КʹАРЕД ШАНДИЙА

1 Тʹейофилойе һежа, мьн кʹьтеба хԝәйә пешьнда дәрһәԛа ԝан һʹәму тьшта ньвиси, чь кӧ Иса дькьр у һин дькьр 2 һʹәта рʹожа кӧ әԝ һатә һьлкʹьшандьне ль әʹзмен. Пешийа ԝе йәке, әԝи бь рʹӧһʹе пироз рʹебәри да шандийед хԝәйә бьжарти. 3 Пәй щәфед хԝәрʹа, әԝи бь гәләк избатийед рʹаст нишани ԝан кьр, кӧ әԝ сах ә. Ԝана нава 40 рʹожида әԝ дьдитьн, у әԝи дәрһәԛа Пʹадшатийа Хԝәде хәбәр дьда. 4 Щарәке гава Иса рʹасти ԝан һат, тʹәми да ԝан: «Жь Оршәлиме дәрнәкʹәвьн, ле һивийа созе Бав бьн, дәрһәԛа кʹижани ԝә жь мьн бьһист. 5 Чьмки Йуһʹәнна бь аве дьньхӧманд,* ле һуне чәнд рʹож шунда бь рʹӧһʹе пироз бенә ньхӧмандьне».

6 Гава әԝана тʹәвайи тʹоп бун, же пьрсин: «Хӧдан, тӧйе ньһа пʹадшатийа Исраеле вәгәрʹини?» 7 Әԝи ԝанрʹа гот: «Нәлазьм ә кӧ һун, ԝәхт у зәмана бьзаньбьн, кʹижан кӧ Бав бь һʹӧкӧме хԝә кʹьфш кьрийә. 8 Ле һуне ԛәԝате бьстиньн гава рʹӧһʹе пироз бе сәр ԝә, у һуне бьбьнә шәʹдед мьн ль Оршәлиме, ль тʹәмамийа Щьһустане у Самәрйайе, у сәр тʹәмамийа дьнйайе».* 9 Гава әԝи әв гьли готьн, ԝана дит кӧ әԝ һатә һьлкʹьшандьне ль әʹзмен, у әʹԝрәки әԝ ль бәр чʹәʹве ԝан вәшарт. 10 Чахе әԝ һьлдькʹьшийа у ԝана һе ль әʹзмен дьньһерʹи, ньшкева дӧ мер бь кʹьнщед сьпи бәр ԝан сәкьнин, 11 у готьн: «Гәли Щәлилийа, һун чьма ль әʹзмен дьньһерʹьн? Исайе кӧ ль әʹзмен һатә һьлкʹьшандьне, ԝе һәма ԝи щурʹәйи вәгәрʹә, чаԝа ԝә дит әԝ чу ль әʹзмен».

12 Паше әԝана жь Чʹийайе Зәйтʹуне вәгәрʹийанә Оршәлиме. Әв чʹийа ԝәкә километрәке* жь Оршәлиме дур бу. 13 Гава әԝана һатьн, чунә ода жорьн, кʹидәре дьман. Әԝ бун Пәтрус у Йуһʹәнна, Аԛуб у Әндраԝьс, Филипо у Тʹума, Бәртоломәйо у Мәтта, Аԛубе кӧрʹе Һалфаԝо у Шьмһʹуне хирәт, у ӧса жи Щьһудайе кӧрʹе Аԛуб. 14 Ԝан һʹәмуйа һәр гав тʹәвайи дӧа дькьрьн тʹәви һьнә кʹӧлфәта у Мәрйәма дийа Иса у бьред ԝи.

15 Ԝан рʹожада, Пәтрус нава хушк у бьрада (һәжмара кәсед кӧ тʹоп бьбун ԝәкә 120 бу) рʹабу у гот: 16 «Бьрано, гәрәке әԝ ньвисар бьһата сери, кʹижан кӧ рʹӧһʹе пироз бәреда бь дәве Даԝьд дәрһәԛа Щьһуда пʹехәмбәрти кьрьбу, кӧ әԝ бу рʹебәре ԝан, йед кӧ Иса гьртьн. 17 Чьмки Щьһуда йәк жь мә бу, у һатьбу бьжартьне кӧ тʹәви мә хьзмәт кә. 18 (Әви мәрьви пе пʹәред кӧ бона хьрабийа хԝә стандьбу, әʹрд кʹьрʹи. Әԝ сәр сери кʹәт, зьке ԝи ԛәльши, у һʹәму рʹувийед ԝи дәркʹәтьнә дәрва. 19 Һʹәму бьнәлийед Оршәлиме дәрһәԛа ве йәке пеһʹәсийан, у сәр зьмане ԝан әв әʹрд Һакәлдама һатә навкьрьне, чь кӧ те һʹәсабе «Әʹрде Хуне».) 20 Кʹьтеба Зәбурада ӧса һатийә ньвисаре: ‹Бьра мала ԝи ԝеран бә, у бьра тʹӧ кәс теда нәжи›, у ‹Бьра дәԝса ԝи кәсәки дьн бьбә бәрпьрсийар›. 21 Ләма жи гәрәке йәк бе бьжартьне жь ԝан мәрьвед кӧ тʹәви мә бун тʹәмамийа ԝи ԝәхти, гава Хӧдан Иса тʹәви мә бу 22 жь рʹожа кӧ Йуһʹәнна әԝ ньхӧманд, һʹәта рʹожа кӧ әԝ жь нав мә һатә һьлдане ль әʹзмен. Йәк жь ван мәрьва гәрәке тʹәви мә бьбә шәʹде рʹабуна ԝи».

23 Һьнге ԝана бәʹса дӧ кәса кьр, Усьве кӧ жерʹа Барсабо у Йусто те готьне, у Матийо. 24 Паше ԝана ӧса дӧа кьр: «Йа Йаһоԝа, тӧ дьле һәр кәси зани. Нишани мә кә, кӧ тә жь ван дӧ мәрьва, кʹижан бьжартийә, 25 ԝәки әԝ ве хьзмәтийе у шандитийе бинә сери, чь кӧ Щьһуда жь дәсте хԝә бәрʹда, сәва кӧ рʹийа хԝәда һәрʹә». 26 Ԝана пʹәшк авит у пʹәшк Матийорʹа кʹәт, у әԝ сәр 11 шандийада зедә бу.

2 Рʹожа Пенщийе Һʹәсабе, әԝана гьшк щики тʹәвайи бун. 2 Ньшкева, дәнгәк мина баки ԛайим жь әʹзмен һат, у тʹәмамийа мала кӧ әԝана теда рʹуньшти бун, тʹьжә кьр. 3 У алавед агьр кӧ мина зьмана ԝанрʹа хӧйа бун, бәла бун у сәр ԝан һәр йәки данин. 4 Һʹәму бь рʹӧһʹе пироз тʹьжә бун, у дәстпекьрьн сәр щурʹә-щурʹә зьмана хәбәр дьн, чаԝа кӧ рʹӧһʹе пироз әԝана дьданә хәбәрдане.

5 Һьнге Щьһуйед хԝәдехофә жь һәр ԝәлати, Оршәлимеда бун. 6 Гава әв дәнг һатә бьһистьне, хәлԛ ль һәв тʹоп бун. Әԝана гәләк әʹщебмайи ман, чьмки дьбьһистьн кӧ шагьрт сәр зьманед ԝан һәр йәки хәбәр дьдьн. 7 Әԝана һʹәйр-һʹӧжмәкʹар ман у готьн: «Нә әԝ һʹәму кәсед кӧ хәбәр дьдьн, жь Щәлиле нә? 8 Ле ижа ча һәр йәк жь мә сәр зьмане хԝәйи де дьбьһе? 9 Партойи, Мәди, Әлами, бьнәлийед Месопотамйайе, Щьһустане, Кәпәдокйайе, Понтосе у Асйайе, 10 Фьригйайе, Памфилйайе, Мьсьре у бьнәлийед һәремед Либйайе йед незики Курене, йед жь Рʹоме һати һьм Щьһу һьм жи йед кӧ дине Щьһуйа ԛәбул кьрьбун,* 11 Крети у Әʹрәб—әм һʹәму дьбьһен кӧ әԝана сәр зьманед мә дәрһәԛа кьред Хԝәде йед мәзьн хәбәр дьдьн». 12 Һәр кәс мәтʹал у шаш ма, у жь һәв дьпьрсин: «Әв чь те һʹәсабе?» 13 Ле һьнәка жи ԛәрфед хԝә ԝан дькьрьн у дьготьн: «Әԝана пе шәрава ширьн* сәрхԝәш бунә».

14 Һьнге Пәтрус тʹәви Йанздәһа* рʹабу у бь дәнгәки бьльнд гот: «Гәли бьнәлийед Щьһустане у һʹәму бьнәлийед Оршәлиме, рʹьнд гӧһ бьдьнә гьлийед мьн. 15 Әв мәрьв сәрхԝәш ниньн, ча һун дьфькьрьн, чьмки ньһа шәбәԛ ә, сьһʹәт нәһ ә.* 16 Ле әв гьлийед Йоԝел пʹехәмбәр бәр чʹәʹвед ԝә тенә сери: 17 ‹Хԝәде дьбежә: «Рʹожед хьлазийеда,* әзе рʹӧһʹе хԝә сәр һәр щурʹә мәрьвада бьбариньм. Кӧрʹ у ԛизед ԝә ԝе пʹехәмбәртийе бькьн, у хортед ԝә ԝе дитьнока бьвиньн, у кал-пиред ԝә ԝе хәԝна бьвиньн. 18 У ԝан рʹожада, әзе рʹӧһʹе хԝә сәр һʹәму хӧламед хԝәда, һьм сәр жьна, һьм жи сәр мерада, бьбариньм, у әԝе пʹехәмбәртийе бькьн. 19 Әзе жор ль әʹзмен нишана бькьм у жер жи сәр рʹуйе әʹрде кʹәрәмәта бькьм: хун, агьр у әʹԝред ду. 20 Пешийа һатьна рʹожа Йаһоԝайә мәзьн у мәхсус, тәʹв ԝе тәʹри бә у һив ԝе мина хуне сор бә. 21 Һьнге һәр кәсе кӧ гази наве Йаһоԝа кә, ԝе хьлаз бә»›.

22 Гәли бьнәлийед Исраеле, гӧһ бьдьнә ван гьлийа: Чаԝа кӧ һун хԝәха заньн, Хԝәде зәлал нишан кьр, ԝәки Исайе Ньсрәти алийе ԝива һатийә шандьне, у әԝи пе Иса кʹәрәмәт у кьред мәзьн дькьрьн. 23 Хԝәде пешда заньбу у ԛьрар кьрьбу, кӧ әԝ мәрьв бькʹәвә дәсте ԝә, у ԝә пе дәсте гӧнәкʹара әԝ стуне хьст у кӧшт. 24 Ле Хԝәде әԝ жь мьрьне рʹакьр, әԝ жь щәфе* мьрьне аза кьр, чьмки һʹӧкӧме мьрьне сәр ԝи тʹӧнә бу кӧ ԝи бьгьрә. 25 Даԝьд дәрһәԛа ԝи ӧса готьбу: ‹Йаһоԝа һәртʹьм бәр чʹәʹве мьн ә, чьмки әԝ алийе мьле мьни рʹасте йә, ԝәки әз тʹӧ тьшти нәтьрсьм. 26 Ләма жи дьле мьн ша йә, у әз бь шабуне хәбәр дьдьм. У әзе* пе гӧмане бьжим, 27 чьмки тӧйе мьн Горʹеда* нәһели, у тӧйе нәһели ԝәки хьзмәткʹаре тәйи амьн бьрʹьзә. 28 Тә рʹийед жийине нишани мьн кьр. Чахе әз кʹеләка тә* бьм, те дьле мьн бь шабуне тʹьжә ки.

29 Бьрано, изьне бьдьнә мьн ԝәки әз әшкәрә дәрһәԛа кал-баве* мә Даԝьд бежьм. Әԝ мьр, һатә дәфьнкьрьне у тʹьрба ԝи һʹәта иро вьра йә. 30 Әԝ пʹехәмбәр бу у әԝи заньбу кӧ Хԝәде ԝирʹа сонд хԝарьбу, ԝәки ԝе йәк жь зӧрʹәта ԝи, сәр тʹәхте ԝи бьдә рʹуньштандьне. 31 Даԝьд пешда дит кӧ Мәсиһ ԝе жь мьрьне рʹабә, у гот кӧ әԝе Горʹеда нәминә, у бәдәна ԝи ԝе нәрʹьзә. 32 Хԝәде әԝ Иса жь мьрьне рʹакьр, у әм һʹәму шәʹдед ве йәке нә. 33 Әԝ һатә бьльндкьрьне у ль мьле Хԝәдейи рʹасте рʹуньшт, у рʹӧһʹе пироз кӧ Бав жерʹа соз дабу, станд. Ләма жи Иса рʹӧһʹе пироз барандә сәр мә, у һун ньһа ве йәке дьвиньн у дьбьһен. 34 Даԝьд нәчу ль әʹзмен, ле әԝ дьбежә: ‹Йаһоԝа Хӧдане мьнрʹа гот: «Алийе мьле мьни рʹасте рʹуне, 35 һʹәта кӧ әз дьжмьнед тә бькьмә бьне пʹийед тә»›. 36 Ләма жи бьра тʹәмамийа мала Исраеле рʹьнд бьзаньбә, кӧ әв Исайе кӧ ԝә стуне хьст, Хԝәде әԝ һьм кьрә Хӧдан, һьм жи Мәсиһ».

37 Әв гьли кʹур кʹәтьнә дьле ԝан, у ԝана Пәтрус у шандийед дьнрʹа гот: «Бьрано, ижа әм чь бькьн?» 38 Пәтрус ԝанрʹа гот: «Тʹобә кьн, у бьра һәр йәк жь ԝә бь наве Иса Мәсиһ бе ньхӧмандьне,* сәва кӧ гӧнед ԝә бенә бахшандьне. Һьнге һуне рʹӧһʹе пироз ча пʹешкʹеш бьстиньн. 39 Чьмки әв соз бона ԝә, зарʹед ԝә у бона ԝан һʹәмуйа нә, йед кӧ дур ьн, бона һʹәмуйед кӧ Хԝәдайе мә Йаһоԝа ԝе гази бал хԝә кә». 40 Әԝи бь гәләк гьлийед дьн жи шәʹдәти да, тʹәми да ԝан у гот: «Хԝә жь ви ньсьле хьраб хьлаз кьн». 41 Һьнге мәрьвед кӧ бь дьл у щан гьлийед ԝи ԛәбул кьрьн, һатьнә ньхӧмандьне, у ԝе рʹоже ԝәкә 3 000 кәс сәр шагьртада зедә бун. 42 Әԝана тʹьме жь шандийа һин дьбун, тʹәвайи ԝәхт дәрбаз дькьрьн,* дьхԝарьн у дӧа дькьрьн.

43 Шандийа дәстпекьрьн гәләк нишан у кʹәрәмәта бькьн, у тьрса Хԝәде кʹәтә дьле һәр кәсе кӧ әв тьшт дитьн. 44 Һʹәму кәсед кӧ бунә баԝәрмәнд тʹәвайи бун, у әԝана һәр тьштед хԝә нав һәвда пʹарәвәдькьрьн. 45 Ԝана мал-мьлкʹе хԝә дьфьрот у әв пʹәрә ль гора һʹәԝще һәр кәси пʹарәвәдькьрьн. 46 Әԝана һәр рʹож пʹарьстгәһеда тʹоп дьбун, дьчунә малед һәв тʹәвайи хԝарьн дьхԝарьн, әшԛ-ша у бь дьле сах хԝарьна хԝә һәвдӧрʹа пʹарәвәдькьрьн. 47 Ԝана пәсьне Хԝәде дьда у һʹәму мәрьв ԝанрʹа рʹази бун. Ԝи чахи, Йаһоԝа рʹож бь рʹож һәжмара кәсед кӧ дьһатьнә сәр рʹийа хьлазбуне, зедә дькьр.

3 Рʹожәке, Пәтрус у Йуһʹәнна паши нивро незики сьһʹәта сьсийа* ԝәхте дӧа һьлкʹьшийанә пʹарьстгәһе. 2 Һьнге мәрьвәки кӧ жь буйина хԝәда ньгада сәԛәт бу, анинә ԝедәре. Ԝана һәр рʹож әԝ незики дәре пʹарьстгәһе дьһиштьн (сәр ԝи дәри дьготьн «Дәре Бәдәԝ»), ԝәки әԝ жь хәлԛе кӧ дькʹәтьнә пʹарьстгәһе, пʹәра бьхԝазә. 3 Гава әԝи дит кӧ Пәтрус у Йуһʹәнна дькʹәвьнә пʹарьстгәһе, дәстпекьр һиви кә кӧ пʹәра бьдьне. 4 Ле Пәтрус у Йуһʹәнна дина хԝә данә ԝи, у Пәтрус гот: «Мә бьньһерʹә». 5 Әԝи жи ԝана ньһерʹи, һивийе бу кӧ әԝана ԝе тьштәки бьдьнә ԝи, у чʹәʹве ԝи ль ԝан бу. 6 Ле Пәтрус гот: «Зерʹ у зиве мьн тʹӧнә, ле чь бал мьн һәйә әзе әве бьдьмә тә. Бь наве Иса Мәсиһе Ньсрәти, рʹабә у бьгәрʹә!» 7 Пәтрус дәсте ԝийи рʹасте гьрт у әԝ рʹакьр. Дәрберʹа ньгед ԝи шьдийан, 8 әԝи банзда у дәстпекьр рʹе һәрʹә. Әԝ тʹәви ԝан чу пʹарьстгәһе, рʹева әԝи банздьда у пәсьне Хԝәде дьда. 9 У һʹәмушка дит кӧ әԝ рʹе дьчә у пәсьне Хԝәде дьдә. 10 Ԝана әԝ нас кьр, кӧ әв һәма әԝ мәрьв ә, кʹижан бәр Дәре Бәдәԝ йе пʹарьстгәһе рʹуньшти бу у жь мәрьва пʹәрә дьхԝәст. Әԝана шаш у әʹщебмайи ман сәр ве йәке кӧ әԝ дькарә рʹе һәрʹә.

11 Һʹәта әԝи мәрьви һе хԝә ль Пәтрус у Йуһʹәнна дьгьрт, гьшк шашмайи рʹәвин бал ԝан, бәрбь щийе кӧ жерʹа Сьвдәра* Сьлеман дьһатә готьне. 12 Гава Пәтрус әв йәк дит, әԝи щьмәʹтерʹа гот: «Гәли Исраелийа, һун чьрʹа сәр ве йәке әʹщебмайи дьминьн? Һун чьрʹа ӧса мә дьньһерʹьн, ԛәй те бежи мә пе ԛәԝата хԝә йан пе амьнийа хԝәйә һьндава Хԝәде ӧса кьр, ԝәки әԝ рʹе һәрʹә? 13 Хԝәдайе Бьраһим, Исһаԛ у Аԛуб, Хԝәдайе кал-бавед мә, Хьзмәткʹаре хԝә Иса рʹумәт кьр, йе кӧ ԝә да дәсте мәрьва у бәр Пилато инкʹар кьр, чахе Пилато сафи кьрьбу ԝи аза кә. 14 Бәле, ԝә йе пироз у рʹаст инкʹар кьр, у ԝә хԝәст кӧ меркӧжәк бе бәрʹдане, 15 ле ԝә Сәроке жийине кӧшт. Ле Хԝәде әԝ жь мьрьне рʹакьр, у әм шәʹдед ве йәке нә. 16 Пе наве Иса у бь сайа баԝәрийа мәйә һьндава наве ԝи, ньгед ԝи мәрьви шьдийан, кʹижани кӧ һун ньһа дьвиньн у нас дькьн. Һәма пе ԝе баԝәрийа һьндава Иса, әԝ мәрьв бәр чʹәʹве ԝә һʹәмуйа ԛәнщ бу. 17 Бьрано, әз заньм кӧ ԝә жи мина сәрԝеред хԝә бь нәзанийа хԝә әв йәк кьр. 18 Бь ви щурʹәйи, Хԝәде әв тьштед кӧ пешда бь дәве һʹәму пʹехәмбәра готьбун, ани сери, кӧ Мәсиһе ԝи ԝе щәфе бькʹьшинә.

19 Ләма тʹобә бькьн у вәгәрʹьн,* ԝәки гӧнед ԝә бенә паԛьжкьрьне, у һуне жь алийе Йаһоԝада дьлрʹьһʹәтийе бьстиньн. 20 У әԝ ԝе Мәсиһе кӧ әԝи бона ԝә бьжартийә, демәк Иса, бьшинә. 21 Әԝ гәрәке ль әʹзмен бьминә, һʹәта кӧ һʹәму тьшт диса ӧса бьбьн чаԝа дәстпекеда бу, чаԝа кӧ Хԝәде бь дәве пʹехәмбәред хԝәйә пироз, йед кӧ бәре дьжитьн, готьбу. 22 Муса ӧса готийә: ‹Хԝәдайе ԝә Йаһоԝа ԝе жь нава бьред ԝә пʹехәмбәрәки мина мьн бьдә ԝә. Һун гәрәке гӧһ бьдьнә һәр тьште кӧ әԝе ԝәрʹа бежә. 23 Һәр кәсе кӧ гӧһ нәдә ԝи Пʹехәмбәри, ԝе бе кӧштьне. 24 У һʹәму пʹехәмбәра жи, жь Самуйел гьрти һʹәта йед кӧ паши ԝи һатьн, әшкәрә дәрһәԛа ван рʹожа әʹлам дькьрьн. 25 Һун ьн кӧрʹед пʹехәмбәра у ве пәймана кӧ Хԝәде тʹәви кал-баве ԝә гьредабу. Хԝәде Бьраһимрʹа гот: ‹Бь сайа зӧрʹәта тә, һʹәму мьләтед сәр рʹуйе әʹрде ԝе бенә кʹәрәмкьрьне›. 26 Чахе Хԝәде Хьзмәткʹаре хԝә бьжарт, әԝи әԝ пешийе шандә бал ԝә кӧ ԝә кʹәрәм кә у али ԝә һәр кәси бькә, ԝәки һун тʹәрка кьред хԝәйә хьраб бьдьн».

4 Һе Пәтрус у Йуһʹәнна хәлԛерʹа хәбәр дьдан, кʹаһин, сәрԝере нобәдаред пʹарьстгәһе у Садуԛи һатьнә бал ԝан. 2 Әԝана гәләк әʹщьз бун, чьмки шандийа хәлԛ һин дькьрьн у әшкәрә әʹлам дькьрьн, кӧ Иса жь мьрьне һатийә рʹакьрьне. 3 Ләма ԝана әԝ гьртьн, у һʹәта рʹожа дьн кәледа һиштьн, чьмки евар бу. 4 Ле гәләк кәсед кӧ хәбәрдана ԝан бьһистьн, баԝәр кьрьн, у һәжмара ԝан мәрьва* гьһиштә ԝәкә 5 000.

5 Рʹожа дьн, сәрԝер, рʹуспи у ԛанунзанед Щьһуйа Оршәлимеда тʹәвайи тʹоп бун. 6 Ӧса жи сәроке кʹаһина Һәнан, Ԛәйафа, Йуһʹәнна, Скәндәр у һʹәму мәрьвед сәроке кʹаһина, ԝедәре бун. 7 Ԝана Пәтрус у Йуһʹәнна ортʹа хԝәда данә сәкьнандьне у дәстпекьрьн пьрса бьдьнә ԝан: «Ԝә әв йәк пе ԛәԝата кʹе, йан жи пе наве кʹе кьр?» 8 Һьнге Пәтрус бь рʹӧһʹе пироз тʹьжә бу у ԝанрʹа гот:

«Гәли сәрԝеред щьмәʹте у рʹуспино! 9 Һәрге иро һун жь бо ԛәнщики кӧ мә мәрьвәки сәԛәтрʹа кьрийә, пьрса дьдьнә мә, у дьхԝазьн бьзаньбьн кӧ кʹе әԝ мәрьв ԛәнщ кьрийә, 10 бьра һун у тʹәмамийа щьмәʹта Исраеле бьзаньбьн кӧ әв йәк ԛәԝьми бь наве Иса Мәсиһе Ньсрәти, йе кӧ ԝә сәр стуне дардакьр, ле Хԝәде әԝ жь мьрьне рʹакьр. Бь сайа ԝи әв мәрьв ԛәнщ бу у бәр ԝә сәкьнийә. 11 Әԝ ә ‹кәвьре кӧ ԝә авакʹара инкʹар кьр, ле әԝ буйә кәвьре сәрәкә›.* 12 Хенщи ԝе йәке, хьлазбун жь тʹӧ кәсәки дьн найе, чьмки бьн әʹзменда навәки дьн тʹӧнә, бь сайа кʹижани әм дькарьн хьлаз бьн».

13 Гава ԝана дит кӧ Пәтрус у Йуһʹәнна бь мерхаси хәбәр дьдьн у фәʹм кьрьн кӧ әԝана нәхԝәнди* у нәзан ьн, әʹщебмайи ман. Ԝана тедәрхьст кӧ әԝана тʹәви Иса бун. 14 Ԝана мәрьве кӧ һатьбу ԛәнщкьрьне у бал ԝан сәкьни бу, дьньһерʹин у нькарьбун тьштәки бежьн. 15 Ләма ԝана фәрман да ԝан, ԝәки жь ода Диԝана Бьльнд йа Щьһуйа* дәркʹәвьн, у дәстпекьрьн һәврʹа бьшеԝьрьн, 16 у готьн: «Әм ван мәрьва чаԝа бькьн? Чьмки бь рʹасти жи ԝана кʹәрәмәт кьр, кӧ тʹәмамийа щьмәʹта Оршәлимерʹа әшкәрә йә, у әм нькарьн ве йәке инкʹар кьн. 17 Сәва кӧ әв йәк нав щьмәʹтеда һе зедә бәла нәбә, ԝәрә әм ԝана бьтьрсиньн у ԝанрʹа бежьн кӧ бь ви нави ида кәсәкирʹа хәбәр нәдьн».

18 Ԝана гази ван дӧ шагьрта кьр у тʹәми да ԝан, ԝәки бь наве Иса тʹӧ тьшти нәбежьн у һин нәкьн. 19 Ле Пәтрус у Йуһʹәнна ԝанрʹа готьн: «Һун хԝәха бьфькьрьн, гәло бәр чʹәʹве Хԝәде чь рʹаст ә, әм гӧһ бьдьнә Хԝәде йан гӧһ бьдьнә ԝә? 20 Әм нькарьн дәрһәԛа тьштед кӧ мә дитьнә у бьһистьнә, нәбежьн». 21 Ԝана диса әԝана тьрсандьн у паше бәрʹдан, чьмки тʹӧ сәбәб нәдитьн кӧ ԝана щәза кьн. У һьм жи әԝана жь щьмәʹте дьтьрсийан, чьмки гьшка жь бо тьште ԛәԝьми шькьри дьданә Хԝәде. 22 Әԝ мәрьве кӧ бь ве кʹәрәмәте ԛәнщ бу, әʹмьрда 40 сали зедәтьр бу.

23 Гава әԝана һатьнә бәрʹдане, чун бал шагьртед дьн у ԝанрʹа гьли кьрьн чь кӧ сәрокед кʹаһина у рʹуспийа ԝанрʹа готьбун. 24 Гава ԝана әв йәк бьһист, һәврʹа бь дәнге бьльнд Хԝәдерʹа ӧса дӧа кьрьн:

«Йа Хӧдане Мәзьн, йе кӧ әʹрд у әʹзман, бәʹр у һʹәму тьштед нав ԝанда чекьрьнә, 25 у йе кӧ пе рʹӧһʹе пироз бь дәве хьзмәткʹаре хԝә у баве мә Даԝьд готьбу: ‹Чьма мьләт һерс дькʹәвьн у хәлԛ дәрһәԛа тьштед пʹучʹ дьфькьрьн? 26 Пʹадшед дьнйайе бунә йәк у сәрԝер ль һәв тʹоп бун, кӧ мьԛабьли Йаһоԝа у бьжартийе* ԝи рʹабьн›. 27 Бь рʹасти, һьм Һеродәс һьм Понтийо Пилато тʹәви мәрьвед жь мьләтед дьн у тʹәви щьмәʹта Исраеле ль ви бажари мьԛабьли хьзмәткʹаре тәйи пироз Иса, тʹоп бун, йе кӧ тә бьжартийә, 28 ԝәки ве йәке бькьн чь кӧ пе ԛәԝата* тә у хԝәстьна тә пешда һатьбу ԛьраркьрьне. 29 У ньһа, йа Йаһоԝа, дина хԝә бьде ча әԝана мә дьдьнә тьрсандьне* у али хӧламед хԝә бькә, сәва кӧ әм бь мерхаси дәрһәԛа хәбәра тә хәбәр дьн. 30 Диса жи дәсте хԝә бона ԛәнщкьрьне дьреж кә у бьра бь наве хьзмәткʹаре тәйи пироз, Иса, нишан у кʹәрәмәт бьԛәԝьмьн».

31 Чахе ԝана дӧа-дьрозгә хьлаз кьр, щийе кӧ әԝана тʹоп бьбун һʹәжийа, у һʹәмушк бь рʹӧһʹе пироз тʹьжә бун у бь мерхаси дәрһәԛа хәбәра Хԝәде хәбәр дьдан.

32 Хенщи ԝе йәке, гәләк кәсед кӧ баԝәр кьрьн, сәр фькьр у нетәке бун, у тʹӧ кәси жь ԝан сәр һәбука хԝә нәдьгот «Әва йа мьн ә», ле ԝана һәр тьште хԝә нав һәвда пʹарәвәдькьр. 33 У шандийа бәрдәԝам дькьрьн бь ԛәԝатәкә зор дәрһәԛа сахкьрьна Хӧдан Иса шәʹдәтийе бьдьн, у Хԝәде ԛәнщийа хԝәйә мәзьн сәр ԝан һʹәмуйа дьбаранд. 34 Бь рʹасти, нав ԝанда тʹӧ кәсе дәсттәнг тʹӧнә бу, чьмки әʹрд у малед кʹе һәбун, дьфьротьн, пʹәрә дьанин 35 у дьданә шандийа. Әв пʹәрә ль гора һʹәԝщед һәр кәси дьһатә бәлакьрьне. 36 Усьве кӧ жерʹа ӧса жи Барнабас дьһатә готьне (чь кӧ ль гора ԝәлгәрʹандьне те һʹәсабе «Кӧрʹе Бәрдьлийе»), Леԝи бу у әʹсьле хԝәда жь Кипрусе бу, 37 әԝи әʹрде хԝә фьрот у әв пʹәрә ани да шандийа.

5 Мәрьвәки бь наве Һананийа тʹәви жьна хԝә Саферийайе әʹрдәк фьрот. 2 Ле һьнә пʹәрә әԝи хԝәрʹа вәшарт, у жьна ԝи һаж ве йәке һәбу, пʹәре майи жи әԝи ани у да шандийа. 3 Ле Пәтрус Һананийарʹа гот: «Һананийа, тә чьрʹа һишт кӧ Шәйтʹан сәр дьле тә һʹӧкӧм кә, ԝәки тӧ рʹӧһʹе пироз бьхапини у һьнә пʹәре әʹрд хԝәрʹа вәшери? 4 Пешийа кӧ тә әԝ әʹрд бьфьрота, нә әԝ йе тә бу? Нә паши фьротане жи әԝ пʹәрә дәсте тәда бу? Ижа тә чьрʹа фькьрәкә ӧса кьрә дьле хԝә? Тә нә кӧ мәрьв хапандьн, ле Хԝәде». 5 Гава Һананийа әв гьли бьһистьн, кʹәт у мьр. У тьрсәкә мәзьн кʹәтә дьле һʹәму кәсед кӧ әв йәк бьһистьн. 6 Һьнге чәнд хорт һатьн, әԝ бь кʹьтан пʹечʹан, бьрьнә дәрва у дәфьн кьрьн.

7 Ԝәкә се сьһʹәт шунда жьна ԝи жи һат, ле әԝ һаж ве йәке тʹӧнә бу кӧ чь ԛәԝьми бу. 8 Пәтрус жь ԝе пьрси: «Мьнрʹа бежә, ԝә әʹрде хԝә баһе һаԛаси фьрот?» Әԝе жи гот: «Бәле, һәма һаԛаси». 9 Һьнге Пәтрус жерʹа гот: «Чьрʹа ԝә һәрда гьлийед хԝә кьрә йәк, ԝәки рʹӧһʹе Йаһоԝа бьщерʹьбиньн? Ва йә, кәсед кӧ мере тә дәфьн кьрьн, бәр дери нә, у әԝана тен ԝәки тә жи дәрхьнә дәрва». 10 Дәрберʹа әԝ бәр ньгед ԝи кʹәт у мьр. Гава хорт кʹәтьнә һьндӧрʹ у дитьн кӧ әԝ мьрийә, ԝана әԝ жи бьр у кʹеләка мере ԝе дәфьн кьрьн. 11 Һьнге тьрсәкә мәзьн кʹәтә дьле тʹәмамийа щьвате у һәр кәсе кӧ әв йәк бьһистьн.

12 Бь дәсте шандийа гәләк кʹәрәмәт у нишан нава щьмәʹтеда дьһатьнә кьрьне; у әԝана гьшк тʹәвайи Сьвдәра* Сьлеманда тʹоп дьбун. 13 Рʹаст ә тʹӧ кәсәки дьн нәԝерьбу тʹәви ԝан буйа, ле йәкә щьмәʹте пәсьне ԝан дьда. 14 Хенщи ԝе йәке, чьԛас дьчу һе зедә жьн у мера баԝәрийа хԝә Хӧдан дьанин у дьбунә шагьртед ԝи. 15 Мәрьва гәләк кәсед нәхԝәш дьанинә кʹучʹед сәрәкә у ԝедәре сәр дошәка датанин, ԝәки гава Пәтрус дәрбаз бә, һәма сийа ԝи бькʹәвә сәр ԝан һьнәка. 16 Ӧса жи, гәләк мәрьв жь бажаред дәр-доре Оршәлиме дьһатьн. Ԝана кәсед нәхԝәш у йед щьнакʹәти дьанин, у әԝана гьшк ԛәнщ дьбун.

17 Кʹаһине мәзьн у һʹәмуйед тʹәви ԝи, йед кӧ пьштгьред һинкьрьнед Садуԛийа* бун, бь һʹәвсудийе тʹьжә рʹабун. 18 Ԝана шанди гьртьн у авитьнә кәла бажер. 19 Ле мәләке Йаһоԝа шәв һат у дәред кәле вәкьр, әԝана дәрхьстьн у гот: 20 «Һәрʹьн пʹарьстгәһе у бәрдәԝам кьн мәрьварʹа дәрһәԛа ве жийине гьли кьн». 21 Гава ԝана әв йәк бьһист, бәрбанге кʹәтьнә пʹарьстгәһе у дәстпекьрьн һин кьн.

Чахе кʹаһине мәзьн у пьштгьред ԝи щьвийан, ԝана Диԝана Бьльнд йа Щьһуйа* у рʹуспийед Исраеле тʹоп кьрьн у нобәдар шандьнә кәле, ԝәки шандийа биньн щәм ԝан. 22 Ле гава нобәдар гьһиштьнә ԝедәре, ԝана шанди кәледа нәдитьн. Һьнге әԝана пашда вәгәрʹийан, у готьн: 23 «Мә дит кӧ дәред кәле дадайи нә у нобәдар бәр дәри сәкьни нә, ле гава мә дәри вәкьр, һьндӧрʹда кәсәк нәдит». 24 Гава сәрԝере нобәдаред пʹарьстгәһе у сәрокед кʹаһина әв гьли бьһистьн, мәтʹал ман, тʹәвльһәв бун у ньзаньбун ахьрийа ве йәке ԝе ча бә. 25 Ԝе дәме кәсәк һат у ԝанрʹа гот: «Ва әԝ мәрьвед кӧ ԝә авитьнә кәле, пʹарьстгәһеда сәкьни нә у щьмәʹте һин дькьн». 26 Һьнге сәрԝере нобәдара у нобәдар чун шандийа биньн, ле нә бь дәсте зоре, чьмки әԝана дьтьрсийан кӧ щьмәʹт ԝана бьдә бәр кәвьра.

27 У ԝана шанди анинә бәр Диԝана Бьльнд йа Щьһуйа. Кʹаһине мәзьн жь ԝан пьрси 28 у гот: «Мә сәрт фәрман да ԝә, ԝәки һун бь ԝи нави һин нәкьн, ле ԝә диса жи Оршәлим пе һинкьрьнед хԝә тʹьжә кьрийә, у һун дьхԝазьн хуна ԝи мәрьви бькьнә стийе мә». 29 Ле Пәтрус у шандийед дьн готьн: «Әм гәрәке гӧрʹа Хԝәде бькьн, нә кӧ гӧрʹа мәрьва. 30 Хԝәдайе кал-бавед мә, Иса жь мьрьне рʹакьр, әԝе кӧ ԝә стунева* дарда кьр у кӧшт. 31 Хԝәде әԝ бьльнд кьр у ча Сәрок у Хьлазкʹар дани ль мьле хԝәйи рʹасте, ԝәки мәщала тʹобәкьрьне у бахшандьна гӧна бьдә Исраеле. 32 Әм шәʹдед ван тьшта нә, у ӧса жи рʹӧһʹе пироз, кʹижан кӧ Хԝәде дайә ԝан, йед кӧ ԝи ча сәрԝер ԛәбул дькьн у гӧрʹа ԝи дькьн».

33 Гава ԝана әв йәк бьһист, гәләк һерс кʹәтьн у дьхԝәстьн ԝана бькӧжьн. 34 Ле йәки Ферьси, наве кʹижани Гамалйел бу, йе кӧ дәрсдаре Ԛануне бу у тʹәмамийа щьмәʹте ԛәдьре ԝи дьгьрт, Диԝана Бьльнд йа Щьһуйада рʹабу у фәрман да, кӧ сәр ԝәхтәки кьн шандийа дәрхьн дәрва. 35 Һьнге әԝи гот: «Гәли Исраелийа, пешийа кӧ һун тьштәки ль ван мәрьва бькьн, рʹьнд бьфькьрьн. 36 Мәсәлә, пешийа ԝан рʹожа, мәрьвәк һәбу, наве кʹижани Тʹәԝдас бу. Әԝи хԝә ча кәсәки мәзьн дьда кʹьфше у ԝәкә 400 мәрьв бунә пьштгьред ԝи. Ле гава әԝ һатә кӧштьне, һʹәму пьштгьред ԝи һәв бәла бун. 37 Пәй ԝирʹа, ԝәʹде навньвисаре, Щьһудайе Щәлили һат у мәрьв пәй хԝә бьрьн. Ле әԝ жи мьр, у һʹәму кәсед кӧ пәй ԝи дьчун жи һәв бәла бун. 38 Жь бо ве йәке әз ԝәрʹа дьбежьм, жь ԝан мәрьва вәгәрʹьн у бьһельн бьра һәрʹьн. Чьмки һәрге әв нет у шьхӧл жь мәрьва йә, әԝе хьраб бә. 39 Ле һәрге жь Хԝәде йә, һуне нькарьбьн хьраб кьн. Фәсал бьн, ԝәки ӧса нибә, кӧ һун мьԛабьли Хԝәде шәрʹ бькьн». 40 Ԝана гӧһ да ԝи у гази шандийа кьрьн, әԝ данә бәр ԛамчийа* у фәрман данә ԝан, кӧ бь наве Иса Мәсиһ ида хәбәр нәдьн, у паше бәрʹдан.

41 Гава шанди жь Диԝана Бьльнд йа Щьһуйа дәркʹәтьн, гәләк ша бун, чьмки бона ԝан ԛәдьрәки мәзьн бу, ԝәки әԝана жь бо наве Иса һатьнә беһӧрмәткьрьне. 42 Әԝана нәдьсәкьнин у бәрдәԝам дькьрьн һәр рʹож пʹарьстгәһеда, ӧса жи мал бь мал һин кьн у мьзгинийа дәрһәԛа Иса Мәсиһ бәла кьн.

6 Ԝан рʹожада, һәжмара шагьрта зедә дьбу. Һьнге Щьһуйед кӧ сәр зьмане Йунани хәбәр дьдан, һьндава Щьһуйед кӧ сәр зьмане Ибрани хәбәр дьдан газьн кьрьн, чьмки ԝәʹде бәлакьрьна хԝарьне, жьнәбийед ԝан дьһатьнә биркьрьне. 2 Ләма жи Донздәһа* гази гәләк шагьрта кьрьн у ԝанрʹа готьн: «Ԝе нәрʹаст бә һәрге әм һинкьрьна хәбәра Хԝәде бьһельн, ԝәки хԝарьне бәла кьн. 3 Бьрано, һʹәфт бьред кӧ хԝәйе навәки баш ьн у бь рʹӧһʹе пироз у биланийева тʹьжә нә, нав хԝәда бьжберьн, ԝәки әм ви шьхӧле фәрз бьдьнә дәсте ԝан. 4 Ле әме хԝә тʹәсмили дӧа у һинкьрьна хәбәра Хԝәде бькьн». 5 Әв гьли һʹәмуйа хԝәш һат, у ԝана Стәйфан, мәрьвәки кӧ бь баԝәрийе у рʹӧһʹе пирозва тʹьжә бу, ӧса жи Филипо, Прокоро, Николо, Тимон, Парменас у Николойе Әнтакйайе, бьжартьн. 6 Ԝана әԝана бьрьнә бал шандийа, у паши дӧакьрьне дәстед хԝә данинә сәр ԝан.

7 Хәбәра Хԝәде бәрдәԝам дьбу бәла бә, у һәжмара шагьрта Оршәлимеда гәләк зедә дьбу. У гәләк кʹаһина жи әв баԝәри ԛәбул кьрьн.

8 Стәйфане кӧ бь кʹәрәм у ԛәԝата Хԝәдева тʹьжә бу, нав щьмәʹтеда нишан у кʹәрәмәтед мәзьн дькьрьн. 9 Ле һьнә мәрьвед ава готи жь Кʹьништа* Азакьрийа тʹәви чәнд кәсед Курени, Скәндәрйайи, Киликйайи у Асйайи, тʹәви Стәйфан кʹәтьнә дәʹԝе. 10 Ле ԝана нькарьбу мьԛабьли биланийа ԝи у рʹӧһʹе пироз кӧ әԝи пе хәбәр дьда, дәркʹәтана. 11 Һьнге ԝана дьзива сәре мәрьва тʹьжә кьр, ԝәки әԝана ӧса бежьн: «Мә бьһист кӧ әԝ кʹьфьрийа Хԝәде у Муса дькә». 12 Ԝана щьмәʹт, рʹуспи у ԛанунзан мьԛабьли ԝи рʹакьрьн, у ньшкева һатьн бь дәсте зоре Стәйфан гьртьн у бьрьнә Диԝана Бьльнд йа Щьһуйа.* 13 Ԝана гази шәʹдед дәрәԝ кьрьн, кӧ готьн: «Әв мәрьв насәкьнә, диса мьԛабьли ви щийе пироз у Ԛануне хәбәр дьдә. 14 Мәсәлә, мә бьһист кӧ әԝи гот, ԝәки әв Исайе Ньсрәти ԝе ви щийи һьлшинә у әʹдәтед кӧ Муса данә мә, бьгӧһезә».

15 Һʹәму кәсед кӧ Диԝана Бьльнд йа Щьһуйада рʹуньшти бун, ԝи ньһерʹин у дитьн кӧ рʹуйе ԝи мина рʹуйе мәләк бу.

7 Һьнге кʹаһине мәзьн пьрси: «Әв йәк рʹаст ә?» 2 Стәйфан щаб да: «Гәли бьра у бавно, гӧһ бьдьнә мьн! Чахе баве мә Бьраһим Месопотамйайеда бу, пешийа кӧ әԝ дәрбази Һаране буйа, Хԝәдайе рʹумәте ԝирʹа хӧйа бу, 3 у жерʹа гот: ‹Ԝәлате хԝә у мәрьвед хԝә бьһелә, у һәрʹә ԝәлате кӧ әзе нишани тә бькьм›. 4 Һьнге әԝ жь ԝәлате Кьлданийа дәркʹәт у Һаранеда щиԝар бу. Паши мьрьна баве ԝи, Хԝәде рʹебәри ԝи кьр, ԝәки әԝ жь ԝедәре дәрбази ԝи ԝәлати бә, кʹидәре кӧ һун ньһа дьжин. 5 Ль ви ԝәлати Хԝәде тʹӧ мьлкʹ нәда ԝи, һәла һе ԛаси пʹийәки жи. Ле Хԝәде соз дабу кӧ әԝе ви ԝәлати бьдә дәсте ԝи у зӧрʹәта ԝи, гава зарʹа ԝи һе тʹӧнә бу жи. 6 У Хԝәде ԝирʹа гот кӧ зӧрʹәта ԝи ԝе ԝәлатәки хәрибда бьжи, у ԝе ԝана бькьнә хӧлам у 400 сали бьдьнә щәфе. 7 Хԝәде гот: ‹Әзе ԝи мьләти, кʹижанирʹа әԝана хӧламтийе бькьн, щәза кьм. У паше, әԝана ԝе жь ԝедәре дәркʹәвьн у ль ви щийи мьнрʹа хьзмәтийа пироз бькьн›.

8 Хԝәде ӧса жи тʹәви Бьраһим пәймана сьнәте гьреда. Чахе Бьраһимрʹа Исһаԛ бу, әԝи рʹожа һʹәйшта әԝ сьнәт кьр. Исһаԛрʹа Аԛуб бу, у Аԛубрʹа 12 кӧрʹ бун, йед кӧ бунә бавәʹшир. 9 Бьред Усьв һʹәвсуди ԝи кьрьн у әԝ фьротьнә Мьсьре. Ле Хԝәде тʹәви ԝи бу 10 у әԝ жь һʹәму тәнгасийед ԝи хьлаз кьр. Хԝәде билани да ԝи у али ԝи кьр, кӧ пʹадше Мьсьре, Фьрәԝьн жь ԝи рʹази бә. У Фьрәԝьн әԝ сәр Мьсьре у сәр тʹәмамийа мала хԝә кьрә сәрԝер. 11 Паше тʹәмамийа Мьсьре у Кәнанеда бу хәлайи, бәле әԝ тәнгасикә гьран бу, у кал-бавед мә бе хӧрәк мабун. 12 Ле Аԛуб бьһист кӧ Мьсьреда гәньм һәйә, у әԝи щара пешьн кал-бавед мә шандьнә ԝедәре. 13 Гава бьред Усьв щара дӧда чунә ԝедәре, Усьв хԝә әшкәрә нишани ԝан кьр, у Фьрәԝьн дәрһәԛа малбәта ԝи пеһʹәсийа. 14 Һьнге Усьв хәбәр шанд, ԝәки Аԛубе баве ԝи у һʹәму мәрьвед ԝи жь Кәнане дәрен у дәрбази Мьсьре бьн. Әԝана бь тʹәмами 75 кәс бун. 15 Ӧса Аԛуб дәрбази Мьсьре бу. Ԝедәре әԝ у кал-бавед мә мьрьн. 16 Һәстийед ԝан бьрьнә Шәкәме у кьрьнә ве тʹьрбе, кӧ Бьраһим Шәкәмеда жь кӧрʹед Һамор пе зив кʹьрʹи бу.

17 Гава ԝәхт незик дьбу ԝәки Хԝәде созе кӧ дабу Бьраһим бинә сери, щьмәʹта Исраеле Мьсьреда гәләк зедә бьбу. 18 Һьнге Мьсьреда Фьрәԝьнәки тʹәзә дәстпекьр сәрԝертийе бькә, ле әԝи Усьв нас нәдькьр. 19 Әԝи һьндава щьмәʹта мәда мьхәнәти кьр, у зоре бавед мә кьр, кӧ әԝана зарʹед хԝәйә тʹәзәбуйи бьһельн ԝәки бьмьрьн. 20 Ԝи чахи, Муса һатә буйине, у әԝ беһʹәсаб бәдәԝ бу.* Се мәһа әԝ мала баве хԝәда дьһатә хԝәйкьрьне. 21 Ле гава де-баве ԝи мәщбур бун ԝи бьһельн, ԛиза Фьрәԝьн әԝ һьлда бьрә щәм хԝә у ча кӧрʹе хԝә мәзьн кьр. 22 Ӧса, Муса тʹәмамийа биланийа Мьсьрийа һин бу, у хәбәрдан у кьред хԝәда йәки зор бу.

23 Гава Муса 40 сали бу, нет кʹәтә дьле ԝи, ԝәки тʹәсәлийа бьред хԝә,* кӧрʹед Исраеле бькә. 24 Гава әԝи дит кӧ йәки Мьсьри нәһәԛийе жь ԝан йәки дькә, әԝ пʹараст, һʹәйфа ԝи һьлда у йе Мьсьри кӧшт. 25 Муса тʹьре бьред ԝи ԝе фәʹм бькьн, ԝәки Хԝәде дьхԝазә ԝана бь дәсте ԝи хьлаз кә, ле ԝана әв йәк фәʹм нәкьр. 26 Рʹожа дьн, гава әԝ һатә бал ԝан у дит кӧ дӧ Исраели һәврʹа шәрʹ дькьн, әԝи дьхԝәст ԝәки әԝана ль һәв бен у ӧса гот: ‹Щамерно, нә һун бьред һәв ьн? Һун чьма хьрабийе ль һәв дькьн?› 27 Ле йе кӧ нәһәԛи ль бьре хԝә дькьр, Муса дәʹф да у гот: ‹Кʹи тӧ сәр мә сәрԝер у һʹакьм кʹьфш кьри? 28 Йан тӧ дьхԝази мьн жи бькӧжи, чаԝа кӧ тә дӧһӧ йе Мьсьри кӧшт?› 29 Гава Муса әв йәк бьһист, рʹәви у ча хәриб ԝәлате Мьдйанеда ма. Ԝедәре дӧ кӧрʹ жерʹа бун.

30 Паши 40 сали, ль бәрʹийа Чʹийайе Синайе, мәләкәк нав алава агьре тʹуме стьрийада Мусарʹа хӧйа бу. 31 Чахе Муса әв йәк дит, әʹщебмайи ма. У гава әԝ незик дьбу ԝәки рʹьнд бьвинә, дәнге Йаһоԝа бьһист: 32 ‹Әз Хԝәдайе кал-бавед тә мә, Хԝәдайе Бьраһим, Исһаԛ у Аԛуб›. Һьнге Муса ләрьзи у нәԝерьбу рʹьнд тʹум бьньһерʹә. 33 Йаһоԝа ԝирʹа гот: ‹Чарьхед хԝә жь ньгед хԝә бехә, чьмки щийе кӧ тӧ сәкьни йи, әʹрде пироз ә. 34 Бәле, мьн дит ԝәки щьмәʹта мьн чаԝа Мьсьреда щәфе дькʹьшинә. У мьн заринийа ԝан бьһист у әз пәйа бум, кӧ ԝана аза кьм. Әзе тә бьшиньмә Мьсьре›. 35 Исраелийа Муса инкʹар кьрьн гава готьн: ‹Кʹи тӧ ча сәрԝер у һʹакьм кʹьфш кьри?›, ле Хԝәде әв Муса бь дәсте мәләке кӧ нав тʹуме стьрийада ԝирʹа хӧйа бу, ча сәрԝер у хьлазкʹар шанд. 36 Әԝи әԝана жь ԝедәре дәрхьстьн, у Мьсьреда, бәр Бәʹра Сор у 40 сали бәрʹийеда нишан у кʹәрәмәт дькьрьн.

37 Һәма Муса бу, йе кӧ Исраелийарʹа гот: ‹Хԝәде ԝе жь нава бьред ԝә пʹехәмбәрәки мина мьн бьдә ԝә›. 38 Муса әԝ кәс бу, йе кӧ тʹәви кал-бавед мә бәрʹийеда бу, кʹижанирʹа мәләк сәр Чʹийайе Синайе хәбәр дьда. У әԝи жь Хԝәде хәбәред сах у пироз стандьн кӧ бьгьһинә мә. 39 Кал-бавед мә нәдьхԝәстьн гӧрʹа ԝи бькьн, ԝана әԝ инкʹар кьр, у дьле хԝәда вәгәрʹийанә Мьсьре. 40 Ԝана Һарунрʹа гот: ‹Мәрʹа хӧдана чекә, ԝәки рʹебәрийе мә бькьн. Чьмки әм ньзаньн чь һатә сәре ви Мусайе кӧ әм жь ԝәлате Мьсьре дәрхьстьн›. 41 Һьнге ԝана голькәк чекьр, ви пʹутирʹа ԛӧрбан дан, у бона тьштед кӧ бь дәсте хԝә чекьрьбун, кʹеф дькьрьн. 42 Ләма Хԝәде бәре хԝә жь ԝана гӧһаст у һишт кӧ әԝана стәйркед әʹзмен бьһʹәбиньн, чаԝа кʹьтеба Пʹехәмбәрада ньвисар ә: ‹Йа мала Исраел, гәло 40 сали бәрʹийеда ԝә ԛӧрбан мьнрʹа дьанин? 43 На, ԝә коне Молох у стәйрка хӧдан Рʹәфан тʹәви хԝә дьбьрьн, әԝ пʹутед кӧ ԝә чекьр ԝәки ԝана бьһʹәбиньн. Ләма әзе ԝә аксори Бабилоне ԝедатьр бькьм›.

44 Бәрʹийеда коне кал-бавед мәйи шәʹдәтийе һәбу. Хԝәде Мусарʹа нишан кьрьбу, ԝәки ԝи кони чаԝа чекә, у кон ӧса һатә чекьрьне чаԝа әԝи дитьбу. 45 Әв кон ча мьлкʹ кал-бавед мәрʹа ма, у тʹәви Йешу бьрьнә ԝәлате кӧ Хԝәде бона хатьре кал-бавед мә, мьләтед дьн же дәрхьстьн. Әв кон һʹәта рʹожед Даԝьд ԝедәре ма. 46 Даԝьд ԛәбулкьрьна Хԝәде станд у һиви кьр, ԝәки ԛәдьр бьстинә кӧ Хԝәдайе Аԛубрʹа маләке ава кә. 47 Ле йе кӧ ԝирʹа маләк ава кьр, Сьлеман бу. 48 Ле Хԝәдайе Һәри Жорьн малед бь дәста чекьрида, нажи. Чаԝа кӧ пʹехәмбәр дьбежә: 49 ‹Йаһоԝа дьбежә: «Әʹзман тʹәхте мьн ә у әʹрд щийе бьн пʹийе мьн ә. Һуне маләкә чаԝа мьнрʹа ава кьн? Йан щийе кӧ әз теда рʹьһʹәт бьм, кʹӧ йә? 50 Нә әв һʹәму тьшт бь дәсте мьн һатьнә чекьрьне?»›

51 Сәрһʹьшкно, дьл у гӧһед ԝә гьрти нә! Һун һәртʹьм мьԛабьли рʹӧһʹе пироз дәртен. Чаԝа бавед ԝә дькьрьн, һун жи һәма ӧса дькьн. 52 Кал-бавед ԝә кʹижан пʹехәмбәр нәзерандьн? Ԝана әԝ кӧштьн, йед кӧ дәрһәԛа һатьна йе рʹаст* әʹлам дькьрьн, нәмамийа кʹижани ԝә кьр у кӧшт. 53 Хԝәде бь мәләка Ԛанун да ԝә, ле ԝә әԝ нәани сери».

54 Гава ԝана әв йәк бьһист, гәләк һерс кʹәтьн у дьранед хԝә сәр ԝи чʹьрʹькандьн. 55 Ле Стәйфан бь рʹӧһʹе пироз тʹьжә бу, ль әʹзмен ньһерʹи у дит рʹумәта Хԝәде у Исайе кӧ алийе мьле Хԝәдейи рʹасте сәкьни бу. 56 У әԝи гот: «Ва, әз дьвиньм әʹзмане вәкьри у Кӧрʹе инсен ль алийе мьле Хԝәдейи рʹасте сәкьни». 57 Ле ԝана гӧһед хԝә гьртьн у бь ԛирʹин һʹьщуми сәр ԝи кьрьн. 58 Чахе ԝана әԝ жь бажер дәрхьст, ԝи данә бәр кәвьра. Шәʹдед кӧ әԝ сущдар дькьрьн, кʹьнщед хԝә данин бәр ньгед хортәки бь наве Шаԝул. 59 Гава ԝана Стәйфан дьда бәр кәвьра, әԝи жь Иса рʹәща кьр: «Хӧдан Иса, әз жийина хԝә* дьдьмә дәсте тә». 60 Һьнге әԝ кʹәтә сәр чока у бь дәнгәки бьльнд гот: «Йаһоԝа, ве йәке ԝанрʹа гӧнә һʹәсаб нәкә». Гава әԝи әв йәк гот, мьр.

8 Шаԝул кӧштьна Стәйфан ԛәбул дькьр.

Ԝе рʹоже зерандьнәкә мәзьн мьԛабьли щьвата Оршәлиме дәстпебу у гьшк, хенщи шандийа, һәремед Щьһустане у Самәрйайеда һәв бәла бун. 2 Мәрьвед хԝәдехоф Стәйфан дәфьн кьрьн у сәр ԝи шинәкә гьран кьрьн. 3 Ле Шаԝул дәстпекьр һʹьщуми сәр щьвате кә. Әԝ жь маләке дькʹәтә маләкә дьн, бь дәсте зоре жьн у мер дәрдьхьстьн у давитьнә кәле.

4 Шагьртед кӧ һәв бәла бьбун мьзгинийа Хԝәде һʹәму дәра гьли дькьрьн. 5 Филипо кʹәтә бажаре Самәрйайе,* у дәстпекьр ԝанрʹа дәрһәԛа Мәсиһ гьли кә. 6 Һʹәму мәрьва рʹьнд гӧһ дьданә Филипо чахе гьлийед ԝи дьбьһистьн у дьдитьн кʹәрәмәтед кӧ әԝи дькьрьн. 7 Жь гәләк кәсед щьнакʹәти щьн бь ԛирʹин дәрдькʹәтьн. Хенщи ԝе йәке, гәләк шьлушәʹт у сәԛәт жи дьһатьнә ԛәнщкьрьне. 8 У шабунәкә мәзьн кʹәтә ԝи бажари.

9 Самәрйайеда мәрьвәк һәбу, наве ԝи Шьмһʹун бу, йе кӧ сербази дькьр. Әԝи хԝә ча йәки мәзьн һʹәсаб дькьр, у мәрьвед Самәрйайе сәр кьред ԝи әʹщебмайи дьман. 10 Һәр кәси, жь бьчʹука һʹәта мәзьна, дина хԝә дьда ԝи у дьгот: «Ԛәԝата Хԝәдейә мәзьн нав ԝи мәрьвида йә». 11 Ԝана рʹьнд гӧһ дьданә ԝи, чьмки әԝи зудава пе сербазийа хԝә щьмәʹт әʹщебмайи дькьр. 12 Ле гава ԝана Филипо баԝәр кьр, йе кӧ мьзгинийа дәрһәԛа Пʹадшатийа Хԝәде у дәрһәԛа наве Иса Мәсиһ бәла дькьр, һьм жьн һьм жи мер дьһатьнә ньхӧмандьне.* 13 Шьмһʹун жи баԝәр кьр, у чахе әԝ һатә ньхӧмандьне, бәрдәԝам дькьр хԝә ль Филипо дьгьрт у сәр нишан у кʹәрәмәтед ԝи әʹщебмайи дьма.

14 Гава шандийед Оршәлимеда бьһистьн кӧ мәрьвед Самәрйайе хәбәра Хԝәде ԛәбул кьрьнә, ԝана Пәтрус у Йуһʹәнна шандьнә щәм ԝан. 15 Әԝана жи һатьн у бона ԝан дӧа кьрьн, ԝәки әԝана рʹӧһʹе пироз бьстиньн, 16 чьмки һе рʹӧһʹе пироз нәһатьбу сәр тʹӧ кәси жь ԝан, ле тʹәне бь наве Хӧдан Иса әԝана һатьбун ньхӧмандьне. 17 Һьнге Пәтрус у Йуһʹәнна дәстед хԝә данин сәр ԝан, у ԝана рʹӧһʹе пироз станд.

18 Гава Шьмһʹун дит кӧ мәрьва рʹӧһʹе пироз бь ве йәке дьстандьн кӧ шандийа дәстед хԝә датанин сәр ԝан, әԝи ԝанрʹа пʹәрә соз да 19 у гот: «Әԝи һʹӧкӧми бьдьнә мьн жи, сәва кӧ әз дәстед хԝә дайньм сәр кʹе, әԝ рʹӧһʹе пироз бьстинә». 20 Ле Пәтрус жерʹа гот: «Бьра зиве тә тʹәви тә бьԛәлә, чьмки тә тʹьре тӧ дькари пʹешкʹеша Хԝәде пе пʹәра бькʹьрʹи! 21 Һәԛе тә ве йәкеда тʹӧнә, чьмки Хԝәде дьле тәйи хьраб дьвинә. 22 Ләма ве хьрабийа хԝә тʹобә кә, у бәр Йаһоԝа лава кә, ԝәки һәрге бьбә, әԝ нета дьле тәйә хьраб, бьбахшинә тә. 23 Чьмки әз дьвиньм кӧ тӧ жәʹрәкә тәʹл и, у хӧламе нәһәԛийе йи». 24 Шьмһʹун жи гот: «Бона мьн бәр Йаһоԝа лава кьн, ԝәки тьштед кӧ ԝә мьнрʹа гот, нәйенә сәре мьн».

25 Чахе ԝана бь тʹәмами шәʹдәти да у дәрһәԛа хәбәра Йаһоԝа хәбәр дан, әԝана вәгәрʹийанә Оршәлиме у рʹеда гәләк гӧндед Самәрйада мьзгини бәла дькьрьн.

26 Ле Филипорʹа мәләке Йаһоԝа гот: «Рʹабә у алийе башурева ԝе рʹерʹа һәрʹә, йа кӧ жь Оршәлиме дьчә Газайе». (Әв рʹе бәрʹийеда йә.) 27 Әԝ жи рʹабу у рʹе кʹәт. Ԝедәре ԝәзирәки* жь Әтйопйайе һәбу. Әԝ ԝәзире пʹадшайа* Әтйопйа бу ль Кәндакйайе, у әԝ бона һʹәму хьзна ԝе щабдар бу. Әԝ бона һʹәбандьне чубу Оршәлиме, 28 у ида вәдьгәрʹийа мале. Әԝ әʹрәба хԝәда рʹуньшти бу у бь дәнгәки бьльнд ньвисара Ишайа пʹехәмбәр дьхԝәнд. 29 Һьнге Хԝәде бь рʹӧһʹе хԝә Филипорʹа гот: «Һәрʹә, бьгьһижә ԝе әʹрәбе». 30 Филипо жи рʹәви, незики әʹрәбе бу у бьһист кӧ әԝ бь дәнгәки бьльнд ньвисара Ишайа пʹехәмбәр дьхунә, у жь ԝи пьрси: «Чь кӧ тӧ дьхуни фәʹм дьки?» 31 Әԝи гот: «Һʹәта кәсәк мьнрʹа шьровәнәкә, әзе чаԝа фәʹм бькьм?» У әԝи жь Филипо һиви кьр, ԝәки әԝ һьлкʹьшә у тʹәви ԝи рʹуне. 32 Пʹара Ньвисаре кӧ әԝи дьхԝәнд, әԝ бу: «Мина пәза бона сәржекьрьне әԝ һатә бьрьне, у чаԝа бәрха кӧ ԝәʹде бьрʹина һьрийе накә кʹалин, әԝ дәве хԝә вәнакә. 33 Әԝ ньмьз кьрьн у бь нәһәԛийе сущдар кьрьн. Кʹи ԝе һур бь һур дәрһәԛа кал-бавед ԝи гьли кә? Чьмки жийина ԝи сәр әʹрде һатә һьлдане».

34 Ԝәзир жи Филипорʹа гот: «Әз һиви тә дькьм, мьнрʹа бежә, пʹехәмбәр ван тьшта сәр кʹе дьбежә? Сәр хԝә, йан сәр кәсәки дьн?» 35 Филипо дәстпекьр жь ве ньвисаре хәбәр дә у мьзгинийа дәрһәԛа Иса Мәсиһ гьли кә. 36 Гава әԝана һе рʹеда бун у гьһиштьнә чʹәмәки, ԝәзир гот: «Ва бьньһерʹә! Вьра ав һәйә. Чь рʹийа мьн дьгьрә кӧ әз бемә ньхӧмандьне?» 37* —— 38 У ԝәзир фәрман да кӧ әʹрәбе бьдьнә сәкьнандьне, әԝ у Филипо чун кʹәтьнә аве, у Филипо әԝ ньхӧманд. 39 Гава әԝана жь аве дәркʹәтьн, рʹӧһʹе Йаһоԝа дәрберʹа Филипо жь ԝедәре бьр. Ԝәзир бь шабунәкә мәзьн рʹийа хԝә бәрдәԝам кьр у ида Филипо нәдит. 40 Филипо гьһиштә Ашдоде, әԝ ԝан дәра дьгәрʹийа у бәрдәԝам дькьр һʹәму бажарада мьзгини бәла дькьр һʹәта кӧ гьһиштә Ԛәйсәрйайе.

9 Ле Шаԝул һе шагьртед Хӧдан нәфрʹәт дькьр у дьхԝәст ԝана бькӧжә. Әԝ чу бал кʹаһине мәзьн, 2 у бона кʹьништед* Шаме нәʹмә жь ԝи хԝәстьн, ԝәки һʹәму кәсед кӧ Рʹийа Хӧданда* дьчьн, һьм жьна, һьм жи мера бьгьрә у бинә Оршәлиме.

3 Гава әԝ һе рʹеда бу у незики Шаме бу, ньшкева жь әʹзмен рʹонайике дора ԝи шәԝԛ да. 4 Әԝ әʹрде кʹәт у дәнгәк бьһист, кӧ ԝирʹа гот: «Шаԝул, Шаԝул, тӧ чьма мьн дьзерини?» 5 Шаԝул пьрси: «Әзхӧлам, тӧ кʹи йи?» Әԝи гот: «Әз Иса мә, кʹижани тӧ дьзерини. 6 Рʹабә у бькʹәвә бажер, у ԝедәре ԝе тәрʹа бе готьне, ԝәки тӧ чь гәрәке бьки». 7 Мәрьвед кӧ тʹәви Шаԝул бун, зар-зьман кʹәтьн у сәкьнин, чьмки ԝана дәнгәк бьһист, ле тʹӧ кәс нәдьдитьн. 8 Шаԝул жь әʹрде рʹабу, чʹәʹвед ԝи вәкьри бун, ле әԝи нькарьбу тьштәк бьдита. Һьнге ԝана дәсте ԝи гьрт у әԝ анинә Шаме. 9 Се рʹожа әԝи тьштәк нәдьдит, нә дьхԝар у нә жи вәдьхԝар.

10 Шамеда шагьртәки бь наве Һананийа һәбу. Хӧдан дитьнокеда ԝирʹа гот: «Һананийа!» Әԝи гот: «Кʹәрәм кә, Хӧдан». 11 Хӧдан ԝирʹа гот: «Рʹабә у һәрʹә ԝе кʹучʹа кӧ жерʹа Йа Рʹаст те готьне, у мала Щьһудада мәрьвәки жь Тарсусе, наве кʹижани Шаԝул ә, бьгәрʹә. Чьмки әԝ ньһа дӧа дькә, 12 у әԝи дитьнокеда дит кӧ мәрьвәки бь наве Һананийа һат у дәстед хԝә данин сәр ԝи, кӧ әԝ диса бьвинә». 13 Ле Һананийа щаб да: «Хӧдан, мьн жь гәләка бьһистийә кӧ әви мәрьви Оршәлимеда чьԛас хьраби ль хьзмәткʹаред* тә кьрийә. 14 У әԝи жь сәрокед кʹаһина изьн стандийә, ԝәки һʹәму кәсед кӧ вьра жи гази наве тә дькьн, бьгьрә». 15 Ле Хӧдан ԝирʹа гот: «Һәрʹә, чьмки мьн әв мәрьв бьжартийә,* ԝәки әԝ наве мьн мьләтед дьнрʹа бьдә наскьрьне, ӧса жи пʹадшарʹа у щьмәʹта Исраелерʹа. 16 Әзе әшкәрә нишани ԝи кьм, кӧ әԝе сәва наве мьн чьԛас щәфе бькʹьшинә».

17 Һьнге Һананийа чу у кʹәтә ԝе мале, дәстед хԝә данин сәр Шаԝул у гот: «Шаԝул, бьре мьн, Хӧдан Иса, йе кӧ рʹеда тәрʹа хӧйа бу, әз шандьмә бал тә, ԝәки тӧ диса бьвини у бь рʹӧһʹе пироз тʹьжә би». 18 Дәрберʹа тьштәк жь чʹәʹве ԝи кʹәт у әԝи диса дькарьбу бьвинә. Паше әԝ рʹабу у һатә ньхӧмандьне,* 19 у әԝи хԝарьн хԝар у ԛәԝат станд.

Шаԝул чәнд рʹожа ль Шаме бал шагьрта ма, 20 у дәрберʹа дәстпекьр кʹьништада мьзгинийе бәла кә, ԝәки Иса Кӧрʹе Хԝәде йә. 21 Ле һʹәму кәсед кӧ ԝи дьбьһистьн, шаш дьман у дьготьн: «Әва әԝ нинә, йе кӧ Оршәлимеда бь һерса ԛайим мьԛабьли шагьртед Иса* рʹадьбу? Нә әв сәва ве йәке һатийә вьра, кӧ ԝана бьгьрә у бьдә дәсте сәрокед кʹаһина?» 22 Ле Шаԝул һе зедә бь ԛәԝатәкә мәзьн һин дькьр у избат дькьр, кӧ Иса йә Мәсиһ, у сәр ве йәке Щьһуйед Шаме шаш у мәтʹал дьман.

23 Пәй гәләк рʹожарʹа, Щьһу ль һәв шеԝьрин, ԝәки ԝи бькӧжьн. 24 Ле Шаԝул дәрһәԛа шеԝьра ԝан пеһʹәсийа. Ԝана ӧса жи шәв у рʹож нобәдарийа дәргәһед бажер дькьр, ԝәки ԝи бькӧжьн, 25 ләма шагьртед ԝи шәв әԝ кьрьнә сәвәте* у пʹәнщәра диԝаре бажеррʹа дахьстьн.

26 Гава әԝ һатә Оршәлиме, дьхԝәст тʹәви шагьрта бә, ле гьшк жь ԝи дьтьрсийан, чьмки ԝана баԝәр нәдькьр кӧ әԝ жи буйә шагьрт. 27 Һьнге Барнабас һат али ԝи бькә. Әԝи әԝ бьрә бал шандийа у ԝанрʹа һур бь һур гьли кьр, кӧ Паԝлос рʹеда чаԝа Хӧдан дитийә у тʹәви ԝи хәбәр дайә. Ӧса жи әԝи гьли кьр, кӧ Шаԝул чаԝа ль Шаме бь мерхаси дәрһәԛа наве Иса хәбәр дьда. 28 Шаԝул тʹәви ԝан ма, әԝ ль Оршәлиме аза дьчу-дьһат у бь мерхаси дәрһәԛа наве Хӧдан хәбәр дьда. 29 Әԝ ӧса жи тʹәви Щьһуйед кӧ бь Йунани хәбәр дьдан, хәбәр дьда у дькʹәтә дәʹԝе, ле ԝана жи мәщал дьгәрʹийа кӧ ԝи бькӧжьн. 30 Гава бьра ве йәке пеһʹәсийан, ԝана әԝ ани Ԛәйсәрйайе у жь ԝедәре шандьнә Тарсусе.

31 Щьватед ль тʹәмамийа Щьһустане, Щәлиле у Самәрйайе әʹдьлайеда бун. Әԝана ԛәԝи дьбун у һәжмара ԝан зедә дьбу, чьмки әԝана жь Йаһоԝа дьтьрсийан у рʹӧһʹе пироз ԛәԝат дьда ԝан.

32 Гава Пәтрус дәр-доре ԝе һәреме дьгәрʹийа, ӧса жи һатә бал шагьртед* кӧ Лидайеда дьжитьн. 33 Ԝедәре әԝи мәрьвәки бь наве Әйнейас дит, йе кӧ һʹәйшт сала нав ньвинада бу, чьмки шьлушәʹт бу. 34 Пәтрус ԝирʹа гот: «Әйнейас, Иса Мәсиһ тә ԛәнщ дькә. Рʹабә у ньвина хԝә тʹоп кә». У әԝ дәрберʹа рʹабу. 35 Гава щьмәʹта Лидайе у дәшта Шароне дитьн кӧ әԝ мәрьв ԛәнщ буйә, ԝана жи Хӧдан баԝәр кьр.

36 Йафайеда шагьртәкә бь наве Табитʹа һәбу, әв нав бь Йунани «Доркас» ә.* Әԝе гәләк ԛәнщи дькьр у һьндава кʹәсибада дәствәкьри бу. 37 Ле әԝ нәхԝәш кʹәт у мьр. Ԝана әԝ шушт у данинә ода жорьн. 38 Бажаре Лидайе незики Йафайе бу. Гава шагьрт пеһʹәсийан кӧ Пәтрус ԝедәре йә, ԝана дӧ мәрьв шандьн бал ԝи у жь ԝи рʹәща кьрьн: «Жь кʹәрәма хԝә зу ԝәрә бал мә». 39 Пәтрус жи рʹабу у тʹәви ԝан чу. Гава әԝ гьһиштә ԝедәре, ԝана әԝ бьрә ода жорьн. Ԝедәре һʹәму жьнәби ль дора Пәтрус гьртьн, у бь гьри гәләк кʹьнщ у кьрасед кӧ Доркасе ԝанрʹа дьрутьбун, нишани ԝи дькьрьн. 40 Пәтрус һʹәму дәрхьстьнә дәрва, кʹәтә сәр чока у дӧа кьр. Паше әԝи жьнька мьри ньһерʹи у гот: «Табитʹа, рʹабә!» Әԝе чʹәʹвед хԝә вәкьр, у гава әԝе Пәтрус дит, рʹуньшт. 41 Пәтрус дәсте хԝә дьрежи ԝе кьр у әԝ рʹакьр. Паше әԝи гази шагьрта у жьнәбийа кьр, у ԝана дит кӧ жьньк сах ә. 42 Әв йәк тʹәмамийа Йафайеда бәла бу, у гәләка Хӧдан баԝәр кьр. 43 Пәтрус гәләк рʹожа ль Йафайе, мала Шьмһʹуне чʹәрмкәрда* ма.

10 Ԛәйсәрйайеда мәрьвәк һәбу, наве ԝи Корʹнелйо бу, әԝ сәрсәдәки кʹома* Итали бу. 2 Әԝ хԝәдехоф бу у тʹәмамийа малбәта хԝәва Хԝәде дьһʹәбанд. Әԝи кʹәсибарʹа гәләк ԛәнщи дькьр у һәр гав Хԝәдерʹа дӧа дькьр. 3 Нивро незики сьһʹәта сьсийа,* әԝи дитьнокеда зәлал дит, кӧ мәләке Хԝәде һатә бал ԝи у ԝирʹа гот: «Корʹнелйо!» 4 Корʹнелйо тьрсә-тьрс ль ԝи ньһерʹи у пьрси: «Чь йә Хӧдан?» Әԝи жи гот: «Хԝәде дӧайед тә бьһист у ԛәнщийед кӧ тә кʹәсибарʹа кьрийә, дит у бир накә. 5 Ньһа мәрьва бьшинә Йафайе у гази Шьмһʹун кә, кӧ жерʹа Пәтрус те готьне. 6 Әԝ меване Шьмһʹуне чʹәрмкәр ә,* мала кʹижани бәр бәʹре йә». 7 Гава мәләке кӧ тʹәви ԝи хәбәр дьда, чу, Корʹнелйо гази дӧ бәрдәстийед хԝә у әскәрәки хԝәдехоф кьр, йе кӧ бьн дәсте ԝида бу. 8 Әԝи һәр тьшт ԝанрʹа гот у әԝана шандьнә Йафайе.

9 Әԝана рʹожа дьн гава незики бажер дьбун, һьнге нивро незики сьһʹәта донздәһа* Пәтрус дәркʹәтә сәр бане хани, ԝәки дӧа бькә. 10 Әԝ гәләк бьрʹчи бу у хԝәст хԝарьне бьхԝә. Гава һе хԝарьн һазьр дькьрьн, әԝи дитьнокәк дит. 11 Әԝи әʹзмане вәкьри у тьштәки мина пʹәрчʹәки мәзьни кʹьтани дит, кʹижан кӧ бь һәр чар ньчʹед хԝәйә бьльндкьри дадькʹәтә сәр әʹрде. 12 Һьндӧрʹе ԝеда һәр щурʹә һʹәйԝанед чарньг, шулькийед әʹрде у тәйрәдед әʹзмен һәбун. 13 Һьнге әԝи дәнгәк бьһист, кӧ ԝирʹа гот: «Пәтрус, рʹабә, һʹәйԝанәки сәржекә у бьхԝә!» 14 Ле Пәтрус гот: «Әз нькарьм Хӧдан, чьмки мьн тʹӧ щар тьштәки мьрʹдарʹ у һʹәрам нәхԝарийә». 15 Әԝи щара дӧда әв дәнг бьһист, кӧ гот: «Тьштед кӧ Хԝәде һʹәлал кьрьнә, ида һʹәрам һʹәсаб нәкә». 16 Әв йәк щара сьсийа жи ԛәԝьми, у дәрберʹа әв тьште мина пʹәрчʹә, һьлкʹьшийа ль әʹзмен.

17 Пәтрус шаш ма, у гава әԝ һе сәр мәʹна ве дитьноке дьфькьри, мәрьвед кӧ жь алийе Корʹнелйо һатьбунә шандьне, мала Шьмһʹун дитьн у бәр дәргәһ сәкьнин. 18 Ԝана кьрә гази у пьрсин гәло Шьмһʹуне кӧ жерʹа Пәтрус те готьне, меване ве мале йә, йан на. 19 Пәтрус һе сәр ве дитьноке дьфькьри, рʹӧһʹ* ԝирʹа гот: «Се мәрьв тә дьгәрʹьн. 20 Ләма рʹабә, бәржер бә у тʹәви ԝан һәрʹә. Дӧдьли нәбә, чьмки мьн әԝ шандьнә». 21 Пәтрус жи пәйа бу, чу щәм ԝан мәрьва, у гот: «Кәсе кӧ һун ле дьгәрʹьн, әз ьм. Һун бона чь һатьнә?» 22 Ԝана гот: «Корʹнелйойе сәрсәд әм шандьнә. Әԝ мәрьвәки рʹаст у хԝәдехоф ә, у һʹәму Щьһу ԛәдьре ԝи дьгьрьн. Әԝи пе мәләкәки пироз жь Хԝәде рʹебәри станд, кӧ бьшинә пәй тә, ԝәки тӧ бейи мала ԝи, у әԝ гӧһ бьдә готьнед тә». 23 Һьнге Пәтрус әԝана тʹәглифи мале кьрьн, у ча меванед хԝә әԝана ԛәбул кьрьн.

Рʹожа дьн, әԝ рʹабу у тʹәви ԝан чу. Чәнд бьред жь Йафайе жи тʹәви ԝи чун. 24 Рʹожәк шунда әԝана гьһиштьнә Ԛәйсәрйайе. Корʹнелйо жи һивийа ԝан бу, у әԝи һәвал у мәрьвед хԝә ль һәв тʹоп кьрьбун. 25 Гава Пәтрус кʹәтә һьндӧрʹ, Корʹнелйо һатә пешийа ԝи, хԝә авитә бәр ньгед ԝи у бәр ԝи та бу. 26 Ле Пәтрус әԝ рʹакьр у гот: «Рʹабә, әз жи мина тә мәри мә». 27 Әԝ Корʹнелйорʹа бь хәбәрдане кʹәтә һьндӧрʹе мале у дит кӧ гәләк мәрьв тʹоп бунә. 28 Пәтрус ԝанрʹа гот: «Һун рʹьнд заньн ԝәки мьԛабьли Ԛануне йә әв йәк, кӧ Щьһу тʹәви мьләте дьн рʹабә-рʹуне, йан жи һәвва һәрʹьн-бен. Ле Хԝәде нишани мьн кьр, кӧ әз гәрәке тʹӧ мәрьви мьрʹдарʹ у һʹәрам һʹәсаб нәкьм. 29 Ләма гава әԝана һатьнә пәй мьн, мьн газьн нәкьр у һатьм. Ньһа әз дьхԝазьм бьзаньбьм ԝә чьрʹа гази мьн кьрийә».

30 Һьнге Корʹнелйо гот: «Чар рʹож пешда, незики ве сьһʹәте, нивро незики сьһʹәта сьсийа* мьн мала хԝәда дӧа дькьр. Ньшкева мәрьвәки бь кʹьнщед сьпи бәр мьн сәкьни 31 у гот: ‹Корʹнелйо, Хԝәде дӧайед тә бьһист у ԛәнщийед тә дит.* 32 Мәрьва бьшинә Йафайе у гази Шьмһʹун кә, кӧ жерʹа Пәтрус те готьне. Әԝ меване Шьмһʹуне чʹәрмкәр ә, мала кʹижани бәр бәʹре йә›. 33 Һьнге мьн дәрберʹа мәрьв шандьн пәй тә, у ча баш ә тӧ һати. Ньһа әм һʹәму жи бәр Хԝәде сәкьни нә, ԝәки Йаһоԝа чь тʹәми дайә тә кӧ мәрʹа бежи, бьбьһен».

34 Һьнге Пәтрус гот: «Ньһа әз бь рʹасти фәʹм дькьм кӧ Хԝәде фьрԛийе накә ортʹа мәрьва, 35 ле жь һәр мьләти, мәрьве кӧ жь ԝи дьтьрсә у рʹастийе дькә, Хԝәде ԝи ԛәбул дькә. 36 Хԝәде мьзгинийа әʹдьлайе Исраелийарʹа бь Иса Мәсиһ шанд; әԝ Хӧдане һʹәмуйа йә. 37 Һун заньн ԝәки жь Щәлиле гьрти, нав тʹәмамийа Щьһустанеда дәрһәԛа чь хәбәр дьдан пәй ԝе ньхӧмандьнерʹа, йа кӧ Йуһʹәнна әʹлам дькьр: 38 кӧ чаԝа Хԝәде Исайе жь Ньсрәте пе рʹӧһʹе пироз кʹьфш кьр у ԛәԝат да ԝи. Ӧса жи чаԝа Иса ль ԝәлет дьгәрʹийа, ԛәнщи дькьр у кәсед кӧ бьн һʹӧкӧме Мире-щьнада дьчәрчьрин, ԛәнщ дькьр, чьмки Хԝәде тʹәви ԝи бу. 39 Әм шәʹдед ван һʹәму тьшта нә, йед кӧ әԝи ԝәлате Щьһуйада у Оршәлимеда кьрьн. Ле ԝана әԝ сәр стуне* дардакьрьн. 40 Рʹожа сьсийа Хԝәде әԝ жь мьрьне рʹакьр у изьн да, ԝәки әԝ мәрьварʹа хӧйа бә. 41 Әԝи изьн нәда кӧ һәр кәс ԝи бьвинә, ле тʹәне изьн да мә, йед кӧ паши рʹакьрьна ԝи жь мьрьне, тʹәви ԝи хԝарьн у вәхԝарьн. Әм бәреда алийе Хԝәдеда һатьнә бьжартьне, ԝәки ԝи бьвиньн у дәрһәԛа ԝи гьли кьн. 42 Ӧса жи, Иса тʹәми да мә ԝәки әм мәрьварʹа мьзгинийе бәла кьн у бь щурʹәки баш шәʹдәтийе бьдьн кӧ Хԝәде әԝ бьжартийә, ԝәки бьбә һʹакьме саха у мьрийа. 43 Һʹәму пʹехәмбәр дәрһәԛа ԝи шәʹдәтийе дьдьн, у дьбежьн кӧ бь сайа наве ԝи гӧнед һәр кәсе кӧ баԝәрийа хԝә ԝи тинә, ԝе бенә бахшандьне».

44 Һе Пәтрус дәрһәԛа ван тьшта хәбәр дьда, рʹӧһʹе пироз һатә сәр һʹәму кәсед кӧ әв хәбәра Хԝәде дьбьһистьн. 45 Баԝәрмәндед Щьһу,* йед кӧ тʹәви Пәтрус һатьбун, әʹщебмайи ман, чьмки рʹӧһʹе пироз ча пʹешкʹеша жь Хԝәде сәр мьләтед дьнда жи һатә барандьне. 46 Чьмки ԝана дьбьһист кӧ әԝана бь зьманед хәриб хәбәр дьдьн у шькьрийе дьдьнә Хԝәде. Һьнге Пәтрус гот: 47 «Ида кʹи дькарә рʹийа ԝан бьгьрә кӧ әԝана пе аве бенә ньхӧмандьне, йед кӧ мина мә рʹӧһʹе пироз стандьн?» 48 Һьнге Пәтрус тʹәми да кӧ әԝана бь наве Иса Мәсиһ бенә ньхӧмандьне. Паше ԝана жь ԝи һиви кьр, ԝәки чәнд рʹожа щәм ԝан бьминә.

11 Шанди у бьред кӧ Щьһустанеда бун, бьһистьн ԝәки мәрьвед жь мьләтед дьн жи хәбәра Хԝәде ԛәбул кьрьнә. 2 Гава Пәтрус һьлкʹьшийа Оршәлиме, мәрьвед кӧ пьштгьрийа сьнәткьрьне дькьрьн, дәстпекьрьн ԝирʹа бькʹәвьнә дәʹԝе. 3 Ԝана гот: «Чьрʹа тӧ чуйи мала мәрьвед нәсьнәткьри у тә тʹәви ԝан нан хԝар?» 4 Һьнге Пәтрус дәстпекьр һәр тьшти һур бь һур ԝанрʹа шьровәкә:

5 «Гава мьн бажаре Йафайеда дӧа дькьр, мьн дитьнокәк дит. Тьштәки мина пʹәрчʹәки мәзьни кʹьтани, кʹижан кӧ һәр чар ньчʹед ԝе бьльндкьри бун, жь әʹзмен дакʹәт, у һатә бәр мьн. 6 Гава мьн һьндӧрʹе ԝе рʹьнд ньһерʹи, мьн һʹәйԝанед чарньг, һʹәйԝанед бәйани, шулькийед әʹрде у тәйрәдед әʹзмана дитьн. 7 Мьн ӧса жи дәнгәк бьһист, кӧ мьнрʹа гот: ‹Пәтрус, рʹабә, һʹәйԝанәки сәржекә у бьхԝә!› 8 Ле мьн гот: ‹Әз нькарьм Хӧдан, чьмки тьштәки мьрʹдарʹ у һʹәрам мьн тʹӧ щар нәхԝарийә. 9 Мьн щара дӧда дәнгәк жь әʹзмен бьһист, кӧ гот: ‹Тьштед кӧ Хԝәде һʹәлал кьрьнә, ида һʹәрам һʹәсаб нәкә›. 10 Әв йәк щара сьсийа жи ԛәԝьми, у паше һʹәму тьшт һьлкʹьшийа ль әʹзмен. 11 У һәма ԝи чахи, се мәрьв бәр мала кӧ әм дьман, сәкьни бун. Әԝана жь Ԛәйсәрйайе һатьбунә шандьне бал мьн. 12 Һьнге рʹӧһʹ* мьнрʹа гот, ԝәки әз тʹәви ԝан һәрʹьм у дӧдьли нәбьм. Әв шәш бьра жи тʹәви мьн һатьн, у әм кʹәтьнә мала ԝи мәрьви.

13 Әԝи мәрʹа гот кӧ мала хԝәда мәләкәк дитийә, йе кӧ ԝирʹа готийә: ‹Мәрьва бьшинә Йафайе, у бьра әԝана Шьмһʹуне кӧ жерʹа Пәтрус те готьне, тʹәви хԝә биньн. 14 Әԝе тәрʹа бежә ԝәки тӧ тʹәви һʹәму нәфәред хԝә чаԝа дькари хьлаз би›. 15 Ле гава мьн дәстпекьр хәбәр дьм, рʹӧһʹе пироз һатә сәр ԝан, чаԝа кӧ әԝ дәстпекеда һатьбу сәр мә. 16 Һьнге әв готьнед Хӧдан һатьн бира мьн: ‹Йуһʹәнна бь аве дьньхӧманд, ле һуне бь рʹӧһʹе пироз бенә ньхӧмандьне›. 17 Ләма һәрге Хԝәде әԝ пʹешкʹеш да ԝан жи, кʹижан кӧ дабу мә, йед кӧ баԝәрийа хԝә Хӧдан Иса Мәсиһ анинә, ижа әз кʹи мә кӧ рʹийа Хԝәде бьгьрьм?»

18 Гава ԝана әв йәк бьһист, ида нәдькʹәтьнә дәʹԝе,* пәсьне Хԝәде дан у дьготьн: «Демәк Хԝәде мәщал да мәрьвед жь мьләтед дьн жи, ԝәки әԝана тʹобә кьн у жийине бьстиньн».

19 Пәй кӧштьна Стәйфанрʹа баԝәрмәндед кӧ жь бо зерандьне һәв бәла бун, гьһиштьнә Финикйайе, Кипрусе у Әнтакйайе, ле тʹәне Щьһуйарʹа мьзгини бәла дькьрьн. 20 Ле һьнәк жь ԝан жь Кипрусе у Курене һатьнә Әнтакйайе, у мьзгинийа дәрһәԛа Хӧдан Иса әʹлам дькьрьн ԝан мәрьварʹа, йед кӧ бь зьмане Йунани хәбәр дьдан. 21 Дәсте Йаһоԝа сәр ԝан бу, у гәләк кәс бунә баԝәрмәнд у пәй Хӧдан чун.

22 Дәрһәԛа ԝан дәнг-бәʹс гьһиштә щьвата Оршәлиме, у ԝана Барнабас шандә һʹәта Әнтакйайе. 23 Гава әԝ гьһиштә ԝедәре у дит кӧ Хԝәде чаԝа ԛәнщийа хԝәйә мәзьн һьндава ԝанда дайә кʹьфше, гәләк ша бу. Әԝи дьле ԝан һʹәмуйа ԛәԝи кьр, ԝәки әԝана диса жи бь тʹәмамийа дьле хԝә Хӧданрʹа амьн бьминьн. 24 Барнабас мәрьвәки ԛәнщ бу, әԝ бь рʹӧһʹе пироз тʹьжи бу, у баԝәрийа ԝи ԛәԝи бу. У гәләк мәрьва баԝәрийа хԝә Хӧдан анин. 25 Пәйрʹа Барнабас чу Тарсусе кӧ Шаԝул бьгәрʹә. 26 Гава әԝи әԝ дит, ле ани Әнтакйайе. Әԝана саләке тʹәви щьвате тʹоп дьбун у гәләк мәрьв һин дькьрьн. Әнтакйайеда щара пешьн бь рʹебәрийа Хԝәде шагьрт һатьнә навкьрьне «Мәсиһи».

27 Ԝан рʹожада, пʹехәмбәр жь Оршәлиме һатьнә Әнтакйайе. 28 Йәки жь ԝан, бь наве Һагабо, пе рʹебәрийа рʹӧһʹе пироз пʹехәмбәрти кьрьбу, кӧ зутьрәке сәр тʹәмамийа әʹрде ԝе хәлайикә гьран бьбә. У әԝ йәк рʹожед Ԛәйсәр Клаԝдйода ԛәԝьми. 29 Һьнге шагьрта сафи кьр, кӧ дәсте кʹева чьԛас те, кʹомәке бьдьнә бьред Щьһустанеда. 30 Ԝана һәма ӧса жи кьр у һʹәму тьшт пе дәсте Барнабас у Шаԝул рʹуспийарʹа шандьн.

12 Ԝан чаха Һеродәс Пʹадша дәстпекьр пәй һьнәкед жь щьвате кʹәвә. 2 Әԝи Аԛубе бьре Йуһʹәнна бь шур да кӧштьне. 3 Гава Һеродәс дит кӧ әв йәк Щьһуйа хԝәш һат, әԝи Пәтрус жи да гьртьне. (Әв йәк рʹожед Щәжьна Нане Шкәвада* ԛәԝьми.) 4 Чахе әԝи Пәтрус да гьртьне у авитә кәле, әԝи фәрман да, ԝәки чар кʹомед жь чар әскәра дор бь дор нобәдарийа ԝи бькьн. Һеродәс дьхԝәст пәй Щәжьна Дәрбазбунерʹа ԝи дәрхә бәр щьмәʹте. 5 Гава Пәтрус кәледа гьрти бу, тʹәмамийа щьвате бь дьл у щан сәва ԝи Хԝәдерʹа дӧа дькьр.

6 Шәва пешийа кӧ Һеродәс әԝ дәрхьста бәр щьмәʹте, Пәтрус бь дӧ зьнщира гьредайи ортʹа дӧ әскәрада рʹазайи бу, нобәдар жи бәр дәри сәкьни бун. 7 Ньшкева мәләке Йаһоԝа хӧйа бу, у ԝи щийи кʹидәреда Пәтрус бу, рʹонайе шәԝԛ да. Мәләк дәсте хԝә кʹеләка Пәтрус хьст, әԝ һʹьшйар кьр у гот: «Зу рʹабә!» Һьнге зьнщир вәбун у жь дәстед ԝи кʹәтьн. 8 Мәләк ԝирʹа гот: «Кʹьнщед хԝә ль хԝә кә у чарьхед хԝә бькә ньгед хԝә». Пәтрус һәма ӧса жи кьр. Паше мәләк жерʹа гот: «Пʹоте хԝә ль хԝә кә у пәй мьн ԝәрә». 9 Пәтрус жи дәркʹәтә дәрва у пәй ԝи чу. Ле әԝи фәʹм нәкьр ԝәки тьште кӧ мәләк дькьр, бь рʹасти дьԛәԝьмин, әԝи тʹьре әԝ дитьнок ә. 10 Әԝана бәр нобәдаред пешьн у йед дӧдарʹа дәрбаз бун у гьһиштьнә дәргәһе һʹәсьн, кʹижан кӧ дьбьрә бәр бажер. Дәргәһ хԝәха вәбу у әԝана дәркʹәтьнә дәрва. Гава әԝана һе кʹучʹерʹа дәрбаз дьбун, ньшкева мәләк жь бәр чʹәʹве Пәтрус ӧнда бу. 11 Һьнге Пәтрус фәʹм кьр чь ԛәԝьми, у гот: «Ньһа әз бь рʹасти заньм, кӧ Йаһоԝа мәләке хԝә шанд, ԝәки мьн жь дәсте Һеродәс хьлаз кә, у нәһишт ԝәки тьштед кӧ Щьһу һивийе бун, бенә сери».

12 Чахе Пәтрус әв йәк фәʹм кьр, чу мала Мәрйәме, дийа Йуһʹәнна, кʹижанирʹа Маркос дьготьн. Ԝедәре гәләк кәс тʹоп бьбун у дӧа дькьрьн. 13 Гава әԝи дәргәһ хьст, кәчʹькәкә бәрдәсти бь наве Рʹода дәркʹәт кӧ бьвинә һәла әԝ кʹи йә. 14 Гава кәчʹьке дәнге Пәтрус нас кьр, ӧса ша бу кӧ дәргәһ вәнәкьр, ле рʹәви кʹәтә һьндӧрʹе мале, у гот кӧ Пәтрус бәр дәргәһ ә. 15 Ԝана ԝерʹа гот: «Тә һʹьше хԝә ӧнда кьрийә!» Ле әԝ сәр гьлийе хԝә дьма. Һьнге ԝана гот: «Әԝ мәләке ԝи йә». 16 Ле Пәтрус һе бәр дәри сәкьни бу, у дәри дьхьст. Гава ԝана дәри вәкьр, әԝ дитьн у мәтʹал ман. 17 Әԝи бь дәсте хԝә ԝанрʹа нишан кьр, ԝәки дәнге хԝә нәкьн, у һур бь һур ԝанрʹа гьли кьр, кӧ Йаһоԝа әԝ чаԝа жь кәле дәрхьстийә, у ԝанрʹа гот: «Ван һʹәму тьшта Аԛубрʹа* у бьрарʹа бежьн». Паше әԝ дәркʹәт чу щики дьн.

18 Гава сьбәһ сафи бу, әскәр тʹәвльһәв бун, чьмки ньзаньбун кӧ Пәтрус кʹидәре йә. 19 Һеродәс һʹәму дәра әԝ дьгәрʹийа. Чахе әԝи әԝ нәдит, нобәдар данә бәр пьрса у фәрман да, кӧ әԝана бенә щәзакьрьне. Ле хԝәха жь Щьһустане чу Ԛәйсәрйайе у һьнә ԝәхт ԝедәре ма.

20 Һеродәс сәр щьмәʹта Сур у Сайдайе гәләк һерскʹәти бу. Ләма жи әԝана тʹәвайи һатьнә бал ԝи, у Бьластойе кӧ бона мала пʹадша щабдар бу, кʹьшандьнә алийе хԝә, сәва әԝ али ԝан бькә, ԝәки бона әʹдьлайе пʹадшарʹа хәбәр дьн. Чьмки ԝәлате ԝан жь ԝәлате пʹадша хԝарьн дьстанд. 21 Рʹожәкә кʹьфшкьрида, Һеродәс кʹьнщед пʹадшатийе ль хԝә кьрьн, сәр кʹӧрсийа диԝане рʹуньшт у щьмәʹтерʹа хәбәр да. 22 Һьнге щьмәʹте дькьрә ԛирʹин: «Әв дәнге хԝәде йә, нә кӧ йе мәрьва!» 23 Дәрберʹа мәләке Йаһоԝа ӧса кьр, кӧ әԝ нәхԝәш кʹәт, чьмки әԝи рʹумәт нәда Хԝәде. Кӧрма әԝ хԝар у әԝ мьр.

24 Ле хәбәра Йаһоԝа бәла дьбу, у һәжмара кәсед кӧ баԝәр дькьрьн, зедә дьбу.

25 Гава Барнабас у Шаԝул Оршәлимеда шьхӧле кʹомәкдайине бь тʹәмами анинә сери, вәгәрʹийанә Әнтакйайе, у Йуһʹәннайе кӧ жерʹа Маркос жи дьготьн, хԝәрʹа бьрьн.

13 Щьвата Әнтакйайеда пʹехәмбәр у дәрсдар һәбун: Барнабас у Шьмһʹуне кӧ жерʹа Нигер дьготьн, Шаԝул, Лукйойе Курени, у Мәнайине кӧ тʹәви Һеродәс сәрԝере һәреме һин дьбу. 2 Гава ԝана Йаһоԝарʹа хьзмәт дькьр у рʹожи дьгьрт, рʹӧһʹе пироз ԝанрʹа гот: «Барнабас у Шаԝул бона мьн башԛә кьн, ԝәки ԝи шьхӧли бькьн, бона чь мьн әԝана бьжартьнә». 3 Ԝана паши рʹожигьртьне у дӧакьрьне, дәстед хԝә данинә сәр ԝан у әԝ шандьн.

4 Бь ви аԝайи, әв меред кӧ бь рʹӧһʹе пироз һатьнә шандьне, чунә Селукйайе, у жь ԝедәре пе гәмийе дәрбази Кипрусе бун. 5 Гава әԝана гьһиштьнә Сәламисе, дәстпекьрьн кʹьништед* Щьһуйада хәбәра Хԝәде бәла кьн. Йуһʹәнна жи тʹәви ԝан бу у али ԝан дькьр.*

6 Чахе әԝана ль тʹәмамийа гьраве һʹәта Пафосе гәрʹийан, Щьһуки бь наве Бар-Йешу дитьн, йе кӧ сербаз у пʹехәмбәрәки ԛәлп бу. 7 Әԝ тʹәви Сәргийо Паԝлосе ԝәли* бу, йе кӧ мәрьвәки аԛьл бу. Әԝи Барнабас у Шаԝул гази бал хԝә кьрьн, чьмки әԝи гәләк дьхԝәст гӧһ бьдә хәбәра Хԝәде. 8 Ле әԝ сербаз, йе кӧ ӧса жи дьһатә навкьрьне Елумас* (чь кӧ те һʹәсабе «сербаз»), мьԛабьли ԝан рʹабу у нәдьхԝәст ԝәки ԝәли хәбәра Хԝәде баԝәр бькә. 9 Һьнге Шаԝуле кӧ жерʹа Паԝлос жи дьготьн, бь рʹӧһʹе пироз тʹьжә бу, ль ԝи ньһерʹи 10 у гот: «Әй кӧрʹе Мире-щьна! Дьле тә бь дәрәԝа у хьрабийе тʹьжә йә, у тӧ дьжмьне рʹастийе йи! Те һʹәта кʹәнге дәрһәԛа рʹийед Йаһоԝайә рʹаст дәрәԝа бьки? 11 Ва Йаһоԝа ԝе тә щәза кә у тӧйе һьнә ԝәхт кор би у рʹонайа рʹоже* нәвини». Дәрберʹа мьж у тәʹри сәр ԝида һат, у әԝи дәр-доре хԝә дьгәрʹийа, кӧ кәсәк дәсте ԝи бьгьрә у рʹебәрийа ԝи бькә. 12 Гава ԝәли дит чь ԛәԝьми, баԝәрийа хԝә хәбәра Хԝәде ани, чьмки сәр ԝе һинкьрьна Йаһоԝа әʹщебмайи ма.

13 Паԝлос у мәрьвед кӧ тʹәви ԝи бун, пе гәмийе жь Пафосе рʹе кʹәтьн у чунә Пәргайа ль Памфилйайе. Ле Йуһʹәнна әԝана һиштьн у вәгәрʹийа Оршәлиме. 14 Ле әԝана жь Пәргайе дәрбази Әнтакйайа Пьсидйайе бун. Ԝедәре әԝана рʹожа Шәмийе* кʹәтьнә кʹьниште у рʹуньштьн. 15 Пәй хԝәндьна Ԛануне у Ньвисаред Пʹехәмбәрарʹа, сәрԝеред кʹьниште әв хәбәр ԝанрʹа шандьн: «Бьрано, һәрге бона щьмәʹте готьнәкә ԝәйә дьлдайине һәйә, кʹәрәм кьн бежьн». 16 Һьнге Паԝлос рʹабу, бь дәста нишан да у гот:

«Гәли Исраелийа у һун, йед кӧ жь Хԝәде дьтьрсьн, гӧһ бьдьнә мьн! 17 Хԝәдайе ве щьмәʹта Исраеле кал-бавед мә бьжартьн. Гава әԝана ль ԝәлате Мьсьре ча хәриб дьжитьн, Хԝәде әԝана кьрьнә мьләтәки ԛәԝи у мәзьн, у бь дәсте хԝәйи ԛәԝи әԝана жь ԝедәре дәрхьстьн. 18 Әԝи ԝәкә 40 сали бәрʹийеда ль ԝан сәбьр дькьр. 19 Әԝи һʹәфт мьләтед ԝәлате Кәнанеда ԛьрʹ кьр, у әԝ әʹрде ԝан ча мьлкʹ да Исраелийа. 20 Әв һʹәму тьшт ԝәкә 450 сал кʹьшанд.

Паши ве йәке, һʹәта рʹожед Самуйел пʹехәмбәр әԝи һʹакьм дьданә ԝан. 21 Ле паше щьмәʹте дәʹԝа кьр кӧ пʹадше ԝан һәбә, у Хԝәде Шаԝуле кӧрʹе Киш жь бәрәка Бьнйамин да ԝан, у әԝи 40 сали пʹадшати кьр. 22 Гава Хԝәде әԝ жь тʹәхте пʹадшатийе рʹакьр, әԝи Даԝьд сәр ԝан кьрә пʹадша, у сәр ԝи ӧса гот: ‹Мьн Даԝьде кӧрʹе Йеша, мәрьвәки ль гора дьле хԝә дит. Әԝ ԝе хԝәстьна мьн гьшки бинә сери›. 23 Хԝәде чаԝа соз дабу, жь зӧрʹәта ԝи хьлазкʹарәк да Исраеле, әԝ Иса бу. 24 Пешийа һатьна ԝи, Йуһʹәнна тʹәмамийа щьмәʹта Исраелрʹа дьгот, кӧ гәрәке әԝана бенә ньхӧмандьне,* ԝәки нишан кьн кӧ тʹобә дькьн. 25 Йуһʹәнна хьлазийа хьзмәтийа хԝә ӧса гот: ‹Һун дьфькьрьн әз әԝ ьм? На, әз әԝ ниньм. Ле йе кӧ паши мьн те, әз нәһежа мә кӧ жь ньгед ԝи чарьха бехьм›.

26 Гәли бьра, зӧрʹәта Бьраһим у һун, йед кӧ жь Хԝәде дьтьрсьн! Әв хәбәра дәрһәԛа хьлазбуне мәрʹа һатийә шандьне. 27 Бьнәлийед Оршәлиме у сәрԝеред ԝан әԝ* ԛәбул нәкьрьн. У гава ԝана әԝ сущдар дькьр, готьнед Пʹехәмбәра, йед кӧ һәр рʹожа Шәмийе бь дәнгәки бьльнд тенә хԝәндьне, анинә сери. 28 Рʹаст ә ԝана мәʹнийа кӧ әԝ бе кӧштьне нәдитьн, ле диса жи зоре Пилато кьрьн, ԝәки ԝи бьдә кӧштьне. 29 У чахе ԝана һʹәму тьштед кӧ дәрһәԛа ԝи һатьбун ньвисаре анинә сери, әԝ жь стуне* анинә хԝаре у кьрьнә тʹьрбе. 30 Ле Хԝәде әԝ жь мьрьне рʹакьр, 31 у әԝ гәләк рʹожа ԝан мәрьварʹа хӧйа дьбу, йед кӧ тʹәви ԝи жь Щәлиле чубун һʹәта Оршәлиме. У ньһа әԝана щьмәʹтерʹа дәрһәԛа ԝи шәʹдәтийе дьдьн.

32 У әм ве мьзгинийе дьдьнә ԝә, дәрһәԛа ви созе кӧ кал-бавед мәрʹа һатьбу дайине. 33 Бь ве йәке кӧ Хԝәде Иса жь мьрьне рʹакьр, әԝи әв соз бона зарʹед ԝан, демәк бона мә бь тʹәмами ани сери, чаԝа зәбура дӧдада һатийә ньвисаре: ‹Тӧ кӧрʹе мьн и; иро әз бумә баве тә›. 34 Әԝ йәк кӧ Хԝәде әԝ жь мьрьне рʹакьр у бәдәна ԝи ԝе тʹӧ щар нәрʹьзә, бь ван готьна әʹйан кьрийә: ‹Әзе һʹәзкьрьна амьн, йа кӧ мьн Даԝьдрʹа соз дайә, нишани ԝә кьм. У әв соз бь итʹбар ә›. 35 Ләма зәбурәкә дьнда ӧса те готьне: ‹Тӧйе нәһели ԝәки хьзмәткʹаре тәйи амьн бьрʹьзә›. 36 Даԝьд тʹәмамийа әʹмьре хԝәда Хԝәдерʹа хьзмәт дькьр.* Ле әԝ мьр* у тʹәви кал-баве хԝә һатә дәфьнкьрьне, у бәдәна ԝи рʹьзийа. 37 Ле әԝе кӧ Хԝәде ԝи жь мьрьне рʹакьр, нәрʹьзийа.

38 Ләма бьрано, бьра һун бьзаньбьн кӧ бь сайа Иса гӧнед ԝә дькарьн бенә бахшандьне. 39 У чьда Ԛануна Муса нькарьбу ԝә бесущ һʹәсаб кьра, бь сайа Иса һәр кәсе кӧ баԝәр дькә, дькарә бесущ бе һʹәсабе. 40 Ләма һаж хԝә һәбьн, ԝәки тьштед кӧ Ньвисаред Пʹехәмбәрада һатьнә ньвисаре, нәйен сәре ԝә: 41 ‹Ва бьньһерʹьн, һуне, йед кӧ ԛәрфед хԝә кәсед дьн дькьн, зәндәгьрти бьминьн у бәтавәбьн! Чьмки әзе рʹожед ԝәда шьхӧләки биньм сери. Әв шьхӧл шьхӧләки ӧса йә, кӧ һәрге кәсәк һур бь һур ԝәрʹа бежә жи, һуне баԝәр нәкьн›».

42 Гава Паԝлос у Барнабас дәркʹәтьнә дәрва, щьмәʹте жь ԝана һиви кьр кӧ Шәмийа дьн жи диса дәрһәԛа ван тьшта ԝанрʹа хәбәр дьн. 43 Гава щьвина кʹьниште бәла бу, гәләк Щьһу у кәсед кӧ дине Щьһуйа ԛәбул кьрьбун,* пәй Паԝлос у Барнабас чун. Ԝана һәрда тʹәви ԝан хәбәр дьдан у дьле ԝан ԛәԝи дькьрьн, ԝәки әԝана һʹәзкьрьна Хԝәдеда бьминьн.*

44 Шәмийа дьн, ԝәкә тʹәмамийа бажер ль һәв тʹоп бу, ԝәки гӧһ бьдә хәбәра Йаһоԝа. 45 Гава Щьһуйа һаԛас мәрьв дитьн, һʹәвсуди кьрьн у дәстпекьрьн Паԝлос беһӧрмәт кьн у мьԛабьли ԝи хәбәр дьн. 46 Һьнге Паԝлос у Барнабас бе тьрс ԝанрʹа готьн: «Хәбәра Хԝәде гәрәке пешийе ԝәрʹа бьһата готьне. Ле чьмки ԝә әв хәбәр инкʹар кьр у хԝә һежайи жийина һʹәта-һʹәтайе һʹәсаб накьн, әм дьчьнә щәм мьләтед дьн. 47 Чьмки Йаһоԝа бь ван гьлийа тʹәми дайә мә: ‹Мьн тӧ кьри рʹонайи бона мьләта, ԝәки һʹәта сәре дьнйайе мәрьва хьлаз ки».

48 Гава кәсед жь мьләтед дьн әв гьли бьһистьн, ша бун у шькьри дьданә хәбәра Йаһоԝа, у һʹәму кәсед кӧ дьле ԝан бона жийина һʹәта-һʹәтайе һазьр бу, бунә баԝәрмәнд. 49 Бь ви аԝайи хәбәра Йаһоԝа сәр тʹәмамийа ԝәлет бәла дьбу. 50 Ле Щьһуйа жьнед навдарә хԝәдехоф у гьрәгьред бажер, мьԛабьли Паԝлос у Барнабас рʹакьрьн. Әԝана пәй Паԝлос у Барнабас кʹәтьн у жь бажер дәрхьстьн. 51 Һьнге ԝана тʹоза ньгед хԝә даԝшанд, ԝәки ԝанрʹа бьбә шәʹдәти, у чунә Конйайе. 52 У шагьрта бәрдәԝам дькьр бь рʹӧһʹе пироз у бь шабуне тʹьжә бьн.

14 Конйайеда Паԝлос у Барнабас тʹәвайи кʹәтьнә кʹьништа* Щьһуйа, у ԝана ӧса хәбәр да, кӧ гәләк мәрьвед Щьһу у Йунани бунә баԝәрмәнд. 2 Ле Щьһуйед кӧ баԝәр нәкьрьн, нав мьләтед дьн дан,* ԝәки әԝана мьԛабьли бьра рʹабьн. 3 Ләма Паԝлос у Барнабас епʹещә ԝәхт ԝедәре ман у ԝана пе ԛәԝата Йаһоԝа бе тьрс хәбәра ԛәнщийа ԝийә мәзьн бәла дькьр. У Хԝәде жи бь ве йәке кӧ пе дәсте ԝан нишан у кʹәрәмәт дькьрьн, шәʹдәтийа ве йәке дькьр. 4 Ле щьмәʹта бажер пʹарәвәбу, һьнәка пьшта Щьһуйа дьгьртьн, у һьнәкед дьн жи пьшта шандийа дьгьртьн. 5 Чахе һьм мәрьвед жь мьләтед дьн, һьм жи Щьһуйа тʹәви сәрԝеред хԝә дьхԝәстьн һʹьщуми сәр Паԝлос у Барнабас бькьн у ԝана бьдьнә бәр кәвьра, 6 әԝана ве йәке пеһʹәсийан у рʹәвийан бажаред Лукайонйайе; Листра у Дербәйе у дәр-доре ԝан. 7 Ԝедәре жи ԝана мьзгини бәла дькьр.

8 Листрайеда мәрьвәки ньгада сәԛәт һәбу. Әԝ жь буйина хԝәда сәԛәт бу у тʹӧ щара нәгәрʹийабу. 9 Гава Паԝлос хәбәр дьда, әԝи мәрьви гӧһ дьда ԝи. Паԝлос ль ԝи ньһерʹи, дит кӧ баԝәрийа ԝи һәйә у дькарә ԛәнщ бә, 10 бь дәнгәки бьльнд готе: «Рʹабә у сәр ньгед хԝә бьсәкьнә». Һьнге әԝи банзда у дәстпекьр рʹе һәрʹә. 11 Гава хәлԛе дит кӧ Паԝлос чь кьр, ԝана бь зьмане Ликаони гот: «Хӧдан дьлԛе мәрьвада дакʹәтьнә жер щәм мә!» 12 Ԝана дәстпекьр Барнабасрʹа бежьн Зәԝс, ле Паԝлосрʹа жи Һәрмес, чьмки әԝи дьһа зедә хәбәр дьда. 13 У кʹаһине Зәԝс, пʹарьстгәһа кʹижани бәр бажер бу, га анинә бәр дәргәһед бажер тʹәви тʹащәгӧла, у хԝәст тʹәви хәлԛе, Паԝлос у Барнабасрʹа бькә ԛӧрбан.

14 Ле гава шандийа, демәк Барнабас у Паԝлос әв йәк бьһистьн, ԝана кʹьнщед хԝә ԛәлаштьн у бь ләз кʹәтьнә нава әʹлаләте у бь дәнге бьльнд готьн: 15 «Бьрано, һун чьма ӧса дькьн? Әм жи мина ԝә мәрьв ьн, у шашийед мә жи һәнә. Әм мьзгинийе дьдьнә ԝә, кӧ һун тʹәрка ԝан тьштед пʹучʹ бьдьн, у Хԝәдайе сах бьһʹәбиньн, йе кӧ әʹрд у әʹзман, бәʹр у һʹәму тьштед нав ԝанда чекьрьнә. 16 Әԝи рʹожед ньсьлед бәреда изьн дьда һʹәму мьләта, кӧ әԝана рʹийа хԝәда һәрʹьн. 17 Ле диса жи әԝи шәʹдәтийа хԝә дьда. Мәсәлә, әԝи ԛәнщи дькьр, ԝәрʹа жь әʹзмен баран дьбаранд, әʹрдед ԝә дәмсалада бәр дьдан, тʹер-тʹьжә хԝарьн дьда ԝә у дьле ԝә бь шабуне тʹьжә дькьр». 18 Рʹаст ә ԝана әв гьли дьготьн, ле диса жи анщах щьмәʹт данә сәкьнандьне, кӧ ԝанрʹа ԛӧрбана нәдьн.

19 Ле жь Әнтакйайе у Конйайе Щьһу һатьн у әʹлаләт мьԛабьли Паԝлос рʹакьрьн, ԝана әԝ данә бәр кәвьра, у кʹьшандьнә жь бажер дәр, чьмки дьфькьрин кӧ әԝ мьрийә. 20 Ле гава шагьрт дора ԝи тʹоп бун, әԝ рʹабу у кʹәтә бажер. Рʹожа дьн, әԝ тʹәви Барнабас чу Дербәйе. 21 Чахе ԝана ԝи бажарида мьзгини бәла кьр у али гәләк мәрьва кьрьн кӧ бьбьнә шагьрт, вәгәрʹийанә Листрайе, Конйайе у Әнтакйайе. 22 Ԝедәре ԝана дьле шагьрта ԛәԝи дькьр у али ԝан дькьрьн, ԝәки әԝана баԝәрийеда бьминьн, у ԝанрʹа дьготьн: «Пешийа кӧ әм бькʹәвьнә Пʹадшатийа Хԝәде, әм гәрәке гәләк тәнгасийарʹа дәрбаз бьн». 23 Хенщи ԝе йәке, ԝана һәр щьватәкеда рʹуспи кʹьфш кьрьн, у паши дӧакьрьн у рʹожигьртьне, ԝана рʹуспийед кӧ Хԝәде баԝәр кьрьбун, тʹәсмили Йаһоԝа кьрьн.

24 Паше әԝана нава Пьсидйайерʹа дәрбази Памфилйайе бун. 25 У чахе ԝана хәбәра Хԝәде Пәргайеда әʹлам кьрьн, чунә Әталйайе. 26 Жь ԝедәре әԝана бь гәмийе дәрбази Әнтакйайе бун, кʹидәре бьра әԝана тʹәсмили ԛәнщийа Хԝәдейә мәзьн кьрьбун, бона шьхӧле кӧ ԝана ида хьлаз кьрьбу.

27 Гава әԝана гьһиштьнә ԝедәре, щьват ль һәв тʹоп кьрьн у дәрһәԛа ԝан һʹәму тьшта чь кӧ Хԝәде бь дәсте ԝан кьрьбу, гьли кьрьн. Ԝана гот кӧ Хԝәде мьләтед дьнрʹа дәре баԝәрийе вәкьрийә. 28 У әԝана ԝәʹдәки дьреж тʹәви шагьрта ман.

15 Һьнә шагьрт жь Щьһустане һатьн у дәстпекьрьн бьра ӧса һин кьн: «Һәрге һун ль гора әʹдәте Муса нәйенә сьнәткьрьне, һуне нькарьбьн хьлаз бьн». 2 Ле чьмки ньһерʹандьна ԝан жь ньһерʹандьна Паԝлос у Барнабас щӧдә дьбу, нав ԝанда дәʹԝ пешда һат. Ләма жи һатә сафикьрьне, кӧ Паԝлос у Барнабас тʹәви чәнд бьра жь бо ве пьрсе һәрʹьн Оршәлиме бал шандийа у рʹуспийа.

3 Щьвате әԝана вәрʹекьрьн у ԝана рʹийа хԝә бәрдәԝам кьр нав Финикйа у Самәрйайерʹа дәрбаз бун. Ԝана бьрарʹа һур бь һур дәрһәԛа ве йәке гьли дькьр, кӧ кәсед жь мьләтед дьн чаԝа бунә баԝәрмәнд. Әве йәке һʹәму бьра гәләк ша дькьр. 4 Гава әԝана гьһиштьнә Оршәлиме, алийе щьватеда, шандийа у рʹуспийада бь дьлгәрми һатьнә ԛәбулкьрьне, у һʹәму тьштед кӧ Хԝәде бь ԝан кьрьбу, ԝанрʹа гьли кьрьн. 5 Ле һьнә баԝәрмәндед кӧ бәре пьштгьред һинкьрьнед Ферьсийа* бун, жь щийед хԝә рʹабун у готьн: «Гәрәке әԝана бенә сьнәткьрьне у ԝанрʹа тʹәми бе дайине, кӧ хԝә ль Ԛануна Муса бьгьрьн».

6 Һьнге шанди у рʹуспи тʹоп бун, ԝәки ве пьрсе шеԝьр кьн. 7 Пәй шеԝьркьрьн у дәʹԝ-доза дьрежрʹа, Пәтрус рʹабу у ԝанрʹа гот: «Бьрано, чаԝа кӧ һун заньн, Хԝәде бәреда нав ԝәда әз бьжартьмә, ԝәки мәрьвед жь мьләтед дьн мьзгинийе жь дәве мьн бьбьһен у баԝәр бькьн. 8 У Хԝәдейе кӧ дьла занә, нишан кьр ԝәки әԝ ԝана ԛәбул дькә гава рʹӧһʹе пироз да ԝан жи. 9 Әԝи тʹӧ фьрԛи нәкьрә нава мә у ԝанда, у дьле ԝан бь баԝәрийе паԛьж кьр. 10 Ижа һун чьрʹа Хԝәде дьщерʹьбиньн у нирәки ӧса датиньн сәр стийе шагьрта, кӧ нә кал-бавед мә карьбунә бьвьн, нә жи мә? 11 Ле әм баԝәр ьн кӧ бь сайа ԛәнщийа мәзьн йа Хӧдан Иса, әм һатьнә хьлазкьрьне, ӧса жи әԝана ԝе бенә хьлазкьрьне».

12 Сәр ван гьлийа тʹәмамийа кʹоме хԝә кәрʹ кьр. Ԝана гӧһ да Барнабас у Паԝлос, бь дәсте кʹижана Хԝәде нав мьләтед дьнда гәләк нишан у кʹәрәмәт кьрьбун. 13 Гава ԝана хәбәрдана хԝә хьлаз кьр, Аԛуб гот: «Бьрано, гӧһ бьдьнә мьн. 14 Шьмһʹун һур бь һур гьли кьр кӧ Хԝәде чаԝа щара пешьн дина хԝә да мьләтед дьн, ԝәки нав ԝанда щьмәʹтәке бона наве хԝә тʹоп кә. 15 Әԝ йәк у готьнед пʹехәмбәра жи ль һәв дьгьрьн, чаԝа ньвисар ә: 16 ‹Паши ван тьшта әзе вәгәрʹьм у мала* Даԝьдә һьлшийайи, диса рʹакьм. Әзе пʹаред ԝейә һьлшийайи тʹәзәда ава кьм, 17 ԝәки кәсед майи у мәрьвед жь һʹәму мьләта, йед кӧ наве мьн сәр ԝан ә, бь хирәт Йаһоԝа бьгәрʹьн. Ве йәке Йаһоԝа дьбежә, йе кӧ ван тьшта дькә, 18 чь кӧ һе жь бәреда әʹйан ә›. 19 Ләма жи әз дьфькьрьм, ԝәки әм гәрәке баре мәрьвед жь мьләтед дьн гьран нәкьн, йед кӧ тенә сәр рʹийа Хԝәде. 20 Ле әм ԝанрʹа бьньвисьн кӧ гәрәке әԝана жь тьштед пʹутпʹарьстийева гьредайи, жь зьнекʹарийе,* жь гоште һʹәйԝанед мьрар* у жь хуне хԝә дур бьгьрьн. 21 Чьмки һе ԝәʹде бәреда һәр бажарида готьнед Муса тенә әʹламкьрьне, у һәр Шәми* кʹьништада* бь дәнге бьльнд тенә хԝәндьне».

22 Һьнге шанди у рʹуспийа тʹәви тʹәмамийа щьвате сафи кьрьн, кӧ нав хԝәда чәнд мәрьва бьжберьн, ԝәки тʹәви Паԝлос у Барнабас бьшиньн Әнтакйайе. Ԝана Щьһудайе кӧ жерʹа Барсабо дьготьн у Силас, йед кӧ нав бьрада рʹебәрийа щьвате дькьрьн, бьжартьн, у тʹәви ԝан шандьн. 23 Ԝана тʹәви ԝан әв нәʹмә шанд:

«Әм бьред ԝәйи шанди у рʹуспи, сьлавед гәрм дьшиньн ԝә, бьред жь мьләтед дьнрʹа, йед кӧ Әнтакйайе, Сурйайе, у Киликйайеда дьжин! 24 Мә бьһистийә кӧ һьнәк жь мә һатьнә у бь гьлийед хԝә дьле ԝә тәнг кьрьнә у сәре ԝә тʹәвльһәв кьрьнә, ле мә тʹӧ рʹебәри нәдайә ԝан. 25 Ләма жи мә тʹәвайи сафи кьр, ԝәки бьра бьжберьн, у тʹәви бьред мәйи дәлал Барнабас у Паԝлос, бьшиньн бал ԝә. 26 Әван бьра жь бо хатьре наве Хӧдане мә Иса Мәсиһ әʹмьре хԝә кьрьнә бьн хофе. 27 Әм Щьһуда у Силас дьшиньн, ԝәки әԝана жи ԝан тьшта ԝәрʹа бежьн. 28 Рʹӧһʹе пироз али мә кьр кӧ әм бьгьһижьнә ве нете, ԝәки баре ԝә дьһа гьран нәкьн, хенщи ван тьштед фәрз: 29 Жь тьштед кӧ пʹутарʹа һатьнә ԛӧрбанкьрьне, жь хуне, жь гоште һʹәйԝанед мьрар у жь зьнекʹарийе хԝә дур бьгьрьн. Һәрге һун ӧса бькьн, жийина ԝә ԝе баш бә. Бьра Хԝәде сьһʹәт-ԛәԝате бьдә ԝә!»

30 Әв бьра рʹе кʹәтьн у гьһиштьнә Әнтакйайе. Ԝана тʹәмамийа кʹоме тʹәвайи тʹоп кьр у әв нәʹмә данә ԝан. 31 Чахе ԝана әв нәʹма һеланкьрьне хԝәндьн, гәләк ша бун. 32 Щьһуда у Силас, йед кӧ хԝәха жи пʹехәмбәр бун, бь готаред хԝә бьра һелан кьрьн у дьле ԝан ԛәԝи кьрьн. 33 Чахе әԝана чәндәке ԝедәре ман, бьра әԝ бь әʹдьлайи вәрʹекьрьн у шандьнә Оршәлиме. 34* —— 35 Ле Паԝлос у Барнабас Әнтакйайеда ман. Ԝана һин дькьр у тʹәви гәләкед дьн мьзгинийа дәрһәԛа хәбәра Йаһоԝа бәла дькьрьн.

36 Чәнд рʹож шунда, Паԝлос Барнабасрʹа гот: «Ԝәрә әм вәгәрʹьн, у һәр бажарида кʹидәре кӧ мә хәбәра Йаһоԝа бәла кьрийә, тʹәсәлийа бьра бькьн у бьвиньн һәла әԝана чаԝа ньн». 37 Барнабас хԝәст Йуһʹәннайе кӧ жерʹа Маркос дьһатә готьне, тʹәви хԝә бьвә. 38 Ле Паԝлос нәдьхԝәст ԝәки Маркос тʹәви ԝан һәрʹә, чьмки әԝ Памфилйайеда жь ԝан ԛәтийа у тʹәви ԝан шьхӧл нәкьр. 39 Жь бо ве йәке ортʹа Паԝлос у Барнабасда дәʹԝәкә мәзьн пешда һат, у әԝана жь һәв ԛәтийан. Барнабас тʹәви хԝә Маркос бьр у пе гәмийе чу Кипрусе. 40 Ле Паԝлос Силас бьжарт, у паши ԝе йәке кӧ бьра дӧа кьрьбун, ԝәки Йаһоԝа ԛәнщийа хԝәйә мәзьн жь Паԝлос кем нәкә, рʹе кʹәтьн. 41 Әԝ Сурйайерʹа у Киликйайерʹа дәрбаз бу, у щьват ԛәԝи дькьрьн.

16 Паԝлос һатә Дербәйе у паше чу Листрайе жи. Ԝедәре шагьртәки бь наве Тимотʹейо һәбу. Дийа ԝи кʹӧлфәтәкә Щьһуйә баԝәрмәнд бу, ле баве ԝи Йунан бу. 2 Бьред жь Листрайе у Конйайе дәрһәԛа Тимотʹейо баш хәбәр дьдан. 3 Паԝлос хԝәст ԝи тʹәви хԝә бьвә, у жь бо Щьһуйед ԝан дәра, әԝи әԝ да сьнәткьрьне, чьмки һʹәмуйа заньбу кӧ баве ԝи Йунан бу. 4 Гава әԝана бажарарʹа дәрбаз дьбун, ԝана сафикьрьнед шандийа у рʹуспийед Оршәлиме дьгиһандьнә бьра, ԝәки хԝә ль ван сафикьрьна бьгьрьн. 5 Бь ви аԝайи щьват баԝәрийеда ԛәԝи дьбун, у һәр рʹож һәжмара ԝан зедә дьбу.

6 Әԝана Фьригйайерʹа у һәрема Галатйайерʹа дәрбаз дьбун, чьмки рʹӧһʹе пироз изьн нәда ԝан, ԝәки әԝана Асйайеда дәрһәԛа хәбәра Хԝәде хәбәр дьн. 7 Паше, гава әԝана һатьнә Мисйайе, хирәт кьрьн кӧ бькʹәвьнә Битенйайе, ле Иса бь сайа рʹӧһʹ изьн нәда ԝан. 8 Һьнге әԝана бәр Мисйайерʹа дәрбаз бун у һатьнә Тройайе. 9 Шәв Паԝлос дитьнокәк дит: Мәрьвәки Макәдони бәр ԝи сәкьни у жь ԝи лава кьр: «Дәрбази Макәдонйайе бә у али мә бькә». 10 Пәй ԝе дитьнокерʹа мә дәрберʹа сафи кьр һәрʹьнә Макәдонйайе. Мә фәʹм кьр кӧ Хԝәде гази мә дькә, ԝәки әм мьзгинийе әʹлами ԝан кьн.

11 Ләма жи әм жь Тройайе пе гәмийе дәркʹәтьн у рʹастә-рʹаст чунә Самотʹрахе, у рʹожа дьн жи чунә Нейаполисе. 12 У жь ԝедәре әм чунә Филипйайе, колонийәкә Рʹомайи, йа кӧ бажаре сәрәкә йа Макәдонйайе йә. Әм чәнд рʹожа ви бажарида ман. 13 Рʹожа Шәмийе,* әм жь бажер дәркʹәтьн у чунә бәр чʹәмәки, чьмки әм дьфькьрин кӧ ԝедәре щийе дӧакьрьне һәйә. Әм ԝедәре рʹуньштьн, у мә дәстпекьр ԝан кʹӧлфәтарʹа хәбәр дьн, йед кӧ ԝедәре тʹоп бьбун. 14 Кʹӧлфәтәкә хԝәдехоф жи наве кʹижане Лидйа бу, гӧһ дьда. Әԝ жь бажаре Тийатирайе бу у әԝе кʹьнщед ширк дьфьротьн. Йаһоԝа дьле ԝе вәкьр, ԝәки әԝ рʹьнд гӧһ бьдә гьлийед Паԝлос. 15 Гава әԝ у тʹәмамийа малбәта ԝе һатьнә ньхӧмандьне, әԝе жь мә рʹәща кьр: «Һәрге һун мьн һʹәсаб дькьн ча мәрьвәкә Йаһоԝарʹа амьн, ԝәрен мала мьнда бьминьн». У әԝе зоре мә кьр у әм бьрьнә мала хԝә.

16 Рʹожәке, гава әм дьчунә щийе дӧакьрьне, щарик рʹасти мә һат, нав кʹижанеда щьн һәбу, у әԝе бь сайа ԝи кʹочʹәкти дькьр. Әԝе бь кʹочʹәктийе ахайе хԝәрʹа гәләк пʹәрә ԛазанщ дькьр. 17 Әԝе кәчʹьке бәрдәԝам дькьр пәй мә у Паԝлос бе, у бь ԛирʹин дьгот: «Әв мәрьв хӧламед Хԝәдайе Һәри Жорьн ьн! Әԝана ԝәрʹа дәрһәԛа рʹийа кӧ дьбә бәрбь хьлазбуне, әʹлам дькьн!» 18 Әԝе гәләк рʹожа әв йәк дькьр, у Паԝлос ида әʹщьз бу. Ләма әԝ зьвьрʹи у щьнрʹа* гот: «Әз бь наве Иса Мәсиһ фәрмане дьдьмә тә, жь ԝе дәркʹәвә!» У һәма ве дәме щьн жь кәчʹьке дәркʹәт.

19 Гава ахайед ԝе дитьн кӧ әԝана ида нькарьн пʹәра ԛазанщ кьн, Паԝлос у Силас гьртьн у кʹьшандьнә мәйдана бажер бал сәрԝера. 20 Ԝана әԝ анин бәр мәзьнед бажер у готьн: «Әв мәрьв әʹдьлайа бажаре мә хьраб дькьн. Әԝана Щьһу нә, 21 у әʹдәтед ӧса һин дькьн, ԝәки бона мә Рʹомайа набә кӧ әм ԛәбул кьн у биньн сери». 22 Әʹлаләт мьԛабьли ԝан рʹабу, у мәзьнед бажер кʹьнщед ԝан ԛәлаштьн, у фәрман дан кӧ ԝана бьдьнә бәр шьва. 23 Пәй гәләк леданерʹа, ԝана әԝ авитьнә кәле у фәрман данә нобәдаре кәле, кӧ әԝ рʹьнд дина хԝә бьдә ԝан, ԝәки нәрʹәвьн. 24 Жь бо ве йәке кӧ нобәдар фәрманәкә ӧса станд, әԝи әԝана кьрьнә кәла һьндӧрʹ у ньгед ԝан кьрьнә ԛәйда.

25 Незики ниве шәве Паԝлос у Силас дӧа дькьрьн у бь кʹьлама пәсьне Хԝәде дьдан. Гьртийа жи гӧһ дьданә ԝан. 26 Ньшкева әʹрд ӧса ԛайим һʹәжийа кӧ тʹәмамийа кәле һʹәжийа. Дәрберʹа һʹәму дәри вәбун, у зьнщиред һʹәмуйа кʹәтьн. 27 Гава нобәдар һʹьшйар бу у дит кӧ дәред кәле вәкьри нә, шуре хԝә һьлда у хԝәст хԝә бькӧжә, чьмки әԝи тʹьре гьрти рʹәвийанә. 28 Ле Паԝлос бь дәнгәки бьльнд гот: «Зийане нәдә хԝә, әм гьшк вьра нә!» 29 Нобәдар чʹьра хԝәст у рʹәвийа һьндӧрʹ, әԝ жь тьрса ләрьзи у хԝә авитә бәр Паԝлос у Силас. 30 Әԝи әԝана дәрхьстьнә дәрва у ԝанрʹа гот: «Әзхӧлам, әз чь гәрәке бькьм, кӧ хьлаз бьм?» 31 Ԝана гот: «Баԝәрийа хԝә Хӧдан Иса бинә, у тӧйе тʹәмамийа малбәта хԝәва хьлаз би». 32 Паше ԝана тʹәви ԝи у тʹәви һʹәму кәсед кӧ мала ԝида бун, дәрһәԛа хәбәра Йаһоԝа хәбәр дан. 33 Һәма ԝе шәве нобәдар әԝана бьрьн у бьринед ԝан шуштьн. Пәйрʹа әԝ у тʹәмамийа малбәта ԝи дәрберʹа һатьнә ньхӧмандьне. 34 Нобәдар әԝ анин мала хԝә у бәр ԝан сьфьрә вәкьр. Әԝ малбәта хԝәва гәләк ша бу, ԝәки әԝи баԝәрийа хԝә Хԝәде ани.

35 Гава бу рʹож, мәзьнед бажер нобәдар шандьн у готьн: «Ԝан мәрьва бәрʹдьн». 36 Нобәдар гьлийе ԝан гиһандә Паԝлос: «Мәзьнед бажер мәрьв шандьн кӧ ԝә һәрда бәрʹдьн. Дәркʹәвьн у бь сьламәти һәрʹьн». 37 Ле Паԝлос ԝанрʹа гот: «Әм бажарванед Рʹоме нә, ле диса жи ԝана бе диԝан бәр әʹлаләте әм кʹӧтан у авитьнә кәле. У ньһа әԝана дьхԝазьн мә дьзикава бәрʹдьн? На, ӧса набә! Бьра әԝана хԝәха бен у мә бәрʹдьн». 38 Нобәдара әв гьли мәзьнед бажеррʹа готьн. Гава ԝана бьһист кӧ Паԝлос у Силас бажарванед Рʹоме нә, гәләк тьрсийан. 39 Ләма әԝана һатьн жь ԝан бахшандьн хԝәстьн, әԝана жь кәле дәрхьстьн у жь ԝан рʹәща кьрьн кӧ жь бажер һәрʹьн. 40 Ле чахе әԝана жь кәле дәркʹәтьн, чунә мала Лидйайе. Ԝедәре ԝана бьра дитьн, ԛәԝи кьрьн у паше жь бажер дәркʹәтьн.

17 Паԝлос у Силас нав Әмфиполис у Аполонйайерʹа дәрбаз бун у гьһиштьнә Тʹесалонике. Ԝедәре кʹьништәкә* Щьһуйа һәбу. 2 Паԝлос ча һәр гав кʹәтә кʹьниште. Әԝи се рʹожед Шәмийе* жь Ньвисаред Пироз тʹәви ԝан шеԝьр дькьр. 3 Әԝи бь сайа ван ньвисара избат дькьр у шьровәдькьр кӧ гәрәке Мәсиһ щәфа бькʹьшанда, у жь мьрьне бьһата рʹакьрьне. Әԝи ӧса дьгот: «Әв Иса дәрһәԛа кʹижани әз ԝәрʹа әʹлам дькьм, Мәсиһ ә». 4 Ахьрийеда, һьнәк жь ԝан бунә баԝәрмәнд у тʹәви Паԝлос у Силас бунә йәк. Ӧса жи гәләк Йунанед кӧ Хԝәде дьһʹәбандьн у гәләк жьнед нав у дәнг жи бунә баԝәрмәнд.

5 Ле Щьһуйа жь һʹәвсудийе мәрьвед хьраб, йед кӧ мәйданеда бешьхӧл дьчун-дьһатьн, тʹоп кьрьн у бажар тʹәвльһәв кьрьн. Ԝана һʹьщуми сәр мала Йасон кьр у Паԝлос у Силас дьгәрʹийан, кӧ ԝана дәрхьн бәр щьмәʹте. 6 Ле гава әԝана нәдитьн, Йасон у чәнд бьра кʹьшандьнә бәр сәрокед бажер. Ԝана бь дәнгәки бьльнд гот: «Әв мәрьвед кӧ дьнйа тʹәвльһәв кьрьнә, һатьнә вьра жи, 7 у Йасон әԝана ԛәбул кьрьнә мала хԝә. Әв һʹәму мәрьв мьԛабьли ԛанунед Ԛәйсәр рʹадьбьн у дьбежьн, кӧ пʹадшаки дьн һәйә у наве ԝи Иса йә». 8 Гава хәлԛе у сәрокед бажер әв йәк бьһистьн, тьрс кʹәтә дьле ԝан. 9 У чахе ԝана жь Йасон у бьра кʹәфил* стандьн, паше әԝана бәрʹдан.

10 Һәма ԝе шәве, бьра Паԝлос у Силас шандьнә Бәройайе. Гава әԝана гьһиштьнә ԝедәре, чунә кʹьништа Щьһуйа. 11 Щьмәʹта Бәройайе һинбунеда жь щьмәʹта Тʹесалонике зедәтьр хирәт бун. Ԝана хәбәра Хԝәде бь дьл у щан ԛәбул кьр у Ньвисаред Пироз һәр рʹож рʹьнд лекʹолин дькьрьн, ԝәки бьвиньн һәла тьштед кӧ әԝана дьбьһен рʹаст ьн, йан на. 12 Ләма гәләк жь ԝан бунә баԝәрмәнд, у нав ԝанда гәләк кʹӧлфәт у меред Йунани йед хԝәйиԛәдьр жи һәбун. 13 Ле гава Щьһуйед Тʹесалонике пеһʹәсийан кӧ Паԝлос Бәройайеда жи хәбәра Хԝәде бәла дькә, әԝана һатьнә ԝедәре у щьмәʹт мьԛабьли ԝан рʹакьрьн. 14 Һьнге бьра дәрберʹа Паԝлос шандьнә бәр бәʹре, ле Силас у Тимотʹейо ԝедәре ман. 15 Бьред кӧ Паԝлос вәрʹедькьрьн һʹәта Атʹинайе чун. Чахе Паԝлос тʹәми да ԝан, ԝәки Силас у Тимотʹейо зу бенә щәм ԝи, паши ве йәке әԝана вәгәрʹийан.

16 Чахе Паԝлос Атʹинайеда һивийа ԝан бу у дит кӧ бажар бь пʹута тʹьжә йә, әԝ әʹщьз бу. 17 Һьнге әԝи дәстпекьр кʹьништеда тʹәви Щьһуйа у мәрьвед дьн, йед кӧ Хԝәде дьһʹәбандьн, шеԝьр кә. Ӧса жи әԝи һәр рʹож базареда тʹәви ԝан мәрьва хәбәр дьда, йед кӧ рʹасти ԝи дьһатьн. 18 Ле һьнә философед Епикури у Стойхи тʹәви Паԝлос кʹәтьнә дәʹԝе. Һьнәка жь ԝан дьготьн: «Әв мәрьве кӧ дькә бьлә-бьл чь дьхԝазә бежә?» Һьнәкед дьн жи ӧса дьготьн: «Те кʹьфше кӧ әԝ дәрһәԛа хӧданед хәриб гьли дькә». Ԝана ӧса гот, чьмки Паԝлос мьзгинийа дәрһәԛа Иса у рʹабуна мьрийа бәла дькьр. 19 Ԝана әԝ ани Диԝана Бьльнд йа Атʹинайе* у готьн: «Дькари мәрʹа бежи әв һинкьрьна тʹәзә, дәрһәԛа кʹижани тӧ хәбәр дьди, чь йә? 20 Чьмки тӧ тьштед ӧса дьбежи, чь кӧ бона гӧһед мә хәриб ьн. Ләма әм дьхԝазьн бьзаньбьн әԝ тьшт чь тенә һʹәсабе». 21 Һʹәму мәрьвед Атʹинайи у хәрибед кӧ ԝедәре дьман, ԝәʹде хԝәйә аза сәр ве йәке хәрщ дькьрьн, кӧ гӧһ дьданә тьштед тʹәзә у дәрһәԛа ԝан тьшта хәбәр дьдан. 22 Һьнге Паԝлос нава Диԝана Бьльнд йа Атʹинайеда сәкьни у гот:

«Гәли Атʹинайа! Һәр тьштида те кʹьфше, ԝәки һун жь мәрьвед дьн зедәтьр хӧдана дьтьрсьн. 23 Мәсәлә, гава әз бажерда дьгәрʹийам, мьн рʹьнд дина хԝә дьда тьштед кӧ һун дьһʹәбиньн, у мьн ԛӧрбангәһәк дит, сәр кʹижани ӧса ньвисар ә: ‹Хԝәдеки Нәнасрʹа›. Ләма жи әз дьхԝазьм ԝи Хԝәдайе кӧ һун нас накьн, ле дьһʹәбиньн, ԝәрʹа бьдьмә наскьрьне. 24 Әв Хԝәдайе кӧ дьнйа у һʹәму тьштед ԝеда чекьрьнә, Хӧдане әʹрд у әʹзмен ә, у әԝ пʹарьстгәһада, йед кӧ бь дәстед мерьв һатьнә чекьрьне, нажи. 25 У әԝ һʹәԝщә нинә кӧ мәрьв али ԝи бькьн, чьмки әԝ хԝәха жийине, бинкʹьшандьне у һәр тьшти дьдә һʹәму мәрьва. 26 Хԝәде жь мәрьвәки һʹәму мьләт чекьрьн, ԝәки әԝана тʹәмамийа рʹуйе әʹрде тʹьжә кьн. Әԝи ԝәхт кʹьфш кьрьн у синор данин бона щийе кӧ мәрьв бьжин. 27 Әԝи ӧса кьр, ԝәки әԝана бь хирәт Хԝәде бьгәрʹьн у ԝи бьвиньн, чьмки әԝ незики мә һәр йәки йә. 28 Бь сайа Хԝәде әм дьжин, дьмәшьн у һәнә. Һәла һе һьнә ньвискʹаред* ԝә жи готьнә: ‹Әм жи зарʹед ԝи нә›.

29 У һәрге әм зарʹед Хԝәде нә, әм гәрәке нәфькьрьн кӧ Хԝәде мина зерʹ, йан зив йан жи кәвьр ә, тьштәки кӧ бь һʹьш у һостатийа мәрьва һатийә чекьрьне. 30 Рʹаст ә, бәре Хԝәде чʹәʹве хԝә дадьда сәр нәзанәбуна ӧса, ле әԝ ньһа мәрьвед һʹәму дәрарʹа дьбежә, кӧ әԝана гәрәке тʹобә кьн. 31 Чьмки әԝи рʹожәк кʹьфш кьрийә, ԝәки бь дәсте мәрьвәки кӧ әԝи бьжартийә, бь һәԛи диԝана тʹәмамийа дьнйайе бькә. У гава Хԝәде әԝ жь мьрьне рʹакьр, һʹәму мәрьварʹа избат кьр кӧ әв рʹож ԝе бе».

32 Гава ԝана дәрһәԛа рʹабуна мьрийа бьһист, жь ԝан һьнәк пе кʹәнийан, ле кәсед дьн ӧса готьн: «Дәрһәԛа ве йәке әм дьхԝазьн щарәкә дьн жи гӧһ бьдьнә тә». 33 Һьнге Паԝлос жь ԝедәре чу, 34 у һьнә мәрьва хԝә ль ԝи гьртьн у бунә баԝәрмәнд. Нав ԝанда бун Дийонисйо, һʹакьмәки Диԝана Бьльнд йа Атʹинайе, кʹӧлфәтәкә бь наве Дамәрис у ӧса жи кәсед дьн.

18 Паши ве йәке, Паԝлос жь Атʹинайе дәркʹәт у чу Корьнтʹе. 2 Ԝедәре әԝ рʹасти Щьһуки бь наве Әкила һат, йе кӧ әʹсьле хԝәда жь Понтосе бу. Әԝ тʹәви жьна хԝә Прьскилайе жь Италийайе тʹәзә һатьбу, чьмки Ԛәйсәр Клаԝдйо фәрман дабу, ԝәки һʹәму Щьһу жь Рʹоме дәркʹәвьн. Паԝлос чу бал ԝан. 3 У чьмки пʹеше ԝан йәк бу, әԝ мала ԝанда ма у тʹәви ԝан кон чедькьрьн. 4 Паԝлос һәр рʹожед Шәмийе кʹьништеда* готар дьхԝәндьн,* у кәсед Щьһу у кәсед Йунани дьданә баԝәркьрьне.

5 Гава Силас у Тимотʹейо жь Макәдонйайе һатьн, Паԝлос дәстпекьр һе зедә хәбәра Хԝәде бәла кә у Щьһуйарʹа избат дькьр кӧ Иса йә Мәсиһ. 6 Ле чьмки әԝана мьԛабьли ԝи рʹадьбун у әԝ беһӧрмәт дькьрьн, әԝи кʹьнщед хԝә даԝшанд у ԝанрʹа гот: «Бьра хуна ԝә сәр стийе ԝә бә. Әз бесущ ьм. Жь вьр шунда әзе һәрʹьм щәм мәрьвед жь мьләтед дьн». 7 Паԝлос жь ԝедәре чу у кʹәтә мала мәрьвәки бь наве Тито Йусто, йе кӧ Хԝәде дьһʹәбанд. Мала ԝи кʹеләка кʹьниште бу. 8 Сәрԝере кʹьниште Кьриспо тʹәмамийа малбәта хԝәва баԝәрийа хԝә Хӧдан ани. Ӧса жи гәләк Корьнтʹийед кӧ мьзгини бьһистьн, баԝәр кьрьн у һатьнә ньхӧмандьне.* 9 Хӧдан шәв дитьнокеда Паԝлосрʹа гот: «Нәтьрсә, бәрдәԝам кә хәбәр дә у хԝә кәрʹ нәкә, 10 чьмки әз тʹәви тә мә, у тʹӧ кәс ԝе зьраре нәдә тә; ви бажарида гәләк мәрьв һәнә, йед кӧ ԝе баԝәрийа хԝә мьн биньн». 11 Ләма Паԝлос сал нивәке ԝедәре ма у хәбәра Хԝәде ԝан һин дькьр.

12 Рʹожед ԝәлийе Ахайайе Галийода, Щьһуйа гьлийед хԝә кьрьнә йәк, һʹьщуми сәр Паԝлос кьрьн у әԝ бьрьнә бәр тʹәхте һʹакьм. 13 Ԝана гот: «Әв мәрьв щьмәʹте һин дькә, ԝәки Хԝәде нә ль гора ԛануне бьһʹәбиньн». 14 Гава Паԝлос дьхԝәст тьштәки бежә, Галийо Щьһуйарʹа гот: «Щьһуно, һәрге ви мәрьви нәһәԛи бькьра йан хьрабикә мәзьн, ԝи чахи мьне бь сәбьр гӧһ бьда ԝә. 15 Ле һәрге дәʹԝ бона хәбәра йә, нава йә, йан бона ԛануна ԝә йә, һун хԝәха сафи кьн. Әз нахԝазьм бьбьмә һʹакьме ван тьшта». 16 У әԝи әԝана жь ԝедәре дәрхьстьнә дәрва. 17 Һьнге ԝан һʹәмуйа сәрԝере кʹьниште Состенис гьртьн у пешбәри тʹәхте һʹакьм кʹӧтан. Ле ԛә хәма Галийо нибу.

18 Паԝлос чәнд рʹожа ԝедәре ма, паше хатьре хԝә жь бьра хԝәст у пе гәмийе бәрбь Сурйайе чу. Прьскила у Әкила жи тʹәви ԝи бун. Пешийа ве йәке, әԝи Кәнхерйайеда пʹорʹе хԝә кьн кьрьбу, чьмки сонд хԝарьбу. 19 Гава әԝана гьһиштьнә Әфәсе, әԝи әԝана ԝедәре һиштьн, ле хԝәха кʹәтә кʹьниште у тʹәви Щьһуйа дькʹәтә хәбәрдане. 20 Чьԛас жи ԝана һиви жь ԝи дькьр кӧ әԝ ԝәхтәкә дьреж ԝедәре бьминә, йәкә әԝ ԛайил нәбу. 21 Ле әԝи хатьре хԝә жь ԝан хԝәст у готә ԝан: «Һәрге Йаһоԝа бьхԝазә, әзе диса вәгәрʹьм бал ԝә». У әԝ пе гәмийе жь Әфәсе 22 дәрбази Ԛәйсәрйайе бу. Әԝ һьлкʹьшийа Оршәлиме у сьлав да щьвате. Паше әԝ дакʹәтә Әнтакйайе.

23 Паԝлос һьнәк ԝәхт ԝедәре ма, паше рʹе кʹәт. Әԝ һәрема Галатйа у Фьригйайеда щурʹә-щурʹә щийа дьгәрʹийа у дьле һʹәму шагьрта ԛәԝи дькьр.

24 Ԝе дәме Щьһуки бь наве Аполос, йе кӧ әʹсьле хԝәда жь Скәндәрйайе бу, һатә Әфәсе. Әԝ йәки хәбәрхԝәш бу у Ньвисаред Пироз рʹьнд заньбу. 25 Әԝ дәрһәԛа рʹийа Йаһоԝа һатьбу һинкьрьне. Бь сайа рʹӧһʹе пироз, әԝ гәләк хирәт бу у әԝи дәрһәԛа Иса рʹаст хәбәр дьда у һин дькьр. Ле занәбуна ԝи тʹәне дәрһәԛа ньхӧмандьна Йуһʹәнна бу. 26 Аполос дәстпекьр кʹьништеда бь мерхаси хәбәр дә. Гава Прьскила у Әкила хәбәрдана ԝи бьһистьн, ԝана әԝ бьрә щәм хԝә у рʹийа Хԝәде һе рʹьнд жерʹа зәлал кьрьн. 27 Аполос дьхԝәст дәрбази Ахайайе бә, ләма бьра шагьртарʹа ньвисин у һиви кьрьн, ԝәки әԝана бь дьл у щан ԝи ԛәбул кьн. Гава Аполос гьһиштә ԝедәре, әԝи гәләк али ԝан мәрьва кьр, йед кӧ бь сайа ԛәнщийа Хԝәдейә мәзьн бьбунә баԝәрмәнд. 28 Әԝи бь хирәтәкә мәзьн бәр щьмәʹте избат дькьр ԝәки һинкьрьнед Щьһуйа нәрʹаст ьн, у бь сайа Ньвисаред Пироз нишан дькьр кӧ Иса Мәсиһ ә.

19 Гава Аполос һе Корьнтʹеда бу, Паԝлос һәремед навинрʹа дәрбаз бу у һатә Әфәсе. Ԝедәре әԝи чәнд шагьрт дитьн 2 у ԝанрʹа гот: «Гава һун бунә баԝәрмәнд, ԝә рʹӧһʹе пироз станд?» Ԝана жерʹа гот: «На, мә ԛә нә жи бьһистийә ԝәки рʹӧһʹе пироз һәйә». 3 Һьнге Паԝлос гот: «Ижа һун ча һатьнә ньхӧмандьне?» Ԝана гот: «Пе ньхӧмандьна* Йуһʹәнна». 4 Паԝлос гот: «Йуһʹәнна мәрьв дьньхӧмандьн, чаԝа нишана тʹобәкьрьне. Әԝи мәрьварʹа дьгот кӧ гәрәке әԝана баԝәрийа хԝә ԝи биньн, йе кӧ пәй ԝи те, демәк Иса». 5 Гава ԝана әв йәк бьһист, бь наве Хӧдан Иса һатьнә ньхӧмандьне. 6 У гава Паԝлос дәстед хԝә данин сәр ԝан, рʹӧһʹе пироз һатә сәр ԝан. Ԝана дәстпекьр сәр зьманед хәриб хәбәр дьн у пʹехәмбәртийе бькьн. 7 Әԝана бь тʹәмами ԝәкә 12 мәрьв бун.

8 Паԝлос се мәһа дьчу кʹьниште* у бь мерхаси хәбәр дьда. Әԝи готар дьхԝәндьн у кәсед дьн дәрһәԛа Пʹадшатийа Хԝәде дьданә баԝәркьрьне. 9 Ле гава һьнәка бь сәрһʹьшки нәдьхԝәстьн баԝәр кьн* у бәр хәлԛе дәрһәԛа Рʹийа Хӧдан* хьраб хәбәр дьдан, әԝ жь нав ԝан чу, шагьрт хԝәрʹа бьрьн у һәр рʹож әԝи мәкʹтәба Тиранода готар дьхԝәндьн. 10 Әԝе йәке дӧ сала кʹьшанд, у бь ви аԝайи һʹәму кәсед кӧ һәрема Асйайеда дьжитьн, һьм Щьһуйа һьм жи Йунана хәбәра Хӧдан бьһистьн.

11 Хԝәде бәрдәԝам дькьр бь дәстед Паԝлос кʹәрәмәтед мәзьн бькә. 12 Һәла һе жи мәрьва дәстмал у шалькед Паԝлос дьбьрьнә бал кәсед нәхԝәш, әԝана ԛәнщ дьбун, у ӧса жи щьн жь ԝана дәрдькʹәтьн. 13 Ле һьнә Щьһуйед кӧ ԝан дәра дьгәрʹийан у щьн дәрдьхьстьн, ԝана жи дьхԝәст пе наве Хӧдан Иса бәри щьна дьн, у дьготьн: «Әз пе наве Иса, дәрһәԛа кʹижани Паԝлос әʹлам дькә, фәрмане дьдьмә ԝә, дәркʹәвьн». 14 Һʹәфт кӧрʹед сәроке кʹаһинед Щьһуйа, наве кʹижани Скеԝа бу, ӧса дькьрьн. 15 Ле щьн ԝанрʹа ӧса гот: «Әз Иса нас дькьм, у Паԝлос жи мьнрʹа нас ә, ле һун кʹи нә?» 16 Һьнге мәрьве щьнакʹәти, һʹьщуми сәр ԝан кьр у хԝә авитә сәр һәр йәки жь ԝан, ӧса кӧ әԝана гьшк тәʹзи у бьриндар жь ԝе мале рʹәвийан. 17 Һʹәму мәрьвед кӧ Әфәседа дьжитьн, һьм Щьһу һьм жи Йунан ве йәке пеһʹәсийан; тьрс кʹәтә дьле ԝан һʹәмуйа у наве Хӧдан Иса дьһатә рʹумәткьрьне. 18 Гәләк кәсед кӧ бунә баԝәрмәнд, дьһатьн гӧнед хԝә дьданә рʹуйе хԝә у дәрһәԛа кьред хԝә дьготьн. 19 Гәләк жь ԝан, йед кӧ сербази дькьрьн, кʹьтебед хԝә тʹоп кьрьн у бәр чʹәʹве һʹәмуйа шәԝьтандьн. Гава ԝана баһе ван кʹьтеба һʹәсаб кьр, ԛимәте ԝан 50 000 зив дәркʹәт. 20 Бь ви аԝайи, хәбәра Йаһоԝа һе зедә бәла дьбу у ԛәԝата ԝе һе мәзьн дьбу.

21 Паши ԝан ԛәԝьмандьна, Паԝлос сафи кьр ԝәки Макәдонйа у Ахайайерʹа дәрбаз бә у һәрʹә Оршәлиме. Әԝи гот: «Паши чуйина ԝедәре, әз гәрәке Рʹоме жи бьвиньм». 22 Әԝи дӧ аликʹарчийед хԝә, Тимотʹейо у Ерасто шандьнә Макәдонйайе, ле хԝәха һьнә ԝәхт Асйайеда ма.

23 Ԝи чахи жь бо Рʹийа Хӧдан* гәләк шәрʹ-дәʹԝ пешда һат. 24 Мәрьвәки зивкәр, бь наве Димитрийо һәбу, йе кӧ жь зив пʹарьстгәһед бьчʹукә Артәмисе чедькьрьн. Бь ве йәке, әԝи һостед дьнрʹа жи гәләк пʹәрә ԛазанщ дькьр. 25 Әԝи әԝ һостә у йед дьнә кӧ әв шьхӧл дькьрьн, һәв тʹоп кьрьн у гот: «Щамерно, һун рʹьнд заньн кӧ жь ви шьхӧли әм гәләк пʹәрә ԛазанщ дькьн. 26 Ньһа һун дьвиньн у дьбьһен, ԝәки әви Паԝлоси нә тʹәне Әфәседа, ле дькарьн бежьн тʹәмамийа Асйайеда ньһерʹандьна гәләк мәрьва гӧһастийә. Әԝи әԝана данә баԝәркьрьне кӧ хӧданед бь дәста чекьри, бь рʹасти хӧдан ниньн. 27 Ижа хоф һәйә ԝәки нә тʹәне шьхӧле мә ԝе беһӧрмәт бә, ле ӧса жи мәрьв ԝе пʹарьстгәһа хӧдана мәзьн Артәмис, бәр тьштәки һʹәсаб нәкьн. Бь ве йәке мәзьнайа Артәмисе, йа кӧ мәрьв тʹәмамийа Асйайеда у сәр тʹәмамийа дьнйайе ле дьһʹәбиньн, ԝе беԛәдьр бә». 28 Гава ԝана әв йәк бьһист, һерс кʹәтьн у кьрьнә ԛирʹин: «Артәмиса Әфәсийа, мәзьн ә!»

29 Бажерда тʹәвльһәвбун чебу. Һʹәму тʹәвайи кʹәтьнә тейатре, ԝана Гайос у Әристархойе Макәдони, йед кӧ рʹеԝитийа Паԝлосда тʹәви ԝи бун, хԝәрʹа кʹьшандьнә һьндӧрʹ. 30 Паԝлос һазьр бу һәрʹә һьндӧрʹ у бькʹәвә нав хәлԛе, ле шагьрта нәһишт. 31 Һәла һе һьнәк жь әндәмед комитейа щәжьна у листька жи, йед кӧ ԛәдьре ԝи дьгьртьн, хәбәрәк ԝирʹа шандьн у же рʹәща кьрьн, ԝәки әԝ хԝә нәкә хәтайе у нәкʹәвә тейатре. 32 Ԝедәре һьнәка бона тьштәки дькьрьнә ԛирʹин, һьнәкед дьн жи бона тьштәки дьн; чьмки әԝана тʹәвльһәв бун у һʹәчʹи зәʹф жь ԝана ньзаньбун чьрʹа тʹоп бунә. 33 Щьһуйа Скәндәр жь нав әʹлаләте дәрхьстьн данә пеш. Скәндәр бь дәсте хԝә нишан кьр, кӧ әԝ дьхԝазә тьштәки бежә. 34 Ле гава ԝана фәʹм кьр кӧ әԝ Щьһу йә, ԝан һʹәмуйа тʹәвайи ԝәкә дӧ сьһʹәта бь дәнгәки бьльнд дькьрьнә ԛирʹин: «Артәмиса Әфәсийа, мәзьн ә!»

35 Чахе мәзьне бажер әʹлаләт да кәрʹкьрьне, әԝи гот: «Гәли мәрьвед Әфәсе, ԛә мәрьвәк һәйә, ԝәки ньзаньбә кӧ бажаре Әфәсе, хԝәйе пʹарьстгәһа Артәмиса мәзьн ә, һʹәйкәле кʹижане жь әʹзмен һатийә хԝаре? 36 Әв тьшт найенә инкʹаркьрьне, ләма рʹьһʹәт бьн у ләз нәкʹәвьн. 37 Мәрьвед кӧ ԝә анинә вьра, нә ԛачахед пʹарьстгәһе нә у нә жи кʹьфьри ль хӧдана мә кьрьнә. 38 Ле һәрге шькийате Димитрийо у һостед дьн сәр кәсәки һәйә, бона ве йәке рʹожед диԝане у ԝәли* һәнә. Бьра ԝедәре әԝана шькийате һәвдӧ бькьн. 39 Ле һәрге һун тьштәки жь ве зедәтьр дьхԝазьн, бьра сафикьрьн сәр щьвина ԛануни бе кьрьне. 40 Жь бо тьштед кӧ иро ԛәԝьминә әм дькарьн бькʹәвьнә хәтайе у тʹәвльһәвбунеда бенә нәһәԛкьрьне, чьмки бона ве һәвтʹопбуне тʹӧ мәʹнийа мә тʹӧнә». 41 Гава әԝи әв йәк гот, щьвин жь һәв бәла кьр.

20 Гава тʹәвльһәвбун сәкьни, Паԝлос шандә пәй шагьрта у чахе әԝи дьле ԝан ԛәԝи кьр у хатьре хԝә жь ԝан хԝәст, чу Макәдонйайе. 2 Әԝ ԝан һәремада дьгәрʹийа у дьле шагьртед ԝедәре ԛәԝи дькьр. Паше әԝ һатә Йунаньстане, 3 у се мәһа ԝедәре ма. Әԝи дьхԝәст пе гәмийе дәрбази Сурйайе бә, ле чьмки Щьһуйа дьхԝәст ԝи бькӧжьн, әԝи сафи кьр Макәдонйайерʹа вәгәрʹә. 4 Тʹәви ԝи әв кәс бун: Сопатройе кӧрʹе Пиру жь Бәройайе, Әристархо у Секундо жь Тʹесалоникийе, Гайос жь Дербәйе, Тимотʹейо, ӧса жи Тьхико у Трофимо жь Асйайе. 5 Әв мәрьв пешийа мә чун у Троаседа һивийа мә бун. 6 Ле әм паши рʹожед Щәжьна Нане Шкәва* жь Филипйайе пе гәмийе рʹе кʹәтьн у пәй пенщ рʹожарʹа һатьнә бал ԝан Троаседа. Әм һʹәфт рʹожа ԝедәре ман.

7 Рʹожа һʹәфтийейә пешьн, гава әм тʹоп бун кӧ тʹәвайи хԝарьне бьхԝьн, Паԝлос дәстпекьр хәбәр дә, чьмки әԝ гәрәке рʹожа дьн бьчуйа. Хәбәрдана ԝи һʹәта ниве шәве кʹьшанд. 8 Отʹаха жорьнда, кʹидәре әм тʹоп бьбун, гәләк чʹьра вехьсти бун. 9 Һе Паԝлос хәбәр дьда, хортәки бь наве Әйтухо, сәр пʹәнщәре рʹуньшти бу, кʹәтә хәԝәкә кʹур у жь ԛате сьсийа кʹәт. Чахе незики ԝи бун, әԝ мьри бу. 10 Паԝлос чу жере, хԝә сәрда ԛуз кьр, әԝ да һʹәмеза хԝә у гот: «Рʹьһʹәт бьн, чьмки әԝ сах ә».* 11 Паше Паԝлос чу жоре, нан кәр кьр* у хԝар. Әԝи дьреж һʹәта бәрбанге тʹәви ԝан хәбәр дьда у паше жь ԝедәре чу. 12 Ԝана гәдә сах-сьламәт тʹәви хԝә бьр, у беһʹәсаб дьлбини стандьн.

13 Әм кʹәтьнә гәмийе у чунә Асосе, ле Паԝлос һʹәта ԝедәре пʹийа чу. Әԝи мәрʹа готьбу кӧ әм гәрәке ԝи жь ԝедәре хԝәрʹа бьвьн. 14 Әԝ Асоседа рʹасти мә һат, мә әԝ тʹәви хԝә кьрә гәмийе у әм чунә Мьтулане. 15 Рʹожа дьн әм пе гәмийе жь ԝедәре чунә Хийойе. Рʹожәк шунда әм чунә Самосе, у рʹожа дьн әм гьһиштьнә Миләтосе. 16 Паԝлос сафи кьр бәр Әфәсерʹа дәрбаз бә, ԝәки Асйайеда нәминә. Чьмки әԝи дьхԝәст зу һәрʹә Оршәлиме, сәва кӧ рʹожа Пенщийе Һʹәсабе ԝедәре бә.

17 Жь Миләтосе әԝи хәбәрәк шандә Әфәсе кӧ гази рʹуспийед щьвате кә. 18 Гава әԝана гьһиштьнә щәм ԝи, Паԝлос ԝанрʹа гот: «Һун рʹьнд заньн ԝәки жь рʹожа кӧ әз һатьмә Асйайе, рʹабун-рʹуньштьна мьн чаԝа бу. 19 Мьн бь мьлукти у бь һесьра Хӧданрʹа хьзмәт кьр, нава ԝан тәнгасийед кӧ Щьһуйа анинә сәре мьн. 20 Мьн хԝә паш нәхьст, ԝәки һәр тьштед керһати* ԝәрʹа бежьм. У мьн бәр хәлԛе, һьм жи мал бь мал, һун һин дькьрьн. 21 Мьн һьм Щьһуйарʹа, һьм жи Йунанарʹа бь щурʹәки баш шәʹдәти да ԝәки әԝана тʹобә кьн, Хԝәде бьгәрʹьн у Хӧдан Иса баԝәр кьн. 22 У ньһа әз бь рʹебәрийа рʹӧһʹе пироз дьчьмә Оршәлиме, ле ньзаньм ԝедәре чь ԝе бе сәре мьн. 23 Әз тʹәне заньм кӧ рʹӧһʹе пироз һәр бажарида мьнрʹа дьбежә, кӧ кәла у тәнгаси һивийа мьн ьн. 24 Әз накʹәвьм һʹәйра әʹмьре хԝә, ле хԝәстьна мьн тʹәне әв ә, ԝәки әз һʹәта хьлазийе ләщмәйдана хԝәда бьрʹәвьм у хьзмәтийа кӧ мьн жь Хӧдан Иса стандийә, биньм сери, демәк мьзгинийа дәрһәԛа ԛәнщийа Хԝәдейә мәзьн бәла кьм.

25 Әз заньм кӧ һуне, кʹижанарʹа мьн дәрһәԛа Пʹадшатийа Хԝәде гьли кьрийә, ида тʹӧ щар рʹуйе мьн нәвиньн. 26 Ләма әз иро ԝәрʹа шәʹдәтийе дьдьм, кӧ хуна тʹӧ кәси сәр стийе мьн нинә. 27 Чьмки мьн хԝә паш нәхьстийә жь ве йәке, кӧ дәрһәԛа ԛьрара Хԝәде ԝәрʹа гьли кьм. 28 Һаж хԝә у һаж тʹәмамийа кәрийе Хԝәде һәбьн. Рʹӧһʹе пироз һун ча бәрпьрсийар кʹьфш кьрьнә, ԝәки шьвантийа щьвата Хԝәде бькьн, йа кӧ әԝи бь хуна Кӧрʹе хԝә кʹьрʹийә. 29 Әз заньм кӧ паши чуйина мьн, гӧред һар ԝе бькʹәвьнә нава ԝә у ԝе һьндава кәрида берʹәʹм бьн. 30 Нава ԝәда жи ԝе һьнә мәрьв дәркʹәвьн у һинкьрьнед хельф бәла кьн, ԝәки шагьрта пәй хԝә бьвьн.

31 Ләма һʹьшйар бьминьн у бир нәкьн кӧ се сала мьн шәв у рʹож, һәртʹьм һәр йәк жь ԝә бь һесьра ширәт дькьр. 32 У ньһа әз ԝә тʹәсмили Хԝәде у хәбәра дәрһәԛа ԛәнщийа ԝийә мәзьн дькьм. Әв хәбәр дькарә ԝә ԛәԝи кә у мьлкʹе кӧ һʹәму пирозарʹа ԝе бе дайине, бьдә ԝә. 33 Чʹәʹвед мьн сәр зив, зерʹ, йан жи сәр кʹьнщед кәсәки нибунә. 34 Һун хԝәха заньн ԝәки мьн һьм бона һʹәԝщед хԝә, һьм жи бона һʹәԝщед кәсед кӧ тʹәви мьн бун, хәм дькьр. 35 Мьн пе рʹабун-рʹуньштьна хԝә нишани ԝә кьр, кӧ ча бьхәбьтьн, аликʹарийе бьдьнә кәсед сьст у әԝ готьнед Хӧдан Иса бир нәкьн: ‹Бәхтәԝари һе зедә дайинеда йә, нә кӧ стандьнеда›».

36 Гава әԝи әв тьшт готьн, тʹәви һʹәмуйа кʹәтә сәр чока у дӧа кьр. 37 Һьнге гьшк гьрийан. Ԝана Паԝлос һʹәмез дькьр* у ле пачʹ дькьрьн, 38 чьмки әԝана гәләк хәмгин бун илаһи жь бо ван гьлийа, кӧ әԝи гот ԝәки әԝана ԝе ида тʹӧ щар рʹуйе ԝи нәвиньн. Паше ԝана әԝ һʹәта гәмийе вәрʹекьрьн.

21 Гава әм жь ԝана вәԛәтийан у пе гәмийе рʹе кʹәтьн, әм рʹастә-рʹаст чунә Косе. Рʹожа дьн әм чунә Рʹодосе, у жь ԝедәре һʹәта Патарайе чун. 2 Чахе мә гәмик дит, йа кӧ дьчу алийе Финикйайе, әм кʹәтьнә гәмийе у чун. 3 Гава гьрава Кипрусе хӧйа дьбу, мә әԝ алийе чʹәпе һишт, у чунә алийе Сурйайе. Әм ль Суре сәкьнин, сәва кӧ баре гәмийе ԝедәре бе валакьрьне. 4 Мә шагьрт дьгәрʹийан у мә әԝана дитьн, у әм һʹәфт рʹожа ԝедәре ман. Ԝана бь рʹебәрийа рʹӧһʹ бәрдәԝам дькьр Паԝлосрʹа бежьн, ԝәки әԝ нәчә Оршәлиме. 5 Гава ԝәʹде мә һат, әм дәркʹәтьн у рʹе кʹәтьн. Һʹәмуйа тʹәви жьн у зарʹа, әм һʹәта бажер дәр вәрʹекьрьн. Бәр бәʹре, әм кʹәтьнә сәр чока, мә дӧа кьр 6 у мә хатьре хԝә жь һәвдӧ хԝәст. Паше әм кʹәтьнә гәмийе, у әԝана жи вәгәрʹийанә малед хԝә.

7 Жь Суре әм чунә Птолемайе. Мә бьра сьлав кьрьн у әм рʹожәке тʹәви ԝан ман. 8 Рʹожа дьн әм жь ԝедәре дәркʹәтьн у һатьнә Ԛәйсәрйайе. Әм чунә мала Филипойе мьзгинван, йе кӧ йәк жь ԝан һʹәфт бьра бу, кʹижан кӧ һатьбун бьжартьне, у әм щәм ԝи ман. 9 Чар ԛизед Филипо һәбун. Әԝана бькʹьр бун у пʹехәмбәрти дькьрьн. 10 Ле чахе әм гәләк рʹож ԝедәре ман, пʹехәмбәрәки бь наве Һагабо жь Щьһустане бәржер бу. 11 Әԝ һатә бал мә, ԛайиша Паԝлос һьлда, дәст-ньгед хԝә гьреда у гот: «Рʹӧһʹе пироз ӧса дьбежә: ‹Оршәлимеда, Щьһу ԝе хԝәйе ве ԛайише ви щурʹәйи гьредьн у бьдьнә дәсте мьләтед дьн›». 12 Гава мә әв йәк бьһист, мә у бьред кӧ ԝедәре бун жь Паԝлос рʹәща кьрьн, кӧ әԝ нәчә Оршәлиме. 13 Һьнге Паԝлос гот: «Һун чь дькьн? Һун чьма дьгьрин у дьле мьн дьшкеньн? Әз һазьр ьм нә тʹәне бемә гьредане, ле бона хатьре наве Хӧдан Иса, Оршәлимеда бьмьрьм жи». 14 Гава мә дит кӧ әм нькарьн ньһерʹандьна ԝи бьгӧһезьн, әм ле вәгәрʹийан* у мә гот: «Бьра ԛьрара Йаһоԝа бе сери».

15 Пәй ԝан рʹожарʹа, мә хԝә бона рʹеԝитийе һазьр кьр у бәре хԝә да Оршәлиме. 16 Һьнә шагьртед жь Ԛәйсәрйайе жи тʹәви мә һатьн. Ԝана әм анинә мала Мьнасойе Кипруси, йе кӧ йәк жь шагьртед пешьн бу, у әм бунә меванед ԝи. 17 Гава әм гьһиштьнә Оршәлиме, бьра әм бь дьлгәрми ԛәбул кьрьн. 18 Рʹожа дьн, Паԝлос тʹәви мә чу бал Аԛуб, у һʹәму рʹуспи жи ԝедәре бун. 19 Паԝлос сьлав да ԝан у һур бь һур гьли кьр, кӧ Хԝәде бь хьзмәтийа ԝи нава мьләтед дьнда чь кьр.

20 Гава ԝана әв тьшт бьһист, дәстпекьрьн пәсьне Хԝәде бьдьн у Паԝлосрʹа готьн: «Бьре мә, тӧ дьвини кӧ нав Щьһуйада бь һʹәзара баԝәрмәнд һәнә, у әԝана һʹәмушк жи Ԛануне хԝәй дькьн. 21 Ле ԝана дәрһәԛа тә бьһистийә, кӧ тӧ һʹәму Щьһуйед нав мьләтед дьнда һин дьки, ԝәки әԝана Ԛануна Муса бьһельн. У тӧ дьбежи ԝәки әԝана кӧрʹед хԝә сьнәт нәкьн у хԝә ль әʹдәта нәгьрьн. 22 Ижа әм чь бькьн? Әԝана ԝе әʹсәйи пебьһʹәсьн кӧ тӧ һати. 23 Ләма жи әм тәрʹа ча дьбежьн ӧса бькә: Чар мәрьв бал мә һәнә, йед кӧ Хԝәдерʹа сонд хԝарьнә. 24 Ван мәрьва тʹәви хԝә бьвә у ль гора әʹдәт, хԝә тʹәви ԝан паԛьж кә. Хәрщед ԝан бьдә, ԝәки әԝана пʹорʹед хԝә кӧрʹ кьн. Һьнге һәр кәс ԝе бьзаньбә ԝәки тьштед кӧ дәрһәԛа тә һатьнә готьне, нәрʹаст ьн у тӧ диса хԝә ль Ԛануне дьгьри. 25 Ле бона баԝәрмәндед жь мьләтед дьн, мә сафикьрьна хԝә ньвиси у шанд ԝәки әԝана гәрәке жь тьштед кӧ пʹутарʹа һатьнә ԛӧрбанкьрьне, жь хуне, жь гоште һʹәйԝанед мьрар* у жь зьнекʹарийе,* хԝә дур бьгьрьн».

26 Рʹожа дьн, Паԝлос әԝ мәрьв тʹәви хԝә бьрьн у ль гора әʹдәт хԝә тʹәви ԝан паԛьж кьр. Паше әԝ кʹәтә пʹарьстгәһе кӧ бежә, ԝәки рʹожед паԛьжкьрьна ль гора әʹдәт ԝе кʹәнге хьлаз бьн, сәва кӧ бона ԝан һәр йәки ԛӧрбан бе дайине.

27 Гава һʹәфт рʹож ида ԝе тʹәмам буна, Щьһуйед жь Асйайе Паԝлос пʹарьстгәһеда дитьн, у хәлԛ мьԛабьли ԝи рʹакьрьн. Ԝана әԝ гьрт 28 у бь дәнгәки бьльнд дьготьн: «Исраелино, али мә бькьн! Әв мәрьв һʹәму дәра нав хәлԛеда һинкьрьнед ӧса бәла дькә, кʹижан кӧ мьԛабьли щьмәʹта мә, Ԛануна мә, у ви щийи нә. Әԝи һәла һе Йунан жи анинә пʹарьстгәһе у әв щийе пироз һʹәрʹьмандийә». 29 Жь бо ԝе йәке кӧ ԝана бәре Трофимойе Әфәси бажерда тʹәви Паԝлос дитьбун, фькьрин ԝәки Паԝлос әԝ тʹәви хԝә бьрийә пʹарьстгәһе. 30 Тʹәмамийа бажер тʹәвльһәв бу. Хәлԛ тʹәвайи бь ләз рʹәвин чун, Паԝлос гьртьн, жь пʹарьстгәһе дәрхьстьн, у перʹа-перʹа дәри һатьнә гьртьне. 31 Гава ԝана дьхԝәст ԝи бькӧжьн, хәбәр гьһиштә сәроке әскәра, ԝәки тʹәмамийа Оршәлиме тʹәвльһәв буйә. 32 У әԝи дәрберʹа тʹәви хԝә әскәр у сәрсәд бьрьн, у чунә бал хәлԛе. Гава ԝана сәроке әскәра у әскәр дитьн, ида Паԝлос нәхьстьн.

33 Һьнге сәроке әскәра незик бу у Паԝлос да гьртьне. Әԝи фәрман да ԝәки дәстед ԝи бь дӧ зьнщира бенә гьредане. Паше әԝи же пьрси, кӧ әԝ кʹи йә у чь кьрийә. 34 Ле хәлԛе дькьрә ԛирʹин, һьнәка тьштәк дьготьн, һьнәка жи тьштәки дьн дьготьн. Сәроке әскәра жь бо ве тʹәвльһәвбуне нькарьбу фәʹм кьра кӧ чь ԛәԝьмийә. Ләма әԝи фәрман да, ԝәки Паԝлос бьвьнә әскәрхане. 35 Гава Паԝлос гьһиштә бәр пʹепәлунга, әскәра әԝ һьлбьрʹьн у ӧса бьрьн, чьмки щьмәʹте дьхԝәст зийан бьда ԝи. 36 Гәләк мәрьв пәй ԝан дьһатьн у бь дәнгәки бьльнд дьготьн: «Ԝи бькӧжьн!»

37 Гава Паԝлос дьбьрьн әскәрхане, әԝи жь сәроке әскәра пьрси: «Изьн ә әз тьштәки тәрʹа бежьм?» Әԝи гот: «Тӧ Йунани зани? 38 Тӧ әв мәрьве Мьсьри нини, йе кӧ һьнә ԝәхт пешда, шәрʹ-дәʹԝ пешда ани у 4 000 меркӧж бьрә бәрʹийе?» 39 Һьнге Паԝлос гот: «На, әз Щьһу мә у жь Тарсуса Киликйайе мә. Әз бажарване бажарәки навдар ьм. Ләма әз рʹәща дькьм, изьне бьдә мьн, ԝәки әз щьмәʹтерʹа хәбәр дьм». 40 Чахе сәроке әскәра изьн да Паԝлос, әԝ сәр пʹепәлунга сәкьни, у бь дәсте хԝә щьмәʹтерʹа нишан кьр ԝәки хԝә кәрʹ кьн. Гава щьмәʹте хԝә кәрʹ кьр, әԝи бь зьмане Ибрани ԝанрʹа гот:

22 «Гәли бав у бьрано, гӧһ бьдьнә мьн һәла әз дьхԝазьм бона пʹарастьна хԝә чь бежьм». 2 Гава щьмәʹте бьһист кӧ Паԝлос сәр зьмане Ибрани хәбәр дьдә, дьһа хԝә кәрʹ кьрьн, у әԝи гот: 3 «Әз мәрьвәки Щьһу мә у Тарсуса Киликйайеда һатьмә буйине. Ле ви бажарида әз щәм Гамалйел һатьмә һинкьрьне. У әз ӧса һатьмә һинкьрьне, ԝәки һур бь һур хԝә ль Ԛануна кал-бава бьгьрьм. Мьн Хԝәдерʹа ӧса бь хирәт хьзмәт дькьр, чаԝа һун иро. 4 Әз пәй ԝан мәрьва дькʹәтьм, йед кӧ сәр Рʹийа Хӧдан* бун у мьн һәла һе әԝана дькӧштьн жи. Мьн һьм мер, һьм жи кʹӧлфәт дьгьртьн у давитьнә кәле. 5 Кʹаһине мәзьн у тʹәмамийа щьвина рʹуспийа дькарьн шәʹдәтийа ве йәке бьдьн. Мьн жь ԝана ӧса жи нәʹмә бона бьред Шамеда стандьн, у әз рʹе кʹәтьм чум, кӧ йед ԝедәре бь зьнщира бьгьрьм у биньм Оршәлиме, ԝәки әԝана бенә щәзакьрьне.

6 Ле гава әз һе рʹеда бум у незики Шаме дьбум, нивро, ньшкева жь әʹзмен рʹонайикә мәзьн дора мьн шәԝԛ да. 7 Әз кʹәтьмә сәр әʹрде у мьн дәнгәк бьһист, кӧ мьнрʹа гот: ‹Шаԝул, Шаԝул, тӧ чьрʹа мьн дьзерини?› 8 Мьн гот: ‹Хӧдан тӧ кʹи йи?› У әԝи мьнрʹа гот: ‹Әз Исайе Ньсрәти мә, кʹижани тӧ дьзерини›. 9 Мәрьвед кӧ тʹәви мьн бун, ԝана рʹонайи дит, ле дәнге кӧ мьнрʹа хәбәр дьда нәбьһистьн. 10 Һьнге мьн гот: ‹Хӧдан, әз чь бькьм?› Хӧдан мьнрʹа гот: ‹Рʹабә һәрʹә Шаме, у ԝедәре ԝе тәрʹа бе готьне кӧ тӧ чь бьки›. 11 Ле жь бо шәԝԛа ве рʹонайе мьн тьштәк нәдьдит. Кәсед кӧ тʹәви мьн бун, дәсте мьн гьртьн у әз бьрьмә Шаме.

12 Шамеда мәрьвәки баԝәрмәнд бь наве Һананийа һәбу, йе кӧ хԝә ль Ԛануне дьгьрт, у Щьһуйед ԝедәре дәрһәԛа ԝи баш хәбәр дьдан. 13 Әԝ һатә бал мьн, бәр мьн сәкьни у гот: ‹Шаԝул, бьре мьн, бьра чʹәʹвед тә вәбьн!› Перʹа-перʹа чʹәʹвед мьн вәбун, у мьн әԝ дит. 14 Һананийа гот: ‹Хԝәдайе кал-бавед мә тӧ бьжарти, ԝәки тӧ ԛьрара ԝи бьзаньби, Йе Рʹаст* бьвини у дәнге ԝи бьбьһейи. 15 Чьмки тӧйе бьби шәʹде ԝи, у тьштед кӧ тә дитьнә у бьһистьнә, һʹәму мәрьварʹа бежи. 16 Ижа чь рʹийа тә дьгьрә? Рʹабә, ԝәрә ньхӧмандьне* у гази наве Иса бькә, ԝәки гӧнед тә бенә шуштьне›.

17 Гава әз вәгәрʹийамә Оршәлиме у мьн пʹарьстгәһеда дӧа дькьр, һьнге мьн дитьнокәк дит. 18 Хӧдан мьнрʹа гот: ‹Ләз кʹәвә у жь Оршәлиме дәре, чьмки әԝана ԝе шәʹдәтийа тә дәрһәԛа мьн ԛәбул нәкьн›. 19 Мьн жи гот: ‹Хӧдан, һәр кәс рʹьнд занә ԝәки мьн һәр кʹьништәкеда,* йед кӧ баԝәрийа хԝә тә дьанин, дькʹӧтан у давитьнә кәле. 20 У гава хуна шәʹде тә Стәйфан һатә рʹетьне, әз ԝедәре сәкьни бум у кӧштьна ԝирʹа рʹази бум. У мьн нобәдарийа кʹьнщед ԝан мәрийа дькьр, йед кӧ әԝ кӧштьн›. 21 Ле диса жи Хӧдан мьнрʹа гот: ‹Һәрʹә, чьмки әзе тә бьшиньм щийед дур бал мьләтед дьн›».

22 Һʹәта ԝан гьлийа щьмәʹте гӧһ дьда Паԝлос, ле паше ԝана бь дәнгәки бьльнд гот: «Ви мәрьви рʹубари дьне нәһельн! Әԝ һежа нинә бьжи!» 23 Ԝана дькьрә ԛирʹин, кʹьнщед хԝә давитьнә әʹрде у тʹоз рʹадькьрьн, 24 ләма жи сәроке әскәра фәрман да, кӧ Паԝлос бьвьнә әскәрхане, ԝи бьдьнә бәр ԛамчийа у пьрса бьдьне. Әԝи дьхԝәст фәʹм кьра, кӧ щьмәʹт чьма дькә ԛирʹин у мьрьна Паԝлос дьхԝазә. 25 Ле гава Паԝлос гьредан ԝәки бьдьнә бәр ԛамчийа, әԝи сәрсәдрʹа кӧ ԝедәре сәкьни бу, гот: «Изьна ԝә һәйә кӧ бажарване Рʹоме бейи диԝане бьдьнә бәр ԛамчийа?» 26 Гава сәрсәд әв йәк бьһист, чу бал сәроке әскәра кӧ ве хәбәре бьгьһинә ԝи, у же пьрси: «Тӧйе ньһа чь бьки? Әв мәрьв бажарване Рʹоме йә». 27 Һьнге сәроке әскәра чу бал Паԝлос у же пьрси: «Һәла бежә, тӧ бажарване Рʹоме йи?» Әԝи гот: «Әре». 28 Сәроке әскәра гот: «Мьн бь гәләк пʹәра әв бажарванти стандийә». Паԝлос жи гот: «Ле мьн жь буйина хԝә әв стандийә».

29 Дәрберʹа мәрьвед кӧ гәрәке ԝи хьстана у әԝ бьдана бәр пьрса, жь ԝи дур кʹәтьн. Сәроке әскәра чахе фәʹм кьр кӧ Паԝлос бажарване Рʹоме йә, у әԝи әԝ бь зьнщира гьредайә, тьрс кʹәтә дьле ԝи.

30 Рʹожа дьн, жь бо ԝе йәке кӧ сәроке әскәра хԝәст бьзаньбә, кӧ Щьһуйа чьрʹа Паԝлос сущдар дькьрьн, әԝи зьнщиред ԝи данә вәкьрьне у фәрман да, ԝәки сәрокед кʹаһина у Диԝана Бьльнд йа Щьһуйа* ль һәв тʹоп бьн. Һьнге әԝи Паԝлос ани у бәр ԝан да сәкьнандьне.

23 Паԝлос Диԝана Бьльнд йа Щьһуйа* ньһерʹи у гот: «Бьрано, һʹәта рʹожа иро исафа мьн бәр Хԝәде тʹәмьз ә». 2 Һьнге кʹаһине мәзьн Һананийа фәрман да ԝан, йед кӧ незики Паԝлос сәкьни бун, ԝәки дәве ԝи хьн. 3 Паԝлос жи ԝирʹа гот: «Диԝаре сьпикьри,* Хԝәде жи ԝе тә хә! Тӧ вьра рʹуньшти йи ԝәки ль гора Ԛануне диԝана мьн бьки, ле тӧ хԝәха мьԛабьли Ԛануне фәрмане дьди кӧ ль мьн хьн». 4 Йед кӧ кʹеләка ԝи сәкьни бун, готьн: «Тӧ кʹаһине мәзьн йе Хԝәде беһӧрмәт дьки?» 5 Паԝлос жи гот: «Бьрано, мьн ньзаньбу кӧ әԝ кʹаһине мәзьн ә. Чаԝа кӧ һатийә ньвисаре: ‹Сәрԝере мьләте хԝә беһӧрмәт нәкә›».

6 Жь бо ԝе йәке кӧ Паԝлос заньбу ԝәки һьнәк жь Диԝана Бьльнд йа Щьһуйа Садуԛи нә у һьнәк жи Ферьси нә, әԝи бь дәнгәки бьльнд гот: «Бьрано, әз Ферьси мә, у кӧрʹе Ферьсийа мә. Әз рʹабуна мьрийа баԝәр дькьм, ләма диԝана мьн дькьн». 7 Бона ԝан гьлийа нава Ферьси у Садуԛийада дәʹԝ-доз пешда һат, у дӧтирәти кʹәтә нава щьвине. 8 Чьмки Садуԛи дьбежьн кӧ нә рʹабуна мьрийа һәйә, нә мәләк һәнә у нә жи рʹӧһʹ, ле Ферьси ван һʹәму тьшта баԝәр дькьн. 9 Һьнге щьмәʹте дәстпекьр бькә ԛарʹә-ԛарʹ, у һьнә ԛанунзанед Ферьси рʹабун һерсә-һерс готьн: «Әм ви мәрьвида тʹӧ сущи навиньн, ле һәрге рʹӧһʹәки йан мәләкәки ԝирʹа хәбәр дайә . . .». 10 Гава дәʹԝ-доз дьһа зедә бу, сәроке әскәра тьрсийа кӧ Паԝлос жь дәсте хәлԛе бе кӧштьне. Ләма әԝи фәрман да әскәра, кӧ әԝана ԝи жь нав хәлԛе дәрхьн у бьвьн әскәрхане.

11 Ԝе шәве Хӧдан бәр ԝи хӧйа бу у гот: «Мерхас бә! Чаԝа кӧ тә Оршәлимеда рʹьнд дәрһәԛа мьн шәʹдәти да, тӧйе Рʹомеда жи дәрһәԛа мьн шәʹдәтийе бьди».

12 Гава бу рʹож, Щьһуйа нав хԝәда сонд хԝарьн ԝәки ньфьрʹ ль ԝан бә, һәрге әԝана тьштәки бьхԝьн йан вәхԝьн һʹәта Паԝлос нәкӧжьн. 13 Һәжмара кәсед кӧ сонд хԝарьбун жь 40 мәрьви зедәтьр бун. 14 Әв мәрьв чунә бал сәрокед кʹаһина у рʹуспийа у готьн: «Мә сонд хԝарийә у мә гот кӧ ньфьрʹ ль мә бә, һәрге әм тьштәки бьхԝьн йан вәхԝьн, һʹәта кӧ Паԝлос нәкӧжьн. 15 Ләма һун гәрәке тʹәви Диԝана Бьльнд йа Щьһуйа, жь сәроке әскәра һиви кьн, ԝәки әԝ Паԝлос бинә бал ԝә. Бьра ӧса бе кʹьфше, йанчь һун дьхԝазьн дәрһәԛа ԝи һәр тьшти һе рʹаст пебьһʹәсьн. Ле пешийа кӧ әԝ бьгьһижә вьра, әме ԝи бькӧжьн».

16 Гава кӧрʹе хушка Паԝлос пеһʹәсийа кӧ ԝана тʹәльк дани ԝәки Паԝлос бькӧжьн, әԝ чу әскәрхане у әв хәбәр гиһандә Паԝлос. 17 Һьнге Паԝлос гази сәрсәдәки кьр у жерʹа гот: «Ви хорти бьвә бал сәроке әскәра, чьмки әԝ дьхԝазә тьштәки ԝирʹа бежә». 18 Әԝи жи әԝ бьрә бал сәроке әскәра у гот: «Паԝлосе гьрти гази мьн кьр у жь мьн һиви кьр, ԝәки әз ви хорти биньм бал тә, чьмки әԝ дьхԝазә тьштәки тәрʹа бежә». 19 Сәроке әскәра дәсте ви хорти гьрт, әԝ бьрә алики у же пьрси: «Тӧ чь дьхԝази мьнрʹа бежи?» 20 Әԝи гот: «Щьһуйа нав хԝәда сафи кьрьнә кӧ жь тә һиви кьн, ԝәки тӧ сьбе Паԝлос бини бәр Диԝана Бьльнд йа Щьһуйа, йанчь әԝана дьхԝазьн дәрһәԛа ԝи һәр тьшти һе рʹаст пебьһʹәсьн. 21 Ле тӧ ԝана баԝәр нәкә, чьмки жь нав ԝан 40 мәрьви зедәтьр Паԝлосрʹа тʹәльк данинә. Ԝана сонд хԝарийә кӧ ньфьрʹ ль ԝан бә, һәрге әԝана тьштәки бьхԝьн йан вәхԝьн, һʹәта кӧ Паԝлос нәкӧжьн. Әԝана ньһа һазьр ьн у һивийа сафикьрьна тә нә». 22 Һьнге сәроке әскәра ви хортирʹа гот: «Тьштед кӧ тә мьнрʹа готьнә, тʹӧ кәсирʹа нәбежә», у паше әԝи әԝ бәрʹда.

23 Әԝи гази дӧ сәрсәда кьр у ԝанрʹа гот: «Һазьр кьн 200 әскәра, 70 сийара у 200 рʹьмдара. Бьра әԝана ишәв незики сьһʹәта нәһа* һәрʹьнә Ԛәйсәрйайе. 24 Хенщи ԝе йәке, бона Паԝлос һәспа һазьр кьн, ԝәки әԝ сах-сьламәт бьгьһижә щәм Фәликсе ԝәли». 25 Сәроке әскәра һьм жи нәʹмәкә ӧса ньвиси:

26 «Әз, Клаԝдйо Лусйо, сьлав ль тә Фәликсе Ԝәлийе Хԝәйиԛәдьр дькьм! 27 Щьһуйа әв мәрьв гьртьн у һьндьк мабу әԝ бьһата кӧштьне. Ле әз тʹәви әскәред хԝә зу һатьм һәԝара ԝи, чьмки мьн бьһист кӧ әԝ бажарване Рʹоме йә. 28 Мьн дьхԝәст пебьһʹәсийама кӧ Щьһу чьда ԝи нәһәԛ дькьн, ләма мьн әԝ шандә бал Диԝана Бьльнд йа Щьһуйа. 29 Мьн фәʹм кьр кӧ әԝ жь бо пьрсед кӧ Ԛануна ԝанва гьредайи нә, һатә сущдаркьрьне. Ле әз тʹӧ сәбәби навиньм ԝәки әԝ һежайи кӧштьне, йан гьртьне йә. 30 У чьмки мьнрʹа һатә готьне кӧ Щьһуйа тʹәльк данинә, ԝәки ԝи бьдьнә кӧштьне, мьн әԝ перʹа-перʹа шандә бал тә. Мьн готә кәсед кӧ шькийате ԝи дькьн, ԝәки чь дьхԝазьн мьԛабьли ԝи бежьн, бәр тә бежьн».

31 Чаԝа кӧ әскәрарʹа фәрман һатьбу дайине, ԝана шәв Паԝлос бьрьн Әнтипәтрисе. 32 Рʹожа дьн ԝана сийар тʹәви Паԝлос шандьн, ле хԝәха вәгәрʹийанә әскәрхане. 33 Чахе әԝана гьһиштьнә Ԛәйсәрйайе, сийара нәʹмә гиһандьнә ԝәли у Паԝлос данә дәсте ԝи. 34 Ԝәли нәʹмә хԝәнд у жь Паԝлос пьрси, кӧ әԝ жь кʹижан һәреме йә. Гава әԝ пеһʹәсийа кӧ Паԝлос жь Киликйайе йә, 35 гот: «Чахе кәсед кӧ шькийате тә дькьн бенә вьра, әзе гӧһ бьдьмә тә». У әԝи фәрман да кӧ Паԝлос ԛәсьра Һеродәсда бьн нобәдарийеда бьминә.

24 Паши пенщ рʹожа, кʹаһине мәзьн Һананийа тʹәви чәнд рʹуспийа у готарванәки* наве кʹижани Тәртуло бу, һат. Ԝана ԝәлирʹа шькийатед Паԝлос кьрьн. 2 Гава гази Тәртуло кьрьн, әԝи бь ван гьлийа дәстпекьр шькийате Паԝлос бькә:

«Йа Фәликсе Хԝәйиԛәдьр, бь сайа тә әм әʹдьлайеда дьжин, у чьмки тӧ бь сәрԝахтийе сәрԝертийе дьки, әв мьләт пешда дьчә! 3 Әм һәртʹьм у һʹәму дәра ве йәке бь шькьрдарикә мәзьн ԛәбул дькьн. 4 Ле сәва кӧ әз сәре тә зедә нәешиньм, әме кьн гьлийед хԝә тәрʹа бежьн, у һиви дькьм жь кʹәрәма хԝә гӧһ бьдә мә. 5 Мә фәʹм кьр кӧ әв мәрьв хәта йә, у тʹәвльһәвбуне дькә нав һʹәму Щьһуйед сәр тʹәмамийа дьнйайе. Әԝ сәроке кʹома Ньсрәтийа йә.* 6 Әԝи ӧса жи дьхԝәст пʹарьстгәһе һʹәрам кә, ләма мә әԝ гьрт. 7* —— 8 Һәрге тӧ жь ԝи бьпьрси, те хԝәха бькарьби жь ԝи һәр тьшти бьзаньби, һәла бона чь әм шькийате ԝи дькьн».

9 Щьһу жи бь ве сущдаркьрьне рʹази бун у готьн, кӧ әв һʹәму тьшт рʹаст ьн. 10 Ԝәли нишан да Паԝлос кӧ хәбәр дә, у әԝи щаб да:

«Әз заньм кӧ гәләк сал ьн тӧ һʹакьме ви мьләти йи, әзе жи бь рʹәзәдьли бона хԝә щаба хԝә бьдьм. 11 Чаԝа кӧ тӧ хԝәха дькари тедәрхи, ԝәкә 12 рʹож пешда әз бона һʹәбандьне һатьмә Оршәлиме. 12 Тʹӧ кәси нәдитийә кӧ әз пʹарьстгәһеда кәсәкирʹа кʹәтьмә дәʹԝе, йан кʹьништеда* йан жи бажерда нав хәлԛеда тʹәвльһәвбун пешда анийә. 13 У ньһа жи әԝана нькарьн гьлийед хԝә избат кьн, кӧ чьда мьн нәһәԛ дькьн. 14 Ле әз тиньм сәр хԝә, ԝәки чь кӧ әԝана һʹәсаб дькьн ча кʹома Ньсрәтийа, хьзмәтийа мьнә пироз ә, кʹижан кӧ әз Хԝәдайе кал-бавед хԝәрʹа тиньм сери. У һʹәму тьштед кӧ Ԛанунеда у Ньвисаред Пʹехәмбәрада ньвиси нә, әз баԝәр дькьм. 15 Әз Хԝәдеда гӧман ьм, чаԝа әԝана жи, ԝәки һʹәму кәсед рʹаст у нәрʹаст ԝе жь мьрьне рʹабьн. У гӧмана ԝан мәрьва жи, ӧса нә. 16 Жь бо ве йәке әз һәртʹьм хирәт дькьм, кӧ исафа мьн бәр Хԝәде у мәрьва тʹәмьз бә. 17 Аԝа паши гәләк сала әз вәгәрʹийамә Оршәлиме, ԝәки ԛәнщийе мьләте хԝәрʹа бькьм у Хԝәдерʹа ԛӧрбана бьдьм. 18 Гава мьн әв һʹәму тьшт дькьрьн, у әз ль гора әʹдәт паԛьж бум, ԝана әз пʹарьстгәһеда дитьм. Әз тʹәви әʹлаләте нибум, у нә жи мьн тʹәвльһәвбун пешда ани. Ле чәнд Щьһуйед жь Асйайе ԝедәре бун. 19 Һәрге жи тьштәки ԝан мьԛабьли мьн һәбуйа, әԝана гәрәке бьһатана бәр тә шькийате мьн бькьрана. 20 Йан жи, бьра әв мәрьвед кӧ вьра нә, бежьн ԝәки гава әз бәр Диԝана Бьльнд йа Щьһуйа сәкьни бум, ԝана чь нәһәԛи мьнда дит, 21 хенщи кӧ мьн нав ԝанда дәнге хԝә бьльнд кьр у гот: ‹Бона баԝәрийа һьндава рʹабуна мьрийа әз иро бәр ԝә темә диԝанкьрьне!›»

22 Ле чьмки Фәликс ида гәләк тьшт дәрһәԛа Рʹийа Хӧдан* заньбу, әԝи әв шьхӧл паш хьст у гот: «Чахе сәроке әскәра Лусйо бе, әзе һьнге бона шьхӧле ԝә сафикьрьна хԝә бькьм». 23 Әԝи фәрман да сәрсәд кӧ Паԝлос гьрти бьһельн, ле диса жи һьнә азайи бьдьнә ԝи, у изьне бьдьне кӧ һәвалед ԝи бона һʹәԝщед ԝи хәм бькьн.

24 Пәй чәнд рʹожарʹа, Фәликс тʹәви жьна хԝә Дьрусилайе, йа кӧ Щьһу бу, һат. Әԝи шандә пәй Паԝлос, ԝәки гӧһ бьдә гьлийед ԝи дәрһәԛа баԝәрийа һьндава Мәсиһ Иса. 25 Ле гава Паԝлос дәрһәԛа рʹастийе, хԝәгьртьне у диԝана ахьрийе хәбәр дьда, тьрс кʹәтә дьле Фәликс у әԝи гот: «Ньһа тӧ дькари һәрʹи, ле чахе ԝәʹде мьн һәбә, әзе диса гази тә кьм». 26 Һьм жи әԝ һивийе бу кӧ Паԝлос пʹәрә бьда ԝи, ләма жи гәләк щара гази Паԝлос дькьр у тʹәви ԝи хәбәр дьда. 27 Дӧ сал шунда, Поркийо Фесто дәԝса Фәликс бу ԝәли. Ле чьмки Фәликс дьхԝәст дьле Щьһуйа бькʹьрʹә, әԝи Паԝлос гьрти һишт.

25 Фесто гьһиштә һәрема Щьһустане у дәстпекьр ԛӧльха хԝә бинә сери. Пәй се рʹожарʹа, әԝ жь Ԛәйсәрйайе чу Оршәлиме. 2 Сәрокед кʹаһина у гьрәгьред Щьһуйа бәр Фесто шькийате Паԝлос кьрьн. У ԝана жь Фесто һиви кьр, 3 ԝәки әԝ ԝанрʹа ԛәнщийе бькә кӧ Паԝлос бинә Оршәлиме. Ле нета ԝан әв бу, кӧ тʹәльке чекьн у рʹеда Паԝлос бькӧжьн. 4 Ле Фесто ԝанрʹа гот кӧ гәрәке Паԝлос Ԛәйсәрйайеда гьрти бьминә, у әԝ жи ԝе ԝәхтәкә незикда вәгәрʹә ԝедәре. 5 Әԝи ӧса жи гот: «Бьра нав ԝәда йед хԝәйиһʹӧкӧм тʹәви мьн бен, у шькийате ԝи бькьн, һәрге ви мәрьви бь рʹасти жи хьраби кьрийә».

6 Фесто һʹәйшт йан дәһ рʹожа ԝедәре ма, паше чу Ԛәйсәрйайе. Рʹожа дьн, әԝ сәр тʹәхте һʹакьм рʹуньшт у фәрман да, ԝәки Паԝлос биньн бәр ԝи. 7 Гава әԝ һат, Щьһуйед кӧ жь Оршәлиме һатьбун, дәр-доре ԝи гьртьн у гәләк бӧхданед гьран давитьнә ԝи, ле нькарьбун избат кьрьна.

8 Ле Паԝлос бона пʹарастьна хԝә ӧса гот: «Мьн һьндава Ԛануна Щьһуйа тʹӧ гӧнә нәкьрийә, нә һьндава пʹарьстгәһе, у нә жи һьндава Ԛәйсәр». 9 Ле Фесто дьхԝәст дьле Щьһуйа бькʹьрʹә, у Паԝлосрʹа гот: «Дьхԝази һәрʹи Оршәлиме у ԝедәре бәр мьн бейи диԝанкьрьне?» 10 Ле Паԝлос гот: «Әз бәр тʹәхте һʹакьме Ԛәйсәр сәкьни мә, у гәрәке диԝана мьн вьра бе кьрьне. Чаԝа кӧ тӧ хԝәха зани, мьн тʹӧ нәһәԛи Щьһуйа нәкьрийә. 11 Һәрге әз бь рʹасти нәһәԛ ьм у мьн тьштәки кӧ һежайи мьрьне йә, кьрийә, әз һазьр ьм бьмьрьм. Ле һәрге бона шькийатед ван мәрьва избати тʹӧнә нә, изьна тʹӧ кәси тʹӧнә ԝәки мьн бьдә дәсте ԝан, сәва дьле ԝан бькʹьрʹә. Әз дәʹԝа диԝана Ԛәйсәр дькьм!» 12 Паше гава Фесто тʹәви ширәткʹаред хԝә хәбәр да, әԝи гот: «Тӧ дәʹԝа Ԛәйсәр дьки, те һәрʹи щәм Ԛәйсәр».

13 Паши чәнд рʹожа, Әгрипа Пʹадша у Бәрник һатьнә Ԛәйсәрйайе кӧ тʹәсәлийа Фесто бькьн, у ԝирʹа ԛәдьр бьдьнә кʹьфше. 14 У чьмки әԝана чәнд рʹожа ԝедәре бун, Фесто пʹадшарʹа дәрһәԛа шьхӧле Паԝлос гьли кьр у гот:

«Мәрьвәк һәйә кӧ Фәликс әԝ гьрти һиштийә. 15 Гава әз Оршәлимеда бум, сәрокед кʹаһина у рʹуспийед Щьһуйа шькийате ԝи кьрьн у дьхԝәстьн әԝ бе диԝанкьрьне. 16 Ле мьн ԝанрʹа гот кӧ ль гора әʹдәте Рʹомайа, изьн тʹӧнә пе хԝәстьна шькийатчийа мәрьвәки бьдьнә дәсте ԝан. Мәрьве кӧ те сущдаркьрьне гәрәке рʹу бь рʹу тʹәви кәсед кӧ шькийате ԝи дькьн хәбәр дә, ԝәки мәщала ԝи һәбә кӧ хԝә бьпʹарезә. 17 Гава әԝана һатьнә вьра, мьн дәрәнги нәхьст, рʹожа дьн әз сәр тʹәхте һʹакьм рʹуньштьм, у мьн фәрман да кӧ ви мәрьви биньн. 18 Чахе шькийатчи рʹабун ԝәки хәбәр дьн, ԝана тʹӧ тьштед хьрабда чьда жи шькед мьн һәбун, ԝи нәһәԛ нәкьрьн. 19 Әԝана тʹәне кʹәтьнә дәʹԝе бона пьрсед һʹәбандьна ԝанва гьредайи у бона мәрьвәки бь наве Иса, йе кӧ мьрийә, ле Паԝлос дьгот кӧ әԝ сах ә. 20 У чьмки мьн ньзаньбу кӧ чаԝа ве дәʹԝе сафи кьм, мьн же пьрси һәла әԝ дьхԝазә һәрʹә Оршәлиме, ԝәки ԝедәре бона ԝан тьшта бе диԝанкьрьне. 21 Ле чахе Паԝлос хԝәст һе гьрти бьминә һʹәта Аԝгусто* дәрһәԛа пьрса ԝи сафикьрьнәке бькә, мьн фәрман да, ԝәки әԝ гьрти бьминә, һʹәта әз ԝи бьшиньм бал Ԛәйсәр».

22 Һьнге Әгрипа готә Фесто: «Әз дьхԝазьм гӧһ бьдьмә ви мәрьви». Фесто жи готе: «Тӧйе сьбе гӧһ бьди ԝи». 23 Рʹожа дьн Әгрипа у Бәрник бь бабахи кʹәтьнә диԝане, сәрокед әскәра у гьрәгьред бажер жи тʹәви ԝан бун. Гава Фесто фәрман да, Паԝлос анин. 24 Фесто гот: «Йа Әгрипа Пʹадша у һʹәму кәсед кӧ вьра нә, һәла ԝи мәрьви бьньһерʹьн! Һʹәму Щьһуйед Оршәлиме у Щьһуйед кӧ вьра нә, бь газьна һатьнә бал мьн у бь дәнгәки бьльнд дьбежьн, ԝәки әԝ гәрәке бе кӧштьне. 25 Ле мьн фәʹм кьр, ԝәки әԝи тьштәки һежайи мьрьне нәкьрийә. Гава әԝи хԝәст шьхӧле хԝә бьвә бал Аԝгусто, мьн сафи кьр кӧ ԝи бьшиньм бал ԝи. 26 Ле тьштәк тʹӧнә ԝәки әз дәрһәԛа ԝи Ԛәйсәррʹа бьньвисьм. Ләма жи мьн әԝ ани бәр ԝә һʹәмуйа, у илаһи бәр тә, йа Әгрипа Пʹадша, ԝәки паши лекʹолина шьхӧле ԝийи диԝане, әз бькарьбьм тьштәки бьньвисьм. 27 Чьмки тьштәки беаԛьлайи йә, ԝәки әз гьртики бьшиньм у бона суще ԝи тьштәки нәньвисьм».

26 Әгрипа Паԝлосрʹа гот: «Изьна тә һәйә ԝәки тӧ бона хԝә хәбәр ди». Һьнге Паԝлос дәсте хԝә дьреж кьр у бона пʹарастьна хԝә гот:

2 «Йа Әгрипа Пʹадша, әз ша мә кӧ иро бәр тә дькарьм хԝә бьпʹарезьм, бона һʹәму шькийатед кӧ Щьһу ль мьн дькьн. 3 Илаһи чьмки тӧ һʹәму әʹдәт у дәʹԝ-дозед Щьһуйа рʹьнд зани. Ләма әз һиви тә дькьм, бь сәбьр гӧһ бьдә мьн.

4 Һʹәму Щьһу рʹьнд заньн, ԝәки мьн жийина хԝә жь хортанийа хԝәда чаԝа дәрбаз кьрийә нава мьләте хԝәда у Оршәлимеда. 5 Йед кӧ мьн нас дькьн, һәрге бьхԝазьн, дькарьн шәʹдәтийа ве йәке бьдьн, ԝәки әз Ферьси бум, пәйчуйе кʹомәкә дине мә, кʹижан кӧ һур бь һур у сәрт хԝә ль Ԛануне дьгьрә. 6 Ле бона гӧмана һьндава ԝи созе кӧ Хԝәде дабу кал-бавед мә, әз ньһа бәр диԝане сәкьни мә. 7 Донздәһ бәрәкед мә жи һивийа ви сози нә, ԝәки әԝ бе сери, ләма жи әԝана шәв-рʹож бь хирәт Хԝәдерʹа хьзмәтийа пироз дькьн. Йа Пʹадша, сәва ве гӧмане Щьһу мьн сущдар дькьн.

8 Һун чьма баԝәр накьн, ԝәки Хԝәде мьрийа рʹадькә? 9 Мьн хԝәха жи баԝәр дькьр, ԝәки әз гәрәке чь жь дәсте мьн те бькьм, сәва кӧ мьԛабьли наве Исайе Ньсрәти рʹабьм. 10 Мьн әԝ тьшт Оршәлимеда дькьрьн. Мьн жь сәрокед кʹаһина дәстур станд у гәләк шагьрт* авитьнә кәле, у гава әԝана гәрәке бьһатана кӧштьне, әз рʹази дьбум. 11 Мьн гәләк щара һʹәму кʹьништада* әԝана щәза дькьрьн, у мьн зоре ԝан дькьр кӧ тʹәрка баԝәрийа хԝә бьдьн. У мьн ӧса кʹина ԝан гьртьбу, кӧ дьчумә бажаред дьн жи, ԝәки ԝана бьзериньм.

12 Чахе әз бь ве нете у бь изьна кӧ сәрокед кʹаһина дабу мьн, дьчумә Шаме, 13 йа Пʹадша, нивро рʹеда мьн рʹонайик дит. Әве рʹонайе жь рʹонайа тәʹве зедәтьр шәԝԛ дьда у жь әʹзмен авитә сәр мьн у сәр кәсед кӧ тʹәви мьн бун. 14 У гава әм һʹәму әʹрде кʹәтьн, мьн дәнгәк бьһист, йе кӧ сәр зьмане Ибрани мьнрʹа гот: ‹Шаԝул, Шаԝул, тӧ чьрʹа мьн дьзерини? Тӧ зьраре дьди хԝә, кӧ мьԛабьли ԝи кәси рʹадьби, йе кӧ шьва сәртуж гьртийә. 15 Мьн жи гот: ‹Әзхӧлам, тӧ кʹи йи?› Әԝи гот: ‹Әз Иса мә, кʹижани тӧ дьзерини. 16 Рʹабә у сәр ньга бьсәкьнә. Әз тәрʹа хӧйа бум, чьмки мьн тӧ бьжарти. Тӧйе һьм бона тьштед кӧ тә дитьнә, һьм жи бона тьштед кӧ әзе нишани тә бькьм, бьби хьзмәткʹар у шәʹде мьн. 17 У әзе тә жь ве щьмәʹте у жь ԝан мьләта, щәм кʹижана әзе тә бьшиньм, бьпʹарезьм. 18 Тӧйе чʹәʹвед ԝан вәки у ԝана жь тәʹрийе дәрхи рʹонайе, у жь бьн һʹӧкӧме Шәйтʹан дәрхи у бьви бәрбь Хԝәде. Бь сайа баԝәрийа ԝанә һьндава мьн, гӧнед ԝан ԝе бенә бахшандьне, у әԝана ԝе тʹәви пироза мьлкʹ бьстиньн›.

19 Ләма, йа Әгрипа Пʹадша, чаԝа кӧ Иса ве дитьнокеда мьнрʹа гот, мьн һәма ӧса жи кьр. 20 Пешийе әз чумә бал кәсед ль Шаме, паше бал кәсед ль Оршәлиме, бал кәсед ль тʹәмамийа һәрема Щьһустане у бал мьләтед дьн жи. Мьн мәрьварʹа дьгот, ԝәки әԝана гәрәке тʹобә кьн, бенә сәр рʹийа Хԝәде у пе кьред хԝә нишан кьн кӧ ԝана тʹобә кьрийә. 21 Бона ве йәке Щьһуйа әз пʹарьстгәһеда гьртьм у дьхԝәстьн мьн бькӧжьн. 22 Ле бь аликʹарийа Хԝәде, әз һʹәта рʹожа иро шәʹдәтийе дьдьмә кәсед бьчʹук у мәзьн. Әз зедә тьшт набежьм, хенщи ван тьштед кӧ Пʹехәмбәра у Муса готьбун, йед кӧ гәрәке бьһатана сери: 23 Мәсиһ гәрәке щәфа бькʹьшанда, у ча йе пешьн жь мьрьне бьһата рʹакьрьне, ԝәки ве щьмәʹтерʹа у мьләтед дьнрʹа мьзгини бәла кьра у рʹонайи банийа».

24 Гава Паԝлос әв тьшт бона пʹарастьна хԝә дьготьн, Фесто бь дәнгәки бьльнд гот: «Паԝлос, тә һʹьше хԝә ӧнда кьрийә! Хԝәндьна тәйә зедә тӧ дин кьри!» 25 Ле Паԝлос гот: «Йа Фестойе Хԝәйиԛәдьр, мьн һʹьше хԝә ӧнда нәкьрийә, әз гьлийед рʹаст дьбежьм у бь аԛьлайи. 26 Пʹадша ван һʹәму тьшта рʹьнд занә, ләма жи әз бь азайи тʹәви ԝи хәбәр дьдьм. Әз баԝәр ьм кӧ тьштәк жи жь ԝи вәшарти нинә, чьмки әв тьшт дьзикава нәһатьнә кьрьне. 27 Йа Әгрипа Пʹадша, тӧ Пʹехәмбәра баԝәр дьки? Әз заньм кӧ тӧ баԝәр дьки». 28 Һьнге Әгрипа Паԝлосрʹа гот: «Һьндьк майә тӧ мьн бьки Мәсиһи». 29 Сәр ве йәке Паԝлос гот: «Әз Хԝәдерʹа дӧа дькьм, ԝәки зу йан дәрәнг нә тʹәне тӧ, ле һʹәмуйед кӧ иро гӧһ дьдьнә мьн, мина мьн бьбьнә Мәсиһи, ле бе ван зьнщира».

30 Һьнге пʹадша рʹабу сәр пʹийа, ԝәли, Бәрник у һʹәмуйед тʹәви ԝи рʹуньшти жи перʹа рʹабун. 31 Гава әԝана дәрдькʹәтьн, һәвдӧрʹа дьготьн: «Әви мәрьви тьштәки һежайи гьртьне йан мьрьне, нәкьрийә». 32 Һьнге Әгрипа Фесторʹа гот: «Һәрге әԝи мәрьви шьхӧле хԝә нәбьра бал Ԛәйсәр, мәщал ԝе һәбуйа ԝәки әԝ бьһата бәрʹдане».

27 Гава һатә сафикьрьне кӧ әм пе гәмийе һәрʹьн Италйайе, ԝана Паԝлос тʹәви чәнд гьртийед дьн данә дәсте сәрсәде жь кʹома Аԝгусто,* наве кʹижани Йулйо бу. 2 Әм кʹәтьнә гәмике, йа кӧ жь Әдрәмите дьчу гәмиԝаргәһед* һәрема Асйайе, у рʹе кʹәтьн. Әристархо Макәдони, йе кӧ жь Тʹесалонике бу, тʹәви мә бу. 3 Рʹожа дьн әм Сайдайеда пәйа бун. Йулйо ԛәнщи Паԝлосрʹа кьр у изьн да ԝи, кӧ һәрʹә щәм һәвалед хԝә, ԝәки әԝана али ԝи бькьн.

4 Жь ԝедәре әм рʹе кʹәтьн, у чьмки ба пешийа мә дьхьст, әм бәр Кипрусрʹа чун. 5 Паше әм бәʹрерʹа бәр Киликйа у Памфилйайерʹа дәрбаз бун, у гьһиштьнә Мирайе, бажарәки Ликйайе. 6 Ԝедәре сәрсәд гәмик дит, йа кӧ жь Скәндәрйайе дьчу Италйайе, у әԝи әм кьрьнә ве гәмийе. 7 Гәләк рʹож әм һеди-һеди дьчун, у чәтьн гьһиштьнә Кьнидйайе. У чьмки ба рʹийа мә дьгьрт, әм алийе Кьретайерʹа пешбәри Салмонерʹа дәрбаз бун. 8 У бь зәʹмәтәкә мәзьн әм незики дәве бәрерʹа дьчун у гьһиштьнә щики бь наве Гәмиԝаргәһед Бәдәԝ, йа кӧ незики бажаре Ласәйайе бу.

9 Епʹещә ԝәхт дәрбаз бу у ида хоф бу кӧ әм пе гәмийе рʹе кʹәвьн, һәла һе рʹожигьртьна Рʹожа Кʹәԝандьне жи дәрбаз бьбу, ләма Паԝлос ширәтәкә ӧса да ԝан 10 у гот: «Щамерно, әз дьвиньм кӧ әв рʹеԝити дькарә бьбә сәбәб, ԝәки әм нә тʹәне бар у гәмийе, ле жийина хԝә жи ӧнда кьн». 11 Ле сәрсәд дәԝса кӧ гӧһ бьда Паԝлос, гӧһ да гәмиван у хԝәйе гәмийе. 12 Чьмки нәбаш бу ԝәки зьвьстане ве гәмиԝаргәһеда дәрбаз кьн, гәләка ширәт дан кӧ әм һәрʹьн бьгьһижьнә Финиксе, у һәрге дьбә, зьвьстане ԝедәре дәрбаз кьн. Финикс гәмиԝаргәһа Кьретайе бу, йа кӧ ль башур-рʹоавайе у ль бакӧр-рʹоавайе дьньһерʹә.

13 Гава байе башурейи сьст һат, әԝана фькьрин кӧ әԝе бьгьһижьнә нета хԝә. Ләма ԝана ләнгәр кʹьшандьн жор у бәр Кьретайерʹа незики дәве бәʹрерʹа чун. 14 Ле һьнә ԝәхт шунда баки ԛәԝи жь бакӧра рʹоһьлате* рʹабу. 15 У чьмки ба пешийа гәмийе дьхьст, әм нькарьбун пешда бьчуна, ләма жи мә ида тьштәк нәкьр у ба әм бьрьн. 16 Әм бәр гьравәкә бьчʹукә бь наве Каԝдарʹа дәрбаз бун, у мә анщах дәсте хԝә гиһандә ԛәйика кӧ пьшта гәмийева бу, у әԝ гьрт. 17 Чахе ԝана ԛәйик кʹьшандә жор, ԝана пе тʹога гәми бьнива шьдандьн. Гәмиван тьрсийан кӧ гәми лила Суртьседа рʹуне, ләма ԝана бабьркед гәмийе дахьстьн жере у һиштьн кӧ ба мә бькʹьшинә. 18 Ле чьмки ба әм вьрда-ԝеда дьбьрьн, гәмивана рʹожа дьн дәстпекьрьн баре гәмийе бавежьнә бәʹре. 19 У рʹожа сьсийа ԝана һащәтед гәмийе жи авитьнә бәʹре.

20 Гәләк рʹож нә тәʹв хӧйа дьбу, нә жи стәйрк, у баки ԛәԝи гәмийе дьхьст, ләма жи мә ида гӧмана хԝә ӧнда дькьр, кӧ әме хьлаз бьн. 21 Чахе ида гәләк ԝәхт әԝана бьрʹчи бун, һьнге Паԝлос нав ԝанда рʹабу у гот: «Щамерно, һәрге ԝә гӧһ бьда ширәта мьн у жь Кьретайе дәрнәкʹәтана бәʹре, ԝәйе һаԛас зьрар нәдита. 22 Ле ньһа әз рʹәща дькьм, нәтьрсьн, чьмки кәсәк жь ԝә ԝе нәмьрә, тʹәне гәми ԝе жь дәсте мә һәрʹә. 23 Ишәв, Хԝәдайе кӧ әз жерʹа хьзмәт дькьм у ле дьһʹәбиньм, мәләк шандә бал мьн, 24 йе кӧ ӧса гот: ‹Нәтьрсә Паԝлос! Гәрәке тӧ һәрʹи бәр Ԛәйсәр. Ва йә, Хԝәде ԝе һьм тә, һьм жи һʹәму кәсед кӧ тʹәви тә нә, хьлаз кә›. 25 Ләма щамерно, нәтьрсьн! Чьмки әз баԝәрийа хԝә Хԝәде тиньм у баԝәр ьм кӧ һʹәму гьлийед мәләк ԝе бенә сери. 26 Ле гәрәке әм гәмийа хԝә сәр гьравәке бьдьнә сәкьнандьне».

27 Гава шәва 14 бу у Бәʹра Адрийада ба әм вьрда-ԝеда дьбьр-дьанин, ниве шәве гәмивана тʹәхмин кьрьн кӧ әм незики дәве бәʹре дьбьн. 28 Һьнге ԝана кʹурайа аве чап кьр у дитьн кӧ әԝ ԝәкә 36 метр кʹур ә. Әԝана һьнәки пешда чун, диса чап кьрьн, у дитьн кӧ ав ида ԝәкә 27 метр кʹур ә. 29 У жь тьрса кӧ гәми дькарә зьнара кʹәвә, ԝана чар ләнгәр авитьн у һʹьзрәт бун кӧ сьбәһ сафи бә. 30 Ле гава гәмивана дьхԝәст жь гәмийе бьрʹәвьн, ԝана ӧса кьр кӧ йанчь ләнгәра давежьн, ле бь рʹасти ԛәйик жь гәмийе пәйа кьрьн. 31 Ԝе дәме Паԝлос сәрсәд у әскәрарʹа гот: «Һәрге әв мәрьв гәмийеда нәминьн, һуне нькарьбьн хьлаз бьн». 32 Һьнге әскәра тʹогед ԛәйике бьрʹин, у ԛәйик кʹәтә аве.

33 Незики сәре сьбәһе, Паԝлос жь һʹәмуйа һиви кьр, ԝәки һьнә хԝарьн бьхԝьн. Әԝи гот: «Әва ида 14 рʹож ә кӧ һун бь тьрс дәр-доре хԝә дьньһерʹьн, у ԝә ԛәт тьштәк жи нәхԝарийә. 34 Ләма әз бона кʹара ԝә һиви дькьм кӧ һун тьштәки бьхԝьн. Жь сәре ԝә пʹорʹәк жи ԝе ӧнда нәбә». 35 Пәй ԝан гьлийарʹа, әԝи нан һьлда, бәр ԝан шькьри да Хԝәде, нан кәр кьр* у хԝар. 36 Һьнге дьле һʹәмуйа ԛәԝи бу, у ԝана дәстпекьр тьштәки бьхԝьн. 37 Гәмийеда әм бь тʹәмами 276 мәри бун. 38 Гава ԝана тʹер хԝар, гәньм авитьнә бәʹре у баре гәмийе дьһа сьвьк кьрьн.

39 Гава сьбәһ сафи бу, ԝана ньзаньбу кӧ дьгьһижьнә кʹидәре, ле ԛума дәве бәре дитьн у дьхԝәстьн гәмийе ԝедәре бьдьнә сәкьнандьне. 40 Һьнге ԝана ләнгәр ԛәтандьн у бәʹреда һиштьн. Ԝе дәме ԝана тʹогед берька сьст кьрьн, бабьрка пешийе бьльнд кьрьн у бәрбь дәве бәʹре чун. 41 Ле гәми кʹәтә нава ԛуме у ԝедәре сәкьни. Позе гәмийе ԛумеда ма у ԛә нәләԛийа. Ле пьшта гәмийе жь бо ԛәԝата пʹелед бәʹре һурдәхԝәши дьбу. 42 Һьнге әскәра сафи кьрьн гьртийа бькӧжьн, сәва кӧ тʹӧ кәс хԝә аве нәхә* у нәрʹәвә. 43 Ле сәрсәд нәһишт кӧ әԝана ве йәке бькьн, чьмки әԝи дьхԝәст Паԝлос хьлаз кә. Әԝи фәрман да, ԝәки йед кӧ дькарьн хԝә аве хьн, пешийе әԝана хԝә бавежьнә аве у бьгьһижьнә дәве бәʹре, 44 ле йед майин жи һьнәк сәр тʹәхта у һьнәк жи сәр пʹаред гәмийейә дьн пәй ԝан һәрʹьн. Ӧса һʹәму кәс бь сьламәти гьһиштьнә дәве бәʹре.

28 Гава әм сьламәти гьһиштьнә дәве бәʹре, әм пеһʹәсийан кӧ наве ве гьраве Малта йә. 2 Бьнәлийед гьраве* мәрʹа гәләк һʹәйф бун. Жь бо ве йәке кӧ баран дьбари у сар бу, ԝана агьр вехьст, у әм һʹәму бь дьлгәрми ԛәбул кьрьн. 3 Ле чахе Паԝлос һьнә ԛьршьк тʹоп кьр у авитә сәр агьр, жь бо гәрме мәʹрәк дәркʹәт у хԝә авитә дәсте ԝи. 4 Гава бьнәлийед гьраве мәʹре жәʹрдадайи дәсте Паԝлосва дальԛи дитьн, ԝана һәвдӧрʹа гот: «Бе шьк әԝ мәрьв меркӧж ә. Рʹаст ә әԝ сах у сьламәт жь бәʹре хьлаз бу, ле йәкә Һәԛийе* изьн нәда кӧ әԝ сах бьминә». 5 Ле Паԝлос мәʹре дәсте хԝәва даԝшандә сәр агьр, у тʹӧ зьрар нәстанд. 6 Әԝана жи һивийе бун кӧ ԝе дәсте ԝи бьԝәрьмә у әԝ ньшкева бькʹәвә бьмьрә. Ле гава әԝана гәләк ԝәхт һивийе бун у дитьн кӧ тьштәк нәһатә сәре ԝи, фькьре хԝә гӧһастьн у дьготьн кӧ әԝ хԝәде йә.

7 Незики ԝедәре әʹрдед мәрьвәки һәбун у әԝ мәзьне ве гьраве бу, наве ԝи Поплийо бу. Әԝи бь дьл әм ԛәбул кьрьн у се рʹожа әм щәм ԝи ман. 8 Ԝе дәме баве Поплийо бь зькеше нәхԝәш у бь гәрма бьльнд нав ньвинада бу. Паԝлос чу бал ԝи, дӧа кьр, дәстед хԝә данин сәр ԝи у әԝ ԛәнщ кьр. 9 Паши ве йәке, мәрьвед гьраве жи йед кӧ нәхԝәш бун, дьһатьнә бал ԝи у ԛәнщ дьбун. 10 Ԝана ԛәдьре мә дьгьрт у гәләк пʹешкʹеш данә мә. У гава әм һазьр бун рʹе кʹәвьн, ԝана һʹәму тьштед кӧ мәрʹа лазьм бун, кьрьнә гәмийе.

11 Се мәһ шунда әм пе гәмике, сәр кʹижане шькьле «Кӧрʹед Зәԝс» һәбу, рʹе кʹәтьн. Әԝ гәми жь Скәндәрйайе бу у тʹәмамийа зьвьстане сәр ве гьраве бу. 12 Әм гьһиштьнә Сирәкусе у се рʹожа ԝедәре ман. 13 Жь ԝедәре әм чунә Рʹәгийуме. Рʹожәк шунда байе башуре рʹабу, у рʹожа дӧда әм ида гьһиштьнә Потийоле. 14 Потийоледа мә бьра дитьн, у ԝана жь мә һиви кьр кӧ әм һʹәфт рʹожа щәм ԝан бьминьн. Паше әм бәрбь Рʹоме чун. 15 Гава бьред Рʹоме дәрһәԛа һатьна мә бьһистьн, әԝана һʹәта Мәйдана Әпийу у щийе бь наве Се Меванханә һатьнә пешийа мә. Гава Паԝлос әԝана дитьн, шькьри да Хԝәде, у дьле ԝи ԛәԝи бу. 16 Ахьрийа ахьрийе әм кʹәтьнә Рʹоме, у Паԝлосрʹа изьн һатә дайине кӧ әԝ бьн нобәдарийа әскәрда тʹәне бьминә.

17 Паши се рʹожа Паԝлос гази гьрәгьред Щьһуйа кьр. Гава әԝана тʹоп бун, әԝи ԝанрʹа гот: «Бьрано, рʹаст ә мьн тьштәк мьԛабьли щьмәʹте йан әʹдәтед кал-бавед мә нәкьрийә, ле әз Оршәлимеда гьртьмә у дамә дәсте Рʹомайа. 18 Ԝана әз дамә бәр пьрса, паше дьхԝәстьн мьн бәрʹдьн, чьмки тʹӧ мәʹни нәдитьн кӧ мьн бькӧжьн. 19 Ле Щьһу мьԛабьли ве йәке рʹабун, у әз мәщбур бум шьхӧле хԝә бьдьмә дәсте Ԛәйсәр, ле нә сәва ве йәке кӧ шькийате мьләте хԝә бькьм. 20 Ләма мьн һиви кьр кӧ әз ԝә бьвиньм у тʹәви ԝә хәбәр дьм. Әз бона гӧмана Исраеле ван ԛәйд-зьнщирада мә». 21 Ԝана ԝирʹа гот: «Мә дәрһәԛа тә тʹӧ нәʹмә жь Щьһустане нәстандийә, у бьред кӧ жь ԝедәре һатьнә жи, тʹӧ йәки сәр тә тьштәки хьраб нәготийә. 22 Ле әм дьфькьрьн ԝәки һежа йә кӧ әм ньһерʹандьна тә сәр ве йәке пебьһʹәсьн, чьмки һʹәму дәра дәрһәԛа ви дине тʹәзә* хьраб хәбәр дьдьн».

23 Һьнге ԝана рʹожәк кʹьфш кьр кӧ ԝи бьвиньн, у тʹәви һе зедә мәрьва һатьнә щийе кӧ Паԝлос дьма. Жь сьбәһе һʹәта еваре әԝи ԝанрʹа дәрһәԛа Пʹадшатийа Хԝәде һур бь һур шьровәдькьр. Әԝи хирәт кьр кӧ һьм пе Ԛануна Муса, һьм жи пе Ньвисаред Пʹехәмбәра ԝана Исада бьдә баԝәркьрьне. 24 Һьнәка баԝәрийа хԝә гьлийед ԝи анин, һьнәка жи баԝәр нәкьрьн. 25 У чьмки ньһерʹандьна ԝан жь һәв щӧдә дьбу, әԝана жь ԝедәре дьчун, у һьнге Паԝлос ӧса гот:

«Рʹӧһʹе пироз бь дәве Ишайа пʹехәмбәр кал-бавед ԝәрʹа чьԛас рʹаст готьбу: 26 ‹Һәрʹә щәм ви мьләти у бежә: «Һуне бьбьһен, ле тʹӧ щар фәʹм нәкьн. Һуне бьньһерʹьн, ле тʹӧ щар нәвиньн. 27 Чьмки дьле ви мьләти һʹьшк буйә, ԝана бь гӧһе хԝә бьһист, ле һәрәкʹәт нәкьр, у ԝана чʹәʹвед хԝә гьртьнә, ԝәки тʹӧ щар нәвиньн, у бь гӧһед хԝә нәбьһен у бь дьле хԝә фәʹм нәкьн у вәнәгәрʹьн бал мьн, кӧ әз ԝана ԛәнщ кьм»›. 28 Ләма жи бьзаньбьн, ԝәки хьлазкьрьна жь Хԝәде, мьләтед дьнрʹа һатийә шандьне у әԝана ԝе гӧһ бьдьнә ве хәбәре». 29* ——

30 Паԝлос дӧ сала ԝе маледа ма, кʹижан кӧ әԝи кʹьре гьртьбу, у әԝи һәр кәсе кӧ дьһатә бал ԝи, бь дьлгәрми ԛәбул дькьр. 31 Әԝи ԝанрʹа дәрһәԛа Пʹадшатийа Хԝәде гьли дькьр у бе тьрс дәрһәԛа Хӧдан Иса Мәсиһ һин дькьр, у тʹӧ кәси рʹийа ԝи нәдьгьрт.