ЛЬ ГОРА ЙУҺʹӘННА

1 Дәстпекеда Хәбәр* һәбу. Хәбәр тʹәви Хԝәде бу у Хәбәр мина Хԝәде бу.* 2 Әԝ дәстпекеда тʹәви Хԝәде бу. 3 Һәр тьшт бь ԝи чебу, у тʹӧ тьшт бейи ԝи ченәбу.

4 Бь ԝи жийин чебу, у жийин бона мәрьва рʹонайи бу. 5 Рʹонайи тәʹрийеда шәԝԛ дьдә, ле тәʹрийе әԝ зәфт нәкьрийә.

6 Мәрьвәк һат, йе кӧ алийе Хԝәдеда һатьбу шандьне. Наве ԝи Йуһʹәнна бу. 7 Әв мәрьв ча шәʹдә һат, ԝәки бона рʹонайе шәʹдәтийе бьдә, сәва кӧ һʹәму щурʹә мәрьв пе ԝи баԝәр бькьн. 8 Әԝ хԝәха әԝ рʹонайи нибу, ле әԝи гәрәке шәʹдәти бьда бона ԝе рʹонайе.

9 Әв рʹонайа рʹаст, йа кӧ һʹәму щурʹә мәрьварʹа рʹонайе дьдә, гәрәке зутьрәке бьһата дьнйайе. 10 Әԝ дьнйайеда бу, у дьнйа бь сайа ԝи чебу, ле бәле дьнйайе әԝ нас нәкьр. 11 Әԝ һатә бал щьмәʹта хԝә, ле ԝана әԝ ԛәбул нәкьр. 12 Ле һʹәмуйед кӧ әԝ ԛәбул кьрьн, әԝи изьн да ԝан ԝәки бьбьнә зарʹед Хԝәде, чьмки ԝана баԝәрийа хԝә ԝи ани.* 13 У әԝана һатьнә буйине нә жь бәндә,* нә жь хԝәстьна бәдәне у нә жи жь хԝәстьна мәрьва, ле жь Хԝәде.

14 Хәбәр бу мәрьв* у нав мәда жит. Мә рʹумәта ԝи дит, рʹумәта кӧ кӧрʹе тайе тʹәне жь бав стандийә, у әԝи тʹьме рʹасти дьгот у Хԝәде жь ԝи рʹази бу.* 15 (Йуһʹәнна дәрһәԛа ԝи шәʹдәти дьда у бь дәнгәки бьльнд дьгот: «Сәр ви кәси мьн готьбу: ‹Йе кӧ пәй мьнрʹа те, жь мьн мәзьнтьр буйә, чьмки әԝ һе пешийа мьн һәбу›».) 16 Мә һʹәмуйа ԛәнщийа мәзьн тʹер-тʹьжә жь ԝи стандийә, чьмки әԝ бь ԛәнщийа мәзьн тʹьжә йә. 17 Хԝәде бь дәсте Муса Ԛанун дайә, ле ԛәнщийа мәзьн у рʹасти, бь дәсте Иса Мәсиһ дайә. 18 Тʹӧ мәрьви тʹӧ щар Хԝәде нәдитийә, ле тайе тʹәне кӧ хԝәдек ә у кʹеләка Баве йә,* әԝи Әԝ мәрʹа әʹйан кьрийә.

19 Әв ә шәʹдәтийа Йуһʹәнна, чахе Щьһуйа жь Оршәлиме кʹаһин у Леԝи шандьн бал ԝи, сәва кӧ жь ԝи бьпьрсьн: «Тӧ кʹи йи?» 20 Әԝ жь пьрса ԝан нәрʹәвийа у әшкәрә гот: «Әз Мәсиһ ниньм». 21 Ԝана же пьрси: «Ле тӧ кʹи йи? Тӧ Елйас и?» Әԝи гот: «На». Ԝана пьрси: «Тӧ әԝ Пʹехәмбәр и, йе кӧ гәрәке бьһата?» Әԝи гот: «На!» 22 Һьнге ԝана жь ԝи пьрси: «Тӧ кʹи йи? Дә мәрʹа бежә, ԝәки әм щаба ԝан бьдьн, йед кӧ әм шандьнә. Тӧйе дәрһәԛа хԝә чь мәрʹа бежи?» 23 Әԝи гот: «Әԝ әз ьм, йе кӧ бәрʹийеда бь дәнгәки бьльнд дькә гази: ‹Рʹийа Йаһоԝа рʹаст кьн›, чаԝа кӧ Ишайа пʹехәмбәр готийә». 24 Әԝ мәрьв алийе Ферьсийада һатьбун шандьне. 25 Ԝана жь ԝи пьрси: «Һәрге тӧ Мәсиһ нини, нә Елйас у нә жи Пʹехәмбәр и, ижа тӧ чьрʹа дьньхӧмини?»* 26 Йуһʹәнна щаба ԝан да: «Әз аведа дьньхӧминьм. Ле нав ԝәда йәк һәйә, кӧ һун ԝи нас накьн, 27 әԝ пәй мьн те, у әз нә жи һежа мә чарьхед ԝи бехьм».* 28 Әв тьшт алийе дьнә Чʹәме Урдӧне, ль Бәйтанйайе, ԝи щийе кӧ Йуһʹәнна дьньхӧманд, ԛәԝьмин.

29 Рʹожа дьн, әԝи дит кӧ Иса незики ԝи дьбә, у гот: «Ва йә, Бәрхе Хԝәде, йе кӧ гӧне дьнйайе һьлдьдә! 30 Әԝ ә, йе кӧ мьн сәр ԝи готьбу: ‹Пәй мьнрʹа мәрьвәк те, йе кӧ жь мьн мәзьнтьр буйә, чьмки әԝ һе пешийа мьн һәбу›. 31 Һәла һе мьн жи әԝ нас нәдькьр, ле әз һатьм кӧ аведа бьньхӧминьм, ԝәки әԝ Исраеледа бе әʹйанкьрьне». 32 Йуһʹәнна ӧса жи шәʹдәти да: «Мьн дит кӧ рʹӧһʹе Хԝәде мина кәвоткәке жь әʹзмен дакʹәтә сәр ԝи у сәр ԝи ма. 33 Һәла һе мьн жи әԝ нас нәдькьр, ле Әԝе кӧ әз шандьмә, ԝәки аведа бьньхӧминьм, мьнрʹа гот: ‹Сәр кʹе тӧ бьвини кӧ рʹӧһʹ дадькʹәвә у сәр дьминә, әԝ ә йе кӧ бь рʹӧһʹе пироз дьньхӧминә›. 34 Мьн жи әв йәк дит, у мьн шәʹдәти да ԝәки Кӧрʹе Хԝәде әԝ ә».

35 Рʹожа дьн, Йуһʹәнна диса ԝедәре сәкьни бу у дӧ шагьртед ԝи жи тʹәви ԝи бун, 36 у гава әԝи дит кӧ Иса дәрбаз дьбә, гот: «Ва йә Бәрхе Хԝәде!» 37 Чахе ԝан дӧ шагьрта әв готьнед ԝи бьһистьн, пәй Иса чун. 38 Иса зьвьрʹи, дит кӧ әԝана пәй ԝи тен у ԝанрʹа гот: «Һун чь дьгәрʹьн?» Ԝана ԝирʹа гот: «Рәби, тӧ шәв кʹидәре дьмини?» (хәбәра «Рәби» те һʹәсабе «Дәрсдар».) 39 Әԝи ԝанрʹа гот: «Ԝәрен, у һуне бьвиньн». Нивро незики сьһʹәта чара* бу. Әԝана жи тʹәви ԝи чун у дитьн кӧ әԝ шәв кʹидәре дьминә. Ԝе рʹоже әԝана щәм ԝи ман. 40 Әндраԝьс, бьре Шьмһʹун Пәтрус, йәк жь ԝан һәрда бу, йед кӧ готьнед Йуһʹәнна бьһистьн у пәй Иса чун. 41 Әԝи пешийе бьре хԝә Шьмһʹун дит у ԝирʹа гот: «Мә Мәсиһ дитийә» («Мәсиһ» те һʹәсабе «Йе Бьжарти»), 42 у әԝи әԝ бьрә щәм Иса. Гава Иса ль ԝи ньһерʹи, гот: «Тӧ Шьмһʹун и, кӧрʹе Йуһʹәнна; наве тә ԝе Кифас бә» (чь кӧ те ԝәлгәрʹандьне «Пәтрус»).

43 Рʹожа дьн, Иса дьхԝәст һәрʹә Щәлиле. Әԝи Филипо дит у ԝирʹа гот: «Пәй мьн ԝәрә». 44 Филипо жь Бәйтсайдайе, жь бажаре Әндраԝьс у Пәтрус бу. 45 Филипо Натанйел дит у ԝирʹа гот: «Мә әԝ кәс дит, дәрһәԛа кʹижани Ԛануна Мусада у ньвисаред Пʹехәмбәрада ньвисар бу: Исайе кӧрʹе Усьв жь Ньсрәте». 46 Ле Натанйел гот: «Ԛә тьштәки ԛәнщ дькарә жь Ньсрәте дәркʹәвә?» Филипо жи гот: «Ԝәрә у пе чʹәʹве хԝә бьвинә». 47 Иса дит кӧ Натанйел бәрбь ԝи те у сәр ԝи гот: «Ва йә, Исраелики рʹаст, нава кʹижанеда мьхәнәти тʹӧнә йә». 48 Натанйел жь ԝи пьрси: «Тӧ жь кʹӧ мьн нас дьки?» Иса жерʹа гот: «Пешийа кӧ Филипо гази тә кьра, мьн тӧ бьн дара һежиреда дити». 49 Натанйел гот: «Дәрсдар,* тӧ Кӧрʹе Хԝәде йи, тӧ Пʹадше Исраеле йи». 50 Иса жи щаба ԝи да: «Мьн тәрʹа гот, кӧ мьн тӧ бьн дара һежиреда дити, ләма тӧ ве йәке баԝәр дьки?» 51 Паше Иса гот: «Әз рʹаст ԝәрʹа дьбежьм, һуне әʹзмане вәкьри у мәләкед Хԝәде бьвиньн, йед кӧ тенә хԝаре бал Кӧрʹе инсен у дьчьн жор».

2 Рʹожа сьсийа, Ԛанайа Щәлиледа дәʹԝатәк һәбу, у дийа Иса ԝедәре бу. 2 Иса у шагьртед ԝи жи һатьбунә тʹәглифкьрьне сәр ве дәʹԝате.

3 Гава шәрав ида хьлаз дьбу, дийа Иса жерʹа гот: «Шәрава ԝан нәма». 4 Ле Иса ԝерʹа гот: «Чи ише мә йә?* Һе ԝәхте мьн нәһатийә». 5 Дийа ԝи бәрдәстийарʹа гот: «Әԝ ԝәрʹа чь бежә, бькьн». 6 Ԝедәре 6 кʹупед кәвьри бона аве һәбун, йед кӧ ль гора әʹдәте Щьһуйа бона паԛьжкьрьне дьһатьнә хәбьтандьне. Һәр кʹупәки дькарьбу ԝәкә 2 йан 3 пиван* ав һьлда. 7 Иса ԝанрʹа гот: «Ван кʹупа бь аве тʹьжә кьн». У ԝана әԝ һʹәта дев тʹьжә кьр. 8 Паше әԝи ԝанрʹа гот: «Ньһа һьнәки дәрхьн у бәрпьрсийаре дәʹԝатерʹа бьвьн». У ԝана ӧса жи кьр. 9 Гава бәрпьрсийаре дәʹԝате ава кӧ бьбу шәрав тәʹм кьр (әԝи ньзаньбу кӧ әԝ жь кʹӧ һат, тʹәне бәрдәстийед кӧ ав дәрхьстьн заньбун), гази зәʹве кьр, 10 у жерʹа гот: «Һәр кәс пешийе шәрава рʹьнд дәрдьхә, у гава меван сәрхԝәш дьбьн, әԝ шәрава нәрʹьнд дәрдьхә. Ле тә һʹәта ньһа шәрава рʹьнд хԝәй кьрийә». 11 Әв кʹәрәмәта кӧ Иса Ԛанайа Щәлиледа кьр, кʹәрәмәта ԝийә пешьн бу. Бь ви аԝайи әԝи рʹумәта хԝә әʹйан кьр, у шагьртед ԝи баԝәрийа хԝә ԝи анин.

12 Паши ве йәке, әԝ тʹәви дийа хԝә, бьред хԝә, у шагьртед хԝә чу Кәпәрнаһуме, ле әԝана ԝедәре гәләк рʹож нәман.

13 Щәжьна Дәрбазбуне йа Щьһуйа незик дьбу, у Иса һьлкʹьшийа Оршәлиме. 14 Пʹарьстгәһеда әԝи мәрьвед кӧ дәԝар, пәз у кәвотк дьфьротьн у ӧса жи пʹәрәгӧһерʹ рʹуньшти дитьн. 15 Һьнге әԝи жь бәна ԛамчик чекьр, у һʹәму кәс тʹәви пәз у дәԝаред ԝан жь пʹарьстгәһе дәрхьстьн, ԛӧрʹушед пʹәрәгӧһерʹа авитьн у тʹәхтед ԝан ԝәлгәрʹандьн. 16 У әԝи кәвоткфьрошарʹа гот: «Вана жь вьра һьлдьн! Ида мала Баве мьн нәкьнә мала арш-вершийе».* 17 Шагьртед ԝи анин бира хԝә кӧ һатийә ньвисаре: «Хирәта һьндава мала тә ԝе мина агьрәки гӧрʹ дьле мьнда бә».*

18 Һьнге Щьһуйа жь ԝи пьрсин: «Бь чь нишане тӧ дькари мәрʹа избат ки, ԝәки изьна тә һәйә ван тьшта бьки?» 19 Иса щаба ԝан да: «Әве пʹарьстгәһе һьлшиньн, у әзе ԝе нава се рʹожада ава кьм». 20 Һьнге Щьһуйа ԝирʹа готьн: «Әв пʹарьстгәһ нава 46 салада һатийә авакьрьне, у тӧ дьхԝази нава се рʹожада ава ки?» 21 Ле гава әԝи дәрһәԛа пʹарьстгәһе дьгот, әԝи бәʹса бәдәна хԝә дькьр. 22 Гава Иса жь мьрьне һатә рʹакьрьне, шагьртед ԝи анинә бира хԝә кӧ әԝи әв йәк чәнд щара готьбу, у ԝана баԝәрийа хԝә Ньвисаред Пироз у готьнед Иса ани.

23 Чахе Иса ԝәʹде Щәжьна Дәрбазбуне Оршәлимеда бу, гәләк мәрьва кʹәрәмәтед кӧ әԝи дькьрьн дитьн, у баԝәрийа хԝә ԝи* анин. 24 Ле Иса бь тʹәмами итʹбарийа хԝә ԝана нәдьани, чьмки әԝи әԝ һʹәму нас дькьрьн, 25 у әԝ нә һʹәԝще ԝе йәке бу, кӧ кәсәки бона мәрьвәки ԝирʹа тьштәк бьгота, чьмки әԝи дьле мәрьва заньбу.

3 Ферьсики бь наве Никодемо һәбу, йе кӧ сәрԝерәки Щьһуйа бу. 2 Әԝ шәв һатә щәм Иса у ԝирʹа гот: «Дәрсдар,* әм заньн ԝәки тӧ жь Хԝәде ча дәрсдар һати, чьмки әв кʹәрәмәтед кӧ тӧ дьки, тʹӧ кәс бе аликʹарийа Хԝәде нькарә бькә». 3 Иса ԝирʹа гот: «Әз рʹаст тәрʹа дьбежьм, һәрге кәсәк тʹәзәда* нәйе буйине, әԝе нькарьбә Пʹадшатийа Хԝәде бьвинә». 4 Никодемо же пьрси: «Гәло йәки кал чаԝа дькарә тʹәзәда бе буйине? Ԛә әԝ дькарә диса бькʹәвә зьке дийа хԝә у бе буйине?» 5 Иса щаба ԝи да: «Әз рʹаст тәрʹа дьбежьм, һәрге кәсәк жь аве у рʹӧһʹ* нәйе буйине, ԝе нькарьбә бькʹәвә Пʹадшатийа Хԝәде. 6 Жь бәдәне, бәдән те буйине у жь рʹӧһʹ, рʹӧһʹ те буйине. 7 Әʹщебмайи нәминә, кӧ мьн тәрʹа гот: ‹Һун гәрәке тʹәзәда бенә буйине›. 8 Ба ль кʹӧ дьхԝазә ԝедәре рʹадьбә. Һун дәнге ба дьбьһен, ле ньзаньн әԝ жь кʹӧ те, йан дьчә кʹӧ. Һәр кәсе кӧ жь рʹӧһʹ те буйине жи ӧса йә».

9 Никодемо жь Иса пьрси: «Әв йәк чаԝа дьбә?» 10 Иса гот: «Тӧ дәрсдаре Исраеле йи у ван тьшта ньзани? 11 Әз рʹаст тәрʹа дьбежьм, тьштед кӧ әм заньн, дьбежьн, у шәʹдәтийа тьштед кӧ мә дитийә, дьдьн. Ле һун шәʹдәтийа мә ԛәбул накьн. 12 Мьн дәрһәԛа тьштед кӧ сәр әʹрде нә, ԝәрʹа гьли кьр, ле һун баԝәр накьн, ижа һәрге әз дәрһәԛа тьштед әʹзмани гьли кьм, һуне чаԝа баԝәр кьн? 13 Һьм жи, тʹӧ мәрьв һьлнәкʹьшийайә әʹзмен, хенщи Кӧрʹе инсен, йе кӧ жь әʹзмен һатә хԝаре. 14 Чаԝа кӧ Муса бәрʹийеда мәʹр бьльнд кьр, Кӧрʹе инсен жи гәрәке ӧса бе бьльндкьрьне,* 15 ԝәки һәр кәсе кӧ ԝи баԝәр бькә жийина һʹәта-һʹәтайе бьстинә.

16 Хԝәде дьнйа ӧса һʹәз кьр, ԝәки Кӧрʹе хԝәйи тайе-тʹәне да, сәва кӧ һәр кәсе кӧ баԝәрийа хԝә ԝи тинә, нәмьрә, ле жийина һʹәта-һʹәтайе бьстинә. 17 Хԝәде Кӧрʹе хԝә нәшандийә дьнйайе, ԝәки әԝ диԝана дьнйайе бькә, ле ԝәки дьнйа бь сайа ԝи хьлаз бә. 18 Йе кӧ баԝәрийа хԝә ԝи тинә, ԝе нәйе диԝанкьрьне. Ле йе кӧ баԝәрийа хԝә ԝи найнә, ида һатийә диԝанкьрьне, чьмки әԝи баԝәрийа хԝә Кӧрʹе Хԝәде йе тайе тʹәне нәанийә.* 19 Һʹиме диԝанкьрьне әв ә: Рʹонайи һатийә дьнйайе, ле мәрьва дәԝса рʹонайе, тәʹри һʹәз кьрьн, чьмки кьред ԝан хьраб бун. 20 Йе кӧ тьштед хьраб дькә, рʹонайе нәфрʹәт дькә у бәрбь рʹонайе начә, ԝәки кьред ԝи әшкәрә нәбьн. 21 Ле йе кӧ тьштед рʹаст дькә, әԝ бәрбь рʹонайе дьчә, ԝәки әшкәрә бә кӧ кьред ԝи ль гора ԛьрара Хԝәде бун».

22 Паши ве йәке, Иса тʹәви шагьртед хԝә чу гӧндед Щьһустане, у ԝедәре әԝи һьнә ԝәʹдә тʹәви ԝан дәрбаз кьр у мәрьв дьньхӧмандьн.* 23 Ле Йуһʹәнна жи мәрьв дьньхӧмандьн ль Әʹйноне, незики Салиме, чьмки ԝедәре ав зәʹф бу. Мәрьв дьһатьн бал ԝи у дьһатьнә ньхӧмандьне; 24 һьнге Йуһʹәнна һе нәавитьбунә кәле.

25 Нав шагьртед Йуһʹәнна у Щьһукида дәрһәԛа әʹдәте паԛьжкьрьне дәʹԝ пешда һат. 26 Ләма жи әԝана чун бал Йуһʹәнна у жерʹа готьн: «Дәрсдар, бьньһерʹә, мәрьве кӧ тʹәви тә алийе дьнә Чʹәме Урдӧне бу, дәрһәԛа кʹижани тә шәʹдәти да, мәрьва дьньхӧминә у гьшк дьчьнә бал ԝи». 27 Йуһʹәнна щаб да у гот: «Мәрьв нькарә тьштәки бьстинә, һʹәта кӧ жь әʹзмен ԝирʹа нәйе дайине. 28 Һун хԝәха шәʹдә нә, кӧ мьн ӧса готьбу: ‹Әз Мәсиһ ниньм, ле әз пешийа ԝи һатьмә шандьне›. 29 Бук бона зәʹва йә. Ле һәвале зәʹве чахе дьсәкьнә у дәнге ԝи дьбьһе, гәләк ша дьбә. Ләма жи әз бь шабуне тʹьжә бум. 30 Мәсиһ гәрәке һе мәзьн бә, ле әз гәрәке һе бьчʹук бьм».

31 Йе кӧ жь жоре те, сәр һʹәмуйарʹа йә. Йе кӧ жь әʹрде йә, дәрһәԛа тьштед кӧ сәр әʹрде нә хәбәр дьдә, чьмки әԝ жь әʹрде йә. Йе кӧ жь әʹзмен те, сәр һʹәмуйарʹа йә. 32 Әԝ дәрһәԛа тьштед кӧ дитийә у бьһистийә шәʹдәтийе дьдә, ле тʹӧ кәс шәʹдәтийа ԝи ԛәбул накә. 33 Ле йе кӧ шәʹдәтийа ԝи ԛәбул дькә, избат дькә* кӧ Хԝәде рʹаст ә. 34 Әԝе кӧ Хԝәде ле шандийә, гьлийед Хԝәде дьбежә, чьмки Хԝәде бь мәрʹдани рʹӧһʹе хԝә дьдә. 35 Бав Кӧрʹ һʹәз дькә у һәр тьшт дайә дәсте ԝи. 36 Йе кӧ Кӧрʹ баԝәр дькә, әԝе жийина һʹәта-һʹәтайе бьстинә. Ле йе кӧ гӧрʹа Кӧрʹ накә, әԝе жийине нәвинә, ле хәзәба Хԝәде ԝе сәр ԝи бьминә.

4 Ферьсийа бьһистьн кӧ Иса жь Йуһʹәнна зедәтьр мәрьва дькә шагьрт у дьньхӧминә,* 2 ле шагьртед ԝи дьньхӧмандьн, нә кӧ Иса хԝәха. 3 Гава Иса дәрһәԛа ве йәке пеһʹәсийа, жь Щьһустане дәркʹәт у диса чу Щәлиле. 4 Ле гәрәке әԝ Самәрйайерʹа дәрбаз буйа. 5 Әԝ һатә бажарәки Самәрйайе наве кʹижани Сиһар бу, незики ԝи әʹрди кʹижан кӧ Аԛуб дабу кӧрʹе хԝә Усьв. 6 Бира Аԛуб ԝедәре бу. Иса бәр ве бире рʹуньшт, чьмки әԝ жь рʹеԝитийе ԝәстийайи бу. Нивро незики сьһʹәта донздәһа* бу.

7 Кʹӧлфәтәкә Самәри һат кӧ аве бькʹьшинә. Иса ԝерʹа гот: «Авәке бьдә әз вәхԝьм». 8 (Шагьртед ԝи чубун бажер кӧ хԝарьне бькʹьрʹьн.) 9 Һьнге кʹӧлфәта Самәри ԝирʹа гот: «Нә тӧ Щьһу йи, ле әз кʹӧлфәтәкә Самәри мә? Тӧ чаԝа аве жь мьн дьхԝази?» (Чьмки Щьһу Самәрйарʹа хәбәр надьн.) 10 Иса щаба ԝе да у гот: «Һәрге тә бьзаньбуйа кӧ Хԝәде чь беһәԛ дьдә тә, у кʹи йә кәсе кӧ тәрʹа дьбежә ‹Авәке бьдә әз вәхԝьм›, тәйе жь ԝи рʹәща кьра у әԝи ԝе ава жийине бьда тә». 11 Кʹӧлфәте ԝирʹа гот: «Әзхӧлам, тьштәки тә жи тʹӧнә кӧ аве пе бькʹьшини, у бир жи кʹур ә. Ижа тӧйе ве ава жийине жь кʹӧ бини? 12 Чьма тӧ жь баве мә Аԛуб мәзьнтьр и, йе кӧ әв бир дайә мә у жь ве бире, зарʹед ԝи, пәз у дәԝаред ԝи вәхԝарьнә?» 13 Иса щаба ԝе да: «Һәр кәсе кӧ жь ве аве вәхԝә, әԝе диса тʹи бә. 14 Ле кʹи кӧ жь ԝе аве вәхԝә йа кӧ әзе бьдьме, ԝе тʹӧ щар тʹи нәбә. Әԝ ав ԝе нав ԝида бьбә каникә кӧ жийина һʹәта-һʹәтайе дьдә». 15 Кʹӧлфәте ԝирʹа гот: «Әзхӧлам, ԝе аве бьдә мьн, ԝәки әз ида тʹи нәбьм у нәйемә вьра кӧ аве бькʹьшиньм».

16 Әԝи жерʹа гот: «Һәрʹә, гази мере хԝә бькә у пашда ԝәре». 17 Кʹӧлфәте ԝирʹа гот: «Мере мьн тʹӧнә йә». Иса жи гот: «Тә рʹаст гот кӧ мере тә тʹӧнә йә. 18 Чьмки пенщ меред тә һәбун, у әԝе кӧ ньһа тʹәви тә йә, мере тә нинә. Әв йәк тә рʹаст гот». 19 Кʹӧлфәте ԝирʹа гот: «Әзхӧлам, әз дьвиньм кӧ тӧ пʹехәмбәр и. 20 Кал-бавед мә сәр ви чʹийайи Хԝәде һʹәбандьнә, ле һун дьбежьн щийе һʹәбандьне гәрәке ль Оршәлиме бә». 21 Иса жерʹа гот: «Мьн баԝәр бькә, ԝәхт ԝе бе кӧ һуне нә сәр ви чʹийайи, у нә жи ль Оршәлиме Бав бьһʹәбиньн. 22 Һун бе занәбун дьһʹәбиньн, ле әм сәр һʹиме занәбуне дьһʹәбиньн, чьмки хьлазбун жь Щьһуйа дәстпедьбә. 23 Ле бәле, әԝ ԝәхт те у ида һатийә жи кӧ хьзмәткʹаред рʹаст бь рʹӧһʹ у рʹастийе Бав бьһʹәбиньн. Чьмки Бав хьзмәткʹаред ӧса дьгәрʹә. 24 Хԝәде Рʹӧһʹ ә, у йед кӧ ԝи дьһʹәбиньн, гәрәке бь рʹӧһʹ у рʹастийе ԝи бьһʹәбиньн». 25 Кʹӧлфәте гот: «Әз заньм кӧ йе Бьжарти, кʹижан кӧ ԝирʹа Мәсиһ те готьне, гәрәке бе. Гава әԝ бе, әԝе мәрʹа һәр тьшти әшкәрә кә». 26 Иса жерʹа гот: «Әԝ әз ьм, кӧ тәрʹа хәбәр дьдьм».

27 Һәма һьнге шагьртед ԝи һатьн. Әԝана әʹщебмайи ман кӧ Иса кʹӧлфәтерʹа хәбәр дьдә, ле һәмьки тʹӧ кәси нәгот: «Тӧ чь дьхԝази?» йан «Чьма тӧ ԝерʹа хәбәр дьди?» 28 Һьнге кʹӧлфәте щерʹе хԝәйи аве һишт, чу бажер у мәрьварʹа гот: 29 «Ԝәрен ԝи мәрьви бьвиньн, йе кӧ һʹәму тьштед кӧ мьн бәре кьрьбун, мьнрʹа гот. Дьбәкә әԝ ә Мәсиһ?» 30 Әԝана жи жь бажер дәркʹәтьн у дьһатьнә бал ԝи.

31 Ԝе дәме, шагьрта лавайа Иса кьрьн: «Дәрсдар, тьштәки бьхԝә». 32 Ле әԝи ԝанрʹа гот: «Хԝарьнәкә мьн һәйә, кӧ һун ньзаньн». 33 Һьнге шагьрта жь һәвдӧ пьрсин: «Гәло кәсәки ԝирʹа хԝарьн анийә?» 34 Иса ԝанрʹа гот: «Хԝарьна мьн әԝ ә, ԝәки ԛьрара ԝи биньм сери у шьхӧле ԝи тʹәмам кьм, йе кӧ әз шандьмә. 35 Һун хԝәха набежьн кӧ һʹәта дьруне чар мәһ һәйә? Ле әз ԝәрʹа дьбежьм: Сәре хԝә бьльнд кьн у ль зәвийа бьньһерʹьн, кӧ әԝ зәр бунә у бона дьруне һазьр ьн. 36 Йе кӧ дьдьру һәԛе хԝә дьстинә у бона жийина һʹәта-һʹәтайе бәр тʹоп дькә, ләма йе кӧ дьчинә у йе кӧ дьдьру, һәрд жи һәврʹа ша дьбьн. 37 Бәле, әв готьн рʹаст ә: ‹Йәк дьчинә у йәки дьн дьдьру›. 38 Мьн һун шандьн, ԝәки тьштед кӧ ԝә нәчандьнә бьдьрун. Кәсед дьн чандьнә, ле һун жь кʹәда ԝан кʹаре дьстиньн».

39 Гәләк Самәрийед кӧ жь ԝи бажари бун, баԝәрийа хԝә ԝи анин, жь бо шәʹдәтийа ве кʹӧлфәте, кӧ дьгот: «Һʹәму тьштед кӧ мьн кьрьбун, әԝи мьнрʹа готьн». 40 У чахе Самәри һатьн бал ԝи, ԝана жь ԝи рʹәща кьр кӧ әԝ бал ԝан бьминә, у әԝ жи дӧ рʹожа ԝедәре ма. 41 Ахьрийеда, бона хәбәрдана ԝи гәләк мәрьвед дьн жи баԝәрийа хԝә ԝи анин, 42 у ԝана кʹӧлфәтерʹа гот: «Әм ида нә кӧ пе готьна тә баԝәр дькьн, ле мә хԝәха бьһист у әм заньн кӧ әв мәрьв бь рʹасти жи хьлазкʹаре дьнйайе йә».

43 Пәй ван һәр дӧ рʹожарʹа, Иса жь ԝедәре чу Щәлиле. 44 Әԝи хԝәха гот кӧ ԛәдьре пʹехәмбәр щи-мьскʹәне ԝида тʹӧнә. 45 Гава әԝ гьһиштә Щәлиле, Щәлилийа әԝ ԛәбул кьр, чьмки ԝәʹде щәжьне әԝана жи ль Оршәлиме бун у ԝана һʹәму тьштед кӧ Иса ԝедәре кьрьбун, дитьн.

46 Паше Иса диса һатә Ԛанайа Щәлиле, ль щийе кӧ әԝи ав кьрьбу шәрав. Ль Кәпәрнаһуме бәрдәстики пʹадша һәбу, кӧрʹе кʹижани нәхԝәш бу. 47 Гава әв мәрьв пеһʹәсийа кӧ Иса жь Щьһустане һатийә Щәлиле, әԝ чу бал ԝи у же рʹәща кьр кӧ әԝ бе у кӧрʹе ԝи, йе кӧ бәр мьрьне бу, ԛәнщ кә. 48 Ле Иса ԝирʹа гот: «Һʹәта кӧ һун нишан у кʹәрәмәта нәвиньн, һуне тʹӧ щар баԝәр нәкьн». 49 Бәрдәстийе пʹадша жерʹа гот: «Хӧдан, һе зарʹа мьн нәмьрийә тʹәви мьн ԝәре». 50 Иса ԝирʹа гот: «Һәрʹә мале, кӧрʹе тә ԛәнщ буйә». Ви мәрьви баԝәрийа хԝә готьнед Иса ани у чу. 51 Әԝ һе рʹеда бу, хӧламед ԝи һатьн у готьн ԝәки кӧрʹе ԝи ԛәнщ буйә. 52 Әԝи жь ԝан пьрси һәла кʹижан сьһʹәтеда әԝ бәрбь пʹакбуне чу. Ԝана жи гот: «Дӧһӧ, нивро незики сьһʹәта йәке* гәрма ԝи дани». 53 Һьнге баве кӧрʹьк фәʹм кьр, кӧ әԝ һәма ве сьһʹәтеда бу, гава Иса ԝирʹа готьбу: «Кӧрʹе тә ԛәнщ буйә». Әԝи у тʹәмамийа мала ԝи Иса баԝәр кьрьн. 54 Әва кʹәрәмәта Исайә дӧда бу, гава әԝ жь Щьһустане һатә Щәлиле.

5 Паши ве йәке Иса чу Оршәлиме сәр щәжьнәкә Щьһуйа. 2 Ль Оршәлиме бәр Дәргәһе Пез һʹәԝзәки бь пенщ сьвдәред пе стуна һәйә, наве кʹижани бь Ибрани Бәйтһаста йә. 3 Ԝедәре гәләк кәсед нәхԝәш, кор, сәԛәт у шьлушәʹт вәләзийайи бун. 4* —— 5 У ԝедәре мәрьвәк һәбу, йе кӧ 38 сала нәхԝәш бу. 6 Иса әв мәрьв пʹалдайи дит, у заньбу кӧ ида гәләк ԝәхт ә әԝ нәхԝәш ә, же пьрси: «Тӧ дьхԝази ԛәнщ би?» 7 Мәрьве нәхԝәш ԝирʹа гот: «Әзхӧлам, гава ав һәв дькʹәвә, кәсәки мьн тʹӧнә кӧ мьн бькә һʹәԝз. У һʹәта әз дьгьһижьмә аве, кәсәки дьн пешийа мьн дькʹәве». 8 Иса ԝирʹа гот: «Рʹабә, ньвина хԝә һьлдә у бьгәрʹә». 9 У әԝ мерьк дәрберʹа ԛәнщ бу, ньвина хԝә һьлда у дәстпекьр рʹе һәрʹә.

Әв рʹожа Шәмийе* бу. 10 Ләма Щьһуйа ԝи мәрьве ԛәнщбуйирʹа готьн: «Иро рʹожа Шәмийе йә, изьн тʹӧнә кӧ тӧ ньвина хԝә бьви». 11 Ле әԝи ԝанрʹа гот: «Мәрьве кӧ әз ԛәнщ кьрьм мьнрʹа гот: ‹Ньвина хԝә һьлдә у бьгәрʹә». 12 Ԝана жи же пьрси: «Әв мәрьв кʹи йә кӧ тәрʹа гот: ‹Ньвина хԝә һьлдә у бьгәрʹә›?» 13 Ле әԝ мәрьве ԛәнщбуйи ньзаньбу кӧ әԝ кʹи бу, чьмки Иса нав әʹлаләтеда ӧнда бьбу.

14 Паше Иса әԝ мерьк пʹарьстгәһеда дит у жерʹа гот: «Бьньһерʹә, тӧ ԛәнщ буйи. Ида гӧна нәкә, ԝәки тьштәки һе хьраб нәйе сәре тә». 15 Әԝ мерьк чу у Щьһуйарʹа гот, ԝәки йе кӧ әԝ ԛәнщ кьр, Иса бу. 16 Ләма жи Щьһу пәй Иса дькʹәтьн, чьмки әԝи рʹожа Шәмийе әԝ тьшт дькьрьн. 17 Ле Иса ԝанрʹа гот: «Баве мьн һʹәта ньһа шьхӧл дькә у әз жи шьхӧл дькьм». 18 Бона ве йәке, Щьһуйа һе зедә дьхԝәстьн ԝи бькӧжьн, чьмки бь ньһерʹандьна ԝан әԝи нә тʹәне ԛануна рʹожа Шәмийе дьтʹәрʹьбанд, ле ӧса жи Хԝәде ча Баве хԝә нав дькьр, у бь ве йәке хԝә дькьрә ԝәкә Хԝәде.

19 Ләма Иса ԝанрʹа гот: «Әз рʹаст ԝәрʹа дьбежьм, Кӧрʹ нькарә жь бәр хԝә тьштәки бькә, тʹәне чь кӧ әԝ дьвинә Бав дькә, ве йәке дькә. Бав чь дькә Кӧрʹ жи ӧса дькә. 20 Чьмки Бав Кӧрʹ һʹәз дькә, у һәр тьште кӧ хԝәха дькә, нишани ԝи дькә. У әԝе һе тьштед мәзьн нишани ԝи бькә, ԝәки һун әʹщебмайи бьминьн. 21 Чаԝа кӧ Бав, мьрийа жь мьрьне рʹадькә, Кӧрʹ жи кәсед кӧ әԝ дьхԝазә, жь мьрьне рʹадькә. 22 Бав диԝана тʹӧ кәси накә, ле һʹәму һʹӧкӧме диԝанкьрьне дайә дәсте Кӧрʹ, 23 ԝәки һʹәму кәс һӧрмәте бьдьн Кӧрʹ, чаԝа кӧ әԝана һӧрмәте дьдьнә Бав. Кәсе кӧ һӧрмәте надә Кӧрʹ, әԝ һӧрмәте надә Баве жи кӧ әԝ шандийә. 24 Әз рʹаст ԝәрʹа дьбежьм, кәсе кӧ гӧһ дьдә готьнед мьн у йе кӧ әз шандьмә баԝәр дькә, әԝе жийина һʹәта-һʹәтайе бьстинә у нәйе диԝанкьрьне. Әԝе жь мьрьне дәрбази жийине бә.

25 Әз рʹаст ԝәрʹа дьбежьм, ԝәхт те у ида һатийә жи, кӧ йед мьри дәнге Кӧрʹе Хԝәде бьбьһен, у кәсед кӧ гӧһ дьдьн ԝе бьжин. 26 Чьмки ԛәԝата Бав һәйә, кӧ жийине бьдә, у әԝи ԛәԝат дайә Кӧрʹ, ԝәки әԝ жи жийине бьдә. 27 Бав һʹӧкӧм дайә дәсте Кӧрʹ, ԝәки диԝане бькә, чьмки әԝ Кӧрʹе инсен ә. 28 Сәр ве йәке әʹщебмайи нәминьн, чьмки әԝ ԝәхт незик дьбә, кӧ һʹәмуйед мәзәлада ԝе дәнге ԝи бьбьһен 29 у жь мьрьне рʹабьн. Йед кӧ ԛәнщи кьрьнә ԝе бона жийине рʹабьн, ле йед кӧ хьраби кьрьнә ԝе бона диԝанкьрьне рʹабьн. 30 Әз нькарьм тьштәки жь бәр хԝә бькьм. Әз жь Бав чь дьбьһем, ль гора ве йәке диԝане дькьм. У диԝана мьн һәԛ ә, чьмки әз нә кӧ ль гора хԝәстьна хԝә, ле ль гора хԝәстьна йе кӧ әз шандьмә, дькьм.

31 Һәрге әз хԝәха дәрһәԛа хԝә шәʹдәтийе бьдьм, шәʹдәтийа мьн нәрʹаст ә. 32 Кәсәки дьн һәйә, кӧ дәрһәԛа мьн шәʹдәтийе дьдә, у әз заньм кӧ шәʹдәтийа ԝи рʹаст ә. 33 Ԝә мәрьв шандьн бал Йуһʹәнна, у әԝи дәрһәԛа мьн шәʹдәтийа рʹаст да. 34 Ле әз һʹәԝще шәʹдәтийа мәрьва ниньм, әз ван тьшта дьбежьм, ԝәки һун хьлаз бьн. 35 Йуһʹәнна мина чʹьраке бу, кӧ дьшьхӧли у рʹонайи дьда, ле хԝәстьна ԝә дьреж нәкʹьшанд, ԝәки бь рʹонайа ԝи ша бьн. 36 Ле шәʹдәтийа мьн һәйә, кʹижан кӧ жь шәʹдәтийа Йуһʹәнна кӧ бона мьн да, мәзьнтьр ә, чьмки шьхӧлед кӧ Баве мьн данә мьн, ԝәки әз биньм сери, шәʹдәтийе дьдьн кӧ Бав әз шандьмә. 37 У Баве кӧ әз шандьмә, хԝәха бона мьн шәʹдәти дайә. Ле ԝә тʹӧ щара нә дәнге ԝи бьһистийә у нә жи рʹуйе ԝи дитийә, 38 у хәбәра ԝи дьле ԝәда наминә, чьмки һун баԝәрийа хԝә ԝи найньн, йе кӧ әԝи шандийә.

39 Һун Ньвисаред Пироз лекʹолин дькьн, чьмки һун дьфькьрьн кӧ һуне бь ве йәке жийина һʹәта-һʹәтайе бьстиньн, у һәма әв Ньвисар хԝәха бона мьн шәʹдәтийе дьдьн. 40 Ле диса жи һун нахԝазьн бенә бал мьн, ԝәки жийине бьстиньн. 41 Әз нахԝазьм мәрьв рʹумәте бьдьнә мьн, 42 ле әз рʹьнд заньм кӧ һʹәзкьрьна Хԝәде дьле ԝәда тʹӧнә йә. 43 Әз бь наве Баве хԝә һатьм, ле һун мьн ԛәбул накьн. Ле һәрге йәки дьн бь наве хԝә бьһата, ԝәйе әԝ ԛәбул кьра. 44 Һәрге һун рʹумәте дьдьнә һәвдӧ, ле рʹумәта кӧ жь Хԝәдайе тʹәк ә, нагәрʹьн, ида һуне чаԝа мьн баԝәр бькьн? 45 Нәфькьрьн кӧ әзе ԝә бәр Бав сущдар кьм. Йе кӧ ԝә сущдар дькә, Муса йә, әԝ ә йе кӧ ԝә гӧмана хԝә данийә сәр ԝи. 46 Бь рʹасти һәрге ԝә Муса баԝәр кьра, ԝәйе мьн жи баԝәр кьра, чьмки әԝи дәрһәԛа мьн ньвиси. 47 Ле һәрге һун ньвисаред ԝи баԝәр накьн, һуне чаԝа готьнед мьн баԝәр кьн?»

6 Паши ве йәке, Иса дәрбази алийе дьнә Бәʹра Щәлиле, демәк Тәбәрйайе бу. 2 У әʹлаләтәкә мәзьн пәй ԝи дьчу, чьмки ԝана дьдит кӧ әԝи чаԝа бь кʹәрәмәти кәсед нәхԝәш ԛәнщ дькьрьн. 3 Һьнге Иса һьлкʹьшийа сәр чʹийе у тʹәви шагьртед хԝә ԝедәре рʹуньшт. 4 Щәжьна Дәрбазбуне йа Щьһуйа незик дьбу. 5 Гава Иса дит, кӧ әʹлаләтәкә мәзьн те бал ԝи, Филипорʹа гот: «Әм кʹидәре нан бькʹьрʹьн, ԝәки әван мәрьва тʹер кьн?» 6 Ле әԝи әв йәк дьгот, ԝәки ԝи бьщерʹьбинә, чьмки хԝәха заньбу кӧ ԝе чь бькьра. 7 Филипо ԝирʹа гот: «Һәрге әм пе 200 динари жи нан бькʹьрʹьн, ԝе тʹере нәкә кӧ әм һәма пәʹрики бьдьнә һәр кәси». 8 Йәк жь шагьртед ԝи, Әндраԝьс, бьре Шьмһʹун Пәтрус, Исарʹа гот: 9 «Вьра гәдәки бьчʹук һәйә, щәм ԝи пенщ нанед щәһ у дӧ мәʹсийед бьчʹук һәнә. Ле ԝе чаԝа тʹера һаԛас мәрьва бькә?»

10 Иса гот: «Мәрьва бьдьнә рʹуньштандьне». Ԝи щийи гәләк чʹерә һәбу, у йед кӧ ԝедәре рʹуньштьн, тʹәне мер ԝәкә 5 000 бун. 11 Иса нан һьлда, шькьри да Хԝәде у паше мәрьварʹа бәла кьр. Бь ви щурʹәйи әԝи мәʹсийед бьчʹук жи бәла кьрьн, у һәр кәси чьԛас дьхԝәст һаԛас дьстанд. 12 Гава ԝана тʹер хԝар, әԝи шагьртед хԝәрʹа гот: «Ван бәрмайа тʹоп кьн, ԝәки тьштәк нәйе авитьне». 13 Ԝана жи жь ԝан пенщ нанед щәһ, кӧ мәрьва хԝарьбу, 12 сәвәт* тʹьжә бәрмайи тʹоп кьрьн.

14 Гава мәрьва әв кʹәрәмәта кӧ Иса кьр, дитьн, ӧса дьготьн: «Бь рʹасти Пʹехәмбәре кӧ ԝе бьһата дьнйайе, әв ә». 15 Һьнге Иса фәʹм кьр, кӧ әԝана дьхԝазьн ԝи бь дәсте зоре бькьнә пʹадша, ләма әԝ тʹәне диса чу сәр чʹийе.

16 Гава бу евар, шагьртед ԝи дакʹәтьнә бәр бәʹре. 17 Әԝана кʹәтьнә ԛәйике у рʹе кʹәтьн, ԝәки дәрбази Кәпәрнаһуме, алийе дьнә бәʹре бьн. Ида тәʹри кʹәтьбу әʹрде, ле Иса һе нәһатьбу щәм ԝан. 18 Баки ԛайим рʹабу у пʹелед бәʹре бьльнд дьбун. 19 Чахе әԝана ԝәкә 5 йан 6 километра* пешда чун, дитьн кӧ Иса сәр аверʹа дьмәшә у незики ԛәйике дьбә. Әԝана гәләк тьрсийан, 20 ле Иса ԝанрʹа гот: «Әз ьм, нәтьрсьн!» 21 Һьнге ԝана бь шабун әԝ һьлданә ԛәйике, у ԛәйик дәрберʹа гьһиштә ԝи щийи, кʹидәре кӧ әԝана дьчун.

22 Рʹожа дьн, әʹлаләта кӧ алийе дьнә бәʹре мабу, дит кӧ пештьри ԛәйикәкә бьчʹук ԝедәре ԛәйик тʹӧнә бу, ле Иса нәкʹәтьбу ԝе ԛәйике, шагьртед ԝи тʹәне чубун. 23 Ԝе дәме, жь Тәбәрйайе ԛәйик һатьн у незики ԝи щийи сәкьнин, кʹидәре кӧ әʹлаләте нан хԝарьбу, паши ве йәке чахе Хӧдан дӧада шькьри дабу Хԝәде. 24 Гава әʹлаләте дит, кӧ Иса у шагьртед ԝи ԝедәре ниньн, әԝана кʹәтьнә ԛәйика у чунә Кәпәрнаһуме, ԝәки Иса бьгәрʹьн.

25 Гава ԝана Иса алийе дьнә бәʹре дит, ԝана ԝирʹа гот: «Дәрсдар,* тӧ кʹәнге һати вьра?» 26 Иса ԝанрʹа гот: «Әз рʹаст ԝәрʹа дьбежьм, һун мьн дьгәрʹьн, нә бона ԝе йәке, кӧ ԝә кʹәрәмәт дитьнә, ле бона ԝе йәке, кӧ ԝә жь ԝи нани хԝарийә у тʹер бунә. 27 Нә кӧ бона хԝарьна кӧ иро һәйә у сьбе тʹӧнә йә бьхәбьтьн, ле бьхәбьтьн бона хԝарьна кӧ тʹӧ щар хьраб набә у жийина һʹәта-һʹәтайе дьдә. Ве хԝарьне Кӧрʹе инсен ԝе бьдә ԝә, чьмки Бав, Хԝәде, мора хԝәйә ԛәбулкьрьне дайә сәр ԝи».

28 Һьнге ԝана жь ԝи пьрси: «Гәрәке әм чь бькьн, ԝәки ван шьхӧлед Хԝәде биньнә сери?» 29 Иса ԝанрʹа гот: «Хԝәде дьхԝазә ԝәки һун ԝи баԝәр бькьн, йе кӧ әԝи шандийә». 30 Ле ԝана ԝирʹа гот: «Ижа тӧйе кʹижан кʹәрәмәте бьки, ԝәки әм бьвиньн у тә баԝәр бькьн? Тӧйе чь бьки? 31 Мәсәлә, кал-бавед мә бәрʹийеда мана дьхԝарьн, чаԝа кӧ һатийә ньвисаре: ‹Әԝи жь әʹзмен нан да ԝан›». 32 Һьнге Иса ԝанрʹа гот: «Әз рʹаст ԝәрʹа дьбежьм, нә кӧ Муса бу, йе кӧ жь әʹзмен нан да ԝә, ле Баве мьн нане рʹаст жь әʹзмен дьдә ԝә. 33 Чьмки нане Хԝәде әԝ ә, йе кӧ жь әʹзмен те хԝаре у жийине дьдә дьнйайе». 34 Һьнге ԝана жерʹа гот: «Хӧдан, һәртʹьм ви нани бьдә мә».

35 Иса ԝанрʹа гот: «Әз ьм нане жийине. Һәр кәсе кӧ те бал мьн, әԝе ԛә бьрʹчи нәбә, у йе кӧ мьн баԝәр дькә, әԝе тʹӧ щар тʹи нәбә. 36 Ле чаԝа кӧ мьн ԝәрʹа гот, ԝә әз дитьм, ле һун диса жи баԝәр накьн. 37 Һʹәмуйед кӧ Бав данә мьн ԝе бенә бал мьн, у йе кӧ бе бал мьн, әзе тʹӧ щар бәри ԝи нәдьм. 38 Чьмки әз жь әʹзмен һатьмә хԝаре, ԝәки нә кӧ ԛьрара хԝә биньм сери, ле ԛьрара ԝи, йе кӧ әз шандьмә. 39 Ԛьрара йе кӧ әз шандьмә әв ә, ԝәки әз һʹәмуйед кӧ әԝи данә мьн, тʹӧ кәси ӧнда нәкьм, ле рʹожа хьлазийе* ԝана жь мьрьне рʹакьм. 40 Чьмки ԛьрара Баве мьн әв ә, ԝәки һәр кәсе кӧ Кӧрʹ ԛәбул дькә у ԝи баԝәр дькә, жийина һʹәта-һʹәтайе бьстинә, у әзе рʹожа хьлазийе ԝи жь мьрьне рʹакьм».

41 Һьнге Щьһуйа сәр ԝи кьрьнә кӧтә-кӧт, чьмки әԝи гот: «Әз ьм нане кӧ жь әʹзмен һатә хԝаре». 42 У ԝана гот: «Нә әв Исайе кӧрʹе Усьв ә? Әм дийа ԝи у баве ԝи нас дькьн. Ижа әԝ ча дьбежә: ‹Әз жь әʹзмен һатьмә хԝаре›?» 43 Иса сәр ве йәке щаба ԝан да: «Бәс ә нав һәвда бькьнә кӧтә-кӧт. 44 Тʹӧ кәс нькарә бе бал мьн һʹәта Баве кӧ әз шандьмә, ԝи бәрбь мьн нәкʹьшинә, у әзе ԝи рʹожа хьлазийе жь мьрьне рʹакьм. 45 Ньвисаред Пʹехәмбәрада һатийә ньвисаре: ‹Әԝана һʹәму ԝе жь алийе Йаһоԝада бенә һинкьрьне›. Һәр кәсе кӧ гӧһ дьдә Бав у һин дьбә, те бал мьн. 46 Әв найе һʹәсабе кӧ кәсәки Бав дитийә. Тʹәне йе кӧ жь Хԝәде йә, әԝи Бав дитийә. 47 Әз рʹаст ԝәрʹа дьбежьм, йе кӧ баԝәр дькә, жийина ԝийә һʹәта-һʹәтайе һәйә.

48 Әз ьм нане жийине. 49 Кал-бавед ԝә бәрʹийеда мана дьхԝарьн, ле йәкә әԝана мьрьн. 50 Ле йе кӧ ви нане кӧ жь әʹзмен те хԝаре бьхԝә, әԝе нәмьрә. 51 Нане кӧ жь әʹзмен һатийә хԝаре у жийине дьдә, әз ьм. Һәрге кәсәк ви нани бьхԝә, әԝе һʹәта-һʹәтайе бьжи. Бәле, әв нан бәдәна мьн ә, йа кӧ әзе бьдьм ԝәки дьнйа бьжи».

52 Һьнге Щьһу һәврʹа кʹәтьнә дәʹԝе у дьготьн: «Әв мәрьв чаԝа дькарә бәдәна хԝә бьдә мә, ԝәки әм бьхԝьн?» 53 Иса ԝанрʹа гот: «Әз рʹаст ԝәрʹа дьбежьм, һәрге һун жь бәдәна Кӧрʹе инсен нәхԝьн у хуна ԝи вәнәхԝьн, һуне жийине нәстиньн.* 54 Йе кӧ жь бәдәна мьн бьхԝә у хуна мьн вәхԝә, ԝе жийина һʹәта-һʹәтайе бьстинә. У әзе ԝи рʹожа хьлазийе жь мьрьне рʹакьм. 55 Чьмки бәдәна мьн хԝарьна рʹаст ә у хуна мьн жи вәхԝарьна рʹаст ә. 56 Йе кӧ жь бәдәна мьн дьхԝә у хуна мьн вәдьхԝә, әԝ тʹәви мьн йәктийеда дьминә, у әз жи тʹәви ԝи йәктийеда дьминьм. 57 Чаԝа кӧ Баве сах әз шандьм у әз бь сайа Бав дьжим, бь ԝи аԝайи жи йе кӧ жь бәдәна мьн бьхԝә, ԝе бь сайа мьн бьжи. 58 Нане кӧ жь әʹзмен һатийә хԝаре, әв ә. Әв мина ԝи нани нинә, кʹижан кӧ кал-бавед ԝә дьхԝарьн, ле йәкә мьрьн. Ле йе кӧ жь ви нани бьхԝә, әԝе һʹәта-һʹәтайе бьжи». 59 Иса әв гьли готьн, гава кʹьништәкә* Кәпәрнаһумеда һин дькьр.

60 Гава шагьртед ԝи әв йәк бьһистьн, гәләка жь ԝан готьн: «Әԝ тьштед чьԛас әʹщеб дьбежә! Кʹи дькарә гӧһ бьдә ван гьлийа?» 61 Ле Иса заньбу кӧ шагьртед ԝи сәр ве йәке дькьнә кӧтә-кӧт, ләма жи әԝи ԝанрʹа гот: «Әв йәк баԝәрийа ԝә сьст дькә? 62 Ле һәрге һун бьвиньн кӧ Кӧрʹе инсен һьлдькʹьшә щийе кӧ әԝ бәре ԝедәре бу, һьнге һуне чь бькьн? 63 Рʹӧһʹ* жийине дьдә; бәдән ԛә кери тьштәки найе. Гьлийед кӧ мьн ԝәрʹа готьн, рʹӧһʹ у жийин ьн. 64 Ле нав ԝәда һьнәк һәнә, йед кӧ баԝәр накьн». Иса һе сәре серида заньбу кʹи баԝәр накә у кʹи ԝе нәмамийа ԝи бькә. 65 У әԝи гот: «Ләма жи мьн ԝәрʹа гот, тʹӧ кәс нькарә бе бал мьн, һʹәта кӧ Бав изьне нәдә».

66 Бона ве йәке, гәләк шагьртед ԝи вәгәрʹийанә шьхӧлед хԝәйә бәре у ида пәй ԝи нәдьчун. 67 Һьнге Иса жь Донздәһа* пьрси: «Дьԛәԝьмә һун жи дьхԝазьн һәрʹьн?» 68 Шьмһʹун Пәтрус щаба ԝи да: «Хӧдан, әм һәрʹьн щәм кʹе? Готьнед жийина һʹәта-һʹәтайе щәм тә нә. 69 Әм баԝәр дькьн у әм заньн, ԝәки тӧ Пирозе Хԝәде йи». 70 Иса ԝанрʹа гот: «Мьн һун 12 бьжартьн, рʹаст ә? Ле йәк жь ԝә бӧхданбеж ә». 71 Бь рʹасти әԝи дәрһәԛа Щьһуда, кӧрʹе Шьмһʹуне Исхәрйоти дьгот, кʹижан кӧ рʹаст ә йәк жь Донздәһа бу, ле һәма әԝ бу, йе кӧ ԝе нәмамийа Иса бькьра.

7 Паши ве йәке, Иса ль Щәлиле ма. Әԝи нәдьхԝәст һәрʹә Щьһустане, чьмки Щьһуйа дьхԝәстьн ԝи бькӧжьн. 2 Щәжьна Кончекьрьне* йа Щьһуйа незик дьбу, 3 ләма жи бьред ԝи ԝирʹа готьн: «Жь вьр һәрʹә Щьһустане, сәва кӧ шагьртед тә жи әԝ кьред кӧ тӧ дьки, бьвиньн. 4 Чьмки кәсе кӧ дьхԝазә нав-дәнг бә, кьред хԝә вәнашерә. Һәрге тӧ ван тьшта дьки, дә хԝә нишани дьнйайе кә». 5 Бь рʹасти бьред ԝи баԝәрийа хԝә ԝи нәдьанин. 6 Иса ԝанрʹа гот: «Ԝәхте мьн һе нәһатийә, ле ԝәхте ԝә тʹьме дәсте ԝәда йә. 7 Мәʹнийа дьнйайе тʹӧнә ԝәки ԝә нәфрʹәт кә, ле әԝ мьн нәфрʹәт дькә, чьмки әз шәʹдәтийе дьдьм, кӧ кьред ԝе хьраб ьн. 8 Һун һәрʹьн сәр ве щәжьне, ле әз ньһа найем, чьмки ԝәхте мьн һе нәһатийә». 9 Әԝи әв йәк ԝанрʹа гот у Щәлиледа ма.

10 Ле чахе бьред ԝи чунә щәжьне, паше әԝ жи чу ԝедәре, ле ӧса кӧ кәсәки ньзаньбу. 11 Щәжьнеда Щьһуйа ԝи дьгәрʹийан у дьпьрсин: «Әԝ кʹӧ йә?» 12 Нав хәлԛеда дәрһәԛа ԝи гәләк хәбәрдан дьчу. Һьнәка дьготьн: «Әԝ мәрьвәки баш ә». Һьнәка жи дьгот: «На. Әԝ хәлԛе дьхапинә». 13 Ле һәмьки жь тьрса Щьһуйа, тʹӧ кәси нәԝерьбу дәрһәԛа ԝи әшкәрә хәбәр да.

14 Гава ниве щәжьне дәрбаз бу, Иса чу пʹарьстгәһе у дәстпекьр һин кә. 15 Щьһу әʹщебмайи дьман у дьготьн: «Әԝ мәкʹтәбада* һин нәбуйә, ижа әԝ жь кʹӧ һаԛас баш Ньвисаред Пироз занә?» 16 Иса ԝанрʹа гот: «Чь кӧ әз һин дькьм, нә жь мьн ә, ле жь ԝи йә, йе кӧ әз шандьмә. 17 Йе кӧ бьхԝазә ԛьрара Хԝәде бинә сери, әԝе фәʹм бькә һәла әв һинкьрьн жь Хԝәде йә, йан әз жь бәр хԝә хәбәр дьдьм. 18 Йе кӧ жь бәр хԝә хәбәр дьдә, әԝ рʹумәта хԝә дьгәрʹә, ле әԝе кӧ рʹумәта йе кӧ әԝ шандийә дьгәрʹә, йәки рʹаст ә у нәһәԛи ԝида тʹӧнә. 19 Муса Ԛанун да ԝә, ӧса нинә? Ле тʹӧ кәс жь ԝә Ԛануне найнә сери. Ижа һун чьрʹа дьхԝазьн мьн бькӧжьн?» 20 Хәлԛе жи гот: «Щьн нав тәда йә. Кʹи дьхԝазә тә бькӧжә?» 21 Иса ԝанрʹа гот: «Мьн тʹәне кʹәрәмәтәк кьр у һун гьшк әʹщебмайи дьминьн. 22 Һәла бьфькьрьн: Муса ԛануна дәрһәԛа сьнәткьрьне да ԝә, ле әв жь Муса нибу, жь кал-баве ԝә бу, у һун рʹожа Шәмийе* жи сьнәт дькьн. 23 Һәрге һун рʹожа Шәмийе сьнәт дькьн, ԝәки Ԛануна Муса нәтʹәрʹьбә, ижа һун чьма һаԛас әʹщьз дьбьн, кӧ мьн рʹожа Шәмийе мәрьвәк бь тʹәмами ԛәнщ кьрийә? 24 Нә кӧ ль гора дитьна чʹәʹве хԝә, ле ль гора һәԛийе диԝане бькьн».

25 Һьнге һьнә жь бьнәлийед Оршәлиме дьготьн: «Нә әва әԝ мәрьв ә, йе кӧ әԝана дьхԝазьн бькӧжьн? 26 Ле һәла бьньһерʹьн, әԝ вьра әшкәрә хәбәр дьдә у әԝана тьштәки ԝирʹа набежьн. Дьбәкә сәрокед мә баԝәр бунә кӧ әԝ Мәсиһ ә? 27 Нә әм заньн кӧ әв мәрьв жь кʹӧ йә, ле чахе Мәсиһ бе, тʹӧ кәс ԝе ньзаньбә әԝ жь кʹӧ йә». 28 Ԝе дәме, гава Иса пʹарьстгәһеда һин дькьр, әԝи бь дәнгәки бьльнд гот: «Һун мьн нас дькьн у заньн әз жь кʹӧ мә. Әз хԝәсәрихԝә нәһатьмә, ле йе кӧ әз шандьмә бь рʹасти һәйә, у һун ԝи нас накьн. 29 Әз ԝи нас дькьм, чьмки әз жь ԝи һатьмә, у Әԝи әз шандьмә». 30 Һьнге ԝана дьхԝәст ԝи бьгьрьн, ле нькарьбун, чьмки ԝәхте ԝи һе нәһатьбу. 31 Ле диса жи, жь әʹлаләте гәләк мәрьва баԝәрийа хԝә ԝи дьанин у дьготьн: «Гава Мәсиһ бе, әԝе жь ԝи зедәтьр кʹәрәмәта бькә?»

32 Ферьсийа бьһист кӧ әʹлаләт сәр Иса дькә кӧтә-кӧт, ләма ԝана у сәрокед кʹаһина нобәдар шандьн, ԝәки ԝи бьгьрьн. 33 Һьнге Иса гот: «Әзе һьнә ԝәхт щәм ԝә бьминьм, паше әзе һәрʹьм щәм Ԝи, йе кӧ әз шандьмә. 34 Һуне мьн бьгәрʹьн, ле нәвиньн, у щийе кӧ әзе ԝедәре бьм, һуне нькарьбьн бен». 35 Һьнге Щьһуйа һәврʹа готьн: «Әв мәрьв ԝе һәрʹә кʹидәре кӧ әме ԝи нәвиньн? Ԛәй әԝ дьхԝазә һәрʹә бал Щьһуйед кӧ нав Йунанада бәла бунә у Йунана һин кә? 36 Гәло әԝ бь ван готьна чь дьхԝазә бежә: ‹Һуне мьн бьгәрʹьн, ле нәвиньн, у щийе кӧ әзе ԝедәре бьм, һуне нькарьбьн бен›?»

37 Рʹожа хьлазийе, кӧ рʹожа щәжьнейә һәрә фәрз бу, Иса рʹабу у бь дәнгәки бьльнд гот: «Һәрге кәсәк тʹи йә, бьра бе бал мьн у вәхԝә. 38 Йе кӧ мьн баԝәр дькә, чаԝа кӧ Ньвисаред Пирозда те готьне: ‹Ԝе чʹәмед ава жийине жь ԝи бькʹьшьн›». 39 Иса әв йәк дәрһәԛа рʹӧһʹе пироз гот. Кәсед кӧ ԝи баԝәр дькьрьн, ԝана ԝе зутьрәке әв рʹӧһʹ бьстанда. Ԝана әв рʹӧһʹ нәстандьбу, чьмки Иса һе нәһатьбу рʹумәткьрьне. 40 Һьнә кәсед жь нав әʹлаләте кӧ әв гьли бьһистьн, готьн: «Бь рʹасти жи әԝ Пʹехәмбәр ә». 41 Һьнәка жи дьготьн: «Әԝ Мәсиһ ә». Ле һьнәкед дьн жи дьготьн: «Чьма Мәсиһ гәрәке жь Щәлиле бьһата? 42 Нә Ньвисаред Пирозда те готьне, кӧ Мәсиһ ԝе жь зӧрʹәта Даԝьд бә у жь Бәйтләһʹме, жь гӧнде Даԝьд бе?» 43 У жь бо Иса нав щьмәʹтеда дӧтирәти чебу. 44 Жь ԝан һьнәка дьхԝәст ԝи бьгьрьн, ле тʹӧ кәси дәст нәда ԝи.

45 Нобәдар вәгәрʹийан щәм сәрокед кʹаһина у Ферьсийа. Ԝана жь нобәдара пьрси: «Ԝә чьма әԝ нәани вьр?» 46 Нобәдара гот: «Тʹӧ кәси тʹӧ щар мина ви мәрьви хәбәр нәдайә». 47 Ферьсийа жи ԝанрʹа готьн: «Һун жи һатьнә хапандьне? 48 Ԛә жь сәрԝера йан жь Ферьсийа кәсәки баԝәрийа хԝә ԝи анийә? 49 Ле әв щьмәʹта кӧ Ԛануне ньзанә, ньфьрʹкьри йә». 50 Никодемо, йе кӧ йәк жь Ферьсийа бу у бәре чубу бал Иса, ԝанрʹа гот: 51 «Ль гора Ԛануна мә, пешийа кӧ әм диԝана кәсәки бькьн, әм гәрәке пешийе гӧһ бьдьнә ԝи у пебьһʹәсьн кӧ әԝи чь кьрийә, ӧса нинә?» 52 Ԝана жи ԝирʹа гот: «Тӧ жи жь Щәлиле йи? Рʹьнд лекʹолин кә у тӧйе бьвини кӧ тʹӧ пʹехәмбәр гәрәке жь Щәлиле нәһата».*

8 12 Һьнге Иса диса тʹәви ԝан хәбәр да у гот: «Әз рʹонайа дьнйайе мә. Кʹи кӧ пәй мьн те ԝе тʹӧ щар тәʹрийеда нәгәрʹә, ле әԝе бьбә хԝәйе рʹонайа жийине». 13 Сәр ве йәке Ферьсийа готьн: «Тӧ хԝәха дәрһәԛа хԝә шәʹдәтийе дьди; шәʹдәтийа тә нәрʹаст ә». 14 Иса щаба ԝан да: «Һәрге әз дәрһәԛа хԝә шәʹдәтийе дьдьм, шәʹдәтийа мьн рʹаст ә, чьмки әз заньм кӧ әз жь кʹӧ һатьмә у кʹӧда дьчьм. Ле һун ньзаньн кӧ әз жь кʹӧ һатьмә у кʹӧда дьчьм. 15 Һун ль гора ньһерʹандьна мәрьва* диԝане дькьн, ле әз диԝана тʹӧ кәси накьм. 16 Ле һәрге әз диԝане бькьм жи, диԝанкьрьна мьн рʹаст ә, чьмки әз тʹәне ниньм, ле Баве кӧ әз шандьмә, тʹәви мьн ә. 17 Ԛануна ԝәда жи ньвисар ә: ‹Шәʹдәтийа дӧ мәрьва рʹаст ә. 18 Әз дәрһәԛа хԝә шәʹдәтийе дьдьм у Баве кӧ әз шандьмә жи дәрһәԛа мьн шәʹдәтийе дьдә». 19 Ԝана жь ԝи пьрси: «Баве тә кʹидәре йә?» Иса гот: «Һун нә мьн нас дькьн, нә жи Баве мьн. Һәрге ԝә әз нас кьрама, ԝәйе Баве мьн жи нас кьра». 20 Әԝи әв гьли дьготьн, гава пʹарьстгәһеда бәр пʹәрәданге һин дькьр. Ле тʹӧ кәси әԝ нәгьрт, чьмки ԝәхте ԝи һе нәһатьбу.

21 Иса диса ԝанрʹа гот: «Әз дьчьм, у һуне мьн бьгәрʹьн, ле йәкә һуне нав гӧнед хԝәда бьмьрьн. Һун нькарьн бенә щийе кӧ әз дьчьме». 22 Һьнге Щьһуйа ӧса гот: «Дьбә кӧ әԝ дьхԝазә хԝә бькӧжә? Ләма дьбежә: ‹Һун нькарьн бенә щийе кӧ әз дьчьме›». 23 Иса ԝанрʹа гот: «Һун жь әʹрде нә, әз жь әʹзмен ьм. Һун жь ве дьнйайе нә, әз нә жь ве дьнйайе мә. 24 Ләма мьн ԝәрʹа гот: Һуне нав гӧнед хԝәда бьмьрьн. Һәрге һун баԝәр нәкьн кӧ әԝ әз ьм, һуне нав гӧнед хԝәда бьмьрьн». 25 Һьнге ԝана же пьрси: «Тӧ кʹи йи?» Иса жи ԝанрʹа гот: «Әз бадиһәԝа тʹәви ԝә хәбәр дьдьм. 26 Гәләк тьшт һәнә кӧ әз дәрһәԛа ԝә бежьм у гәләк тьшт кӧ диԝана ԝә бькьм. Ле Әԝе кӧ әз шандьмә рʹастийе дьбежә, у тьштед кӧ мьн жь ԝи бьһистьнә, әз дьнйайеда дьбежьм». 27 Ԝана фәʹм нәкьр кӧ әԝ бәʹса Бав дькә. 28 Һьнге Иса ԝанрʹа гот: «Гава һун Кӧрʹе инсен бьльнд кьн,* һьнге һуне бьзаньбьн кӧ әԝ әз ьм у әз тʹӧ тьшти хԝәсәрихԝә накьм, ле тʹәне чь кӧ Бав әз һин кьрьмә, әз ве йәке дьбежьм. 29 У Әԝе кӧ әз шандьмә тʹәви мьн ә. Әԝи әз тʹәне нәһиштьмә, чьмки әз һәртʹьм тьштед кӧ ԝи хԝәш тен, дькьм». 30 Гава әԝи әв тьшт готьн, гәләка ԝи баԝәр кьрьн.

31 Иса готә ԝан Щьһуйа, йед кӧ баԝәрийа хԝә ԝи анибун: «Һәрге һун һинкьрьна мьнда дьминьн, һун бь рʹасти жи шагьртед мьн ьн. 32 Һуне рʹастийе бьзаньбьн, у рʹасти ԝе ԝә аза кә». 33 Һьнәка жерʹа готьн: «Әм зӧрʹәта Бьраһим ьн, у мә тʹӧ щар кәсәкирʹа хӧламти нәкьрийә. Ижа тӧ чаԝа мәрʹа дьбежи: ‹Һуне аза бьн›?» 34 Иса ԝанрʹа гот: «Бь рʹасти, һәр кәсе кӧ гӧнә дькә, хӧламе гӧнә йә. 35 Хенщи ве йәке, хӧлам һʹәта-һʹәтайе мала ахайе хԝәда наминә, ле кӧрʹ һʹәта-һʹәтайе дьминә. 36 Ләма һәрге Кӧрʹ ԝә аза кә, һуне бь рʹасти жи аза бьн. 37 Әз заньм ԝәки һун жь зӧрʹәта Бьраһим ьн. Ле һун дьхԝазьн мьн бькӧжьн, чьмки готьнед мьн нагьһижьнә дьле ԝә. 38 Әз ԝан тьшта дьбежьм, чь кӧ мьн щәм Баве хԝә дитийә, ле һун тьштед кӧ ԝә жь баве хԝә бьһистьнә, дькьн». 39 Ԝана ԝирʹа гот: «Баве мә Бьраһим ә». Иса жи гот: «Һәрге һун зарʹед Бьраһим буна, ԝәйе мина кьред Бьраһим бькьра. 40 Ле һун дькьн кӧ мьн бькӧжьн, ԝи кәси, йе кӧ жь Хԝәде рʹасти бьһистийә у ԝәрʹа готийә. Бьраһим ӧса нәдькьр. 41 Һун кьред баве хԝә дькьн». Ԝана жерʹа гот: «Әм жь зьнекʹарийе нәһатьнә буйине. Тʹәне Бавәки мә һәйә, әԝ жи Хԝәде йә».

42 Иса ԝанрʹа гот: «Һәрге Хԝәде Баве ԝә буйа, ԝәйе әз һʹәз кьрама, чьмки әз жь Хԝәде һатьмә у бь сайа ԝи әз вьра мә. Әз хԝәсәрихԝә нәһатьмә, ле әԝи әз шандьмә. 43 Чьма һун гьлийед мьн фәʹм накьн? Чьмки һун нькарьн гӧһ бьдьнә гьлийед мьн. 44 Һун жь баве хԝә Мире-щьна нә, у һун дьхԝазьн хԝәстьнед баве хԝә биньн сери. Әԝ һе жь сәре серида бу меркӧж. Әԝ сәр рʹийа рʹастийе нәма, чьмки дьле ԝида рʹасти тʹӧнә йә. Гава әԝ дәрәԝа дькә, бь ве йәке әʹйан дькә кӧ йәки чаԝа йә, чьмки әԝ дәрәԝин ә у баве дәрәԝа йә. 45 Ле әз рʹастийе дьбежьм, ләма һун мьн баԝәр накьн. 46 Кʹи жь ԝә дькарә избат кә кӧ мьн гӧнә кьрийә? Һәрге әз рʹастийе дьбежьм, чьрʹа һун мьн баԝәр накьн? 47 Кʹи кӧ жь Хԝәде йә, гӧһ дьдә гьлийед Хԝәде. Ләма һун гӧһ надьн, чьмки һун жь Хԝәде ниньн».

48 Сәр ве йәке Щьһуйа ԝирʹа готьн: «Чьрʹа әм рʹаст набежьн кӧ ‹тӧ Самәри йи у щьн тәда йә›?» 49 Иса гот: «Щьн мьнда нинә. Әз рʹумәте дьдьмә Баве хԝә, ле һун мьн беһӧрмәт дькьн. 50 Әз рʹумәта хԝә нагәрʹьм, ле Әԝе кӧ дьхԝазә ԝәки әз бемә рʹумәткьрьне, Хԝәде йә, у һʹакьм Әԝ ә. 51 Әз рʹаст ԝәрʹа дьбежьм, кәсе кӧ гьлийед мьн тинә сери, әԝе тʹӧ щар мьрьне нәвинә». 52 Щьһуйа ԝирʹа готьн: «Ньһа әм заньн ԝәки щьн тәда йә. Бьраһим мьрийә, у пʹехәмбәр жи мьрьнә, ле тӧ дьбежи: ‹Кәсе кӧ гьлийед мьн тинә сери, әԝе тʹӧ щар мьрьне нәвинә›.* 53 Чьрʹа тӧ жь баве мә Бьраһим мәзьнтьр и? Әԝ у пʹехәмбәр жи мьрьнә. Тӧ хԝә дәԝса кʹе датини?» 54 Иса гот: «Һәрге әз рʹумәте бьдьмә хԝә, рʹумәта мьн тьштәк нинә. Йе кӧ мьн рʹумәт дькә, Баве мьн ә, кʹижанирʹа һун дьбежьн, кӧ Хԝәдайе ԝә йә. 55 Һун ԝи ԛә нас накьн, ле әз ԝи нас дькьм. Һәрге мьн бьгота, кӧ әз ԝи нас накьм, әзе жи мина ԝә дәрәԝин бума. Ле әз ԝи нас дькьм у гьлийед ԝи тиньм сери. 56 Һʹьзрәта баве ԝә Бьраһим әв бу, кӧ рʹожа мьн бьвинә, у әԝи әԝ дит у ша бу». 57 Һьнге Щьһуйа готьнә ԝи: «Тӧ һе 50 сали жи нини, у тӧ дьбежи кӧ тә Бьраһим дитийә?» 58 Иса ԝанрʹа гот: «Әз рʹаст ԝәрʹа дьбежьм, пешийа буйина Бьраһим, әз ида һәбум». 59 Һьнге ԝана кәвьр һьлдан кӧ бавежьнә ԝи, ле Иса хԝә вәшарт у жь пʹарьстгәһе дәркʹәт.

9 Гава Иса дәрбаз дьбу, әԝи мәрьвәк дит, кʹижан кӧ жь буйина хԝәда кор бу. 2 У шагьртед ԝи жь ԝи пьрсин: «Дәрсдар, кʹи гӧнә кьрийә кӧ әв мәрьв кор һатийә буйине, әԝи йан де-баве ԝи?» 3 Иса щаб да: «Нә әԝи гӧнә кьрийә, нә жи де-баве ԝи. Ле ӧса ԛәԝьми, ԝәки бь ве йәке кьред Хԝәде бенә әʹйанкьрьне. 4 Һʹәта кӧ һе рʹож ә, әм гәрәке хԝәстьна Ԝи, йе кӧ әз шандьмә биньн сери. Шәв те, һьнге тʹӧ кәс ԝе нькарьбә кʹар бькә. 5 Һʹәта кӧ әз дьнйайеда мә, әз рʹонайа дьнйайе мә». 6 Паши ԝан гьлийа, әԝи тʹуйи әʹрде кьр, жь тʹуке һʹәрʹи чекьр, әв һʹәрʹи ль чʹәʹве ԝи хьст 7 у ԝирʹа гот: «Һәрʹә сәрчʹәʹве хԝә һʹәԝзе Силԝамеда бьшо» (Силԝам те ԝәлгәрʹандьне: «Йе Шанди»). Әԝ жи чу сәрчʹәʹве хԝә шушт, у чахе вәгәрʹийа ида дьдит.

8 Щинаред ԝи у кәсед кӧ бәре дитьбун кӧ әԝи пʹарс дькьр, дьготьн: «Әва әве кор нинә, кӧ рʹудьньшт у пʹарс дькьр?» 9 Һьнәка дьготьн: «Әре, әԝ ә». Һьнәкед дьн жи дьготьн: «На, әв нинә, ле рʹәнге ԝида йә». Ле әԝи мәрьви дьгот: «Әԝ әз ьм». 10 Һьнге ԝана же пьрси: «Ижа чʹәʹвед тә чаԝа вәбун?» 11 Әԝи гот: «Әԝ мәрьве кӧ жерʹа дьбежьн Иса, һʹәрʹи чекьр, ль чʹәʹвед мьн хьст у мьнрʹа гот: ‹Һәрʹә Силԝаме у сәрчʹәʹве хԝә бьшо›. Әз жи чум, мьн сәрчʹәʹве хԝә шушт у чʹәʹвед мьн вәбун». 12 Ԝана жь ԝи пьрси: «Кʹӧ йә әв мәрьв?» Әԝи гот: «Әз ньзаньм».

13 Ԝана әв мәрьве кӧ бәре кор бу, бьрьнә щәм Ферьсийа. 14 Әԝ рʹожа кӧ Иса һʹәрʹи чекьр у чʹәʹвед ԝи вәкьрьн, рʹожа Шәмийе* бу. 15 Ферьсийа жи дәстпекьрьн жь ԝи мәрьви бьпьрсьн, һәла чʹәʹвед ԝи чаԝа вәбунә. Әԝи ԝанрʹа гот: «Әԝи һʹәрʹи ль чʹәʹвед мьн хьст, мьн сәрчʹәʹве хԝә шушт у ньһа әз дьвиньм». 16 Жь Ферьсийа һьнәка готьн: «Әв мәрьв жь Хԝәде нинә, чьмки әԝ рʹожа Шәмийе хԝәй накә». Ле һьнә мәрьвед дьн готьн: «Кәсе гӧнәкʹар чаԝа дькарә кʹәрәмәтед ӧса бькә?» У нав ԝанда дӧтирәти чебу. 17 Һьнге ԝана диса жь мәрьве, кӧ кор бу пьрси: «Тӧйе дәрһәԛа ԝи, йе кӧ чʹәʹвед тә вәкьрьн, чь бежи?» Әԝи гот: «Әԝ пʹехәмбәр ә».

18 Ле Щьһуйа һʹәта гази де-баве ԝи нәкьрьн, баԝәр нәдькьрьн кӧ әԝ бәре кор бу у ньһа чʹәʹвед ԝи вәбунә. 19 У ԝана жь де-баве ԝи пьрси: «Әва кӧрʹе ԝә йә, йе кӧ һун дьбежьн ԝәки әԝ жь буйина хԝәда кор ә? Ижа ньһа әԝ чаԝа дьвинә?» 20 Де-баве ԝи готьн: «Әм заньн кӧ әԝ кӧрʹе мә йә у әԝ жь буйина хԝәда кор бу. 21 Ле әԝ чаԝа ньһа дьвинә әм ньзаньн, у кʹи чʹәʹвед ԝи вәкьрьнә жи әм ньзаньн. Жь ԝи бьпьрсьн. Әԝ мәзьн ә, бьра хԝәха бежә». 22 Де-баве ԝи жь тьрса Щьһуйа ӧса готьн, чьмки Щьһуйа ида сафи кьрьбун, кӧ һәрге кәсәк Иса ча Мәсиһ ԛәбул кә, гәрәке жь кʹьниште* бе дәрхьстьне. 23 Ләма жи де-баве ԝи готьн: «Әԝ мәзьн ә, жь ԝи бьпьрсьн».

24 Аԝа ԝана щара дӧда гази ԝи мәрьви кьрьн, йе кӧ бәре кор бу, у готьне: «Рʹумәте бьдә Хԝәде у рʹаст мәрʹа бежә. Әм заньн кӧ әв мәрьв гӧнәкʹар ә». 25 Әԝи щаба ԝан да: «Әз ньзаньм әԝ гӧнәкʹар ә, йан на. Ле әз тьштәки заньм, бәре әз кор бум, у ньһа әз дькарьм бьвиньм». 26 Һьнге ԝана же пьрси: «Әԝи чь кьр? Әԝи чаԝа чʹәʹвед тә вәкьрьн?» 27 Әԝи щаба ԝан да: «Мьн ԝәрʹа ида гот, ле ԝә гӧһ нәда мьн. Һун чьма дьхԝазьн диса бьбьһен? Ԛәй һун жи дьхԝазьн бьбьнә шагьртед ԝи?» 28 Ле ԝана әԝ беһӧрмәт кьр у готьн: «Тӧ йи шагьрте ԝи, ле әм шагьртед Муса нә. 29 Әм заньн кӧ Хԝәде Мусарʹа хәбәр дьда, ле әв мәрьв жь кʹидәре йә, әм ньзаньн». 30 Әԝи жи ԝанрʹа гот: «Һәма әв ә әʹщеб, кӧ әԝи чʹәʹвед мьн вәкьрьнә, ле һун ньзаньн әԝ жь кʹидәре йә. 31 Әм заньн кӧ Хԝәде гӧһ надә гӧнәкʹара, ле һәрге кәсәк Хԝәде дьтьрсә у ԛьрара ԝи тинә сери, Хԝәде гӧһ дьдә ԝи. 32 Һе бәреда ԛә тʹӧ щар нәһатийә бьһистьне кӧ чʹәʹвед кәсәки жь буйинеда кор, һатьнә вәкьрьне. 33 Һәрге әв мәрьв жь Хԝәде нибуйа, ԝе нькарьбуйа тьштәк бькьра». 34 Ԝана жи ԝирʹа гот: «Тӧ бь тʹәмами нав гӧнәда һати буйине, у тӧ мә һин дьки?» У ԝана әԝ авитьнә дәрва!

35 Иса бьһист кӧ ԝана әв мәрьв авитьнә дәрва, у гава әԝи ле дит, ԝирʹа гот: «Тӧ баԝәрийа хԝә Кӧрʹе инсен тини?» 36 Әԝи мәрьви гот: «Әзхӧлам, әԝ кʹи йә, кӧ әз баԝәрийа хԝә ԝи биньм?» 37 Иса жерʹа гот: «Тә әԝ дит, у ньһа әԝ тәрʹа хәбәр дьдә». 38 Әԝи гот: «Хӧдан, әз баԝәрийа хԝә ԝи тиньм». У сәре хԝә бәр Иса дани. 39 Һьнге Иса ԝирʹа гот: «Әз бона ԝе диԝанкьрьне һатьмә дьнйайе, сәва кӧ кәсед кор бьвиньн, у йед кӧ дьвиньн, кор бьн». 40 Ферьсийед кӧ ԝедәре бун әв йәк бьһистьн у ԝирʹа готьн: «Бь готьна тә әм жи кор ьн?» 41 Иса ԝанрʹа гот: «Һәрге һун кор буна, гӧнед ԝә ԝе тʹӧнә буна. Ле чьмки һун дьбежьн ‹Әм дьвиньн›, һун гӧнед хԝәда дьминьн».

10 Иса гот: «Әз рʹаст ԝәрʹа дьбежьм, йе кӧ дәрирʹа накʹәвә ахле пез, ле щики дьнрʹа дькʹәве, әԝ дьз у ԛачах ә. 2 Ле йе кӧ дәрирʹа дькʹәвә һьндӧрʹ, әԝ шьване пез ә. 3 Нобәдар ԝирʹа дәри вәдькә, у пәз гӧһ дьдьнә дәнге ԝи. Әԝ бь нава гази пәзед хԝә дькә у ԝана дәрдьхә дәрва. 4 Гава әԝ һʹәму пәзед хԝә дәрдьхә дәрва, әԝ пешийа ԝан дьчә у пәз пәй ԝи дьчьн, чьмки әԝана дәнге ԝи нас дькьн. 5 Әԝана ԝе тʹӧ щар пәй йәки хәриб нәчьн, ле ԝе жь ԝи бьрʹәвьн, чьмки әԝана дәнге хәриба нас накьн». 6 Иса әв мәсәлә ԝанрʹа гот, ле ԝана фәʹм нәкьр, кӧ әԝ дәрһәԛа чь дьбежә.

7 Ләма жи Иса диса гот: «Әз рʹаст ԝәрʹа дьбежьм, әз ьм дәри бона пез. 8 Һʹәму кәсед кӧ хԝә дәԝса мьн данинә, дьз у ԛачах ьн, ле пез гӧһ нәданә ԝан. 9 Әз ьм дәри. Һәр кәсе кӧ бь мьн дькʹәвә һьндӧрʹ, ԝе хьлаз бә. Әԝе бькʹәве, дәркʹәвә, у щийе чʹерә бьвинә. 10 Дьз тʹәне бона дьзийе, кӧштьне у ԛьрʹкьрьне те. Ле әз һатьмә, сәва кӧ пәз жийине бьстиньн у һʹәта-һʹәтайе бьжин. 11 Әз ьм шьване ԛәнщ. Шьване ԛәнщ әʹмьре хԝә бона пез дьдә. 12 Хәбатчийе кӧ нә шьван ә у нә жи хԝәйе пез ә, гава дьвинә гӧр те, пез дьһелә у дьрʹәвә. Гӧр һьнәка дьгьрә у йед дьн жи жь һәв бәла дькә, 13 чьмки әԝ мәрьв тʹәне хәбатчи йә у әԝ бәр пез накʹәвә. 14 Әз ьм шьване ԛәнщ. Әз пәзед хԝә нас дькьм у пәзед мьн жи мьн нас дькьн, 15 чаԝа кӧ Бав мьн нас дькә у әз жи Бав нас дькьм. У әз әʹмьре хԝә бона пез дьдьм.

16 Пәзед мьнә дьн жи һәнә, йед кӧ нә жь ви ахьли нә. Әз гәрәке ԝана жи биньм, у әԝе гӧһ бьдьнә дәнге мьн. Әԝе бьбьнә кәрик у ԝе шьванәки ԝан һәбә. 17 Бав мьн һʹәз дькә, чьмки әз әʹмьре хԝә дьдьм, ԝәки әʹмьре хԝә диса бьстиньм. 18 Тʹӧ кәс әʹмьре мьн жь мьн настинә, ле әз хԝәха әʹмьре хԝә дьдьм. Һʹӧкӧме мьн һәйә кӧ әз әʹмьре хԝә бьдьм у диса жи бьстиньм. Мьн әв тʹәми жь Баве хԝә стандийә».

19 Бона ԝан гьлийа нав Щьһуйада диса дӧтирәти чебу. 20 Жь ԝан гәләка дьгот: «Щьн нав ԝида йә у әԝ дин буйә. Чьма һун гӧһ дьдьнә ԝи?» 21 Һьнәкед дьн жи дьготьн: «Мәрьве кӧ щьн навда йә, ӧса хәбәр надә. Ԛә щьн дькарә чʹәʹве кора вәкә?»

22 Һьнге ль Оршәлиме Щәжьна Пирозкьрьна Пʹарьстгәһе дәрбаз дьбу у зьвьстан бу, 23 у Иса пʹарьстгәһеда сьвдәра* Сьлеманда дьгәрʹийа. 24 Һьнге Щьһуйа дора ԝи гьртьн у ԝирʹа готьн: «Тӧйе һʹәта кʹәнге мә шькеда бьһели? Һәрге тӧ йи Мәсиһ, мәрʹа зәлал бежә». 25 Иса щаба ԝан да: «Мьн ԝәрʹа гот, ле һун баԝәр накьн. Кьред кӧ әз бь наве Баве хԝә дькьм, дәрһәԛа мьн шәʹдәтийе дьдьн. 26 Ле һун баԝәр накьн, чьмки һун пәзед мьн ниньн. 27 Пәзед мьн гӧһ дьдьнә дәнге мьн, әз ԝана нас дькьм у әԝана пәй мьн тен. 28 Әз жийина һʹәта-һʹәтайе дьдьмә ԝан, у әԝана ԝе тʹӧ щар нәмьрьн. У тʹӧ кәс ԝе ԝана жь дәсте мьн дәрнәхә. 29 Чь кӧ Баве мьн дайә мьн, жь һʹәму тьштед дьн ԛимәттьр ә, у тʹӧ кәс нькарә ԝана жь дәсте Бав дәрхә. 30 Әз у Бав йәк ьн».*

31 Щьһуйа диса кәвьр һьлдан, ԝәки ԝи бьдьнә бәр кәвьра. 32 Иса ԝанрʹа гот: «Мьн гәләк кьред ԛәнщ жь Бав нишани ԝә кьр. Сәва кʹижан жь ван кьра һун мьн дьдьнә бәр кәвьра?» 33 Щьһуйа щаба ԝи дан: «Әм сәва кьред ԛәнщ тә надьнә бәр кәвьра, ле бона кʹьфьрийа. Чьмки тӧ мәрьв и, ле хԝә дьки хԝәде». 34 Иса жи щаба ԝан да: «Нә ԛануна ԝәда ньвисар ә, кӧ Хԝәде дьбежә: ‹Һун хԝәде нә›?* 35 Һәрге Хԝәде ԝанрʹа, кʹижана кӧ хәбәра Хԝәде сущдар дькә, гот ‹һун хԝәде нә›, у набә жи кӧ Ньвисаред Пироз бәтал бә, 36 ле һун чаԝа ԝирʹа, йе кӧ Бав ԝи пироз кьрийә у шандийә дьнйайе, дьбежьн ‹Тӧ кʹьфьрийа дьки›, жь бо ԝе йәке кӧ мьн гот ‹Әз Кӧрʹе Хԝәде мә›? 37 Һәрге әз кьред Баве хԝә накьм, мьн баԝәр нәкьн. 38 Ле һәрге әз ԝана дькьм, һун кӧ мьн баԝәр накьн жи, һәма кьред мьн баԝәр кьн, ԝәки һун бьзаньбьн у фәʹм кьн кӧ Бав тʹәви мьн йәктийеда йә у әз тʹәви Бав йәктийеда мә». 39 Һьнге ԝана диса дьхԝәст Иса бьгьрьн, ле әԝ жь дәсте ԝан хьлаз бу.

40 Әԝ диса дәрбази алийе дьнә Чʹәме Урдӧне бу, ль щийе кӧ Йуһʹәнна пешда дьньхӧманд,* у әԝ ԝедәре ма. 41 Гәләк мәрьв һатьн бал ԝи у дьготьн: «Йуһʹәнна кʹәрәмәтәк жи нәкьрийә, ле һʹәму тьштед кӧ әԝи дәрһәԛа ԝи мәрьви готьбу, рʹаст бу». 42 У ԝедәре гәләк мәрьва баԝәрийа хԝә ԝи анин.

11 Мәрьвәки бь наве Лазар нәхԝәш кʹәтьбу. Әԝ жь Бәйтанйайе, жь гӧнде Мәрйәм у хушка ԝе Мәртʹайе бу. 2 Әва әԝ Мәрйәм бу, йа кӧ рʹуне бинхԝәш сәр ньгед Хӧданда рʹетьбу у бь пʹорʹе хԝә ньгед ԝи зьһа кьрьбу. Әв Лазаре кӧ нәхԝәш бу, бьре ԝе бу. 3 Хушкед ԝи кәсәк шандьн щәм Иса, кӧ ԝирʹа бежьн: «Хӧдан, әԝе кӧ тӧ һʹәз дьки нәхԝәш ә». 4 Ле гава Иса әв йәк бьһист, гот: «Әв нәхԝәши бона мьрьне нинә, ле бона ве йәке йә, кӧ Хԝәде у Кӧрʹе Хԝәде бенә рʹумәткьрьне».

5 Иса Мәртʹайе, хушка ԝе у Лазар һʹәз дькьр. 6 Ле гава әԝи бьһист кӧ Лазар нәхԝәш ә, диса жи дӧ рʹожа ль щийе кӧ әԝ ԝедәре бу, ма. 7 Паше әԝи шагьртарʹа гот: «Ԝәрен, әм диса һәрʹьн Щьһустане». 8 Шагьрта ԝирʹа готьн: «Дәрсдар, чәндәк пешда Щьһуйа дьхԝәстьн тӧ бьдана бәр кәвьра, у ньһа тӧ дьхԝази диса һәрʹи ԝедәре?» 9 Иса щаб да: «Нә рʹонайа рʹоже 12 сьһʹәт ә? Һәрге кәсәк рʹож дьгәрʹә, әԝ налькʹӧмә, чьмки әԝ рʹонайа ве дьнйайе дьвинә. 10 Ле һәрге кәсәк шәв дьгәрʹә, әԝ дьлькʹӧмә, чьмки рʹонайи ԝида тʹӧнә».

11 Паши ван гьлийа, әԝи гот: «Досте мә Лазар хәԝрʹа чуйә, ле әз дьчьм ԝедәре, кӧ ԝи һʹьшйар кьм». 12 Һьнге шагьрта жерʹа готьн: «Хӧдан, һәрге әԝ хәԝрʹа чуйә, әԝе ԛәнщ бә». 13 Иса дәрһәԛа мьрьна ԝи дьгот, ле ԝана тʹьре кӧ әԝ дәрһәԛа рʹазане дьбежә. 14 Һьнге Иса зәлал ԝанрʹа гот: «Лазар мьрийә, 15 у әз ша мә кӧ ԝедәре нибум, чьмки чь кӧ әзе бькьм ԝе баԝәрийа ԝә ԛәԝи кә. Ле ньһа ԝәрен әм һәрʹьн бал ԝи». 16 Һьнге Тʹума, йе кӧ жерʹа «Щеԝи» дьготьн, шагьртед дьнрʹа гот: «Ԝәрен әм жи һәрʹьн, кӧ тʹәви ԝи бьмьрьн».

17 Гава Иса гьһиштә ԝедәре, әԝ пеһʹәсийа кӧ Лазар ида чар рʹож ә тʹьрбеда йә. 18 Бәйтанйа незики Оршәлиме бу, ԝәкә 3 километра* же дур бу. 19 Гәләк Щьһу һатьбун кӧ бәр дьле Мәртʹа у Мәрйәмеда бен, бона мьрьна бьре ԝан. 20 У гава Мәртʹайе бьһист кӧ Иса те, чу пешийа ԝи, ле Мәрйәм малда ма. 21 Һьнге Мәртʹайе готә Иса: «Хӧдан, һәрге тӧ ль вьр буйайи, бьре мьне нәмьра. 22 Ле ньһа жи әз заньм, тӧ жь Хԝәде чь бьхԝази, Хԝәде ԝе бьдә тә». 23 Иса ԝерʹа гот: «Бьре тә ԝе жь мьрьне рʹабә». 24 Мәртʹайе ԝирʹа гот: «Әз заньм кӧ рʹожа хьлазийе, ԝәʹде рʹабуна мьрийа әԝе жь мьрьне рʹабә». 25 Иса ԝерʹа гот: «Рʹабун у жийин әз ьм. Йе кӧ мьн баԝәр дькә, һәрге бьмьрә жи, ԝе вәгәрʹә жийине. 26 У һәр кәсе кӧ дьжи у мьн баԝәр дькә, әԝе ԛә нәмьрә. Тӧ ве йәке баԝәр дьки?» 27 Әԝе гот: «Әре Хӧдан, әз баԝәр дькьм кӧ тӧ Мәсиһ и, Кӧрʹе Хԝәде, йе кӧ гәрәке бьһата дьнйайе». 28 Паши ԝан гьлийа, әԝ чу гази хушка хԝә Мәрйәме кьр у дьзива жерʹа гот: «Дәрсдар ль вьр ә у әԝ гази тә дькә». 29 Гава әԝе әв йәк бьһист, зу рʹабу у чу бал ԝи.

30 Иса һе нәкʹәтьбу гӧнд, ле ль ԝи щийи мабу, кʹидәре Мәртʹа рʹасти ԝи һатьбу. 31 Щьһуйед кӧ малда тʹәви Мәрйәме бун у бәр дьле ԝеда дьһатьн, гава дитьн кӧ әԝ зу рʹабу у дәркʹәтә дәрва, пәй ԝе чун, чьмки ԝана тʹьре әԝе һәрʹә бәр тʹьрбе бьгьри. 32 Гава Мәрйәм гьһиштә щийе кӧ Иса ԝедәре бу у әԝ дит, хԝә авитә ньгед ԝи у гот: «Хӧдан, һәрге тӧ ль вьр буйайи, бьре мьне нәмьра». 33 Гава Иса дит кӧ әԝ у Щьһуйед кӧ тʹәви ԝе һатьбун, дьгьрин, кʹәсәра кʹур һате у дьле ԝи ешийа. 34 Әԝи пьрси: «Ԝә әԝ данийә кʹӧ?» Ԝана щаба ԝи да: «Хӧдан, ԝәрә бьвинә». 35 Һьнге жь чʹәʹвед Иса һесьр һатьн. 36 У Щьһуйа готьн: «Бьньһерʹьн, әԝи чьԛас ле һʹәз дькьр!» 37 Ле жь ԝан һьнәка готьн: «Әви кӧ чʹәʹвед йе кор вәкьрьн, нькарьбу ӧса бькьра, кӧ әв мәрьв нәмьра?»

38 Диса кʹәсәра кʹур һатә Иса, у әԝ чу бәр тʹьрбе. Әв тʹьрб шкәфтәк бу у кәвьрәк бәр дәве ԝе бу. 39 Иса гот: «Ви кәвьри ԝеда кьн». Ле Мәртʹайе, хушка йе мьри, ԝирʹа гот: «Хӧдан, ида чар рʹож ә кӧ әԝ мьрийә, ньһа ида бин кʹәтийе». 40 Иса жерʹа гот: «Мьн тәрʹа нәгот, һәрге тӧ баԝәр бьки, тӧйе рʹумәта Хԝәде бьвини?» 41 Ԝана кәвьр ԝеда кьр. Һьнге Иса чʹәʹвед хԝә бәрбь әʹзмен бьльнд кьр у гот: «Баво, зәʹф рʹази мә кӧ тә дӧайе мьн бьһист. 42 Әз заньм кӧ тӧ һәртʹьм мьн дьбьһейи, ле мьн әв йәк бона хатьре ве щьмәʹта вьра сәкьни гот, ԝәки әԝана баԝәр кьн, кӧ тә әз шандьмә». 43 Паши ван гьлийа, әԝи бь дәнгәки бьльнд гот: «Лазар, дәркʹәвә!» 44 У әв мәрьве кӧ мьри бу, дәркʹәт, дәст-пʹийед ԝи бь кʹьтан пʹечʹайи бун, сәрчʹәʹве ԝи жи бь пʹәрчʹәки пʹечʹайи бу. Иса ԝанрʹа гот: «Ԝи вәкьн, кӧ әԝ рʹе һәрʹә».

45 Ԝе дәме гәләк Щьһуйед кӧ һатьбун бал Мәрйәме у тьштед кӧ Иса кьрьбун дитьн, баԝәрийа хԝә ԝи анин. 46 Ле жь ԝан һьнәк чунә бал Ферьсийа у тьштед кӧ Иса кьрьбу, ԝанрʹа готьн. 47 Һьнге сәрокед кʹаһина у Ферьсийа, Диԝана Бьльнд* йа Щьһуйа тʹопи сәр һәв кьрьн у готьн: «Әм чь бькьн? Әв мәрьв гәләк кʹәрәмәта дькә. 48 Һәрге әм ӧса бьһельн, һʹәму мәрьв ԝе баԝәрийа хԝә ԝи биньн. У Рʹомайи жи ԝе бен у һьм щийе мә,* һьм жи мьләте мә жь мә бьстиньн». 49 Ле йәк жь ԝан бь наве Ԛәйафа, йе кӧ ԝе сале кʹаһине мәзьн бу, ԝанрʹа гот: «Һун ԛә тьштәки фәʹм накьн. 50 Ԛә нагьһижә һʹьше ԝә кӧ бона ԝә һе баш ә, ԝәки мәрьвәк бона щьмәʹте бьмьрә, нә кӧ тʹәмамийа мьләт ԛьрʹ бә?» 51 Әԝи әв жь бәр хԝә нәгот. Ле чьмки әԝ ԝе сале кʹаһине мәзьн бу, әԝи пʹехәмбәрти кьр кӧ Иса гәрәке бона щьмәʹте бьмьрә, 52 у нә тʹәне бона щьмәʹте, ле ӧса жи кӧ зарʹед Хԝәде йед бәлабуйи, тʹәвайи тʹоп кә у бькә йәк. 53 Жь ве рʹоже, ԝана шеԝьра кӧштьна Иса дькьр.

54 Ләма жи Иса ида әшкәрә нава Щьһуйада нәдьгәрʹийа, ле әԝ жь ԝедәре дәркʹәт у чу бажарәки бь наве Әфрайим, йа кӧ ль һәрема незики бәрʹийе бу, у әԝ тʹәви шагьртед хԝә ԝедәре ма. 55 Һьнге Щәжьна Дәрбазбуне йа Щьһуйа ида незик дьбу, у жь гӧнда гәләк мәрьв һәвраз чунә Оршәлиме, ԝәки пешийа щәжьне хԝә ль гора әʹдәт паԛьж кьн. 56 Ԝана Иса дьгәрʹийа, у гава пʹарьстгәһеда сәкьни бун, һәврʹа дьготьн: «Һун чь дьфькьрьн? Гәло әԝе ԛә нәйе щәжьне?» 57 Ле сәрокед кʹаһина у Ферьсийа фәрман дабун, ԝәки һәрге кәсәк бьзаньбә кӧ Иса кʹидәре йә, гәрәке әʹлами ԝан кә, ԝәки әԝана бькарьбьн ԝи бьгьрьн.

12 Шәш рʹож пешийа Щәжьна Дәрбазбуне, Иса һатә Бәйтанйайе, кʹидәре кӧ Лазар дьжит, йе кӧ Иса әԝ жь мьрьне рʹакьрьбу. 2 Ԝедәре ԝана бона Иса шив һазьр кьр. Мәртʹайе ԝанрʹа бәрдәсти дькьр, ле Лазар нав ԝанда бу, йед кӧ тʹәви ԝи бәр сьфре рʹуньшти бун. 3 Һьнге Мәрйәме ԝәкә нив литьр рʹуне бинхԝәш* у бьһа, рʹетә сәр ньгед Иса у пе пʹорʹе хԝә ньгед ԝи зьһа кьр. Тʹәмамийа мале пе бина рʹуне бинхԝәш тʹьжә бу. 4 Ле йәк жь шагьртед Иса, Щьһудайе Исхәрйоти, йе кӧ ԝе паше нәмамийа ԝи бькьра, гот: 5 «Чьма әв рʹуне бинхԝәш бь 300 динари нәһатә фьротане, у әв пʹәрә кʹәсибарʹа нәһатә бәлакьрьне?» 6 Әԝи әв йәк гот нә кӧ бона кʹәсиба хәм дькьр, ле чьмки әԝ дьз бу. Ԛӧтʹийа пʹәра щәм ԝи бу, у чь пʹәрә дькʹәте, әԝи же дьдьзи. 7 Һьнге Иса гот: «Ле вәгәрʹьн, бьра әԝ ви әʹдәти бинә сери, кӧ мьн бона рʹожа дәфьнкьрьне* һазьр кә. 8 Йед кʹәсиб һәр гав тʹәви ԝә нә, ле әзе һәр гав тʹәви ԝә нибьм».

9 Гәләк Щьһу гава пеһʹәсийан кӧ Иса ԝедәре йә, һатьн, ԝәки нә кӧ тʹәне Иса бьвиньн, ле ӧса жи Лазаре кӧ әԝи жь мьрьне рʹакьрьбу. 10 Һьнге сәрокед кʹаһина шеԝьрин, ԝәки Лазар жи бькӧжьн, 11 чьмки гәләк Щьһу жь бо ԝи дьчун ԝедәре у баԝәрийа хԝә Иса дьанин.

12 Рʹожа дьн, әʹлаләтәкә мәзьн кӧ һатьбу щәжьне, бьһист кӧ Иса те Оршәлиме. 13 Ԝана чʹьԛьлед даред хӧрме һьлдан, чунә пешийа ԝи у бь дәнгәки бьльнд дьготьн: «Хԝәде, әм лава дькьн, ԝи хьлаз кә! Кʹәрәмкьри йә әԝе кӧ бь наве Йаһоԝа те, Пʹадше Исраеле!» 14 Иса щәʹшькәк дит у ле сийар бу, чаԝа кӧ ньвисар ә: 15 «Нәтьрсә, кәчʹа Сийоне. Бьньһерʹә, Пʹадше тә сәр щәʹшька кʹәре сийарбуйи те». 16 Дәстпекеда, шагьртед ԝи әв тьшт фәʹм нәкьрьн, ле гава Иса һатә рʹумәткьрьне, кʹәтә бира ԝан кӧ әв һʹәму тьшт дәрһәԛа ԝи һатьбун ньвисаре у кӧ әв йәк ԝана бона ԝи кьр.

17 Әԝ әʹлаләт йа кӧ тʹәви Иса бу, гава әԝи гази Лазар кьрьбу, кӧ жь тʹьрбе дәре у әԝ жь мьрьне рʹакьр, бәрдәԝам дькьр шәʹдәтийа ве йәке бьдә. 18 Гәләк мәрьва дәрһәԛа ве кʹәрәмәте бьһистьн, ләма чунә пешийа ԝи. 19 Ферьсийа нав хԝәда готьн: «Һун дьвиньн тьштәк жь дәсте мә найе. Дьнйа аләм пәй ԝи дьчә».

20 Нав кәсед кӧ бона һʹәбандьне һатьнә щәжьне, һьнә Йунан жи һәбун. 21 Әԝана һатьн бал Филипо, йе кӧ жь Бәйтсайдайа Щәлиле бу, у жь ԝи һиви кьрьн: «Әм дьхԝазьн Иса бьвиньн». 22 Филипо чу Әндраԝьсрʹа гот. Паше Әндраԝьс у Филипо жи чун Исарʹа готьн.

23 Ле Иса ԝанрʹа гот: «Ԝәхт һатийә кӧ Кӧрʹе инсен бе рʹумәткьрьне. 24 Әз рʹаст ԝәрʹа дьбежьм, һәрге льба гәньм нәкʹәвә нав хԝәлийе у нәмьрә, әԝ тʹәне льбәк дьминә. Ле һәрге әԝ бьмьрә, һьнге әԝе гәләк бәр бьдә. 25 Йе кӧ әʹмьре хԝә һʹәз дькә, әԝе ԝи ӧнда кә. Ле йе кӧ ве дьнйайеда әʹмьре хԝә нәфрʹәт дькә, әԝе ԝи бона жийина һʹәта-һʹәтайе хԝәй кә. 26 Һәрге кәсәк бьхԝазә мьнрʹа хьзмәткʹарийе бькә, бьра пәй мьн бе, у әз кʹидәре бьм, ԝе хьзмәткʹаре мьн жи ԝедәре бә. Һәрге кәсәк бьхԝазә мьнрʹа хьзмәткʹарийе бькә, ԝе Бав ԝи һӧрмәт кә. 27 Ньһа бина мьн гәләк тәнг буйә. Әз чь бежьм? Баво, мьн жь ве сьһʹәте хьлаз кә. Ле нә әз һәма бона ве сьһʹәте һатьмә? 28 Баво, наве хԝә рʹумәт кә». Һьнге дәнгәк жь әʹзмен һат: «Мьн рʹумәт кьрийә, у әзе диса рʹумәт кьм».

29 Әʹлаләта кӧ ԝедәре сәкьни бу, әв йәк бьһист у гот кӧ әԝ гӧрʹинийа әʹзмен бу. Һьнәка жи дьгот: «Мәләкәки ԝирʹа хәбәр да». 30 Иса гот: «Әв дәнг бона мьн нәһат, ле бона ԝә. 31 Ньһа әв дьнйа те диԝанкьрьне, у сәрԝере ве дьнйайе ԝе бе авитьне дәрва. 32 Ле гава әз жь әʹрде бемә бьльндкьрьне,* әзе һʹәму щурʹә мәрьва бәрбь хԝә бькʹьшиньм». 33 Әԝи бь ван готьна да фәʹмкьрьне, кӧ зутьрәке әԝе чь щурʹәйи бьмьрә. 34 Һьнге әʹлаләте жерʹа гот: «Ԛанунеда те готьне кӧ Мәсиһ ԝе һʹәта-һʹәтайе бьжи. Ижа тӧ чаԝа дьбежи ԝәки Кӧрʹе инсен гәрәке бе бьльндкьрьне?* Әв Кӧрʹе инсен кʹи йә?» 35 Иса ԝанрʹа гот: «Рʹонайи ԝе һьнә ԝәхт нав ԝәда бә. Һʹәта рʹонайи һе бал ԝә йә, рʹонайеда бьмәшьн, ԝәки тәʹри ԝә зәфт нәкә. Әԝе кӧ тәʹрийеда дьмәшә, ньзанә әԝ кʹӧда дьчә. 36 Һʹәта рʹонайи бал ԝә йә, рʹонайе баԝәр бькьн, ԝәки һун бьбьнә кӧрʹед рʹонайе».

Гава Иса әв тьшт готьн, чу у хԝә жь ԝан вәшарт. 37 Паши һаԛас кʹәрәмәта кӧ әԝи бәр чʹәʹве ԝан кьрьн, ԝана диса жи баԝәрийа хԝә ԝи нәдьани. 38 Ӧса готьнед Ишайа пʹехәмбәр һатьнә сери: «Йаһоԝа, кʹе хәбәра мә баԝәр кьрийә? У Йаһоԝа ԛәԝата* хԝә кʹерʹа нишан кьрийә?» 39 Мәʹнийа кӧ ԝана нькарьбу баԝәрийа хԝә ԝи биньн, Ишайа әԝ жи готийә: 40 «Әԝи чʹәʹвед ԝан кор кьрьнә, у дьлед ԝан һʹьшк кьрьнә, ԝәки әԝана бь чʹәʹвед хԝә нәвиньн у бь дьлед хԝә фәʹм нәкьн у вәнәгәрʹьн бал мьн, кӧ әз ԝана ԛәнщ кьм». 41 Ишайа әв тьшт готьн, чьмки әԝи рʹумәта Мәсиһ дит у дәрһәԛа ԝи хәбәр да. 42 Йәкә гәләк сәрԝера жи баԝәрийа хԝә ԝи анин, ле жь тьрса Ферьсийа әшкәрә нишан нәдькьрьн, ԝәки жь кʹьниште* нәйенә дәрхьстьне. 43 Чьмки пәсьне жь мәрьва һе ԝана хԝәш дьһат, нә кӧ пәсьне жь Хԝәде.

44 Ле Иса бь дәнгәки бьльнд гот: «Әԝе кӧ мьн баԝәр дькә, әԝ нә тʹәне мьн баԝәр дькә, ле ӧса жи ԝи, йе кӧ әз шандьмә. 45 У кʹи кӧ мьн дьвинә, әԝ ӧса жи ԝи дьвинә, йе кӧ әз шандьмә. 46 Әз чаԝа рʹонайи һатьмә дьнйайе, ԝәки һәр кәсе кӧ баԝәрийа хԝә мьн бинә, тәʹрийеда нәминә. 47 Ле һәрге кәсәк готьнед мьн дьбьһе у найнә сери, әз диԝана ԝи накьм. Чьмки әз нәһатьмә кӧ диԝана дьнйайе бькьм, ле әз һатьмә кӧ дьнйайе хьлаз кьм. 48 Йе кӧ мьн инкʹар дькә у готьнед мьн ԛәбул накә, йәк һәйә кӧ ԝе диԝана ԝи бькә. Әԝ готьна кӧ мьн готийә, ԝе рʹожа хьлазийеда* диԝана ԝи бькә. 49 Чьмки мьн жь бәр хԝә хәбәр нәдайә, ле Баве кӧ әз шандьмә тʹәми дайә мьн, кӧ әз чь бежьм у чь хәбәр дьм. 50 У әз заньм кӧ тʹәмийа ԝи дьбә бәрбь жийина һʹәта-һʹәтайе. Ләма һәр тьште кӧ әз дьбежьм, һәма ӧса дьбежьм, чаԝа Бав мьнрʹа готийә».

13 Пешийа Щәжьна Дәрбазбуне, Иса ида заньбу кӧ сьһʹәта ԝи һатийә, ԝәки әԝ ве дьнйайе бьһелә у һәрʹә бал Бав. Иса шагьртед хԝә, йед кӧ ве дьнйайеда бун, һʹәз кьр, у һʹәта хьлазийе һʹәз кьр. 2 Ԝәхте шиве бу, у Мире-щьна ида кьрьбу дьле Щьһудайе Исхәрйоти, кӧрʹе Шьмһʹун, ԝәки нәмамийа Иса бькә. 3 Иса, кӧ заньбу Бав һәр тьшт дайә дәсте ԝи, у кӧ әԝ жь Хԝәде һатийә у дьчә щәм Хԝәде, 4 жь сәр шиве рʹабу, чӧхе хԝә да алики, пʹешгирәк һьлда ль пьшта хԝә гьреда. 5 Паше әԝи ав кьрә тʹәште у дәстпекьр ньгед шагьртед хԝә бьшо, у пе пʹешгира кӧ пьшта ԝива гьредайи бу, зьһа кьр. 6 Гава дора Шьмһʹун Пәтрус һат, әԝи Исарʹа гот: «Хӧдан, те ньгед мьн бьшойи?» 7 Иса ԝирʹа гот: «Әз чь дькьм тӧ ньһа фәʹм наки, ле паше те фәʹм ки». 8 Пәтрус жерʹа гот: «Тӧйе тʹӧ щар ньгед мьн нәшойи!» Иса жи жерʹа гот: «Һәрге әз ньгед тә нәшом, тӧйе нькарьби тʹәви мьн би».* 9 Һьнге Шьмһʹун Пәтрус гот: «Хӧдан, һәрге ӧса нә, нә тʹәне ньгед мьн, ле дәст у сәре мьн жи бьшо». 10 Иса ԝирʹа гот: «Әԝе кӧ һатийә шуштьне, пештьри ньга нә һʹәԝщә йә кӧ әԝ бе шуштьне, чьмки әԝ бь тʹәмами паԛьж ә. Һун паԛьж ьн, ле нә һʹәму». 11 Чьмки әԝи заньбу кʹи ԝе нәмамийа ԝи бькә. Ләма жи әԝи гот: «Жь ԝә нә һʹәму паԛьж ьн».

12 Гава әԝи ньгед ԝан шуштьн, чӧхе хԝә ль хԝә кьр, диса бәр сьфре рʹуньшт у ԝанрʹа гот: «Һун фәʹм дькьн кӧ мьн бона ԝә чь кьр? 13 Һун мьнрʹа ‹Дәрсдар› у ‹Хӧдан› дьбежьн, у һун рʹаст ьн, һәма ӧса жи һәйә. 14 Әз ԝәки Хӧдан у Дәрсдар ьм, у мьн ньгед ԝә шушт, гәрәке һун жи ньгед һәвдӧ бьшон. 15 Мьн мәсәлә ԝәрʹа һишт, ԝәки чь кӧ мьн бона ԝә кьр, һун жи һәма ӧса бькьн. 16 Әз рʹаст ԝәрʹа дьбежьм, хӧлам жь ахайе хԝә мәзьнтьр нинә, у нә жи йе шанди жь йе кӧ әԝ шандийә, мәзьнтьр ә. 17 Һәрге һун ван тьшта заньн, һуне бәхтәԝар бьн гава ԝан тьшта бькьн. 18 Әз дәрһәԛа ԝә һʹәмуйа набежьм. Әз заньм мьн кʹижан бьжартьнә. Ле әв йәк ԛәԝьми, ԝәки әв ньвисар бе сери: ‹Йе кӧ нане мьн дьхԝар, бу дьжмьне мьн›.* 19 Ньһада, пешийа кӧ әԝ йәк бьԛәԝьмә әз ԝәрʹа дьбежьм, ԝәки гава әԝ йәк бьԛәԝьмә, һун баԝәр кьн кӧ әԝ әз ьм. 20 Әз рʹаст ԝәрʹа дьбежьм, әԝе кӧ ԝи ԛәбул кә кʹижани кӧ әз дьшиньм, әԝ мьн жи ԛәбул дькә. У йе кӧ мьн ԛәбул дькә, әԝ Ԝи жи ԛәбул дькә йе кӧ әз шандьмә».

21 Паши ван гьлийа, бина Иса тәнг бу у әԝи әшкәрә гот: «Әз рʹаст ԝәрʹа дьбежьм, йәк жь ԝә ԝе нәмамийа мьн бькә». 22 Шагьрта жи шашмайи ль һәв дьньһерʹин, гәло әԝ дәрһәԛа кʹе дьбежә. 23 Йәк жь шагьрта, йе кӧ Иса ле һʹәз дькьр, кʹеләка* Иса бәр сьфре рʹуньшти бу. 24 Һьнге Шьмһʹун Пәтрус нишан дайе у жерʹа гот: «Мәрʹа бежә әԝ дәрһәԛа кʹе дьбежә». 25 Әԝи жи хԝә да бәр синге Иса у же пьрси: «Хӧдан, әԝ кʹи йә?» 26 Иса щаб да у гот: «Әз пәʹрийе нан тʹаседа кьм у бьдьмә кʹе, әԝ ә». У паше гава әԝи нан тʹаседа кьр, да Щьһудайе кӧрʹе Шьмһʹуне Исхәрйоти. 27 Чахе Щьһуда пәʹрийе нан һьлда, һьнге Шәйтʹан кʹәтә нава ԝи. Иса ԝирʹа гот: «Чь тӧ дьки, зу бькә». 28 Ле йед кӧ бәр сьфре рʹуньшти бун, тʹӧ кәси фәʹм нәкьр, кӧ әԝи чьма ԝирʹа ӧса гот. 29 Ԛӧтʹийа пʹәра щәм Щьһуда бу, ләма һьнәка тʹьре кӧ Иса ԝирʹа гот: «Тьштед кӧ бона щәжьне мәрʹа лазьм ьн, бькʹьрʹә», йан жи әԝи гәрәке тьштәк бьда кʹәсиба. 30 Әԝи ча пәʹрийе нан һьлда, дәрберʹа дәркʹәтә дәрва. Ида шәв бу.

31 Гава әԝ дәркʹәтә дәрва, Иса гот: «Ньһа Кӧрʹе инсен те рʹумәткьрьне у Хԝәде пе ԝи те рʹумәткьрьне. 32 Хԝәде хԝәха ԝе ԝи рʹумәт кә, у ԝе дәрберʹа ԝи рʹумәт кә. 33 Достед* мьн, әз гәләк ԝәхт тʹәви ԝә наминьм. Һуне мьн бьгәрʹьн, у чаԝа мьн Щьһуйарʹа гот, әз ԝәрʹа жи дьбежьм, ‹Һун нькарьн бенә щийе кӧ әз дьчьме›. 34 Әз тʹәмикә тʹәзә дьдьмә ԝә: Һәвдӧ һʹәз бькьн. Чаԝа кӧ мьн һун һʹәз кьрьнә, һун жи ӧса һәвдӧ һʹәз бькьн. 35 Бь ве йәке гьшк ԝе бьзаньбьн кӧ һун шагьртед мьн ьн, һәрге нав ԝәда һʹәзкьрьн һәбә».

36 Шьмһʹун Пәтрус жь ԝи пьрси: «Хӧдан, тӧ дьчи кʹӧ?» Иса щаб да: «Щийе кӧ әз дьчьме, ньһа тӧ нькари пәй мьн бейи, ле тӧйе паше бейи». 37 Пәтрус жерʹа гот: «Хӧдан, чьма әз ньһа нькарьм пәй тә бем? Әзе бона тә әʹмьре хԝә жи бьдьм». 38 Иса жи ԝирʹа гот: «Тӧйе әʹмьре хԝә бона мьн бьди? Әз рʹаст тәрʹа дьбежьм, һе дик банг нәдә, тӧйе се щара мьн инкʹар ки».

14 «Бьра дьле ԝә тәнг нәбә. Баԝәрийа хԝә Хԝәде биньн у баԝәрийа хԝә мьн жи биньн. 2 Мала Баве мьнда гәләк щи һәнә. Һәрге ӧса нибуйа, мьне ԝәрʹа нәгота, чьмки әз дьчьм бона ԝә щи һазьр кьм. 3 Гава әз һәрʹьм у бона ԝә щи һазьр кьм, әзе диса бем у ԝә бьвьмә щәм хԝә, ԝәки әз ль кʹӧ бьм, һун жи ԝедәре бьн. 4 У әз дьчьмә кʹидәре, һун ве рʹе заньн».

5 Тʹума жерʹа гот: «Хӧдан, әм ньзаньн тӧ дьчи кʹӧ. Әме чаԝа рʹе бьзаньбьн?»

6 Иса ԝирʹа гот: «Рʹе, рʹасти у жийин әз ьм. Тʹӧ кәс бейи мьн нькарә бе щәм Баве. 7 Һәрге ԝә әз нас кьрама, ԝәйе Баве мьн жи нас кьра. Аԝа жь ԝьр шунда һун ԝи нас дькьн у ԝә әԝ дитийә».

8 Филипо ԝирʹа гот: «Хӧдан, кʹа Бав нишани мә кә, у әв бәси мә йә».

9 Иса ԝирʹа гот: «Филипо, әз һаԛас ԝәхт тʹәви ԝә мә, у һе тӧ мьн нас наки? Йе кӧ әз дитьмә, Бав жи дитийә. Ижа тӧ ча дьбежи ‹Бав нишани мә кә›? 10 Тӧ баԝәр наки кӧ әз тʹәви Бав йәктийеда мә, у Бав жи тʹәви мьн йәктийеда йә? Тьштед кӧ әз ԝәрʹа дьбежьм, әз жь бәр хԝә набежьм, ле Баве кӧ тʹәви мьн йәктийеда дьминә, пе мьн кьред хԝә дькә. 11 Баԝәр бьн кӧ әз тʹәви Бав йәктийеда мә, у Бав жи тʹәви мьн йәктийеда йә. Ле һәрге һун готьнед мьн баԝәр накьн, кьред мьн баԝәр бькьн. 12 Әз рʹаст ԝәрʹа дьбежьм, йе кӧ баԝәрийа хԝә мьн бинә, әԝе кьред кӧ әз дькьм, бькә. У әԝе кьред һе мәзьн жи бькә, чьмки әз дьчьм щәм Бав. 13 Ӧса жи, һәр тьште кӧ һун бь наве мьн бьхԝазьн, әзе бькьм, ԝәки Бав пе Кӧрʹ бе рʹумәткьрьне. 14 Һәрге һун бь наве мьн тьштәки бьхԝазьн, әзе бькьм.

15 Һәрге һун мьн һʹәз дькьн, һуне тʹәмийед мьн биньн сери. 16 У әзе жь Бав һиви кьм у әԝе аликʹарәки* дьн бьдә ԝә, ԝәки һʹәта-һʹәтайе тʹәви ԝә бьминә. 17 Әԝ рʹӧһʹе рʹастийе йә, у дьнйа нькарә ԝи бьстинә, чьмки дьнйа нә ԝи дьвинә у нә жи нас дькә. Ле һун ԝи нас дькьн, чьмки әԝ тʹәви ԝә йә у нав ԝәда йә. 18 Әзе ԝә етʹим нәһельм. Әзе бемә бал ԝә. 19 Ԝәхтәкә кьнда, дьнйа ԝе ида мьн нәвинә, ле һуне мьн бьвиньн, чьмки әз дьжим у һуне жи бьжин. 20 Ԝе рʹоже һуне бьзаньбьн кӧ әз тʹәви Баве хԝә йәктийеда мә, һун жи тʹәви мьн йәктийеда ньн, у әз тʹәви ԝә йәктийеда мә. 21 Йе кӧ тʹәмийед мьн ԛәбул дькә у ԝан тинә сери, әԝ мьн һʹәз дькә. У йе кӧ мьн һʹәз дькә, Баве мьн жи ԝе ԝи һʹәз бькә, у әзе жи ԝи һʹәз бькьм у хԝә ԝирʹа әʹйан кьм».

22 Щьһуда (нә Щьһудайе Исхәрйоти) жь Иса пьрси: «Хӧдан, тӧ чьрʹа дьхԝази хԝә мәрʹа әʹйан ки, нә кӧ дьнйайерʹа?»

23 Иса щаба ԝи да: «Йе кӧ мьн һʹәз дькә, әԝе готьнед мьн бинә сери, у Баве мьн жи ԝе ԝи һʹәз бькә. Әз у Бав әме бенә щәм ԝи у тʹәви ԝи бьжин. 24 Йе кӧ мьн һʹәз накә, әԝ готьнед мьн найнә сери. Готьнед кӧ һун дьбьһен, нә йед мьн ьн, ле йед Баве мьн ьн, йе кӧ әз шандьмә.

25 Һʹәта кӧ әз щәм ԝә мә, әз ван һʹәму тьшта ԝәрʹа дьбежьм. 26 Ле аликʹар, демәк рʹӧһʹе пироз, йе кӧ Бав ԝе бь наве мьн бьшинә, әԝе һʹәму тьшти ԝә һин кә, у һʹәму тьштед кӧ мьн ԝәрʹа готьнә, ԝе бинә бира ԝә. 27 Әз әʹдьлайе ԝәрʹа дьһельм, әз әʹдьлайа хԝә дьдьмә ԝә. Әʹдьлайа кӧ әз дьдьмә ԝә, нә мина ве әʹдьлайе йә, йа кӧ дьнйа дьдә ԝә. Бьра дьле ԝә тәнг нәбә у тьрс нәкʹәвә дьле ԝә. 28 Ԝә бьһист кӧ мьн ԝәрʹа гот: ‹Әз дьчьм, у әзе пашда вәгәрʹьм щәм ԝә›. Һәрге һун мьн һʹәз дькьн, һуне ша бьн кӧ әз дьчьм щәм Бав, чьмки Бав жь мьн мәзьнтьр ә. 29 Мьн әв тьшт пешийа кӧ бьԛәԝьмьн ԝәрʹа готьнә, ԝәки гава әԝ бьԛәԝьмьн, һун баԝәр кьн. 30 Ида гәләк ԝәхт нәмайә әз тʹәви ԝә хәбәр дьм, чьмки сәрԝере ве дьнйайе те, ле һʹӧкӧме ԝи сәр мьн тʹӧнә йә. 31 Ле сәва кӧ дьнйа бьзаньбә әз Бав һʹәз дькьм, әз һәма ӧса дькьм чаԝа кӧ Бав тʹәми ль мьн кьрийә. Рʹабьн, әм жь вьра һәрʹьн.

15 Әз ьм кʹола тьрийейә рʹаст, у Баве мьн рʹәзван ә. 2 Һәр чʹьԛьләкә мьнә кӧ бәр надә, әԝ дьбьрʹә, ле һәр чʹьԛьләкә кӧ бәр дьдә, әԝ паԛьж дькә, ԝәки һе зедә бәр бьдә. 3 Һун ида паԛьж ьн бь сайа ԝан гьлийа, кӧ мьн ԝәрʹа готьнә. 4 Тʹәви мьн йәктийеда бьминьн, у әзе жи тʹәви ԝә йәктийеда бьминьм. Чаԝа кӧ чʹьԛьл нькарә бәр бьдә һәрге кʹолева нинә, һун жи нькарьн бәр бьдьн һәрге тʹәви мьн йәктийеда нибьн. 5 Кʹол әз ьм, һун жи чʹьԛьл ьн. Йе кӧ тʹәви мьн йәктийеда дьминә у әз жи тʹәви ԝи йәктийеда дьминьм, әԝ гәләк бәр дьдә, чьмки бейи мьн һун нькарьн тьштәки бькьн. 6 Һәрге кәсәк тʹәви мьн йәктийеда наминә, әԝе мина чʹьԛьләки бе авитьне у һʹьшк бә. У мәрьв ԝан чʹьԛьла тʹоп дькьн, давежьнә нава агьр у дьшәԝьтиньн. 7 Һәрге һун тʹәви мьн йәктийеда бьминьн, у готьнед мьн дьле ԝәда бьминьн, һун чь бьхԝазьн жи ԝе ԝәрʹа бе дайине. 8 Бь ве йәке Баве мьн те рʹумәткьрьне, кӧ һун һе зедә бәр дьдьн у избат дькьн ԝәки һун шагьртед мьн ьн. 9 Чаԝа кӧ Бав мьн һʹәз дькә, әз жи ԝә һʹәз дькьм. Һʹәзкьрьна мьнда бьминьн. 10 Һәрге һун тʹәмийед мьн биньн сери, һуне һʹәзкьрьна мьнда бьминьн, чаԝа кӧ мьн тʹәмийед Бав анинә сери у әз һʹәзкьрьна ԝида дьминьм.

11 Мьн әв һʹәму тьшт ԝәрʹа готьн, сәва кӧ шабуна мьн нав ԝәда бә у шабуна ԝә тʹьжә бә. 12 Тʹәмийа мьн әв ә: Чаԝа кӧ мьн һун һʹәз кьрьн, һун жи ӧса һәвдӧ һʹәз бькьн. 13 Тʹӧ һʹәзкьрьн сәр ԝе һʹәзкьрьнерʹа тʹӧнә, кӧ кәсәк әʹмьре хԝә бона достед хԝә бьдә. 14 Һун достед мьн ьн, һәрге ве йәке дькьн, чь кӧ әз тʹәми дьдьмә ԝә. 15 Ида әз ԝәрʹа набежьм хӧлам, чьмки хӧлам ньзанә ахайе ԝи чь дькә. Ле әз ԝәрʹа дьбежьм достед мьн, чьмки һәр тьште кӧ мьн жь Баве хԝә бьһистийә, мьн ԝәрʹа готийә. 16 Нә кӧ ԝә әз бьжартьмә, ле мьн һун бьжартьнә, ԝәки һун һәрʹьн у бәрдәԝам кьн бәр бьдьн, бәре кӧ ԝе бьминә. Һьнге һун бь наве мьн чь жь Бав бьхԝазьн, әԝе бьдә ԝә.

17 Әз ԝан тьшта тʹәми дьдьмә ԝә, ԝәки һун һәвдӧ һʹәз бькьн. 18 Һәрге дьнйа ԝә нәфрʹәт дькә, бьзаньбьн кӧ пешийе әве әз нәфрʹәт кьрьмә. 19 Һәрге һун пʹара ве дьнйайе буна, дьнйайе һун һʹәз кьрана. У чьмки һун пʹара ве дьнйайе ниньн, ле мьн һун жь ве дьнйайе бьжартьнә, ләма жи дьнйа ԝә нәфрʹәт дькә. 20 Гьлийед кӧ мьн ԝәрʹа гот, биньн бира хԝә: Хӧлам жь ахайе хԝә мәзьнтьр нинә. Һәрге әԝана пәй мьн дькʹәвьн, ԝе пәй ԝә жи кʹәвьн. Һәрге әԝана гьлийед мьн тиньн сери, ԝе гьлийед ԝә жи биньн сери. 21 Ле әԝана ԝе жь бо наве мьн ван һʹәму тьшта биньн сәре ԝә, чьмки Ԝи нас накьн, йе кӧ әз шандьмә. 22 Һәрге әз нәһатама у мьн ԝанрʹа нәгота, гӧне ԝан ԝе тʹӧнә буйа. Ле ньһа әԝана бона гӧне хԝә нькарьн хԝә һәԛ дәрхьн. 23 Кәсе кӧ мьн нәфрʹәт дькә, әԝ Баве мьн жи нәфрʹәт дькә. 24 Һәрге мьн нав ԝанда нәкьрана әԝ кьред кӧ тʹӧ кәси нәкьрьнә, гӧне ԝан ԝе тʹӧнә буйа. Ле ньһа ԝана әз дитьмә, у әԝана һьм мьн, һьм жи Баве мьн нәфрʹәт дькьн. 25 Ле әв йәк ԛәԝьми, ԝәки гьлийед кӧ Ԛануна ԝанда һатьнә ньвисаре, бенә сери: ‹Ԝана бе сәбәб әз нәфрʹәт кьрьм›. 26 Гава әв аликʹар бе, кʹижани әзе жь Бав ԝәрʹа бьшиньм, демәк рʹӧһʹе рʹастийе кӧ жь Баве йә, әԝе бона мьн шәʹдәтийе бьдә. 27 У гәрәке һун жи бона мьн шәʹдәтийе бьдьн, чьмки сәре серида һун тʹәви мьн бун.

16 «Мьн әв тьшт ԝәрʹа готьн, ԝәки һун нәлькʹӧмьн. 2 Һуне жь кʹьниште* бенә дәрхьстьне. Әре, ԝәхт те гава һәр кәсе кӧ ԝә бькӧжә, ԝе бьфькьрә кӧ әԝ хьзмәтийа пироз бона Хԝәде дькә. 3 Ле әԝана ԝе ӧса бькьн, чьмки ԝана нә Бав, нә жи әз нас кьрьмә. 4 Ле мьн әв тьшт ԝәрʹа готьн, ԝәки гава ԝәхт бе кӧ әԝ тьшт бьԛәԝьмьн, һун биньнә бира хԝә, кӧ мьн әв йәк ԝәрʹа готьбу.

Мьн сәре серида әв тьшт ԝәрʹа нәготьн, чьмки әз тʹәви ԝә бум. 5 Ньһа әз дьчьм бал Ԝи, йе кӧ әз шандьмә, у тʹӧ кәс жь ԝә мьн напьрсә: ‹Тӧ кʹӧда дьчи?› 6 Жь бо ԝе йәке кӧ мьн әв тьшт ԝәрʹа готьн, һун гәләк хәмгин бунә. 7 Ле әз рʹаст ԝәрʹа дьбежьм, чуйина мьн бона кʹара ԝә йә. Чьмки һәрге әз нәчьм, аликʹар ԝе нәйе бал ԝә. Ле һәрге әз һәрʹьм, әзе ԝи ԝәрʹа бьшиньм. 8 Гава әԝ бе, әԝе дьнйайерʹа избатийед зәлал дәрһәԛа гӧнә, рʹастийе у диԝане бьдә, 9 пешийе дәрһәԛа гӧнә, чьмки әԝана баԝәрийа хԝә мьн найньн. 10 Паше дәрһәԛа рʹастийе, чьмки әз дьчьм бал Бав у һуне ида мьн нәвиньн. 11 У паше жи дәрһәԛа диԝане, чьмки сәрԝере ве дьнйайе һатийә диԝанкьрьне.

12 Һе гәләк тьшт һәнә кӧ ԝәрʹа бежьм, ле ньһа һун нькарьн ԝана фәʹм кьн. 13 Гава әԝ,* демәк рʹӧһʹе рʹастийе бе, ԝе рʹебәрийе ԝә бькә, у али ԝә бькә кӧ һун бь тʹәмами рʹастийе фәʹм кьн. Чьмки әԝе нә кӧ жь бәр хԝә хәбәр дә, ле тьште кӧ дьбьһе ԝе бежә у әʹлами ԝә бькә дәрһәԛа тьштед кӧ ԝе бьԛәԝьмьн. 14 Әԝе мьн рʹумәт кә, чьмки ԝе ԝан тьшта әʹлами ԝә бькә, чь кӧ жь мьн бьһистийә. 15 Һʹәму тьштед кӧ щәм Бав һәнә, йед мьн ьн. Ләма жи мьн гот, кӧ рʹӧһʹе пироз ԝе ԝан тьшта әʹлами ԝә бькә, чь кӧ жь мьн бьһистийә. 16 Һьнә ԝәхт шунда, һуне ида мьн нәвиньн, у диса һьнәки шунда, һуне мьн бьвиньн».

17 Һьнге чәнд шагьртед ԝи һәвдӧрʹа готьн: «Гәло әԝ бь ван гьлийа чь дьхԝазә бежә: ‹Һьнә ԝәхт шунда, һуне ида мьн нәвиньн, у диса һьнә ԝәхт шунда, һуне мьн бьвиньн›, у ‹әз дьчьм бал Бав›?» 18 У ԝана дьгот: «Әв гьли, ‹һьнә ԝәхт шунда›, чь те һʹәсабе? Әм фәʹм накьн әԝ чь дьбежә». 19 Иса заньбу кӧ әԝана чь дьхԝазьн жь ԝи бьпьрсьн у ԝанрʹа гот: «Һун ве йәке жь һәв дьпьрсьн, чьмки мьн гот: ‹Һьнә ԝәхт шунда, һуне ида мьн нәвиньн, у диса һьнә ԝәхт шунда, һуне мьн бьвиньн›? 20 Әз рʹаст ԝәрʹа дьбежьм, һуне бьгьрин у бькьнә ԛирʹин, ле дьнйа ԝе ша бә. Һуне хәмгин бьн, ле хәмгинийа ԝә ԝе бьбә шабун. 21 Кʹӧлфәт ԝәʹде зарʹанине еше дькʹьшинә, чьмки ԝәʹде ԝе һатийә. Ле чахе жерʹа ида зарʹ дьбә, әԝ жь шабуна кӧ зарʹ дьне кʹәтийә, еш у щәфе хԝә бир дькә. 22 Һәма бь ви щурʹәйи, һун жи ньһа хәмгин ьн, ле әзе ԝә диса бьвиньм у дьле ԝә ԝе бь шабуне тʹьжә бә, у тʹӧ кәс ԝе нькарьбә шабуна ԝә жь ԝә бьстинә. 23 Ԝе рʹоже һуне ԛә тьштәки жь мьн нәпьрсьн. Әз рʹаст ԝәрʹа дьбежьм, һәрге һун пе наве мьн жь Бав тьштәки бьхԝазьн, әԝе бьдә ԝә. 24 Һʹәта ньһа ԝә пе наве мьн тьштәк нәхԝәстийә. Бьхԝазьн у һуне бьстиньн, сәва кӧ шабуна ԝә тʹьжә бә.

25 Мьн ԝәрʹа әв тьшт бь мәсәла готьн. Ԝәхт те кӧ әзе ида нә кӧ бь мәсәла ԝәрʹа хәбәр дьм, ле әшкәрә дәрһәԛа Бав ԝәрʹа гьли кьм. 26 Ԝе рʹоже, һуне пе наве мьн жь Бав бьхԝазьн. Ле әв найе һʹәсабе, кӧ бона ԝә әзе бьхԝазьм. 27 Бав ԝә һʹәз дькә, чьмки ԝә әз һʹәз кьрьмә у ԝә баԝәр кьрийә кӧ әз жь Хԝәде һатьмә шандьне. 28 Бав әз шандьмә дьнйайе. Ньһа әз дьнйайе дьһельм у дьчьм бал Бав».

29 Шагьртед ԝи готьн: «Ньһа тӧ әшкәрә хәбәр дьди, у мәсәла нади хәбате. 30 Ида әм заньн кӧ тӧ һәр тьшти зани, у нә лазьм ә кәсәк тьштәки жь тә бьпьрсә. Ләма жи әм баԝәр дькьн, кӧ тӧ жь Хԝәде һати». 31 Иса ԝанрʹа гот: «Ньһа һун баԝәр дькьн? 32 Ԝәхт те у һатийә жи, кӧ һәр кәс жь ԝә ԝе бьрʹәвә мала хԝә, у һуне мьн тʹәне бьһельн. Ле әз тʹәне ниньм, чьмки Бав тʹәви мьн ә. 33 Мьн әв тьшт ԝәрʹа готьн, сәва кӧ бь сайа мьн әʹдьлайа ԝә һәбә. Дьнйайеда ԝе тәнгасийед ԝә һәбьн, ле һун мерхас бьн! Мьн дьнйа алт кьр».

17 Паши ван гьлийа, Иса чʹәʹвед хԝә бәрбь әʹзмен һьлбьрʹи у гот: «Баво, сьһʹәт һатийә. Кӧрʹе хԝә рʹумәт кә, ԝәки кӧрʹе тә жи тә рʹумәт кә. 2 Тә һʹӧкӧме сәр һʹәму мәрьварʹа дайә ԝи, ԝәки жийина һʹәта-һʹәтайе бьдә һʹәму кәсед кӧ тә данә ԝи. 3 Сәва кӧ жийина һʹәта-һʹәтайе бьстиньн, әԝана гәрәке тә, Хԝәдайе тʹәк у рʹаст нас кьн,* у ӧса жи Иса Мәсиһе кӧ тә шандийә. 4 Мьн әв шьхӧле кӧ тә дайә мьн ани сери у бь ве йәке мьн тӧ сәр рʹуйе әʹрде рʹумәт кьри. 5 У ньһа Баво, алийе хԝәда мьн рʹумәт кә бь ԝе рʹумәте, кʹижан кӧ пешийа әʹфьрандьна дьнйайе щәм мьн һәбу, гава әз кʹеләка тә бум.

6 Мьн наве тә ԝан мәрьварʹа әʹйан кьрийә, йед кӧ тә жь дьнйайе данә мьн. Әԝана йед тә бун, у тә әԝ данә мьн, у ԝана хԝә ль хәбәра тә гьртийә.* 7 Ньһа әԝана заньн, ԝәки һʹәму тьштед кӧ тә данә мьн, жь тә нә, 8 чьмки готьнед кӧ тә данә мьн, мьн данә ԝан у ԝана жи әԝ ԛәбул кьрьнә. Әԝана заньн кӧ әз жь тә мә, у баԝәр кьрьнә кӧ тә әз шандьмә. 9 Әз сәва ԝан рʹәща дькьм. Әз нә кӧ сәва дьнйайе рʹәща дькьм, ле сәва ԝан рʹәща дькьм, йед кӧ тә данә мьн, чьмки әԝана йед тә нә. 10 Һәр тьштед мьн йед тә нә у һәр тьштед тә йед мьн ьн, у әз нав ԝанда һатьмә рʹумәткьрьне.

11 Әз ида ль дьнйайе ниньм, ле әԝана ль дьнйайе нә, у әз темә щәм тә. Баве Пироз, жь бо хатьре наве хԝә, кӧ тә дайә сәр мьн, ԝан бьбә хԝәйи, ԝәки әԝана бьбьнә йәк, чаԝа кӧ әм йәк ьн.* 12 Гава әз тʹәви ԝан бум, мьн әԝана хԝәй дькьрьн бона хатьре наве тә, кӧ тә да сәр мьн. Мьн әԝана пʹарастьн, у тʹӧ кәс жь ԝан ԛьрʹ нәбуйә, хенщи ԝи, йе кӧ ԝе бе ԛьрʹкьрьне,* сәва кӧ Ньвисаред Пироз бенә сери. 13 Ле ньһа әз темә щәм тә, у һʹәта кӧ әз ль дьнйайе мә, әз ԝан тьшта дьбежьм, ԝәки шабуна ԝан мина шабуна мьн бә у әԝана бь ве шабуне тʹьжә бьн. 14 Мьн хәбәра тә дайә ԝан, ле дьнйайе әԝана нәфрʹәт кьрьнә, чьмки әԝана пʹара ве дьнйайе ниньн, чаԝа кӧ әз пʹара ве дьнйайе ниньм.

15 Әз рʹәща накьм ԝәки тӧ ԝана жь дьнйайе һьлди, ле әз рʹәща дькьм ԝәки тӧ ԝана жь Мире-щьна* хԝәй ки. 16 Әԝана пʹара ве дьнйайе ниньн, чаԝа кӧ әз пʹара ве дьнйайе ниньм. 17 Ԝана пе рʹастийе пироз кә.* Хәбәра тә рʹасти йә. 18 Чаԝа кӧ тә әз шандьмә дьнйайе, мьн жи әԝана шандьнә дьнйайе. 19 Әз бона ԝан пироз дьминьм, сәва кӧ әԝана жи бь сайа рʹастийе пироз бьн.

20 Әз нә кӧ тʹәне бона ԝан рʹәща дькьм, ле ӧса жи бона ԝан һʹәмуйа, йед кӧ бь сайа гьлийед ԝан баԝәрийа хԝә мьн тиньн. 21 Баво, чаԝа кӧ тӧ тʹәви мьн йәктийеда ни, у әз тʹәви тә йәктийеда мә, бьра әԝана һʹәму жи бьбьнә йәк у тʹәви мә йәктийеда бьн, сәва кӧ дьнйа баԝәр кә, кӧ тә әз шандьмә. 22 Мьн рʹумәта кӧ тә дайә мьн, дайә ԝан, ԝәки әԝана бьбьнә йәк, чаԝа кӧ әм жи йәк ьн. 23 Әз тʹәви ԝан йәктийеда мә, у тӧ тʹәви мьн йәктийеда ни, ԝәки әԝана бь тʹәмами йәктийеда бьн. Бь ве йәке дьнйа ԝе бьзаньбә кӧ тә әз шандьмә, у тә әԝана ӧса һʹәз кьрьн, чаԝа тә әз һʹәз кьрьм. 24 Баво, әз дьхԝазьм ԝәки йед кӧ тә данә мьн, тʹәви мьн ԝедәре бьн, кʹидәре әз ьм, сәва кӧ әԝана рʹумәта мьн, йа кӧ тә дайә мьн, бьвиньн, чьмки тә пешийа дәстпека дьнйайе әз һʹәз кьрьм. 25 Баве һәԛ, бь рʹасти дьнйайе тӧ нас нәкьри, ле әз тә нас дькьм, у әԝана заньн кӧ тә әз шандьмә. 26 Мьн наве тә ԝанрʹа әʹйан кьр у әзе диса жи әʹйан кьм, ԝәки әԝана жи мәрьва ӧса һʹәз бькьн, чаԝа кӧ тә әз һʹәз кьрьмә, у ԝәки әз тʹәви ԝан йәктийеда бьм».

18 Паши ԝе готьне Иса тʹәви шагьртед хԝә дәрбази алийе дьнә Нәԝала* Ԛьдроне бу, кʹидәре бахчәк һәбу, у әԝ шагьртед хԝәва кʹәтьне. 2 Нәмаме ԝи Щьһуда жи әв щи заньбу, чьмки ԝедәре гәләк щара Иса рʹасти шагьртед хԝә дьһат. 3 Щьһуда тʹәви хԝә һьлда кʹомәкә әскәра у нобәдаред кӧ сәрокед кʹаһина у Ферьсийа шандьбун, у бь чʹьра, агьра у чʹәка һатьнә ԝедәре. 4 Иса һәр тьшт заньбу, кӧ ԝе чь бе сәре ԝи, пешда чу у ԝанрʹа гот: «Һун кʹе дьгәрʹьн?» 5 Ԝана щаба ԝи да: «Исайе Ньсрәти». Әԝи жи ԝанрʹа гот: «Әв әз ьм». Нәмаме ԝи Щьһуда жи тʹәви ԝан сәкьни бу.

6 Гава Иса ԝанрʹа гот, «Әв әз ьм», әԝана пашда чун у әʹрде кʹәтьн. 7 Һьнге әԝи диса жь ԝан пьрси: «Һун кʹе дьгәрʹьн?» Ԝана гот: «Исайе Ньсрәти». 8 Иса щаба ԝан да: «Мьн ԝәрʹа гот кӧ әз ьм. Һәрге һун мьн дьгәрʹьн, бьһельн бьра әԝана һәрʹьн». 9 Әԝи әв йәк гот, сәва кӧ әв гьлийед ԝи бенә сери: «Әԝед кӧ тә данә мьн, мьн жь ԝан ԛә йәк ӧнда нәкьр».

10 Һьнге Шьмһʹун Пәтрус, шуре кӧ щәм ԝи һәбу дәрхьст, ль хӧламе кʹаһине мәзьн хьст у гӧһе ԝийи рʹасте жекьр. Наве ԝи хӧлами Малхо бу. 11 Иса Пәтрусрʹа гот: «Шуре хԝә бькә ԛабе. Әзе чаԝа ԝе кʹаса кӧ Бав дайә мьн вәнәхԝьм?»

12 Һьнге әскәра, сәроке әскәра у нобәдаред Щьһуйа Иса гьртьн у гьредан. 13 Ԝана пешийе әԝ бьрә бал Һәнан, чьмки Һәнан хәзуре Ԛәйафа бу. Ԛәйафа ԝе сале кʹаһине мәзьн бу. 14 Әԝа әԝ Ԛәйафа бу, йе кӧ Щьһуйарʹа готьбу ԝәки һе баш ә, кӧ йәк бона щьмәʹте бьмьрә.

15 Шьмһʹун Пәтрус у шагьртәки дьн пәй Иса дьчун. Әв шагьрт насе кʹаһине мәзьн бу, у әԝ тʹәви Иса кʹәтә һʹәԝша кʹаһине мәзьн, 16 ле Пәтрус дәрва бәр дәри сәкьни бу. Һьнге шагьрте кӧ насе кʹаһине мәзьн бу, дәркʹәт у тʹәви дәргәһване хәбәр да у Пәтрус бьрә һьндӧрʹ. 17 Әв щарийа кӧ дәргәһван бу жь Пәтрус пьрси: «Дьбә тӧ жи йәк жь шагьртед ви мәрьви йи?» Әԝи гот: «На, әз ниньм». 18 Хӧлам у нобәдара пе кʹомьре агьр вехьстьбун, доре сәкьни бун у хԝә гәрм дькьрьн, чьмки сар бу. Пәтрус жи тʹәви ԝан сәкьни бу у хԝә гәрм дькьр.

19 Һьнге сәроке кʹаһина пьрс данә Иса дәрһәԛа шагьртед ԝи у һинкьрьнед ԝи. 20 Иса щаба ԝи да: «Мьн бәр һʹәму мәрьва әшкәрә хәбәр дьда, у мьн һәртʹьм кʹьништ* у пʹарьстгәһеда, кʹидәре һʹәму Щьһу тʹоп дьбун, һин дькьр у мьн тʹӧ тьшт дьзива нәготийә. 21 Тӧ чьма жь мьн дьпьрси? Жь ԝан бьпьрсә, йед кӧ бьһистьнә мьн ԝанрʹа чь готийә. Әԝана заньн мьн чь готийә». 22 Гава әԝи ӧса гот, жь нобәдара йәки кӧ ԝедәре сәкьни бу, силәк ль Иса хьст у ԝирʹа гот: «Тӧ чь щурʹәйи щаба сәроке кʹаһина дьди?» 23 Иса жи щаба ԝи да: «Һәрге мьн тьштәки нәрʹаст гот, бежә. Ле һәрге мьн рʹаст гот, тӧ чьма мьн дьхи?» 24 Паши ве йәке, Һәнан әԝ гьредайи шандә щәм кʹаһине мәзьн, Ԛәйафа.

25 Гава Шьмһʹун Пәтрус бәр агьр сәкьни бу у хԝә гәрм дькьр, жь ԝи пьрсин: «Дьбә тӧ жи йәк жь шагьртед ԝи йи?» Әԝи әв йәк инкʹар кьр у гот: «На, әз ниньм». 26 Ԝедәре хӧламәки кʹаһине мәзьн һәбу. Әԝ мәрьве ԝи кәси бу, йе кӧ Пәтрус гӧһе ԝи жекьрьбу, у әԝи Пәтрусрʹа гот: «Нә бахчәда мьн тӧ тʹәви ԝи дити?» 27 Ле Пәтрус диса әв йәк инкʹар кьр, у һәма ԝе дәме дик банг да.

28 Һьнге ԝана Иса жь щәм Ԛәйафа бьрьнә ԛәсьра ԝәли. Сәре сьбәһе бу. Ле йед кӧ Иса бьрьн, хԝәха нәкʹәтьнә ԛәсьра ԝәли, сәва кӧ әԝана һʹәрам нәбьн, ԝәки бькарьбьн хԝарьна Щәжьна Дәрбазбуне бьхԝьн. 29 Ләма Пилато дәркʹәтә дәрва щәм ԝан у пьрси: «Һун ви мәрьви чьда нәһәԛ дькьн?» 30 Ԝана щаба ԝи да: «Һәрге әв мәрьв нәһәԛ нибуйа, мә әԝ нәдьда дәсте тә». 31 Һьнге Пилато ԝанрʹа гот: «Әԝи хԝәрʹа бьвьн у ль гора ԛануна хԝә диԝана ԝи бькьн». Щьһуйа жи ԝирʹа готьн: «Изьна мә тʹӧнә әм кәсәки бькӧжьн». 32 Әԝ йәк ӧса ԛәԝьми, ԝәки әԝ готьна Иса, кӧ әԝе чь щурʹәйи бьмьрә, бе сери.

33 Пилато диса кʹәтә ԛәсьра ԝәли, гази Иса кьр у жь ԝи пьрси: «Тӧ йи Пʹадше Щьһуйа?» 34 Иса щаб да: «Тӧ ве йәке хԝәха дьбежи, йан кәсед дьн тьштәк дәрһәԛа мьн тәрʹа готьнә?» 35 Пилато гот: «Чьма әз Щьһу мә? Мьләте тә у сәрокед кʹаһина тӧ данә дәсте мьн. Тә чь кьрийә?» 36 Иса гот: «Пʹадшатийа мьн мина пʹадшатийа ве дьнйайе нинә. Һәрге Пʹадшатийа мьн мина пʹадшатийа ве дьнйайе буйа, хьзмәткʹаред мьн ԝе шәрʹ кьрана, ԝәки әз нәкʹәтама дәсте Щьһуйа. Ле Пʹадшатийа мьн нә жь ве дьнйайе йә». 37 Һьнге Пилато жь ԝи пьрси: «Ԝәки ӧса нә тӧ пʹадша йи?» Иса щаб да: «Тӧ хԝәха дьбежи кӧ әз пʹадша мә. Әз бона ве йәке һатьмә буйине у һатьмә дьнйайе, ԝәки бона рʹастийе шәʹдәтийе бьдьм. Һәр кәсе кӧ алийе рʹастийе йә, гӧһ дьдә дәнге мьн». 38 Пилато ԝирʹа гот: «Рʹасти чь йә?»

Паши ве йәке, әԝ диса дәркʹәтә дәрва щәм Щьһуйа у ԝанрʹа гот: «Әз тʹӧ нәһәԛийе ԝида навиньм. 39 Һьм жи, әʹдәте ԝә һәйә кӧ әз ԝәʹде Щәжьна Дәрбазбуне гьртики бона ԝә бәрʹдьм. Һун дьхԝазьн ԝәки әз бона ԝә Пʹадше Щьһуйа бәрʹдьм?» 40 Ԝана кьрә ԛирʹин у гот: «Нә кӧ ви мәрьви, ле Барабас бәрʹдә!» Ле Барабас ԛачах бу.

19 Паше Пилато Иса бьр у да бәр ԛамчийа. 2 Әскәра жь стьрийа тʹащәк чекьрьн у данә сәр сәре ԝи, у чӧхәки ширк* ль ԝи кьрьн. 3 Әԝана дьһатьнә щәм ԝи у дьготьн: «Сьлав ль тә, йа Пʹадше Щьһуйа!» У ӧса жи силә ԝи дьхьстьн. 4 Пилато диса дәркʹәтә дәрва у ԝанрʹа гот: «Ва бьньһерʹьн! Әз ԝи тиньм дәрва щәм ԝә, ԝәки һун бьзаньбьн кӧ әз тʹӧ нәһәԛийе ԝида навиньм». 5 Һьнге Иса бь тʹаще стьрийа у бь чӧхе ширк дәркʹәтә дәрва. У Пилато ԝанрʹа гот: «Ва йә әԝ мәрьв!» 6 Ле гава сәрокед кʹаһина у нобәдара әԝ дитьн, ԝана кьрә ԛирʹин у дьготьн: «Ԝи стуне хә! Ԝи стуне хә!» Пилато ԝанрʹа гот: «Һун хԝәха ԝи бьвьн у стуне хьн, чьмки әз тʹӧ нәһәԛийе ԝида навиньм». 7 Щьһуйа ԝирʹа готьн: «Ԛануна мә һәйә, у ль гора ве ԛануне гәрәке әԝ бе кӧштьне, чьмки әԝи хԝә кьрә кӧрʹе Хԝәде».

8 Гава Пилато әв йәк бьһист, һе зедә тьрсийа. 9 Әԝ диса кʹәтә һьндӧрʹе ԛәсьра ԝәли у жь Иса пьрси: «Тӧ жь кʹидәре йи?» Ле Иса щаб нәда. 10 Һьнге Пилато ԝирʹа гот: «Тӧ нахԝази тʹәви мьн хәбәр ди? Тӧ ньзани кӧ һʹӧкӧме мьн һәйә әз тә бәрʹдьм у һʹӧкӧме мьн һәйә тә стуне хьм?» 11 Иса жи щаба ԝи да: «Һәрге жь жор тәрʹа нәһата дайине, тʹӧ һʹӧкӧме тә ԝе сәр мьн тʹӧнә буйа. Ләма гӧне ԝи, йе кӧ әз дамә дәсте тә, һе мәзьн ә».

12 Жь бо ве йәке Пилато мәщал дьгәрʹийа кӧ ԝи бәрʹдә, ле Щьһуйа дькьрә ԛирʹин: «Һәрге тӧ ԝи мәрьви бәрʹди, тӧ досте Ԛәйсәр нини. Һәр кәсе кӧ хԝә дькә пʹадша, мьԛабьли Ԛәйсәр рʹадьбә». 13 Паше, гава Пилато әв гьли бьһистьн, әԝи Иса дәрхьстә дәрва у хԝәха жи сәр кʹӧрсийа диԝане рʹуньшт, йа кӧ ль Сәле Кәвьр бу (наве ԝи щийи бь Ибрани Габата бу). 14 Рʹожа Һазьркьрьне* бу йа Щәжьна Дәрбазбуне, у нивро незики сьһʹәта донздәһа* бу. Пилато Щьһуйарʹа гот: «Ва йә пʹадше ԝә!» 15 Ле ԝана кьрә ԛирʹин: «Ԝи жь мә дур хә! Ԝи жь мә дур хә! Ԝи стуне хә!» Пилато ԝанрʹа гот: «Әз пʹадше ԝә стуне хьм?» Сәрокед кʹаһина ԝирʹа готьн: «Хенщи Ԛәйсәр, тʹӧ пʹадшаки мә тʹӧнә». 16 Һьнге әԝи Иса да дәсте ԝан, ԝәки ԝи стуне хьн.

Ԝана жи Иса бьр. 17 Әԝи хԝәха стуна хԝә һьлда, у дәркʹәтә ԝи щийе кӧ жерʹа Щийе Ԛаф дьбежьн (бь Ибрани Голгота). 18 Ԝедәре ԝана Иса сәр стуне мьх кьр. Кʹеләка ԝи дӧ мер жи дардакьри бун, һәр йәк алики, Иса ортʹа ԝанда бу. 19 Пилато ньвисарәк жи ньвиси у стунева кьр. Ԝедәре аһа ньвисар бу: «Исайе Ньсрәти, Пʹадше Щьһуйа». 20 Гәләк Щьһуйа әв ньвисар хԝәнд, чьмки щийе кӧ Иса сәр стуне мьхкьри бу незики бажер бу у әԝ бь Ибрани, Латини у Йунани һатьбу ньвисаре. 21 Ле сәрокед кʹаһинед Щьһуйа Пилаторʹа готьн: «Нәньвисә, ‹Пʹадше Щьһуйа›, ле бьньвисә кӧ әԝи гот ‹Әз Пʹадше Щьһуйа мә›». 22 Пилато жи щаб да: «Мьн чь ньвисийә, ньвисийә».

23 Паше гава әскәра Иса сәр стуне мьх кьрьн, кʹьнщед ԝи һьлдан у нав хԝәда кьрьнә чар пʹара, һәр йәкирʹа пʹарәк. Ле кьрасе ԝи дьрути нибу, у жь сәри һʹәта бьни һунанди бу. 24 Ләма ԝана һәвдӧрʹа готьн: «Ԝәрә әм ве нәԛәльшиньн, ле пʹәшк бавежьн һәла әԝе кʹерʹа бькʹәвә». Әԝ йәк аһа бу, ԝәки әв ньвисар бе сери: «Ԝана кʹьнщед мьн нав хԝәда пʹарәвәкьрьн, у бона кʹьнще мьн пʹәшк авитьн». Әскәра һәма ӧса жи кьрьн.

25 Бәр стуна Иса йа щәфайе, дийа ԝи у хатийа ԝи сәкьнибун. Ӧса жи, Мәрйәма жьна Клопас у Мәрйәма Мәгдәлани ԝедәре бун. 26 Гава Иса дийа хԝә у шагьрте кӧ әԝи ле һʹәз дькьр, ԝедәре сәкьни дитьн, дийа хԝәрʹа гот: «Ва йә, кӧрʹе тә!» 27 Паше әԝи ви шагьрте хԝәрʹа гот: «Ва йә, дийа тә!» Жь һьнгева, әԝи шагьрти әԝ бьрә мала хԝә.

28 Паше, гава Иса заньбу кӧ ида һәр тьшт һатийә сери, гот: «Әз тʹи мә», ԝәки бь ве йәке ньвисар бе сери. 29 Ԝедәре фьраԛәкә бь шәрава тьрʹш тʹьжә һәбу. У ԝана луфьк һьлда кьрә шәрава тьрʹш, сәре дарькәкева* кьрьн у дьрежи бәр дәве ԝи кьрьн. 30 Гава Иса әв шәрава тьрʹш тәʹм кьр, әԝи гот: «Һатә сери!» У сәре хԝә бәржер кьр у мьр.*

31 Әԝ рʹожа Һазьркьрьне бу, ләма сәва кӧ рʹожа Шәмийе* щьнйаз сәр стуне нәмана (чьмки ве рʹоже Шәмийа мәзьн бу), Щьһуйа жь Пилато һиви кьрьн, ԝәки ньгед кәсед сәр стуне бенә шкенандьне у щьнйазед ԝан бенә һьлдане. 32 Һьнге әскәр һатьн у ньгед һәрдӧ мәрьвед кӧ тʹәви Иса дардакьри бун, шкенандьн. 33 Ле гава әԝана һатьнә щәм Иса, дитьн кӧ әԝ ида мьрийә, у ԝана ньгед ԝи нәшкенандьн. 34 Ле жь әскәра йәки, пе рʹьме кʹеләка ԝи ԛӧл кьр, у дәрберʹа ав у хун же дәркʹәт. 35 Йе кӧ әв йәк дитьбу шәʹдәти дайә, у шәʹдәтийа ԝи рʹаст ә. Әԝ занә кӧ әԝ чь жи дьбежә рʹаст ә, ԝәки һун жи баԝәр бькьн. 36 Бь рʹасти әв һʹәму тьшт ԛәԝьмин, ԝәки әва ньвисара бе сери: «Тʹӧ һәстийе ԝи ԝе нәйе шкенандьне». 37 У ньвисарәкә дьн жи ӧса дьбежә: «Әԝана ԝе ль ԝи бьньһерʹьн, бәдәна кʹижани ԛӧл кьрьнә».

38 Паши ван тьшта, Усьве Аримәтйайи, йе кӧ йәк жь шагьртед Иса бу, ле жь тьрса Щьһуйа әв йәк вәдьшарт, жь Пилато һиви кьр ԝәки щьнйазе Иса һьлдә. Пилато изьн да ԝи у әԝ жи чу у щьнйазе Иса һьлда. 39 Никодемо жи, йе кӧ щара пешьн шәв һатьбу щәм Иса, һат, рʹуне бинхԝәш у уд тʹәвһәвкьри ԝәкә 30 килограм ани. 40 Ԝана щьнйазе Иса һьлда у ль гора әʹдәте дәфьнкьрьна Щьһуйа, бьһарәт ле дан у пʹәрчʹед кʹьтанида пʹечʹан. 41 Незики щийе кӧ Иса стуне хьстьбун, бахчәк һәбу, у нав бахчәда тʹьрбәкә тʹәзә һәбу, кӧ һе тʹӧ кәс теда нәһатьбу данине. 42 Чьмки рʹожа Һазьркьрьне йа Щьһуйа бу, у тʹьрб жи незик бу, ԝана Иса кьрә ԝедәре.

20 Рʹожа пешьн йа һʹәфтийе, сьбәһе зу гава һе тәʹри бу, Мәрйәма Мәгдәлани чу бәр тʹьрбе, у дит ԝәки кәвьре бәр тʹьрбе ида ԝедакьри йә. 2 Әԝ рʹәвә-рʹәв чу бал Шьмһʹун Пәтрус у шагьрте дьн, йе кӧ Иса ле һʹәз дькьр, у ԝанрʹа гот: «Хӧдан жь тʹьрбе дәрхьстьнә, у әм ньзаньн әԝ данинә кʹидәре».

3 Һьнге Пәтрус у шагьрте дьн бәрбь тʹьрбе чун. 4 Һәрдӧ һәврʹа рʹәвин, ле шагьрте дьн жь Пәтрус зутьр рʹәвийа у әԝ пешийе гьһиштә бәр тʹьрбе. 5 Әԝи хԝә ԛуз кьр, ль һьндӧрʹ ньһерʹи у пʹәрчʹед кʹьтани ԝедәре дит, ле нәкʹәтә һӧндӧрʹ. 6 Паше Шьмһʹун Пәтрус жи кӧ пәй ԝи дьһат, кʹәтә һьндӧрʹе тʹьрбе у дит пʹәрчʹед кʹьтани ԝедәре нә. 7 Пʹәрчʹе сәре ԝи нә кӧ тʹәви пʹәрчʹед дьн бу, ле ԛәткьри алики дани бу. 8 Паше шагьрте дьн жи, йе кӧ пешийе һатьбу бәр тʹьрбе кʹәтә һӧндӧрʹ, дит у баԝәр кьр. 9 Ле ԝана һе әв ньвисар кӧ Иса гәрәке жь мьрьне бьһата рʹакьрьне, фәʹм нәкьрьбун. 10 Паше шагьрт вәгәрʹийанә малед хԝә.

11 Ле Мәрйәм дәрва бәр тʹьрбе сәкьни бу у дьгьрийа. Әԝе бь гьри хԝә ԛуз кьр, ԝәки һьндӧрʹе тʹьрбе бьньһерʹә. 12 У әԝе дит кӧ дӧ мәләкед пе кʹьнщед сьпи, ль щийе кӧ щьнйазе Иса ԝедәре бу рʹуньштьнә, йәк бәр сери у йе дьн бьнпʹийе. 13 Мәләка жь ԝе пьрси: «Тӧ чьма дьгьрийи?» Әԝе щаб да: «Хӧдане мьн дәрхьстьнә, у әз ньзаньм кӧ әԝ данинә кʹидәре». 14 Гава әԝе әԝ йәк гот, пьшт хԝәва зьвьрʹи у ԝедәре Иса сәкьни дит, ле әԝе фәʹм нәкьр кӧ әԝ Иса йә. 15 Иса жь ԝе пьрси: «Тӧ чьма дьгьрийи? Тӧ кʹе дьгәрʹи?» Мәрйәме тʹьре әԝ бахчәван ә, у әԝе ԝирʹа гот: «Әзхӧлам, һәрге тә щьнйазе ԝи һьлдайә, мьнрʹа бежә тә әԝ данийә кʹидәре, у әзе ԝи бьвьм». 16 Иса ԝерʹа гот: «Мәрйәм!» Әԝе бәре хԝә дайе у бь Ибрани жерʹа гот: «Рәббуни!» (чь кӧ те һʹәсабе «Дәрсдар!») 17 Иса жерʹа гот: «Мьн бәрʹдә, чьмки әз һе һьлнәкʹьшийамә щәм Бав. Ле һәрʹә щәм бьред мьн у ԝанрʹа бежә: ‹Әз һьлдькʹьшьм щәм Баве хԝә у Баве ԝә, щәм Хԝәдайе хԝә у Хԝәдайе ԝә›». 18 Мәрйәма Мәгдәлани һатә бал шагьрта у ԝанрʹа гот: «Мьн Хӧдан дит!» У тьштед кӧ Иса жерʹа готьбу, ԝанрʹа гьли кьр.

19 Хут ве еваре, рʹожа пешьн йа һʹәфтийе, шагьрт ль һәв тʹоп бун у жь тьрса Щьһуйа дәри дадан. Һьнге Иса һат, нава ԝанда сәкьни у готә ԝан: «Сьлав ль ԝә».* 20 Паши ван гьлийа, әԝи дәстед хԝә у кʹеләка хԝә нишани ԝан кьр. Һьнге шагьрт гәләк ша бун гава Хӧдан дитьн. 21 Иса диса ԝанрʹа гот: «Сьлав ль ԝә. Чаԝа кӧ Бав әз шандьмә, әз жи ԝә дьшиньм». 22 Паше әԝи пʹьфи сәр ԝан кьр у гот: «Рʹӧһʹе пироз бьстиньн. 23 Һәрге һун гӧнед кәсәки бьбахшиньне, әԝ бахшанди нә. Ле һәрге һун гӧнед кәсәки нәбахшиньне, әԝ нәбахшанди нә».

24 Ле Тʹумайе кӧ йәк жь Донздәһа* бу у жерʹа «Щеԝи» дьготьн, тʹәви ԝан нибу чахе Иса һат. 25 Шагьртед дьн ԝирʹа готьн: «Мә Хӧдан дит!» Ле әԝи ԝанрʹа гот: «Һʹәта әз сәр дәстед ԝи бьринед* жь мьха нәвиньм, тʹьлийа хԝә нәдьмә ван бьрина, у дәсте хԝә нәдьмә кʹеләка ԝи, әзе тʹӧ щар баԝәр нәкьм».

26 Паши шәш рʹожа, шагьртед ԝи диса маләкеда бун, у ве щаре Тʹума тʹәви ԝан бу. Рʹаст ә дәри дадайи бун, ле Иса һат нав ԝанда сәкьни у гот: «Сьлав ль ԝә». 27 Паше әԝи Тʹумарʹа гот: «Тʹьлийа хԝә бьдә дәстед мьн, у дәстед мьн бьньһерʹә, дәсте хԝә бьдә кʹеләка мьн, у ида дӧдьли нәбә, ле баԝәр кә». 28 Тʹума жи ԝирʹа гот: «Хӧдане мьн у Хԝәдайе мьн!» 29 Иса жерʹа гот: «Тә әз дитьм, ләма тә баԝәр кьр? Чьԛас бәхтәԝар ьн кәсед кӧ нәдитьнә, ле йәкә баԝәр дькьн».

30 Һәмьки Иса бәр шагьрта гәләк кʹәрәмәтед дьн жи кьрьн, кʹижан кӧ ве кʹьтеба гӧломәтккьрида нәһатьнә ньвисаре. 31 Ле әв тьшт һатьнә ньвисаре, ԝәки һун баԝәр кьн кӧ Иса Мәсиһ ә, Кӧрʹе Хԝәде йә, у бь ве баԝәрийе һун бь наве ԝи жийине бьстиньн.

21 Паши ве йәке, Иса бәр бәʹра Тәбәрйайе диса шагьртарʹа хӧйа бу. Әв ви щурʹәйи ԛәԝьми: 2 Шьмһʹун Пәтрус, Тʹума (кʹижанирʹа «Щеԝи» дьготьн), Натанйеле жь Канайа Щәлиле, кӧрʹед Зәбәди у дӧ шагьртед дьн тʹәвайи ԝедәре бун. 3 Шьмһʹун Пәтрус ԝанрʹа гот: «Әз дьчьм мәʹсийа бьгьрьм». Ԝана жерʹа гот: «Әм жи тʹәви тә тен». Әԝана чун кʹәтьнә ԛәйике, ле тʹәмамийа шәве тʹӧ тьшт нәгьртьн.

4 Ле гава сьбәһ сафи дьбу, Иса бәр дәве бәʹре сәкьни бу, ле шагьрта әԝ нас нәкьрьн. 5 Һьнге Иса жь ԝан пьрси: «Достно,* бал ԝә хԝарьн һәйә?» Ԝана жи щаб да: «На!» 6 Әԝи ԝанрʹа гот: «Тʹорʹе бавежьнә алийе ԛәйикейи рʹасте, у һуне мәʹсийа бьгьрьн». Ԝана тʹорʹ авит, ле нькарьбун тʹорʹе бькʹьшиньн, чьмки мәʹси гәләк бун. 7 Һьнге әԝ шагьрте кӧ Иса ле һʹәз дькьр, Пәтрусрʹа гот: «Әв Хӧдан ә!» Гава Шьмһʹун Пәтрус әв йәк бьһист, кʹьнще хԝә авитә сәр хԝә, чьмки әԝ нив тәʹзи бу, у хԝә авитә аве. 8 Ле шагьртед дьн пе ԛәйика бьчʹук тʹорʹа тʹьжә мәʹси ль пәй хԝә кʹьшандьн. Әԝана жь дәве бәʹре дур нибун, ле ԛаси 100 метри дур бун.

9 Гава әԝана дәркʹәтьнә бәр дәве бәʹре, ԝедәре ԝана нан дит у мәʹси сәр агьре кʹомьре. 10 Иса ԝанрʹа гот: «Һьнәк жь ԝан мәʹсийед кӧ ԝә һежа гьртьнә, биньн». 11 Һьнге Шьмһʹун Пәтрус кʹәтә ԛәйике у тʹорʹа кӧ бь 153 мәʹсийед мәзьн тʹьжә бу, кʹьшандә бәр дәве бәʹре. Рʹаст ә мәʹси гәләк бун, ле тʹорʹ нәԛәльши. 12 Иса ԝанрʹа гот: «Ԝәрен тәʹште бьхԝьн». Жь шагьрта тʹӧ кәси нәԝерьбу же бьпьрсийа: «Тӧ кʹи йи?», чьмки ԝана заньбу кӧ әԝ Хӧдан ә. 13 Иса нан һьлда да ԝан, у ӧса жи мәʹси да ԝан. 14 Паши ԝе йәке кӧ Иса жь мьрьне һатә рʹакьрьне, әв щара сьсийа бу кӧ әԝ шагьртарʹа хӧйа бу.

15 Чахе ԝана тәʹште хԝар, Иса жь Шьмһʹун Пәтрус пьрси: «Шьмһʹуне кӧрʹе Йуһʹәнна, тӧ мьн жь ԝан зедәтьр һʹәз дьки?» Әԝи жи щаба ԝи да: «Әре, Хӧдан, тӧ зани әз тә һʹәз дькьм». Һьнге Иса гот: «Бәрхед мьн бьчʹеринә». 16 Иса щара дӧда ле пьрси: «Шьмһʹуне кӧрʹе Йуһʹәнна, тӧ мьн һʹәз дьки?» Әԝи гот: «Әре, Хӧдан, тӧ зани әз тә һʹәз дькьм». Иса жерʹа гот: «Шьвантийе пәзед мьн бькә». 17 Иса щара сьсийа ле пьрси: «Шьмһʹуне кӧрʹе Йуһʹәнна, тӧ мьн һʹәз дьки?» Дьле Пәтрус ешийа, чьмки Иса щара сьсийа ле пьрси: «Тӧ мьн һʹәз дьки?» Әԝи гот: «Хӧдан, тӧ һәр тьшти зани. Тӧ зани әз тә һʹәз дькьм». Иса ԝирʹа гот: «Пәзед мьн бьчʹеринә. 18 Әз рʹаст тәрʹа дьбежьм, тә хортанийа хԝәда хԝәха кʹьнщед хԝә ль хԝә дькьр у кʹидәре тә дьхԝәст тӧ дьгәрʹийайи. Ле гава тӧ кал би, тӧйе дәсте хԝә дьреж ки у кәсәки дьн ԝе кʹьнща ль тә бькә у тә бьвә щийе кӧ тӧ нахԝази». 19 Әԝи әв йәк гот, сәва әʹйан кә ԝәки Пәтрус ԝе бь мьрьна чь щурʹәйи рʹумәте бьдә Хԝәде. Паши ван гьлийа әԝи жерʹа гот: «Бәрдәԝам кә пәй мьн ԝәрә».

20 Пәтрус пьшт хԝәва зьвьрʹи у дит әԝ шагьрте кӧ Иса ле һʹәз дькьр, пәй ԝан те. Әва әԝ шагьрт бу, йе кӧ ӧса жи ԝәʹде шиве хԝә дабу бәр синге Иса у готьбу: «Хӧдан, әԝ кʹи йә кӧ ԝе нәмамийа тә бькә?» 21 Гава Пәтрус әԝ дит, жь Иса пьрси: «Хӧдан, ле әԝе ча бә?» 22 Иса щаба ԝи да: «Һәрге әз бьхԝазьм кӧ әԝ бьминә һʹәта әз бем, чь ише тә йә? Тӧ бәрдәԝам кә пәй мьн ԝәрә». 23 Ләма әв готьн нав шагьртед Исада бәла бу, кӧ әв шагьрт ԝе нәмьрә. Ле Иса нәготьбу кӧ әԝе нәмьрә, ле готьбу: «Һәрге әз бьхԝазьм кӧ әԝ бьминә һʹәта әз бем, чь ише тә йә?»

24 Әва әԝ шагьрт ә, йе кӧ шәʹдәтийа ван тьшта дьдә у әв тьшт ньвисинә, у әм заньн кӧ шәʹдәтийа ԝи рʹаст ә.

25 Бь рʹасти жи Иса гәләк тьштед дьн жи кьрьнә. Һәрге әԝ һур бь һур бьһатана ньвисаре, бь тʹәхмина мьн әв һʹәму кʹьтебед гӧломәтккьри ԝе сәр дьне щи нәбуна.