НӘʹМА РʹОМАЙАРʹА

1 Әз, Паԝлос, хӧламе Мәсиһ Иса, йе кӧ ча шанди һатьмә газикьрьн у бьжартьне, ԝәки мьзгинийа Хԝәде бәла кьм, ве нәʹме дьньвисьм. 2 Хԝәде әв мьзгини һе бәреда бь пʹехәмбәред хԝә Ньвисаред Пирозда соз дабу. 3 Әв мьзгини дәрһәԛа Кӧрʹе ԝи йә, йе кӧ жь зӧрʹәта Даԝьд бу. 4 Әшкәрә йә кӧ әԝ Кӧрʹе Хԝәде йә, чьмки Хԝәде бь сайа ԛәԝата рʹӧһʹе хԝәйи пироз әԝ жь мьрьне рʹакьр. Бәле, әԝ Хӧдане мә Иса Мәсиһ ә. 5 Мә пе ԝи жь Хԝәде ԛәнщийа мәзьн станд. Иса әз ча шанди бьжартьмә, ԝәки али мәрьвед жь һʹәму мьләта бькьм, сәва кӧ әԝана баԝәр бькьн, гӧһдар бьн у рʹумәте бьдьнә наве ԝи. 6 Һун жи нав ван мьләтада ньн, йед кӧ һатьнә газикьрьне кӧ пәй Иса Мәсиһ һәрʹьн. 7 Әз ԝан һʹәмуйарʹа дьньвисьм, йед кӧ Рʹомеда ньн, һʹәзкьрийед Хԝәдерʹа, кʹижана әԝи бьжартийә кӧ бьбьнә йед пироз:

Бьра ԛәнщийа мәзьн у әʹдьлайа жь Баве мә Хԝәде у Хӧдан Иса Мәсиһ, жь ԝә кем нәбә.

8 Пешийа һәр тьшти әз бь наве Иса Мәсиһ бона ԝә һʹәмуйа Хԝәдайе хԝәрʹа шькьрийе дьдьм, чьмки нав тʹәмамийа дьнйайеда дәрһәԛа баԝәрийа ԝә хәбәр дьдьн. 9 Хԝәде, кʹижанирʹа әз бь тʹәмамийа дьле хԝә хьзмәт дькьм у мьзгинийа дәрһәԛа Кӧрʹе ԝи бәла дькьм, шәʹдә йә кӧ әз һәртʹьм дӧайед хԝәда бәʹса ԝә дькьм. 10 Әз дӧа дькьм кӧ һәрге бе стандьне у һәрге Хԝәде бьхԝазә, әзе рʹожәке бемә щәм ԝә. 11 Әз һʹьзрәта ԝе рʹоже мә, кӧ ԝә бьвиньм у пʹешкʹешәкә рʹӧһʹани бьдьмә ԝә, ԝәки һун баԝәрийеда ԛәԝи бьн; 12 аԝа готи әм һәвдӧ ԛәԝи кьн, әз бь баԝәрийа ԝә ԛәԝи бьм, һун жи бь баԝәрийа мьн.

13 Бьрано, әз дьхԝазьм һун бьзаньбьн, ԝәки мьн гәләк щар хԝәстийә бемә щәм ԝә, ле һʹәта ньһа рʹийа мьн те гьртьне. Мьн дьхԝәст кӧ хьзмәтийа мьн нав ԝәда жи бәред баш бинә, чаԝа нав мьләтед дьнда. 14 Әз һьм борщдаре* Йунана, һьм мьләтед дьн, һьм билана һьм жи йе нәзана мә. 15 Ләма әз бь дьл у щан дьхԝазьм Рʹомеда ԝәрʹа жи мьзгинийе бәла кьм. 16 Әз мьзгинийе шәрм һʹәсаб накьм, чьмки әв бь рʹасти ԛәԝата Хԝәде йә, бона хьлазбуна һʹәму баԝәрмәнда, пешийе бона Щьһуйа, паше бона Йунана. 17 Рʹастийа Хԝәде әшкәрә дьбә ԝанрʹа, йед кӧ баԝәр дькьн, у әв йәк баԝәрийа ԝан ԛәԝи дькә, чаԝа кӧ Ньвисаред Пирозда һатийә ньвисаре: «Йе рʹаст ԝе бь сайа баԝәрийа хԝә бьжи».

18 Хәзәба Хԝәде жь әʹзмен сәр һʹәму мәрьвед зӧлм у нәһәԛ хӧйа дьбә, йед кӧ бь нәһәԛийед хԝә наһельн кӧ рʹасти әʹйан бә. 19 Чь кӧ гәрәке бона Хԝәде бьзаньбьн ԝанрʹа зәлал әʹйан ә, чьмки Хԝәде әв тьшт ԝанрʹа зәлал кьрьнә. 20 Һәрге әԝана һур бь һур дина хԝә бьдьне кӧ дьнйа чаԝа һатийә чекьрьне, ԝе хәйсәт-һʹӧнӧред ԝийә кӧ найенә дитьне, бьвиньн. Һәрге әԝана сәр тьштед кӧ әԝи чекьрьнә кʹур бьфькьрьн, ԝе тедәрхьн ԝәки Хԝәде йәки ча нә. Әв тьшт ԛәԝата ԝийә бесинор нишан дькьн у избат дькьн, ԝәки әԝ Хԝәде йә. Кәсед кӧ чʹәʹвед хԝә сәр ван избатийа дьгьрьн, нькарьн һәԛ дәрен. 21 Чьмки рʹаст ә ԝана Хԝәде нас дькьр, ле йәкә рʹумәт нәданә ԝи чаԝа Хԝәде, нә жи рʹазибун данә кʹьфше. Ԝана хԝә данә фькьред пʹучʹ, у дьле ԝани бефәʹм, бу тәʹри. 22 Әԝана хԝә билан һʹәсаб дькьн, ле бь рʹасти бефәʹм ьн. 23 Дәԝса кӧ рʹумәте бьдьнә Хԝәдайе кӧ һәр у һәр дьжи, әԝана рʹумәте дьдьнә пʹута, йед кӧ мина мәрьва нә кӧ дьмьрьн, у ӧса жи йед кӧ мина чʹьвика, һʹәйԝанед чарньг у шулькийа нә.

24 Ләма жи Хԝәде һишт, ԝәки әԝана пәй хԝәстьнед һʹәрам кʹәвьн йед кӧ дьле ԝанда ньн, у ӧса бәдәна хԝә бьһʹәрʹьминьн. 25 Ԝана дәԝса рʹастийа Хԝәде, дәрәԝи һʹәз кьр. Әԝана әʹфрина дьһʹәбиньн, нә кӧ Әʹфьрандар, йе кӧ һʹәта-һʹәтайе һежайи пәсьна йә. Амин. 26 Ләма жи Хԝәде әԝ данә хԝәстьнед әʹйб у шәрм, чьмки жьна тʹәрка һәләԛәтийа хԝәйә тʹәбийәти данә у нә кӧ мерарʹа, ле жьнарʹа сәре хԝә датиньн. 27 Һәма ԝи щурʹәйи, мера жи тʹәрка һәләԛәтийа хԝәйә тʹәбийәти данә у сәре хԝә нә кӧ жьнарʹа датиньн, ле мер тʹәви мера тьштед һʹәрам дькьн у пе тәмед хԝәйә хьраб сәр һәв дьшәԝьтьн. Әԝана ԝе сәва гӧне хԝә бь тʹәмами щәзайе бьстиньн.

28 Чьмки ԝана һʹәсаб нәкьр кӧ һежа йә Хԝәде нас кьн,* ләма Хԝәде һишт кӧ әԝана бәрдәԝам кьн сәр тьштед пʹучʹ бьфькьрьн у тьштед нәщайиз бькьн. 29 Әԝана бь ван тьшта тʹьжә нә: Нәһәԛи, зӧлми, тьмайи, хьраби, һʹәвсуди, кӧштьн, шәрʹ, дәрәԝи у мьхәнәти. Әԝана гәвәзә нә, 30 бӧхданбеж ьн, Хԝәде нәфрʹәт дькьн, бешәрм ьн, кʹӧбар-бабах ьн, ԛӧрʹә нә у хьрабийе тʹьвдир дькьн.* Әԝана гӧрʹа де-бавада ниньн, 31 сәрһʹьшк ьн, хԝәйе созе хԝә ниньн, һʹәзкьрьна ԝан тʹӧнә у берʹәʹм ьн. 32 Әԝана рʹьнд заньн ԝәки мәрьвед кӧ тьштед ӧса дькьн, ль гора ԛануна Хԝәде һежайи мьрьне нә. Диса жи әԝана нә тʹәне бәрдәԝам дькьн ԝан тьшта бькьн, ле ӧса жи ԛәбул дькьн мәрьвед кӧ тьштед ӧса дькьн.

2 Ләма фьрԛи тʹӧнә тӧ кʹи йи, тӧ нькари хԝә һәԛ дәрхи һәрге кәсед дьн сущдар дьки, чьмки тӧ бона чь жи мәрьва сущдар дьки, тӧ хԝәха жи ԝан тьшта дьки. Гава тӧ кәсед дьн сущдар дьки, тӧ хԝәха хԝә сущдар дьки. 2 Ле әм заньн гава Хԝәде диԝана ԝан мәрьва дькә, йед кӧ тьштед ӧса дькьн, диԝана ԝи рʹаст ә.

3 Ле чахе тӧ мәрьва сущдар дьки бона ԝан тьшта чь кӧ тӧ хԝәха жи дьки, тә тʹьре те жь диԝана Хԝәде бьрʹәви? 4 Йан тӧ беһӧрмәт дьки ԛәнщийа ԝийә мәзьн, рʹәʹм у сәбьра ԝи, кӧ әԝ һьндава тәда дьдә кʹьфше? Тӧ фәʹм наки кӧ Хԝәде дьхԝазә бь ԛәнщийа хԝә али тә бькә, ԝәки тӧ тʹобә ки? 5 Ле жь бо ԝе йәке кӧ тӧ сәрһʹьшк и у нахԝази тʹобә ки, тӧ һерса Хԝәде сәр хԝәда тини, йа кӧ Хԝәде ԝе рʹожа хәзәбе бьрʹежинә, гава диԝана һәԛ бькә. 6 Әԝе һәԛе һәр кәси ль гора кьред ԝан бьдә ԝан. 7 Хԝәде ԝе жийина һәр-һәйи бьдә кәсед кӧ рʹумәт, һӧрмәт у жийина һʹәта-һʹәтайе дьгәрʹьн, чьмки әԝана бәрдәԝам дькьн ԛәнщийе бькьн. 8 Ле Хԝәде ԝе хәзәб у һерса хԝә сәр ԝанда бьрʹежинә, йед кӧ шәрʹ-дәʹԝа һʹәз дькьн, гӧһ надьнә рʹастийе, ле пәй нәһәԛийе дьчьн. 9 Һәр мәрьве кӧ хьрабийе дькә ԝе тәнгасийе у щәфе бькʹьшинә, фьрԛи тʹӧнә әԝ Щьһу бә йан Йунан бә. 10 Ле һәр мәрьве кӧ ԛәнщийе дькә, ԝе рʹумәт, һӧрмәт у әʹдьлайе бьстинә, пешийе Щьһу у паше жи Йунан. 11 Чьмки Хԝәде фьрԛийе накә нава мәрьва.

12 Һәр кәсе кӧ бьн Ԛанунеда нибун у гӧнә кьрьнә, ԝе бе Ԛанун жи бьмьрьн. Ле һәр кәсе кӧ бьн Ԛанунеда ньн у гӧнә кьрьнә, әԝе ль гора Ԛануне бенә диԝанкьрьне. 13 Нә кӧ кәсе кӧ Ԛануне занә бәр чʹәʹве Хԝәде рʹаст ә, ле кәсе кӧ ль гора Ԛануне дьжи. 14 Ле гава мьләтед дьн, кӧ Ԛануне ньзаньн ԝан тьшта дькьн чь кӧ Ԛанун дьбежә, ӧса әԝана нишан дькьн ԝәки Ԛанун нав ԝанда йә. 15 Әԝана дьдьнә кʹьфше, ԝәки тьштед кӧ Ԛанун һин дькә дьле ԝанда ньвисар ьн, у исафа ԝан жи шәʹдәтийа ве йәке дьдә. Әԝана бь фькьред хԝә йан хԝә сущдар дькьн, йан жи хԝә һәԛ дәрдьхьн. 16 Анәгори ԝе мьзгинийа кӧ әз бәла дькьм, ԝе әԝ һʹәму тьшт ԝе рʹоже бьԛәԝьмә, гава Хԝәде бь сайа Мәсиһ Иса диԝана мәрьва бькә, бона кьред ԝан у фькьред ԝанә вәшарти.

17 Тӧ хԝә Щьһу һʹәсаб дьки, баԝәрийа хԝә ԛануне тини, у Хԝәдерʹа фьрнаԛ дьби. 18 Тӧ ԛьрара Хԝәде зани у тьштед рʹаст ԛәбул дьки, чьмки тӧ ль гора Ԛануне һати һинкьрьне. 19 Тӧ хԝәда баԝәр и, ԝәки тӧ бона кора рʹебәр и, бона ԝан йед кӧ тәʹрийеда ньн, рʹонайи йи, 20 ширәткʹаре нәзана йи, дәрсдаре зарʹа йи у һʹиме занәбуне у рʹастийа Ԛануне зани. 21 Тӧ, йе кӧ кәсед дьн һин дьки, чьрʹа хԝә һин наки? Тӧ дьбежи «Нәдьзә», ле хԝәха дьдьзи. 22 Тӧ дьбежи «Ԛавийе нәкә», ле тӧ хԝәха ԛавийе дьки. Тӧ дьбежи ԝәки пʹута нәфрʹәт дьки, ле тӧ пʹарьстгәһа тʹалан дьки. 23 Тӧ, йе кӧ фьрнаԛ дьби ԝәки ԛануна Хԝәде зани, чьрʹа Ԛануне пʹепәс дьки у бь ве йәке Хԝәде беһӧрмәт дьки? 24 Чаԝа кӧ Ньвисаред Пирозда һатийә ньвисаре: «Рʹуйе ԝәда нав мьләтед дьнда наве Хԝәде те беһӧрмәткьрьне».

25 Һәрге тӧ хԝә ль Ԛануне дьгьри, һьнге кʹара сьнәте һәйә. Ле һәрге тӧ хԝә ль Ԛануне нагьри, һьнге сьнәта тә дьбә бесьнәти. 26 Һәрге мәрьвәки нәсьнәткьри хԝә ль тʹәмийед Ԛанунейә рʹаст дьгьрә, әԝе бәр чʹәʹве Хԝәде сьнәткьри бе һʹәсабе, ӧса нинә? 27 Тә һинкьрьна дәрһәԛа сьнәте у Ԛануне стандийә, ле тӧ ль гора Ԛануне нажийи. Жь бо ве йәке кәсе нәсьнәткьри, йе кӧ ль гора Ԛануне дьжи, ԝе тә сущдар кә. 28 Чьмки Щьһуйе рʹаст нә тʹәне рʹува Щьһу йә, у сьнәт жи нә тʹәне сәр бәдәне те кьрьне. 29 Ле Щьһуйе рʹаст дьле хԝәда Щьһу йә, у сьнәта ԝи жи бь рʹӧһʹе пироз сәр дьле ԝи һатийә кьрьне, нә кӧ бь Ԛануна ньвисар. Кәсе ӧса нә кӧ жь мәрьва, ле жь Хԝәде пәсьна дьстинә.

3 Кʹара ве йәке чь йә, кӧ мәрьв Щьһу йә? Йан жи кʹара сьнәте чь йә? 2 Кʹара ве йәке гәләк ә: Мәсәлә, Хԝәде хәбәред хԝәйи пироз тʹәсмили Щьһуйа кьрьнә. 3 Аԝа һәрге жь ԝан һьнәк амьн нәман, гәло кембаԝәрийа ԝан те һʹәсабе кӧ Хԝәде нәамьн ә? 4 Һәмьки на! Һәрге һʹәму мәрьв дәрәԝа бькьн жи, Хԝәде ԝе һәртʹьм рʹастийе бежә. Чаԝа кӧ һатийә ньвисаре: «Тӧйе готьнед хԝәда рʹаст дәрейи, у тӧйе сәркʹәви гава тә сущдар кьн». 5 Нәһәԛийа мә һе зәлал нишан дькә кӧ Хԝәде һәԛ ә. Ижа Хԝәде нәһәԛ ә чахе хәзәба хԝә тинә сәр мә? (Әз ӧса дьбежьм, ча һьнә мәрьв дьфькьрьн.) 6 Тʹӧ щар на! Һәрге Хԝәде нәһәԛ бә, ԝе чаԝа диԝана дьнйайе бькә?

7 Ӧса жи һәрге дәрәԝийа мьн һе зедә нишан дькә, ԝәки Хԝәде рʹаст ә у һе зедә рʹумәте дьдә ԝи, ижа әз чьрʹа мина йәки гӧнәкʹар темә сущдаркьрьне? 8 У чьрʹа әм аһа набежьн: «Дә ԝәрә әм хьрабийе бькьн, ԝәки ԛәнщи дәре», чаԝа һьнә мәрьв шәрʹа мә гьли дькьн, кӧ йанчь әм ӧса дьбежьн? Әԝ мәрьв ԝе ль гора һәԛийе бенә диԝанкьрьне.

9 Ижа әм Щьһу жь кәсед дьн четьр ьн? Һәмьки на! Чаԝа кӧ мә ида готьбу, һьм Щьһу һьм жи Йунан бьн һʹӧкӧме гӧнәда ньн. 10 Ньвисаред Пирозда һатийә ньвисаре: «Мәрьве рʹаст тʹӧнә, ԛә йәк жи тʹӧнә. 11 Кәсәки кӧ фәʹм бькә тʹӧнә; кәсәки кӧ Хԝәде дьгәрʹә тʹӧнә. 12 Һʹәму мәрьв жь рʹе дәркʹәтьн у бекер бунә. Кәсәки кӧ ԛәнщийе дькә тʹӧнә, ԛә йәк жи тʹӧнә». 13 «Хәбәрдана ԝан, мәрьва дькӧжә.* Әԝана бь зьмане хԝә дәрәԝа дькьн». «Жәʹра мәʹра сәр левед ԝан ә». 14 «Дәве ԝан бь ньфьрʹа у гьлийед тәʹл тʹьжә йә». 15 «Ньгед ԝан хунрʹетьнерʹа ләз ьн». 16 «Рʹийед ԝан ԛәда-бәлайе тиньн, 17 у әԝана рʹийа әʹдьлайе ньзаньн». 18 «Тьрса Хԝәде дьле ԝанда тʹӧнә».

19 Әм заньн Ԛанун чь кӧ дьбежә бона ԝан ә, йед кӧ бьн Ԛанунеда ньн, ԝәки дәве һәр кәси бе дадане, у әшкәрә бә кӧ тʹәмамийа дьнйайе бәр Хԝәде нәһәԛ ә у һежайи щәзакьрьне йә. 20 Ләма жи тʹӧ кәс нькарә бәр чʹәʹве Хԝәде рʹаст бе һʹәсабе бь ве йәке кӧ хԝә ль Ԛануне дьгьрә. Бь рʹасти Ԛанун али мә дькә, ԝәки әм һе зәлал фәʹм кьн, кӧ гӧнә чь йә.

21 Ле ньһа әм фәʹм дькьн кӧ мәрьв бейи Ԛануне дькарә бәр чʹәʹве Хԝәде рʹаст бе һʹәсабе. Әв йәк Ԛанун у Ньвисаред Пʹехәмбәрада жи те готьне. 22 Бәле, һʹәмуйед кӧ баԝәрийа хԝә Иса Мәсиһ тиньн, дькарьн бәр чʹәʹве Хԝәде рʹаст бенә һʹәсабе, чьмки Хԝәде фьрԛийе накә ортʹа мәрьва. 23 Һʹәмуйа гӧнә кьрийә у нькарьн бьгьһижьнә рʹумәта Хԝәде. 24 Ле Мәсиһ Иса әԝана хьлаз кьрьн, кӧ бона гӧнә һәԛ да у ӧса әԝана бәр Хԝәде рʹаст һатьнә һʹәсабе. У әв йәк пʹешкʹеш ә, кӧ Хԝәде бь ԛәнщийа хԝәйә мәзьн дайә ԝан. 25 Хԝәде, Мәсиһ кьрә ԛӧрбан, сәва кӧ мәрьв бь сайа баԝәрийа һьндава хуна ԝи, тʹәви Хԝәде ль һәв бен.* Хԝәде әв йәк кьр, сәва кӧ һәԛийа хԝә бьдә кʹьфше. Бь ве йәке кӧ әԝи гӧнед кӧ пешда һатьбун кьрьне, дьбахшанд, әԝи сәбьра хԝә нишан дькьр 26 Ле әԝ ӧса жи һәԛийа хԝә мәрʹа нишан дькә бь ве йәке, кӧ рʹаст һʹәсаб дькә ԝи мәрьви, йе кӧ баԝәрийа хԝә Иса тинә.

27 Ижа ԛә мәʹни һәйә, ԝәки әм пʹайе хԝә бьдьн? На, ԛә мәʹник жи тʹӧнә. Гәло әм гәрәке пʹайе хԝә бьдьн, кӧ Ԛануне тиньн сери? На, әм гәрәке фьрнаԛ бьн кӧ әм пәй ԛануна баԝәрийе дьчьн. 28 Чьмки әм заньн ԝәки мәрьв пе баԝәрийа хԝә рʹаст те һʹәсабе, нә кӧ бь ве йәке кӧ әԝ хԝә ль Ԛануне дьгьрә. 29 Гәло Хԝәде тʹәне Хԝәдайе Щьһуйа йә? Нә әԝ Хԝәдайе мьләтед дьн ә жи? Бәле, әԝ Хԝәдайе һʹәму мьләта йә. 30 Чьмки Хԝәде йәк ә, әԝе һьм кәсед сьнәткьри, һьм жи кәсед нәсьнәткьри бь сайа баԝәрийа ԝан, ԝана рʹаст һʹәсаб кә. 31 Һәрге ӧса йә, гәло әм бь баԝәрийа хԝә Ԛануне бәтал дькьн? На! Әм пьштгьрийа Ԛануне дькьн.

4 Әм дәрһәԛа кал-баве мә Бьраһим чь дькарьн бежьн? 2 Һәрге Бьраһим пе кьра рʹаст бьһата һʹәсабе, мәʹнийа ԝи ԝе һәбуйа пʹайе хԝә бьда, ле нә ль бәр Хԝәде. 3 Ньвисаред Пироз чь дьбежьн? «Бьраһим баԝәрийа хԝә Йаһоԝа ани, у йәки рʹаст һатә һʹәсабе». 4 Мәрьве кӧ хәбатәке дькә, һәԛе хԝә нә кӧ ча пʹешкʹеш дьстинә, ле ча һәԛе кӧ ԝирʹа дькʹәвә. 5 Ле мәрьве кӧ гӧмана хԝә надә сәр кьред хԝә, ле баԝәрийа хԝә Хԝәде тинә, Хԝәдейе кӧ мәрьве гӧнәкʹар рʹаст һʹәсаб дькә, ԝе ԝи бона баԝәрийа ԝи рʹаст һʹәсаб кә. 6 Даԝьд жи сәр ԝи мәрьви дьбежә бәхтәԝар, кʹижани Хԝәде рʹаст һʹәсаб дькә, ле нә бона кьред ԝи. Әԝи ӧса гот: 7 «Чьԛас бәхтәԝар ьн әԝ мәрьв, йед кӧ кьред ԝанә хьраб һатьнә бахшандьне у гӧнед ԝан жи һатьнә биркьрьне. 8 Чьԛас бәхтәԝар ә мәрьве кӧ Йаһоԝа гӧне ԝи, ԝе бира хԝәда хԝәй нәкә».

9 Гәло тʹәне мәрьвед кӧ һатьнә сьнәткьрьне бәхтәԝар ьн? Йан мәрьвед кӧ нәһатьнә сьнәткьрьне жи дькарьн бәхтәԝар бьн? Чьмки әм дьбежьн: «Бьраһим пе баԝәрийа хԝә йәки рʹаст һатә һʹәсабе». 10 Гәло кʹәнге әԝ бь сайа баԝәрийа хԝә йәки рʹаст һатә һʹәсабе? Пешийа кӧ әԝ һатә сьнәткьрьне, йан паши сьнәткьрьне? Чахе һе нәһатьбу сьнәткьрьне. 11 Бәле, гава Бьраһим һе нәсьнәткьри бу, әԝ пе баԝәрийа хԝә йәки рʹаст һатә һʹәсабе. Әԝи нишанәк, демәк сьнәткьрьн ча мор станд, сәва кӧ бьбә баве һʹәму нәсьнәткьрийа, йед кӧ пе баԝәрийа хԝә рʹаст бьһатана һʹәсабе. 12 Бьраһим ӧса жи бу баве сьнәткьрийа, нә тʹәне йе сьнәткьрийа, ле йе ԝан жи, йед кӧ пʹегәһа баԝәрийа баве мә Бьраһимда дьчьн, кʹижан кӧ һе пешийа сьнәта ԝи һәбу.

13 Чьмки әԝ созе кӧ Бьраһим у зӧрʹәта ԝирʹа һатә дайине, ԝәки дьнйайе ԝар бьн, нә кӧ бь Ԛануне бу, ле бь ԝе йәке бу, кӧ әԝи баԝәр кьр у йәки рʹаст һатә һʹәсабе. 14 Һәрге әԝед кӧ хԝә ль Ԛануне дьгьрьн, бьбуна хԝәйе ԝар, һьнге баԝәри ԝе пʹучʹ буйа у әв соз жи бәтал буйа. 15 Бь рʹасти тʹәрʹьбандьна Ԛануне хәзәба Хԝәде пешда тинә, ле һәрге ԛанун тʹӧнә бә, тʹәрʹьбандьна ԛануне жи ԝе тʹӧнә бә.

16 Бь ԝи аԝайи, әм ви сози бь сайа баԝәрийе дьстиньн, чьмки әв ԛәнщийа Хԝәдейә мәзьн ә бона мә. Тʹәмамийа зӧрʹәта Бьраһим дькарә ви сози бьстинә, бәле, нә тʹәне йед кӧ хԝә ль Ԛануне дьгьрьн, ле ӧса жи йед кӧ баԝәрийа ԝан мина баԝәрийа Бьраһим ә, йе кӧ баве мә һʹәмуйа йә. 17 (Чаԝа кӧ Ньвисаред Пирозда ньвисар ә: «Мьн тӧ кьри баве гәләк мьләта».) Бьраһим баԝәрийа хԝә Хԝәде ани, Хԝәдайе кӧ мьрийа сах дькә у бона тьштед кӧ һе тʹӧнә нә, ӧса хәбәр дьдә, те бежи әԝ ида һәнә. 18 Рʹаст ә һʹиме гӧмана Бьраһим тʹӧнә бу, ле диса жи гӧмана ԝи һәбу, у әԝи баԝәр дькьр кӧ ԝе бьбә баве гәләк мьләта, чьмки Хԝәде жерʹа ӧса гот: «Зӧрʹәта тәйе аһа зедә бә». 19 Бьраһим баԝәрийеда сьст нәбу, рʹаст ә дьфькьри кӧ ԝирʹа ԝе зарʹ нәбьн, (чьмки әԝ әʹмьрда незики 100 сали бу), у Сәраһ жи ида пир буйә, нькарә зарʹа бинә, 20 ле жь бо созе кӧ Хԝәде дабу ԝи, әԝи баԝәр дькьр у тʹӧ щар дӧдьли нәдьбу. Баԝәрийа ԝи әԝ ԛәԝи дькьр, у әԝи рʹумәт дьда Хԝәде. 21 Әԝ бь тʹәмами баԝәр бу кӧ Хԝәде дькарә созе хԝә бинә сери. 22 Бь сайа баԝәрийа хԝә «әԝ йәки рʹаст һатә һʹәсабе».

23 Ле әв гьли «әԝ йәки рʹаст һатә һʹәсабе», нә тʹәне бона Бьраһим һатьнә ньвисаре, 24 ле ӧса жи бона мә. Әме жи ча кәсед рʹаст бенә һʹәсабе, чьмки әм Хԝәдайе кӧ Хӧдан Иса жь мьрьне рʹакьрийә, баԝәр дькьн. 25 Иса бона гӧнед мә һатә кӧштьне, у әԝ жь мьрьне һатә рʹакьрьне, ԝәки әм рʹаст бенә һʹәсабе.

5 Аԝа чьмки әм бь баԝәрийа хԝә рʹаст һатьнә һʹәсабе, ԝәрен әм бь сайа Хӧдане мә Иса Мәсиһ, тʹәви Хԝәде әʹдьлайеда ша бьн.* 2 Баԝәрийа мә һьндава Иса бона мә рʹе вәдькә, ԝәки әм незики Хԝәде бьн у ԛәнщийа Хԝәдейә мәзьн бьстиньн, кʹижане жи әм ньһа дьстиньн. У ԝәрен әм ша бьн,* чьмки гӧмана мә һәйә кӧ Хԝәде ԝе мә рʹумәт кә. 3 Ӧса жи ԝәрен әм ша бьн чахе әм тәнгасийа дькʹьшиньн, чьмки әм заньн кӧ тәнгаси сәбьре пешда тинә. 4 Сәбьр жи али мә дькә кӧ рʹазибуна Хԝәде бьстиньн, у рʹазибуна ԝи гӧмане дьдә мә, 5 у гӧман мә дьлтәнг накә, чьмки Хԝәде пе рʹӧһʹе пироз, кʹижан кӧ мәрʹа һатийә дайине, дьле мә бь һʹәзкьрьна хԝә тʹьжә кьрийә.

6 Гава әм һе бечʹарә* бун, Мәсиһ бона мә мәрьвед гӧнәкʹар ԝәʹде кʹьфшкьрида мьр. 7 Дьԛәԝьмә тʹӧ кәс һазьр нибә бона мәрьвәки рʹаст әʹмьре хԝә бьдә. Ле бона мәрьвәки ԛәнщ дьбәкә кәсәк һазьр бә әʹмьре хԝә бьдә. 8 Ле Хԝәде һʹәзкьрьна хԝә һьндава мәда да кʹьфше бь ԝе йәке, кӧ Мәсиһ бона мә мьр, гава әм һе гӧнәкʹар бун. 9 Әв йәк кӧ әм бь хуна Иса рʹаст һатьнә һʹәсабе, мә һе зедә дьдә баԝәркьрьне, кӧ әме жь хәзәба Хԝәде хьлаз бьн. 10 Рʹаст ә әм дьжмьнед Хԝәде бун, ле бь сайа мьрьна Кӧрʹе ԝи әм бунә достед ԝи.* Илаһи ньһа кӧ әм достед Хԝәде нә, әм дӧдьли набьн, кӧ бь сайа жийина Иса әме хьлаз бьн. 11 Ӧса жи, тьштед кӧ Хԝәде бь дәсте Хӧдане мә Иса Мәсиһ кьрьнә, мә ша дькьн, чьмки бь сайа ԝи әм ньһа бунә достед Хԝәде.

12 Чаԝа бь мәрьвәки гӧнә кʹәтә дьнйайе у жь гӧнә мьрьн һат, ӧса мьрьн дәрбази сәр һʹәму мәрьва бу, чьмки һʹәмуйа жи гӧнә кьр. 13 Һе пешийа Ԛануне, дьнйайеда гӧнә һәбу, ле һәрге ԛанун тʹӧнә, мәрьв нькарә сәва гӧнед хԝә бе сущдаркьрьне. 14 Жь рʹожед Адәм һʹәта рʹожед Муса, мьрьн пʹадшатийе дькә һәла һе сәр ԝан жи, гӧнед кʹижана мина йед Адәм нибун. Адәм жи мина ԝи кәси бу, йе кӧ гәрәке бьһата.

15 Ле пʹешкʹеша Хԝәде нә мина гӧне Адәм ә. Гәләк мәрьв сәва гӧне Адәм мьрьнә. Ле ԛәнщийа Хԝәде у пʹешкʹеша кӧ әԝи бь ԛәнщийа мәрьвәки, демәк Иса Мәсиһ, дайә, һе зедә йә. Бь сайа ве пʹешкʹеше, Хԝәде кʹәрәмед хԝә сәр гәләк мәрьвада дьбаринә. 16 Ӧса жи фьрԛийа ортʹа пʹешкʹеша Хԝәде у гӧне Адәм әв ә: Гӧне ви мәрьви бу сәбәб, ԝәки һʹәму мәрьв нәһәԛ һатьнә һʹәсабе, ле бь сайа пʹешкʹеша Хԝәде гәләк мәрьв рʹаст һатьнә һʹәсабе. 17 Һәрге жь бо гӧне мәрьвәки, мьрьне пʹадшати кьр, ле чьԛас һе зедә әм дькарьн баԝәр бьн, ԝәки бь сайа йәки, демәк Иса Мәсиһ, әԝед кӧ ԛәнщийа Хԝәдейә мәзьн у пʹешкʹеша рʹастийе дьстиньн, ԝе бьжин у пʹадшатийе бькьн.

18 Ләма жи чаԝа гӧнәк бу сәбәб, ԝәки һʹәму мәрьв нәһәԛ һатьнә һʹәсабе, һәма ӧса кьрьнәкә рʹаст бу мәʹни, кӧ гәләк мәрьв рʹаст тенә һʹәсабе у жийине дьстиньн. 19 Чаԝа кӧ бь нәгӧһдарийа мәрьвәки, гәләк бунә гӧнәкʹар, һәма ӧса бь гӧһдарикьрьна мәрьвәки, гәләк ԝе рʹаст бенә һʹәсабе. 20 Ԛанун һатийә дайине, сәва кӧ әшкәрә бә ԝәки мәрьв чьԛас гӧнәкʹар ьн. Ле кʹидәре гӧнә зедә буйә, ԛәнщийа Хԝәдейә мәзьн жи һе зедә буйә. 21 Чаԝа кӧ гӧнә пʹадшатийе дькә у мьрьне тинә, ԛәнщийа Хԝәдейә мәзьн жи ньһа бь сайа рʹастийе пʹадшатийе дькә у бь сайа Хӧдане мә Иса Мәсиһ, мә бәрбь жийина һʹәта-һʹәтайе дьбә.

6 Ижа әм ньһа чь бежьн? Гәло әм гәрәке бәрдәԝам кьн гӧнә бькьн, сәва кӧ ԛәнщийа Хԝәдейә мәзьн һьндава мәда зедә бә? 2 Һәмьки на! Әм бона гӧнә мьрьнә, ижа әм ча дькарьн бәрдәԝам кьн гӧнә бькьн? 3 Йан һун ньзаньн, ԝәки әм һʹәмуйед кӧ Иса Мәсиһда һатьнә ньхӧмандьне,* мьрьна ԝида жи һатьнә ньхӧмандьне? 4 Гава әм мьрьна ԝида һатьнә ньхӧмандьне, әм тʹәви ԝи һатьнә дәфьнкьрьне, сәва кӧ чаԝа Мәсиһ пе рʹумәта Бав жь мьрьне һатә рʹакьрьне, әм жи бь жийинәкә тʹәзә бьжин. 5 Һәрге әм мина ԝи мьрьн у ӧса тʹәви ԝи йәктийеда бун, әме ӧса жи тʹәви ԝи йәктийеда бьн, чахе мина ԝи жь мьрьне бенә рʹакьрьне. 6 Әм заньн кӧ шәхсийәта мәйә бәре тʹәви ԝи сәр стуне һатийә мьхкьрьне, сәва кӧ ԛәԝата гӧнә бәдәна мәда нәминә у әм ида гӧнәрʹа хӧламтийе нәкьн. 7 Чьмки гава мәрьв дьмьрә, әԝ жь гӧне хԝә аза дьбә.*

8 Әм тʹәви Мәсиһ мьрьнә, у әм баԝәр дькьн кӧ әме тʹәви ԝи бьжин жи. 9 Чьмки әм заньн ԝәки Мәсиһ кӧ жь мьрьне рʹабуйә, ида намьрә. Мьрьн ида сәр ԝи һʹӧкӧм накә. 10 Әԝ щарәке мьр, ԝәки гӧнә бьдә һьлдане. Ле ньһа әԝ дьжи, ԝәки ԛьрара Хԝәде бинә сери. 11 Һун жи хԝә бона гӧнә мьри һʹәсаб кьн, ле бьжин сәва кӧ ԛьрара Хԝәде биньн сери, чаԝа шагьртед Иса Мәсиһ.

12 Нәһельн кӧ гӧнә сәр жийина ԝә һʹӧкӧм кә, у ԝә мәщбур кә гӧрʹа хԝәстьнед бәдәна хԝә бькьн. 13 Бәдәнед хԝә нәдьнә гӧнә ча һащәтед бона хьрабийе.* Ле хԝә тʹәсмили Хԝәде бькьн, чаԝа мәрьвед кӧ жь мьрьне һатьнә рʹакьрьне у бәдәнед хԝә жи ча һащәтед бона ԛәнщийе* тʹәсмили Хԝәде кьн. 14 Бьра гӧнә сәр ԝә һʹӧкӧм нәкә, чьмки һун бьн Ԛанунеда ниньн, ле бьн ԛәнщийа Хԝәдейә мәзьнда ньн.

15 Ижа һәрге әм бьн Ԛанунеда ниньн, ле бьн ԛәнщийа Хԝәдейә мәзьнда ньн, әм гәрәке гӧнә бькьн? Тʹӧ щар на! 16 Һун ньзаньн кӧ һәрге һун мина хӧлама гӧһдарийа кәсәки дькьн, һун дьбьнә хӧламед ԝи? Һәрге һун хӧламед гӧнә нә, һуне бьмьрьн, һәрге һун хӧламед Хԝәде нә у гӧһ дьдьнә ԝи, һуне мәрьвнә рʹаст бенә һʹәсабе. 17 Ле шькьр Хԝәдерʹа, ԝәки рʹаст ә һун ԝәхтәке хӧламед гӧнә бун, ле ньһа һун гӧрʹа ве һинкьрьнеда ньн, кӧ ԝә стандийә. 18 Бәле, һун кӧ жь гӧнә аза бунә, һун бунә хӧламед рʹастийе. 19 Жь бо ԝе йәке кӧ һун кʹамьл ниньн, әз бь зьманәки һеса тʹәви ԝә хәбәр дьдьм. Ԝә ль гора хԝәстьнед бәдәна хԝә дькьр, у һун хӧламед һʹәрамийе у беԛанунийе бун. Ле ньһа һун гәрәке ль гора ԝан хԝәстьна бькьн, кʹижан кӧ ԝә дькьнә хӧламед тьштед рʹаст у пироз. 20 Чьмки гава һун хӧламед гӧнә бун, ԝә хӧламтийа тьштед рʹаст нәдькьр.

21 Һьнге ԝә жь кьред хԝә чь бәр дьстанд? Ԝә тьштед ӧса дькьр, жь бо кʹижана һун ньһа шәрм дькьн, у ахьрийа ԝан тьшта мьрьн ә. 22 Ле ньһа гава һун жь гӧнә аза бунә у бунә хӧламед Хԝәде, һун бәре пирозийе тиньн, у әԝ йәк бәрбь жийина һʹәта-һʹәтайе дьбә. 23 Чьмки һәԛе гӧнә мьрьн ә, ле пʹешкʹеша Хԝәде жийина һʹәта-һʹәтайе йә, кʹижан кӧ әԝ бь сайа Хӧдане мә Иса Мәсиһ дьдә мә.

7 Бьрано, һун ньзаньн ԝәки Ԛанун сәр мәрьв һʹӧкӧм дькә, һʹәта әԝ сах ә? (Әз ԝанрʹа хәбәр дьдьм, йед кӧ ԛануне заньн) 2 Мәсәлә, һʹәта кӧ мере кʹӧлфәта меркьри сах ә, әв кʹӧлфәт пе ԛануне ԝива гьредайи йә. Ле һәрге мере ԝе бьмьрә, әԝ һьнге жь ԛануна ԝи аза дьбә. 3 Һәрге мере ԝе һе сах ә у әԝ бьбә жьна мерәки дьн, әԝ ԛавийе дькә. Ле һәрге мере ԝе бьмьрә, әԝ жь ве ԛануне аза дьбә, у һәрге әԝ бьбә жьна мерәки дьн, әԝ ԛавийе накә.

4 Бь ви щурʹәйи, бьрано, бәдәна Мәсиһ һун жь Ԛануна Муса аза кьрьнә, сәва кӧ һун бьбьнә пʹара ԝи кәси, кӧ жь мьрьне һатә рʹакьрьне, ԝәки һун бәред баш Хԝәдерʹа биньн. 5 Гава мә ль гора хԝәстьнед бәдәне дьжит, Ԛануне әшкәрә кьр, ԝәки хԝәстьнед гӧнәкʹар бона бәдәна мә бунә мәʹнийа гӧнә. У әв гӧнә мә бәрбь мьрьне дьбә. 6 Ле әм бона Ԛануне мьрьн, ләма жи әм ньһа жь Ԛануне аза нә. Ньһа әм Хԝәдерʹа бь щурʹе тʹәзә хьзмәт дькьн, демәк бь рʹӧһʹ, нә кӧ бь щурʹе кәвьн, чаԝа кӧ Ԛанунеда ньвисар бу.

7 Ижа әм чь бежьн? Гәло Ԛанун гӧнә йә? Һәмьки на! Ԛануне нибуйа, мьне фәʹм нәкьра кӧ гӧнә бь рʹасти чь йә. Мәсәлә, һәрге Ԛанунеда ӧса нәһата готьне: «Һавьжийа хԝә тьштед хәлԛе нәйнә!»,* мьне ньзаньбуйа ԝәки дьлһавьжи нәрʹаст ә. 8 Ле гӧнә бь ве тʹәмийе нава мьнда һәр щурʹә дьлһавьжи пешда ани. Ле бейи ве Ԛануне, гӧнә мьри бу. 9 Бь рʹасти жи, гава Ԛанун һе тʹӧнә бу, әз сах бум, ле гава Ԛанун дәркʹәт, гӧнә сах бу у әз мьрьм. 10 У мьн дит ԝәки тʹәмийа кӧ гәрәке әз бәрбь жийине бьвьрама, әз бәрбь мьрьне бьрьм. 11 Гӧнә бь ве тʹәмийе әз хапандьм у әз кӧштьм. 12 Диса жи Ԛанун пироз ә у тʹәми жи пироз ә, рʹаст у ԛәнщ ә.

13 Ԝәки ӧса нә, тьштәки ԛәнщ әз кӧштьм? Һәмьки на! Гӧнә бу сәбәбе мьрьна мьн. Ԛанун ԛәнщ ә, ле әԝ әʹйан дькә кӧ гӧнә бу сәбәбе мьрьна мьн. Бь ви щурʹәйи, тʹәмийе да кʹьфше, ԝәки гӧнә бь рʹасти чьԛас хьраб ә. 14 Әм заньн кӧ Ԛанун жь Хԝәде йә,* ле әз бәндә мә* у ча дил гӧнәрʹа һатьмә фьротане. 15 Чьмки әз фәʹм накьм чь дькьм. Нә кӧ ԝи тьшти дькьм, чь кӧ дьхԝазьм, ле ԝи тьшти дькьм, чь кӧ бәр чʹәʹве мьн рʹәш ә. 16 Әз ԛәбул дькьм кӧ Ԛанун ԛәнщ ә, ле диса жи тьштед кӧ әз нахԝазьм бькьм, әз дькьм. 17 Ԝәки ӧса нә, нә кӧ әз ван тьшта дькьм, ле гӧне кӧ нав мьнда йә, дькә. 18 Әз заньм кӧ нав мьнда, демәк бәдәна мьнә гӧнәкʹарда, тьштәки ԛәнщ тʹӧнә. Әз дьхԝазьм тьштед ԛәнщ бькьм, ле нькарьм бькьм. 19 Тьштед ԛәнщ йед кӧ әз дьхԝазьм бькьм, әз накьм, ле тьштед хьраб, йед кӧ әз нахԝазьм бькьм, әз дькьм. 20 Һәрге әз ԝан тьшта дькьм чь кӧ нахԝазьм бькьн, ԝи чахи нә кӧ әз дькьм, ле гӧне кӧ нав мьнда йә, дькә.

21 Әз дәрәща хԝәда ве ԛануне дьвиньм: Гава әз дьхԝазьм тьште рʹаст бькьм, жь мьн хьраби дәрте. 22 Бь рʹасти әз кʹурайа дьле хԝәда ԛануна Хԝәде һʹәз дькьм. 23 Ле бәдәна хԝәда әз ԛанунәкә дьн дьвиньм, кʹижан кӧ тʹәви ԛануна һʹьше мьн шәрʹ дькә. Әв йәк мьн дькә диле ԛануна гӧнә, йа кӧ бәдәна мьнда йә. 24 Әз мәрьвәки һесир-бәләнгаз ьм! Кʹи ԝе мьн жь бәдәна кӧ мьн бәрбь мьрьне дьбә, хьлаз кә? 25 Шькьр Хԝәдерʹа, чьмки әԝ мьн бь Хӧдане мә Иса Мәсиһ хьлаз дькә! Бәле, бь һʹьше хԝә әз хӧламе ԛануна Хԝәде мә, ле бь бәдәна хԝә әз хӧламе ԛануна гӧнә мә.

8 Ләма жи әԝед кӧ тʹәви Иса Мәсиһ йәктийеда ньн, найенә диԝанкьрьне. 2 Ԛануна рʹӧһʹ, йа кӧ жийине дьдә йед кӧ тʹәви Иса Мәсиһ йәктийеда ньн, һун жь ԛануна гӧнә у мьрьне аза кьрьн. 3 Ԛануна Муса нькарьбу һун аза кьрана, чьмки мәрьв гӧнәкʹар у сьст ьн, ле Хԝәде әԝ йәк кьр. Әԝи Кӧрʹе хԝә бь бәдәна мина йа мәрьве гӧнәкʹар шандә дьнйайе, ԝәки гӧнә бьдә һьлдане. Ӧса Хԝәде диԝана гӧнә кьр, кӧ нава мәрьвада йә, 4 сәва кӧ әм бькарьбьн дәʹԝакьрьнед Ԛанунейә рʹаст биньн сери у ль гора рʹӧһʹ бьжин, нә кӧ ль гора бәдәна гӧнәкʹар. 5 Чьмки кәсед кӧ ль гора бәдәна гӧнәкʹар дьжин, сәр хԝәстьнед бәдәна гӧнәкʹар дьфькьрьн, ле кәсед кӧ ль гора рʹӧһʹ дьжин, сәр тьштед рʹӧһʹани дьфькьрьн. 6 Чьмки гава һʹьш-аԛьл сәр хԝәстьнед бәдәна гӧнәкʹар ә, әԝ бәрбь мьрьне дьбә. Ле гава һʹьш-аԛьл сәр тьштед рʹӧһʹани йә, әԝ бәрбь жийине у әʹдьлайе дьбә. 7 Һʹьш-аԛьле кʹе сәр хԝәстьнед бәдәна гӧнәкʹар ә, әԝ дьбә дьжмьне Хԝәде, чьмки бәдәна гӧнәкʹар гӧрʹа ԛануна Хԝәде накә, нә жи дькарә бькә. 8 Демәк әԝед кӧ ль гора бәдәна хԝәйә гӧнәкʹар дьжин, нькарьн Хԝәде хԝәш бен.

9 Ле һун ль гора бәдәна гӧнәкʹар нажин, һун ль гора рʹӧһʹ дьжин, һәрге бь рʹасти рʹӧһʹе Хԝәде нав ԝәда йә. Һәрге бал кәсәки рʹӧһʹе Мәсиһ тʹӧнә, әв мәрьв пʹара Мәсиһ нинә. 10 Рʹаст ә бәдәна ԝә жь бо гӧнә мьри йә, ле һәрге һун тʹәви Мәсиһ йәктийеда ньн, рʹӧһʹ ԝә сах дькә, чьмки һун рʹаст һатьнә һʹәсабе. 11 Рʹӧһʹе Хԝәде, Иса жь мьрьне рʹакьрийә. Һәрге әԝ рʹӧһʹ нав ԝәда йә, Әԝе кӧ Мәсиһ Иса жь мьрьне рʹакьрийә, ԝе бь ви рʹӧһʹе хԝәйи кӧ нав ԝәда йә, бәдәна ԝә жи йа кӧ дьмьрә, сах кә.

12 Ләма жи бьрано, әм борщдар ниньн гӧрʹа бәдәна хԝәйә гӧнәкʹар бькьн. 13 Һәрге һун ль гора бәдәна хԝәйә гӧнәкʹар бьжин, һуне бьмьрьн. Ле һәрге һун изьне бьдьн, ԝәки ԛәԝата рʹӧһʹе пироз хԝәстьнед бәдәна ԝәйә гӧнәкʹар бькӧжә, һуне бьжин. 14 Чьмки кәсед кӧ бьн рʹебәрийа рʹӧһʹе Хԝәдеда ньн, кӧрʹед Хԝәде нә. 15 Ԝә рʹӧһʹәки ӧса нәстандийә кӧ ԝә дькә хӧлам у дьтьрсинә. Ле ԝә әԝ рʹӧһʹ стандийә, йе кӧ ԝә дькә кӧрʹед Хԝәде. Бь ви рʹӧһʹи әм дькьнә гази: «Абба,* Баво!» 16 Рʹӧһʹе Хԝәде мәрʹа әʹйан дькә,* кӧ әм зарʹед Хԝәде нә. 17 Һәрге әм зарʹед ԝи нә, әв те һʹәсабе кӧ әм һьм ԝаред Хԝәде нә, һьм жи тʹәви Мәсиһ хԝәйиԝар ьн. Ле пешийе әм гәрәке мина ԝи щәфе бькʹьшиньн, ԝәки мина ԝи бенә рʹумәткьрьне.

18 Бь тʹәхмина мьн щәфед кӧ әм ньһа дькʹьшиньн, ԛә тьштәк ниньн һьмбәри рʹумәта кӧ ԝе мәрʹа әʹйан бә. 19 Һʹәму әʹфрин* һʹьзрәта ԝи ԝәʹдәйи нә, гава Хԝәде рʹумәта кӧрʹед хԝә әʹйан кә. 20 Чьмки әʹфьрин бәр байе бош-бәталийе кʹәтьн, нә кӧ бь хԝәстьна хԝә, ле Хԝәде әԝ йәк һишт. Ле әԝи гӧман жи да, 21 ԝәки әʹфрин жь дилтийа гӧнә у мьрьне аза бьн, у чаԝа зарʹед Хԝәде, азайа рʹумәти бьстиньн. 22 Чьмки әм заньн кӧ һʹәму әʹфрин һʹәта ньһа дьнальн у еше дькʹьшиньн. 23 Мә бәре пешьн стандийә, демәк рʹӧһʹе пироз, у әм жи дьнальн. Ле әм һʹьзрәта ԝи ԝәʹдәйи нә, кӧ Хԝәде мә ча кӧрʹед хԝә ԛәбул кә у аза кә жь бәдәнед мә, чьмки Иса бона мә һәԛ* да. 24 Әм пе ве гӧмане хьлаз бунә. Ле әԝ гӧмана кӧ һатийә сери, ида гӧман нинә, чьмки гава гӧмана бәндә те сери, әԝе ча диса гӧман бә? 25 Ле гава гӧмана мә сәр ԝан тьшта йә, чь кӧ мә нәстандийә, әм бь сәбьр бәрдәԝам дькьн һивийе бьн.

26 Ӧса жи гава әм сьст ьн, рʹӧһʹе пироз али мә дькә. Дьбәкә әм заньн кӧ гәрәке дӧа бькьн, ле ньзаньн сәва чь дӧа бькьн. У гава әм дьнальн у ньзаньн чь бежьн, рʹӧһʹе пироз хԝәха бона мә һиви дькә. 27 Хԝәдайе кӧ дьла дьхунә, занә рʹӧһʹ чь дьхԝазә, чьмки рʹӧһʹ ве йәке бона пироза һиви дькә, чь кӧ ль гора ԛьрара Хԝәде йә.

28 Әм заньн кӧ Хԝәде һʹәму кьред хԝә ӧса һәв тинә, ԝәки әԝ бона кʹара ԝан мәрьва бә, йед кӧ ԝи һʹәз дькьн у ль гора ԛьрара ԝи һатьнә газикьрьне. 29 Хԝәде серида әԝана бьжартьн у серида сафи кьр, кӧ әԝана бьбьнә мина Кӧрʹе ԝи, ԝәки әԝ ньхӧри бә нав гәләк бьрада. 30 Хԝәде гази ԝан кьр, йед кӧ әԝи бьжартьбу у әԝана рʹаст һʹәсаб кьрьн. Ахьрийеда Хԝәде әԝана рʹумәт кьрьн, йед кӧ әԝи рʹаст һʹәсаб кьрьн.

31 Ижа әм дәрһәԛа ван тьшта чь бежьн? Һәрге Хԝәде тʹәви мә йә, кʹи дькарә мьԛабьли мә бә? 32 Һәрге әԝи һʹәйфа хԝә Кӧрʹе хԝә нәани у бона мә һʹәмуйа кьрә ԛӧрбан, гәло әԝе жь ԛәнщийа хԝә һʹәму тьштед дьн жи нәдә мә? 33 Кʹи дькарә бьжартийед Хԝәде нәһәԛ дәрхә? Йе кӧ ԝана рʹаст һʹәсаб дькә, Хԝәде йә. 34 Кʹи дькарә ԝана сущдар кә? Чьмки Мәсиһ Иса мьр у жь мьрьне һатә рʹакьрьне, әԝе кӧ алийе мьле Хԝәдейи рʹасте йә у әԝе кӧ бона мә рʹәща дькә.

35 Чь дькарә мә жь һʹәзкьрьна Мәсиһ бьԛәтинә? Гәло тәнгаси, кӧл-дәрд, зерандьн, хәлайи-щәлайи, кʹәсиби,* хофи, йан зордари* дькарә мә жь һʹәзкьрьна Мәсиһ бьԛәтинә? 36 Ньвисаред Пироз дьбежьн: «Бона тә әм һәртʹьм бәр мьрьне нә. Мәрьв мә һʹәсаб дькьн ча пәзед бона сәржекьрьне». 37 Бь сайа ԝи, йе кӧ мә һʹәз дькә, әм ван һʹәму тьштада бь тʹәмами сәр дькʹәвьн. 38 Чьмки әз баԝәр ьм кӧ тʹӧ тьшт нькарә мә жь һʹәзкьрьна Хԝәде бьԛәтинә: Нә мьрьн, нә жийин, нә мәләк, нә сәрԝерти, нә тьштед ньһа, нә тьштед кӧ ԝе бен, нә ԛәԝат, 39 нә бьльндайи, нә кʹурайи, нә жи әʹфринәки дьн. Ԛә тʹӧ тьшт нькарә мә жь һʹәзкьрьна Хԝәде бьԛәтинә, йа кӧ бь сайа Хӧдане мә Мәсиһ Иса те әʹйанкьрьне.

9 Әз ча шагьрте Мәсиһ рʹастийе дьбежьм у дәрәԝа накьм. Исафа мьн, йа кӧ бьн рʹебәрийа рʹӧһʹе пирозда йә, шәʹдәтийа ве йәке дьдә, 2 кӧ дәрд у еша мәзьн дьле мьнда йә. 3 Мьне бьхԝәста ньфьрʹ ль мьн буйа у жь Мәсиһ ԛәтанди бума дәԝса бьред хԝә, мьләте хԝә. 4 Әԝана Исраели нә, у һатьнә бьжартьне кӧ бьбьнә зарʹед Хԝәде. Хԝәде рʹумәта хԝә нишани ԝан кьр, у пәйман, Ԛанун, соз у хьзмәтийа пироз жи да ԝан. 5 Әԝана зӧрʹәта кал-бавед мә нә, у Мәсиһ жи жь зӧрʹәта ԝан һат. Бьра Хԝәдайе кӧ ль сәр һʹәмуйарʹа йә, һʹәта-һʹәтайе бе рʹумәткьрьне. Амин.

6 Әв йәк найе һʹәсабе кӧ хәбәра Хԝәде нәһатийә сери. Чьмки нә һәр кәсе кӧ жь Исраел буйә, бь рʹасти Исраели йә. 7 Әԝана кӧ жь зӧрʹәта Бьраһим ьн, найе һʹәсабе ԝәки әԝана гьшк бь рʹасти зарʹед ԝи нә. Хԝәде Бьраһимрʹа готьбу: «Зӧрʹәта тә ԝе жь Исһаԛ бә». 8 Демәк нә һʹәму зарʹед Бьраһим зарʹед Хԝәде нә. Ле бь рʹасти зарʹед кӧ бь созе Хԝәде дьне кʹәтьнә, зӧрʹәта Бьраһим тенә һʹәсабе. 9 Чьмки Хԝәде әв соз дабу: «Саләкә дьн, ви чахи әзе бем, у ԝе кӧрʹәки Сәрайе һәбә». 10 Әв соз нә тʹәне һьнге һатьбу дайине, ле ӧса жи гава Рʹевека жь баве мә Исһаԛ щеԝийада һʹәмлә бу. 11 Һе әԝана дьне нәкʹәтьбун у тьштәки ԛәнщ йан хьраб нәкьрьбун, Хԝәде нишан дабу кӧ әԝе кʹижани бьжберә. Чьмки Хԝәде мәрьва нә ль гора кьред ԝан, ле ль гора ԛьрара хԝә дьжберә. 12 Хԝәде ԝерʹа гот: «Кӧрʹе мәзьн ԝе бьбә хӧламе кӧрʹе бьчʹук». 13 У чаԝа һатийә ньвисаре: «Мьн Аԛуб һʹәз кьр, ле Әсаԝ нәфрʹәт кьр».

14 Ижа әм чь бежьн? Нәһәԛийа Хԝәде һәйә? Һәмьки на! 15 Чьмки Хԝәде Мусарʹа гот: «Әз кʹе жи бьжберьм ԝәки рʹәʹма хԝә ле биньм, әзе рʹәʹма хԝә ԝи биньм, әз кʹе жи бьжберьм ԝәки һьндава ԝида дьлшәԝат бьм, әзе һьндава ԝида дьлшәԝат бьм». 16 Демәк әв хԝәстьн йан хирәта мерьвва гьредайи нинә, ле рʹәʹма Хԝәдева гьредайи йә. 17 Ньвисаред Пирозда Хԝәде Фьрәԝьнрʹа гот: «Мьн тӧ сах һишти, ԝәки әз ԛәԝата хԝә сәр тә нишан кьм у сәва наве мьн тʹәмамийа дьнйайеда әʹйан бә». 18 Аԝа Хԝәде кʹижана дьхԝазә те рʹәʹме у кʹижана дьхԝазә ԝана сәрһʹьшк дькә.

19 Тӧйе пьрсе бьди мьн: «Хԝәде чьрʹа мәрьва нәһәԛ дькә? Кʹи дькарә мьԛабьли ԛьрара ԝи рʹабә?» 20 Ле тӧ кʹи йи, ԝәки мьԛабьли гьлийе Хԝәде рʹадьби? Гәло щерʹ дькарә щерʹкәррʹа* бежә: «Тә чьма әз ӧса чекьрьмә?» 21 Гәло дәсте щерʹкәрда нинә, ԝәки әԝ жь һʹәрʹике, һьм фьраԛәкә бона дәрәщед мәхсус* у һьм жи фьраԛәкә бона хәбьтандьна һәррʹожи* чекә? 22 Ӧса жи Хԝәде. Әԝи дьхԝәст һерса хԝә сәр мәрьвед хьрабда бьрʹежә у ԛәԝата хԝә нишан кә. Ле диса жи әԝ һьндава мәрьвед кӧ һерса ԝи рʹадькьрьн у һежайи ԛьрʹкьрьне бун, гәләк бь сәбьр бу. 23 Әԝи әв йәк кьр, сәва кӧ рʹумәта хԝәйә мәзьн нишани ԝан мәрьва кә, йед кӧ һежайи рʹәʹма ԝи бун. Әԝи әԝана һазьр кьрьнә, ԝәки рʹумәте бьстиньн, 24 демәк әм, йед кӧ әԝи бьжартьнә нә тʹәне жь нав Щьһуйа, ле жь нав мьләтед дьн жи. 25 Чаԝа кӧ Хԝәде кʹьтеба Һосәйада готьбу: «Щьмәʹта кӧ нә щьмәʹта мьн ә, әзе нав кьм ‹щьмәʹта мьн›, у йа нәһʹәзкьри, әзе нав кьм ‹йа һʹәзкьри›. 26 У ԝи щийе кӧ ԝанрʹа һатә готьне, ‹Һун щьмәʹта мьн ниньн›, ԝедәре сәр ԝан ԝе бе готьне ‹кӧрʹед Хԝәдайе сах›».

27 Һьм жи Ишайа сәр Исраеле гот: «Һәрге һәжмара Исраелийа ԛаси ԛума бәʹре бә жи, тʹәне һьнә кәс ԝе хьлаз бьн. 28 Чьмки Йаһоԝа ԝе жь дьнйайе щабе бьхԝазә; әԝе фәрмана хԝә зу бинә сери». 29 Чаԝа кӧ Ишайа бәреда готьбу: «Һәрге Йаһоԝа, Хԝәдайе ордийа жь зӧрʹәта мә кәсәк сах нәһишта, әме бьбуна мина Содом у Гоморайе».

30 Ижа әм чь дькарьн бежьн? Рʹаст ә мәрьвед жь мьләтед дьн хԝә ль рʹастийе нәдьгьртьн, ле бь сайа баԝәрийа хԝә гьһиштьнә рʹастийе. 31 Исраелийа хирәт дькьр кӧ хԝә ль ԛануна рʹастийе бьгьрьн, ле диса жи ԝана нькарьбу ԝе ԛануне биньн сери. 32 Чьма? Чьмки ԝана хирәт дькьр нә кӧ бь баԝәрийе рʹаст бенә һʹәсабе, ле бь кьред хԝә. Әԝана ль «кәвьре лькʹӧмандьне» кʹәтьн. 33 Чаԝа кӧ Ньвисаред Пирозда те готьне: «Ва йә, әзе ль Сийоне кәвьрәки дайньм, йе кӧ ԝе бьбә сәбәбе кʹәтьна мәрьва, у әзе зьнарәки дайньм кӧ рʹийа ԝан бьгьрә, ле кәсе кӧ баԝәрийа хԝә ԝи тинә, ԝе дьлшкәсти нәбә».

10 Бьрано, хԝәстьна дьле мьн у дӧа-дьрозгед мьн Хԝәдерʹа әԝ ә, кӧ мьләте мьн хьлаз бә. 2 Әз дькарьм шәʹдәтийа ве йәке бьдьм, кӧ хирәта ԝан һьндава Хԝәдеда һәйә, ле әԝана ԛьрара Хԝәде бь тʹәмами фәʹм накьн. 3 Ԝана ньзаньбу кӧ бәр чʹәʹве Хԝәде чь рʹаст ә у бь ньһерʹандьна хԝә дькьрьн, ләма жи ԝана хԝә ль рʹастийа Хԝәде нәдьгьрт. 4 Мәсиһ, хьлазийа Ԛануне йә,* ләма һәр кәсе кӧ баԝәрийа хԝә ԝи тинә, ԝе рʹаст бе һʹәсабе.

5 Дәрһәԛа ве йәке кӧ ча ль гора Ԛануне бьгьһижьнә рʹастийе, Муса аһа дьньвисә: «Мәрьве кӧ ван тьшта дькә, ԝе бь сайа ԝан бьжи». 6 Дәрһәԛа рʹастийа кӧ жь баԝәрийе те, Хәбәра Хԝәде ӧса дьбежә: «Дьле хԝәда нәбежә: ‹Кʹи ԝе һьлкʹьшә ль әʹзмен?› (ԝәки Мәсиһ бинә хԝаре), 7 йан, ‹Кʹи ԝе дакʹәвә чʹәʹла бе бьни?› (ԝәки Мәсиһ жь мьрьне рʹакә)». 8 Ле Ньвисаред Пироз чь дьбежьн? «Хәбәр незики тә йә, сәр зар-зьмане тә у дьле тәда йә». Әв «хәбәр», хәбәра баԝәрийе йә, йа кӧ әм бәла дькьн. 9 Һәрге тӧ әшкәрә бежи ԝәки Иса Хӧдан ә, у дьле хԝәда баԝәр ки кӧ Хԝәде әԝ жь мьрьне рʹакьрийә, тӧйе хьлаз би. 10 Чьмки сәва кӧ тӧ рʹаст бейи һʹәсабе, гәрәке бь дьле хԝә баԝәр ки, ле сәва кӧ тӧ хьлаз би, гәрәке дәрһәԛа баԝәрийа хԝә мәрьварʹа гьли ки.

11 Чьмки Ньвисаред Пироз ӧса дьбежьн: «Кәсе кӧ ԝи баԝәр дькә, ԝе дьлшкәсти нәбә». 12 Нав Щьһу у Йунанада ԛә фьрԛи тʹӧнә. Хӧдане һʹәмуйа йәк ә. Әԝ бь мәрʹдани али ԝан һʹәму кәса дькә, йед кӧ гази ԝи дькьн. 13 Чьмки «һәр кәсе кӧ гази наве Йаһоԝа кә, ԝе хьлаз бә». 14 Ле һәрге әԝана ԝи баԝәр нәкьн, ԝе ча гази ԝи кьн? У һәрге ԝана дәрһәԛа ԝи ԛә нәбьһистийә, ԝе ча баԝәрийа хԝә ԝи биньн? Ле һәрге кәсәк дәрһәԛа ԝи әʹлам нәкә, ԝе чаԝа әԝана бьбьһен? 15 У ԝе чаԝа әʹлам кьн, һәрге нәйенә шандьне? Чаԝа кӧ Ньвисаред Пирозда те готьне: «Чьԛас хԝәш ә бьвиньн кәсед* кӧ мьзгинийе бәла дькьн!»

16 Ле һʹәмуйа мьзгини ԛәбул нәкьр. Чьмки Ишайа гот: «Йаһоԝа, кʹе хәбәра мә баԝәр кьрийә?» 17 Аԝа баԝәри жь бьһистьне те, у сәва мәрьв бьбьһен, гәрәке хәбәра дәрһәԛа Мәсиһ бе бәлакьрьне. 18 Ле әз дәрһәԛа Исраеле дьпьрсьм: Гәло мәщала ԝан тʹӧнә бу, кӧ бьбьһен? Бәле, мәщала ԝан һәбу. Чьмки Ньвисаред Пироз ӧса дьбежьн: «Дәнге ԝан тʹәмамийа дьнйайеда һатә бьһистьне, у хәбәра ԝан гьһиштә һʹәму ԛӧлбед дьнйайе». 19 Ле әз дьпьрсьм: Гәло Исраеле фәʹм нәкьр? Пешийе Муса гот: «Әзе ӧса бькьм кӧ һун һʹәвсудийа ԝан бькьн, йед кӧ мьләт ниньн. Әзе пе мьләтәки бефәʹм һерса ԝә рʹакьм». 20 Паше Ишайа бь мерхаси гот: «Кәсед кӧ әз нәдьгәрʹийам, ԝана әз дитьм; кәсед кӧ бона мьн нәдьпьрсин, әз нас кьрьм». 21 Ле әԝ дәрһәԛа Исраеле ӧса дьбежә: «Тʹәмамийа рʹоже мьн дәсте хԝә дьрежи мәрьвед нәгӧһдар у сәрһʹьшка дькьр».

11 Ижа әз дьпьрсьм: Гәло Хԝәде тʹәрка щьмәʹта хԝә да? Һәмьки на! Әз хԝәха жи Исраели мә, жь зӧрʹәта Бьраһим у бәрәка Бьнйамин ьм. 2 Хԝәде тʹәрка щьмәʹта хԝә нәда, йе кӧ әԝи жь дәстпеке бьжартьбу. Гәло һун ньзаньн кӧ Ньвисаред Пироз дәрһәԛа Елйас чь дьбежьн, у әԝи чаԝа Хԝәдерʹа газьне Исраелийа дькьр? 3 Әԝи гот: «Йаһоԝа, ԝана пʹехәмбәред тә кӧштьн у ԛӧрбангәһед тә һьлшандьн. Тʹәне әз мамә, у ньһа әԝана дьхԝазьн мьн жи бькӧжьн». 4 Ле Хԝәде ча щаба ԝи да? «Жь щьмәʹта мьн һе 7 000 мәрьв һәнә, йед кӧ сәре хԝә бәр Баәʹл данәнинә».* 5 Ньһа жи һәма ӧса йә. Кʹомәкә бьчʹук һәйә, йа кӧ Хԝәде бь ԛәнщийа хԝәйә мәзьн бьжартийә. 6 Һәрге Хԝәде әԝана бь ԛәнщийа хԝәйә мәзьн бьжартьнә, ԝәки ӧса нә әв йәк жь бо кьред ԝан нинә, йан на ԛәнщийа ԝийә мәзьн ԝе ида нәһата һʹәсабе ԛәнщийа мәзьн.

7 Ижа әм чь дькарьн бежьн? Тьште кӧ Исраели һʹьзрәт бун, нәстандьн, ле тʹәне ԝана станд, йед кӧ Хԝәде әԝана бьжартьбун. Йед майин нәдьхԝәстьн гӧһ бьдьн. 8 Чаԝа кӧ Ньвисаред Пирозда те готьне: «Хԝәде әԝана кьрьнә хәԝәкә кʹур, ԝәки чʹәʹвед ԝан нәвиньн у гӧһед ԝан нәбьһен, у әв йәк һʹәта рʹожа иро ӧса йә». 9 Ӧса жи Даԝьд дьбежә: «Бьра сьфра ԝан, ԝанрʹа бьбә тʹәльк у кәвьре лькʹӧмандьне, сәва кӧ әԝана бькʹәвьн у бенә щәзакьрьне. 10 Бьра чʹәʹвед ԝан тәʹри бә, ԝәки нәвиньн, у бьра пьшта ԝан бьн барәки гьранда хар бә».

11 Ижа пьрса мьн әв ә: Гәло Щьһу лькʹӧмин у кʹәтьн, ԝәки ида рʹанәбьн? Һәмьки на! Ле бь гаве ԝанә шаш, рʹе вәбу кӧ мәрьвед жь мьләтед дьн бькарьбьн хьлаз бьн, у әв бу сәбәбе һʹәвсудийа Щьһуйа. 12 Аԝа һәрге жь бо гава ԝанә шаш кʹәрәм кʹәтә дьнйайе, у бь кембуна һәжмара ԝан мәрьвед жь мьләтед дьн һе зедә кʹәрәма дьстиньн, ижа чахе һәжмара Щьһуйа у мьләтед дьн тʹәмам бә, әԝана ԝе чьԛас зедә кʹәрәма бьстиньн!

13 Ньһа әз ԝәрʹа, йед кӧ жь мьләтед дьн ьн, дьбежьм: Әз ча шанди бона мьләтед дьн, хьзмәтийа хԝә ԛимәт дькьм. 14 Ӧса жи әз гӧман ьм, кӧ әзе бькарьбьм бь тьштед кӧ ԝә стандьнә, нав мьләте хԝәда һʹәвсудийе пешда биньм, ԝәки жь ԝан һьнәка хьлаз кьм. 15 Хԝәде тʹәрка ԝан да, у бь ви щурʹәйи рʹе бона һʹәму мәрьвед дьнйайе вәбу, ԝәки тʹәви Хԝәде ль һәв бен. Һәрге Хԝәде ԝана ньһа ԛәбул кә, нә әԝ ԝе мина ве йәке бә кӧ әԝана жь мьрьне вәдьгәрʹьн жийине? 16 Һәрге пʹарәкә һәвир, йа кӧ ча бәре пешьн һатийә һьлдане, пироз ә, тʹәмамийа һәвир жи пироз ә. У һәрге кʹока даре пироз ә, чʹьԛьл жи пироз ьн.

17 Ле һәрге чәнд чʹьԛьл жь даре һатьнә шкенандьне, һьнге тӧ, йе кӧ чʹьԛьле дара зәйтʹунейә бәйани буйи, дәԝса ԝан һати певакьрьне,* у тʹәви ԝан тӧ жь кʹока дара зәйтʹуне кʹаре дьстини. 18 Ле нәфькьрә кӧ тӧ жь чʹьԛьлед дьн четьр и. Һәрге тӧ дьфькьри кӧ жь ԝан четьр и, бир нәкә ԝәки нә кӧ тӧ кʹоке дьгьри, ле кʹок тә дьгьрә. 19 Һьнге тӧйе бежи: «Чʹьԛьлед дьн һатьнә шкенандьне, ԝәки әз дарева бемә певакьрьне». 20 Әре, рʹаст ә! Әԝана шкәстьн, чьмки баԝәрийа ԝан тʹӧнә бу, ле тӧ бь сайа баԝәрийа хԝә ԛәԝи сәкьни йи. Ләма ԛӧрʹә нәбә, ле һаж хԝә һәбә. 21 Чьмки һәрге һʹәйфа Хԝәде чʹьԛьлед әʹсьли нәһат, һʹәйфа ԝи ԝе тә жи нәйе. 22 Дина хԝә бьдьнә ԛәнщи у сәртбуна Хԝәде. Әԝ һьндава кәсед кӧ кʹәтьнә, сәрт ә, чьмки баԝәрийа ԝан тʹӧнә бу. Ле һәрге тӧ ԛәнщийа ԝида бьмини, Хԝәде ԝе һьндава тәда ԛәнщ бә. Йан на, тӧйе жи жь даре бейи бьрʹине. 23 Һәрге Щьһу нава нәбаԝәрийеда нәминьн, ԝе бенә певакьрьне, чьмки Хԝәде диса дькарә ԝан пева кә. 24 Тӧ жь дара зәйтʹунейә бәйани һати бьрʹине, у мьԛабьли тʹәбийәта хԝә дара зәйтʹунейә бахчәва һати певакьрьне. Ижа ԝе чьԛас һеса бә, кӧ чʹьԛьлед әʹсьли дара хԝәйә зәйтʹунева бенә певакьрьне!

25 Бьрано, әз дьхԝазьм кӧ һун һаж жь ве сӧрʹа пироз һәбьн, ԝәки һун чʹәʹве хԝәда хԝә дәԝса билана данәйньн: Һʹәта кӧ һәжмара мәрьвед жь мьләтед дьн, йед кӧ һатьнә бьжартьне, тʹәмам нәбә, һьнә Исраели ԝе сәрһʹьшк бьминьн. 26 Бь ви щурʹәйи тʹәмамийа Исраеле ԝе хьлаз бә. Чаԝа кӧ Ньвисаред Пирозда те готьне: «Жь Сийоне Хьлазкʹарәк ԝе дәркʹәвә, у әԝе хьрабийе жь зӧрʹәта Аԛуб дур хә. 27 У әв ә пәймана мьнә тʹәви ԝан, гава әз гӧнед ԝан бьбахшиньм». 28 Бәле, әԝана бунә дьжмьнед мьзгинийе, у әв йәк бона кʹара ԝә йә. Ле Хԝәде әԝана бьжартьнә, у ԝана һʹәз дькә бона хатьре кал-бавед ԝан. 29 Хԝәде ԝе пʹошман нәбә бона пʹешкʹешед кӧ әԝ дьдә у бона кәсед кӧ әԝ дьжберә. 30 Ԝәхтәке ԝә гӧһдарийа Хԝәде нәдькьр, ле ньһа жь бо нәгӧһдарийа Щьһуйа, Хԝәде рʹәʹма хԝә ԝә ани. 31 Ньһа әԝана нәгӧһдар ьн, у Хԝәде рʹәʹма хԝә ԝә тинә. Ле әԝ дькарә рʹәʹма хԝә ԝан жи бинә, чаԝа кӧ ль ԝә ани. 32 Хԝәде әԝ һʹәму кьрьнә гьртийед нәгӧһдарийе, ԝәки әԝ бькарьбә рʹәʹма хԝә ԝан һʹәмуйа бинә.

33 Чьԛаси кʹур ьн дәԝләмәндти, сәрԝахти у занәбуна Хԝәде! Гәло кʹи дькарә ԛьраред ԝи фәʹм бькә, у кʹи дькарә рʹийед ԝи бьзаньбә? 34 «Гәло кʹи фькьред Йаһоԝа занә, у кʹи дькарә ширәте бьдә ԝи?» 35 Йан «Кʹи пешийе тьштәк дайә Хԝәде, кӧ Хԝәде гәрәке ль ԝи вәгәрʹинә?» 36 Чьмки һәр тьшт жь Хԝәде йә, бь ԝи йә у бона ԝи йә. Әԝ һәр у һәр һежайи рʹумәте йә. Амин.

12 Бьрано, әз һиви жь ԝә дькьм бона ԝе дьлшәԝатийа Хԝәде, һун бәдәнед хԝә ча ԛӧрбанәкә сах, пироз у ль Хԝәде хԝәш, пʹешкʹеши ԝи бькьн. У һʹьш-аԛьле хԝә бьдьнә хәбате, ԝәки Хԝәдерʹа хьзмәт кьн. 2 У ида изьне нәдьнә ве дьнйайе кӧ сәр ԝә һʹӧкӧм кә, ле щурʹе фькьрандьна хԝә бьгӧһезьн, ԝәки һун хԝәха ԛьрара Хԝәде фәʹм бькьн, йа кӧ ԛәнщ ә, хԝәш ә у бекемаси йә.

3 Чьмки Хԝәде мьнрʹа ԛәнщийа мәзьн кьрийә, ләма әз жь ԝә һʹәмуйа рʹәща дькьм кӧ чьԛас ԝә дькʹәвә, жь ԝе зедәтьр сәр хԝә нәфькьрьн. Ле бьра һәр кәс жь ԝә ль гора баԝәрийа кӧ Хԝәде дайә ԝә, бь сәрԝахти бьфькьрә. 4 Чьмки бәдәнәкеда гәләк әндәм һәнә, ле кьред ԝан жь һәв щӧдә нә. 5 Мина ве йәке, әм чьԛас гәләк бьн жи, әм бәдәнәк ьн, чьмки әм тʹәви Мәсиһ йәктийеда ньн у һәвва гьредайи нә. 6 Жь бо ԛәнщийа мәзьн кӧ Хԝәде бона мә кьрийә, мә һәр кәси щурʹә-щурʹә пʹешкʹеш стандийә. Һәрге мә пʹешкʹеша пʹехәмбәртийе стандийә, ԝәрен әм ль гора баԝәрийа хԝә пʹехәмбәртийе бькьн; 7 һәрге йа хьзмәтийе стандийә, ԝәрен әм чьԛас дькарьн хьзмәт кьн; һәрге йа һинкьрьне стандийә, ԝәрен әм чьԛас дькарьн һин кьн. 8 Һәрге пʹешкʹеша мә әԝ ә, кӧ әм дьле мәрьва ԛәԝи кьн, ԝәрен әм дьла ԛәԝи кьн. Һәрге пʹешкʹеша мә дайин ә, ԝәрен әм бь мәрʹдани бьдьн. Йе кӧ рʹебәрийе дькә, бьра бь хирәт рʹебәрийе бькә. Йе кӧ дьлрʹәʹмтийе дьдә кʹьфше, бьра ве йәке бь дьл у щан бькә.

9 Бьра һʹәзкьрьна ԝәда дӧрʹути тʹӧнә бә. Хьрабийе нәфрʹәт кьн у хԝә ль тьште ԛәнщ бьгьрьн. 10 Бьра һʹәзкьрьн у дьлгәрми нав ԝәда һәбә. Ԛәдьргьртьнеда һун гава пешьн бавежьн. 11 Хәбатһʹәз* бьн, нә кӧ тʹәмбәл бьн. Бьра рʹӧһʹе пироз дьле ԝәда агьре хирәте вехә. Бь тʹәмамийа дьле хԝә Йаһоԝарʹа хьзмәт кьн. 12 Бь гӧмана хԝә ша бьн. Тәнгасийед хԝәда сәбьр кьн. Һәр гав дӧа бькьн. 13 Аликʹарийе бьдьнә щьмәʹта Хԝәде,* ль гора һʹәԝщед ԝан. Тʹьме мәщала бьгәрʹьн кӧ меванһʹәзийе бьдьнә кʹьфше. 14 Дӧа ль ԝан бькьн йед кӧ ԝә дьзериньн, бәле дӧа ль ԝан бькьн, у ньфьрʹа ль ԝан нәкьн. 15 Тʹәви йед ша дьбьн ша бьн у тʹәви йед дьгьрин бьгьрин. 16 Һун чаԝа дәрһәԛа хԝә дьфькьрьн, дәрһәԛа кәсед дьн жи ӧса бьфькьрьн. Бь зедәйи сәр хԝә нәфькьрьн, ле хԝәйе ньһерʹандьнәкә мьлук бьн. Һун чʹәʹве хԝәда хԝә дәԝса билана данәйньн.

17 Гава мәрьв хьрабийе ль ԝә дькьн, һун хьрабийе ль ԝан нәкьн. Чь бәр чʹәʹве һʹәму мәрьва ԛәнщ ә, ԝе бькьн. 18 Чьԛас жь дәсте ԝә те, тʹәви һʹәму мәрьва әʹдьлайеда бьн. 19 Дәлално, һʹәйфе һьлнәдьн, ле щи бьдьнә хәзәба Хԝәде, чьмки Ньвисаред Пирозда ӧса те готьне: «Йаһоԝа дьбежә: ‹Һʹәйфһьлдан йа мьн ә; әзе һʹәйфе һьлдьм». 20 Ле тӧ ӧса бькә: «Һәрге дьжмьне тә бьрʹчи йә, хԝарьне бьдә ԝи. Һәрге әԝ тʹи йә, аве бьдә ԝи. Һәрге тӧ ӧса бьки, тӧйе дьле ԝи нәрм ки».* 21 Нәһелә кӧ хьраби сәр тә кʹәвә, ле бь ԛәнщийе тӧ сәр хьрабийе кʹәвә.

13 Һәр мәрьвәк бьра гӧрʹа ԝан һʹӧкӧмәтийада бә, йед кӧ сәр ԝирʹа ньн, чьмки һәр һʹӧкӧмәти жь Хԝәде йә. Кәсед кӧ ньһа һʹӧкӧм дькьн, ԝи щийи дьгьрьн, кʹижан кӧ Хԝәде изьн дайә ԝан. 2 Ләма жи кʹи мьԛабьли һʹӧкӧмәтийе рʹадьбә, әԝ мьԛабьли тʹәрбәтийа жь Хԝәде рʹадьбә. Әԝе кӧ мьԛабьли ве тʹәрбәтийе рʹадьбә, ԝе бе диԝанкьрьне. 3 Нә кӧ йед ԛәнщийе дькьн жь сәрԝера дьтьрсьн, ле йед кӧ хьрабийе дькьн. Нәлазьм ә тӧ жь сәрԝера бьтьрси. Һәрге тӧ ԛәнщийе бьки, әԝана ԝе пәсьне тә бьдьн. 4 Чьмки әԝана хӧламед Хԝәде нә бона кʹара тә. Ле һәрге тӧ хьрабийе дьки, бьтьрсә, чьмки шур бадиһәԝа дәсте ԝанда нинә. Әԝана хӧламед Хԝәде нә у ԝан мәрьва щәза дькьн, йед кӧ хьрабийе дькьн.

5 Ләма жи мәʹнийа тәйә баш һәйә, кӧ гӧрʹа ԝан бьки, ԝәки нә тʹәне жь һерса ԝан бьрʹәви, ле ӧса жи исафа тә рʹьһʹәт бә. 6 Ләма тӧ хәрща жи дьди, чьмки сәрԝер хӧламед Хԝәде нә, йед кӧ тʹьме бона кʹара мәрьва ԛӧльх дькьн. 7 Кʹерʹа чь дькʹәвә, бьдьне: кʹерʹа хәрщ, хәрщ бьдьне, кʹерʹа ԛәдьр, ԛәдьре ԝи бьгьрьн, кʹерʹа һӧрмәт, һӧрмәте бьдьне.

8 Тʹӧ тьштида нәбьнә дәйндаре тʹӧ кәси, хенщи һәвдӧһʹәзкьрьнеда. Кәсе кӧ мәрьва һʹәз дькә, ԛанун анийә сери. 9 Чьмки ԛанун дьбежә: «Ԛавийе нәкә, нәкӧжә, нәдьзә, һавьжийа хԝә тьштед хәлԛе нәйнә», у һәр ԛанунед дьн жи кӧ һәнә, дькʹәвьнә нава ве готьне: «Мәрьва һʹәз бькә чаԝа тӧ хԝә һʹәз дьки». 10 Һʹәзкьрьн мәрьварʹа хьрабийе накә; ләма жи һʹәзкьрьн Ԛануне тинә сери.

11 Ве йәке бькьн, чьмки һун заньн кӧ ԝәхт ида һатийә, ԝәки һун жь хәԝе һʹьшйар бьн. Ньһа хьлазбун дьһа незики мә йә, нә кӧ һьнге гава әм бунә баԝәрмәнд. 12 Шәв дәрбаз дьбә у рʹож незик буйә. Аԝа ԝәрә әм кьред тәʹристанийе жь хԝә дур хьн, у чʹәкед рʹонайе ль хԝә кьн. 13 Бьра рʹабун-рʹуньштьна мә лайиԛ бә, чаԝа бьн рʹонайа рʹожеда. Бьра әм хԝә жь ван тьшта дур бьгьрьн: Жь кʹефкьрьна бесинор у нәщайиз, сәрхԝәшийе, бенамусийе, рʹабун-рʹуньштьна нәщайиз, шәрʹ-дәʹԝа у һʹәвсудийе. 14 Ле чʹәʹв бьдьнә мәсәла Хӧдан Иса Мәсиһ, у нәфькьрьн кӧ чаԝа хԝәстьнед бәдәна гӧнәкʹар рʹази кьн.

14 Йе кӧ баԝәрийеда сьст ә, ԛәбул кьн. У һәрге ньһерʹандьна кәсәки жь ньһерʹандьна ԝә щӧдә дьбә, ԝи сущдар нәкьн. 2 Әԝе кӧ баԝәрийеда ԛәԝи йә, һәр тьшти дьхԝә. Ле әԝе кӧ баԝәрийеда сьст ә, тʹәне сәбзә* дьхԝә. 3 Әԝе кӧ һәр тьшти дьхԝә, бьра хԝә сәр ԝирʹа нәгьрә, йе кӧ һәр тьшти нахԝә. У әԝе кӧ һәр тьшти нахԝә, бьра кәсе кӧ һәр тьшти дьхԝә сущдар нәкә. Чьмки Хԝәде әв мәрьв ԛәбул кьрийә. 4 Тӧ кʹи йи ԝәки хӧламе хәлԛе сущдар дьки? Ԝе ахайе ԝи сафи кә әԝ рʹаст ә йан нәрʹаст ә.* Бь аликʹарийа Йаһоԝа әв мәрьв дькарә пешдачуйи бә.*

5 Бона кәсәки рʹожәк жь рʹожед дьн фәрзтьр ә, ле бона йәки дьн һʹәму рʹож жи ԝәкә һәв ьн. Бьра һәр мәрьв сафикьрьна хԝәда бь тʹәмами баԝәр бә. 6 Әԝе кӧ рʹожәке дьһа фәрз һʹәсаб дькә, ве йәке бона Йаһоԝа дькә. Әԝе кӧ һәр тьшти дьхԝә, бона Йаһоԝа дьхԝә, чьмки әԝ бона хԝарьне шькьрийе дьдә Хԝәде. У әԝе кӧ нахԝә, әԝ бона Йаһоԝа нахԝә, ле йәкә шькьрийе дьдә Хԝәде. 7 Тʹӧ кәс жь мә тʹәне сәва хԝә нажи, у тʹӧ кәс жь мә тʹәне сәва хԝә намьрә. 8 Чьмки һәрге әм дьжин, бона Йаһоԝа дьжин, у һәрге әм дьмьрьн, бона Йаһоԝа дьмьрьн. Ләма жи фьрԛи тʹӧнә әм дьжин йан дьмьрьн, әм пʹара Йаһоԝа нә. 9 Бона ве йәке жи Мәсиһ мьр у вәгәрʹийа жийине, сәва кӧ әԝ һьм бона кәсед мьри, һьм жи бона кәсед сах бьбә Хӧдан.

10 Ле тӧ чьма бьре хԝә сущдар дьки? Йан тӧ чьма хԝә сәр бьре хԝәрʹа дьгьри? Әм һʹәмуйе бәр Хԝәде бьсәкьньн, у әԝе диԝана мә һʹәмуйа бькә. 11 Чьмки Ньвисаред Пирозда ӧса те готьне: «Йаһоԝа дьбежә: ‹Әз сәре хԝә сонд дьхԝьм, һәр кәс ԝе бәр мьн бькʹәвә сәр чока, у һәр кәс ԝе ԛәбул кә ԝәки Хԝәде әз ьм›». 12 Һьнге, һәр йәк жь мә ԝе бона хԝә бәр Хԝәде щабе бьдә.

13 Ләма ԝәрә әм ида һәвдӧ сущдар нәкьн. Ле дәԝсе чь жь дәсте ԝә те бькьн, ԝәки һун баԝәрийа бьре хԝә сьст нәкьн у ԝи нәбьнә бәрбь гӧнә. 14 Әз ча шагьрте Хӧдан Иса, баԝәр ьм ԝәки һәр тьште кӧ әм дьхԝьн, һʹәрам нинә. Ле һәрге кәсәк дьфькьрә кӧ тьштәк һʹәрам ә, әԝ бона ԝи һʹәрам ә. 15 Һәрге тӧ бь хԝарьна хԝә дьле бьре хԝә жь хԝә дьһели, тӧ ида һʹәзкьрьне нади кʹьфше. Бь хԝарьна хԝә, баԝәрийа ԝи ӧнда нәкә, бона кʹижани Мәсиһ мьр. 16 Тьште кӧ тӧ һʹәсаб дьки рʹаст ә жи нәкә, һәрге әԝе бьбә мәʹни кӧ мәрьв сәр тә хьраб хәбәр дьн. 17 Чьмки Пʹадшатийа Хԝәде нә кӧ хԝарьн у вәхԝарьнева гьредайи йә, ле рʹасти, әʹдьлайи у шабунева гьредайи йә, кʹижана кӧ рʹӧһʹе пироз дьдә. 18 Йе кӧ бь ви щурʹәйи Мәсиһрʹа хьзмәт дькә, дьле Хԝәде хԝәш те у мәрьв жь ԝи рʹази нә.

19 Ләма жи ԝәрен чь жь дәсте мә те әм бькьн, ԝәки нав мәда әʹдьлайи һәбә у әм һәвдӧ ԛәԝи кьн. 20 Рʹуйе хԝарьнеда шьхӧле Хԝәде хьраб нәкьн. Рʹаст ә һʹәму хԝарьн һʹәлал ә, ле әԝ хԝарьна кӧ дькарә кәсәки бәрбь гӧнә бьвә, тӧ гәрәке нәхԝи. 21 Йа баш әԝ ә кӧ тӧ нә гошт бьхԝи, нә шәраве вәхԝи у нә жи тьштәки ӧса бьки, чь кӧ дькарә бьбә сәбәб, ԝәки бьре тә гӧнә бькә. 22 Тӧ чь жи баԝәр дьки, бьра нав тә у Хԝәдеда бьминә. Бәхтәԝар ә кәсе кӧ хԝә сущдар накә бона тьштед кӧ ль гора ньһерʹандьна ԝи рʹаст ьн. 23 Һәрге мәрьвәк дькʹәвә бьн шьке, ԝәки фьлан тьшти бьхԝә йан на, ле диса жи дьхԝә, әԝ ида нәһәԛ дәрте, чьмки әԝ бе баԝәри дькә. Һәр тьште кӧ мәрьв бе баԝәри дькә, гӧнә йә.

15 Әм кӧ баԝәрийеда ԛәԝи нә, гәрәке кемасийед кәсед сьст һьлдьн һʹәсаб у тʹәне кʹара хԝә нәгәрʹьн. 2 Һәр йәк жь мә гәрәке хирәт кә кӧ бькʹәвә һʹәйра кәсе дьн у тьште кӧ бона ԝи ԛәнщ ә, бькә, ԝәки ԝи бьшьдинә. 3 Чьмки Мәсиһ жи кʹара хԝә нәдьгәрʹийа. Чаԝа Ньвисаред Пирозда те готьне: «Беһӧрмәткьрьна кәсед кӧ тә беһӧрмәт дькьн, һатә сәр мьн». 4 Чьмки һәр тьштед кӧ Ньвисаред Пирозда пешда һатьнә ньвисаре, бона һинкьрьна мә һатьнә ньвисаре, ԝәки пе сәбьре у дьлбинийа кӧ Ньвисаред Пироз дьдьнә мә, гӧмана мә һәбә. 5 Бьра Хԝәдайе кӧ сәбьр у дьлбинийе дьдә ԝә, али ԝә бькә кӧ ньһерʹандьна ԝә жи мина ньһерʹандьна Мәсиһ Иса бә. 6 Бь ви щурʹәйи, һуне йәктийеда рʹумәте бьдьнә Хԝәде, Баве Хӧдане мә Иса Мәсиһ.

7 Чаԝа кӧ Мәсиһ һун ԛәбул кьрьн, гәрәке һун жи һәвдӧ ԛәбул кьн. Әв йәк рʹумәте дьдә Хԝәде. 8 Әз ԝәрʹа дьбежьм: Мәсиһ бу хьзмәткʹаре Щьһуйа,* ԝәки нишан кә кӧ Хԝәде рʹаст ә у избат кә, ԝәки созед кӧ Хԝәде данә кал-бавед мә, бь итʹбар ьн, 9 у ԝәки мьләтед дьн бона рʹәʹма ԝи рʹумәте бьдьнә Хԝәде. Чаԝа кӧ Ньвисаред Пирозда те готьне: «Ләма әзе нав мьләтада шькьрийе бьдьмә тә у бь кʹьлама пәсьне наве тә бьдьм». 10 У ӧса жи те готьне: «Мьләтно, щьмәʹта ԝирʹа ша бьн». 11 Ӧса жи те готьне: «Һун, һʹәму мьләтно, пәсьне Йаһоԝа бьдьн, бьра һʹәму щьмәʹт пәсьне ԝи бьдьн». 12 Ӧса жи Ишайа дьбежә: «Кʹока Йеша ԝе дәркʹәвә, әԝе рʹабә кӧ сәр мьләтарʹа сәрԝертийе бькә. У мьләт ԝе гӧмана хԝә бьдьнә сәр ԝи». 13 Бьра Хԝәдайе кӧ гӧмане дьдә, ԝә бь шабун у әʹдьлайе тʹьжә кә бона ве йәке кӧ һун итʹбарийа хԝә ԝи тиньн. Бәле, бьра пе ԛәԝата рʹӧһʹе пироз гӧмана ԝә дьһа ԛәԝи бә.

14 Бьрано, әз баԝәр ьм кӧ һун бь ԛәнщийе тʹьжә нә у занәбуна ԝә һәйә, у һун дькарьн һәвдӧ ширәт кьн.* 15 Мьн дәрһәԛа һьнә тьшта әшкәрә ԝәрʹа ньвиси, ԝәки әз ван тьшта диса биньмә бира ԝә, чьмки Хԝәде ԛәнщийа мәзьн бона мьн кьрийә, 16 ԝәки әз бьбьмә хьзмәткʹаре Мәсиһ Иса, кӧ мьләтарʹа мьзгинийе бәла кьм. Әз ви шьхӧле пирозда гәләк хирәт ьм, ԝәки әв мьләт бьбьнә ԛӧрбанәкә кӧ ль Хԝәде хԝәш те, йа кӧ бона ԝи бь рʹӧһʹе пироз һатийә пирозкьрьне.

17 Әз ша мә кӧ шагьрте Мәсиһ Иса мә у шьхӧле Хԝәде дькьм. 18 Әзе дәрһәԛа тьштед кӧ мьн кьрьнә, хәбәр нәдьм. Ле әзе тʹәне дәрһәԛа тьштед кӧ Мәсиһ пе мьн кьрийә у готийә, хәбәр дьм, ԝәки али мьләтед дьн бькьм, кӧ әԝана гӧһдарийа ԝи бькьн. 19 Ԝана жь бо нишан у кʹәрәмәтед кӧ бь рʹӧһʹе Хԝәде һатьнә кьрьне, гӧһдари кьрьн. Бь ви щурʹәйи, жь Оршәлиме гьрти һʹәта Илиркуме, мьн бь тʹәмами мьзгинийа дәрһәԛа Мәсиһ бәла кьр. 20 Мьн хԝәрʹа нет дани, кӧ әз мьзгинийе ль щийед кӧ наве Мәсиһ һатийә бьһистьне, бәла нәкьм, чьмки мьн нәдьхԝәст шьхӧле кӧ мәрьвәки дьн дәстпекьрийә, бәрдәԝам кьм.* 21 Чаԝа кӧ Ньвисаред Пирозда те готьне: «Кʹижанарʹа бона ԝи нәһатийә готьне, ԝе бьвиньн у кʹижана нәбьһистийә, ԝе фәʹм бькьн».

22 Жь бо ве йәке, рʹийа мьн гәләк щар дьһатә гьртьне кӧ әз бемә бал ԝә. 23 Ле ньһа мьн хьзмәтийа хԝә ван һәремада хьлаз кьрийә, у ида гәләк* сал ә кӧ әз дьхԝазьм тʹәсәлийа ԝә бькьм. 24 Ләма әз гӧман ьм кӧ гава һәрʹьм Испанйайе, әзе ԝә бьвиньм, әме һьнәк ԝәхт тʹәвайи дәрбаз кьн, у паше һуне мьн вәрʹекьн. 25 Ле ньһа әз рʹе дькʹәвьм кӧ һәрʹьм Оршәлиме, ԝәки аликʹарийе бьдьмә бьра.* 26 Бьред Макәдонйайеда у Ахайайеда ша бун, ԝәки аликʹарийе* бьдьнә бьред Оршәлимеда, йед кӧ кʹәсиб ьн. 27 Бәле, ԝана әв йәк бь дьл у щан кьр. Бь рʹасти, әԝана дәйндаред ԝан бун, чьмки бьред Оршәлимеда тʹәви ԝан бьра тьштед рʹӧһʹани пʹарәвәкьрьбун. Ләма әԝ бьра жи гәрәке алийе һәбукеда кʹомәке бьдьнә бьред Оршәлимеда. 28 Гава әз ван ԛӧрбанкьрьна бьгьһиньмә ԝан, әзе һәрʹьм Испанйайе у рʹеда әзе сәрики ԝә хьм. 29 Әз заньм кӧ гава әз бьгьһижьмә ԝә, әзе тʹер-тʹьжә кʹәрәмед Мәсиһ ԝәрʹа биньм.

30 Бьрано, бь сайа баԝәрийа ԝә һьндава Хӧдане мә Иса Мәсиһ у һʹәзкьрьна кӧ рʹӧһʹе пироз дьдә, әз һиви жь ԝә дькьм кӧ һун тʹәви мьн жь дьл бона мьн Хԝәдерʹа дӧа бькьн. 31 Дӧа бькьн кӧ әз жь дәсте нәбаԝәрмәндед кӧ Щьһустанеда ньн, хьлаз бьм, у ԝәки бьред ль Оршәлиме әв ԛӧрбанкьрьнед кӧ әз тиньм бь шабун ԛәбул кьн. 32 Һьнге, һәрге хԝәстьна Хԝәде бә, әзе бь шабун бемә щәм ԝә у әме һәвдӧ ԛәԝи кьн. 33 Бьра Хԝәдайе кӧ әʹдьлайе дьдә, тʹәви ԝә һʹәмуйа бә. Амин.

16 Әз дьхԝазьм кӧ һун хушка мә Фойбе ԛәбул кьн, йа кӧ щьвата Кәнхерйайеда хьзмәт дькә. 2 Жь кʹәрәма хԝә ԝе ӧса ԛәбул кьн, чаԝа лайиԛи хьзмәткʹаред* Хӧдан ә. Һәрге әԝ һʹәԝще тьштәки бә, али ԝе бькьн, чьмки әԝе аликʹари дайә* гәләка, ӧса жи мьн.

3 Сьлаве бьдьнә Прискайе у Әкила, һәвалкʹаред мьн шьхӧле Мәсиһ Исада. 4 Ԝана бона мьн әʹмьре хԝә кьрьнә бьн хофе, у нә кӧ тʹәне әз жь ԝан рʹази мә, ле тʹәмамийа щьватед мьләтед дьн жи. 5 У щьвата мала ԝанда жи сьлав кьн. Апенәтойе һәвале мьни дәлал жи сьлав кьн. Апенәто йәк жь ԝан мәрьвед пешьн бу, йед кӧ Асйайеда бунә шагьртед Мәсиһ. 6 Сьлаве бьдьнә Мәрйәме, йа кӧ бона ԝә гәләк хәбьтийә. 7 Сьлаве бьдьнә Әндронко у Йунйас. Әԝана мәрьвед мьн ьн у тʹәви мьн гьрти бун. Шанди ԝана рʹьнд нас дькьн, у әԝана гәләк сал пешийа мьн бунә шагьртед Мәсиһ.

8 Сьлаве бьдьнә Әмплийато һәвале мьни дәлал, кӧ шагьрте Хӧдан ә. 9 Сьлаве бьдьнә Урбано. Әԝ шьхӧле Мәсиһда һәвалкʹаре мә йә, у ӧса жи сьлаве бьдьнә һәвале мьни дәлал Стахо. 10 Сьлаве бьдьнә Апелис, ԛәбулкьрийе Мәсиһ. Сьлаве бьдьнә нәфәред мала Аристополо. 11 Сьлаве бьдьнә мәрьве мьн Һеродийон. Сьлаве бьдьнә нәфәред мала Нәркисо, йед кӧ шагьртед Мәсиһ нә. 12 Сьлаве бьдьнә Трифинайе у Трифосайе. Әв хушк бь кʹәдәкә мәзьн бона Хӧдан шьхӧл дькьн. Сьлаве бьдьнә хушка мәйә дәлал Пәрсисе, чьмки әԝе бь кʹәдәкә мәзьн бона Хӧдан шьхӧл кьрийә. 13 Сьлаве бьдьнә Рʹуфо, бьжартийе Хӧдан. У сьлаве бьдьнә дийа ԝи жи, әԝ бона мьн жи ча де бу. 14 Сьлаве бьдьнә Асинкрито, Флегон, Һәрмес, Патробас, Һәрмас у бьред кӧ тʹәви ԝан ьн. 15 Сьлаве бьдьнә Филолого, Йулийа, Неройис у хушка ԝи, ӧса жи Олимпас у һʹәму бьред* кӧ тʹәви ԝан ьн. 16 Бь дьлгәрми* һәвдӧ сьлав кьн. Һʹәму щьватед Мәсиһ ԝә сьлав дькьн.

17 Бьрано, әз жь ԝә рʹәща дькьм, кӧ һун һаж кәсед ӧса һәбьн, йед кӧ дӧтирәтийе пешда тиньн, баԝәрийа кәсед дьн сьст дькьн у мьԛабьли ԝе һинкьрьне рʹадьбьн, йа кӧ һун һин бунә. Хԝә жь кәсед ӧса дур бьгьрьн. 18 Чьмки кәсед ӧса нә кӧ хӧламед Хӧдане мә Мәсиһ нә, ле хӧламед хԝәстьнед хԝә нә. Әԝана бь гьлийе хԝәш у хәбәрдана ширьн мәрьвед дьле хԝәйи сах дьхапиньн. 19 Һәр кәс занә ԝәки һун мәрьвнә гӧһдар ьн, у әз ве йәкерʹа гәләк ша мә. Әз дьхԝазьм кӧ һун билан бьн у тьштед ԛәнщ бькьн, бесущ бьн у хԝә жь хьрабийе дур бьгьрьн. 20 Хԝәдайе кӧ әʹдьлайе дьдә, ԝе зутьрәке Шәйтʹан бьне ньгед ԝәда бьһʹьнщьрʹинә. Бьра кʹәрәма Хӧдане мә Иса, тʹәви ԝә бә.

21 Һәвалкʹаре мьн Тимотʹейо ԝә сьлав дькә. Мәрьвед мьн Лукйо, Йасон у Соспатро жи ԝә сьлав дькьн.

22 Әз Тәртийо, бь дәсте кʹижани әв нәʹмә һатә ньвисаре, ԝә бь наве Хӧдан сьлав дькьм.

23 Гайос жи йе кӧ әз ча меван ԛәбул кьрьмә, мала кʹижанида щьват тʹоп дьбә, әԝ жи ԝә сьлав дькә. Ерасто, йе кӧ бона хьзна бажер щабдар ә у бьре ԝи Кьԝарто жи ԝә сьлав дькьн. 24* ——

25 Хԝәде дькарә бь сайа мьзгинийа кӧ әз бәла дькьм у бь хәбәра дәрһәԛа Иса Мәсиһ, ԝә ԛәԝи кә. Әв хәбәр әшкәрәкьрьна сӧрʹа пирозва гьредайи йә, йа кӧ ԝәхтәкә дьреж вәшарти бу. 26 Ле ньһа әв сӧрʹ әшкәрә буйә. Бь сайа Ньвисаред пʹехәмбәртийе һʹәму мьләт әв сӧрʹа пироз пеһʹәсийан. Хԝәдайе мәйи һʹәта-һʹәтайе тʹәми да, кӧ әв сӧрʹ нав мьләтада әшкәрә бә, сәва кӧ әԝана баԝәр кьн у гӧрʹа ԝи бькьн. 27 Бьра Хԝәдерʹа, йе кӧ тʹәк билан ә, рʹумәт бе дайине һʹәта-һʹәтайе бь сайа Иса Мәсиһ. Амин.