сәр ԝе ӧса ньвиси: «Наве ԝи Йуһʹәнна йә». Һʹәму әʹщебмайи ман. 64 Дәрберʹа зар-зьмане ԝи вәбун, әԝи дәстпекьр хәбәр дә у пәсьне Хԝәде бьдә. 65 Тьрс кʹәтә дьле һʹәму щинаред ԝан, у тʹәмамийа һәрема Щьһустанеда гьшка дәстпекьр дәрһәԛа ве йәке хәбәр дьн. 66 Һʹәмуйед кӧ әв йәк дьбьһистьн, дьле хԝәда ӧса дьготьн: «Гәло әв зарʹ ԝе бьбә кʹе?» Чьмки дәсте Йаһоԝа бь рʹасти сәр ԝи бу.

67 Зәкәрйа баве зарʹе, рʹӧһʹе пироз станд у пʹехәмбәрти кьр: 68 «Шькьр жь Йаһоԝа Хԝәдайе Исраеле, чьмки әԝи дина хԝә дайә щьмәʹта хԝә у әԝ хьлаз кьрийә. 69 У әԝи жь мала хӧламе хԝә Даԝьд, хьлазкʹарәки зор* дайә мә, 70 чаԝа кӧ әԝи бь заре пʹехәмбәред хԝәйи пироз, йед кӧ бәре дьжитьн, готьбу, 71 ԝәки әԝе мә жь дьжмьна у жь дәсте һʹәму кәсед кӧ мә нәфрʹәт дькьн, хьлаз кә. 72 Әԝ ԝе ль гора созе кӧ дабу кал-баве мә, һьндава мәда рʹәʹм бә у пәймана хԝәйә пироз бинә бира хԝә. 73 Әре, сонда кӧ әԝи баве мә Бьраһимрʹа хԝарьбу, 74 кӧ әме паши хьлазкьрьна жь дәсте дьжмьна, бе тьрс у хоф ԝи бьһʹәбиньн. 75 У ве йәке һʹәму рʹожед әʹмьре хԝәда рʹаст у бь амьни бькьн. 76 Ле тӧ, кӧрʹе мьн, тӧйе бона Хԝәдайе Жорьн бьби пʹехәмбәр, чьмки тӧйе пешийа Йаһоԝава һәрʹи, сәва кӧ рʹийед ԝи һазьр ки, 77 у щьмәʹта ԝи бьди һʹәсандьне, кӧ бь сайа бахшандьна гӧна әԝе бенә хьлазкьрьне. 78 Чьмки Хԝәдайе мә пʹьрʹ дьлшәԝат ә. Әв дьлшәԝати ԝе жь әʹзмана дакʹәвә сәр мә, мина рʹойе кӧ һьлте, 79 ԝәки рʹонайе бьдә ԝан, йед кӧ тәʹристанийеда у сийа мьрьнеда ньн, у ньгед мә дайнә сәр рʹийа әʹдьлайе».

80 Зарʹ мәзьн дьбу у бь аликʹарийа рʹӧһʹе Хԝәде ԛәԝи дьбу.* Әԝ бәрʹийеда дьжит, һʹәта рʹожа кӧ әԝ бәр щьмәʹта Исраеле хӧйа бу.

2 Ԝан рʹожада Аԝгустойе Ԛәйсәр фәрман да, кӧ нав тʹәмамийа имперйайеда,* һʹәму мәрьв бенә навньвисаре. 2 (Әв навньвисара пешьн ԝәʹде Куренйо, ԝәлийе Сурйайе һатә кьрьне.) 3 Һәр кәс чу бажаре хԝә, ԝәки наве хԝә бьдә ньвисаре. 4 Һәмьки Усьв жи жь Ньсрәта Щәлиле чу Щьһустане, ль бажаре Даԝьд, кӧ жерʹа Бәйтләһʹм те готьне, чьмки әԝ жь зӧрʹәта Даԝьд бу. 5 Әԝ тʹәви жьна хԝә Мәрйәме чу, ԝәки наве хԝә бьдьнә ньвисаре. Һьнге Мәрйәмерʹа ида гәрәке зарʹ бьбуйа. 6 Чахе әԝана ԝедәре бун, ԝәʹдә перʹа гьһишт кӧ жерʹа зарʹ бьбә. 7 У жерʹа кӧрʹе ԝейи ньхӧри бу, у әԝе әԝ пʹечʹәкеда пʹечʹа у афьрʹда дани, чьмки меванханеда бона ԝан щи тʹӧнә бу.

8 Ве һәремеда, шьван дәштеда шәв нобәдарийа кәрийед хԝә дькьрьн. 9 Ньшкева мәләке Йаһоԝа ԝанрʹа хӧйа бу у рʹумәта Йаһоԝа дора ԝан шәԝԛ да, у әԝана гәләк тьрсийан. 10 Ле мәләк ԝанрʹа гот: «Нәтьрсьн! Әз һатьм мьзгинийа шабунәкә мәзьн бьдьмә ԝә, кӧ ԝе бона һʹәму мәрьва бә. 11 Чьмки ль бажаре Даԝьд хьлазкʹарәк ԝәрʹа һатә буйине. Әԝ Мәсиһ у Хӧдан ә. 12 У әва ԝәрʹа бьбә нишан: Зарʹа тʹәзәбуйи һуне пʹечʹәкеда пʹечʹайи у афьрʹда бьвиньн». 13 Ньшкева гәләк мәләкед дьн* жи хӧйа бун, ԝана пәсьне Хԝәде дьда у дьготьн: 14 «Шькьр жь Хԝәдайе Жорьнрʹа, у әʹдьлайи сәр дьне ԝан мәрьварʹа, кʹижана әԝ ԛәбул дькә».

15 Гава мәләк вәгәрʹийанә ль әʹзмен, шьвана дәстпекьрьн һәврʹа бежьн: «Рʹабьн, әм һʹәта Бәйтләһʹме һәрʹьн у тьштед ԛәԝьми чь кӧ Йаһоԝа мәрʹа әʹйан кьр, бьвиньн». 16 Әԝана ләзә-ләз чун у Мәрйәм, Усьв у зарʹа афьрʹда дитьн. 17 Гава ԝана әԝ дитьн, чь кӧ бона кӧрʹьк һатьбу әʹламкьрьне, гьли кьрьн. 18 Һәр кәсе кӧ готьнед шьвана дьбьһист, зәндәгьрти дьма. 19 Ле Мәрйәме әв һʹәму готьн дьле хԝәда хԝәй дькьрьн у сәр ԝан кʹур дьфькьри, кӧ әԝ чь тенә һʹәсабе. 20 Паше, шьван вәгәрʹийан у бона һʹәму тьштед кӧ бьһистьн у дитьн, пәсьн у шькьри дьданә Хԝәде. Чаԝа кӧ ԝанрʹа һатьбу готьне, һәр тьшт һәма ӧса һатә сери.

21 Рʹожа һʹәйшта, гава ԝәхт һат кӧ зарʹ бе сьнәткьрьне, ԝана наве ԝи дани Иса, чаԝа кӧ һе пешийа һʹәмләбуна Мәрйәме мәләк нав дайе.

22 Гава ԝәхта паԛьжбуна ль гора Ԛануна Муса һат, Усьв у Мәрйәме зарʹ бьрьнә Оршәлиме, ԝәки ԝи биньн бәр Йаһоԝа у нишан кьн кӧ әв зарʹ ԝирʹа дькʹәвә. 23 Чаԝа кӧ Ԛануна Йаһоԝада һатийә ньвисаре: «Һәр кӧрʹе ньхӧри гәрәке Йаһоԝарʹа бе тʹәсмилкьрьне». 24 У ԝана ль гора Ԛануна Йаһоԝа, йа кӧ дьбежә: «щотәк фатьмок, йан жи дӧ щущукед кәвотка», ԛӧрбан ани.

25 Һьнге Оршәлимеда мәрьвәк һәбу, наве ԝи Шимәйон бу. Әԝ мәрьве рʹаст у хԝәдехоф һивийа ԝи ԝәʹдәйи бу, чахе Хԝәде дьлбинийе бьдә Исраеле, у рʹӧһʹе пироз сәр ԝи бу. 26 Хенщи ве йәке, Хԝәде бь сайа рʹӧһʹе пироз ԝирʹа әʹйан кьрьбу, кӧ әԝ һʹәта Мәсиһе Йаһоԝа нәвинә, ԝе нәмьрә. 27 Әԝ бь рʹебәрийа рʹӧһʹе пироз һатә пʹарьстгәһе. Чахе де-баве Исайе бьчʹук ль гора әʹдәт әԝ анинә пʹарьстгәһе, ԝәки Ԛануне биньн сери, 28 Шимәйон кӧрʹьк һьлда да һʹәмеза хԝә, пәсьне Хԝәде да у гот: 29 «Йа Хӧдане Мәзьн, чаԝа тә соз дайә, тӧ хӧламе хԝә бь хер у сьламәти бәрʹдьди. 30 Чьмки чʹәʹвед мьн әԝ дитьн, йе кӧ хьлазкьрьне тинә, 31 йе кӧ тә һазьр кьрийә, ԝәки һʹәму мьләт бьвиньн. 32 Әԝ рʹонайи йә, кӧ хелийа сәр чʹәʹве мьләта һьлдьдә, у рʹумәта щьмәʹта тә Исраеле йә». 33 Де у баве ԝи сәр тьштед кӧ Шимәйон бона ԝи дьготьн, әʹщебмайи ман. 34 Шимәйон ӧса жи дӧа ль ԝан кьр у Мәрйәма дийа зарʹерʹа гот: «Әв зарʹ ԝе бьбә сәбәбе рʹабун у кʹәтьна гәләка ль Исраеле. У әԝе бьбә нишанәк, кʹижан кӧ ԝе бәр чʹәʹве мәрьва рʹәш бә, 35 (әре, шурәки дьреж ԝе тәрʹа дәрбаз бә), ԝәки фькьред гәләк дьла әʹйан бьн».

36 Ԝедәре пʹехәмбәрәкә әʹмьрда мәзьн бь наве Һана һәбу. Әԝ ԛиза Фаноԝел бу у жь бәрәка Ашер бу. Паши меркьрьна хԝә, әԝе һʹәфт сала тʹәви мере хԝә житьбу. 37 Әԝ жьнәбикә 84 сали бу. Әԝ жь пʹарьстгәһе дур нәдькʹәт, шәв у рʹож бь дӧа у рʹожигьртьне хьзмәтийа пироз дькьр. 38 Әԝ һәма ве сьһʹәте һат у пәсьне Хԝәде дьда. У әԝе дәрһәԛа ве зарʹе ԝан һʹәмуйарʹа гьли дькьр, йед кӧ һивийа хьлазкьрьна Оршәлиме бун.

39 У гава ԝана һәр тьшт ль гора Ԛануна Йаһоԝа ани сәри, вәгәрʹийанә Щәлиле, ль бажаре хԝә Ньсрәте. 40 Зарʹ мәзьн у ԛәԝи дьбу, биланийа ԝи зедә дьбу, у кʹәрәма Хԝәде сәр ԝи бу.

41 Һәр сал де-баве Иса бона Щәжьна Дәрбазбуне дьчунә Оршәлиме. 42 Гава Иса 12 сали бу, әԝана ль гора әʹдәт чунә ве щәжьне. 43 Чахе рʹожед щәжьне дәрбаз бун, у әԝана пашда вәдьгәрʹийанә мала хԝә, Иса Оршәлимеда ма. Ле де-баве ԝи һаж ве йәке тʹӧнә бун. 44 Ԝана тʹьре әԝ нава рʹеԝийада йә, ләма әԝана рʹийа рʹожәке чун. Паше ԝана дәстпекьр нав мәрьв у һәвалед хԝәда ԝи бьгәрʹьн. 45 Ле гава ԝана әԝ нәдит, вәгәрʹийанә Оршәлиме у һʹәму щийа ԝи гәрʹийан. 46 Паши се рʹожа, ԝана әԝ пʹарьстгәһеда дит. Әԝ нава дәрсдарада рʹуньштьбу, гӧһ дьда ԝан у пьрс дьданә ԝан. 47 Һʹәмуйед кӧ хәбәрдана ԝи дьбьһистьн, сәр занәбун у щабед ԝи әʹщебмайи дьман. 48 Гава де-баве ԝи әԝ ԝедәре дитьн, әʹщебмайи ман, у дийа ԝи ԝирʹа гот: «Лаԝо, тә чьма ӧса сәре мә кьр? Әз у баве тә пʹьрʹ хәмгин бун, у мә һʹәму щийа тӧ дьгәрʹийайи». 49 Ле әԝи ԝанрʹа гот: «Ԝә чьрʹа әз дьгәрʹийам? Ԝә ньзаньбу кӧ гәрәке әз мала Баве хԝәда бьм?» 50 Ле ԝана гьлийед ԝи фәʹм нәкьр.

51 Паше әԝ тʹәви ԝан вәгәрʹийа Ньсрәте у диса гӧрʹа ԝанда бу. Ле дийа ԝи әв һʹәму гьли дьле хԝәда хԝәй дькьрьн. 52 Иса мәзьн дьбу у биланийа ԝи зедә дьбу, у һьм Хԝәде, һьм жи мәрьва әԝ һʹәз дькьрьн.

3 Панздәһ салийа сәрԝертийа Тибәрйойе Ԛәйсәрда, Понтийо Пилато ԝәлийе Щьһустане бу, Һеродәс* сәрԝере һәрема Щәлиле бу, бьре ԝи Филипо сәрԝере һәрема Итурйайе у Тʹрахонитийе бу, у Лусанйас сәрԝере һәрема Авелинйайе бу. 2 Рʹожед Ԛәйафа у сәроке кʹаһина Һәнанда, Йуһʹәннайе кӧрʹе Зәкәрйа, бәрʹийеда жь Хԝәде хәбәр станд.

3 Һьнге Йуһʹәнна ль тʹәмамийа дәр-доре Урдӧне дьгәрʹийа. Әԝи мәрьварʹа дьгот, ԝәки тʹобә кьн у ве йәке бь ньхӧмандьне нишан кьн, сәва кӧ гӧнед ԝан бенә бахшандьне. 4 Чаԝа кӧ кʹьтеба Ишайа пʹехәмбәрда һатийә ньвисаре: «Бәрʹийеда кәсәк бь дәнге бьльнд дькә гази: ‹Рʹийа Йаһоԝа һазьр кьн! Рʹийед ԝи рʹаст кьн. 5 Гәрәке һәр нәԝал бе тʹьжәкьрьне у һәр чʹийа у тʹәпә бенә ньмьзкьрьне. Гәрәке рʹийед хьл-хар бенә рʹасткьрьне у рʹийед кәвьри бенә дузкьрьне. 6 У һʹәму мәрьв ԝе ԝи бьвиньн, бь сайа кʹижани Хԝәде ԝе хьлазкьрьне бьдә›».

7 Гава әʹлаләт дьһатә бал Йуһʹәнна, ԝәки әԝ ԝана бьньхӧминә, әԝи ԝанрʹа дьгот: «Һәй зӧрʹәта* мәʹред жәʹрдар, кʹи ԝәрʹа готийә ԝәки һун дькарьн жь хәзәба Хԝәде йа кӧ те, бьрʹәвьн? 8 Дә бь кьред хԝә нишан кьн, кӧ һун тʹобә дькьн.* Дьле хԝәда нәбежьн: ‹Бьраһим баве мә йә›. Әз ԝәрʹа дьбежьм, кӧ Хԝәде дькарә жь ван кәвьра жи Бьраһимрʹа зарʹа чекә. 9 Әре, балтʹә ида ль бәр кʹока дара йә. Һәр дара кӧ бәред баш надә, ԝе бе бьрʹине у авитьне нава агьр».

10 У әʹлаләте жь ԝи дьпьрси: «Ижа әм гәрәке чь бькьн?» 11 Әԝи ԝанрʹа дьгот: «Дӧ дәст кʹьнще* кʹе һәнә, бьра йәки бьдә ԝи, йе кʹе тʹӧнә. У хӧрәке кʹе һәйә бьра диса ӧса бькә». 12 Һʹәта хәрщгьр жи дьһатьн кӧ бенә ньхӧмандьне, у ԝирʹа дьготьн: «Дәрсдар, әм гәрәке чь бькьн?» 13 Әԝи ԝанрʹа дьгот: «Чьԛас жь ԝә те хԝәстьне, жь ԝи зедәтьр хәрщ дәʹԝа нәкьн». 14 Әскәра жи жь ԝи дьпьрси: «Ле әм гәрәке чь бькьн?» Әԝи жи ԝанрʹа гот: «Бь зордарийе пʹәра жь хәлԛе нәстиньн у шәрʹа нәвежьнә ԝан, ле бь һәԛе хԝә рʹази бьн».

15 Мәрьв һивийа Мәсиһ бун у ԝана дьле хԝәда сәр Йуһʹәнна ӧса дьгот: «Дьбәкә әԝ ә Мәсиһ?» 16 Йуһʹәнна щаба һʹәмуйа да: «Әз ԝә бь аве дьньхӧминьм, ле йе кӧ паши мьн те, жь мьн ԛәԝаттьр ә, у әз нәһежа мә кӧ чарьхед ԝи бехьм.* Әԝе ԝә бь рʹӧһʹе пироз у бь агьр бьньхӧминә. 17 Һащәта* ԝи дәсте ԝида йә, сәва кӧ бедәра* хԝә бь тʹәмами паԛьж кә. Әԝе гәньм әʹмбара хԝәда тʹоп кә у кайе бьшәԝьтинә бь агьре кӧ натәмьрә».

18 Әԝи ӧса жи гәләк ширәт дьданә мәрьва у мьзгини бәла дькьр. 19 Ле сәрԝере һәреме Һеродәс, жь бо Һеродийа жьна бьре хԝә у һʹәму кьред хԝәйи хьраб, алийе Йуһʹәннада һатә сущдаркьрьне. 20 Һеродәс сәрда хьрабикә дьн жи кьр, кӧ Йуһʹәнна авитә кәле.

21 Гава тʹәмамийа щьмәʹте һатә ньхӧмандьне, Иса жи һатә ньхӧмандьне. Чахе әԝи дӧа дькьр, әʹзман вәбу, 22 у рʹӧһʹе пироз мина кәвоткәке дакʹәтә сәр ԝи у дәнгәк жь әʹзмен һат: «Тӧ йи Кӧрʹе мьни дәлал, йе кӧ дьле мьн ша дькә».

4 Иса бь рʹӧһʹе пироз тʹьжи жь Урдӧне чу. Рʹӧһʹ әԝ бьрә бәрʹийе, 2 у әԝ 40 рʹожи ԝедәре ма у алийе Мире-щьнада һатә щерʹьбандьне. Нава ԝан һʹәму рʹожада Иса тʹӧ тьшт нәхԝар, у пәй ԝан рʹожарʹа әԝ бьрʹчи бу. 3 Һьнге Мире-щьна ԝирʹа гот: «Һәрге тӧ кӧрʹе Хԝәде йи, дә ви кәвьрирʹа бежә кӧ бьбә нан». 4 Ле Иса ԝирʹа гот: «Ньвисаред Пирозда ньвисар ә: ‹Мәрьв тʹәне бь нан нажи›».

5 Һьнге Мире-щьна әԝ ани сәр щики бьльнд, у дәԛеда һʹәму пʹадшатийед дьнйайе нишани ԝи кьр. 6 У Мире-щьна ԝирʹа гот: «Әзе һʹәму һʹӧкӧм у рʹумәта ԝан бьдьмә дәсте тә, чьмки әԝ мьнрʹа һатьнә дайине, у кʹерʹа кӧ бьхԝазьм әзе бьдьме. 7 Һәрге тӧ сәре хԝә бәр мьн дайни, әв һʹәму ԝе бьбьн йед тә». 8 Иса ԝирʹа гот: «Ньвисар ә: ‹Хԝәдайе хԝә Йаһоԝа бьһʹәбинә у тʹәне ԝирʹа хьзмәтийа пироз бькә›».

9 Паше әԝи әԝ бьрә Оршәлиме у сәр щийе һәри бьльнд йе пʹарьстгәһе да сәкьнандьне, у ԝирʹа гот: «Һәрге тӧ кӧрʹе Хԝәде йи, дә хԝә жь вьр бавежә хԝаре, 10 чьмки ньвисар ә: ‹Әԝе бона тә тʹәмийе бьдә мәләкед хԝә, ԝәки әԝана тә хԝәй кьн›, 11 у ‹Әԝана ԝе тә сәр дәстед хԝә һьлгьрьн, ԝәки ньге тә кәвьр нәкʹәвә›». 12 Иса щаба ԝи да: «Һатийә готьне: ‹Хԝәдайе хԝә Йаһоԝа нәщерʹьбинә›». 13 Гава Мире-щьна һʹәму щерʹьбандьнед хԝә хьлаз кьрьн, әԝ Иса һишт һʹәта дәмәкә дьнә баш.

14 Иса бь ԛәԝата рʹӧһʹе пироз тʹьжә, вәгәрʹийа Щәлиле. Дәрһәԛа кьред ԝийи баш ль тʹәмамийа һәреме бәла бу. 15 У әԝи кʹьништада* һин дькьр, у һʹәмуйа пәсьне ԝи дьдан.

16 Паше әԝ һатә Ньсрәте, ԝи щийе кӧ әԝ мәзьн бьбу, у ча һәр гав, рʹожа Шәмийе әԝ кʹәтә кʹьниште у рʹабу ԝәки бьхунә. 17 Кʹьтеба гӧломәтккьри йа Ишайа пʹехәмбәр данә ԝи, әԝи жи вәкьр у әԝ щи дит, кʹидәре кӧ аһа ньвисар бу: 18 «Рʹӧһʹе Йаһоԝа сәр мьн ә, чьмки әԝи әз кʹьфш кьрьмә, ԝәки мьзгинийе бьдьмә бәләнгаза. Әԝи әз шандьмә кӧ гьртийарʹа азайе әʹлам кьм, корарʹа бежьм кӧ әԝе диса бьвиньн, у һесира аза кьм, 19 у сала ԛәбулкьрьна Йаһоԝа әʹлам кьм». 20 Паши ве йәке, Иса әв кʹьтеб гӧломәтк кьр, да дәсте хьзмәткʹаре кʹьниште, у чу рʹуньшт. Кʹьништеда һʹәмушк зурʹ бьбун ль ԝи дьньһерʹин. 21 Һьнге әԝи ԝанрʹа гот: «Әв ньвисара кӧ ԝә һежа бьһист, иро һатә сери».

22 Ԝан һʹәмуйа дәстпекьр сәр ԝи тьштед ԛәнщ бежьн, у һʹәйр-һʹӧжмәкʹар дьман сәр гьлийед ԝийә хԝәш. У ԝана дьгот: «Нә әԝ кӧрʹе Усьв ә?» 23 Һьнге әԝи ԝанрʹа гот: «Бе шьк һуне ве готьне сәр мьн бежьн: ‹Һʹәкимо! Дә хԝә ԛәнщ кә. Мә бьһист кӧ тә Кәпәрнаһумеда чь кьрийә. Дә вьра щи-мьскʹәне хԝәда жи бькә». 24 У әԝи гот: «Әз рʹаст ԝәрʹа дьбежьм, тʹӧ пʹехәмбәр щи-мьскʹәне хԝәда найе ԛәбулкьрьне. 25 Ле әз ԝәрʹа рʹастийе дьбежьм: Рʹожед Елйасда, гава әʹзман сәр се сал у шәш мәһа һатә гьртьне у ль тʹәмамийа ԝәлет хәлайикә гьран бу, Исраеледа гәләк жьнәби һәбун. 26 Ле Елйас кәсәкирʹа нәһатә шандьне, пештьри жьнәбийа жь Сәрәптайерʹа, ԝәлате Сайдайеда. 27 Ӧса жи, рʹожед Елиша пʹехәмбәрда Исраеледа гәләк мәрьвед кʹоти һәбун, ле тʹӧ кәс жь ԝана нәһатә ԛәнщкьрьне, пештьри Нәмане Сурйайи». 28 Гава һʹәмуйед кʹьништеда әв йәк бьһистьн, гәләк һерс кʹәтьн. 29 Әԝана рʹабун Иса жь бажер дәрхьстьн у бьрьнә сәр кәндале чʹийайе кӧ бажаре ԝан сәр һатьбу авакьрьне, ԝәки жь ԝедәре ԝи бавежьнә хԝаре. 30 Ле әԝ нав ԝанрʹа дәрбаз бу чу.

31 Һьнге әԝ һатә Кәпәрнаһуме, бажарәки Щәлиле, у рʹожед Шәмийе щьмәʹт һин дькьр. 32 Мәрьв сәр һинкьрьна ԝи зәндәгьрти ман, чьмки әԝи ча йәки хԝәйиһʹӧкӧм хәбәр дьда. 33 Кʹьништеда мәрьвәк һәбу, кӧ рʹӧһʹе щьнайи һʹәрам перʹа һәбу у әԝи бь дәнгәки бьльнд кьрә ԛирʹин: 34 «Исайе Ньсрәти, тӧ чь жь мә дьхԝази? Тӧ һати ԛьрʹа мә бини? Әз рʹьнд заньм кӧ тӧ кʹи йи. Тӧ Пироз и, йе кӧ Хԝәде шандийә». 35 Ле Иса сәрт фәрман да ԝи у гот: «Кәрʹ бә у жь ԝи дәркʹәвә!» Һьнге щьн бәр чʹәʹве ԝан әԝ ль әʹрде хьст, у жь ԝи ӧса дәркʹәт, кӧ зьрар нәда ԝи. 36 Гьшк әʹщебмайи ман у һәврʹа готьн: «Бьньһерʹьн, әԝ ча хәбәр дьдә! Әԝ бь һʹӧкӧм у ԛәԝате фәрмане дьдә щьна у әԝана жи дәрдькʹәвьн!» 37 У нав-дәнге ԝи ль тʹәмамийа дәр-доре һәреме бәла дьбу.

38 Чахе Иса жь кʹьниште дәркʹәт, чу мала Шьмһʹун. Хԝәсийа Шьмһʹун жь гәрма бьльнд дьчәрчьри. Ԝана жь Иса һиви кьр, ԝәки али ԝе бькә. 39 Иса незики ԝе бу, әԝ ԛәнщ кьр у гәрма ԝе дани. Әԝ жи дәрберʹа рʹабу у ԝанрʹа бәрдәсти кьр.

40 Ле гава рʹо дьчу ава, һʹәмуйед кӧ щурʹә-щурʹә нәхԝәшийед ԝан һәбун, анинә щәм ԝи. Әԝи дәстед хԝә дани сәр һәр йәки жь ԝан, у әԝ ԛәнщ кьрьн. 41 Әԝи ӧса жи гәләк щьн дәрхьстьн. Ԝана дькьрә ԛирʹин у дьгот: «Тӧ Кӧрʹе Хԝәде йи!» Ле әԝи нәдьһишт щьн тьштәки бежьн, чьмки ԝана заньбу кӧ әԝ Мәсиһ ә.

42 Гава сьбәһ зәлал бу, әԝ жь ԝедәре дәркʹәт у чу щики хәԝлә. Ле әʹлаләте дәстпекьр ль ԝи бьгәрʹьн у һатьнә щәм ԝи; у ԝана нәдьһишт кӧ әԝ жь ԝан һәрʹә. 43 Ле әԝи ԝанрʹа гот: «Әз гәрәке мьзгинийа Пʹадшатийа Хԝәде ль бажаред дьн жи бәла кьм, чьмки әз бона ве йәке һатьмә шандьне». 44 У әԝ чу кʹьништед Щьһустанеда мьзгинийе бәла кә.

5 Щарәке, гава Иса бәр гола Щенисарте* хәбәра Хԝәде һин дькьр, гәләк мәрьв һатьн у дәр-доре ԝи тәнг дькьрьн, ԝәки гӧһ бьдьнә ԝи. 2 Әԝи дӧ ԛәйикед гьредайи бәр голе дитьн, мәʹсигьр жь ԝан дәркʹәтьбун у тʹорʹед хԝә дьшуштьн. 3 Иса кʹәтә йәк жь ԝан ԛәйика, кӧ йа Шьмһʹун бу, у жь ԝи хԝәст кӧ ԛәйике һьнәки жь дәве голе дур хә. Паше әԝ рʹуньшт у жь ԛәйике дәстпекьр әʹлаләте һин кә. 4 Әԝи гава хәбәрдана хԝә хьлаз кьр, Шьмһʹунрʹа гот: «Ԛәйике бьвә щики кʹур, у тʹорʹед хԝә бавежьнә аве». 5 Ле Шьмһʹун гот: «Дәрсдар, мә тʹәмамийа шәве кьр-нәкьр тьштәк нәгьрт. Ле ԝәки тӧ дьбежи, әзе тʹорʹа бавежьмә аве». 6 Гава ԝана ӧса кьр, һаԛас мәʹси гьртьн кӧ тʹорʹед ԝан ида дьԛәтийан. 7 Һьнге ԝана бь нишана гази һәвалед хԝәйи ԛәйика дьнда кьрьн, ԝәки бен у али ԝан бькьн. Әԝана һатьн һәр дӧ ԛәйик тʹьжи мәʹси кьрьн, у һьнәк мабу ԛәйик нӧԛ буна. 8 Гава Шьмһʹун Пәтрус әв йәк дит, хԝә бәр Иса авитә сәр чока у гот: «Жь мьн дур кʹәвә, Хӧдан, әз мәрьвәки гӧнәкʹар ьм». 9 Әԝи ӧса гот, чьмки әԝ у һʹәмуйед кӧ тʹәви ԝи бун, гәләк әʹщебмайи ман кӧ һаԛас мәʹси гьртьбун, 10 ӧса жи кӧрʹед Зәбәди Аԛуб у Йуһʹәнна, йед кӧ һәвалкʹаред Шьмһʹун бун, әʹщебмайи ман. Ле Иса Шьмһʹунрʹа гот: «Нәтьрсә. Жь вьр шунда тӧйе мәрьва мина мәʹсийа бьгьри». 11 Ԝана ԛәйикед хԝә кʹьшандьнә бәр дәве бәʹре, һәр тьшт һиштьн у пәй ԝи чун.

12 Щарәкә дьн гава Иса ль бажарәки бу, ԝедәре мәрьвәки сәрдапеда кʹоти һәбу. Гава әԝи Иса дит, хԝә авитә әʹрде у жь ԝи рʹәща кьр: «Хӧдан, һәрге тӧ тʹәне бьхԝази, тӧ дькари мьн ԛәнщ ки».* 13 Иса жи дәсте хԝә дайе у готе: «Әз дьхԝазьм! Ԛәнщ бә». Дәрберʹа кʹотибун же чу. 14 Иса тʹәми да ԝи, ԝәки ве йәке тʹӧ кәсирʹа нәбежә, у гот: «Ле һәрʹә хԝә нишани кʹаһин кә, у чаԝа Муса тʹәми дайә, бона паԛьжбуна хԝә ԛӧрбане бьдә, ԝәки әԝ бона ԝан бьбә избатийа ԛәнщкьрьна тә».* 15 Ле нав-дәнге Иса һе зедә бәла дьбу у гәләк мәрьв тʹоп дьбун, ԝәки гӧһ бьдьнә ԝи у жь нәхԝәшийед хԝә бенә ԛәнщкьрьне. 16 Ле Иса гәләк щара дьчу щийед хәԝлә, ԝәки дӧа бькә.

17 Рʹожәке, чахе әԝи маләкеда һин дькьр, Ферьси у дәрсдаред Ԛануне, йед кӧ жь һәр гӧнде Щәлиле, Щьһустане у жь Оршәлиме һатьбун, ԝедәре рʹуньшти бун. Йаһоԝа ԛәԝат да Иса, кӧ мәрьва ԛәнщ кә. 18 Һьнге һьнә мәрьва, йәки шьлушәʹт нав ньвинада* анин. Ԝана дьхԝәст ԝи бьвьнә һьндӧрʹе мале у бәр Иса дайньн. 19 Ле жь бо әʹлаләте, ԝана нькарьбу ԝи бьвьнә һьндӧрʹ. Ләма әԝана һьлкʹьшийанә сәр бани, кʹәрмид рʹакьрьн у әԝ дахьстьнә жере бәр Иса. 20 Гава әԝи баԝәрийа ԝан дит, йе шьлушәʹтрʹа гот: «Гӧнед тә һатьнә бахшандьне». 21 Һьнге ԛанунзан у Ферьси фькьрин у готьн: «Әԝ кʹи йә ван кʹьфьрийа дькә? Хенщи Хԝәде кʹи дькарә гӧна бьбахшинә?» 22 Фькьред ԝан Исарʹа әʹйан бун у әԝи ԝанрʹа гот: «Һун дьле хԝәда чь дьфькьрьн? 23 Чь дьһа һеса йә бежьн? ‹Гӧнед тә һатьнә бахшандьне›, йан ‹Рʹабә у рʹе һәрʹә›? 24 Ле сәва һун бьзаньбьн кӧ һʹӧкӧме Кӧрʹе инсен сәр әʹрде һәйә, ԝәки гӧна бьбахшинә . . .» У әԝи готә йе шьлушәʹт: «Әз тәрʹа дьбежьм, рʹабә, ньвина хԝә һьлдә у һәрʹә мала хԝә». 25 Һьнге әԝ бәр ԝан рʹабу, ньвина кӧ сәр пʹалдайи бу, һьлда чу мала хԝә у шькьри дьда Хԝәде. 26 Һʹәмушк һʹәйр-һʹӧжмәкʹар ман у шькьри дьданә Хԝәде. Ԝана бь хоф дьгот: «Мә иро тьштед әʹщеб дитьн!»

27 Паши ве йәке, Иса дәркʹәтә дәрва у хәрщгьрәки бь наве Леԝи дит, йе кӧ ль щийе тʹопкьрьна хәрща рʹуньшти бу, у ԝирʹа гот: «Пәй мьн ԝәрә». 28 Әԝи жи һәр тьшт һишт, рʹабу у пәй ԝи чу. 29 Паше, Леԝи мала хԝәда бона Иса сьфрәкә мәзьн вәкьр. Ԝедәре гәләк хәрщгьр у кәсед дьн жи тʹәви ԝан бәр сьфре рʹуньштьбун. 30 Һьнге Ферьсийа у ԛанунзанед ԝан дәстпекьрьн газьна бькьн у шагьртед ԝирʹа готьн: «Һун чьрʹа тʹәви хәрщгьр у гӧнәкʹара дьхԝьн у вәдьхԝьн?» 31 Иса щаба ԝан да у гот: «Нә кӧ йед сьһʹәт-ԛәԝат һʹәԝще һʹәким ьн, ле йед нәхԝәш. 32 Әз һатьмә нә кӧ гази йед рʹаст кьм, ле гази гӧнәкʹара кьм, ԝәки әԝана тʹобә кьн».

33 Ԝана ԝирʹа гот: «Шагьртед Йуһʹәнна гәләк щар рʹожи дьгьрьн у дӧа-дьрозга дькьн, у шагьртед Ферьсийа жи ӧса дькьн, ле шагьртед тә дьхԝьн у вәдьхԝьн». 34 Иса щаба ԝан да: «Ԛә һун дькарьн зоре һәвалед зәʹва бькьн, ԝәки әԝана рʹожи бьгьрьн, һʹәта зәʹва тʹәви ԝан ә? 35 Ле ԝәхт ԝе бе, гава бь рʹасти зәʹва жь ԝан бе һьлдане, у ԝан рʹожада әԝана ԝе рʹожи бьгьрьн».

36 Әԝи мәсәләк жи ԝанрʹа ани: «Тʹӧ кәс пʹәрчʹәки жь кʹьнщәкә тʹәзә набьрʹә у кʹьнщәкә кәвьнва надьру. Һәрге кәсәк ӧса бькә, һьнге пʹәрчʹе тʹәзә ԝе кʹьнща кәвьн бьԛәльшинә, у һьм жи пʹәрчʹе кʹьнща тʹәзә у йе кәвьн һәв найен. 37 Ӧса жи тʹӧ кәс шәрава тʹәзә накә мәшкед* кәвьн. Һәрге кәсәк ӧса бькә, шәрава тʹәзә ԝе мәшка бьтʹәԛинә у бьрʹьжә, мәшк жи ԝе хьраб бьн. 38 Ле гәрәке шәрава тʹәзә бькьнә мәшкед тʹәзә. 39 У кәсәк пәй шәрава кәвьнрʹа нахԝазә йа тʹәзә вәхԝә, чьмки әԝе бежә: ‹Йа кәвьн хԝәш ә›».

6 Щарәке рʹожа Шәмийе* Иса нава зәвийарʹа дәрбаз дьбу, у шагьртед ԝи сьмбьлед гәньм дьчьнин, дәстед хԝәда дьфьрькандьн* у дьхԝарьн. 2 Һьнге һьнә Ферьсийа гот: «Чьрʹа һун ве йәке дькьн, чь кӧ ԛәдәхә йә рʹожа Шәмийе бькьн?» 3 Ле Иса ԝанрʹа гот: «Ԝә нәхԝәндийә Даԝьд чь кьр, чахе әԝ у йед тʹәви ԝи, бьрʹчи бун? 4 Әԝ кʹәтә мала Хԝәде, у нане пироз* данә ԝи, әԝи һьм хԝәха хԝар, һьм жи да йед тʹәви хԝә. Нә әв нан һʹәмуйарʹа ԛәдәхә бу хенщи кʹаһина?» 5 Паше әԝи ԝанрʹа гот: «Кӧрʹе инсен Хӧдане рʹожа Шәмийе йә».

6 Шәмикә дьн, Иса кʹәтә кʹьниште у дәстпекьр һин кә. Ԝедәре мәрьвәк һәбу, кӧ дәсте ԝийи рʹасте кʹьшийайи бу. 7 Чʹәʹвед ԛанунзан у Ферьсийа сәр Иса бун, һәла әԝе рʹожа Шәмийе кәсәки ԛәнщ кә, чьмки ԝана мәʹни дьгәрʹийа, сәва кӧ ԝи нәһәԛ кьн. 8 Ле әԝи заньбу кӧ әԝана чь дьфькьрьн, ләма мәрьве дәсткʹьшийайирʹа гот: «Рʹабә у ве ортʹе бьсәкьнә». Әԝ жи рʹабу у ԝедәре сәкьни. 9 Һьнге Иса жь ԝан пьрси: «Чь изьн ә рʹожа Шәмийе бькьн, ԛәнщийе йан хьрабийе? Әʹмьр хьлаз кьн йан бькӧжьн?» 10 Иса ль һʹәмуйед дора хԝә ньһерʹи у ԝи мәрьвирʹа гот: «Дәсте хԝә дьреж кә». Әԝи жи ӧса кьр, у дәсте ԝи ԛәнщ бу. 11 Ле әԝана гәләк һерс кʹәтьн у дәстпекьрьн нав хԝәда шеԝьр кьн, кӧ чь биньн сәре Иса.

12 Рʹожәке Иса һьлкʹьшийа чʹийе, ԝәки дӧа бькә, у әԝи тʹәмамийа шәве Хԝәдерʹа дӧа дькьр. 13 Гава бу рʹож, әԝи гази шагьртед хԝә кьр, жь нав ԝан 12 кәс бьжартьн, у әԝана нав кьрьн шанди: 14 Шьмһʹун, йе кӧ әԝи наве ԝи ӧса жи дани Пәтрус, бьре ԝи Әндраԝьс, Аԛуб, Йуһʹәнна, Филипо, Бәртоломәйо, 15 Мәтта, Тʹума, Аԛубе кӧрʹе Һалфаԝо, Шьмһʹуне кӧ жерʹа дьготьн «йе хирәт», 16 Щьһудайе кӧрʹе Аԛуб, у Щьһудайе Исхәрйоти, йе кӧ нәмамийа Иса кьр.

17 Иса тʹәви ԝан жь чʹийе дакʹәт у щики дуз сәкьни. Ԝедәре гәләк шагьртед ԝи у щьмәʹтәкә гьран жь тʹәмамийа Щьһустане, жь Оршәлиме, жь һәрема дәве бәʹра Сур у Сайдайе тʹоп бьбун. Әԝана һатьн, ԝәки гӧһ бьдьнә ԝи у жь нәхԝәшийед хԝә ԛәнщ бьн. 18 Һәла һе мәрьвед щьнакʹәти жи, дьһатьнә ԛәнщкьрьне. 19 Тʹәмамийа әʹлаләте дьхԝәст дәсте хԝә бьдьнә Иса, чьмки ԛәԝат жь ԝи дәрдькʹәт у нәхԝәшийед ԝан һʹәмуйа ԛәнщ дькьр.

20 Әԝи шагьртед хԝә ньһерʹи у гот:

«Чьԛас бәхтәԝар ьн һун, йед кӧ бәләнгаз ьн, чьмки Пʹадшатийа Хԝәде йа ԝә йә.

21 Чьԛас бәхтәԝар ьн һун, йед кӧ ньһа бьрʹчи нә, чьмки һуне тʹер бьн.

Чьԛас бәхтәԝар ьн һун, йед кӧ ньһа дьгьрин, чьмки һуне бькʹәньн.

22 Чьԛас бәхтәԝар ьн һун, гава мәрьв бона Кӧрʹе инсен ԝә нәфрʹәт дькьн, ԝә жь нав хԝә дәрдьхьн, ԝә беһӧрмәт дькьн у наве ԝә хьраб дькьн. 23 Ԝе рʹоже әшԛ бьн у шабуна бьфьрʹьн,* чьмки хәлата мәзьн ль әʹзмен* һивийа ԝә йә. Кал-бавед ԝан жи ӧса сәре пʹехәмбәра дькьрьн.

24 Ле ԝәй ль ԝә дәԝләтийа, чьмки ԝә дьлбинийа хԝә бь тʹәмами стандийә.

25 Ԝәй ль ԝә йед кӧ ньһа тʹер ьн, чьмки һуне бьрʹчи бьн.

Ԝәй ль ԝә йед кӧ ньһа дькʹәньн, чьмки һуне шине бькьн у бьгьрин.

26 Ԝәй ль ԝә, һәрге хәлԛ дәрһәԛа ԝә ԛәнщ хәбәр дьдьн, чьмки кал-бавед ԝан дәрһәԛа пʹехәмбәред дәрәԝ жи ӧса хәбәр дьдан.

27 Ле һун, йед кӧ гӧһ дьдьнә мьн, әз ԝәрʹа дьбежьм: Дьжмьнед хԝә һʹәз бькьн, у ԝанрʹа йед кӧ ԝә нәфрʹәт дькьн, ԛәнщийе бькьн, 28 кәсед кӧ ньфьрʹа ль ԝә дькьн, дӧа ль ԝан бькьн, у бона кәсед кӧ ԝә беһӧрмәт дькьн, дӧа бькьн. 29 Һәрге кәсәк силәке ль рʹуйе тә хә, алийе дьн жи бьдә бәр. У һәрге кәсәк пʹоте тә жь тә бьстинә, кьрасе хԝә жи бьдә ԝи. 30 Кәсәк кӧ тьштәки жь тә дьхԝазә, бьде, у кʹи тьштәки жь тә дьстинә, пашда нәхԝазә.

31 Чь кӧ һун дьхԝазьн мәрьв бона ԝә бькьн, һун жи бона ԝан ӧса бькьн.

32 Һәрге һун тʹәне ԝана һʹәз дькьн, йед кӧ ԝә һʹәз дькьн, ида һун һивийа чь пʹайа нә? Нә гӧнәкʹар жи ԝан мәрийа һʹәз дькьн, йед кӧ ԝана һʹәз дькьн? 33 Һәрге һун тʹәне ԝан мәрийарʹа ԛәнщийе бькьн, йед кӧ ԝәрʹа ԛәнщийе дькьн, ида һун һивийа чь пʹайа нә? Нә гӧнәкʹар жи ӧса дькьн? 34 У һәрге һун дәйн* бьдьнә ԝан, жь кʹижана һуне диса пашда бьстиньн, ида һун һивийа чь пʹайа нә? Нә гӧнәкʹар жи дәйн дьдьнә гӧнәкʹара у һивийе нә кӧ диса бь тʹәмами пашда бьстиньн? 35 Ле һун дьжмьнед хԝә һʹәз бькьн, ԛәнщийе бькьн, дәйни бьдьн у һивийа вәгәрʹандьне нибьн. Һьнге хәлата ԝә ԝе мәзьн бә у һуне бьбьнә кӧрʹед Хԝәдайе Жорьн, чьмки әԝ һьндава бешекьра у хьраба жи, ԛәнщ ә. 36 Дьлрʹәʹм бьн, чаԝа кӧ Баве ԝә дьлрʹәʹм ә.

37 Ӧса жи, ида сущдар нәкьн, у һуне нәйенә сущдаркьрьне. Лома нәкьн у ломәйе ль ԝә нәбә. Бьбахшиньн у ԝе ԝәрʹа бе бахшандьне. 38 Бьдьн, у ԝәрʹа жи ԝе бе дайине. Ԝе бь пиванәкә тʹьжи һʹәжанди, дәԝьсанди, сәри ԛучʹ бькьнә пʹеша ԝә. Чьмки һун һьндава мәрьвада чаԝа бьн, әԝана жи ԝе һьндава ԝәда ӧса бьн».*

39 Паше әԝи мәсәлә жи ԝанрʹа анин: «Йе кор дькарә рʹебәрийе йәки кор бькә? Нә һәр дӧ жи ԝе бькʹәвьнә чʹәʹле? 40 Шагьрт жь дәрсдаре хԝә мәстьр нинә; ле һәр кәсе кӧ баш һатийә һинкьрьне, ԝе бьбә мина дәрсдаре хԝә. 41 Тӧ чьрʹа ԛьршьк чʹәʹве бьре хԝәда дьвини, ле кʹеране чʹәʹве хԝәда навини? 42 Тӧ ча дькари бьре хԝәрʹа бежи: ‹Бьре мьн, ԝәрә әз ԛьршьк жь чʹәʹве тә дәрхьм›, һәрге тӧ кʹеране чʹәʹве хԝәда навини? Дӧрʹу! Пешийе кʹеран жь чʹәʹве хԝә дәрхә у паше тӧйе зәлал бьвини, кӧ чаԝа ԛьршьк жь чʹәʹве бьре хԝә дәрхи.

43 Тʹӧ дара баш бәре хьраб надә, у тʹӧ дара хьраб бәре баш надә. 44 Һәр дар бь бәре хԝә те наскьрьне. Мәсәлә, мәрьв жь стьрийа, һежира начьньн, у нә жи тьрийа жь дьрʹийа дьчьньн. 45 Мәрьве ԛәнщ тьштед ԛәнщ дьбежә, чьмки дьле ԝи бь тьштед ԛәнщ тʹьжә йә. Ле мәрьве хьраб тьштед хьраб дьбежә, чьмки дьле ԝи бь тьштед хьраб тʹьжә йә. Дьл бь чь тʹьжә йә, зьман әве жи дьбежә.

46 Чьма һун мьнрʹа дьбежьн ‹Хӧдан, Хӧдан!›, ле тьштед кӧ әз дьбежьм, накьн? 47 Һәр кәсе кӧ те бал мьн, гӧһ дьдә готьнед мьн у тинә сери, әзе бежьм кӧ әԝ мина кʹе йә: 48 Әԝ мина мәрьвәки йә, йе кӧ бона авакьрьна мале, әʹрд кʹур кʹола у һʹиме ԝе сәр зьнар дани. Гава ава чʹем рʹабу, ль мале хьст, ле нькарьбу мал бьһʹәжанда, чьмки әԝ рʹьнд һатьбу авакьрьне. 49 Ле кәсе кӧ гӧһ дьдә готьнед мьн у тьштәки накә, әԝ мина мәрьвәки йә, йе кӧ мал сәр әʹрде бе һʹим ава кьр. Ава чʹем мале хьст, әԝ дәрберʹа һьлшийа у бь тʹәмами ԝеран бу».

7 Гава Иса готьнед хԝә хәлԛерʹа гот у хьлаз кьр, әԝ кʹәтә Кәпәрнаһуме. 2 Ԝедәре, хӧламе сәрсәдәки* һәбу, йе кӧ гәләк нәхԝәш бу у бәр мьрьне бу. Сәрсәд әԝ хӧлам гәләк һʹәз дькьр. 3 Гава әԝи дәрһәԛа Иса бьһист, чәнд рʹуспийед Щьһуйа шандьнә бал ԝи, ԝәки жь ԝи һиви кьн кӧ әԝ бе у хӧламе ԝи ԛәнщ кә. 4 Әԝана һатьнә щәм Иса, лавайа ԝи кьрьн у готьн: «Әԝ һежа йә ԝәки тӧ ве йәке бона ԝи бьки, 5 чьмки әԝ мьләте мә һʹәз дькә у әԝи хԝәха бона мә кʹьништ* ава кьрийә». 6 Һьнге Иса тʹәви ԝан чу. Ле гава әԝ незики мале бу, сәрсәд һәвалед хԝә шандьнә пешийа ԝи, ԝәки ԝирʹа бежьн: «Хӧдан, зәʹмәте нәкʹьшинә, чьмки әз нәһежа мә кӧ тӧ бейи мала мьн. 7 Ләма мьн хԝә һежа һʹәсаб нәкьр, кӧ бьһатама щәм тә. Ле тʹәне хәбәрәке бежә, у хӧламе мьне ԛәнщ бә. 8 Чьмки әз жи бьн һʹӧкӧме кәсед дьнда мә, у бьн дәсте мьнда жи әскәр һәнә. Гава әз йәкирʹа дьбежьм ‹Һәрʹә!›, әԝ дьчә, йәки дьнрʹа дьбежьм ‹Ԝәрә!›, әԝ те, у гава әз хӧламе хԝәрʹа дьбежьм ‹Ви тьшти бькә!›, әԝ дькә». 9 Чахе Иса әв йәк бьһист, сәр ԝи әʹщебмайи ма. Әԝи бәре хԝә да әʹлаләте, йа кӧ пәй ԝи дьчу у гот: «Әз ԝәрʹа дьбежьм, ԛә Исраеледа жи мьн баԝәрикә һаԛас ԛәԝи нәдитийә». 10 У гава йед кӧ һатьбунә шандьне вәгәрʹийанә мале, ԝана дит кӧ хӧлам ԛәнщ буйә.

11 Һьнә ԝәхт шунда, Иса чу бажарәки бь наве Найин. Шагьртед ԝи у гәләк мәрьв жи тʹәви ԝи дьчун. 12 Гава әԝ незики дәргәһе бажер бу, дит кӧ щьнйазе гәдәки жь бажер дәрдьхьн. Әԝ кӧрʹе жьнәбике тайе тʹәне бу. Гәләк мәрьв жи тʹәви дийа ԝи дьчун. 13 Гава Хӧдан ле дит, дьле ԝи сәр ԝе шәԝьти, у жерʹа гот: «Нәгьри». 14 Паше әԝ незик бу, дәсте хԝә да дарбәсте, у йед кӧ әԝ дьбьрьн, сәкьнин. Һьнге әԝи гот: «Хорто, әз тәрʹа дьбежьм: Рʹабә!» 15 У йе мьри рʹуньшт у дәстпекьр хәбәр дә, у Иса әԝ да дийа ԝи. 16 Саԝ кʹәтә сәр һʹәмуйа, ԝана дәстпекьр шькьрийе бьдьнә Хԝәде, у дьготьн: «Нав мәда пʹехәмбәрәки мәзьн әʹйан буйә», у «Хԝәде дина хԝә дайә щьмәʹта хԝә». 17 У нав-дәнге ԝи ль тʹәмамийа Щьһустане у дәр-доре ԝе бәла бу.

18 Шагьртед Йуһʹәнна дәрһәԛа ван һʹәму тьшта жерʹа гьли кьрьн. 19 Һьнге Йуһʹәнна дӧ шагьртед хԝә шандьн, ԝәки жь Хӧдан бьпьрсьн: «Гәло йе кӧ ԝе бьһата тӧ йи, йан гәрәке әм һивийа кәсәки дьн бьн?» 20 Гава әԝана һатьнә бал Иса, готьн: «Йуһʹәннайе Ньхӧмдар* әм шандьн бал тә, ԝәки жь тә бьпьрсьн: ‹Гәло йе кӧ ԝе бьһата тӧ йи, йан гәрәке әм һивийа кәсәки дьн бьн?›» 21 Ԝе дәме Иса гәләк мәрьв жь нәхԝәши у ешед гьран ԛәнщ кьрьн, щьн дәрхьстьн, у чʹәʹвед гәләк кора вәкьрьн. 22 Иса щаба ԝан да: «Һәрʹьн у тьштед кӧ ԝә бьһистьнә у дитьнә Йуһʹәннарʹа бежьн: Йед кор ньһа дьвиньн, йед сәԛәт дьгәрʹьн, йед кʹоти ԛәнщ дьбьн,* йед кәрʹ дьбьһен, мьри рʹадьбьн у кʹәсибарʹа мьзгини те дайине. 23 Чьԛас бәхтәԝар ә әԝ кәс, йе кӧ мьнда накʹәвә шьке».

24 Гава шагьртед Йуһʹәнна чун, Иса дәстпекьр әʹлаләтерʹа дәрһәԛа Йуһʹәнна хәбәр дә: «Гава һун чун бәрʹийе, ԝә чь дьхԝәст бьдита? Ԝә дьхԝәст ԛамишәки кӧ жь ба дьһʹәжә, бьдита? 25 Йан ԝә дьхԝәст ԝедәре чь бьдита? Һун чун ԝәки мәрьвәки кʹьнщед бьһа ль хԝә кьри бьвиньн? Нә кәсед кӧ кʹьнщед бьһа ль хԝә дькьн у дәԝләти дьжин, ԛәсьред пʹадшада ньн? 26 Дә бежьн, һун чун чь бьвиньн? Пʹехәмбәрәки? Бәле, әз ԝәрʹа дьбежьм, әԝ пʹехәмбәр ә, ле жь пʹехәмбәрәки зедәтьр ә жи. 27 Әва әԝ кәс ә, дәрһәԛа кʹижани ньвисар ә: ‹Әз ԛасьде хԝә пешийа тә дьшиньм. Әԝе пешийа тә рʹе һазьр кә›. 28 Әз ԝәрʹа дьбежьм, жь нав һʹәму мәрьвед кӧ һатьнә буйине, кәсәк жь Йуһʹәнна мәзьнтьр, тʹӧнә йә. Ле Пʹадшатийа Хԝәдеда, йе һәри бьчʹук жь ԝи мәзьнтьр ә». 29 (Гава тʹәмамийа щьмәʹте у хәрщгьра әв йәк бьһист, ԝана ԛәбул кьр кӧ Хԝәде рʹаст ә, чьмки әԝана бь дәсте Йуһʹәнна һатьбунә ньхӧмандьне. 30 Ле Ферьси у йед кӧ Ԛанун рʹьнд заньбун, рʹебәрийа кӧ Хԝәде дабу ԝан ԛәбул нәкьрьн, чьмки әԝана бь дәсте Йуһʹәнна нәһатьбун ньхӧмандьне.)

31 Иса хәбәрдана хԝә бәрдәԝам кьр: «Әз мәрьвед ви ньсьли бәрамбәри кʹе бькьм, әԝана мина кʹе нә? 32 Әԝана мина ԝан зарʹа нә, йед кӧ базареда рʹуньшти нә, гази һәвдӧ дькьн у дьбежьн: ‹Мә бона ԝә бьлуре дьхьст, ле һун нәдьрʹәԛьсин. Мә шин дькьр, ле һун нәдьгьрийан›. 33 Мина ве йәке, Йуһʹәннайе Ньхӧмдар һат, нә нан дьхԝә у нә жи шәраве вәдьхԝә, ле һун дьбежьн: ‹Щьн ԝида һәйә›. 34 Кӧрʹе инсен һатийә, дьхԝә у вәдьхԝә, ле һун дьбежьн: ‹Һәла бьньһерʹьн! Әԝ йәки пәй хԝарьн у вәхԝарьне кʹәти йә, у һәвале хәрщгьр у гӧнәкʹара йә!› 35 Ле билани пе кьред хԝәйи рʹаст* избат дьбә».

36 Йәки Ферьси чәнд щара Иса тʹәглифи сәр хԝарьне дькьр. Әԝ жи чу мала ԝи у бәр сьфре рʹуньшт. 37 Ԝи бажарида жьнәк һәбу, йа кӧ ча гӧнәкʹар нас дькьрьн. Гава әԝ пеһʹәсийа кӧ Иса мала Ферьсида шиве дьхԝә, әԝ һатә ԝедәре у рʹуне бинхԝәш дәрданәкә жь кәвьрә мәрмәрда ани. 38 Әԝ бәр ньгед ԝи кʹәтә сәр чока, дьгьрийа, бь һесьред хԝә ньгед ԝи шьл дькьрьн у бь пʹорʹе хԝә әԝ зьһа дькьрьн. Әԝе ӧса жи ньгед ԝи бь нәрми пачʹ дькьр у рʹуне бинхԝәш ледьхьст. 39 Ферьсийе кӧ әԝ тʹәглифи мала хԝә кьрьбу, әв йәк дит у дьле хԝәда гот: «Һәрге әв мәрьв бь рʹасти пʹехәмбәр буйа, ԝе бьзаньбуйа кӧ әв кʹи йә у йәкә чаԝа йә кӧ дәсте хԝә дьдә ԝи, чьмки әԝ йәкә гӧнәкʹар ә». 40 Ле Иса ԝирʹа гот: «Шьмһʹун, әз дьхԝазьм тьштәки тәрʹа бежьм». Әԝи гот: «Кʹәрәм кә, Дәрсдар!»

41 Иса гот: «Дӧ мәрьв дәйндаред кәсәки бун. Йәк 500 динари, ле йе дьн 50 динари дәйндаре ԝи бу. 42 Ле чьмки тьштәки ԝан тʹӧнә бу кӧ дәйне хԝә бьдьн, әԝи бь мәрʹдани дәйне һәрда бахшандә ԝан. Ижа жь ԝан һәрда, кʹижане гәләк ԝи һʹәз бькә?» 43 Шьмһʹун гот: «Бь тʹәхмина мьн, кʹижанирʹа гәләк һатә бахшандьне». Иса ԝирʹа гот: «Тә рʹаст тедәрхьст». 44 Паше әԝи дина хԝә да жьньке у Шьмһʹунрʹа гот: «Тӧ ве жьньке дьвини? Әз һатьмә мала тә, ле тә бона шуштьна ньгед мьн ав нәда. Ле әԝе ньгед мьн бь һесьред хԝә шьл кьрьн у бь пʹорʹе хԝә зьһа кьрьн. 45 Тә әз пачʹ нәкьрьм, ле әве жьньке жь һьнгева кӧ әз һатьмә, һʹәта ньһа дәст жь пачʹкьрьна ньгед мьн нәкʹьшандийә. 46 Тә рʹун нәрʹетә сәр сәре мьн, ле әве жьньке рʹуне бинхԝәш ньгед мьн хьст. 47 Ләма әз тәрʹа дьбежьм, гӧнед ве жьньке чьԛас гәләк ьн* жи, һатьнә бахшандьне, чьмки әԝе һʹәзкьрьнәкә мәзьн да кʹьфше. Ле кʹерʹа кем те бахшандьне, әԝ кем һʹәзкьрьне дьдә кʹьфше». 48 Паше ԝерʹа гот: «Гӧнед тә һатьнә бахшандьне». 49 Йед кӧ тʹәви ԝи бәр сьфре рʹуньштьбун, һәвдӧрʹа дьготьн: «Гәло әв мәрьв кʹи йә, кӧ һәла һе гӧна жи дьбахшинә?» 50 Ле әԝи жьнькерʹа гот: «Баԝәрийа тә тӧ хьлаз кьри. Бь сьламәти һәрʹә».

8 Һьнә ԝәʹдә шунда, Иса ль бажар у гӧнда дьгәрʹийа, мьзгинийа Пʹадшатийа Хԝәде бәла дькьр. У Донздәһ* тʹәви ԝи бун, 2 ӧса жи чәнд жьн, йед кӧ жь щьна хьлаз бьбун у жь нәхԝәшийа ԛәнщ бьбун: Мәрйәма Мәгдәлани, йа кӧ һʹәфт щьн же дәркʹәтьбун, 3 Йоһана жьна Хузайе рʹебәре мала Һеродәс, Сосьн у гәләк жьнед дьн, йед кӧ пе мал-мьлкʹе хԝә ԝанрʹа бәрдәсти дькьрьн.

4 Чахе әʹлаләтәкә гьран у кәсед кӧ тʹәви ԝи бажар бь бажар дьгәрʹийан, ль һәв тʹоп бун, әԝи мәсәләк ԝанрʹа гот: 5 «Щоткʹарәк дәркʹәт кӧ тʹохьм бьчинә. Гава әԝи тʹохьм дьрʹәшанд, һьнәк жь ԝан кʹәтьнә сәр рʹе, у һатьнә пʹепәскьрьне, у чʹьвикед әʹзмана әԝ хԝарьн. 6 Һьнәк жь ԝан кʹәтьнә сәр әʹрде кәвьри, у чахе әԝ шин бун жь кемасийа шьлайе һʹьшк бун. 7 Һьнә тʹохьм кʹәтьнә нава стьрийа, стьри жи перʹа шин бун у нәһиштьн әԝ мәзьн бьн. 8 Ле һьнә тʹохьм кʹәтьнә сәр әʹрде баш, у чахе әԝ шин бун, ԝана 100 щар зедәтьр бәр дан». Паше әԝи бь дәнгәки бьльнд гот: «Гӧһед кʹе һәнә, бьра бьбьһе».

9 Ле шагьртед ԝи же пьрсин, кӧ әв мәсәлә чь те һʹәсабе. 10 Әԝи гот: «Ԝәрʹа һатийә дайине ԝәки һун сӧрʹед пироз йед Пʹадшатийа әʹзмана фәʹм бькьн, ле бона кәсед майин әԝ пе мәсәла тенә готьне, ԝәки әԝана бьньһерʹьн, ле нәвиньн, у гӧһ бьдьн, ле фәʹм нәкьн. 11 Әв ә мәʹна ве мәсәле: Тʹохьм хәбәра Хԝәде йә. 12 Мәʹна тʹохьмед кӧ кʹәтьнә сәр рʹе әв ә, кӧ мәрьв хәбәра Хԝәде дьбьһен, паше Мире-щьна те у хәбәре жь дьле ԝан дәрдьхә, ԝәки әԝана баԝәр нәкьн у хьлаз нәбьн. 13 Мәʹна тʹохьмед кӧ кʹәтьнә сәр әʹрде кәвьри, әв ә, кӧ мәрьв гава хәбәра Хԝәде дьбьһен, бь шабун ԛәбул дькьн, ле кʹока ԝан тʹӧнә йә. Әԝана ԝәхтәкә кьн баԝәр дькьн, ле ԝәʹде щерʹьбандьне, жь рʹе дәрдькʹәвьн. 14 Мәʹна тʹохьмед кӧ кʹәтьнә нав стьрийа, әв ә, кӧ мәрьв хәбәра Хԝәде дьбьһен, ле жь бо хәма, дәԝләмәндтийе, у кʹефед ве жийине, әԝ бь тʹәмами дьхәньԛьн у бәре гьһишти надьн. 15 Мәʹна тʹохьмед кӧ кʹәтьнә сәр әʹрде баш, әв ә, кӧ мәрьв хәбәра Хԝәде бь дьле сах у ԛәнщ дьбьһен, хԝәйи дькьн у бь сәбьр бәре хԝә дьдьн.

16 Тʹӧ кәс чʹьре венахә у накә бьн фьраԛәке йан бьне ньвине, ле датинә сәр шәмданке, ԝәки кәсед кӧ дькʹәвьнә һӧндӧрʹ рʹонайе бьвиньн. 17 Тʹӧ тьште вәшарти тʹӧнә кӧ нәйе әшкәрәкьрьне, у тʹӧ тьште дьзива тʹӧнә, кӧ тʹӧ щар нәйе әʹйанкьрьне у вәшарти бьминә. 18 Жь бо ве йәке, дина хԝә бьдьне кӧ һун чаԝа гӧһ дьдьн, чьмки бал кʹе һәйә, ԝирʹа ԝе һе зедә бе дайине. Ле бал кʹе тʹӧнә йә, тьште кӧ әԝи тʹьре бал ԝи һәйә жи, ԝе жь ԝи бе стандьне».

19 Де у бьред ԝи һатьнә щәм ԝи, ле чьмки әʹлаләт зәʹф бу, әԝана нькарьбун незики ԝи буна. 20 Ләма жерʹа готьн: «Дийа тә у бьред тә дәрва сәкьни нә, дьхԝазьн тә бьвиньн». 21 Иса жи щаба ԝан да: «Дийа мьн у бьред мьн әԝ ьн, йед кӧ гӧһ дьдьнә хәбәра Хԝәде у тиньн сери».

22 Рʹожәке, әԝ тʹәви шагьртед хԝә кʹәтә ԛәйике у ԝанрʹа гот: «Ԝәрен әм дәрбази алийе голейә дьн бьн». У әԝана рʹе кʹәтьн. 23 Гава әԝана бь ԛәйике дьчун, Иса хәԝрʹа чу. Ль голе баки ԛайим рʹабу, ԛәйика ԝан бь аве тʹьжә дьбу у дькʹәтә бьне аве. 24 Шагьрт чун әԝ жь хәԝе рʹакьрьн у готьн: «Дәрсдар, Дәрсдар, әме бьхәньԛьн!» Әԝ жи рʹабу, фәрман да ба у пʹелед авейә гӧрʹ. Һьнге байе ԛайим сәкьни у һәр тьшт сәԛьрʹи. 25 Паше әԝи ԝанрʹа гот: «Кʹа баԝәрийа ԝә?» Ле әԝана гәләк тьрсийан, әʹщебмайи ман у һәвдӧрʹа готьн: «Гәло әв кʹи йә? Әԝ һәла һе фәрмане дьдә ба у аве жи, у әԝана жи ль гора готьна ԝи дькьн».

26 Әԝана гьһиштьнә һәрема Гьрасинийа, кʹижан кӧ пешбәри Щәлиле йә. 27 Гава Иса жь ԛәйике пәйа бу, жь ви бажари мәрьвәки щьнакʹәти дәркʹәтә пешийа ԝи. Әԝи зудава кʹьнщ хԝә нәдькьр у малда нәдьжит, ле нава мәзәлада дьма. 28 Гава әԝ чʹәʹв Иса кʹәт, кьрә ԛирʹин, ль бәр ԝи кʹәтә сәр чока у бь дәнгәки бьльнд гот: «Тӧ чь жь мьн дьхԝази, Исайе Кӧрʹе Хԝәдайе Һәри Жорьн? Әз һиви тә дькьм, мьн нәчәрчьринә». 29 (Чьмки Иса фәрман дабу щьн, кӧ әԝ жь ԝи мәрьви дәркʹәвә. Щьн гәләк щара әв мәрьв бьн һʹӧкӧме хԝәда дьгьрт.* Мәрьва дәст-ньгед ԝи бь зьнщира гьредьдан у бьн нобәдарийеда хԝәй дькьрьн жи, ле йәкә әԝи зьнщир дьԛәтандьн у щьн әԝ дьбьрә щийед хәԝлә.) 30 Иса жь ԝи пьрси: «Наве тә чь йә?» Әԝи гот: «Ләжйон ә»,* чьмки гәләк щьн кʹәтьбунә нав ԝи. 31 У ԝана гәләк щара жь ԝи һиви дькьрьн, ԝәки әԝ фәрмане нәдә ԝан, кӧ әԝана бькʹәвьнә чʹәла бе бьни. 32 Ԝедәре сәр чʹийе гәләк хьнзир* дьчʹерийан, у щьна рʹәща жь ԝи кьрьн, ԝәки әԝ бьһелә, кӧ әԝана бькʹәвьнә нав хьнзира, у әԝи жи изьн да ԝан. 33 Һьнге щьн жь ԝи мәрьви дәркʹәтьн у кʹәтьнә нав хьнзира, у һʹәму хьнзира хԝә жорда авитьнә голе* у хәньԛин. 34 Ле гава шьванед хьнзира дитьн кӧ чь ԛәԝьми, әԝана рʹәвин у дәрһәԛа ве йәке бажар у гӧндада бәла кьрьн.

35 Мәрьв дәркʹәтьн, сәва кӧ бьвиньн чь ԛәԝьмийә. Гава әԝана һатьнә бал Иса, дитьн ԝәки мәрьве кӧ щьн жь ԝи дәркʹәтьбун, кʹьнще ԝи ле йә, сәр һʹьше хԝә йә у бәр ньгед Иса рʹуньшти йә. Әԝана гәләк тьрсийан. 36 Әԝед кӧ әв йәк дитьбун, ԝанрʹа гьли кьрьн, кӧ чаԝа мәрьве щьнакʹәти ԛәнщ бу. 37 Һьнге гәләк мәрьвед дәр-доре һәрема Гьрасинийа жь Иса һиви кьрьн, ԝәки әԝ жь ԝедәре һәрʹә, чьмки тьрсәкә мәзьн кʹәтьбу дьле ԝан. Әԝ жи кʹәтә ԛәйике у чу. 38 Ле мәрьве кӧ щьн жь ԝи дәркʹәтьбун жь Иса рʹәща дькьр кӧ тʹәви ԝи һәрʹә, ле Иса әԝ шанд у гот: 39 «Вәгәрʹә мала хԝә у һʹәму тьшти гьли кә, чь кӧ Хԝәде бона тә кьрийә». Әԝ жи чу у һʹәму тьштед кӧ Иса бона ԝи кьрьбу, тʹәмамийа бажерда гьли дькьр.

40 Гава Иса вәгәрʹийа Щәлиле, мәрьва бь шабун әԝ ԛәбул кьрьн, чьмки әԝана һивийа ԝи бун. 41 Ԝе дәме сәрԝерәки кʹьниште* һат, наве кʹижани Йайиро бу. Әԝи хԝә авитә ньгед Иса у же лава кьр, кӧ әԝ һәрʹә мала ԝи, 42 чьмки тʹәне ԛизәкә ԝийә ԝәкә 12 сали һәбу у әԝ жи бәр мьрьне бу.

Гава Иса рʹеда бу, гәләк мәрьв пәй ԝи дьчун у дәр-доре ԝи тәнг дькьрьн. 43 Ԝедәре жьнәк һәбу, кӧ ида 12 сал бу сәр хуне вәбьбу, у тʹӧ кәси нькарьбу әԝ ԛәнщ кьра. 44 Әԝ пьштева һат, дәст да рʹишийед кʹьнще ԝи у дәрберʹа хуна кӧ же дьчу сәкьни. 45 Һьнге Иса гот: «Кʹи дәсте хԝә да мьн?» Гава һʹәмуйа инкʹар кьр, Пәтрус гот: «Дәрсдар, һәр алийава тʹьжи хәлԛ ә у дәр-доре тә тәнг дькьн». 46 Ле Иса гот: «Кәсәки дәсте хԝә да мьн, чьмки мьн тʹәхмин кьр кӧ ԛәԝат жь мьн чу». 47 Гава жьньке фәʹм кьр кӧ нькарә хԝә вәшерә, жь тьрса ләрьзи, һат хԝә авитә бәр ньгед ԝи, у бәр һʹәмуйа гот кӧ чьма дәсте хԝә да ԝи, у әԝ чаԝа дәрберʹа ԛәнщ бу. 48 Иса жи ԝерʹа гот: «Ԛиза мьн, баԝәрийа тә тӧ ԛәнщ кьри. Бь хер у сьламәт һәрʹә».

49 Гава Иса һе хәбәр дьда, жь мала сәрԝере кʹьниште мәрьвәк һат у гот: «Ԛиза тә мьр! Ида зәʹмәте нәдә Дәрсдар». 50 Гава Иса әв йәк бьһист, ԝирʹа гот: «Нәтьрсә, тʹәне баԝәр кә, у әԝе бьжи».* 51 Гава әԝ гьһиштә мале, нәһишт тʹӧ кәс бькʹәвә һӧндӧрʹ, хенщи Пәтрус, Йуһʹәнна, Аԛуб у де-баве кәчʹьке. 52 Ле һʹәму мәрьв дьгьрийан, синге хԝә дьхьстьн у шин дькьрьн. Ләма әԝи гот: «Нәгьрин, чьмки әԝ нәмьрийә, ле рʹаза йә». 53 Сәр ве йәке әԝана ԝи кʹәнийан, чьмки заньбун кӧ кәчʹьк мьрийә. 54 Ле әԝи дәсте ԝе гьрт у бь дәнгәки бьльнд гот: «Кәчʹе, рʹабә!» 55 Ԝе гаве әԝ вәгәрʹийа жийине,* у дәрберʹа рʹабу сәр хԝә. Иса гот, кӧ хԝарьне бьдьнә ԝе. 56 Шабуна де-баве ԝе беһʹәсаб бу, ле Иса тʹәми да ԝан, кӧ дәрһәԛа ве йәке тʹӧ кәсирʹа нәбежьн.

9 Паше Иса гази Донздәһа* кьр, ԛәԝат у һʹӧкӧм да ԝан, ԝәки щьна дәрхьн у нәхԝәшийа ԛәнщ кьн. 2 Әԝи әԝ шандьн, ԝәки дәрһәԛа Пʹадшатийа Хԝәде гьли кьн у мәрьва ԛәнщ кьн, 3 у ԝанрʹа гот: «Бона рʹеԝитийе тʹӧ тьшти хԝәрʹа нәбьн, нә шьвдар, нә тʹорбе хԝарьне, нә нан, нә пʹәра,* у нә жи кьрасе зедә. 4 Гава һун бькʹәвьнә маләке, бал ԝан бьминьн һʹәта жь ԝедәре һәрʹьн. 5 У кʹидәре мәрьв ԝә ԛәбул нәкьн, гава һун жь ԝи бажари дәркʹәвьн, тʹоза ньгед хԝә даԝшиньн, ԝәки ԝанрʹа бьбә шәʹдәти».* 6 Һьнге әԝана дәркʹәтьн у нав һәремеда гӧнд-гӧнд гәрʹийан, у һʹәму дәра мьзгини бәла дькьрьн у йед нәхԝәш ԛәнщ дькьрьн.

7 Сәрԝере* һәреме Һеродәс,* дәрһәԛа ԝан һʹәму тьшта пеһʹәсийа у гәләк тʹәвльһәв бу, чьмки һьнәка дьгот кӧ Йуһʹәнна жь мьрьне һатийә рʹакьрьне, 8 һьнәка жи дьгот кӧ Елйас хӧйа буйә, ле һьнәкед дьн жи дьготьн, кӧ йәк жь пʹехәмбәред бәре жь мьрьне рʹабуйә. 9 Һеродәс гот: «Мьн сәре Йуһʹәнна да жекьрьне. Ле әԝ кʹи йә кӧ әз ван тьшта дәрһәԛа ԝи дьбьһем?» Ләма Һеродәс гәләк дьхԝәст ԝи бьвинә.

10 Гава шанди вәгәрʹийан, ԝана һʹәму тьштед кӧ кьрьбун, Исарʹа гьли кьрьн. Паши ве йәке, әԝи әԝана тʹәви хԝә бьрьн у чу бажаре Бәйтсайдайе, ԝәки тʹәвайи тʹәне бьминьн. 11 Ле гава щьмәʹт дәрһәԛа ве йәке пеһʹәсийа, пәй ԝи чу. Әԝи әԝана бь дьлгәрми ԛәбул кьрьн у ԝанрʹа дәрһәԛа Пʹадшатийа Хԝәде хәбәр да у йед нәхԝәш ԛәнщ кьрьн. 12 Бәре еваре, Донздәһ һатьнә бал Иса у ԝирʹа готьн: «Щьмәʹте бьшинә, бьра һәрʹьн гӧнда у щийед дәр-дор, сәва кӧ хԝәрʹа хԝарьне у щийе рʹазане бьвиньн, чьмки әм ль щики хьки-хԝәли нә». 13 Ле әԝи ԝанрʹа гот: «Һун хԝарьне бьдьнә ԝан». Ԝана жи гот: «Бал мә хенщи пенщ нана у дӧ мәʹсийа тьштәк тʹӧнә. Демәк әм хԝәха һәрʹьн бона ԝан һʹәму мәрьва хԝарьне бькʹьрʹьн?» 14 Чьмки ԝедәре ԝәкә 5 000 мер бун. Ле әԝи шагьртед хԝәрʹа гот: «Ԝана бь 50 кәса кʹом-кʹом бьдьнә рʹуньштандьне». 15 Ԝана жи ӧса кьр, у һʹәмушк данә рʹуньштандьне. 16 Иса әԝ пенщ нан у дӧ мәʹси һьлдан, ль әʹзман ньһерʹи у дӧа кьр.* Паши ве йәке, әԝ кәр кьрьн* у да шагьртед хԝә, ԝәки әԝана әʹлаләтерʹа бәла кьн. 17 Һʹәмуйа хԝар у тʹер бун. У ԝана 12 сәвәт* бәрмайи тʹоп кьрьн.

18 Рʹожәке, гава Иса тʹәне дӧа дькьр, шагьрт һатьнә бал ԝи, у әԝи жь ԝан пьрси: «Бь тʹәхмина щьмәʹте, әз кʹи мә?» 19 Ԝана щаба ԝи да: «Дьбежьн Йуһʹәннайе Ньхӧмдар,* ле һьнәк дьбежьн Елйас, һьнәк жи дьбежьн йәк жь пʹехәмбәред бәре йә, кӧ жь мьрьне рʹабуйә». 20 Әԝи жи жь ԝан пьрси: «Ле һун чь дьфькьрьн, әз кʹи мә?» Пәтрус щаба ԝи да: «Мәсиһе Хԝәде йи». 21 Һьнге әԝи тʹәми да ԝан, кӧ ве йәке тʹӧ кәсирʹа нәбежьн, 22 у сәрда гот: «Кӧрʹе инсен гәрәке гәләк щәфа бькʹьшинә, у жь алийе рʹуспийа, сәрокед кʹаһина у ԛанунзанада бе инкʹаркьрьне, бе кӧштьне, у рʹожа сьсийа жь мьрьне бе рʹакьрьне».

23 Паше әԝи һʹәмуйарʹа гот: «Һәрге кәсәк дьхԝазә пәй мьн бе, әԝ ида гәрәке бона хԝә нәжи. Әԝ гәрәке һәр рʹож стуна хԝәйә щәфе һьлгьрә у пәй мьн бе. 24 Чьмки йе кӧ дьхԝазә әʹмьре хԝә хьлаз кә, әԝе ӧнда кә. Ле йе кӧ әʹмьре хԝә бона хатьре мьн ӧнда кә, ԝе хьлаз кә. 25 Һәрге мәрьв тʹәмамийа дьнйайе ԛазанщ кә, ле әʹмьре хԝә ӧнда кә, йан зьраре бьдә хԝә, кʹара ԝи чь йә? 26 Кʹи кӧ мьн у гьлийед мьн шәрм бькә, Кӧрʹе инсен жи ԝе ԝи шәрм бькә, гава рʹумәта хԝәда, рʹумәта Баведа у рʹумәта мәләкед пирозда бе. 27 Ле әз рʹаст ԝәрʹа дьбежьм, вьра нав ԝәда һьнә мәрьв һәнә, йед кӧ ԝе нәмьрьн,* һʹәта Пʹадшатийа Хԝәде нәвиньн».

28 Ԝәкә һʹәйшт рʹожа паши ван гьлийа, әԝи Пәтрус, Йуһʹәнна у Аԛуб тʹәви хԝә бьрьн у һьлкʹьшийа сәр чʹийе кӧ дӧа бькә. 29 У гава әԝи дӧа дькьр, әԝ рʹува һатә гӧһастьне у кʹьнщед ԝи сьпи бун у дьбьрьԛин. 30 У ва дӧ мәрьва тʹәви ԝи хәбәр дьдан. Әԝ Муса у Елйас бун. 31 Әԝана бь рʹумәт хӧйа бун, у дәстпекьрьн дәрһәԛа чуйина ԝи хәбәр дьн, чь кӧ ԝе Оршәлимеда бьһата сери. 32 Пәтрус у кәсед кӧ тʹәви ԝи бун, хәԝрʹа чубун. Ле гава әԝана һʹьшйар бун, ԝана рʹумәта ԝи у ӧса жи һәр дӧ мәрьвед щәм ԝи сәкьни, дитьн. 33 У гава әв һәр дӧ мәрьв жь ԝи дур дькʹәтьн, Пәтрус Исарʹа гот: «Дәрсдар, ча баш ә кӧ әм вьра нә. Бьһелә әм се һʹолька чекьн, йәке бона тә, йәке бона Муса у йәке жи бона Елйас». Әԝи хԝәха фәʹм нәдькьр кӧ чь дьбежә. 34 Ле гава әԝи һе хәбәр дьда, әʹԝрәк хӧйа бу у дакʹәтә сәр ԝан. Чахе әԝана кʹәтьнә бьн әʹԝр, тьрс кʹәтә дьле ԝан. 35 Һьнге дәнгәк жь әʹԝр һат у гот: «Әв ә Кӧрʹе мьн, бьжартийе мьн. Гӧһ бьдьнә ԝи». 36 Гава әԝ дәнг һат, шагьрта дит кӧ Иса тʹәне йә. Ԝана хԝә кәрʹ кьр у ԝан рʹожада тʹӧ кәсирʹа тьштед кӧ дитьбун, нәготьн.

37 Рʹожа дьн, гава әԝана жь чʹийе дакʹәтьн, әʹлаләтәкә мәзьн һатә пешийа Иса. 38 У ва, мәрьвәки жь әʹлаләте кьрә гази у гот: «Дәрсдар, әз һиви тә дькьм, али кӧрʹе мьн бькә!* Әԝ кӧрʹе мьни тайе тʹәне йә. 39 Щьн ԝи дьгьрә, кӧрʹьк ньшкева дькә ԛирʹин, вәдьһәжә у кʹәф бәр дев дькʹәвә. Әԝ ԝи бьриндар дькә, у паше анщах жь ԝи дур дькʹәвә. 40 Мьн жь шагьртед тә рʹәща кьр, ԝәки әви щьни дәрхьн, ле ԝана нькарьбу». 41 Иса гот: «Ньсьле бебаԝәр у гӧнәкʹар, һʹәта кʹәнге гәрәке әз тʹәви ԝә бьм у ԝә сәбьр кьм? Кӧрʹе хԝә бинә вьра». 42 Һʹәта кӧрʹьк незик дьбу жи, щьн әԝ авитә әʹрде у ԛайим вәһәжанд. Ле Иса сәрт фәрман да щьн, кӧрʹьк ԛәнщ кьр у да баве ԝи. 43 У гьшк сәр зорайа ԛәԝата Хԝәде әʹщебмайи мабун.

Гава әԝана сәр һʹәму кьред ԝи һе әʹщебмайи дьман, әԝи шагьртед хԝәрʹа гот: 44 «Рʹьнд гӧһ бьдьн у ван готьна бир нәкьн, чьмки ԝе Кӧрʹе инсен бьдьнә дәсте мәрьва». 45 Ле ԝана фәʹм нәкьр кӧ әԝ чь дьбежә, чьмки нета ван гьлийа жь ԝана вәшарти бу, у әԝана дьтьрсийан дәрһәԛа ве йәке жь ԝи бьпьрсьн.

46 Паше шагьрт һәврʹа кʹәтьнә дәʹԝе, кӧ жь ԝана йе һәри мәзьн кʹи йә. 47 Иса заньбу әԝана дьле хԝәда чь дьфькьрьн, ләма жи зарʹәк ани да кʹеләка хԝә, 48 у ԝанрʹа гот: «Кʹи кӧ ве зарʹе бона хатьре наве мьн ԛәбул кә, әԝ мьн жи ԛәбул дькә. У кʹи кӧ мьн ԛәбул дькә, Йе кӧ әз шандьмә жи ԛәбул дькә. Чьмки йе кӧ нав ԝәда хԝә һәри бьчʹук һʹәсаб дькә, әԝ ә йе һәри мәзьн».

49 Йуһʹәнна гот: «Дәрсдар, мә дит кӧ кәсәк бь наве тә щьна дәрдьхә. Мә хԝәст ԝи бьдьнә сәкьнандьне, чьмки әԝ пәй мә найе». 50 Ле Иса ԝирʹа гот: «Рʹийа ԝи нәгьрьн, чьмки кʹи кӧ мьԛабьли ԝә нинә, алийе ԝә йә».

51 Гава рʹож незик дьбун ԝәки әԝ бьһата һьлдане ль әʹзмен, әԝи сафи кьр һәрʹә Оршәлиме. 52 У пешийа хԝә әԝи ԛасьд шандьн. Әԝана жи чун, кʹәтьнә гӧндәки Самәрийа, ԝәки бона һатьна ԝи һәр тьшти һазьр кьн. 53 Ле ԝана әԝ ԛәбул нәкьр, чьмки әԝи дьхԝәст һәрʹә* Оршәлиме. 54 Гава шагьртед ԝи Аԛуб у Йуһʹәнна әв йәк дитьн, ԝана гот: «Хӧдан, дьхԝази әм жь әʹзмен агьр бьхԝазьн кӧ бьбарә у ԛьрʹа ван бинә?» 55 Ле Иса бәре хԝә да ԝан у сәрт әԝана ширәт кьрьн.* 56 Паше әԝана чунә гӧндәки дьн.

57 Гава әԝана рʹеда бун, кәсәки жерʹа гот: «Дәрсдар, тӧ кʹӧда жи һәрʹи, әзе пәй тә бем». 58 Ле Иса ԝирʹа гот: «Һʹолькед рʹувийа* һәнә кӧ теда дьминьн, у һелунед чʹьвикед әʹзмана жи һәнә, ле ԛә щик тʹӧнә ԝәки Кӧрʹе инсен сәре хԝә ле дайнә». 59 Паше әԝи йәки дьнрʹа гот: «Пәй мьн ԝәрә». Ле әви мәрьви гот: «Хӧдан, изьне бьдә мьн, кӧ әз пешийе һәрʹьм баве хԝә чʹәʹл кьм». 60 Ле Иса ԝирʹа гот: «Бьра мьри мьрийед хԝә чʹәʹл кьн, ле тӧ һәрʹә у һʹәму дәра дәрһәԛа Пʹадшатийа Хԝәде әʹлам кә». 61 У йәки дьн жи гот: «Хӧдан, әзе пәй тә бем, ле пешийе изьне бьдә мьн, кӧ әз хатьре хԝә жь нәфәред хԝә бьхԝазьм». 62 Иса ԝирʹа гот: «Кәсе кӧ әʹрде хԝә щот дькә* у пьшт хԝәва дьньһерʹә, нә һежайи Пʹадшатийа Хԝәде йә».

10 Паши ве йәке, Хӧдан 70 шагьртед дьн бьжартьн у әԝ дӧдӧ-дӧдӧ пешийа хԝә шандьн һәр бажар у щийе кӧ әԝи хԝәха дьхԝәст һәрʹә. 2 У ԝанрʹа гот: «Бәле, шьхӧле нандьруне гәләк ә, ле хәбаткʹар һьндьк ьн. Ләма, һиви жь Хԝәйе нандьруне бькьн, ԝәки нандьруна хԝәрʹа хәбаткʹара бьшинә. 3 Һәрʹьн! Ле һаж хԝә һәбьн, әз ԝә мина бәрха дьшиньмә нава гӧра. 4 Хԝәрʹа нә кʹиськ, нә тʹорбе хԝарьне, нә жи чарьха бьвьн. У рʹева сьлаве нәдьнә тʹӧ кәси.* 5 Һун бькʹәвьнә кʹижан мале, пешийе бежьн: ‹Бьра әʹдьлайи сәр ве мале бә›. 6 У һәрге ԝедәре мәрьвәки әʹдьлайиһʹәз һәбә, әʹдьлайа ԝә ԝе сәр ԝи бьминә. Ле һәрге тʹӧнә бә, әʹдьлайа ԝә ԝе ль ԝә вәгәрʹә. 7 Ԝе маледа бьминьн у чь кӧ дьдьнә бәр ԝә, бьхԝьн у вәхԝьн, чьмки хәбаткʹар һежайи һәԛе хԝә йә. Жь маләке дәрбази маләкә дьн нәбьн.

8 Ӧса жи гава һун бькʹәвьнә бажарәки у әԝана ԝә ԛәбул кьн, чь кӧ датиньн бәр ԝә, бьхԝьн, 9 ԝедәре мәрьвед нәхԝәш ԛәнщ кьн у ԝанрʹа бежьн: ‹Пʹадшатийа Хԝәде незики ԝә буйә›. 10 Ле гава һун бькʹәвьнә бажарәки у әԝана ԝә ԛәбул нәкьн, дәркʹәвьнә кʹучʹед сәрәкә у бежьн: 11 ‹Әм һәла һе жи тʹоза кӧ бажаре ԝәда ньгед мәва гьртийә, даԝдьшиньн. Ле бьзаньбьн, Пʹадшатийа Хԝәде незик буйә›. 12 Әз ԝәрʹа дьбежьм, ԝе рʹоже* һʹале Содоме ԝе дьһа һеса бә, нә кӧ һʹале ԝи бажари.

13 Ԝәй ль тә Хоразин! Ԝәй ль тә Бәйтсайда! Һәрге кʹәрәмәтед кӧ нав ԝәда һатьнә кьрьне, Сур у Сайдайеда бьһатана кьрьне, әԝана ԝе зудава нав кʹӧрх у кʹозийеда рʹуньшти тʹобә кьрана. 14 Ләма ԝәʹде диԝане, һʹале Сур у Сайдайе ԝе дьһа һеса бә, нә кӧ һʹале ԝә. 15 У тӧ, Кәпәрнаһум, тә тʹьре те һʹәта әʹзман бьльнд би? На, тӧйе бькʹәви Горʹе!*

16 Йе кӧ гӧһ дьдә ԝә, гӧһ дьдә мьн. У йе кӧ ԝә инкʹар дькә, мьн жи инкʹар дькә. Хенщи ве йәке, йе кӧ мьн инкʹар дькә, Йе кӧ әз шандьмә жи инкʹар дькә».

17 Паше 70 шагьрт бь шабун вәгәрʹийан у готьн: «Хӧдан, һәла һе щьн жи гӧрʹа мә дькьн чахе әм наве тә һьлдьдьн». 18 Һьнге әԝи ԝанрʹа гот: «Мьн дит кӧ Шәйтʹан мина бьруске ида жь әʹзмен жорда кʹәт. 19 Мьн һʹӧкӧм дайә ԝә кӧ һун мәʹра у дупʹьшка пʹепәс кьн у ԛәԝата дьжмьн алт кьн, у тʹӧ тьшт ԝе зьраре нәдә ԝә. 20 Ле бона ве йәке ша нәбьн кӧ щьн* гӧрʹа ԝә дькьн, ле бона ве йәке ша бьн кӧ навед ԝә ль әʹзмана һатьнә ньвисаре». 21 Ԝе гаве Иса бь шабун у рʹӧһʹе пироз тʹьжә бу, у гот: «Баво, Хӧдане әʹрд у әʹзмана, әз ль бәр һʹәмуйа шькьрийе дьдьмә тә, чьмки тә әв тьшт жь билана у аԛьла вәшарт у зарʹед бьчʹукрʹа әʹйан кьр. Әре Баво, чьмки әв йәк хԝәстьна дьле тә бу. 22 Һәр тьшт жь Баве мьн мьнрʹа һатийә дайине. У кәсәк ньзанә Кӧрʹ кʹи йә, пештьри Баве, у кәсәк ньзанә Бав кʹи йә, пештьри Кӧрʹ у ԝан кәса, кʹижанарʹа Кӧрʹ дьхԝазә рʹастийа дәрһәԛа Бав әшкәрә кә».

23 Паши ве йәке, гава әԝ тʹәви шагьртед хԝә тʹәне бу, ԝанрʹа гот: «Чьԛас бәхтәԝар ьн кәсед кӧ ван тьшта дьвиньн, чь кӧ һун дьвиньн. 24 Әз ԝәрʹа дьбежьм, гәләк пʹехәмбәр у пʹадша һʹьзрәта дитьна ван тьшта бун чь кӧ һун дьвиньн, ле нәдитьн, у һʹьзрәта бьһистьна ван тьшта бун чь кӧ һун дьбьһен, ле нәбьһистьн».

25 Мәрьвәки кӧ Ԛанун рʹьнд заньбу, рʹабу ԝәки Иса бьщерʹьбинә, у гот: «Дәрсдар, әз гәрәке чь бькьм, ԝәки жийина һʹәта-һʹәтайе бьстиньм?» 26 Иса жь ԝи пьрси: «Ԛанунеда чь ньвисар ә? Тӧ ча фәʹм дьки?» 27 Әԝи щаба ԝи да: «‹Йаһоԝа Хԝәдайе хԝә бь тʹәмамийа дьле хԝә, бь тʹәмамийа щанийа хԝә, бь тʹәмамийа ԛәԝата хԝә, у бь тʹәмамийа һʹьше хԝә һʹәз бькә›, у ‹мәрьва һʹәз бькә чаԝа тӧ хԝә һʹәз дьки›». 28 Иса ԝирʹа гот: «Щаба тә рʹаст ә. Бәрдәԝам кә ве йәке бькә, у тӧйе жийине* бьстини».

29 Ле чьмки әви мәрьви дьхԝәст бьдә кʹьфше кӧ йәки рʹаст ә, Исарʹа гот: «Ле кʹижан мәрьва гәрәке әз һʹәз бькьм?» 30 Иса щаб да: «Мәрьвәк жь Оршәлиме дадькʹәт у дьчу Әриһайе. Әԝ кʹәтә дәсте ԛачаха, ԝана әԝ тәʹзи кьр, кʹӧтан у нивкӧшти һиштьн чун. 31 Ԝе дәме, кʹаһинәк ве рʹерʹа дәрбаз дьбу, ле гава әԝи әԝ мәрьв дит, бәррʹа дәрбази алийе дьн бу. 32 Ви щурʹәйи, Леԝик жи һатә ԝедәре у әԝ мәрьв дит, у бәррʹа дәрбази алийе дьн бу. 33 Ле гава йәки Самәри ве рʹерʹа дәрбаз дьбу у әԝ мәрьв дит, дьле ԝи сәр шәԝьти. 34 Әԝ незики ԝи бу, рʹун у шәрав ль бьринед ԝи хьст у бьринед ԝи пʹечʹа. Паше әԝи әԝ дани сәр кʹәре хԝә, бьрә меванханәке у ле бу хԝәйи. 35 Рʹожа дьн, әԝи дӧ динари да хԝәйе меванхане у гот: ‹Хԝәйитийе ль ԝи бькә, у тӧ чь жи сәр ԝи зедә хәрщ ки, гава вәгәрʹьм әзе бьдьмә тә›. 36 Ньһа бь тʹәхмина тә, жь ԝан һәрсека кʹижани һʹәзкьрьн да кʹьфше һьндава ԝи мәрьве кӧ кʹәтә дәсте ԛачаха?» 37 Әԝи гот: «Әԝе кӧ һьндава ԝида рʹәʹмти да кʹьфше». Һьнге Иса ԝирʹа гот: «Тӧ жи һәрʹә у ӧса бькә».

38 Чахе Иса тʹәви шагьртед хԝә рʹийа хԝә бәрдәԝам кьр, әԝ кʹәтә гӧндәки. Ԝедәре жьнькәкә бь наве Мәртʹа, әԝ ча меван тʹәглифи мала хԝә кьр. 39 Хушкәкә ԝе жи һәбу, наве ԝе Мәрйәм бу. Әԝ бәр ньгед Хӧдан рʹуньшт у гӧһ дьда гьлийед ԝи.* 40 Ле Мәртʹа гәләк тьштава мьжул бу. У әԝ һатә щәм Иса у гот: «Хӧдан, тәрʹа йәк ә кӧ хушка мьн һʹәму шьхӧл сәр стийе мьн һиштийә? Жерʹа бежә бьра бе у али мьн бькә». 41 Хӧдан жи ԝерʹа гот: «Мәртʹа, Мәртʹа, тӧ гәләк тьштава мьжул и у тʹәвиһәв дьби. 42 Ле гәләк тьшт нәлазьм ә, тʹәне тьштәк бәс ә. Мәрйәме йа һәрә баш* бьжартийә, у әве жь ԝе нәйе стандьне».

11 Щарәке Иса дӧа дькьр, у гава әԝи дӧайе хԝә хьлаз кьр, жь шагьртед ԝи йәки жерʹа гот: «Хӧдан, мә һин кә кӧ әм ча дӧа бькьн, чаԝа кӧ Йуһʹәнна шагьртед хԝә һин кьрьн».

2 Һьнге Иса ԝанрʹа гот: «Гава һун дӧа дькьн, аһа бежьн: Баво, бьра наве тә пироз бә. Бьра Пʹадшатийа тә бе. 3 Һәр рʹож нане мә ль гора һʹәԝщед мәйи һәррʹожи бьдә мә. 4 У гӧнед мә бьбахшиньнә мә, чаԝа кӧ әм жи гӧнед кәсед дьн* дьбахшиньн, у али мә бькә кӧ әм щерʹьбандьнада шаш нәбьн».*

5 Паше әԝи ԝанрʹа гот: «Бьдьнә бәр чʹәʹве хԝә кӧ йәк жь ԝә ниве шәве дьчә щәм һәваләки хԝә у жерʹа дьбежә: ‹Һәвало, ща се нана дәйни бьдә мьн, 6 чьмки һәваләки мьн жь рʹийа дур һатийә щәм мьн, у тьштәки мьн тʹӧнә кӧ әз дайньм бәр ԝи›. 7 Ле әԝ жь мале щаба ԝи дьдә: ‹Мьн әʹщьз нәкә. Дәри ида дада йә у әз зарʹед хԝәва нава щи-ньвинада ньн. Әз нькарьм рʹабьм у тьштәки бьдьмә тә›. 8 Әз ԝәрʹа дьбежьм, һәрге әԝ һәла һе бона хатьре һәвалтийе жи рʹанәбә у тьштәки нәдә ԝи, йәкә әԝе рʹабә у чь жерʹа лазьм бә бьде, чьмки әԝ сәр йа хԝә дьминә. 9 Ләма әз ԝәрʹа дьбежьм, бәрдәԝам кьн бьхԝазьн у ԝе ԝәрʹа бе дайине, бәрдәԝам кьн бьгәрʹьн у һуне бьвиньн, бәрдәԝам кьн дәри хьн у ԝе бәр ԝә вәбә. 10 Чьмки кʹи кӧ дьхԝазә, дьстинә, кʹи кӧ дьгәрʹә, дьвинә, у кʹи кӧ дәри дьхә, бәр ԝи вәдьбә. 11 Жь ԝә кʹижан ә әԝ бав, кӧ кӧрʹе ԝи мәʹси жь ԝи бьхԝазә, ле әԝ дәԝса мәʹси мәʹр бьдә ԝи? 12 Йан жи һәрге һеке бьхԝазә, әԝ дупʹьшке бьдә ԝи? 13 Һәрге һун, мәрьвед гӧнәкʹар, заньн чаԝа тьштед баш бьдьнә зарʹед хԝә, ле Баве ԝәйи ль әʹзмана ԝе чьԛас һе зедә рʹӧһʹе пироз бьдә ԝан, йед кӧ жь ԝи дьхԝазьн!»

14 Паше, Иса жь мәрьвәки щьн дәрхьст, кʹижани кӧ ԝи лал кьрьбу.* Гава щьн дәркʹәт, мәрьве лал дәстпекьр хәбәр дә, у хәлԛ әʹщебмайи ма. 15 Ле жь ԝан һьнәка гот: «Әԝ бь сайа сәрԝере щьна Бәлзәбул,* щьна дәрдьхә». 16 Һьнәка жи сәва кӧ ԝи бьщерʹьбиньн, нишанәкә жь әʹзмен жь ԝи дьхԝәстьн. 17 Ле Иса заньбу кӧ әԝана чь дьфькьрьн у ԝанрʹа гот: «Һәр пʹадшатийа кӧ нав хԝәда һатийә пʹарәвәкьрьн, ԝеран дьбә, у малбәта кӧ нав хԝәда һатийә пʹарәвәкьрьн, һәв бәла дьбә. 18 Ви щурʹәйи, һәрге Шәйтʹан жи нав хԝәда һатийә пʹарәвәкьрьн, пʹадшатийа ԝи ԝе чаԝа бьминә? Чьмки һун дьбежьн кӧ әз щьна бь сайа Бәлзәбул дәрдьхьм. 19 Һәрге әз щьна бь сайа Бәлзәбул дәрдьхьм, ле шагьртед ԝә* бь сайа кʹе щьна дәрдьхьн? Ләма жи әԝе бьбьн һʹакьмед ԝә. 20 Ле һәрге әз щьна бь сайа ԛәԝата* Хԝәде дәрдьхьм, ида Пʹадшатийа Хԝәде һатийә* у ԝә тедәрнәхьстийә. 21 Чахе мәрьвәки ԛәԝат бь чʹәк мала хԝә дьпʹарезә, мал у мьлкʹе ԝи хԝәйкьри дьминә. 22 Ле һәрге йәки жь ԝи ԛәԝаттьр мьԛабьли ԝи рʹабә у ԝи бьндәст кә, әԝе һʹәму чʹәкед ԝи кӧ әԝи гӧмана хԝә дабу сәр, же бьстинә, у тьштед кӧ жь ԝи тʹалан кьр, бәла кә. 23 Кʹи кӧ алийе мьн нинә, мьԛабьли мьн ә. У кʹи кӧ тʹәви мьн тʹоп накә, һәв бәла дькә.*

24 Гава щьнәк* жь мәрьвәки дәрдькʹәвә, әԝ щийед беавда дьгәрʹә ԝәки щики рʹьһʹәт бьвинә, ле чахе щики ӧса навинә, әԝ хԝәрʹа дьбежә: ‹Кʹа әз вәгәрʹьм мала хԝә, йа кӧ әз же дәркʹәтьмә›. 25 У гава әԝ те, дьвинә кӧ мал һәвдайи у хәмьланди йә. 26 Паше әԝ дьчә у һʹәфт щьнед дьнә жь хԝә хьрабтьр тʹәви хԝә тинә, әԝана дькʹәвьн һьндӧрʹ у ԝедәре дьжин. Ида һʹале ԝи мәрьви жь һʹале ԝийи бәре хьрабтьр дьбә».

27 Гава әԝи әв тьшт дьготьн, кʹӧлфәтәке жь нава әʹлаләте кьрә гази: «Чьԛас бәхтәԝар ә дайика кӧ тӧ зьке хԝәда хԝәйкьри у шир дайә тә!» 28 Әԝи жи гот: «Дьһа бәхтәԝар әԝ ьн, йед кӧ хәбәра Хԝәде дьбьһен у пек тиньн!»

29 Гава хәлԛ тʹоп дьбу, әԝи дәстпекьр хәбәр дә: «Әв ньсьл ньсьләки хьраб ә. Әԝ нишанәке дьгәрʹә, ле хенщи нишана Уньс, жерʹа тʹӧ нишан ԝе нәйе дайине. 30 Чаԝа кӧ Уньс бона щьмәʹта Нинәԝайе бу нишан, Кӧрʹе инсен жи ԝе бона ви ньсьли бьбә нишан. 31 Рʹожа Диԝане, пʹадшайа* башуре ԝе тʹәви мәрьвед ви ньсьли рʹабә у ԝе ԝана сущдар кә. Чьмки әԝ жь сәре дьне һат, ԝәки гӧһ бьдә сәрԝахтийа Сьлеман. Ле ва йә, йәки жь Сьлеман мәзьнтьр вьра йә. 32 Мәрьвед Нинәԝайе ԝе Рʹожа Диԝане тʹәви ви ньсьли рʹабьн у ԝана сущдар кьн, чьмки ԝана гӧһ да хәбәра Уньс у тʹобә кьрьн. Ле ва йә, йәки жь Уньс мәзьнтьр вьра йә. 33 Гава мәрьв чʹьре ведьхә, данайнә щики вәшарти йан жи бьне дәрдане, ле датинә сәр шәмданке, ԝәки кәсед кӧ дькʹәвьнә һӧндӧрʹ рʹонайе бьвиньн. 34 Чʹьра бәдәне чʹәʹве тә йә. Гава чʹәʹве тә зәлал ә,* тʹәмамийа бәдәна тә рʹонайеда йә, ле һәрге чʹәʹве тә һʹәвсуд ә,* бәдәна тә жи тәʹри йә. 35 Ләма һаж хԝә һәбә, кӧ рʹонайа нав тәда нәбә тәʹри. 36 Һәрге бәдәна тә бь тʹәмами рʹонайи бә у пʹарәкә тәʹри тʹӧнә бә, әԝе ӧса рʹонайи бә, чаԝа шәԝԛа чʹьре».

37 Гава Иса хәбәрдана хԝә хьлаз кьр, Ферьсики әԝ тʹәглифи сәр хԝарьне кьр. Әԝ жи чу мала ԝи у бәр сьфре рʹуньшт. 38 Ле гава әԝе Ферьси дит кӧ Иса пешийа нанхԝарьне дәстед хԝә нәшушт,* әʹщебмайи ма. 39 Ле Хӧдан ԝирʹа гот: «Ферьсино, һун кʹас у тʹасе рʹуйе дәрвава дьшон, ле һӧндӧрʹе ԝә тʹьжи тьмайи* у хьраби йә. 40 Бефәʹмно! Гәло әԝе кӧ дәрвава чекьрийә, һӧндӧрʹва жи ченәкьрийә? 41 Гава һун кʹәсибарʹа ԛәнщийе дькьн, бьра жь дьле ԝә бә, у һьнге һуне һәр тьштида паԛьж бьн. 42 Ле ԝәй ль ԝә, Ферьсино! Чьмки һун дәһәке* пунге, пәганоне* у һәр щурʹе пʹьнщаред бахчә дьдьн, ле һун һәԛи у һʹәзкьрьна Хԝәде пьшт гӧһе хԝәва давежьн. Рʹаст ә, әв борщдарийа ԝә бу кӧ һун ван тьшта бькьн, ле лазьм бу кӧ ԝә тьштед дьн жи пьшт гӧһе хԝәва нәавита. 43 Ԝәй ль ԝә, Ферьсино! Чьмки һун һʹәз дькьн кʹьништада* щийед пешьн бьгьрьн, у һʹәз дькьн кӧ мәрьв базарада ԝә сьлав кьн! 44 Ԝәй ль ԝә! Чьмки һун мина мәзәла нә, йед кӧ найенә хане,* у мәрьв сәр ԝан дьгәрʹьн кӧ нә жи һаж пе һәнә!»

45 Һьнге жь кәсед кӧ Ԛанун рʹьнд заньбун йәки ԝирʹа гот: «Дәрсдар, бь ван гьлийа тӧ мә жи беһӧрмәт дьки». 46 Һьнге әԝи гот: «Ԝәй ль ԝә жи, һун йед кӧ Ԛануне рʹьнд заньн! Чьмки һун баре ӧса гьран дьдьнә сәр мәрьва кӧ чәтьн ә бьвьн, ле хԝәха тʹьликә хԝә жи надьнә ԝан бара!

47 Ԝәй ль ԝә! Чьмки һун бона пʹехәмбәра тʹьрба чедькьн, ле кал-бавед ԝә әԝана кӧштьн! 48 Бәле, һун һаж кьред кал-бавед хԝә һәнә, ле диса жи һун ԝан ԛәбул дькьн. Ԝана пʹехәмбәр кӧштьн, һун жи тʹьрбед ԝан чедькьн. 49 Ләма жи Хԝәде, йе кӧ билан ә, ӧса готийә: ‹Әзе пʹехәмбәр у шандийа бьшиньм бал ԝан, у ԝе жь ԝан һьнәка бькӧжьн, һьнәка жи бьзериньн. 50 Бона ве йәке хуна һʹәму пʹехәмбәра, кӧ жь дәстпека дьнйайе һатийә рʹетьне, ԝе жь ви ньсьли бе хԝәстьне, 51 жь хуна Һабил, һʹәта хуна Зәкәрйа, йе кӧ ортʹа ԛӧрбангәһе у мала Хԝәдеда* һатә кӧштьне›. Бәле, әз ԝәрʹа дьбежьм, жь ви ньсьли ԝе бе хԝәстьне.

52 Ԝәй ль ԝә, һун йед кӧ Ԛануне рʹьнд заньн! Чьмки һун кʹьлита занәбуне жь мәрьва дьстиньн. Һун хԝәха нәкʹәтьнә һӧндӧрʹ, у рʹийа кәсед кӧ дьхԝазьн бькʹәвьне жи, дьгьрьн».

53 Гава Иса жь ԝедәре дәркʹәт, ԛанунзана у Ферьсийа дора ԝи гьртьн у бь пьрса дәстпекьрьн ԝи әʹщьз кьн, 54 чьмки әԝана һивийе бун кӧ ԝи сәр гьлийа бьгьрьн.

12 Ԝи чахи, гава бь һʹәзара мәрьв тʹәвайи тʹоп бун, ӧса кӧ ԝана пʹел ньгед һәв дькьрьн, Иса дәстпекьр пешийе шагьртед хԝәрʹа бежә: «Хԝә жь һәвиртьрʹшке Ферьсийа, демәк жь дӧрʹутийа ԝан хԝәй кьн. 2 Ле тʹӧ тьште дьзива тʹӧнә кӧ нәйе әшкәрәкьрьне, у тʹӧ сӧрʹ тʹӧнә кӧ нәйе әʹйанкьрьне. 3 Ләма жи тьште кӧ һун тәʹрийеда дьбежьн, ԝе рʹонайеда бе бьһистьн. Тьштед кӧ һун һӧндӧрʹе одеда бь дәнге ньмьз* дьбежьн, ԝе сәр банийа бе әʹламкьрьне. 4 Достед мьн, хенщи ве йәке әз ԝәрʹа дьбежьм: Жь ԝана нәтьрсьн йед кӧ дькарьн бәдәне бькӧжьн, ле паше нькарьн тʹӧ тьшти бькьн. 5 Ле әзе ԝәрʹа бежьм кӧ һун гәрәке жь кʹе бьтьрсьн: Жь Ԝи бьтьрсьн, йе кӧ нә тʹәне дькарә бькӧжә, ле ӧса жи һʹӧкӧме ԝи һәйә, кӧ паше бавежә Геһенайе.* Әре, әз ԝәрʹа дьбежьм жь Ԝи бьтьрсьн. 6 Нә пенщ чʹьвикед бьчʹук бь дӧ ԛӧрʹуша* тенә фьротане? Диса жи, Хԝәде жь ԝан ԛә йәке жи бир накә. 7 Ле чь ль ԝә дькʹәвә, һʹәму пʹорʹед сәре ԝә жи жьмарти нә. Нәтьрсьн, һун жь гәләк чʹьвика ԛимәттьр ьн.

8 Әз ԝәрʹа дьбежьм, һәр кәсе кӧ бәр мәрьва бежә, ԝәки әԝ шагьрте мьн ә, Кӧрʹе инсен жи ԝе бәр мәләкед Хԝәде бежә кӧ әԝ кәс шагьрте ԝи йә. 9 Ле һәр кәсе кӧ мьн бәр мәрьва инкʹар кә, әԝе жи бәр мәләкед Хԝәде бе инкʹаркьрьне. 10 У һәр кәсе кӧ тьштәки мьԛабьли Кӧрʹе инсен бежә, ԝе ль ԝи бе бахшандьне. Ле йе кӧ мьԛабьли рʹӧһʹе пироз кʹьфьрийа бькә, ԝе ԝи нәйе бахшандьне. 11 Гава ԝә бьвьн бәр щьвинед мәзьн,* сәрԝеред дәԝләте у һʹӧкӧмдара, хәм нәкьн кӧ һуне хԝә чаԝа бьпʹарезьн, йан жи чь бежьн, 12 чьмки ве дәме ԝе рʹӧһʹе пироз ԝә һин кә, кӧ гәрәке һун чь бежьн».

13 Һьнге жь нав әʹлаләте йәки ԝирʹа гот: «Дәрсдар, бьре мьнрʹа бежә бьра миратʹе мьнрʹа пʹарәвәкә». 14 Иса ԝирʹа гот: «Кʹи әз кʹьфш кьрьмә ԝәки сәр ԝә һʹакьмтийе бькьм, йан жи миратʹе ԝәрʹа пʹарәвәкьм?» 15 Паше әԝи ԝанрʹа гот: «Һаж хԝә һәбьн у хԝә жь һәр щурʹә тьмайе бьпʹарезьн, чьмки әʹмьре инсен гьредайи нинә ве йәкева кӧ һәбука ԝи чьԛас ә». 16 У әԝи ԝанрʹа мәсәләк гот: «Зәвийа мәрьвәки дәԝләти гәләк бәр да. 17 Ләма әԝи хԝәрʹа гот: ‹Гәло әз чь бькьм? Щи жи тʹӧнә кӧ бәред зәвийа хԝә текьме›. 18 Паше әԝи гот: ‹Әзе ӧса бькьм: Әзе әʹмбаред хԝә һьлшиньм у йед һе мәзьн чекьм, у һʹәму бәред зәвийа хԝә у һәбука хԝә теда тʹоп кьм, 19 у әзе хԝәрʹа бежьм: «Тә хԝәрʹа тʹера гәләк сала тьшт тʹоп кьрьнә, һеса бә, бьхԝә, вәхԝә у кʹеф кә»›. 20 Ле Хԝәде ԝирʹа гот: ‹Бефәʹмо, ишәв әʹмьре тә жь тә те стандьне. Ижа һәр тьште кӧ тә тʹоп кьрийә, ԝе кʹерʹа бьминә?› 21 Ӧса те сәре һәр кәсе кӧ хьзне хԝәрʹа тʹоп дькә, ле чʹәʹве Хԝәдеда дәԝләти нинә».

22 Паше әԝи шагьртед хԝәрʹа гот: «Ләма әз ԝәрʹа дьбежьм, ида бона әʹмьре хԝә хәма нәкьн, кӧ һуне чь бьхԝьн, йан жи бона бәдәна хԝә, кӧ һуне чь ль хԝә кьн. 23 Чьмки әʹмьр жь хԝарьне ԛимәттьр ә у бәдән жи жь кʹьнща. 24 Ль ԛьрʹԛьрʹка бьньһерʹьн: Әԝана нә дьчиньн, нә жи дьдьрун, у нә жи әʹмбаред ԝан һәнә. Ле диса жи Хԝәде ԝана тʹер дькә. Нә һун жь чʹьвика ԛимәттьр ьн? 25 Кʹи жь ԝә дькарә бь хәмед хԝә, әʹмьре хԝә дәԛәке зедә кә? 26 Ләма, һәрге һун нькарьн тьштәки бьчʹук жи бькьн, чьма һун бона тьштед дьн хәм дькьн? 27 Дина хԝә бьдьнә сосьна кӧ әԝана чаԝа шин дьбьн: Әԝана нә дьхәбьтьн, нә жи кʹьнща дьдьрун. Ле әз ԝәрʹа дьбежьм, кӧ һәла һе Сьлеман Пʹадша жи тʹәмамийа хер-хьзна хԝәда мина йәки жь ԝан, кʹьнщ ль хԝә нәдькьр. 28 Кембаԝәрно, һәрге Хԝәде гиһайе чоле, кӧ иро һәйә у сьбе давежьнә тәндуре, ӧса дьхәмьлинә, ле чьԛас зедә ԝе ль ԝә кә! 29 Ида хәм нәкьн кʹа һуне чь бьхԝьн у чь вәхԝьн, у ида зедә бәр хԝә нәкʹәвьн. 30 Мьләтед дьн пәй ԝан һʹәму тьшта дькʹәвьн. Ле Баве ԝә занә, кӧ һун һʹәԝще ԝан тьшта нә. 31 Дәԝсе, бькʹәвьнә һʹәйра Пʹадшатийа ԝи, у әԝ тьшт ԝе ԝәрʹа бенә дайине.

32 Нәтьрсә, кәрийе бьчʹук, чьмки Баве ԝә хԝәст Пʹадшатийе бьдә ԝә. 33 Һәбука хԝә бьфьрошьн у кʹәсибарʹа ԛәнщийе бькьн. Хԝәрʹа кʹиськед пʹәра кӧ нарʹьзьн, чекьн, у хьзна ль әʹзмана кӧ хьлаз набә, тʹоп кьн, кʹидәре дьз нькарә бькʹәве у бьзуз нькарә бьхԝә. 34 Чьмки хьзна ԝә кʹидәре бә, ԝе дьле ԝә жи ԝедәре бә.

35 Һазьр бьн* у бьра чʹьред ԝә вехьсти бьн. 36 Мина ԝан хӧлама бьн, йед кӧ һивийа ахайе хԝә нә, ԝәки чахе әԝ жь дәʹԝате вәгәрʹә у дәри хә, әԝана дәрберʹа дәри ԝи вәкьн. 37 Чьԛас бәхтәԝар ьн әԝ хӧлам, йед кӧ һʹьшйар дьминьн, чахе ахайе ԝан те! Әз рʹаст ԝәрʹа дьбежьм әԝе хԝә һазьр кә,* ԝана бәр сьфре бьдә рʹуньштандьне у бәрдәстийе ԝанрʹа бькә. 38 У һәрге әԝ еваре дәрәнг,* йан жи паши ниве шәве* бе у ԝана һазьр бьвинә, әԝана бәхтәԝар ьн! 39 Ле ве йәке заньбьн, һәрге хԝәйе мале бьзаньбә кӧ дьз ԝе кʹижан сьһʹәте бе, әԝе нәһелә кӧ дьз бькʹәвә мала ԝи. 40 Һун жи һазьр бьминьн, чьмки Кӧрʹе инсен ԝе сьһʹәтәкә ӧсада бе, кӧ һун һивийе нибьн».

41 Һьнге Пәтрус пьрси: «Хӧдан, тӧ ве мәсәле тʹәне мәрʹа дьбежи, йан һәр кәсирʹа?» 42 Хӧдан гот: «Хӧламе амьн у сәрԝахт* бь рʹасти кʹи йә, йе кӧ ахайе ԝи әԝ сәр хӧламед мала хԝәрʹа кʹьфш кьрийә, ԝәки әԝ хԝарьна ԝан ԝәʹдәда бьдә ԝан? 43 Чьԛас бәхтәԝар ә әԝ хӧлам, гава ахайе ԝи бе у бьвинә кӧ әԝ һәма ӧса дькә! 44 Әз рʹаст ԝәрʹа дьбежьм, әԝе ԝи хӧлами сәр һʹәму һәбука хԝәрʹа кʹьфш кә. 45 Ле һәрге әԝ хӧлам дьле хԝәда бежә, ‹Ахайе мьн дәрәнги дькʹәвә› у әԝ дәстпекә һәвал-хӧламед хԝә бькʹӧтә, бьхԝә, вәхԝә у сәрхԝәш бә, 46 ахайе ԝи рʹожәкә ӧсада ԝе бе, кӧ әԝ хӧлам һивийа ԝи нинә, у сьһʹәтәкә ӧсада, кӧ әԝ ньзанә, у әԝе ԝи сәрт щәза кә у ԝи бавежә щийе нәамьна. 47 Һьнге әԝ хӧламе кӧ хԝәстьна ахайе хԝә фәʹм кьр, ле һазьр нәбу бона һатьна ԝи у нә жи ль гора хԝәстьна ԝи кьр, ԝе гәләки бе кʹӧтане. 48 Ле йе кӧ фәʹм нәкьрийә у тьштед ӧса кьрийә кӧ һежайи кʹӧтане йә, ԝе һьндьк бе кʹӧтане. Һәр кәсе кӧ жерʹа гәләк һатийә дайине, ԝе гәләк жь ԝи бе хԝәстьне. У кʹерʹа гәләк тьшт һатьнә тʹәсмилкьрьне, жь ԝи ԝе һе зедә бе хԝәстьне.

49 Әз һатьм ԝәки сәр әʹрде агьр вехьм. Ида агьр пекʹәтийә, жь ве зедәтьр әзе чь бьхԝазьм? 50 Бь рʹасти ньхӧмандьнәк һәйә, бь кʹижани әз гәрәке бемә ньхӧмандьне, у һʹәта әԝ бе сери, әз зәʹф хәмгин ьм! 51 Ԝә тʹьре әз һатьмә әʹдьлайе биньм сәр рʹуйе әʹрде? На, әз ԝәрʹа дьбежьм, әз һатьмә мәрьва жь һәв бьԛәтиньм. 52 Жь вьр шунда, маләкеда пенщ кәс ԝе мьԛабьли һәв рʹабьн, се кәс мьԛабьли дӧ кәса, у дӧ кәс мьԛабьли се кәса. 53 Бав ԝе мьԛабьли кӧрʹ у кӧрʹ мьԛабьли бав рʹабә, дайик ԝе мьԛабьли ԛизе у ԛиз мьԛабьли дайике рʹабә, хԝәси ԝе мьԛабьли буке у бук мьԛабьли хԝәсийе рʹабә».

54 Паше Иса щьмәʹтерʹа гот: «Гава һун дьвиньн кӧ әʹԝр жь рʹоавайе бьльнд дьбә, дәрберʹа дьбежьн, ‹Ԝе баки ԛайим рʹабә›, у ӧса жи дьбә. 55 У гава һун дьвиньн кӧ байе башуре те, һун дьбежьн, ‹Ԝе гәләк гәрм бә›, у ӧса жи дьбә. 56 Дӧрʹуно! Һун жь әʹрд у әʹзмен тедәрдьхьн һәԝа ԝе чаԝа бә, ле чьма һун фәʹм накьн кӧ ньһа чь дьԛәԝьмә? 57 Һун чьма тедәрнахьн, кӧ чь рʹаст ә? 58 Мәсәлә, гава тӧ тʹәви кәсе кӧ шькийате тә дькә, дьчи бал сәрԝерәки, рʹеда чьԛас дькари ӧса бькә, кӧ тʹәви ԝи ль һәв бейи, сәва кӧ әԝ тә нәдә дәсте һʹакьм, у һʹакьм тә нәдә дәсте нобәдар у әԝ жи тә нәвежә кәле. 59 Әз тәрʹа дьбежьм, һʹәта кӧ тӧ ԛӧрʹуше хԝәйи пашьн нәди, тӧйе жь кәле дәрнәкʹәви».

13 Ԝи чахи һьнә мәрьвед кӧ ԝедәре бун, Исарʹа дәрһәԛа ԝан Щәлилийа гьли кьрьн, хуна кʹижана Пилато тʹәви хуна ԛӧрбанед ԝан кьрьбу. 2 Әԝи ԝанрʹа гот: «Ԝә тʹьре әв тьшт һатьнә сәре ԝан Щәлилийа, чьмки әԝана жь һʹәму Щәлилийед дьн дьһа гӧнәкʹар бун? 3 На, ле әз ԝәрʹа дьбежьм, һәрге һун тʹобә нәкьн, һуне һʹәму жи ӧса бенә ԛьрʹкьрьне. 4 Йан жи әԝ 18 мәрьвед кӧ Силԝамеда бьрщ сәр ԝанда кʹәт у мьрьн, ԝә тʹьре әԝана жь һʹәму бьнәлийед Оршәлиме дьһа гӧнәкʹар бун? 5 На, ле әз ԝәрʹа дьбежьм, һәрге һун тʹобә нәкьн, һуне һʹәму жи ӧса бенә ԛьрʹкьрьне».

6 Паше әԝи әв мәсәлә ԝанрʹа гот: «Мәрьвәки нав рʹәзе хԝәда дарәкә һежире чандьбу. У әԝ һат кӧ бьвинә һәла даре бәр дайә, ле сәр тьштәк нәдит. 7 Һьнге әԝи рʹәзванрʹа гот: ‹Ида әва се сал ә әз тем кӧ бәре ве дара һежире бьвиньм, ле мьн тьштәк нәдитийә. Әве бьбьрʹә! Чьма бадиһәԝа щи гьртийә?› 8 Рʹәзван ԝирʹа гот: ‹Ахайе мьн, ве даре саләке жи бьһелә. Әзе дора ԝе бькʹольм у пʹәйн бькьме. 9 Һәрге паше әԝ бәр бьдә, баш ә, ле һәрге бәр нәдә, һьнге бьбьрʹә›».

10 Иса рʹожәкә Шәмийе* кʹьништеда* һин дькьр. 11 Ԝедәре жьнәк һәбу, йа кӧ 18 сала нәхԝәш бу, чьмки әԝ бьн һʹӧкӧме щьнда бу. Пьшта ԝе ԛуз бьбу, у әԝе нькарьбу хԝә рʹаст кьра. 12 Гава Иса әԝ дит, жерʹа гот: «Тӧ жь нәхԝәшийа хԝә ԛәнщ буйи». 13 У әԝи дәсте хԝә дани сәр ԝе, у жьньке дәрберʹа пьшта хԝә рʹаст кьр у дәстпекьр пәсьне Хԝәде бьдә. 14 Ле сәрԝере кʹьниште хԝәш нәһат кӧ Иса рʹожа Шәмийе ԛәнщ кьр, у әԝи щьмәʹтерʹа гот: «Шәш рʹож бона шьхӧлкьрьне һәнә, ләма ԝан рʹожада ԝәрен хԝә ԛәнщ кьн, нә кӧ рʹожа Шәмийе». 15 Ле Хӧдан щаба ԝи да: «Дӧрʹуно! Һәр кәс жь ԝә рʹожа Шәмийе га йан кʹәре хԝә жь афьрʹ вәнакә у набә сәр аве? 16 Ле әв жьньк, кӧ ԛиза Бьраһим ә, у Шәйтʹан әԝ 18 сала гьредабу, гәрәке рʹожа Шәмийе жь ве ԛәйде аза нәбуйа?» 17 Гава әԝи әв тьшт готьн, һʹәму нәйаред ԝи шәрм кьрьн, ле тʹәмамийа щьмәʹте гәләк ша дьбу бона ԝан кьред ԝийә һʹӧжмәкʹар.

18 Паше әԝи бәрдәԝам кьр гот: «Пʹадшатийа Хԝәде мина чь йә, у әз бәрамбәри чь бькьм? 19 Әԝ мина тʹохьме хәрдале йә, йе кӧ мәрьвәки әʹрде хԝәда чандьбу. Әԝ мәзьн бу у бу дар, у чʹьвикед әʹзмана нав чʹьԛьлед ԝеда һелунед хԝә чекьрьн».

20 У әԝи диса гот: «Әз Пʹадшатийа Хԝәде бәрамбәри чь бькьм? 21 Әԝ мина һәвиртьрʹшк ә, кӧ кʹӧлфәтәке һьлда у кьрә нава се чап* ар, һәвир стьра, һʹәта кӧ тʹәмамийа һәвир һьлат».

22 Гава Иса дьчу Оршәлиме, әԝ гӧнд у бажарарʹа дәрбаз дьбу у мәрьв һин дькьрьн. 23 Мәрьвәки ԝирʹа гот: «Хӧдан, әԝед кӧ ԝе хьлаз бьн, һьндьк ьн?» Әԝи ԝанрʹа гот: 24 «Һʹәму ԛәԝата хԝә бьдьнә хәбате, кӧ һун дәре тәнгрʹа бькʹәвьнә һьндӧрʹ, чьмки әз ԝәрʹа дьбежьм, гәләк кәс ԝе хирәт бькьн кӧ бькʹәвьне, ле ԝе нькарьбьн. 25 Гава хԝәйе мале рʹабә дәри дадә, һуне дәрва бьсәкьньн, дәри хьн у бежьн: ‹Хӧдан, дәри ль мә вәкә›. Ле әԝе ԝәрʹа бежә: ‹Әз ньзаньм һун кʹи нә›. 26 Һьнге һуне бежьн: ‹Мә бәр тә дьхԝар у вәдьхԝар, у тә кʹучʹед сәрәкәда әм һин дькьрьн›. 27 Ле әԝе ԝәрʹа бежә: ‹Әз ньзаньм һун кʹи нә. Жь мьн дур кʹәвьн, һун һʹәмуйед кӧ нәһәԛийе дькьн!› 28 Гава һун бьвиньн кӧ Бьраһим, Исһаԛ, Аԛуб у һʹәму пʹехәмбәр Пʹадшатийа Хԝәдеда ньн, ле һун дәрва ньн, һуне бьгьрин* у ԝе чʹьркә-чʹьрка дьранед ԝә бьн. 29 Мәрьв жь рʹоһьлате у рʹоавайе, жь бакӧре у башуре жи ԝе бен у Пʹадшатийа Хԝәдеда бәр сьфре рʹунен. 30 Һьнә кәсед пашьн ԝе бьбьнә йед пешьн, у һьнә кәсед пешьн ԝе бьбьнә йед пашьн».

31 Һәма ве сьһʹәте һьнә Ферьси һатьнә бал Иса у ԝирʹа готьн: «Рʹабә жь вьр һәрʹә, чьмки Һеродәс дьхԝазә тә бькӧжә». 32 Әԝи ԝанрʹа гот: «Һәрʹьн у ԝи рʹувийирʹа бежьн: ‹Иро у сьбе әз щьна дәрдьхьм у нәхԝәша ԛәнщ дькьм, у рʹожа сьсийада шьхӧле мьн ԝе хьлаз бә›. 33 Ле гәрәке әз иро, сьбе у дӧсьбә шьхӧле хԝә бәрдәԝам кьм, чьмки набә кӧ пʹехәмбәрәк жь Оршәлиме дәр, бе кӧштьне. 34 Ԝах Оршәлим, Оршәлим, тӧ пʹехәмбәра дькӧжи у йед кӧ һатьнә шандьне щәм тә, дьди бәр кәвьра! Чәнд щара мьн дьхԝәст зарʹед тә тʹоп кьра, чаԝа кӧ мьришк щущукед хԝә бьн пʹәрʹе хԝәда тʹоп дькә! Ле ԝә нәхԝәст. 35 Ләма мала ԝә ԝе ԝеран бьминә.* Әз ԝәрʹа дьбежьм, һуне мьн ида нәвиньн һʹәта һун бежьн: ‹Кʹәрәмкьри йә әԝе кӧ бь наве Йаһоԝа те!›»

14 Щарәке рʹожа Шәмийе,* Иса чу мала сәрԝерәки Ферьсийа кӧ хԝарьне бьхԝә, у чʹәʹве мәрьва сәр ԝи бу. 2 Ԝедәре пешбәри ԝи мәрьвәки бь нәхԝәшийа авзе* һәбу. 3 Иса жь ԝан, йед кӧ Ԛанун рʹьнд заньбун у жь Ферьсийа пьрси: «Изьн ә кӧ рʹожа Шәмийе нәхԝәша ԛәнщ кьн, йан на?» 4 Ле ԝана дәнге хԝә нәкьр. Һьнге әԝи дәсте хԝә да ԝи мәрьви, әԝ ԛәнщ кьр у бәрʹда. 5 Паше әԝи жь ԝан пьрси: «Һәрге кӧрʹе ԝә йан гайе ԝә рʹожа Шәмийе бькʹәвә бирәке, гәло кʹи жь ԝә ԝе дәрберʹа ԝи дәрнәхә?» 6 Ԝана нькарьбу щаба пьрса ԝи бьда.

7 Гава чʹәʹве ԝи чу сәр меванед кӧ щийед һәри баш дьгәрʹийан, ԝанрʹа мәсәлә гот: 8 «Гава кәсәк тә тʹәглифи дәʹԝате дькә, ль щийе һәри баш рʹунәне. Дьԛәԝьмә йәки жь тә дьһа хԝәйиԛәдьр жи һатийә тʹәглифкьрьне. 9 Һьнге кәсе кӧ гази ԝә һәрда кьрийә ԝе бе у тәрʹа бежә: ‹Бьра әв мәрьв ль щийе тә рʹуне›. Һьнге тӧйе жь шәрма хԝә рʹаби у дәрбази щийе пашьн би. 10 Ле чахе тӧ тейи тʹәглифкьрьне, һәрʹә ль щийе пашьн рʹуне. Һьнге кәсе кӧ тӧ тʹәглиф кьри ԝе бе у тәрʹа бежә: ‹Һәвало, һәрʹә дәрбази щийе һе баш бә›. У бәр һʹәму мевана ԝе ԛәдьре тә бьльнд бә. 11 Чьмки һәр кәсе кӧ хԝә бьльнд дькә, ԝе бе ньмьзкьрьне. У һәр кәсе кӧ хԝә ньмьз дькә, ԝе бе бьльндкьрьне».

12 Паше Иса ԝи мәрьвирʹа, йе кӧ әԝ тʹәглифи мала хԝә кьрьбу, гот: «Гава тӧ хԝарьна нивро йан шиве датини, гази һәвал, бьра, мәрьвед хԝә йан щинаред хԝәйи дәԝләти нәкә. Чьмки дьбәкә әԝана жи тә тʹәглифи сәр хԝарьне кьн у ԛәнщийа тә ль тә вәгәрʹиньн. 13 Ле гава тӧ сьфрәке датини, гази фәԛира, сәԛәта, тʹопала у кора бькә. 14 Һьнге тӧйе бәхтәԝар би, чьмки тьштәки ԝан тʹӧнә кӧ ль тә вәгәрʹиньн. У ԝәʹде рʹабуна кәсед рʹаст жь мьрьне, ԝе ль тә бе вәгәрʹандьне».

15 Меванәки кӧ әв тьшт бьһистьн ԝирʹа гот: «Чьԛас бәхтәԝар ә кәсе кӧ Пʹадшатийа Хԝәдеда нан дьхԝә».

16 Иса ԝирʹа гот: «Мәрьвәки шивәкә мәзьн һазьр кьр у гәләк кәс тʹәглиф кьрьн. 17 Гава ԝәхте шиве һат, әԝи хӧламе хԝә шанд ԝәки йед тʹәглифкьрирʹа бежә: ‹Ԝәрен, ида һәр тьшт һазьр ә›. 18 Ле ԝан һʹәмушка жи мәʹни гьрт. Йе пешьн ԝирʹа гот: ‹Мьн хԝәрʹа әʹрд кʹьрʹийә, әз гәрәке һәрʹьм у ле бьньһерʹьм. Жь кʹәрәма хԝә бьбахшинә мьн›. 19 Йәки дьн гот: ‹Мьн хԝәрʹа пенщ щот га кʹьрʹийә, у әз дьхԝазьм ԝана бьщерʹьбиньм. Жь кʹәрәма хԝә бьбахшинә мьн›. 20 У йәки дьн жи гот: ‹Әз тʹәзә зәԝьщи мә, ләма әз нькарьм бем›. 21 Хӧлам вәгәрʹийа у һәр тьшт ахайе хԝәрʹа гот. Һьнге аха һерс кʹәт у хӧламе хԝәрʹа гот: ‹Зу һәрʹә кʹучʹед сәрәкә у кʹучʹед бьчʹукә бажер, у кәсед фәԛир, сәԛәт, кор у тʹопал бинә вьр›. 22 Гава хӧлам вәгәрʹийа, гот: ‹Ахайе мьн, мьн фәрмана тә ани сери, ле диса щи һәйә›. 23 У аха жи ви хӧламирʹа гот: ‹Дәркʹәвә сәре рʹийед жь бажер дәр, у зоре ль хәлԛе бькә кӧ әԝана бен, ԝәки мала мьн тʹьжә бә. 24 Әз ԝәрʹа дьбежьм, жь ԝан йед кӧ пешийе һатьбун тʹәглифкьрьне, тʹӧ кәс ԝе шива мьн тәʹм нәкә›».

25 Әʹлаләтәкә гьран тʹәви Иса дьчу, у әԝ зьвьрʹи ԝанрʹа гот: 26 «Һәрге кәсәк те бал мьн, у баве хԝә, дайика хԝә, жьна хԝә, зарʹед хԝә, хушк-бьред хԝә, у һәла һе жийина хԝә жи жь мьн зедәтьр һʹәз дькә,* әԝ нькарә бьбә шагьрте мьн. 27 Кәсе кӧ стуна хԝәйә щәфе һьлнәгьрә у пәй мьн нәйе, әԝ нькарә бьбә шагьрте мьн. 28 Мәсәлә, һәрге кәсәк жь ԝә бьхԝазә бьрщәке ава кә, гәло ԝе пешийе рʹунәне у хәрщ һʹәсаб нәкә, кӧ бьвинә һәла пʹәре ԝи тʹере дькә, ԝәки авакьрьне хьлаз кә? 29 Һәрге әԝ ӧса нәкә, әԝ дьбәкә һʹим дайнә, ле нькарьбә авакьрьне хьлаз кә у һʹәмуйед кӧ бьвиньн, ԝе ԝи бькʹәньн, 30 у бежьн: ‹Әԝи мәрьви авакьрьн дәстпекьр, ле нькарьбу хьлаз кә›. 31 Йан жи гәло кʹижан пʹадша, пешийа кӧ мьԛабьли пʹадшаки дьн дәркʹәвә кӧ шәрʹ бькә, рʹунәне у нәшеԝьрә,* һәла әԝ дькарә пе 10 000 әскәра дәре мьԛабьли ԝи, йе кӧ пе 20 000 әскәра те сәр ԝи? 32 Һәрге әԝ нькарьбә, һʹәта һе пʹадше дьн дур ә, әԝе ԛасьда бьшинә, ԝәки әʹдьлайе бьхԝазә. 33 Бь ви щурʹәйи, тʹӧ кәс нькарә бьбә шагьрте мьн, һәрге дәсте хԝә жь тʹәмамийа һәбуна хԝә нәкʹьшинә.

34 Бь рʹасти, хԝе тьштәки баш ә. Ле һәрге хԝе тәʹма хԝә ӧнда кә, әԝе чаԝа диса шорʹ бә? 35 Әв хԝе нә кери әʹрде те, нә жи кери пʹәйн те. Әԝ те авитьне. Гӧһед кʹе һәнә, бьра бьбьһе».

15 Аԝа һʹәму хәрщгьр у гӧнәкʹар дәр-доре Иса тʹоп дьбун, ԝәки гӧһ бьдьнә ԝи. 2 Ле һьм Ферьси у һьм ԛанунзана дькьрьнә кӧтә-кӧт у дьготьн: «Әв мәрьв гӧнәкʹара ԛәбул дькә у тʹәви ԝан хԝарьне дьхԝә». 3 Һьнге Иса әв мәсәлә ԝанрʹа гьли кьр: 4 «Жь ԝә кʹи йә, йе кӧ 100 пәзед ԝи һәбьн у гава йәки жь ԝан ӧнда кә, 99 пәзед дьн чоле нәһелә у пәза ӧндабуйи нәгәрʹә, һʹәта кӧ ԝе бьвинә? 5 У гава әԝ бьвинә, ԝе ша бә у бьдә сәр мьле хԝә. 6 У чахе әԝ вәгәрʹә мал, ԝе гази һәвал у щинаред хԝә бькә у ԝанрʹа бежә: ‹Тʹәви мьн ша бьн, чьмки мьн пәза хԝәйә ӧндабуйи дитийә›. 7 Әз ԝәрʹа дьбежьм, ӧса жи ль әʹзмен бона гӧнәкʹарәки кӧ тʹобә дькә, ԝе шабунәкә һе мәзьн бә, нә кӧ бона 99 кәсед рʹаст, кʹижанарʹа тʹобәкьрьн нәлазьм ә.

8 Йан жи, һәрге кʹӧлфәтәк кӧ дәһ драһмед* ԝе һәбьн, у әԝ йәки ӧнда кә, гәло әԝе чʹьре венәхә, мала хԝә гези нәкә у рʹьнд ле нәгәрʹә һʹәта бьвинә? 9 У гава әԝ бьвинә, әԝе гази һәвал у щинаред хԝә бькә у бежә: ‹Тʹәви мьн ша бьн, чьмки мьн драһме хԝәйи ӧндакьри дит›. 10 Әз ԝәрʹа дьбежьм, мәләкед Хԝәде жи ӧса ша дьбьн гава гӧнәкʹарәк тʹобә дькә».

11 Паше Иса гот: «Дӧ кӧрʹед мәрьвәки һәбун. 12 Кӧрʹе бьчʹук баве хԝәрʹа гот: ‹Баво, жь һәбука хԝә чь кӧ пʹара мьн дькʹәвә, бьдә мьн›. Һьнге бав ԝанрʹа һәбук пʹарәвәкьр. 13 Чәнд рʹож шунда, кӧрʹе бьчʹук һʹәму тьштед хԝә тʹоп кьр у чу ԝәлатәки дур. Ԝедәре әԝи бь жийинәкә нәщайиз* дьжит у һʹәму һәбука хԝә пʹучʹ кьр. 14 Чахе әԝи һәр тьште хԝә хәрщ кьр, тʹәмамийа ԝи ԝәлатида хәлайикә мәзьн дәстпебу, у әԝ кʹәтә һʹаләки гьран. 15 Әԝ чу бал бьнәлики ԝи ԝәлати, у әԝи мәрьви әԝ шандә дәштед хԝә ԝәки хьнзира* бьчʹеринә. 16 Һʹьзрәта ԝи бу кӧ хԝә һәма пе хӧрәке хьнзира тʹер кьра. Ле тʹӧ кәси тьштәк нәдьда ԝи.

17 Гава һʹьше ԝи һатә сәре ԝи, әԝи гот: ‹Һаԛас пʹалед баве мьн һәнә кӧ тʹер-тʹьжә нане ԝан һәйә, ле әз вьра бьрʹчина дьмьрьм! 18 Әзе рʹабьм һәрʹьм щәм баве хԝә у ԝирʹа бежьм: «Баво, мьн бәр Хԝәде* у бәр тә гӧнә кьрийә. 19 Әз ида нә һежа мә кӧрʹе тә бемә һʹәсабе. Мьн мина пʹаләки хԝә ԛәбул кә»›. 20 Ләма жи әԝ рʹабу чу бал баве хԝә. Гава әԝ һе рʹеда бу, бав әԝ жь дурва дит у дьле ԝи сәр шәԝьти, бь ләз чу пешийа ԝи, әԝ һʹәмез кьр* у пачʹ кьр. 21 Һьнге кӧрʹ баве хԝәрʹа гот: ‹Баво, мьн бәр Хԝәде у бәр тә гӧнә кьрийә. Әз ида нә һежа мә кӧрʹе тә бемә һʹәсабе›. 22 Ле бав хӧламед хԝәрʹа гот: ‹Зу һәрʹьн кʹьнще һәри баш биньн у ль ԝи бькьн. Гӧстилке текьнә тʹьлийа ԝи, у сола бькьнә ньга. 23 Голькәки кʹозикьри биньн у сәржекьн, әм бьхԝьн у ша бьн, 24 чьмки кӧрʹе мьн мьри бу у вәгәрʹийа жийине, әԝ ӧндабуйи бу у һатә дитьне›. У ԝана дәстпекьр ша бьн.

25 Ԝе дәме кӧрʹе ԝийи мәзьн ль зәвийе бу. Гава әԝ вәгәрʹийа у незики мале бу, дәнге стьран у рʹәԛасе бьһист. 26 Әԝи гази хӧламәки кьр у же пьрси, кӧ чь дьԛәԝьмә. 27 Хӧлам жи гот: ‹Бьре тә һатийә у баве тә гольке кʹозикьри сәржекьрийә, чьмки әԝ сах у сьламәт вәгәрʹийа›. 28 Ле әԝ һерс кʹәт у нәхԝәст бькʹәвә мале. Һьнге баве ԝи дәркʹәт у лава ԝи кьр. 29 Ле әԝи баве хԝәрʹа гот: ‹Әва чьԛас сал ә әз тәрʹа хӧламтийе дькьм, у мьн тʹьме гӧрʹа тә кьрийә. Ле тә ԛә карькәк жи нәдайә мьн, ԝәки мьн тʹәви һәвалед хԝә кʹеф кьра. 30 Ле һәма ча әв кӧрʹе тә һат, йе кӧ тʹәви ԛава һәбука тә пʹучʹ кьр, тә бона ԝи гольке кʹозикьри сәржекьр›. 31 Һьнге бав жерʹа гот: ‹Кӧрʹе мьн, тӧ һәртʹьм тʹәви мьн и, у һәр тьште мьн, йе тә йә. 32 Ле әм гәрәке әшԛ у ша бьн, чьмки бьре тә мьри бу у вәгәрʹийа жийине, әԝ ӧндабуйи бу у һатә дитьне›».

16 Паше Иса шагьртед хԝәрʹа гот: «Мәрьвәки дәԝләти һәбу. У ԝирʹа готьн, кӧ хӧламе мала ԝи* һәбука ԝи хәрщ дькә. 2 Әв мәрьве дәԝләти гази ԝи кьр у готе: ‹Әв чь гьли нә әз дәрһәԛа тә дьбьһем? Һʹәсабе шьхӧле хԝә бьдә, чьмки тӧ ида нькари рʹебәрийа мале бьки›. 3 Һьнге әԝи хӧлами дьле хԝәда гот: ‹Әз чь бькьм? Ахайе мьн шьхӧле рʹебәрийа мале жь мьн дьстинә. Ԛәԝата мьн нагьһижә әʹрдкʹолане, у әз шәрм дькьм пʹарсе жи бькьм. 4 Аһа! Әз заньм әзе чь бькьм, ԝәки мәрьв мьн ԛәбули малед хԝә бькьн гава әз бемә дәрхьстьне›. 5 У әԝи йәк-йәк гази дәйндаред ахайе хԝә кьр, у йе пешьнрʹа гот: ‹Тӧ чьԛас дәйндаре ахайе мьн и?› 6 Әԝи гот: ‹Сәд батʹ* бьзьре зәйтʹуне›. Әԝи жи жерʹа гот: ‹Һан ньвисара пәймана хԝә һьлдә, рʹуне у зу бьньвисә 50›. 7 Паше әԝи йе дьнрʹа гот: ‹Ле тӧ чьԛас дәйндар и?› Әԝи гот: ‹Сәд ԛор* гәньм›. Әԝи жи жерʹа гот: ‹Һан ньвисара пәймана хԝә һьлдә у бьньвисә 80›. 8 У аха пʹайе хӧламе хԝәйи нәамьн да, ԝәки әԝи бь аԛьлайи кьр. Чьмки мәрьвед ве дьнйайе,* чахе тʹәви ньсьле хԝә шьхӧл дькьн, жь хьзмәткʹаред Хԝәде* сәрԝахттьр ьн.

9 Әз ԝәрʹа дьбежьм: Бь сайа һәбука ве дьнйа нәһәԛ хԝәрʹа һәвала ԛазанщ кьн, чьмки гава әԝ һәбук нәминә, әԝ һәвал ԝе ԝә ль щийед һʹәта-һʹәтайе ԛәбул кьн. 10 Йе кӧ тьштед бьчʹукда амьн ә, тьштед мәзьнда жи амьн ә, у йе кӧ тьштед бьчʹукда нәамьн ә, тьштед мәзьнда жи нәамьн ә. 11 Ләма жи, һәрге һун һьндава һәбука ве дьнйа нәһәԛ нәамьн ьн, кʹи ԝе рʹастийе бьсперә ԝә? 12 У һәрге һун һьндава тьштед кәсед дьн нәамьн ьн, кʹи ԝе тьште кӧ бона ԝә һатийә һазьркьрьне бьдә ԝә? 13 Тʹӧ хӧлам нькарә дӧ ахарʹа хӧламтийе бькә. Чьмки әԝ ԝе йәки нәфрʹәт кә у йе дьн һʹәз бькә, йан жи йәкирʹа амьн бә у ԛәдьре йе дьн нәгьрә. Һун нькарьн һьм хӧламед Хԝәде бьн, һьм жи хӧламед һәбуке бьн».

14 Ферьсийед пʹәрәһʹәз кӧ әв йәк дьбьһистьн, дәстпекьрьн ԛәрфе хԝә ԝи бькьн. 15 Һьнге әԝи ԝанрʹа гот: «Һун хԝә бәр хәлԛе ӧса дьдьнә кʹьфше кӧ һун мәрьвнә рʹаст ьн, ле Хԝәде дьле ԝә занә. Тьште кӧ нав мәрьвада ԛимәт ә, бәр чʹәʹве Хԝәде һʹәрам ә.

16 Ԛанун у Ньвисаред Пʹехәмбәра пешийа Йуһʹәнна һәбун. Жь ԝьр шунда мьзгинийа дәрһәԛа Пʹадшатийа Хԝәде те бәлакьрьне, у һәр щурʹә мәрьв хирәт дькә кӧ бькʹәве. 17 Бь рʹасти дьһа һеса йә кӧ әʹрд у әʹзман бәтавәбьн, нә кӧ хәзәкә һʹәрфе жь Ԛануне нәйе сери.

18 Һәр кәсе кӧ жьна хԝә бәрʹдә у йәкә дьн бьстинә, ԛавийе дькә. У һәр кәсе кӧ жьна бәрʹдайи бьстинә, ԛавийе дькә.

19 Мәрьвәки дәԝләти һәбу, йе кӧ кʹьнщед бьһа* ль хԝә дькьр, у һәр рʹож бь кʹеф у шайи дәԝләтийеда дьжит. 20 У мәрьвәки пʹарсәкчи, наве кʹижани Лазар бу, дьанинә бәр дәргәһе ԝи. Бәдәна ԝи тʹьжи пʹьзьк бу,* 21 у әԝи дьхԝәст бь тьштед кӧ жь сьфра мәрьве дәԝләти дькʹәтьнә әʹрде, хԝә тʹер кьра. У һәла һе кучʹьк жи дьһатьн у пʹьзькед ԝи даластьн. 22 Ԝәʹдә шунда, әв мәрьве пʹарсәкчи мьр у мәләка әԝ бьрьнә щәм Бьраһим.

Әв мәрьве дәԝләти жи мьр у һатә чʹәʹлкьрьне. 23 Гава әԝ Горʹеда* дьчәрчьри, чʹәʹве хԝә һьлбьрʹи, дурва Бьраһим у кʹеләка ԝи* Лазар дит. 24 Һьнге әԝи кьрә гази у гот: ‹Йа баво Бьраһим, гӧне хԝә мьн бинә,* Лазар бьшинә, ԝәки әԝ тʹьлийа хԝә аведа шьл кә у зьмане мьн һеньк кә, чьмки әз нав ви агьре гӧрʹда дьчәрчьрьм›. 25 Ле Бьраһим гот: ‹Лаԝо, бинә бира хԝә кӧ тә әʹмьре хԝәда, жь гәләк тьштед баш ләзәт дитийә, ле Лазар нава зәлулийеда буйә. Ньһа жи әԝ вьра бәрдьлийе дьстинә, ле тӧ дьчәрчьри. 26 Хенщи ԝе йәке, ортʹа мә у ԝәда гәлики мәзьн ә. Йед кӧ дьхԝазьн жь вьр дәрбази щәм ԝә бьн, нькарьн, у йед кӧ дьхԝазьн жь ԝедәре дәрбази щәм мә бьн, нькарьн›. 27 Һьнге йе дәԝләти гот: ‹Баво, һәрге ӧса йә, әз жь тә рʹәща дькьм, ԝи бьшинә мала баве мьн. 28 Пенщ бьред мьн һәнә, бьра әԝ ԝанрʹа пешда бежә, ԝәки әԝана жи нәкʹәвьнә ви щийе чәрчьрандьне›. 29 Ле Бьраһим гот: ‹Муса у Пʹехәмбәред ԝан һәнә, бьра гӧһ бьдьнә ԝан›. 30 Һьнге әԝи гот: ‹На, баво Бьраһим, әԝе һьнге тʹобә кьн һәрге йәк жь нава мьрийа һәрʹә бал ԝан›. 31 Ле Бьраһим готә ԝи: ‹Һәрге әԝана гӧрʹа Муса у Пʹехәмбәра накьн, йәк жь нава мьрийа рʹабә жи, әԝе баԝәр нәкьн›».

17 Һьнге әԝи шагьртед хԝәрʹа гот: «Ԝе сәбәбед лькʹӧмандьне тʹьме һәбьн. Ле ԝәй ль ԝи мәрьви, йе кӧ дьбә сәбәбе ве йәке! 2 Бона ԝи һе баш ә кӧ кәвьрәки мәзьн* стуйе ԝива бе гьредане у әԝ бе авитьне нава бәʹре, нә кӧ әԝ жь ван бьчʹука йәки жь рʹе дәрхә. 3 Һаж хԝә һәбьн. Һәрге бьре тә һьмбәри тә гӧнә бькә, гӧне ԝи ԝирʹа әшкәрә кә, у һәрге әԝ тʹобә кә, бьбахшинә ԝи. 4 Һәрге жи әԝ рʹожәкеда һʹәфт щара һьмбәри тә гӧнә бькә у һʹәфт щара вәгәрʹә бал тә у бежә, ‹Әз тʹобә дькьм›, гәрәке тӧ ԝи бьбахшини».

5 Шандийа Хӧданрʹа готьн: «Баԝәрийа мә зедә кә». 6 Һьнге Хӧдан гот: «Һәрге баԝәрийа ԝә һәма ԝәкә тʹохьмәки хәрдале буйа, ԝәйе ве дара тʹутерʹа бьгота, ‹Кʹокева рʹабә у хԝә бәʹреда дачʹькинә!›, у әԝе ԝе гӧрʹа ԝә бькьра.

7 Һәрге хӧламәки ԝә һәбә, йе кӧ щоткʹарийе йан шьвантийе дькә, у әԝ жь зәвийе вәгәрʹә мале, ԛә кʹи жь ԝә ԝе ԝирʹа бежә, ‹Зу ԝәре у бәр сьфре рʹуне›? 8 Әԝе жерʹа нәбежә ‹Сәва мьн шиве һазьр кә, шальке бьдә бәр хԝә у бәрдәстийе мьнрʹа бькә, һʹәта әз дьхԝьм у вәдьхԝьм, у паше тӧ дькари бьхԝи у вәхԝи›? 9 Гәло әԝе ԝи хӧламирʹа шекьрдар бә, сәва ԝе йәке кӧ әԝи шьхӧле кӧ жерʹа һатә дайине, ани сери? 10 Һун жи, гава һʹәму шьхӧлед кӧ ԝәрʹа һатьнә дайине, биньн сери у бежьн: ‹Әм хӧламед бекер ьн. Чь кӧ ль мә дькʹәт, мә кьр›».

11 Гава Иса дьчу Оршәлиме, әԝ нав Самәрйайерʹа у Щәлилерʹа дәрбаз дьбу. 12 Гава әԝ дькʹәтә гӧндәки, дәһ мәрьвед кʹоти рʹасти ԝи һатьн, ле дур сәкьнин. 13 У ԝана бь дәнгәки бьльнд гот: «Иса, Дәрсдар, гӧне хԝә мә бинә!»* 14 Гава әԝи әԝана дитьн, ԝанрʹа гот: «Һәрʹьн у хԝә нишани кʹаһина бькьн». У чахе әԝана һе рʹеда бун, ԛәнщ бун.* 15 Жь ԝана йәки гава дит кӧ әԝ ԛәнщ буйә, вәгәрʹийа у бь дәнгәки бьльнд пәсьне Хԝәде дьда. 16 Әԝи хԝә авитә бәр ньгед Иса у рʹазибуна хԝә дьда ԝи. Әԝ Самәри бу. 17 Һьнге Иса гот: «Нә һәр дәһ жи ԛәнщ бун, ле нәһед дьн кʹидәре нә? 18 Пештьри ԝи мәрьве жь мьләтәки дьн, тʹӧ кәс вәнәгәрʹийа, ԝәки пәсьне Хԝәде бьдә?» 19 Паше әԝи жерʹа гот: «Рʹабә һәрʹә. Баԝәрийа тә тӧ ԛәнщ кьри».

20 Гава Ферьсийа жь Иса пьрсин кӧ Пʹадшатийа Хԝәде ԝе кʹәнге бе, әԝи ԝанрʹа гот: «Пʹадшатийа Хԝәде ԝе бь щурʹе әшкәрә нәйе, 21 мәрьв жи ԝе нәбежьн, ‹Бьньһерʹьн, вьра йә!›, йан ‹Бьньһерʹьн, ԝедәре йә!› Чьмки ва Пʹадшатийа Хԝәде нав ԝәда йә».

22 Паше әԝи шагьртед хԝәрʹа гот: «Рʹож ԝе бен, гава һун һʹьзрәт бьн кӧ рʹожәкә Кӧрʹе инсен бьвиньн, ле һуне нәвиньн. 23 У мәрьв ԝе ԝәрʹа бежьн, ‹Бьньһерʹьн, ԝедәре йә!›, йан ‹Бьньһерʹьн, вьра йә!› Дәрнәкʹәвьн у пәй ԝан нәчьн. 24 Чьмки чаԝа кӧ бьруск жь алики әʹзмен һʹәта алийе дьн рʹонайе дьдә, Кӧрʹе инсен жи ԝе рʹожа хԝәда ӧса бә. 25 Ле пешийе, әԝ гәрәке гәләк щәфа бькʹьшинә у алийе ви ньсьлида бе инкʹаркьрьне. 26 Чаԝа рʹожед Нӧһда бу, ӧса жи ԝе рʹожед Кӧрʹе инсенда бә: 27 Мәрьва дьхԝар у вәдьхԝарьн, дьзәԝьщин у мер дькьрьн, һʹәта ԝе рʹожа кӧ Нӧһ кʹәтә гәмийе, у Тофан* рʹабу ԛьрʹа һʹәмуйа ани. 28 Рʹожед Лутда жи ӧса бу: Мәрьва дьхԝар у вәдьхԝарьн, дькʹьрʹин, дьфьротьн, дьчандьн у ава дькьрьн. 29 Ле әԝ рʹожа кӧ Лут жь Содоме дәркʹәт, агьр у кʹьркʹут жь әʹзмен бари, у ԛьрʹа һʹәмуйа ани. 30 Ԝе рʹоже жи, гава Кӧрʹе инсен әʹйан бә, ԝе ӧса бә.

31 Ԝе рʹоже, йе кӧ сәр бани бә, бьра данәкʹәвә, ԝәки тьштед хԝә жь мале һьлдә. У ӧса жи, йе кӧ дәрва нав зәвийеда бә, гәрәке пашда вәнәгәрʹә. 32 Жьна Лут биньн бира хԝә. 33 Йе кӧ дьхԝазә әʹмьре хԝә хьлаз кә, әԝе ԝи ӧнда кә. Ле йе кӧ әʹмьре хԝә ӧнда кә, әԝе ԝи хьлаз кә. 34 Әз ԝәрʹа дьбежьм, ԝе шәве дӧ кәс ԝе нав ньвинәкеда бьн, йәк ԝе бе һьлдане, ле йе дьн ԝе бе һиштьне. 35 Дӧ кʹӧлфәт ԝе гәньм бьһерьн, йәк ԝе бе һьлдане у йа дьн ԝе бе һиштьне». 36* —— 37 Шагьрта жи жь ԝи пьрсин: «Кʹидәре, Хӧдан?» Әԝи ԝанрʹа гот: «Щьнйаз* кʹидәре бә, ԝе тәйр жи ԝедәре тʹоп бьн».

18 Паше Иса ԝанрʹа мәсәләк ани, кӧ чьԛас фәрз ә әԝана һәртʹьм дӧа бькьн у дьлтәнг нәбьн. 2 Әԝи гот: «Бажарәкида һʹакьмәк һәбу, йе кӧ нә жь Хԝәде дьтьрсийа у нә жи ԛәдьре мәрьва дьгьрт. 3 Ви бажарида жьнәбик жи һәбу, йа кӧ һәр гав дьчу бал ԝи у ԝирʹа дьгот: ‹Һәԛийе бькә, мьн жь дәсте нәйаре мьн хьлаз кә›. 4 Ԝәʹдәке әԝи нәдьхԝәст, ле паше хԝәрʹа гот: ‹Әз нә жь Хԝәде дьтьрсьм, у нә жи ԛәдьре мәрьва дьгьрьм, 5 ле чьмки әв жьнәби зәʹмәте дьдә мьн, әзе һәԛийе жерʹа бькьм, ԝәки әԝ һәр гав нәйе у пе хԝәстьна хԝә мьн әʹщьз нәкә›». 6 Паше Хӧдан гот: «Рʹаст ә әв һʹакьм нәһәԛ ә, ле ԝә дина хԝә дайе әԝи чь гот? 7 Гәло Хԝәде жи бьжартийед хԝәрʹа, йед кӧ шәв у рʹож һәԝар-газийа хԝә ԝи дькьн, ԝе һәԛийе нәкә ԝи ԝәʹдәйида кӧ әԝ һьндава ԝанда бь сәбьр ә? 8 Әз ԝәрʹа дьбежьм, әԝе дәрберʹа бона ԝан һәԛийе бькә. Ле гава Кӧрʹе инсен бе, гәло әԝе баԝәрийа ӧса* сәр әʹрде бьвинә?»

9 Ле Иса ԝанрʹа, йед кӧ рʹастийа хԝәда баԝәр бун у мәрьвед дьн бәр тьштәки һʹәсаб нәдькьрьн, әв мәсәлә гот: 10 «Дӧ мәри һьлкʹьшийанә пʹарьстгәһе, ԝәки дӧа бькьн. Йәк Ферьси бу, йе дьн жи хәрщгьр. 11 Йе Ферьси сәкьни бу у дьле хԝәда ӧса дӧа дькьр: ‹Йа Хԝәде, әз шекьрдар ьм кӧ әз мина мәрьвед дьн ниньм; йед кӧ тʹаланийе, нәһәԛийе, йан зьнекʹарийе дькьн, у нә жи мина ви хәрщгьри мә. 12 Әз һʹәфтийе дӧ щара рʹожи дьгьрьм у дәһәке* жь һʹәму кʹара хԝә жи дьдьм›. 13 Ле әԝ хәрщгьр дур сәкьни бу, нәԝерьбу ль әʹзмен жи бьньһерʹийа, синге хԝә дьхьст у дьгот: ‹Хԝәде, ль мьн гӧнәкʹари ԝәрә рʹәʹме›. 14 Әз ԝәрʹа дьбежьм, гава әԝ мәрьв вәгәрʹийа мале, чʹәʹве Хԝәдеда дьһа йәки рʹаст бу, нә кӧ Ферьси. Чьмки һәр кәсе кӧ хԝә бьльнд дькә, ԝе бе ньмьзкьрьне. У кәсе кӧ хԝә ньмьз дькә ԝе бе бьльндкьрьне».

15 Мәрьва зарʹед бьчʹук дьанин бал Иса, ԝәки әԝ дәстед хԝә дайнә сәр ԝан, ле гава шагьрта әв йәк дитьн, рʹийа ԝан дьгьртьн. 16 Ле Иса гази зарʹед бьчʹук кьр, у гот: «Бьһельн бьра зарʹ бенә бал мьн. Рʹийа ԝан нәгьрьн, чьмки Пʹадшатийа Хԝәде бона йед мина ԝан ә. 17 Әз рʹаст ԝәрʹа дьбежьм, кәсе кӧ Пʹадшатийа Хԝәде мина зарʹәке ԛәбул нәкә, әԝе тʹӧ щар нәкʹәвә ԝе».

18 Сәрокәки жь ԝи пьрси: «Дәрсдаре ԛәнщ, әз гәрәке чь бькьм, ԝәки жийина һʹәта-һʹәтайе бьстиньм?» 19 Иса ԝирʹа гот: «Тӧ чьма мьнрʹа дьбежи ԛәнщ? Пештьри Хԝәде тʹӧ кәс ԛәнщ нинә. 20 Тӧ ван тʹәмийа зани: ‹Ԛавийе нәкә, нәкӧжә, нәдьзә, шәʹдәтийа дәрәԝ нәдә, ԛәдьре де у баве хԝә бьгьрә›». 21 Һьнге әԝи гот: «Әз жь бьчʹуктайе ван һʹәму тʹәмийа тиньм сери». 22 Гава Иса әв йәк бьһист, жерʹа гот, «Тьштәк тә кем ә: Һʹәму тьштед хԝә бьфьрошә у пʹәра кʹәсибарʹа бәла кә. Һьнге ԝе хьзна тә ль әʹзмана һәбә. У паше пәй мьн ԝәрә». 23 Гава әԝи әв йәк бьһист, гәләк дьлтәнг бу, чьмки зәʹф дәԝләти бу.

24 Иса ль ԝи ньһерʹи у гот: «Дәԝләтийарʹа ԝе чьԛас чәтьн бә бькʹәвьнә Пʹадшатийа Хԝәде! 25 Бь рʹасти, дәвә ԝе ԛӧла дәрзийерʹа дьһа һеса дәрбаз бә, нә кӧ йе дәԝләти бькʹәвә Пʹадшатийа Хԝәде». 26 Кәсед кӧ әв йәк бьһистьн, готьн: «Ида кʹи дькарә хьлаз бә?» 27 Әԝи гот: «Тьштед кӧ бона мәрьва нәбуйи нә, бона Хԝәде дьбә». 28 Ле Пәтрус гот: «Аԝа дәсте мәда чь һәбу, мә һишт у әм пәй тә һатьн». 29 Әԝи ԝанрʹа гот: «Әз рʹаст ԝәрʹа дьбежьм, һәр кәсе кӧ бона хатьре Пʹадшатийа Хԝәде мал, йан жьн, йан бьра, йан де-бав, йан зарʹ һиштийә, 30 әԝе ньһа дьһа зедә бьстинә, у дьнйа тʹәзәда жи жийина һʹәта-һʹәтайе».

31 Паше әԝи Донздәһ* дан алики у ԝанрʹа гот: «Ва әм ньһа һьлдькʹьшьнә Оршәлиме, у һәр тьште кӧ бь дәсте пʹехәмбәра дәрһәԛа Кӧрʹе инсен һатьнә ньвисаре, ԝе бенә сери. 32 Ԝе ԝи бьдьнә дәсте мәрьвед жь мьләтед дьн, ԝе ԛәрфед хԝә ԝи бькьн, ԝи беһӧрмәт кьн у тʹуйи ԝи бькьн. 33 У паши ве йәке гава ԝи бьдьнә бәр ԛамчийа, ԝе ԝи бькӧжьн. Ле рʹожа сьсийа ԝе жь мьрьне бе рʹакьрьне». 34 Ԝана мәʹна ван гьлийа фәʹм нәкьр, чьмки әв йәк жь ԝан вәшарти бу.

35 Чахе Иса незики Әриһайе бу, мәрьвәки кор кʹеләка рʹе рʹуньшти бу у пʹарс дькьр. 36 Гава әԝи бьһист кӧ гәләк мәрьв дәрбаз дьбьн, дьпьрси һәла чь дьԛәԝьмә. 37 Ԝирʹа готьн: «Исайе Ньсрәти дәрбаз дьбә!» 38 Һьнге әԝи бь дәнгәки бьльнд кьрә гази: «Иса, Кӧрʹе Даԝьд, гӧне хԝә мьн бинә!»* 39 Мәрьвед кӧ пешийе дьчун әʹщьз бун у ԝирʹа готьн, ԝәки хԝә кәрʹ кә. Ле әԝи бь дәнге һе бьльнд дькьрә гази: «Кӧрʹе Даԝьд, гӧне хԝә мьн бинә!» 40 Һьнге Иса сәкьни у фәрман да, ԝәки ԝи мәрьви биньн бал ԝи. Гава мәрьве кор незики ԝи бу, Иса же пьрси: 41 «Тӧ чь дьхԝази әз бона тә бькьм?» Әԝи гот: «Хӧдан, әз дьхԝазьм ԝәки чʹәʹвед мьн диса бьвиньн». 42 Иса ԝирʹа гот: «Бьра чʹәʹвед тә диса бьвиньн. Баԝәрийа тә тӧ ԛәнщ кьри». 43 У дәрберʹа чʹәʹвед ԝи вәбун, әԝ пәй Иса чу у пәсьне Хԝәде дьда. Тʹәмамийа ԝе щьмәʹте жи гава әв йәк дит, пәсьне Хԝәде дьдан.

19 Паше Иса кʹәтә Әриһайе у бажеррʹа дәрбаз дьбу. 2 Ԝедәре мәрьвәки дәԝләти һәбу, наве кʹижани Зәхайо бу. Әԝ мәзьне хәрщгьра бу. 3 Әԝи дьхԝәст Иса бьвинә, ле нькарьбу, чьмки мәрьв зәʹф бун у әԝ жи бәжнеда кьн бу. 4 Ләма әԝ рʹәви пеш у һьлкʹьшийа сәр дарәкә һежире, сәва кӧ Иса бьвинә, чьмки әԝ гәрәке ԝедәрерʹа дәрбаз буйа. 5 Гава Иса һатә ԝедәре, ль жор ньһерʹи у ԝирʹа гот: «Зәхайо, зу бәржер бә, чьмки иро әзе меване мала тә бьм». 6 Һьнге әԝ зу бәржер бу у бь әшԛ-ша ԝи мала хԝәда ԛәбул кьр. 7 Һʹәмуйед кӧ әв йәк дитьн, дькьрьнә кӧтә-кӧт у дьготьн: «Әԝ меванти чу мала мәрьвәки гӧнәкʹар». 8 Ле Зәхайо рʹабу у ԝирʹа гот: «Хӧдан, әзе ниве һәбука хԝә бьдьмә фәԛира у чь кӧ мьн бь нәһәԛи* жь кәсәки стандийә, әзе чар щар ле вәгәрʹиньм». 9 Һьнге Иса гот: «Иро Хԝәде әв мәрьв у мала ԝи хьлаз кьр, чьмки әԝ жи кӧрʹе Бьраһим ә. 10 Кӧрʹе инсен һатийә, сәва кӧ йед ӧндабуйи бьгәрʹә у ԝана хьлаз кә».

11 Һе ԝана дьбьһист, Иса мәсәләкә дьн ԝанрʹа ани, чьмки әԝ незики Оршәлиме бу, у әԝана дьфькьрин кӧ Пʹадшатийа Хԝәде ԝе ида зутьрәке хӧйа бә. 12 Әԝи гот: «Мәрьвәки жь малбәта пʹадша чу ԝәлатәки дур, сәва кӧ пʹадшатийе бьстинә у вәгәрʹә. 13 Әԝи гази дәһә хӧламед хԝә кьр, гәләк пʹәрә* да ԝан у ԝанрʹа гот: ‹Һʹәта әз бем, бь ван пʹәра арш-вершийе бькьн›. 14 Ле бьнәлийед ԝәлате ԝи әԝ нәфрʹәт дькьрьн у ԛасьд пәй ԝи шандьн кӧ бежьн: ‹Әм нахԝазьн кӧ әв мәрьв бьбә пʹадше мә›.

15 Гава әԝи мәрьви пʹадшати станд у вәгәрʹийа, гази ԝан хӧлама кьр, кʹижанарʹа пʹәрә* дабу, ԝәки бьзаньбә кӧ ԝана бь арш-вершийе чьԛас ԛазанщ кьрьбу. 16 Йе пешийе һат у гот: ‹Ахайе мьн, пʹәред тә дәһ щара зедә бун›. 17 Әԝи жерʹа гот: ‹Әʹфәрьм, хӧламе баш! Чьмки тӧ тьште гәләк бьчʹукда амьн буйи, әз һʹӧкӧме сәр дәһ бажара дьдьмә дәсте тә›. 18 Паше йе дӧда һат у гот: ‹Ахайе мьн, пʹәред тә пенщ щара зедә бун›. 19 Әԝи ԝирʹа жи гот: ‹Тӧйе сәр пенщ бажарарʹа сәрԝертийе бьки›. 20 Ле йәки дьн һат у гот: ‹Ахайе мьн, ва йә пʹәре тә, мьн әԝ нав дәзмаледа вәшартьбу. 21 Әз жь тә дьтьрсийам, чьмки тӧ мәрьвәки гәләк сәрт и. Чь кӧ тә данәнийә һьлдьди, у чь кӧ тә нәчандийә дьчьни›. 22 Әԝи жерʹа гот: ‹Хӧламе хьраб, әзе бь готьнед тә диԝана тә бькьм. Һәрге тә заньбу кӧ әз мәрьвәки гәләк сәрт ьм, чь кӧ мьн данәнийә һьлдьдьм, у чь кӧ мьн нәчандийә дьчьньм, 23 ижа тә чьма пʹәред мьн нәда базьргана?* Гава әз бьһатама, мьне бь сәләф бьстанда›.

24 Һьнге әԝи готә ԝан, йед кӧ кʹеләке сәкьни бун: ‹Пʹәра* жь ԝи бьстиньн у бьдьнә ԝи, йе кӧ пʹәрә дәһ щара зедә кьр.* 25 Ле ԝана ԝирʹа гот: ‹Йа аха, нә ида гәләк пʹәред ԝи һәнә!› 26 Әԝи жи гот: ‹Әз ԝәрʹа дьбежьм, бал кʹе һәйә, әԝе һе зедә бьстинә, ле бал кʹе тʹӧнә йә, тьште кӧ бал ԝи һәйә жи, ԝе жь ԝи бе стандьне. 27 Ԝан дьжмьнед мьн, йед кӧ нәдьхԝәстьн әз бьбьмә пʹадша, биньн вьра у бәр чʹәʹве мьн бькӧжьн›».

28 Иса пәй ве хәбәрданерʹа һәвраз чу, ԝәки һәрʹә Оршәлиме. 29 У гава әԝ незики Бәйтфаще у Бәйтанйайе бу, кӧ сәр Чʹийайе Зәйтʹуне нә, дӧ шагьртед хԝә шандьн, 30 у гот: «Һәрʹьн гӧнде пешбәри хԝә. Гава һун бькʹәвьнә ви гӧнди, һуне щәʹшькәкә гьредайи бьвиньн, кӧ һе кәсәк ле сийар нәбуйә. Ԝе щәʹшьке вәкьн у биньн вьра. 31 Ле һәрге кәсәк жь ԝә бьпьрсә: ‹Һун чьма щәʹшьке вәдькьн?›, һун ӧса бежьн: ‹Әԝ Хӧданрʹа лазьм ә›». 32 Йед кӧ һатьбун шандьне, чун у һәр тьшт дитьн, чаԝа кӧ әԝи ԝанрʹа готьбу. 33 Ле гава ԝана щәʹшьк вәдькьр, хԝәйед ԝе жь ԝан пьрсин: «Һун чьма щәʹшьке вәдькьн?» 34 Ԝана гот: «Әԝ Хӧданрʹа лазьм ә». 35 Ԝана щәʹшьк ани бал Иса, кʹьнщед хԝә авитьнә сәр щәʹшьке, у Иса ле сийар кьрьн.

36 Гава әԝ сәр щәʹшьке дәрбаз дьбу, мәрьва кʹьнщед хԝә сәр рʹе рʹадьхьстьн. 37 Чахе әԝ незики рʹийа Чʹийайе Зәйтʹуне бу, кӧ дадькʹәтә жере, һʹәму шагьртед ԝи дәстпекьрьн ша бьн у сәва һʹәму кʹәрәмәтед кӧ ԝана дитьбу, бь дәнгәки бьльнд пәсьне Хԝәде дьдан 38 у дьготьн: «Кʹәрәмкьри йә әԝ Пʹадшайе кӧ бь наве Йаһоԝа те! Әʹдьлайи ль әʹзмен у рʹумәт Йе Жорьнрʹа!» 39 Һьм жи һьнә Ферьси, йед кӧ нав щьмәʹтеда бун, готьн: «Дәрсдар, шагьртед хԝәрʹа бежә кӧ хԝә кәрʹ кьн». 40 Ле Иса ԝанрʹа гот: «Әз ԝәрʹа дьбежьм, һәрге әԝана хԝә кәрʹ кьн, кәвьр ԝе бькьнә ԛирʹин».

41 Гава әԝ незики бажер бу у ле ньһерʹи, сәрда гьрийа 42 у гот: «Хԝазьл тә иро фәʹм кьра кӧ чь дьбә бәрбь әʹдьлайе . . . ле ньһа әв тьшт бәр чʹәʹве тә һатийә вәшартьне. 43 Чьмки рʹож ԝе сәр тәда бен, кӧ дьжмьнед тә ԝе пе кʹенаред тужкьри дора тә чәпәра чекьн, дәр-доре тә бьгьрьн у һәр алийава тәнгасийе бьдьнә тә. 44 Әԝана ԝе ԛьрʹа тә у бьнәлийед тә* биньн, у кәвьр ԝе сәр кәвьр нәминә, чьмки Хԝәде һатийә кӧ диԝана тә бькә, ле тә әв йәк фәʹм нәкьр».

45 Паше Иса кʹәтә пʹарьстгәһе у дәстпекьр бәри ԝан һʹәмуйа бьдә, йед кӧ ԝедәре дьфьротьн 46 у ԝанрʹа дьгот: «Ӧса һатийә ньвисаре, ‹Мала мьн ԝе бе навкьрьне мала дӧа›, ле ԝә әԝ кьрийә шкәфта ԛачаха».

47 Әԝи һәр рʹож пʹарьстгәһеда һин дькьр. Ле сәрокед кʹаһина, ԛанунзан у рʹебәред щьмәʹте мәщал дьгәрʹийан кӧ ԝи бькӧжьн. 48 Ле ԝана тʹӧ мәʹни нәдит кӧ ве йәке бькьн, чьмки тʹәмамийа щьмәʹте жь ԝи дур нәдькʹәт ԝәки гӧһ бьдә ԝи.

20 Рʹожәке, гава Иса пʹарьстгәһеда мәрьв һин дькьрьн у мьзгини бәла дькьр, сәрокед кʹаһина у ԛанунзан тʹәви рʹуспийа һатьн 2 у ԝирʹа готьн: «Тӧ бь чь һʹӧкӧми ван тьшта дьки? Кʹи әв һʹӧкӧм дайә тә?» 3 Әԝи щаба ԝан да: «Әзе жи пьрсәке бьдьмә ԝә у һун щаба мьн бьдьн: 4 Гава Йуһʹәнна мәрьв дьньхӧмандьн,* әԝи әв һʹӧкӧм жь Хԝәде* стандьбу йан жь мәрьва?» 5 Һьнге әԝана нав һәвда шеԝьрин у готьн: «Һәрге әм бежьн ‹Жь Хԝәде›, әԝе бежә, ‹Ле ԝә чьрʹа әԝ баԝәр нәкьр?› 6 Ле һәрге әм бежьн ‹Жь мәрьва›, тʹәмамийа щьмәʹте ԝе мә бьдә бәр кәвьра, чьмки әԝана баԝәр дькьн кӧ Йуһʹәнна пʹехәмбәр бу». 7 Ләма ԝана щаб да, кӧ ньзаньн жь кʹӧ стандийә. 8 Иса жи ԝанрʹа гот: «Әз жи ԝәрʹа набежьм кӧ әз бь чь һʹӧкӧми ван тьшта дькьм».

9 Паше Иса дәстпекьр ве мәсәле хәлԛерʹа гьли кә: «Мәрьвәки рʹәзе тьрийа чанд, әв рʹәз кʹьре да рʹәзвана у сәр ԝәхтәки дьреж чу ԝәлатәки дьн. 10 Гава ԝәʹде чьнина тьрийа һат, әԝи хӧламәк шандә бал рʹәзвана, ԝәки жь ви рʹәзи пʹара хԝә бьстинә. Ле рʹәзвана әԝ кʹӧтан у дәствала шандьн. 11 Әԝи диса хӧламәки дьн шанд. Ԝана әԝ жи кʹӧта, беһӧрмәт кьрьн у дәствала шандьн. 12 Әԝи хӧламе сьсийа жи шанд, ԝана әԝ жи бьриндар кьр у авитьнә дәрва. 13 Һьнге хԝәйе рʹәз гот: ‹Әз чь бькьм? Әзе кӧрʹе хԝәйи дәлал бьшиньм, әԝана ԝе ԛәдьре ԝи бьгьрьн›. 14 Гава рʹәзвана әԝ дит, ль һәв шеԝьрин у готьн: ‹Әв ԝаре ԝи йә. Ԝәрен әм ԝи бькӧжьн, ԝәки миратʹа ԝи мәрʹа бьминә›. 15 Һьнге ԝана әԝ жь рʹәз авитьнә дәрва у кӧштьн. Ижа хԝәйе рʹәз ԝе чь сәре ԝан бькә? 16 Әԝе бе у ван рʹәзвана бькӧжә у рʹәз бьдә йед дьн».

Гава ԝана әв йәк бьһист, готьн: «Хԝәде нәкә!» 17 Ле Иса ль ԝан ньһерʹи у гот: «Ле һәрге ӧса нә, әԝ ньвисар чь те һʹәсабе: ‹Кәвьре кӧ авакʹара инкʹар кьр, буйә кәвьре сәрәкә›?* 18 Һәр кәсе кӧ бькʹәвә сәр ԝи кәвьри, әԝе һур-һури бә. У әԝ кәвьр бькʹәвә сәр кʹе, ԝе ԝи бьһʹьнщьрʹинә».

19 Ԛанунзан у сәрокед кʹаһина дьхԝәстьн һәма ԝе дәме ԝи бьгьрьн, чьмки ԝана фәʹм кьр, кӧ әԝи бь ве мәсәле дәрһәԛа ԝан гот. Ле жь щьмәʹте дьтьрсийан. 20 Чʹәʹвед ԝан сәр Иса бу, у паше ԝана дьзикава пʹәрә данә мәрьва у шандьн бал ԝи, кӧ хԝә дәԝса мәрьвед рʹаст дайньн, ԝәки Иса сәр гьлийа бьгьрьн, у ԝи бьдьнә дәсте дәԝләте у ԝәли. 21 Әԝан мәрьва жь ԝи пьрсин: «Дәрсдар, әм заньн кӧ тӧ рʹаст хәбәр дьди у һин дьки, у нав мәрьвада фьрԛийе данайни. У тӧ рʹийа Хԝәде ль гора рʹастийе һин дьки. 22 Тӧ ча дьфькьри, рʹаст ә кӧ әм хәрщ бьдьнә Ԛәйсәр, йан на?» 23 Ле Иса фелбазийа ԝан заньбу у ԝанрʹа гот: 24 «Кʹа динарәки нишани мьн кьн. Әв сьфәт у ньвисар йед кʹе нә сәр?» Ԝана гот: «Йед Ԛәйсәр ьн». 25 Әԝи ԝанрʹа гот: «Дә ԝәки ӧса нә, тьштед Ԛәйсәр бьдьнә Ԛәйсәр, ле тьштед Хԝәде бьдьнә Хԝәде». 26 Ԝана нькарьбу бәр щьмәʹте Иса сәр гьлийа бьгьрьн, ле сәр щаба ԝи әʹщебмайи ман у дәнге хԝә нәкьрьн.

27 Ле һьнәк жь Садуԛийед кӧ дьбежьн, ԝәки рʹабуна мьрийа тʹӧнә, һатьнә бал Иса у жь ԝи пьрсин: 28 «Дәрсдар, Муса мәрʹа ньвисийә, ‹Һәрге мәрьвәк бьмьрә у жьна хԝә безӧрʹәт бьһелә, гәрәке бьре ԝи жьна ԝи бьстинә у бь ви щурʹәйи зӧрʹәта бьре хԝә бәрдәԝам кә›. 29 Аԝа һʹәфт бьра һәбун. Бьре пешьн зәԝьщи, ле безӧрʹәт мьр. 30 Паше бьре дӧда 31 у паше бьре сьсийа жи әԝ жьн станд. Ӧса һәр һʹәфт бьра әԝ стандьн у зарʹ пәй хԝә нәһиштьн. 32 Ахьрийа-ахьрийе әв жьн жи мьр. 33 Дә ижа ԝәʹде рʹабуна мьрийа, әв жьн ԝе бьбә жьна кʹижани? Чьмки һәр һʹәфт бьра жи әԝ стандьбун».

34 Иса ԝанрʹа гот: «Зарʹед ве дьнйайе дьзәԝьщьн у мер дькьн, 35 ле йед кӧ һежайи ахьрийе у сахкьрьне нә, нә ԝе бьзәԝьщьн нә жи мер кьн. 36 Әԝана ԝе ида нәмьрьн, чьмки ԝе мина мәләка бьн. У әԝана ԝе зарʹед Хԝәде бьн, чьмки ԝе жь мьрьне бенә рʹакьрьне. 37 Ле әв йәк кӧ мьри рʹадьбьн, Муса жи әʹйан кьр. Гава әԝи дәрһәԛа тʹуме стьрийа гьли кьр, әԝи Йаһоԝа нав кьр, ‹Хԝәдайе Бьраһим, Хԝәдайе Исһаԛ у Хԝәдайе Аԛуб›. 38 Әԝ нә кӧ Хԝәдайе мьрийа йә, ле Хԝәдайе саха йә, чьмки әԝана һʹәму бона ԝи сах ьн». 39 Һьнге жь ԛанунзана һьнәка готьн: «Дәрсдар, тә рʹьнд гот». 40 Һьнгеда ида кәсәки нәԝерьбу тьштәки жь ԝи бьпьрсә.

41 Ле әԝи жь ԝан пьрси: «Чьма дьбежьн кӧ Мәсиһ кӧрʹе Даԝьд ә? 42 Нә Даԝьд кʹьтеба Зәбурада хԝәха дьбежә: ‹Йаһоԝа Хӧдане мьнрʹа гот: «Алийе мьле мьни рʹасте рʹуне, 43 һʹәта кӧ әз дьжмьнед тә бькьмә бьне пʹийед тә»›. 44 Даԝьд сәр ԝи дьбежә ‹Хӧдан›, ижа әԝ ча дькарә кӧрʹе ԝи бә?»

45 Чахе тʹәмамийа щьмәʹте гӧһ дьда Иса, әԝи шагьртед хԝәрʹа гот: 46 «Хԝә жь ԛанунзана дур бьгьрьн, йед кӧ һʹәз дькьн бь кʹьнщед дьреж бьгәрʹьн, мәрьв базарада ԝана сьлав кьн, кʹьништада* щийед пешьн бьгьрьн у ԝәʹде шиве ль щийед һәри баш рʹунен. 47 У әԝана мал-мьлкʹе жьнәбийа жь ԝан дьстиньн, у дӧайед хԝә дьреж дькьн, кӧ хԝә бькьнә чʹәʹва. Диԝана ԝан ԝе һе гьран бә».

21 Гава Иса дәр-доре хԝә дьньһерʹи, дит кӧ кәсед дәԝләмәнд пʹәред хԝә давитьнә пʹәрәданга. 2 Паше әԝи жьнәбикә бәләнгаз дит, йа кӧ дӧ ԛӧрʹушед* бьчʹук авите, 3 у әԝи гот: «Әз рʹаст ԝәрʹа дьбежьм, әв жьнәбийа бәләнгаз жь ԝан һʹәмуйа зедәтьр авите. 4 Чьмки ԝан һʹәмуйа жь зедәйа һәбука хԝә авитьне, ле әԝе бәләнгазийа хԝәда, чи ԝе һәбу кӧ пе әʹбура хԝә бькә, авите».

5 Паше гава һьнәка бәʹса пʹарьстгәһе дькьрьн, кӧ әԝ чаԝа бь кәвьред бәдәԝ у тьштед ԛӧрбанкьри һатийә хәмьландьне, 6 әԝи гот: «Әв тьштед кӧ һун ньһа дьвиньн, рʹож ԝе бен кӧ кәвьр ԝе ль сәр кәвьр нәминә. Һәр тьшт ԝе ԝеран бә». 7 Һьнге ԝана жь ԝи пьрси: «Дәрсдар, әв тьшт ԝе кʹәнге бьԛәԝьмьн? Чь ԝе бьбә нишана ве йәке, кӧ әв тьшт ԝе бьԛәԝьмьн?» 8 Әԝи гот: «Һаж хԝә һәбьн, кӧ һун нәйенә хапандьне, чьмки гәләк кәс ԝе бь наве мьн бен у бежьн, ‹Әԝ әз ьм›, у ‹Әв ԝәхте кʹьфшкьри незик ә›. Пәй ԝан нәчьн. 9 У гава һун дәрһәԛа шәрʹ у һәвкʹәтьна бьбьһен, нәтьрсьн. Чьмки пешийе әв тьшт гәрәке бьԛәԝьмьн, ле хьлази ԝе дәрберʹа нәйе».

10 Паше әԝи ԝанрʹа гот: «Мьләте һьмбәри мьләт у пʹадшати ԝе һьмбәри пʹадшатийе рʹабә. 11 Әʹрдһʹәжед мәзьн ԝе һәбьн, у гәләк щийа жи хәлайи у нәхԝәшийед гьран.* Тьштед тьрс у хоф ԝе бьԛәԝьмьн у ԝе нишанед мәзьн жь әʹзмен һәбьн.

12 Ле пешийа кӧ әв һʹәму тьшт бьԛәԝьмьн, мәрьв ԝе мьԛабьли ԝә рʹабьн, ԝе ԝә бьзериньн, әԝе ԝә бьвьнә бәр диԝана кʹьништа* у бавежьнә кәла. У бона наве мьн, ԝе ԝә бьдьнә дәсте пʹадша у ԝәлийа. 13 Әԝ йәк ԝе мәщале бьдә ԝә, кӧ шәʹдәтийе бьдьн. 14 Ле пешда дьле хԝәда ԛьрар нәкьн, кӧ һуне бона пʹарастьна хԝә чь бежьн, 15 чьмки әзе зар-зьман у сәрԝахтийе бьдьмә ԝә, кӧ һʹәму дьжмьнед ԝә нькарьбьн мьԛабьли ԝә хәбәр дьн. 16 Хенщи ве йәке, һәла һе де-бав, бьра, мәрьвед ԝә у һәвал жи, ԝе ԝә бьдьнә гьртьне, у жь ԝә һьнәка ԝе бькӧжьн. 17 У бона наве мьн һуне бәр чʹәʹве һʹәмуйа рʹәш бьн. 18 Ле пʹорʹәки сәре ԝә жи ԝе ӧнда нәбә. 19 Бь сәбьра хԝә һуне әʹмьре хԝә хьлаз кьн.

20 Ле гава һун бьвиньн кӧ ордийа дора Оршәлиме гьртийә, һьнге бьзаньбьн кӧ ԝеранкьрьна ԝе незик буйә. 21 Һьнге бьра йед кӧ Щьһустанеда ньн, бьрʹәвьнә чʹийа, йед кӧ бажерда ньн, бьра жь ԝе дәрен, у йед кӧ гӧндада ньн, бьра нәкʹәвьнә бажер. 22 Чьмки әԝ ԝе рʹожед һәԛикьрьне* бьн, ԝәки һәр чь кӧ һатийә ньвисаре бе сери. 23 Ԝәй ль жьнед һʹәмлә у йед дәстдәргуш ԝан рʹожада! Чьмки тәнгасийа мәзьн ԝе бе сәре ви ԝәлати, у хәзәб сәр ве щьмәʹте. 24 Һьнәк жь ԝан ԝе бь шур бенә кӧштьне, ле йед дьн нав һʹәму мьләта ԝе дилти бенә бьрьне. Һʹәта ԝәхте кӧ мьләтарʹа һатийә кʹьфшкьрьне тʹәмам бә, мьләт ԝе Оршәлиме бь ньгед хԝә пʹепәс кьн.

25 Ӧса жи, сәр тәʹве, һиве у стәйрка нишан ԝе һәбьн, у сәр рʹуйе әʹрде мьләт ԝе жь бо гӧрʹә-гӧрʹа пʹелед бәʹре гәләк бьтьрсьн у чʹарәке нәвиньн. 26 Жь бо тьрсе у жь бо һивийа тьштед кӧ ԝе бенә сәре дьнйайе, мәрьв ԝе бьхәрʹьԛьн, чьмки ԛәԝатед әʹзмана ԝе бенә һʹәжандьне. 27 У һьнге мәрьв ԝе Кӧрʹе инсен бьвиньн, йе кӧ әʹԝрда бь ԛәԝат у рʹумәта мәзьн те. 28 Ле гава әв тьшт дәстпекьн бьԛәԝьмьн, һун рʹабьн сәре хԝә бьльнд кьн, чьмки хьлазбуна ԝә незик ә».

29 Паше әԝи мәсәлә ԝанрʹа гот: «Дина хԝә бьдьнә дара һежире у һʹәму даред дьн. 30 Гава әԝана дьбьшкьвьн, һун дьвиньн у фәʹм дькьн, кӧ һавин ида незик буйә. 31 Бь ви щурʹәйи жи, гава һун ван һʹәму тьшта бьвиньн, бьзаньбьн кӧ Пʹадшатийа Хԝәде незик ә. 32 Әз рʹаст ԝәрʹа дьбежьм, пешийа кӧ әв ньсьл дәрбаз бә, һʹәму тьшт ԝе бенә сери. 33 Әʹрд у әʹзман ԝе бәтавәбьн, ле хәбәред мьн ԝе һәр у һәр бьминьн.

34 Ле һаж хԝә һәбьн, ԝәки дьле ԝә гьран нәбә бь хԝарьн у вәхԝарьна зедә у бь хәмед ве дьнйайе, у ньшкева әԝ рʹож сәр ԝәда нәйе, 35 мина тʹәльке. Чьмки әԝе бе сәре һʹәму кәсед кӧ сәр рʹуйе әʹрде дьжин. 36 Ләма һʹьшйар бьминьн у һәртʹьм дӧа бькьн, ԝәки һун бькарьбьн жь һʹәму тьштед кӧ ԝе бьԛәԝьмьн, хьлаз бьн, у бәр Кӧрʹе инсен бьсәкьньн».

37 Иса рʹож пʹарьстгәһеда һин дькьр, ле шәв дьчу сәре Чʹийайе Зәйтʹуне дьма.* 38 У тʹәмамийа щьмәʹте сьбәһе зу дьһатә пʹарьстгәһе щәм ԝи, ԝәки гӧһ бьдьнә ԝи.

22 Щәжьна Нане Шкәва,* йа кӧ ча Щәжьна Дәрбазбуне жи дьһатә навкьрьне, незик дьбу. 2 Сәрокед кʹаһина у ԛанунзан сәва кӧ Иса бьдьнә кӧштьне мәщаләкә баш дьгәрʹийан, чьмки жь хәлԛе дьтьрсийан. 3 Һьнге Шәйтʹан сәр дьле Щьһудайе Исхәрйоти һʹӧкӧм кьр, йе кӧ жь Донздәһа* бу. 4 Щьһуда чу, тʹәви сәрокед кʹаһина у сәрԝеред нобәдаред пʹарьстгәһе хәбәр да, кӧ ча Иса бьдә дәсте ԝан. 5 Әԝана ша бун у ԝирʹа ԛайил бун, кӧ пʹәред зив бьдьнә ԝи. 6 Әԝ жи рʹази бу, у жь ԝе дәме мәщаләк дьгәрʹийа ԝәки нәмамийа Иса бькә, ле ӧса кӧ щьмәʹт һаж пе тʹӧнә бә.

7 Рʹожа пешьнә Щәжьна Нане Шкәва һат, кӧ ԛӧрбана Щәжьна Дәрбазбуне гәрәке бьһата дайине. 8 Иса готә Пәтрус у Йуһʹәнна: «Һәрʹьн у хԝарьна Щәжьна Дәрбазбуне һазьр кьн, ԝәки әм бьхԝьн». 9 Ԝана ԝирʹа гот: «Тӧ дьхԝази әм кʹидәре һазьр кьн?» 10 Әԝи ԝанрʹа гот: «Гава һун бькʹәвьнә бажер, мәрьвәк ԝе рʹасти ԝә бе, йе кӧ щерʹәки аве һьлгьртийә. Пәй ԝи һәрʹьнә ԝе мале, йа кӧ әԝ бькʹәве. 11 У хԝәйе малерʹа бежьн: ‹Дәрсдар дьбежә: «Кʹидәре йә әԝ ода мевана, кʹижанеда әз дькарьм тʹәви шагьртед хԝә хԝарьна Щәжьна Дәрбазбуне бьхԝьм?»› 12 Әԝ мәрьв ԝе ль ԛате жорьн одәкә мәзьнә һәвдайи нишани ԝә бькә. Ԝедәре шиве һазьр кьн». 13 Әԝана жи чун у һʹәму тьшт ӧса бу чаԝа кӧ Иса ԝанрʹа готьбу. У ԝана бона Щәжьна Дәрбазбуне һʹәму тьшт һазьр кьр.

14 Гава ԝәʹде шиве һат, Иса тʹәви шандийед хԝә бәр сьфре рʹуньшт. 15 У әԝи ԝанрʹа гот: «Әз һʹьзрәт бум кӧ тʹәви ԝә хԝарьна Щәжьна Дәрбазбуне бьхԝьм, пешийа кӧ әз бьчәрчьрьм. 16 Әз ԝәрʹа дьбежьм, әзе ида әве нәхԝьм һʹәта кӧ һʹәму тьшт Пʹадшатийа Хԝәдеда бе сери». 17 У әԝи кʹасәк һьлда, шькьри да Хԝәде у гот: «Әве һьлдьн, у нав хԝәда дәрбази һәв кьн, 18 чьмки әз ԝәрʹа дьбежьм, ньһада әзе ида жь ве шәраве вәнәхԝьм, һʹәта Пʹадшатийа Хԝәде бе».

19 Әԝи ӧса жи нан һьлда, шькьри да Хԝәде, нан кәр кьр,* да ԝан у гот: «Әв бәдәна мьн те һʹәсабе, йа кӧ ԝе бона ԝә бе дайине. Ве йәке бона биранина мьн бькьн». 20 Ӧса жи пәй хԝарьнерʹа әԝи кʹас да ԝан у гот: «Әв кʹас пәймана ну те һʹәсабе, йа кӧ ԝе сәр һʹиме хуна мьн бона ԝә бе рʹетьне.

21 Ле ва йә нәмаме мьн тʹәви мьн бәр сьфре йә. 22 Бәле, һәр тьште кӧ дәрһәԛа Кӧрʹе инсен һатийә ньвисаре, ԝе бе сери. Ле ԝәй ль ԝи мәрьви, йе кӧ ԝе нәмамийа ԝи бькә!» 23 Һьнге ԝана дәстпекьр нав һәвда жь һәв бьпьрсьн, һәла жь ԝана кʹи ԝе әве йәке бькә.

24 Ӧса жи дәʹԝәкә мәзьн нав ԝанда пешда һат, һәла жь ԝана йе һәри мәзьн кʹи йә. 25 Ле әԝи ԝанрʹа гот: «Пʹадшед мьләта, хԝә сәр ԝанрʹа дьгьрьн, у кәсед кӧ һʹӧкӧми сәр ԝан дькьн Херхԝаз тенә навкьрьне. 26 Ле һун гәрәке ӧса нибьн. Бьра йе һәри мәзьн нав ԝәда бьбә мина йе һәри бьчʹук, у йе кӧ рʹебәрийе дькә, бьра бьбә мина йе кӧ бәрдәстийе дькә. 27 Кʹи дьһа мәзьн ә, йе бәр сьфре рʹуньшти, йан бәрдәсти? Нә йе бәр сьфре рʹуньшти? Ле әз нав ԝәда мина бәрдәстики мә.

28 Йед кӧ тәнгасийед мьнда тʹәви мьн манә, һун ьн. 29 У әз тʹәви ԝә пәймана пʹадшатийе гьредьдьм, чаԝа Баве мьн тʹәви мьн пәймана пʹадшатийе гьреда, 30 ԝәки һун Пʹадшатийа мьнда жь сьфра мьн бьхԝьн у вәхԝьн, у сәр тʹәхта рʹунен у бьбьнә һʹакьмед 12 бәрәкед Исраеле.

31 Шьмһʹун, Шьмһʹун, Шәйтʹан хԝәст кӧ ԝә мина гәньм ль бежьнге хә. 32 Ле мьн бона тә дӧа-дьрозгә кьр, ԝәки баԝәрийа тә сьст нәбә, у гава кӧ тӧ вәгәрʹи, бьред хԝә ԛәԝи ки». 33 Һьнге әԝи гот: «Хӧдан, әз һазьр ьм кӧ тʹәви тә бькʹәвьмә кәле у тʹәви тә бьмьрьм жи». 34 Ле Иса гот: «Пәтрус әз тәрʹа дьбежьм, иро пешийа кӧ дик банг дә, тӧйе се щара бежи, кӧ мьн нас наки».

35 Әԝи ӧса жи ԝанрʹа гот: «Гава мьн һун бе кʹиськ, бе тʹорбе хԝарьне у бе чарьх шандьн, гәло тьштәк ԝә кем бу?» Ԝана гот: «На!» 36 Һьнге әԝи ԝанрʹа гот: «Ле ньһа, кʹиське кʹе һәйә бьра хԝәрʹа бьвә, ӧса жи тʹорбед хԝарьне. У шуре кʹе тʹӧнә йә, бьра кʹьнще хԝә бьфьрошә у шур бькʹьрʹә. 37 Чьмки әз ԝәрʹа дьбежьм, гәрәке әва ньвисара сәр мьн бе сери, кӧ: ‹Әԝ һатә һʹәсабе ча йәки ԛачах›.* Чь кӧ дәрһәԛа мьн ньвисар ә те сери». 38 Һьнге ԝана гот: «Хӧдан, ва вьра дӧ шур һәнә». Әԝи ԝанрʹа гот: «Әв бәс ә».

39 Әԝ жь ԝедәре дәркʹәт у ча һәргав чу сәр Чʹийайе Зәйтʹуне, у шагьрт жи пәй ԝи чун. 40 Гава әԝана гьһиштьнә ԝедәре, әԝи ԝанрʹа гот: «Дӧа бькьн, сәва кӧ һун нәкʹәвьнә щерʹьбандьне». 41 У әԝ һьнәки* жь ԝан дур кʹәт, кʹәтә сәр чока, дәстпекьр дӧа бькә 42 у гот: «Баво, һәрге тӧ дьхԝази, ве кʹасе жь мьн дур хә. Ле бьра нә кӧ ԛьрара мьн бә, ле ԛьрара тә бә». 43 Һьнге жь әʹзмен мәләкәк ԝирʹа хӧйа бу у әԝ ԛәԝи кьр. 44 Ле әԝ нава щәфе ӧса гьранда бу, кӧ һе бь дьле кʹәл дӧа дькьр. У худана ԝи мина дьлопед хуне дькʹәтьнә сәр әʹрде. 45 Паши дӧакьрьне, әԝ чу бал шагьрта у дит кӧ әԝана хәԝрʹа чунә, чьмки жь бо хәмгинийе ԛьдум кʹәтьбун. 46 Әԝи ԝанрʹа гот: «Һун чьма рʹаза нә? Рʹабьн у дӧа бькьн, сәва кӧ һун нәкʹәвьнә щерʹьбандьне».

47 Гава әԝи һе хәбәр дьда, гәләк мәрьв һатьнә ԝедәре, у Щьһудайе кӧ йәк жь Донздәһа бу, пешийа ԝан кʹәтьбу. Әԝ незики Иса бу, ԝәки ԝи пачʹ кә. 48 Ле Иса ԝирʹа гот: «Щьһуда, тӧ бь пачʹкьрьне нәмамийа Кӧрʹе инсен дьки?» 49 Гава кәсед дәр-доре ԝи фәʹм кьрьн кӧ чь ԝе бьԛәԝьмә, ԝана гот: «Хӧдан, әм бь шур ԝан хьн?» 50 У жь ԝана йәки бь шур хӧламе кʹаһине мәзьн хьст, у гӧһе ԝийи рʹасте жекьр. 51 Ле Иса гот: «Бәс ә». Әԝи дәсте хԝә да гӧһе хӧлам, у әԝ ԛәнщ кьр. 52 Паше Иса готә сәрокед кʹаһина, сәрԝеред нобәдаред пʹарьстгәһе у рʹуспийед кӧ һатьбун ԝи бьгьрьн: «Чьрʹа әз ԛачах ьм, кӧ һун бь дара у шура һатьнә? 53 Чахе әз һәр рʹож тʹәви ԝә пʹарьстгәһеда бум, ԝә дәсте хԝә нәдьда мьн. Ле ньһа ԝәхте ԝә у һʹӧкӧме тәʹрийе йә».

54 Һьнге ԝана Иса гьрт у бьрьнә мала кʹаһине мәзьн, ле Пәтрус дурва пәй ԝан дьчу. 55 Гава ԝана ортʹа һʹәԝшеда агьр вехьст у доре рʹуньштьн, Пәтрус жи тʹәви ԝан рʹуньшт. 56 Ле щарике әԝ бәр агьр рʹуньшти дит, зурʹ бу ԝи ньһерʹи у гот: «Әв мәрьв жи тʹәви ԝи бу». 57 Ле әԝи әв йәк инкʹар кьр у гот: «Әз ԝи нас накьм, жьньк». 58 Һьнәк ԝәʹдә шунда, кәсәки дьн әԝ дит у гот: «Тӧ жи йәки жь ԝан и». Ле Пәтрус гот: «На, әз нә йәки жь ԝан ьм». 59 Ԝәкә сьһʹәтәк шунда, мәрьвәки дьн бе дӧдьлибун гот: «Бь рʹасти әв мәрьв жи тʹәви ԝи бу, чьмки әԝ жь Щәлиле йә». 60 Ле Пәтрус гот: «Әз ньзаньм тӧ чь дьбежи». У гава әԝи һе хәбәр дьда, һәма ве дәме дик банг да. 61 Һьнге Хӧдан зьвьрʹи у ль Пәтрус ньһерʹи, у Пәтрус готьна Хӧдан ани бира хԝә, кӧ ԝирʹа готьбу: «Иро пешийа кӧ дик банг бьдә, тӧйе се щара мьн инкʹар ки». 62 Әԝ дәркʹәтә дәрва у кʹәлә-кʹәл гьрийа.

63 Мәрьвед кӧ нобәдарийа Иса дькьрьн, дәстпекьрьн ԛәрфед хԝә ԝи бькьн у ль ԝи хьн, 64 паше сәрчʹәʹве ԝи дадан, у дьпьрсин: «Һәрге тӧ пʹехәмбәр и, һәла бежә кʹи тә хьст?» 65 У ԝана мьԛабьли Иса гәләк кʹьфьри кьр.

66 Гава бу рʹож, кʹома рʹуспийед щьмәʹте, демәк сәрокед кʹаһина у ԛанунзан, ль һәв тʹоп бун, Иса анин Диԝана Бьльнд йа Щьһуйа* у готьне: 67 «Һәрге тӧ Мәсиһ и, мәрʹа бежә». Ле әԝи ԝанрʹа гот: «Һәрге әз ԝәрʹа бежьм жи, йәкә һуне баԝәр нәкьн. 68 У һәрге әз жь ԝә бьпьрсьм жи, һуне щабе нәдьн. 69 Ле жь вьр шунда Кӧрʹе инсен ԝе алийе мьле рʹасте, кʹеләка Хԝәдайе һәри ԛәԝат рʹуне». 70 Һьнге гьшка гот: «Демәк тӧ Кӧрʹе Хԝәде йи?» Әԝи ԝанрʹа гот: «Һун хԝәха дьбежьн кӧ әԝ әз ьм». 71 Ԝана гот: «Ида избатийа зедә чи мәрʹа нә? Чьмки мә әв йәк хԝәха бь дәве ԝи бьһист».

23 Һьнге гьшк рʹабун у Иса бьрьнә щәм Пилато. 2 Паше ԝана дәстпекьр ԝи сущдар кьн у дьготьн: «Мә дит кӧ әв мәрьв мьләте мә мьԛабьли дәԝләте рʹадькә, наһелә ԝәки хәрщ бьдьнә Ԛәйсәр, у сәр хԝә дьбежә, кӧ әԝ ә Мәсиһ, пʹадша». 3 У Пилато жь ԝи пьрси: «Тӧ йи Пʹадше Щьһуйа?» Әԝи щаб да: «Тӧ хԝәха дьбежи». 4 Һьнге Пилато сәрокед кʹаһинарʹа у хәлԛерʹа гот: «Әз тʹӧ нәһәԛийе ви мәрьвида навиньм». 5 Ле әԝана сәр йа хԝә ман у готьн: «Әԝи тʹәмамийа Щьһустане, жь Щәлиле һʹәта вьра, бь һинкьрьнед хԝә щьмәʹт тʹәвиһәв кьрийә». 6 Гава Пилато әв йәк бьһист, пьрси һәла әв мәрьв жь Щәлиле йә. 7 Чахе әԝ пеһʹәсийа, кӧ әԝ жь ве һәреме йә, кӧ бьн һʹӧкӧме Һеродәсда йә, әԝи әԝ шандә щәм Һеродәс, йе кӧ һьнге Оршәлимеда бу.

8 Гава Һеродәс Иса дит, зәʹф ша бу. Әԝи зудава дьхԝәст Иса бьвинә, чьмки гәләк тьшт дәрһәԛа ԝи бьһистьбу у һʹьзрәт бу, кӧ Иса бәр ԝи кʹәрәмәтәке бькә. 9 Әԝи гәләк пьрс данә ԝи, ле Иса тʹӧ щаб нәда ԝи. 10 Ле сәрокед кʹаһина у ԛанунзан рʹадьбун сәр ньга у бь һерс әԝ сущдар дькьрьн. 11 Һьнге Һеродәс тʹәви әскәред хԝә Иса ньмьз кьр, кʹьнщед ԛимәт ль ԝи кьр, пе дькʹәнийа, у паше пашда шандә бал Пилато. 12 Ԝе рʹоже Пилато у Һеродәс, йед кӧ бәре дьжмьнед һәв бун, бунә һәвалед һәв.

13 Паше Пилато гази сәрокед кʹаһина, сәрԝера у хәлԛе кьр 14 у ԝанрʹа гот: «Ԝә әв мәрьв анийә бал мьн у дьбежьн кӧ әԝ щьмәʹте мьԛабьли дәԝләте рʹадькә. Аԝа мьн бәр ԝә һәр тьшт жь ԝи пьрси, ле мьн тʹӧ нәһәԛи ԝида нәдит. 15 Бь рʹасти Һеродәс жи тьштәк нәдит, ләма жи әԝ пашда шандә бал мә. Әԝи мәрьви тʹӧ тьште кӧ һежайи мьрьне йә, нәкьрийә. 16 Ләма жи әзе ԝи бьдьмә бәр ԛамчийа у бәрʹдьм». 17* —— 18 Ле һʹәмуйа кьрә ԛирʹин у готьн: «Ԝи бькӧжә у Барабас бона мә бәрʹдә!» 19 (Әԝ мәрьв бона мьԛабьлибуна бажерда у меркӧжийе кьрьбунә кәле.) 20 Пилато диса ԝанрʹа хәбәр да, чьмки әԝи дьхԝәст Иса бәрʹдә. 21 Һьнге ԝана кьрә ԛирʹин у дьготьн: «Ԝи стуне хә! Ԝи стуне хә!» 22 Щара сьсийа әԝи ԝанрʹа гот: «Чьрʹа? Әԝи мәрьви чь хьраби кьрийә? Мьн ԝида тʹӧ тьште һежайи кӧштьне нәдит. Ләма әзе ԝи бьдьмә бәр ԛамчийа у бәрʹдьм». 23 Ле әԝана сәр йа хԝә ман, бь дәнгәки һе бьльнд готьн кӧ гәрәке ԝи стуне хьн, у ԝана ӧса дькьрә ԛирʹин, кӧ 24 Пилато сафи кьр хԝәстьна ԝан бинә сери. 25 Әԝи бона ԝан әԝ мәрьв бәрʹда, йе кӧ бона мьԛабьлибуне у меркӧжийе кьрьбунә кәле, ле Иса һишт сәр хԝәстьна дьле ԝан.

26 Гава әскәра әԝ дьбьр, ԝана кәсәки бь наве Шьмһʹуне Курени, йе кӧ жь зәвийе дьһат, гьртьн у стун данинә сәр пьшта ԝи, ԝәки әԝ ве стуне пәй Иса бьвә. 27 Гәләк мәрьв пәй ԝи дьчун, у нав ԝанда жьн жи һәбун, йед кӧ сингед хԝә дьхьстьн у сәр ԝида дьгьрийан. 28 Иса ль ван жьна зьвьрʹи у гот: «Ԛизед Оршәлиме, сәр мьнда нәгьрин. Сәр хԝә у зарʹед хԝәда бьгьрин. 29 Чьмки рʹож ԝе бен кӧ мәрьв ԝе бежьн: ‹Чьԛас бәхтәԝар ьн жьнед безӧрʹәт, кӧ зарʹ нәанинә у нәмежандьнә!› 30 Һьнге әԝана чʹийарʹа ԝе бежьн: ‹Сәр мәда бькʹәвьн!›, у тʹәпарʹа бежьн: ‹Мә вәшерьн!› 31 Һәрге әԝана ван тьшта дькьн, гава дар һе тәрʹ ә, ле чахе дар һʹьшк бә ԝе чь бьԛәԝьмә?»

32 Дӧ мәрьвед дьн жи, йед кӧ ԛачах бун, дьбьрьн кӧ тʹәви ԝи бенә мьхкьрьне. 33 У гава әԝана гьһиштьнә щийе бь наве «Ԛаф», Иса кʹеләка ԝан дӧ ԛачаха сәр стуне мьх кьрьн, йәк алийе ԝийи чʹәпе у йе дьн жи алийе ԝийи рʹасте бу. 34 Ле Иса гот: «Баво, бьбахшинә ԝан, чьмки әԝана ньзаньн чь дькьн». У әскәра пʹәшк авитьн, сәва кӧ кʹьнщед ԝи нав хԝәда пʹарәвәкьн. 35 У мәрьв ԝедәре сәкьни бун дьньһерʹин. Ле сәрока ԛәрфед хԝә ԝи дькьрьн у дьготьн: «Әԝи хәлԛ хьлаз кьрьн; дә бьра хԝә жи хьлаз кә, һәрге әԝ ә Мәсиһе Хԝәде, Йе Бьжарти». 36 Әскәра жи ԛәрфед хԝә ԝи дькьрьн. Әԝана незики ԝи бун, шәрава тьрʹш дьрежи ԝи кьрьн 37 у дьготьн: «Һәрге тӧ Пʹадше Щьһуйа йи, дә хԝә хьлаз кә». 38 У феза сәре ԝи жи ньвисар һәбу: «Әв Пʹадше Щьһуйа йә».

39 Паше жь ԝан ԛачаха йәки дәстпекьр ԝи беһӧрмәт кә у бежә: «Нә тӧ Мәсиһ и? Дә хԝә хьлаз кә у мә жи перʹа!» 40 Ле йе дьн ль ԝи һьлат у гот: «Тӧ жь Хԝәде натьрси? Тә хԝәха жи щәзайе ви щурʹәйи стандийә! 41 Мә анәгори кьред хԝәйи хьраб һәԛе хԝә стандийә, ле әви мәрьви тʹӧ хьраби нәкьрийә». 42 У Исарʹа гот: «Иса, гава тӧ бькʹәви Пʹадшатийа хԝә, мьн бинә бира хԝә». 43 Иса ԝирʹа гот: «Әз рʹаст тәрʹа дьбежьм иро, тӧйе тʹәви мьн Щьнәтеда би».

44 Нивро гава сьһʹәт незики донздәһа* бу, тәʹри кʹәтә сәр рʹуйе ви әʹрди у һʹәта незики сьһʹәта сьсийа* кʹьшанд, 45 чьмки рʹоже рʹонайи нәдьда. Һьнге пʹәрʹда пʹарьстгәһе нивида ԛәльши. 46 Иса бь дәнгәки бьльнд кьрә гази у гот: «Баво, әз әʹмьре* хԝә дьдьмә дәсте тә». Паши ве готьне, әԝ мьр.* 47 Гава сәрсәд дит кӧ чь ԛәԝьми, дәстпекьр пәсьне Хԝәде бьдә у гот: «Рʹасти жи әв мәрьвәки рʹаст бу». 48 У гава һʹәму мәрьвед кӧ ԝедәре тʹоп бьбун, дитьн кӧ чь ԛәԝьмийә, синге хԝә дьхьстьн у вәдьгәрʹийанә мал. 49 Һʹәмуйед кӧ әԝ нас дькьрьн, дурва сәкьни бун. Ӧса жи жьнед кӧ тʹәви ԝи жь Щәлиле һатьбун, ԝедәре бун у әв тьшт дитьн.

50 Ԝедәре мәрьвәк һәбу, наве кʹижани Усьв бу. Әԝ әндәмәки Диԝана Бьльнд йа Щьһуйа бу, йе кӧ мәрьвәки ԛәнщ у рʹаст бу. 51 (Әԝи мәрьви пьштгьрийа шеԝьра ԝан у кьред ԝан нәкьрьбу.) Әԝ жь Аримәтйайе, жь бажарәки Щьһуйа бу, у әԝ һивийа Пʹадшатийа Хԝәде бу. 52 Әв мәрьв чу бал Пилато у щьнйазе Иса же хԝәст. 53 Әԝи щьнйаз ани хԝаре, бь кʹьтане рʹьнд пʹечʹа, у дани нав тʹьрба кӧ зьнарда кʹолайи бу. Ԝедәре һе тʹӧ кәс нәһатьбу данине. 54 Әԝ рʹож, рʹожа Һазьркьрьне* бу, у рʹожа Шәмийе* дәстпедьбу. 55 Ле кʹӧлфәтед кӧ тʹәви Иса жь Щәлиле һатьбун, әԝана жи чунә бәр тʹьрбе у дитьн чаԝа щьнйазе ԝи теда һатә данине. 56 Паше әԝана вәгәрʹийан, кӧ бьһарәт у рʹунен бинхԝәш һазьр кьн. Ле рʹожа Шәмийе ль гора тʹәмийе, әԝана рʹьһʹәт дьбун.

24 Ле рʹожа пешьн йа һʹәфтийе, әԝана сәре сьбәһе зу чунә бәр тʹьрбе у бьһарәтед бинхԝәш кӧ ԝана һазьр кьрьбу, анин. 2 Ле ԝана дит кӧ кәвьре бәр тʹьрбе жь щийе хԝә һатийә гьлоркьрьн, 3 у чахе кʹәтьнә һӧндӧрʹ, щьнйазе Хӧдан Иса нәдитьн. 4 Гава әԝана һе бона ве йәке шаш мабун, ньшкева дӧ мер бь кʹьнщед кӧ шәԝԛ дьдан бәр ԝан сәкьнин. 5 Жьн тьрсийан у сәре хԝә кьрьнә бәр хԝә. Әван мера готьнә ԝан: «Һун чьма нав мьрийада йе сах дьгәрʹьн? 6 Әԝ вьра нинә, әԝ жь мьрьне һатийә рʹакьрьне. Биньн бира хԝә чахе әԝ һе Щәлиледа бу чь ԝәрʹа гот, 7 кӧ гәрәке Кӧрʹе инсен бьдьнә дәсте гӧнәкʹара, сәр стуне бе дардакьрьне у рʹожа сьсийа жь мьрьне бе рʹакьрьне». 8 Һьнге ԝана готьнед ԝи анинә бира хԝә, 9 у әԝ жь тʹьрбе вәгәрʹийан, чун у һәр тьшт Йанздәһарʹа* у йед дьнрʹа гьли кьрьн. 10 Әԝ Мәрйәма Мәгдәлани, Йоһана у Мәрйәма дийа Аԛуб бун. У жьнед дьн жи, йед кӧ тʹәви ԝан бун, әв һʹәму тьшт шандийарʹа гьли кьрьн. 11 Ле готьнед ԝан бона шандийа пʹучʹ һатьнә кʹьфше, у баԝәрийа хԝә ԝан кʹӧлфәта нәанин.

12 Ле Пәтрус рʹабу у ләз бәрбь тʹьрбе чу. Гава әԝ ԛуз бу у һӧндӧрʹ ньһерʹи, тʹәне пʹәрчʹе кʹьтани дит. Һьнге әԝ жь ԝедәре чу у хԝәрʹа дьфькьри кӧ гәло чь ԛәԝьмийә.

13 Ле ве рʹоже, дӧ шагьрт дьчунә гӧндәки бь наве Әмԝас, кʹижан кӧ ԝәкә 11 километра дури Оршәлиме бу, 14 у ԝана дәрһәԛа һʹәму тьштед кӧ ԛәԝьмибун һәврʹа хәбәр дьда.

15 У гава ԝана нав һәвда хәбәр дьда у дәрһәԛа ван тьшта шеԝьр дькьрьн, Иса незики ԝан бу у тʹәви ԝан чу, 16 ле ԝана әԝ нас нәкьр. 17 Әԝи ԝанрʹа гот: «Һун рʹеда ӧса кʹәлә-кʹәл дәрһәԛа чь һәврʹа хәбәр дьдьн?» Һьнге әԝана мәʹдәкьри сәкьнин. 18 Йәк жь ԝан, наве кʹижани Клепас бу, ԝирʹа гот: «Чь йә, тӧ хәриб и, жь Оршәлиме тʹәне тә нәбьһистийә кӧ ван рʹожа ԝьр чь ԛәԝьмийә?» 19 Әԝи жь ԝан пьрси: «Чь ԛәԝьмийә?» Ԝана ԝирʹа гот: «Тӧ дәрһәԛа тьштед кӧ һатьнә сәре Исайе Ньсрәте ньзани? Әԝ бәр Хԝәде у һʹәму мәрьва бь готьн у кьред хԝә пʹехәмбәрәки зор бу. 20 Сәрокед кʹаһина у сәрԝеред мә щәзайа мьрьне данә сәр ԝи, у әԝ сәр стуне мьх кьрьн. 21 Ле гӧмана мә әԝ бу, ԝәки йе кӧ ԝе Исраеле хьлаз кә әԝ ә. Хенщи ве йәке, иро рʹожа сьсийа йә кӧ әв һʹәму тьшт ԛәԝьми нә. 22 Һьм жи, һьнә кʹӧлфәтед нав мәда әм әʹщебмайи кьрьн. Әԝана сьбәһе зу чубунә бәр тʹьрбе, 23 ле щьнйазе ԝи нәдитьбун, әԝана һатьн у гьли кьрьн кӧ мәләк ԝанрʹа хӧйа бунә, у готьнә ԝәки әԝ сах ә. 24 Паше жь мә һьнә кәс чунә бәр тʹьрбе, у чаԝа кӧ кʹӧлфәта готьбу, ӧса бу, ле әԝ нәдитьн».

25 Һьнге әԝи ԝанрʹа гот: «Беаԛьлно! Һун чьԛас чәтьн баԝәрийа хԝә һʹәму готьнед пʹехәмбәра тиньн! 26 Нә гәрәке Мәсиһ әԝ щәфа бькʹьшанда у бькʹәта рʹумәта хԝә?» 27 У әԝи дәстпекьр ԝанрʹа жь Муса у жь һʹәму Пʹехәмбәра тьштед кӧ дәрһәԛа ԝи тʹәмамийа Ньвисаред Пирозда ньвисар бун, шьровәкә.

28 Ахьрийа-ахьрийе, әԝана незики ԝи гӧнди бун кӧ дьчуне, у әԝи ӧса да кʹьфше кӧ йанчь әԝ рʹийа хԝә диса бәрдәԝам дькә. 29 Ле ԝана зоре ԝи кьр у готьн: «Щәм мә бьминә, чьмки ида бәре евар ә у рʹо дьчә ава». Әԝ жи тʹәви ԝан чу у щәм ԝан ма. 30 Гава әԝ тʹәви ԝан бәр сьфре бу, әԝи нан һьлда, дӧа кьр, нан кәрʹ кьр* у да ԝан. 31 Һьнге ԝана фәʹм кьр кӧ әԝ кʹе йә у әԝ нас кьрьн, ле әԝ бәр чʹәʹве ԝан ӧнда бу. 32 У ԝана һәврʹа гот: «Гәло агьр дьле мә нәдькʹәт, гава әԝи рʹеда тʹәви мә хәбәр дьда у Ньвисаред Пироз зәлал шьровәдькьр?» 33 У һәма ԝе сьһʹәте әԝана рʹабун у вәгәрʹийанә Оршәлиме. Ԝана Йанздәһ тʹәви йед дьн щьвийайи дитьн, 34 йед кӧ готьн: «Рʹасти жи Хӧдан жь мьрьне һатийә рʹакьрьне, у әԝ Шьмһʹунрʹа хӧйа буйә!» 35 Һьнге ԝана гьли кьр кӧ рʹеда чь ԛәԝьми у чаԝа ԝана әԝ нас кьр гава әԝи нан кәр кьр.

36 Чахе ԝана һе дәрһәԛа ван тьшта хәбәр дьда, Иса нав ԝанда хӧйа бу у гот: «Сьлав ль ԝә».* 37 Ле әԝана зьравԛәтанди бун, у жь тьрсе ԝана тʹьре рʹӧһʹәки дьвиньн. 38 Һьнге әԝи ԝанрʹа гот: «Чьма һун тʹәвльһәв бунә у дьле хԝәда дькʹәвьнә шьке? 39 Дәст у ньгед мьн бьньһерʹьн, әва әз ьм. Дәстед хԝә бьдьнә мьн у бьвиньн, чьмки һәрге әз рʹӧһʹ бума, ԝәйе нькарьбуйа дәсте хԝә бьда бәдәна мьн».* 40 Гава әԝи әв йәк дьгот, дәст у ньгед хԝә нишани ԝан кьрьн. 41 Ле ԝана жь шабуне у жь әʹщебмайибуне һе баԝәр нәдькьр, ләма жи әԝи ԝанрʹа гот: «Тьштәки хԝарьне бал ԝә һәйә?» 42 Ԝана жи кьдорә мәʹсийе пьжанди да ԝи, 43 әԝи жи һьлда у бәр чʹәʹве ԝан хԝар.

44 Паше әԝи ԝанрʹа гот: «Гава әз һе бал ԝә бум, мьн ԝәрʹа гот ԝәки һʹәму тьштед кӧ Ԛануна Мусада, Ньвисаред Пʹехәмбәрада у Зәбурада дәрһәԛа мьн һатьнә ньвисаре, гәрәке бенә сери». 45 Һьнге әԝи али ԝан кьр кӧ мәʹна Ньвисаред Пироз бь тʹәмами фәʹм бькьн,* 46 у ԝанрʹа гот: «Аԝа ӧса ньвисар ә: Мәсиһ ԝе бьчәрчьрә у рʹожа сьсийа ԝе жь мьрьне бе рʹакьрьне. 47 У сәр һʹиме наве ԝи, дәрһәԛа тʹобәкьрьне кӧ бахшандьна гӧна бьстиньн, ԝе һʹәму мьләтарʹа бе бәлакьрьне, дәстпебуйи жь Оршәлиме. 48 Һуне бьбьнә шәʹдед ван тьшта. 49 У тьште кӧ Баве мьн соз дайә, әзе ԝәрʹа бьшиньм. Ле һун, бажерда бьминьн һʹәта жь жор ԛәԝате бьстиньн».

50 Паше әԝи әԝ дәрхьстьн, бьрьн Бәйтанйайе, у ԝедәре дәстед хԝә бьльнд кьр у дӧа ль ԝан кьр. 51 Гава әԝи һе дӧа ль ԝан дькьр, әԝ жь ԝан ԛәтийа у бәрбь әʹзмен һатә һьлдане. 52 Ԝана сәре хԝә бәр ԝи дани у бь шабунәкә мәзьн вәгәрʹийанә Оршәлиме. 53 У әԝана һәр гав пʹарьстгәһеда бун у пәсьне Хԝәде дьдан.